1. Ali tɛ́ nu klisánwun lɛ́ ka ɖó ná cí atín lɛ́ ɖɔhun ɖe? (Lɛ̌ kpɔ́n fɔtóo ɔ.)

 A KA ɖ’ayi lěe agɔntín ɖé nɔ wa nǔ gbɔn ɖo jɔhɔn syɛ́nsyɛ́n nu é wú kpɔ́n a? É nɔ nya, amɔ̌, é ka nɔ lɔ́ ǎ. Énɛ́ kplɔ́n mǐ nǔwúkpíkpé tají e atín ɖé lɛ́ ɖó, bɔ ényí jɔhɔn syɛ́nsyɛ́n na bo tlɛ nyi ɔ, yě ma nɔ lɔ́ ǎ é; énɛ́ wɛ nyí ɖɔ yě nɔ húzú sɔgbe xá ninɔmɛ lɛ́. Mǐ lɔ ɖó ná nɔ húzú sɔgbe xá ninɔmɛ lɛ́ hwenu e nǔ lɛ́ fɔ́n bo ɖo nylǎnylá d’é jí wɛ ɖo gbɛzán mǐtɔn mɛ é, bá dó kpo ɖo Jexóva sɛn wɛ kpó awǎjijɛ kpó. Gbɔn nɛ̌ é? Ényí mǐ nɔ húzú sɔgbe xá hǔzúhúzú e nɔ wá xwetɔ́n ɖo gbɛzán mǐtɔn mɛ lɛ́ é, bo nɔ ɖó sísí nú linlin mɛ ɖěvo lɛ́ tɔn kpó gbeta yětɔn lɛ́ kpó hǔn, jlɛ̌ jí nɔ wɛ mǐ ɖe mɔ̌ nɛ́.

2. Jijɔ tɛ́ lɛ́ ka ná d’alɔ mǐ bɔ mǐ ná nɔ húzú sɔgbe xá hǔzúhúzú lɛ́? Étɛ́ lɛ́ jí mǐ ka ná ɖɔ xó dó ɖo xóta élɔ́ mɛ.

² Ðó mǐ nyí mɛsɛntɔ́ Jexóva tɔn lɛ́ wútu ɔ, mǐ nɔ ba ná nɔ jlɛ̌ jí. Mǐ nɔ lɛ́ ba bo ná nɔ sɔ́ mǐɖée hwe, lobo ná nɔ lɛ́ se wǔvɛ́ xá mɛ. Ðo xóta élɔ́ mɛ ɔ, mǐ ná mɔ lěe jijɔ énɛ́ lɛ́ d’alɔ klisánwun ɖé lɛ́, bɔ yě ɖí xwi xá hǔzúhúzú e wá xwetɔ́n ɖo gbɛzán yětɔn mɛ lɛ́ é gbɔn é. Mǐ ná lɛ́ mɔ lěe jijɔ énɛ́ lɛ́ sixú d’alɔ mǐ gbɔn é. Amɔ̌ jɛ nukɔn hwɛ̌ ɔ, mi nú mǐ ní kpɔ́n lěe Jexóva kpó Jezu kpó sɔ́ kpɔ́ndéwú maɖóblɔ̌ ɖé ɖ’ayǐ ɖo jlɛ̌jíninɔ linu gbɔn é.

3. Nɛ̌ mǐ ka wa gbɔn bo tuun ɖɔ Jexóva nɔ nɔ jlɛ̌ jí?

³ È ylɔ́ Jexóva ɖɔ “Só ɔ,” ɖó nǔɖé nɔ sɛ do n’i ǎ. (Sɛ́n. 32:4) É ɖo mɔ̌ có, é ka nɔ lɛ́ nɔ jlɛ̌ jí. Ðó nǔ lɛ́ ɖo hǔzúhúzú wɛ ɖo gbɛ ɔ mɛ wútu ɔ, Jexóva nɔ húzú sɔgbe xá ninɔmɛ lɛ́, bo nɔ tɛ́n kpɔ́n bo nɔ bló bónú akpá e é dó lɛ́ é bǐ ná jɛnu. Jexóva dá gbɛtɔ́ ɖo akpajlɛ́ éɖésúnɔ tɔn mɛ, bɔ é ɖó nǔwúkpíkpé ɔ bo sixú húzú sɔgbe xá hǔzúhúzú e nɔ wá xwetɔ́n lɛ́ é. Mǐ nɔ mɔ nǔgbódodó ɖěɖěe nɔ d’alɔ mǐ bɔ mǐ nɔ wá gbeta e nǔnywɛ́ kpé lɛ́ é kɔn lɛ́ é ɖo Biblu mɛ, mǐ ná bo ɖo wǔvɛ́ ɖěbǔ mɔ wɛ ɔ nɛ́. Kpɔ́ndéwú e Jexóva ɖésúnɔ mɛtún ɔ sɔ́ ɖ’ayǐ é kpó nǔgbódodó ɖěɖěe é ná mǐ lɛ́ é kpó nyí kúnnuɖenú e xlɛ́ ɖɔ é nyí “Só ɔ” có, é ka nɔ lɛ́ nɔ jlɛ̌ jí é ɖé.

