“Hwenu e hɛ̌nnumɔ ce ɖé tɔ́n hun mì é ɔ, un wlí kɔ tɔn bo jɛ vɛ̌go tɔn fyɔ́n jí. Un jló na hu i.”—Paul.

“Ðò xwégbe ɔ, xomɛ nɔ yawǔ sin mì tawun. Un nɔ gbà tavo lɛ, ayihundanú lɛ, nǔ ɖebǔ e wu alɔ ce sixu jɛ é.”—Marco.

Xomɛ sixu gɔn mǐ sin yì ɖó bǎ enɛ mɛ. É ɖò mɔ̌ có, mǐ bǐ wɛ é nɔ vɛwǔ na bɔ mǐ na ɖu ɖò mǐɖée jí hweɖelɛnu. Hwɛjijɔ nukɔntɔn e wu nǔ nɔ nyí mɔ̌ é wɛ nyí ɖɔ mǐ ɖu hwɛhuhu sín gǔ ɖò gbɛtɔ́ nukɔntɔn ɔ, Adamu gɔ́n. (Hlɔ. 5:12) Paul kpo Marco kpo ɖɔhun ɔ, é nɔ vɛwǔ nú mɛɖé lɛ tawun bɔ ye na ɖu ɖò xomɛ e nɔ sin ye é jí. Mɛ ɖevo lɛ sixu mɔ ɖɔ é vɛwǔ bɔ è na ɖu ɖò linlin mɛtɔn lɛ jí. Ði kpɔ́ndéwú ɔ, ye nɔ ɖò nǔ lin kpɔ́n dó nǔ e na dó xɛsi ye, alǒ dó awakanmɛ kú nú ye lɛ é jí wɛ. É nɔ lɛ́ vɛwǔ nú mɛ ɖevo lɛ bɔ ye na ɖu ɖò jlǒ nǔbliblíwiwa tɔn, ahan syɛnsyɛn nunu zɛ jlɛ̌ wu, alǒ amasin aɖǐnɔ lɛ zinzan nyi dò jí.

Mɛ ɖěɖee nɔ jó linlin yetɔn lɛ, jlǒ yetɔn lɛ, kpo nǔ e ye nɔ wà lɛ é kpo dó bɔ ye nɔ ɖu ɖò ye jí lɛ é sixu hɛn gbɛzán yeɖesunɔ tɔn gblé. Amɔ̌, mǐ sixu nyi alɔ nú mɔ̌ wiwa. Gbɔn nɛ̌ é? Gbɔn nǔ sísɔ́ nú mɛɖéejiɖuɖe gblamɛ. Bo na dó d’alɔ mǐ ɖò ali enɛ nu ɔ, mi nú mǐ ni ɖɔ xó dó nǔkanbyɔ elɔ lɛ jí: (1) Etɛ ka nyí mɛɖéejiɖuɖe? (2) Aniwu é ka ɖò taji? (3) Nɛ̌ mǐ ka sixu sɔnǔ nú jijɔ enɛ e nyí ‘nǔ e gbigbɔ mímɛ́ nɔ na mɛ lɛ é’ sín akpáxwé ɖé é gbɔn? (Ga. 5:22, 23) Enɛ gudo ɔ, mǐ na ɖɔ xó dó nǔ e mǐɖesunɔ sixu bló hwenu e mǐ ma na sixu ɖu ɖò mǐɖée jí ǎ é ɖé jí.

Mɛ e nɔ ɖu ɖò éɖée jí é ɖé nɔ zɔn dó lee nǔ cí n’i é jí dó wà nǔ hwebǐnu ǎ. É nyɔ́ wà ɔ, é nɔ ɖɔ alǒ wà nǔ e ma nyɔ́ Mawu nukúnmɛ ǎ lɛ é ǎ.

