1. Ée Adámu kpó Ɛvu kpó hu hwɛ gúdo tlóló é ɔ, étɛ́ Jehovah ka wa? (Bǐbɛ́mɛ 3:15)

 ADÁMU kpó Ɛvu kpó hu hwɛ gúdo tlóló é ɔ, Jehovah gbɔn nǔɖɔɖayǐ tají ɖokpó gblamɛ dó dó nukúnɖíɖó sín akpá nú kúnkan yětɔn lɛ́. Nǔ e é ɖɔ ɖo Bǐbɛ́mɛ 3:15, nwt mɛ é wɛ.—Xa.

2. Aniwú nǔɖɔɖayǐ énɛ́ ka ɖo tají?

² Wěma nukɔntɔn Biblu tɔn mɛ wɛ nǔɖɔɖayǐ ɔ tɔ́n ɖe. É ɖo mɔ̌ có, wěma Biblu tɔn e kpo lɛ́ é bǐ wɛ cá kan xá nǔɖɔɖayǐ énɛ́ ɖo ali ɖé alǒ ɖěvo nu. Lěe nyɛ̌ví nɔ dɔn avɔxwɛ lɛ́ ɖó bǔ gbɔn é ɔ, mɔ̌ wɛ xó ɖěɖěe ɖo Bǐbɛ́mɛ 3:15 mɛ lɛ́ é dɔn xó e ɖo wěma Biblu tɔn lɛ́ ɖokpó ɖokpó mɛ é ɖó bǔ, b’ɛ nyí wɛn ɖokpó gbɔn é nɛ́; wɛn énɛ́ wɛ nyí ɖɔ Mɛhwlɛ́ngántɔ́ ɖé ná sú Awǒvi kpó ahwan tɔn lɛ́ kpó bǐ sín kún dó. * Nyɔ̌ná jí wǔ ɖé wɛ énɛ́ ná nyí nú mɛ ɖěɖěe yí wǎn nú Jehovah lɛ́ é!

3. Étɛ́ lɛ́ jí mǐ ka ná ɖɔ xó dó ɖo xóta élɔ́ mɛ?

³ Ðo xóta élɔ́ mɛ ɔ, mǐ ná ba xósin nú nǔkanbyɔ́ élɔ́ lɛ́ e kúnkplá nǔɖɔɖayǐ e ɖo Bǐbɛ́mɛ 3:15 mɛ é: Mɛ̌ mɛ̌ e wú è ka ɖɔ xó dó ɖ’é mɛ? Nɛ̌ nǔɖɔɖayǐ ɔ ka jɛnu gbɔn? Nɛ̌ mǐ ka ɖo le tɔn ɖu wɛ gbɔn?

4. Mɛ̌ ka nyí “dan” ɔ? Nɛ̌ mǐ ka wa gbɔn bo tuun?

⁴ Bǐbɛ́mɛ 3:14, 15 ɖɔ xó dó “dan” ɖokpó, “kúnkan” dan ɔ tɔn, “nyɔ̌nu” ɖokpó kpó “kúnkan” nyɔ̌nu ɔ tɔn kpó wú. Biblu d’alɔ mǐ, bɔ mǐ tuun yě mɛ ɖokpó ɖokpó. * Mǐ  ní bɛ́sín “dan ɔ” jí. Dan jɔ dan ɖé sixú mɔ nǔ jɛ nǔ e Jehovah ɖɔ ɖo jikpá Edɛ́ni tɔn mɛ é wú ǎ. Énɛ́ wú ɔ, mɛ e ɖó hwɛ ná wɛ Jehovah ɖe é ɔ, nǔɖíɖó nǔnywɛ́tɔ́ ɖé jɛ́n é ná ko nyí. Mɛ̌ wú ɖɔ xó dó wɛ Jehovah ka ɖe tawun? Nǔɖexlɛ́mɛ 12:9 ɖe mɛ e dan ɔ nyí é xlɛ́ vaan. Ðo fínɛ́ ɔ, è ɖe xlɛ́ nyi wɛn ɖɔ “dan xóxó” ɔ wɛ nyí Satáan Awǒvi. Amɔ̌, mɛ̌ mɛ̌ e ka nyí kúnkan dan ɔ tɔn?