4. Nǎ kpɔ́ndéwú e xlɛ́ ɖɔ Jexóva nɔ nɔ jlɛ̌ jí é ɖokpó. (Levíi ví lɛ́ 5:7, 11)

 ⁴ Ali Jexóva tɔn lɛ́ nyɔ́ bɔ nǔ bǐ vɔ ɖ’é wú, bo lɛ́ ɖo jlɛ̌ jí. Jexóva nɔ hɛn nǔ gángángán hwenu e é nɔ ɖo nǔ wa xá gbɛtɔ́ lɛ́ wɛ é ǎ. Mi nú mǐ ní ɖɔ xó dó lěe Jexóva xlɛ́ ɖɔ émí ɖo jlɛ̌ jí gbɔn, hwenu e é ɖo nǔ wa xá Izlayɛ́li ví lɛ́ wɛ é jí. Jexóva byɔ́ ɖɔ dɔkunnɔ kpó wamamɔnɔ kpó bǐ ní nɔ sá vɔ̌ ɖokpó ɔ lɛ́ ǎ. Ðo ninɔmɛ ɖé lɛ́ mɛ ɔ, é yí gbe bɔ mɛ ɖokpó ɖokpó ná sá vɔ̌ lěe é kpé wú gbɔn é.—Xa Levíi ví lɛ́ 5:7, 11.

5. Nǎ kpɔ́ndéwú e xlɛ́ ɖɔ Jexóva nɔ sɔ́ éɖée hwe, bo nɔ lɛ́ se wǔvɛ́ xá mɛ é ɖokpó.

⁵ Mɛɖéesɔ́hwe Jexóva tɔn kpó wǔvɛ́sexámɛ tɔn kpó nɔ sísɛ́ ɛ bɔ é nɔ nɔ jlɛ̌ jí. Ði kpɔ́ndéwú ɔ, mɛɖéesɔ́hwe Jexóva tɔn jɛ wě hwenu e é jló ná sú kún dó nú mɛ nyanya e ɖo Sodɔ́mu lɛ́ é é. Jexóva gbɔn wɛnsagun tɔn lɛ́ jí, bo ɖe wě xá Lɔti hwɛjijɔnɔ ɔ ɖɔ é ní hɔn yi sókan mɛ. Xɛsi ɖi Lɔti dó dɔ̌n yiyi wú. Énɛ́ wú ɔ, é sa vo nú Jexóva ɖɔ é ní yí gbe bónú émí kpó xwédo émítɔn kpó ná yi Sowáa; toxo kpɛví ɖé wɛ bɔ è ɖó ná sú é lɔmɔ̌ sín kún dó. Jexóva hɛn ɔ, é ná ko dó zǒgbe jí ɖɔ Lɔti ɖó ná xwedó wě e émí ɖe xá ɛ lɛ́ é tlélé. É ɖo mɔ̌ có, é yí gbe nú nǔ e Lɔti byɔ́ ɛ é, nú é ná bo tlɛ byɔ́ ɖɔ é ní ma sú kún dó nú toxo Sowáa tɔn ó ɔ nɛ́. (Bǐb. 19:18-22) Xwe kanweko mɔ̌kpán gúdo ɔ, Jexóva se wǔvɛ́ xá Ninívunu lɛ́. É sɛ́ gbeyíɖɔ Jonási dó bónú é ná yi ɖɔ nú mɛ nyanya e ɖo toxo ɔ mɛ lɛ́ é ɖɔ, è ná sú kún dó nú yě kpó toxo ɔ kpó ɖo malínmálín mɛ. Amɔ̌, ée hwɛ Ninívunu lɛ́ tɔn vɛ́ nú yě é ɔ, Jexóva kú nǔbláwǔ nú yě, bo sɔ́ sú kún yětɔn dó ǎ.—Joná. 3:1, 10; 4:10, 11.