Jezu xlɛ́ nǔ e mɛɖéejiɖuɖe nyí é mǐ. Biblu ɖɔ: “Ee è zun i ɔ, é zun mɛ ǎ; ee é jiya ɔ, é gblɔ́n adǎn nú mɛ ǎ; loɔ, é sɔ́ éɖée dó alɔ mɛ nú Mawu e nɔ ɖɔhwɛ kpo hwɛjijɔ kpo é.” (1 Pi. 2:23) Jezu ɖè mɛɖéejiɖuɖe mɔhun xlɛ́ hwenu e é ɖò yatín jí bɔ kɛntɔ́ tɔn lɛ ɖò cícá ɛ ko wɛ é. (Mat. 27:39-44) Jɛ nukɔn nú enɛ ɔ, é ɖu ɖò éɖée jí tawun hwenu e sinsɛngán lɛ kan nǔ gegě byɔ ɛ bo na dó ɖó mɔ n’i é. (Mat. 22:15-22) Bɔ hwenu e Jwifu e ɖò akpɔ jí lɛ é ɖé lɛ fɔ awinnya bo jló na nyi dó è é ɔ, é sɔ́ kpɔ́ndéwú ɖagbe ɖé ɖ’ayǐ nú mǐ! Jezu ba hlɔn ǎ, é nyɔ́ wà ɔ, é “bɛ, bo tɔ́n sín sinsɛnxɔ ɔ mɛ.”—Jaan 8:57-59.

Mǐ ka sixu wà nǔ Jezu ɖɔhun à? Mǐ sixu wà nǔ éɖɔhun ɖó bǎ ɖé mɛ. Mɛsɛ́dó Piyɛ́ɛ wlan ɖɔ: “Klisu ɖesunɔ jiya dó ta mitɔn mɛ, bo jó xlɛ̌ tɔn nyi ayǐ nú mi, bonu mi na zé afɔ dó afɔdo tɔn lɛ mɛ.” (1 Pi. 2:21) Mǐ nyí hwɛhutɔ́ có, mǐ sixu xwedó kpɔ́ndéwú mɛɖéejiɖuɖe tɔn Jezu tɔn télélé. Etɛwu mɔ̌ wiwa ka ɖò taji?

Enyi mǐ ba ɖɔ nǔ mǐtɔn ni nyɔ́ Jehovah nukúnmɛ ɔ, mǐ ɖó na nɔ ɖu ɖò mǐɖée jí. Mǐ na bo ko ɖò Jehovah sɛn wɛ kpo gbejininɔ kpo sín  hwenu línlín ɖíe ɔ, enyi mǐ ma nɔ cɔ́ nǔ e mǐ nɔ ɖɔ alǒ wà lɛ é ǎ ɔ, mǐ sixu hɛn kancica e ɖò mǐ kpo é kpo tɛntin é gblé.

Kpɔ́n kpɔ́ndéwú Mɔyizi, ee nyí mɛɖé ‘bo nɔ sɔ́ éɖée hwe ɖesu; bo nɔ sɔ́ éɖée hwe hú gbɛtɔ́ e ɖò ayikúngban jí lɛ bǐ’ hwenɛnu é tɔn. (Kɛ́n. 12:3) Mɔyizi dɛ ɖò nǔhlunɖɔ Izlayɛli-ví lɛ tɔn nu nú xwè mɔkpan kpo suúlu kpo. Amɔ̌, gbè ɖokpo ɔ, é sɔ́ kpéwú bo ɖu ɖò éɖée jí ǎ. Xomɛ sin i hwenu e ye lɛ́ hlún nǔɖɔ ɖó ye ba sin kpò wutu é. É ɖɔ nú togun ɔ kpo xomɛsin kpo ɖɔ: “Gǔfɔntɔ́ è mi, mi ɖótó! Mǐ na sixu kpéwú bo ɖè sin tɔ́n sín só elɔ mɛ nú mi à?”—Kɛ́n. 20:2-11.

Mɔyizi kpéwú bo ɖu ɖò éɖée jí ǎ. É kpa susu nú Jehovah bo xlɛ́ ɖɔ é wɛ na sin ɔ ye gbɔn nǔjiwǔ gblamɛ ǎ. (Ðɛh. 106:32, 33) Enɛ wu ɔ, Jehovah lɔn nú é yì Akpádídó Yikúngban ɔ jí ǎ. (Kɛ́n. 20:12) É cí ɖɔ ɖu e Mɔyizi ma kpéwú bo ɖu ɖò éɖée jí ǎ é vɛ́ n’i nú gbɛhwenu tɔn e kpò é bǐ ɖɔhun.—Sɛ́n. 3:23-27.