5. Mɛ̌ mɛ̌ e ka ɖo kúnkan dan ɔ tɔn mɛ?

⁵ Hweɖélɛ́nu ɔ, Biblu nɔ zán xókwín kúnkan dó dó gesí mɛ ɖěɖěe nɔ xwedó kpɔ́ndéwú mɛɖé tɔn pɛ́pɛ́pɛ́, káká bɔ è sixú ɖɔ ɖɔ vǐ tɔn lɛ́ wɛ yě nyí é. Hǔn, wɛnsagun gbejímanɔtɔ́ lɛ́ kpó mɛ ɖěɖěe nɔ fɔ́n gǔ dó Jehovah Mawu jí, lobo nɔ lɛ́ klán gbe xá togun tɔn Satáan ɖɔhun lɛ́ é ɖo kúnkan dan ɔ tɔn mɛ. Wɛnsagun e gosín jǐxwé Nɔwée hwenu lɛ́ é káká jɛ mɛ nyanya ɖěɖěe nɔ wa nǔ tɔ́ yětɔn Awǒvi ɖɔhun lɛ́ é jí ɖo mɛ énɛ́ lɛ́ mɛ.—Bǐb. 6:1, 2; Jaan 8:44; 1 Jaan 5:19; Ju. 6.

6. Aniwú Ɛvu ma ka sixú nyí “nyɔ̌nu ɔ” ǎ?

⁶ Din ɔ, mǐ ní kpɔ́n mɛ e nyí “nyɔ̌nu ɔ” é. É sixú nyí Ɛvu ǎ. Étɛ́wú? Hwɛjijɔ e xlɛ́ mɔ̌ é ɖokpó kpowun ɖíe. Nǔɖɔɖayǐ ɔ ɖɔ ɖɔ kúnkan nyɔ̌nu ɔ tɔn ná “só” dan ɔ sín ta. Lěe mǐ ko ɖɔ gbɔn wá yi é ɔ, wɛnsagun nyanya e nɔ nyí Satáan é wɛ nyí dan ɔ, bɔ gbɛtɔ́ hwɛhutɔ́ ɖě ɖó nǔwúkpíkpé ɔ bo ná sú kún tɔn dó ǎ. Énɛ́ wú ɔ, nɛ̌ è ka ná sú kún tɔn dó gbɔn?

7. Lěe Nǔɖexlɛ́mɛ 12:1, 2, 5, 10 ɖe xlɛ́ gbɔn é ɔ, mɛ̌ ka nyí nyɔ̌nu e xó è ɖɔ ɖo Bǐbɛ́mɛ 3:15 mɛ é?

⁷ Wěma gǔdo tɔn Biblu tɔn ɖe mɛ e nyí nyɔ̌nu e xó è ɖɔ ɖo Bǐbɛ́mɛ 3:15 mɛ é xlɛ́. (Xa Nǔɖexlɛ́mɛ 12:1, 2, 5, 10.) Nyɔ̌nu e ɖo ayǐkúngban ɔ jí é ɖě wɛ ǎ!  Sun ɖo afɔ tɔn lɛ́ glɔ́, bɔ sunví wěwe ɖo axɔ́súgbákún e ɖo ta tɔn é wú. É ji vǐ bǔnɔ ɖé ɖo nǔjlɛ́dónǔwú linu; vǐ énɛ́ wɛ nyí Axɔ́súɖuto Mawu tɔn. Ðó jǐxwé wɛ Axɔ́súɖuto ɔ ɖe wútu ɔ, jǐxwé wɛ nyɔ̌nu ɔ lɔ ɖó ná ɖe. Nyɔ̌nu ɔ nɔ te nú tutoblónúnǔ Jehovah tɔn sín akpáxwé e ɖo jǐxwé, bɔ wɛnsagun gbejínɔtɔ́ lɛ́ ɖ’é mɛ é.—Ga. 4:26.