6. Nǎ kpɔ́ndéwú e xlɛ́ ɖɔ Jezu xwedó kpɔ́ndéwú jlɛ̌jíninɔ tɔn Jexóva tɔn é ɖé lɛ́.

⁶ Jezu nɔ xwedó kpɔ́ndéwú jlɛ̌jíninɔ tɔn Jexóva tɔn. È sɛ́ ɛ dó bónú é ná ɖe kúnnu nú “togun Izlayɛ́li tɔn e cí lɛ̌ngbɔ́ búbú ɖɔhun é.” Amɔ̌, é xlɛ́ ɖɔ émí nɔ nɔ jlɛ̌ jí hwenu e é ɖo azɔ̌ énɛ́ wa wɛ é. Ðo ninɔmɛ ɖokpó mɛ ɔ, nǎwe e ma nyí Izlayɛ́linu ǎ é ɖé sa vo n’i ɖɔ é ní gbɔ azɔn nú vǐ nyɔ̌nu émítɔn e “ɖo wǔvɛ́ se wɛ tawun ɖó awǒvi ɖé ɖo jǐ tɔn” wútu é. Jezu se wǔvɛ́ xá nǎwe énɛ́, bo gbɔ azɔn nú vǐ nyɔ̌nu tɔn lěe é byɔ́ gbɔn é. (Mat. 15:21-28) Mǐ ní ɖɔ xó dó kpɔ́ndéwú ɖěvo jí. Hwenu e Jezu bɛ́ sinsɛnzɔ́ tɔn bɔ é ná nɔ zaan é ɔ, é ɖɔ: “Mɛ ɖěbǔ e ná gbɛ́ mì . . . é ɔ, nyi lɔ ná gbɛ́ ɛ.” (Mat. 10:33) Piyɛ́ɛ gbɛ́ Jezu azɔn atɔn có, Jezu ka gbɛ́ ɛ wɛ a? Éǒ. Jezu tuun ɖɔ hwɛ Piyɛ́ɛ tɔn lɛ́ vɛ́ n’i, bɔ é lɛ́ ɖó nǔɖiɖi. Ée Jezu fɔ́n sín kú gúdo é ɔ, é sɔ́ éɖée xlɛ́ Piyɛ́ɛ, bɔ nǔgbó ɔ, é ná ɛ gǎnjɛwú ɖɔ émí sɔ́ hwɛ kɛ ɛ, lobo lɛ́ kpo ɖo wǎn yí n’i wɛ.—Luk. 24:33, 34.

7. Sɔgbe xá Filípunu lɛ́ 4:5 ɔ, mɛ alɔkpa tɛ́ mǐ ka ba ná nyí?

⁷ Mǐ mɔ ɖɔ Jexóva Mawu kpó Jezu Klísu kpó nɔ nɔ jlɛ̌ jí. Bɔ mǐdɛɛ lɛ́ ka lo? Jexóva nɔ ɖó nukún ɖɔ mǐ ní nɔ nɔ jlɛ̌ jí. (Xa Filípunu lɛ́ 4:5.) Biblu ɖé tínmɛ wěmafɔ énɛ́ gbɔn lě: “Nɔ xlɛ́ gbɔn nǔwalɔ towe lɛ́ gblamɛ ɖɔ a nɔ nɔ jlɛ̌ jí.” Mǐ sixú nɔ kan nǔ élɔ́ lɛ́ byɔ́ mǐɖée: ‘Mɛ lɛ́ ka nɔ mɔ ɖɔ un nɔ nɔ jlɛ̌ jí, nɔ yá wǔ jó xó dó, bo kún ka nɔ lɛ́ hɛn nǔ gángángán ó a? Abǐ, yě nɔ mɔ ɖɔ un nɔ hɛn nǔ gángángán, nɔ syɛ́n  nukún, kabǐ nɔ syɛ́n ta wɛ a? Un ka nɔ ɖɔ ɖɔ dandan ɔ, mɛ ɖěvo lɛ́ ɖó ná wa nǔ lɛ́ lěe un lin ɖɔ è ɖó ná wa nǔ lɛ́ gbɔn é pɛ́pɛ́pɛ́ wɛ a? Alǒ nú é byɔ́ ɖó mɔ̌ ɔ, un nɔ ɖótó mɛ ɖěvo lɛ́, lobo nɔ lɛ́ yí gbe nú linlin yětɔn lɛ́?’ Lě do mǐ nɔ nɔ jlɛ̌ jí sɔ é ɔ, mɔ̌ do wɛ mǐ nɔ xwedó kpɔ́ndéwú Jexóva kpó Jezu kpó tɔn sɔ. Mi nú mǐ ní ɖɔ xó dó ninɔmɛ e mɛ é nɔ byɔ́ ɖɔ mǐ ní nɔ jlɛ̌ jí ɖe é we wú, yě wɛ nyí, hwenu e hǔzúhúzú lɛ́ wá xwetɔ́n ɖo gbɛzán mǐtɔn mɛ é kpó hwenu e linlin kpó gbeta kpó mɛ ɖěvo lɛ́ tɔn lɛ́ gbɔn vo nú mǐtɔn lɛ́ é kpó.

8. Étɛ́ lɛ́ ka sixú d’alɔ mǐ bɔ mǐ ná nɔ nɔ jlɛ̌ jí hwenu e hǔzúhúzú lɛ́ wá xwetɔ́n ɖo gbɛzán mǐtɔn mɛ é? (Lɛ̌ kpɔ́n tínmɛ e ɖo do é.)