Etɛ nǔ enɛ ka sixu kplɔ́n mǐ? Enyi mǐ na bo ɖò nǔgbo ɔ mɛ b’ɛ ko lín tawun ɔ, mǐ ɖó na ɖɔ xó kpo mɛmasí kpo nú mɛ ɖěɖee dó xomɛsin nú mǐ, alǒ nú mɛ ɖěɖee è ɖó na gbɛ́ nǔ na lɛ é gbeɖé ǎ. (Efɛ. 4:32; Kolo. 3:12) Nú è na ɖɔ ɔ, enyi mǐ ɖò mɛxo nyí wɛ ɔ, é nɔ vɛwǔ tawun bɔ mǐ na ɖó suúlu hweɖelɛnu. Amɔ̌, flín Mɔyizi. Mǐ jló na hɛn kancica ɖagbe e mǐ ɖó xá Jehovah é gblé ɖó mǐ gɔn ɖuɖu ɖò mǐɖée jí wutu ǎ. Amɔ̌, nɛ̌ mǐ ka sixu sɔnǔ nú jijɔ taji enɛ gbɔn?

Nɔ byɔ gbigbɔ mímɛ́ ɖò ɖɛ mɛ. Etɛwu? Ðó mɛɖéejiɖuɖe nyí nǔ e gbigbɔ mímɛ́ nɔ na mɛ lɛ é sín akpáxwé ɖé, bɔ Jehovah nɔ na gbigbɔ tɔn mɛ ɖěɖee nɔ byɔ ɛ lɛ é. (Luk. 11:13) Jehovah sixu zán gbigbɔ tɔn dó na mǐ hlɔnhlɔn e sín hudo mǐ ɖó é. (Fili. 4:13) É sixu lɛ́ d’alɔ mǐ bɔ mǐ na sɔnǔ nú akpáxwé sínsɛ́n gbigbɔ Jehovah tɔn tɔn ɖevo lɛ ɖi wanyiyi, ee na d’alɔ mǐ bɔ mǐ na nɔ yawǔ ɖu ɖò mǐɖée jí é.—1 Kɔ. 13:5.

Nɔ nyi alɔ nú nǔ e nɔ vɔ́da nú mɛɖéejiɖuɖe lɛ é. Ði kpɔ́ndéwú ɔ, nɔ nyi alɔ nú tɛn Ɛntɛnɛti tɔn kpo ayiɖeɖayǐ kpo ɖěɖee nɔ sɔ́ walɔ nyanya ɖ’ajo lɛ é. (Efɛ. 5:3, 4) Nǔgbo ɔ, mǐ ɖó na nɔ nyi alɔ nú nǔ e sixu zɔ́n bɔ nǔnyanyawiwa na dɔn mǐ lɛ é bǐ. (Nǔx. 22:3; 1 Kɔ. 6:12) Ði kpɔ́ndéwú ɔ, mɛ e jlǒ xóɖóxámɛ tɔn nyanya lɛ nɔ yawǔ dɔn é ɖé sixu wá gbeta ɔ kɔn bo na nyi alɔ nú wema e mɛ è ɖɔ xó dó xóɖóxámɛ jí ɖè lɛ é xixa. É ɖó na lɛ́ nyi alɔ  nú fímu e mɛ è ɖú alɔlwɛ́ ɖè lɛ é kpinkpɔn mlɛ́mlɛ́.