8. Mɛ̌ ka nyí kúnkan nyɔ̌nu ɔ tɔn sín akpáxwé tají ɔ? Hwetɛ́nu é ka húzú akpáxwé tají ɔ? (Bǐbɛ́mɛ 22:15-18)

⁸ Xó Mawu tɔn lɛ́ d’alɔ mǐ bɔ mǐ tuun kúnkan nyɔ̌nu ɔ tɔn sín akpáxwé tají ɔ. Kúnkan Ablaxámu tɔn mɛ wɛ kúnkan énɛ́ ɖó ná gosín. (Xa Bǐbɛ́mɛ 22:15-18.) Lěe nǔɖɔɖayǐ ɔ ɖe xlɛ́ gbɔn é ɔ, kúnkan nya gbejínɔtɔ́ énɛ́ tɔn mɛ wɛ Jezu gosín tlɔlɔ. (Luk. 3:23, 34) Amɔ̌, kúnkan énɛ́ ɖó ná ɖó agbɔ̌n tawun hú gbɛtɔ́ ɖokpó, ɖó é ná sú Satáan Awǒvi sín kún dó, bɔ é sɔ́ ná tíin ǎ. Énɛ́ wú ɔ, hwenu e Jezu ɖo xwe 30 mɔ̌ ɖó wɛ é ɔ, Mawu zán gbigbɔ mímɛ́ tɔn dó sɔ́ ɛ. Ée gbigbɔ mímɛ́ sɔ́ Jezu gúdo é ɔ, é húzú kúnkan nyɔ̌nu ɔ tɔn sín akpáxwé tají ɔ. (Ga. 3:16) Ðo kú Jezu tɔn kpó fínfɔ́n sín kú tɔn kpó gúdo ɔ, è “sɔ́ susu kpódó yɛ̌yi kpán sín axɔ́súgbákún xwe n’i,” bo “ná [ɛ] acɛ e ɖo jǐnukúnsin, kpódó ée ɖo ayǐkúngban jí ɔ kpó bǐ;” acɛ e é ná zán dó “sú Awǒvi sín nǔwiwa lɛ́ sín kún dó” é lɔ ɖo acɛ énɛ́ mɛ.—Ebl. 2:7; Mat. 28:18; 1 Jaan 3:8.

9-10. (a) Mɛ ɖěvo tɛ́ lɛ́ ka lɛ́ ɖo kúnkan nyɔ̌nu ɔ tɔn mɛ? Hwetɛ́nu yě ka nɔ húzú kúnkan nyɔ̌nu ɔ tɔn? (b) Étɛ́ lɛ́ mǐ ka ná gbéjé kpɔ́n bɔ d’é wú?

⁹ Gbɔn vo nú Jezu ɔ, mɛ ɖěvo lɛ́ lɔ ná lɛ́ húzú kúnkan nyɔ̌nu ɔ tɔn. Mɛsɛ́dó Pɔ́lu dó gesí akpáxwé kúnkan ɔ tɔn énɛ́, hwenu e é ɖɔ xó dó Jwifu kpó mɛ e ma nyí Jwifu ǎ bɔ gbigbɔ mímɛ́ sɔ́ lɛ́ é kpó wú é, bo ɖɔ: “Ényí mi nyí Klísu tɔn hǔn, mi nyí Ablaxámu ví, bɔ nǔ ɖagbe e sín akpá Mawu dó nú Ablaxámu ɔ, mi ná mɔ yí.” (Ga. 3:28, 29) Ényí Jehovah sɔ́ klisánwun ɖé kpó gbigbɔ mímɛ́ tɔn kpó ɔ, mɛ énɛ́ e é sɔ́ é nɔ húzú kúnkan nyɔ̌nu ɔ tɔn. Hǔn, Jezu Klísu kpó mɛ 144000 e ná kp’acɛ xá ɛ lɛ́ é kpó wɛ ɖo kúnkan énɛ́ ɔ mɛ. (Nǔɖe. 14:1) Yě mɛ énɛ́ lɛ́ bǐ wɛ nɔ tɛ́n kpɔ́n, bo nɔ lin nǔ lobo nɔ lɛ́ wa nǔ Tɔ́ yětɔn Jehovah Mawu ɖɔhun.