⁸ Jlɛ̌jíninɔ nɔ byɔ́ ɖɔ mǐ ní nɔ húzú sɔgbe xá hǔzúhúzú e nɔ wá xwetɔ́n ɖo gbɛzán mǐtɔn mɛ lɛ́ é. Hǔzúhúzú énɛ́ lɛ́ sixú dɔn tagba e mǐ ma ɖó nukún tɔn gbeɖé ǎ lɛ́ é wá. Ði kpɔ́ndéwú ɔ, mǐ sixú bɛ́ azɔn syɛ́nsyɛ́n ɖé ɖo ajijimɛ. Alǒ akwɛ́yózo sixú hɛn mǐ ajijimɛ, kabǐ hǔzúhúzú sixú tíin ɖo toxóɖiɖɔ linu ɖo fí e mǐ nɔ nɔ é, bɔ énɛ́ sixú d’avaja gbɛzán mǐtɔn mɛ bǐ mlɛ́mlɛ́. (Nǔt. 9:11, nwt; 1 Kɔ. 7:31) Ényí hǔzúhúzú ɖé tlɛ xwetɔ́n ɖo sinsɛnzɔ́ mǐtɔn kpáxwé ɔ, é sixú vɛ́ wǔ nú mǐ. Ényí ninɔmɛ ɔ ná bo tlɛ vɛ́ wǔ gbɔn ɖěbǔ ɔ, mǐ sixú bló hǔzúhúzú lɛ́ bɔ é ná kpa mǐ, nú mǐ nɔ wa nǔ ɛnɛ élɔ́ lɛ́ ɔ nɛ́: (1) nɔ yí gbe nú hǔzúhúzú ɔ, (2) nɔ kpɔ́n sɔgúdo sɛ́dó, (3) nɔ sɔ́ ayi ɖó nǔ ɖagbe lɛ́ jí, (4) nɔ wa nǔɖé lɛ́ dó d’alɔ mɛ ɖěvo lɛ́. b Mi nú mǐ ní kpɔ́n lěe nɔví mǐtɔn ɖé lɛ́ ɖu le nǔ énɛ́ lɛ́ wiwa tɔn gbɔn é.

9. Ðɔ lěe asú kpó asi kpó e nyí mɛsɛ́dó é ɖé ɖí xwi xá wǔvɛ́ maɖónukún lɛ́ gbɔn é.

⁹ Nɔ yí gbe nú hǔzúhúzú ɔ. È sɛ́ Emanuele kpó Francesca kpó dó to ɖěvo mɛ, bɔ yě ná yi wa mɛsɛ́dózɔ́. Ée yě jɛ gbe ayǐ ɔ jí tɔn kplɔ́n jí, bo lɛ́ jɛ kplɔ́nkplɔ́n bá tuun nɔví e ɖo agun yětɔn yɔ̌yɔ́ ɔ mɛ lɛ́ é jí lě tlóló é jɛ́n jɛmɛjí Covid-19 ɔ bɛ́, bɔ yě ɖó ná byɔ́ xɔ glɔ́. Énɛ́ gúdo ɔ, Francesca sín nɔ kú ajijimɛ. É jló Francesca tawun ɖɔ é ní nɔ kpɔ́ xá xwédo tɔn, amɔ̌, jɛmɛjí ɔ lɔn nǔ n’i bónú é ná yi yě gɔ́n ǎ. Nɛ̌ é ka kpé wú bo ɖí xwi xá wǔvɛ́ énɛ́ lɛ́ bǐ gbɔn? Nǔ nukɔntɔn e Emanuele kpó Francesca kpó wa é wɛ nyí ɖɔ, yě nɔ xo ɖɛ ɖó kpɔ́ bo nɔ byɔ́ nǔnywɛ́ bá dó ɖí xwi xá tagba azǎn ɖokpó ɖokpó tɔn, bónú adohu adohu ní ma ɖí bú yě ó. Jexóva ná xósin nú ɖɛ yětɔn lɛ́, gbɔn nǔɖuɖu gbigbɔ tɔn e yě mɔ dó ganmɛ lɛ́ é gblamɛ. Ði kpɔ́ndéwú ɔ, yě kpɔ́n video e mɛ è kan nǔ byɔ́ nɔví súnnu ɖé ɖe, bɔ nɔví súnnu ɔ ɖɔ xó élɔ́ lɛ́, lobɔ é dó wǔsyɛ́n lanmɛ nú yě é: “Lě do è yá wǔ yí gbe nú ninɔmɛ mɛtɔn yɔ̌yɔ́ ɔ sɔ é ɔ, mɔ̌ do wɛ è nɔ yá wǔ ɖó awǎjijɛ sɔ é nɛ́, bɔ énɛ́ nɔ zɔ́n bɔ è sixú nɔ wa nǔ e wú è kpé é bǐ ɖo ninɔmɛ mɛtɔn yɔ̌yɔ́ ɔ mɛ.” c Nǔ wegɔ́ e yě wa é wɛ nyí ɖɔ, yě wá gbeta ɔ kɔn bo ná bló bɔ alɔ ná se kpɛ́n nú yě ɖo mawuxóɖiɖɔ gbɔn alǒkan jí linu, bɔ yě tlɛ jɛ Biblu kplɔ́n xá mɛɖé jí. Nǔ atɔngɔ́ e yě wa é wɛ nyí ɖɔ, yě yí gbe bɔ nɔví ayǐ ɔ jí tɔn lɛ́ dó wǔsyɛ́n lanmɛ nú yě, lobo lɛ́ nɔ gǔdo nú yě, bɔ énɛ́ su nukún yětɔn mɛ tawun. Ayǐhɔ́ngbe ayǐhɔ́ngbe, káká nú xwe ɖokpó ɔ, nɔví nyɔ̌nu xomɛnyɔ́tɔ́ ɖokpó nɔ wlán nǔ kléwún ɖé sɛ́dó yě, bɔ wěmafɔ Biblu tɔn ɖokpó nɔ ɖ’é mɛ. Ényí mǐ lɔ nɔ yí gbe nú ninɔmɛ yɔ̌yɔ́ lɛ́ ɔ, nǔ e wú mǐ ná kpé bá wa lɛ́ é sixú d’awǎjijɛ nú mǐ.