Mǐ sixu mɔ ɖɔ é vɛwǔ bɔ mǐ na xwedó wěɖexámɛ enɛ. É ɖò mɔ̌ có, enyi mǐ dó gǎn ɔ, Jehovah na na mǐ hlɔnhlɔn e sín hudo mǐ ɖó bo na nɔ ɖu ɖò mǐɖée jí é. (2 Pi. 1:5-8) É na d’alɔ mǐ bɔ mǐ na nɔ ɖu ɖò linlin mǐtɔn lɛ, xó mǐtɔn lɛ, kpo nǔwiwa mǐtɔn lɛ kpo jí. Paul kpo Marco kpo e xó è ɖɔ wá yì é sín kpɔ́ndéwú xlɛ́ ɖɔ nǔgbo wɛ nyí xó enɛ. Ye mɛ ɖokpo ɖokpo kplɔ́n bo nɔ ɖu ɖò xomɛsin yetɔn jí. Lɛ̌ kpɔ́n kpɔ́ndéwú nɔví sunnu e nɔ yawǔ sin xomɛ, bo tlɛ nɔ ɖɔ jlɛ xá mɔ̌tokuntɔ́ ɖevo lɛ hwenu e é ɖò mɔ̌to kun wɛ é ɖé tɔn. Nɛ̌ é ka ɖu ɖ’eji gbɔn? “Un nɔ xoɖɛ vívɛ́ gbè bǐ gbè. Un nɔ kplɔ́n xóta ɖěɖee ɖɔ xó dó mɛɖéejiɖuɖe jí lɛ é, bo nɔ hɛn wemafɔ Biblu tɔn e na d’alɔ mì ɖò ali enɛ nu lɛ é tamɛ. Un ko ɖò azɔ̌ wà dó nǔ enɛ jí wɛ sín xwè mɔkpan ɖíe có, un nɔ lɛ́ flín nyiɖée zǎnzǎn lɛ bǐ ɖɔ un jló na tɛ́n kpɔ́n bo na ɖu ɖò nyiɖée jí. Un nɔ yawǔ gosin xwégbe bo nɔ yì fí e un xwè é, mɔ̌ mɛ ɔ, un sɔ́ nɔ zɔn kplakpla jí ǎ.”

Hweɖelɛnu ɔ, mǐ na kpéwú bo ɖu ɖò mǐɖée jí ǎ. Enyi nǔ nyí mɔ̌ ɔ, ɖɛxixo sɛ́dó Jehovah sixu hu winnya nú mǐ tawun. Amɔ̌, hwenɛnu wɛ mǐ ka ɖó na xoɖɛ hugǎn. Hǔn, xoɖɛ sɛ́dó Jehovah tɛn tɔn mɛ. Savo n’i ɖɔ é ni sɔ́ hwɛ kɛ we, ba alɔdó tɔn, bo kánɖeji ɖɔ a kún sɔ́ na wà nǔ ɖokpo ɔ nyi dò ɖě ó. (Ðɛh. 51:11-13) Jehovah na gɔn tó ɖó ɖɛ vívɛ́ e a xò bo byɔ ɛ ɖɔ é ni kú nǔblawu nú we é ǎ. (Ðɛh. 102:18) Mɛsɛ́dó Jaan flín mǐ ɖɔ hun Vǐ Mawu tɔn tɔn “lɛ̀ mǐ wé sín hwɛ mǐtɔn lɛ bǐ mɛ.” (1 Jaan 1:7; 2:1; Ðɛh. 86:5) Flín ɖɔ Jehovah byɔ mɛsɛntɔ́ tɔn e ɖò ayikúngban jí lɛ é ɖɔ ye ni nɔ sɔ́ hwɛ kɛ mɛ hwebǐnu. Enɛ wu ɔ, mǐ sixu ɖeji ɖɔ é na wà nǔ ɖokpo ɔ nú mǐ lɔ.—Mat. 18:21, 22; Kolo. 3:13.

Hwenu e Mɔyizi ma kpéwú bo ɖu ɖò éɖée jí ɖò gbetótló mɛ ǎ é ɔ, é vɛ́ nú Jehovah. É ɖò mɔ̌ có, Jehovah sɔ́ hwɛ kɛ ɛ. Bɔ Xó Mawu tɔn tinmɛ ɖɔ Mɔyizi nyí mɛɖé bo nɔ gbeji nú Mawu bɔ mǐ ɖó na xwedó kpɔ́ndéwú tɔn. (Sɛ́n. 34:10; Ebl. 11:24-28) Jehovah lɔn nú Mɔyizi yì Akpádídó Yikúngban ɔ jí ǎ, amɔ̌, é na fɔ́n Mɔyizi wá gbɛ̀ bɔ é na sixu nɔ gbɛ̀ kaka sɔyi ɖò Palaɖisi ayikúngban jí tɔn ɔ mɛ. Enyi mǐ kpò ɖò gǎn dó wɛ bo nɔ sɔnǔ nú jijɔ taji enɛ e nyí mɛɖéejiɖuɖe é ɔ, mǐ lɔ sixu ɖó nukúnɖiɖó gbɛ̀ mavɔmavɔ tɔn.—1 Kɔ. 9:25.