¹⁰ Din e mǐ ko mɔ mɛ ɖěɖěe xó è ɖɔ ɖo Bǐbɛ́mɛ 3:15 mɛ lɛ́ é ɔ, mi nú mǐ ní vɔ́ lěe Jehovah bló gbɔn bɔ nǔɖɔɖayǐ énɛ́ ɖo jijɛnu wɛ kpɛɖé kpɛɖé é kpó lěe mǐ ɖo le tɔn ɖu wɛ gbɔn é kpó gbéjé kpɔ́n kléwún.

11. Ali tɛ́ nu è ka hɛn aɖǔ kúnkan nyɔ̌nu ɔ tɔn “dó afɔgbɛnnu” ɖe?

¹¹ Sɔgbe xá nǔɖɔɖayǐ e ɖo Bǐbɛ́mɛ 3:15 mɛ é ɔ, dan ɔ ná hɛn aɖǔ kúnkan nyɔ̌nu ɔ tɔn “dó afɔgbɛnnu.” Nǔɖɔɖayǐ énɛ́ jɛnu hwenu e Satáan sísɛ́ Jwifu lɛ́ kpó Hlɔ̌manu lɛ́ kpó bɔ yě hu Vǐ Mawu tɔn é. (Luk. 23:13, 20-24) Lěe akpa e mɛɖé jɛ dó afɔgbɛnnu é sixú zɔ́n bɔ é gɔn zɔnlin ɖi nú hwenu ɖé gbɔn é ɔ, mɔ̌ wɛ Jezu ma sɔ́ sixú kpé wú bo wa nǔ ɖě hwenu e é kú bo ɖo yɔdo mɛ é ǎ é gbɔn.—Mat. 16:21.

12. Nɛ̌ è ka ná só ta dan ɔ tɔn gbɔn? Hwetɛ́nu nǔ ka ná nyí mɔ̌?

¹² Nǔɖɔɖayǐ e ɖo Bǐbɛ́mɛ 3:15 mɛ é xlɛ́ ɖɔ Jezu kún ná dɔn cí yɔdo mɛ ó. Étɛ́wú? Ðó sɔgbe xá nǔɖɔɖayǐ ɔ ɔ, kúnkan nyɔ̌nu ɔ tɔn wɛ ná só dan ɔ sín ta. Énɛ́ xlɛ́ ɖɔ è ɖó ná fɔ́n Jezu sín kú. Nǔ e ka jɛ nǔgbó é nɛ́! Jezu kú bɔ é bló azǎn atɔn gúdo é ɔ, é fɔ́n sín kú, bo húzú  nǔɖíɖó gbigbɔ tɔn e ma sɔ́ ná kú ǎ é ɖé. Hwenu e Mawu ɖó dó é su ɔ, Jezu ná sú Satáan sín kún dó. (Ebl. 2:14) Klísu kpó mɛ ɖěɖěe ná kp’acɛ xá ɛ lɛ́ é kpó ná sú kɛntɔ́ Mawu tɔn lɛ́ bǐ sín kún dó sín ayǐkúngban jí; kɛntɔ́ énɛ́ lɛ́ wɛ nyí kúnkan dan ɔ tɔn.—Nǔɖe. 17:14; 20:4, 10. *