10. Nɛ̌ nɔví nyɔ̌nu ɖokpó ka bló hǔzúhúzú ɖaxó ɖé ɖo gbɛzán tɔn mɛ gbɔn?

¹⁰ Nɔ kpɔ́n sɔgúdo sɛ́dó, bo nɔ sɔ́ ayi ɖó nǔ  ɖagbe lɛ́ jí. Nɔví nyɔ̌nu e gosín Roumanie é ɖokpó nɔ nyí Christina, bo nɔ nɔ Japon, bɔ hwenu e agun Glɛ̌nsigbe tɔn e mɛ é nɔ bló kplé ɖe é ɔ, è ɖe síin é ɔ, é vɛ́ n’i tawun. É ɖo mɔ̌ có, é ka sɔ́ ayi ɖó nǔ e jɛ wá yi é jí, bo nɔ ɖo linlin kpɔ́n wɛ kpowun ǎ. É nyɔ́ wa ɔ, é wá gbeta ɔ kɔn bo ná nɔ wa nǔ e wú é kpé é bǐ ɖo agun xá ɔ mɛ tɔn e mɛ è nɔ dó Japon-gbe ɖe é mɛ, bo nɔ ɖ’alɔ ɖo wɛnɖagbejíjlázɔ́ ɔ mɛ hú gǎn ɖ’ayǐ tɔn ɖo ayǐ ɔ jí. É byɔ́ azɔ̌gbɛ́ tɔn xóxó ɖokpó ɖɔ é ní d’alɔ émí bónú gbe ɔ dídó ní má émí hú gǎn. Nǎwe ɔ yí gbe bo ná nɔ zán Biblu kpó alɔnuwéma Ðu gbɛ víví káká sɔ́yi! kpó dó kplɔ́n Japon-gbe Christina. Christina kpé wú bo kplɔ́n lěe è nɔ dó Japon-gbe gbɔn é, amɔ̌, nǎwe e ɖo Japon-gbe kplɔ́n mɛ wɛ é lɔ jɛ wǎn yí nú nǔgbó ɔ jí. Ényí mǐ nɔ kpɔ́n nukɔn sɛ́dó, lobo nɔ lɛ́ sɔ́ ayi ɖó nǔ ɖagbe lɛ́ jí ɔ, hǔzúhúzú e mǐ ma ɖó nukún tɔn ǎ lɛ́ é sixú zɔ́n bɔ mǐ mɔ nyɔ̌ná e mǐ ma ɖó nukún tɔn ǎ lɛ́ é.

11. Étɛ́ ka d’alɔ asú kpó asi kpó e mɔ akwɛ́yózo é, bɔ yě kpé wú bo ɖí xwi xá?

¹¹ Nɔ wa nǔɖé lɛ́ dó d’alɔ mɛ ɖěvo lɛ́. Asú kpó asi kpó ɖokpó nɔ nɔ to e mɛ è gbɛ́ azɔ̌ mǐtɔn ɖe é ɖokpó mɛ, bɔ hwenu e akwɛ́zinkan to ɔ tɔn j’ayǐ é ɔ, akwɛ́yózo hɛn yě. Nɛ̌ yě ka húzú sɔgbe xá ninɔmɛ ɔ gbɔn? Jɛ nukɔn hwɛ̌ ɔ, yě ɖe afɔ e jɛxá lɛ́ é bo jɛ gbɛ e bɔkun é zán jí. Énɛ́ gúdo ɔ, yě sɔ́ ayi yětɔn ɖó tagba yěɖésúnɔ tɔn lɛ́ jí ǎ, é nyɔ́ wa ɔ, yě wá gbeta ɔ kɔn bo ná sɔ́ ayi ɖó alɔ dídó mɛ ɖěvo lɛ́ jí, gbɔn alɔnu hinhɛn ján ɖo wɛnɖagbejíjlázɔ́ ɔ mɛ gblamɛ. (Mɛ. 20:35) Asú ɔ ɖɔ: “Alɔnu mǐtɔn e mǐ nɔ hɛn ján ɖo wɛnɖagbejíjlázɔ́ ɔ mɛ é zɔ́n bɔ, mǐ sɔ́ nɔ mɔ hwenu gěgé bo nɔ lin nǔ nyanya lɛ́ ǎ, é nyɔ́ wa ɔ, mǐ nɔ mɔ hwenu gěgé dó sɔ́ ayi ɖó jlǒ Mawu tɔn wiwa jí.” Hwenu e ninɔmɛ mǐtɔn húzú é ɔ, mǐ ɖó ná flín lě do é ɖo tají ɖɔ mǐ ní kpo ɖo alɔ dó mɛ ɖěvo lɛ́ wɛ sɔ é, tají ɔ, gbɔn wɛnɖagbejíjlázɔ́ mǐtɔn gblamɛ.

12. Nɛ̌ kpɔ́ndéwú mɛsɛ́dó Pɔ́lu tɔn ka sixú d’alɔ mǐ bɔ mǐ ná nɔ húzú alɔ ɖo sinsɛnzɔ́ mǐtɔn mɛ gbɔn?

¹² É byɔ́ ɖɔ mǐ ní nɔ ɖyɔ́ alɔ ɖo sinsɛnzɔ́ mǐtɔn mɛ. Mɛ ɖěɖěe ɖi nǔ nú nǔ vovo lɛ́, ɖó walɔ vovo lɛ́, bo lɛ́ gosín xá vovo mɛ lɛ́ é wɛ mǐ nɔ xo go. Mɛsɛ́dó Pɔ́lu nɔ húzú alɔ, bɔ kpɔ́ndéwú tɔn sixú kplɔ́n nǔ mǐ. Jezu sɔ́ Pɔ́lu, bɔ é nyí “mɛsɛ́dó nú mɛ e ɖo akɔta ɖě lɛ́ mɛ lɛ́ é.” (Hlɔ̌. 11:13) Ðó azɔ̌ énɛ́ e è sɔ́ d’así nú Pɔ́lu é wútu ɔ, é nɔ jlá wɛn ɖagbe ɔ Jwifu lɛ́, Glɛ̌kinu lɛ́, wěmasetɔ́ ɖaxó ɖaxó lɛ́, glesi yǎyá lɛ́, mɛ nukúnɖéjí lɛ́ kpó axɔ́sú lɛ́ kpó. Bónú wɛn e jlá wɛ Pɔ́lu ɖe é ná mɔ tɛn dó byɔ́ ayi mɛ nú mɛ vovo énɛ́ lɛ́ bǐ ɔ, é sɔ́ éɖée dó ɖó “nǔ bǐ nú gbɛtɔ́ alɔkpa lɛ́ bǐ.” (1 Kɔ. 9:19-23) É nɔ sɔ́ ayi ɖó fí e tóɖóetɔ́ lɛ́ gosín é kpó nǔ e yě ɖi nǔ ná lɛ́ é kpó jí, énɛ́ nɔ d’alɔ ɛ bɔ é nɔ húzú alɔ bo nɔ ɖɔ xó nú mɛ ɖokpó ɖokpó ɖo ali ɖé nu, bo ná dó dɔn ɛ wá Mawu gɔ́n. Ényí mǐ nɔ húzú alɔ bo nɔ tɛ́n kpɔ́n bo nɔ lin tamɛ dó ali ɖagbe hú gǎn e nu mǐ sixú d’alɔ mɛ ɖokpó ɖokpó ɖe é jí ɔ, sinsɛnzɔ́ mǐ lɔmɔ̌ tɔn sixú kpa mǐ.

13. Awǒvinú tɛ́ xó 1 Kɔlɛ́ntinu lɛ́ 8:9 ka ɖɔ, bɔ ényí mǐ nɔ ɖó sísí nú linlin mɛ ɖěvo lɛ́ tɔn ɔ, mǐ hɛn ɔ, mǐ ná nyi alɔ ná?

¹³ Jlɛ̌jíninɔ nɔ lɛ́ d’alɔ mǐ bɔ mǐ nɔ ɖó sísí nú linlin mɛ ɖěvo lɛ́ tɔn lɛ́. Ði kpɔ́ndéwú ɔ, nɔví nyɔ̌nu mǐtɔn ɖé lɛ́ nɔ yí wǎn nú nǔ sá dó nukúnmɛ, mɛ ɖěvo lɛ́ ka nɔ ba xó tɔn ǎ. Klisánwun ɖé lɛ́ nɔ ɖu vǐví ahan syɛ́nsyɛ́n nunu ɖó jlɛ̌ jí tɔn, amɔ̌, mɛ ɖěvo lɛ́ wá gbeta ɔ kɔn bo ná nyi alɔ ná. Klisánwun lɛ́ bǐ wɛ nɔ ba ná nɔ ganjí ɖo agbaza mɛ, amɔ̌, nukúnkpédómɛwú vovo lɛ́ sín gbeta kɔn wɛ yě nɔ wá. Ényí mǐ nɔ lin ɖɔ hwɛ mǐtɔn nɔ jɔ hwebǐnu, bɔ mǐ nɔ tɛ́n kpɔ́n bo ná bló bɔ nɔví mǐtɔn lɛ́ ná nɔ wa nǔ e mǐ nɔ wa lɛ́ é ɔ, mǐ sixú nyí afɔklɛ́nnú nú mɛ ɖěvo lɛ́, bo ná dɔn kínklán wá agun ɔ mɛ. É ɖo wɛn ɖɔ,  mǐ kún ná ba ná wa mɔ̌ ó. (Xa 1 Kɔlɛ́ntinu lɛ́ 8:9; 10:23, 24) Mi nú mǐ ní ɖɔ xó dó kpɔ́ndéwú e xlɛ́ lěe nǔgbódodó Biblu tɔn lɛ́ zínzán sixú d’alɔ mǐ bɔ mǐ ná nɔ jlɛ̌ jí, lobo lɛ́ kpo ɖo fífá kan xo wɛ gbɔn é we wú.