13. Nɛ̌ mǐ ka ɖo jijɛnu nǔɖɔɖayǐ énɛ́ tɔn sín le ɖu wɛ gbɔn?

¹³ Ényí mɛsɛntɔ́ Mawu tɔn wɛ nú we hǔn, a ko ɖo jijɛnu nǔɖɔɖayǐ énɛ́ tɔn sín le ɖu wɛ nɛ́. Jezu ɖe jijɔ Tɔ́ tɔn tɔn lɛ́ xlɛ́ bɔ nǔ bǐ vɔ ɖ’é wú hwenu e é wá ayǐkúngban jí é. (Jaan 14:9) Énɛ́ wú ɔ, nǔ kplɔ́nkplɔ́n dó Jezu wú zɔ́n bɔ mǐ wá tuun Jehovah Mawu, bo lɛ́ yí wǎn n’i. Ali e xlɛ́ agun klisánwun tɔn ɔ wɛ Jezu ɖe ɖo égbé é zɔ́n bɔ mǐ nɔ lɛ́ ɖu le nǔkplɔ́nmɛ tɔn lɛ́ kpó alixlɛ́mɛ tɔn lɛ́ kpó tɔn. É kplɔ́n mǐ lěe mǐ ná zán gbɛ gbɔn bɔ nǔ mǐtɔn ná nyɔ́ Jehovah nukúnmɛ é. Gɔ́ ná ɔ, mǐ bǐ sixú ɖu le kú e Jezu kú é tɔn, énɛ́ wɛ nyí aɖǔ e è hɛn afɔgbɛnnu tɔn é. Gbɔn nɛ̌ é? Ée è fɔ́n Jezu sín kú gúdo é ɔ, Jehovah yí gbe nú vɔ̌ maɖóblɔ̌ e Vǐ tɔn sá, dó “lɛ mǐ wé sín hwɛ mǐtɔn lɛ́ bǐ mɛ é.”—1 Jaan 1:7.

14. Gbɛtɔ́ lɛ́ ɖó ná ɖó nukún ɖɔ nǔ e è ɖɔ ɖ’ayǐ ɖo Edɛ́ni é ná jɛnu afɔjí afɔjí wɛ a? Tínmɛ.

¹⁴ Xó e Jehovah ɖɔ ɖo Edɛ́ni é xlɛ́ ɖɔ é ná tó bló táan ɖé hwɛ̌ cóbɔ nǔɖɔɖayǐ ɔ ná jɛnu bǐ mlɛ́mlɛ́. É ná byɔ́ hwenu ɖo nyɔ̌nu ɔ sí cóbɔ é ná xo kúnkan e sín akpá è dó é kplé; é ná byɔ́ hwenu ɖo Awǒvi ɖésú sí cóbɔ é ná xo mɛ tɔn lɛ́ kplé. Mɔ̌ jɛ́n é ná lɛ́ byɔ́ hwenu cóbɔ kɛn (alǒ wǎngbɛ́númɛ) e ɖo gbɛ̌ta we lɛ́ tɛ́ntin é ná vun kan. Nukúnnú mimɔ jɛ nǔɖɔɖayǐ énɛ́ mɛ nɔ d’alɔ mǐ, ɖó é nɔ gb’akpá nú mǐ ɖɔ gbɛ e nu kpa acɛ dó wɛ Satáan ɖe é ná gbɛ́ wǎn nú mɛsɛntɔ́ Jehovah tɔn lɛ́. Jezu gba akpá mɔ̌hun ɖé nú ahwanvú tɔn lɛ́ ɖo nukɔnmɛ. (Mak. 13:13; Jaan 17:14) É ɖo wɛn ɖɔ, mǐ ɖo lěe nǔɖɔɖayǐ ɔ sín akpáxwé énɛ́ ɖo jijɛnu gbɔn wɛ é mɔ wɛ, tají ɔ, ɖo xwe 100 e mǐ dó gǔdo wá yi din lɛ́ é mɛ. Gbɔn nɛ̌ é?