14. Nǔgbódodó Biblu tɔn tɛ́ lɛ́ ka ɖó ná xlɛ́ ali mǐ ɖo nǔsísɔ́ kpó acɔ́biba kpó kpáxwé?

¹⁴ Nǔsísɔ́ kpó acɔ́biba kpó. Jexóva dó sɛ́n lɛ́ nú mǐ gbɛ́ɖɛ́ɖɛ́ dó lěe mǐ ná nɔ sɔ́ nǔ gbɔn é wú ǎ, é nyɔ́ wa ɔ, é ná mǐ nǔgbódodó e mǐ ná xwedó lɛ́ é. Nǔsísɔ́ mǐtɔn lɛ́ ɖó ná nɔ xlɛ́ ɖɔ mǐ nyí mɛsɛntɔ́ Mawu tɔn lɛ́; nǔzínzán e jɛxá lɛ́ é wɛ è ná nɔ dó ba acɔ́ ná kpó jlɛ̌jíninɔ kpó, kpódó “ayiɖote” kpán. (1 Tim. 2:9, 10; 1 Pi. 3:3) Énɛ́ wú ɔ, mǐ ɖó ná nɔ sɔ́ nǔ ɖo ali ɖé nu, bo ná nɔ dɔn ayi mɛ ɖěvo lɛ́ tɔn wá mǐɖée jí ǎ. Nǔgbódodó Biblu tɔn lɛ́ ná lɛ́vɔ́ d’alɔ mɛxó agun tɔn lɛ́, bɔ yě ná nɔ dó sɛ́n e ma ɖo dandan ǎ lɛ́ é dó nǔsísɔ́ kpó acɔ́biba kpó wú ǎ. Ði kpɔ́ndéwú ɔ, ɖo agun ɖé mɛ ɔ, mɛxó agun tɔn lɛ́ jló ná d’alɔ nɔví súnnu wínnyáwínnyá ɖěɖěe nɔ kpa ɖa mɛ wínnyáwínnyá ɖěɖěe lɛ́ lɛ̌ dó yě lɛ́ é ɖɔhun é ɖé lɛ́; ɖa ɔ cí zuu ɖo ta nú yě ǎ, amɔ̌, é nɔ hánnyá tawun. Nɛ̌ mɛxó agun tɔn lɛ́ ka sixú d’alɔ yě, bɔ hwe ɖokpó ɔ nu ɔ, yě ma ná ɖó sɛ́n ɖé ayǐ ǎ gbɔn? Nukúnkpénǔwútɔ́ lɛ̌dó tɔn ɖe wě xá mɛxó agun tɔn lɛ́ ɖɔ yě ní ɖɔ xó élɔ́ nú nɔví lɛ́: “Ényí mi ɖo atáa jí, bɔ mɛ e ɖo tó ɖó mi wɛ lɛ́ é ɖe ayi sín xó e ɖɔ wɛ mi ɖe é jí, bo sɔ́ ayi ɖó miɖésúnɔ jí hǔn, xó ɖo nǔsísɔ́ mitɔn kpó acɔ́biba mitɔn kpó wú nɛ́.” Xó kléwún énɛ́ d’alɔ nɔví súnnu wínnyáwínnyá lɛ́ bɔ yě mɔ nǔ jɛ nǔ e yě ɖó ná wa é wú, bɔ é sɔ́ byɔ́ ɖɔ mɛxó agun tɔn lɛ́ ní ɖó sɛ́n ɖé ayǐ ǎ. d

15. Ényí mǐ ɖo gbeta nukúnkpémɛwú alɔkpa e mǐ ná yí gbe ná é tɔn kɔn wá wɛ ɔ, sɛ́n kpó nǔgbódodó kpó Biblu tɔn tɛ́ lɛ́ ka sixú xlɛ́ ali mǐ? (Hlɔ̌manu lɛ́ 14:5)

¹⁵ Ganjíninɔ ɖo agbaza lixo. Klisánwun ɖokpó ɖokpó wɛ ná wá gbeta lěe é ná kpé  nukún dó éɖée wú ɖo lanmɛ ná nɔ ganjí kpáxwé gbɔn é tɔn kɔn. (Ga. 6:5) Ényí klisánwun lɛ́ ɖo gbeta lěe è ná kpé nukún dó yě wú ɖo lanmɛ ná nɔ ganjí kpáxwé gbɔn é tɔn kɔn wá wɛ ɔ, yě ɖó ná se tónú nú sɛ́n Biblu tɔn e ɖɔ ɖɔ è ní ɖó wǔ zɔ nú hun kpó awǒvinúwiwa kpó lɛ́ é. (Mɛ. 15:20; Ga. 5:19, 20) Amɔ̌, nú è ɖe énɛ́ sín mɛ ɔ, yěɖésúnɔ wɛ ná wá gbeta nukúnkpédómɛwú alɔkpa e yě ná yí gbe ná é tɔn kɔn. Mɛɖé lɛ́ nɔ yí gbe nú nukúnkpédómɛwú dotóoxwé tɔn kɛ́ɖɛ́, amɔ̌, mɛ ɖěvo lɛ́ nɔ yí gbe nú nukúnkpédómɛwú ɖěvo lɛ́. Ényí mǐ ná bo kú d’é jí gbɔn ɖěbǔ ɖɔ nukúnkpédómɛwú alɔkpa e mǐ yí gbe ná é wɛ nyɔ́ ɔ, mǐ ɖó ná ɖó sísí nú acɛ e nɔví mǐtɔn lɛ́ ɖó, bo ná wá gbeta nukúnkpédómɛwú alɔkpa e yě ná sɔ́ é tɔn kɔn é. Énɛ́ wú ɔ, mǐ ɖó ná hɛn nǔ ɛnɛ élɔ́ lɛ́ dó ayi mɛ: (1) Axɔ́súɖuto Mawu tɔn kɛ́ɖɛ́ jɛ́n ná gbɔ azɔn nú gbɛtɔ́ lɛ́ bǐ mlɛ́mlɛ́. (Eza. 33:24) (2) Klisánwun ɖokpó ɖokpó ɖó ná “kú dó” nǔ e nyɔ́ n’i hú gǎn é jí “mlɛ́mlɛ́.” (Xa Hlɔ̌manu lɛ́ 14:5.) (3) Mǐ nɔ dá hwɛ nú mɛ ɖěvo lɛ́, alǒ wa nǔ ɖěbǔ dó nyí afɔklɛ́nnú nú yě ǎ. (Hlɔ̌. 14:13) (4) Klisánwun lɛ́ nɔ ɖe wǎnyíyí xlɛ́, bo nɔ sɔ́ mɛɖésúsíninɔ e yě ɖó bo ná wá gbeta yěɖésúnɔ tɔn lɛ́ kɔn é ɖó nukɔn nú bǔninɔ agun ɔ tɔn ǎ. (Hlɔ̌. 14:15, 19, 20) Ényí mǐ hɛn nǔ énɛ́ lɛ́ ayi mɛ ɔ, mǐ ná kpo ɖo vǐvɛ́ kpó nɔví mǐtɔn lɛ́ kpó wɛ, lobo lɛ́ gɔ́ so nú fífá ɖo agun ɔ mɛ.

16. Nɛ̌ mɛxó agun tɔn ɖé ka sixú xlɛ́ ɖɔ émí nɔ nɔ jlɛ̌ jí hwenu e é ɖo nǔ wa ɖó kpɔ́ xá mɛxó agun tɔn gbɛ̌ tɔn lɛ́ wɛ é gbɔn? (Lɛ̌ kpɔ́n fɔtóo lɛ́.)

¹⁶ Mɛxó agun tɔn lɛ́ ɖó ná sɔ́ kpɔ́ndéwú ɖagbe ɖ’ayǐ ɖo jlɛ̌jíninɔ linu. (1 Tim. 3:2, 3) Ði kpɔ́ndéwú ɔ, mɛxó agun tɔn ɖé ɖó ná nɔ ɖó nukún ɖɔ è ná yí gbe nú linlin émítɔn lɛ́ hwebǐnu ɖó é hú xwe mɛxó agun tɔn ɖěvo lɛ́ kpowun wútu ǎ. É nɔ tuun ɖɔ Jexóva sixú zán gbigbɔ mímɛ́ tɔn dó sísɛ́ mɛxó agun tɔn e ɖo kplékplé mɛxó lɛ́ tɔn mɛ é ɖěbǔ, bɔ é ná ɖɔ xó e ná d’alɔ bɔ è ná wá gbeta e nǔnywɛ́ kpé é ɖé kɔn é. Gɔ́ ná ɔ, ényí gbeta e kɔn mɛxó agun tɔn lɛ́ gěgé wá é ɖé ma t’afɔ nǔgbódodó Biblu tɔn ɖé jí ǎ ɔ, mɛxó agun tɔn e nɔ nɔ jlɛ̌ jí é nɔ yí gbe nú gbeta énɛ́, ényí é ná bo ma nyí nǔ e ba wɛ é ɖe é ǎ ɔ nɛ́.

17. Nyɔ̌ná tɛ́ lɛ́ sín vǐví klisánwun e nɔ nɔ jlɛ̌ jí lɛ́ é ka nɔ ɖu?

¹⁷ Ényí mǐ nɔ nɔ jlɛ̌ jí ɔ, mǐ nɔ ɖu le tɔn ɖo ali gěgé nu. Mǐ nɔ zun xɔ́ntɔn vívɛ́ xá nɔví mǐtɔn lɛ́, bɔ fífá nɔ lɛ́ nɔ agun ɔ mɛ. Mǐ nɔ ɖu vǐví jijɔ vovo e mǐ ɖó lɛ́ é kpó fí vovo e mɛ e ɖo togun Jexóva tɔn mɛ lɛ́ é gosín lɛ́ é tɔn. Gɔ́ ná ɔ, tuun e mǐ tuun ɖɔ mǐ gbɔn vo nú mǐɖée có, mǐ bǐ ka ɖo Jexóva sɛn wɛ ɖo bǔ xwédo ɖé ɖɔhun é nyɔ́ tawun. Tají hú gǎn ɔ, tuun e mǐ tuun ɖɔ mǐ ɖo kpɔ́ndéwú jlɛ̌jíninɔ tɔn Mawu mǐtɔn Jexóva tɔn xwedó wɛ é nɔ d’awǎjijɛ nú mǐ.