15. Étɛ́wú wǎn e gbɛ ɔ gbɛ́ nú kúnkan nyɔ̌nu ɔ tɔn é ka lɛ́ jɛjí? Aniwú mǐ ma ka ɖó hwɛjijɔ ɖěbǔ bo ná ɖi xɛsi nú Satáan ǎ?

¹⁵ Ée è sɔ́ Jezu b’ɛ húzú Axɔ́sú ɖo 1914 gúdo tlóló é ɔ, è nya Satáan sín jǐxwé dó ayǐkúngban jí. Din ɔ, é sɔ́ sixú kpé wú bo lɛ́ kɔ yi jǐxwé ǎ, bo ɖo te kpɔ́n kún e è ná sú dó n’i é. (Nǔɖe. 12:9, 12) Amɔ̌, é ɖo te xwíí ǎ. Xomɛ sin Satáan tawun, b’ɛ ɖo ahwan tɔ́n togun Mawu tɔn wɛ. (Nǔɖe. 12:13, 17) Énɛ́ wú wɛ wǎn e gbɛ ɔ gbɛ́ nú togun Mawu tɔn é lɛ́ jɛjí. Amɔ̌, mǐ ɖó hwɛjijɔ ɖěbǔ bo ná ɖi xɛsi nú Satáan kpó ahwan tɔn lɛ́ kpó ǎ. É nyɔ́ wa ɔ, mǐ sixú ɖó gǎnjɛwú ɖokpó ɔ mɛsɛ́dó Pɔ́lu e wlán xó élɔ́ lɛ́ é ɖɔhun: “Ényí Mawu ɖo mǐ jí ɔ, mɛ ɖěbǔ sixú wa nǔ ɖěbǔ nú mǐ ǎ.” (Hlɔ̌. 8:31) Mǐ sixú ɖeji bǐ mlɛ́mlɛ́ dó Jehovah wú, ɖó lěe mǐ ko mɔ gbɔn é ɔ, nǔɖɔɖayǐ e ɖo Bǐbɛ́mɛ 3:15 mɛ é gěgé ko jɛnu.

16-18. Nɛ̌ Curtis, Ursula, kpó Jessica kpó ka ɖu le nukúnnú e yě mɔ jɛ Bǐbɛ́mɛ 3:15 mɛ é tɔn gbɔn?

¹⁶ Akpá e Jehovah dó bɔ é ɖo Bǐbɛ́mɛ 3:15 mɛ é sixú d’alɔ mǐ bɔ mǐ ná ɖí xwi xá mɛtɛ́nkpɔ́n ɖěbǔ e mǐ ná mɔ ɖo gbɛzán mǐtɔn mɛ é. Curtis, éé nyí mɛsɛ́dó ɖo Guam é ɖɔ: “Un ɖí xwi xá mɛtɛ́nkpɔ́n lɛ́ kpó awakanmɛ kú mɛ kpó hweɖélɛ́nu wá yi, bɔ énɛ́ tɛ́n gbejí e un ɖe nú Jehovah é  kpɔ́n. Amɔ̌, tamɛ linlin dó nǔɖɔɖayǐ e ɖo Bǐbɛ́mɛ 3:15 mɛ é jí d’alɔ mì bɔ un kpo ɖo jiɖe ɖó dó Tɔ́ ce jǐxwé tɔn ɔ wú wɛ.” Curtis ɖo nukún ɖó azǎn e gbe Jehovah ná ɖó nǔ mɛtɛ́nkpɔ́n mǐtɔn lɛ́ bǐ nu é wɛ.

¹⁷ Nɔví nyɔ̌nu ɖokpó nɔ nyí Ursula, bo nɔ nɔ Baviaire, bo ɖɔ ɖɔ nukúnnú mimɔ jɛ Bǐbɛ́mɛ 3:15 mɛ d’alɔ émí bɔ émí kú d’é jí ɖɔ Biblu ɔ Mawu gɔ́n wɛ é gosín. É mɔ lěe nǔɖɔɖayǐ ɖěvo lɛ́ bǐ cá kan xá nǔɖɔɖayǐ énɛ́ gbɔn é, b’ɛ jí wǔ n’i tawun. É lɛ́ ɖɔ: “Hwenu e un kplɔ́n ɖɔ Jehovah wa nǔɖé afɔjí afɔjí dó ná mǐ nukúnɖíɖó é ɔ, énɛ́ byɔ́ lanmɛ nú mì tawun.”

¹⁸ Jessica e nɔ nɔ Micronésie é ɖɔ: “Un kpo ɖo lěe nǔ cí nú mì azɔn nukɔntɔn e un mɔ ɖɔ un mɔ nǔgbó ɔ é flín wɛ! Nǔɖɔɖayǐ e ɖo Bǐbɛ́mɛ 3:15 mɛ é ko ɖo jijɛnu wɛ. É d’alɔ mì bɔ un nɔ flín ɖɔ wǔvɛ́ e mɔ wɛ mǐ ɖe ɖo égbé lɛ́ é ɔ, é kún nyí nǔ e ba nú mǐ wɛ Jehovah ɖe é nɛ́ ó. Nǔɖɔɖayǐ énɛ́ lɛ́ ná hlɔ̌nhlɔ́n kán e un kán ɖ’é jí ɖɔ un ná ɖu gbɛ e nyɔ́ hú gǎn é ɖé sín vǐví din, bɔ ɖo sɔgúdo ɔ, ná ɖu gbɛ e tlɛ lɛ́ nyɔ́ hú gǎn énɛ́ é sín vǐví é.”

19. Étɛ́wú mǐ ka sixú kú d’é jí ɖɔ akpáxwé gǔdo tɔn nǔɖɔɖayǐ ɔ tɔn ná jɛnu?

¹⁹ Lěe mǐ ko mɔ gbɔn é ɔ, Bǐbɛ́mɛ 3:15 ɖo jijɛnu wɛ din. È mɔ nǔ jɛ kúnkan nyɔ̌nu ɔ tɔn kpó kúnkan dan ɔ tɔn kpó wú vaan. Wǔ e è gblé Jezu e nyí kúnkan nyɔ̌nu ɔ tɔn sín akpáxwé tají ɔ d’afɔgbɛnnu é ko kú, bɔ din ɔ, é nyí Axɔ́sú susunɔ e ma sɔ́ ná kú ǎ é. Din ɔ, Jehovah ko ɖibla sɔ́ mɛ ɖěɖěe ná kp’acɛ xá Vǐ tɔn ɖo jǐxwé lɛ́ é kpé. Ðó akpáxwé nukɔntɔn nǔɖɔɖayǐ ɔ tɔn ko jɛnu wútu ɔ, mǐ ɖó hwɛjijɔ e wú mǐ ná kú d’é jí ɖɔ akpáxwé gǔdo tɔn e ɖo ta dan ɔ tɔn sísó nyí wɛ é lɔ ná jɛnu lɛ́ é bǐ. Hwenu e è ná ko sú Satáan sín kún dó gúdo é ɔ, dǒ nukún lě do agbɔ̌n gbɛtɔ́ gbejínɔtɔ́ lɛ́ tɔn ná jɛ do sɔ é mɛ kpɔ́n! Dɛ káká jɛ vivɔnu. Mɛ ɖejidéwú wɛ Mawu mǐtɔn nyí. É ná gbɔn kúnkan nyɔ̌nu ɔ tɔn jí, bo ná kɔn nyɔ̌ná maxamaxa lɛ́ dó “akɔta e ɖo ayǐkúngban jí lɛ́” é bǐ jí.—Bǐb. 22:18.