Biblu ɖɔ ǎ. Amɔ̌, é ná mɔjɛmɛ ɖaaɖagbe ɖé lɛ́, bɔ é sixú ko nyí nǔ énɛ́ lɛ́ bǐ wútu wɛ yě ma lɛ́ kɔ yi Nazalɛ́ti ɖo hwe ɔ nu ǎ.

Wɛnsagun ɖé ɖɔ nú Mali ɖɔ é ná mɔ xo bo ji vǐ. Hwenu e wɛnsagun ɔ dó wɛn énɛ́ Mali é ɔ, Mali kpó Jozɛ́fu kpó bǐ wɛ nɔ nɔ Nazalɛ́ti e ɖo Galilée yíkúngban jí é, ɖo Jozɛ́fu sín tomɛ. (Luk. 1:26-31; 2:4) Nukɔnmɛ hwenu e yě lɛ́ kɔ sín Ejípu é ɔ, yě lɛ́ yi Nazalɛ́ti. Fínɛ́ wɛ Jezu su ɖe, bo húzú Nazalɛ́tinu. (Mat. 2:19-23) Énɛ́ wú wɛ, ényí è ɖɔ Jezu, Jozɛ́fu kpó Mali kpó sín xó ɔ, ayi nɔ yá wǔ yi Nazalɛ́ti jí.

Hɛ̌nnumɔ Mali tɔn ɖokpó nɔ nyí Elizabɛ́ti, bo nɔ nɔ Judáa. Vɔ̌sánúxwlémawutɔ́ Zakalíi sín asi wɛ; nǎwe énɛ́ wɛ wá ji Jaan Batɛ́mublónúmɛtɔ́ ɔ. (Luk. 1:5, 9, 13, 36) Mali yi ba jǒnɔ Elizabɛ́ti ɖo Judáa, bo nɔ fínɛ́ nú sun atɔn. Énɛ́ gúdo ɔ, Mali lɛ́ kɔ yi Nazalɛ́ti. (Luk. 1:39, 40, 56) Énɛ́ wɛ zɔ́n bɔ Mali tuun ayǐ dó Judáa.

É wá yá é ɔ, Jozɛ́fu se tónú nú gbetakɛ́n e è ɖe tɔ́n ɖɔ è ní yi “dó nyǐkɔ wěma mɛ” é. Nǔgbó ɔ, Jozɛ́fu gosín Nazalɛ́ti bo yi “toxo Davídi tɔn” e è nɔ ylɔ́ ɖɔ Bɛteleyɛ́mu é mɛ, fí e è ɖɔ ɖ’ayǐ ɖɔ è ná ji Mɛsíya ɔ ɖe é. (Luk. 2:3, 4; 1 Sam. 17:15; 20:6; Micée 5:1) Ée Mali ji Jezu ɖo fínɛ́ gúdo é ɔ, Jozɛ́fu zɔn ali dó é kpó vǐ yɛ̌yɛ́ ɔ kpó jí káká yi Nazalɛ́ti ǎ. Yě cí Bɛteleyɛ́mu e ɖó kilomɛ́tlu 9 mɔ̌ dó Jeluzalɛ́mu é. Mɔ̌ mɛ ɔ, é ná bɔ wǔ nú yě bɔ yě ná sɔ́ vǐ yɛ̌yɛ́ ɔ yi tɛ́npli mɛ, bo yi sá vɔ̌ e Sɛ́n ɔ byɔ́ é.—Lev. 12:2, 6-8; Luk. 2:22-24.

Wɛnsagun Mawu tɔn ɔ ko ɖɔ nú Mali ɖ’ayǐ ɖɔ vǐ súnnu tɔn ná jínjɔ́n “axɔ́súzinkpo tɔ́ tɔn Davídi tɔn” jí, bo ná “nyí Axɔ́sú.” Bóyá Jozɛ́fu kpó Mali kpó sixú ko lin ɖɔ é ɖo tají ɖɔ è ní ji Jezu ɖo Davídi sín toxo mɛ. (Luk. 1:32, 33; 2:11, 17) Vlafo yě sixú ko lin ɖɔ nǔnywɛ́nú wɛ é ná nyí ɖɔ émí ní nɔ fínɛ́ káká jɛ hwenu e émí ná tuun nǔ e Mawu ba ɖɔ émí ní wa bɔ d’é wú é dó é.

Mǐ tuun táan nabí e yě nɔ Bɛteleyɛ́mu xɔ cóbɔ sunvíkpɔ́ntɔ́ lɛ́ yi dɔ̌n é ǎ. Amɔ̌ hwenɛ́nu ɔ, xwé ɖé gbe wɛ xwédo ɔ nɔ nɔ, bɔ “vǐ ɔ” ko ɖo susu wɛ, é sɔ́ ɖo kpɛ́nnyɛ́kpɛ́nnyɛ́ ǎ. (Mat. 2:11) É cí ɖɔ yě kún sɔ́ lɛ́ kɔ yi Nazalɛ́ti ó ɖɔhun, é nyɔ́ wa ɔ, yě cí Bɛteleyɛ́mu nú hwenu ɖé, bɔ fínɛ́ húzú xwé yětɔn.

Elódu ná gbe ɖɔ è ní hu “súnnuví e ko ɖó xwe we lɛ́ é kpó éé ma ko ɖó ǎ lɛ́ é kpó bǐ, ɖo Bɛteleyɛ́mu.” (Mat. 2:16) Wɛnsagun ɖokpó gb’akpá nú Jozɛ́fu dó xó ɔ wú, bɔ é kpó Mali kpó sɔ́ Jezu bo hɔn yi Ejípu, bo nɔ dɔ̌n káká jɛ hwenu e Elódu kú é. Nukɔnmɛ ɔ, Jozɛ́fu kplá xwédo tɔn, bɔ yě yi Nazalɛ́ti. Aniwú yě ma ka sɔ́ lɛ́ kɔ yi Bɛteleyɛ́mu ǎ? Ðó hwenɛ́nu ɔ, Elódu sín vǐ Akelawúsi wɛ ɖo acɛ kpa wɛ ɖo Judée; nya dǎkaxotɔ́ ɖé wɛ n’i. Gɔ́ ná ɔ, wɛnsagun ɖokpó lɛ́ gb’akpá nú Jozɛ́fu dó awǒvinú e ɖo kɔlílɛ́ yi dɔ̌n mɛ é wú. Ðo Nazalɛ́ti ɔ, Jozɛ́fu sixú kplɔ́n Jezu ɖo ayijayǐ mɛ, b’ɛ ná sɛn Mawu ganjí.—Mat. 2:19-22; 13:55; Luk. 2:39, 52.

É cí ɖɔ Jozɛ́fu ko kú cóbɔ Jezu hun gbɛ ninɔ ɖo jǐxwé sín ali ɖɔhun. Hǔn, ayǐkúngban jí wɛ è ná fɔ́n Jozɛ́fu dó. Ali ná hun nú mɛ gěgé bɔ yě ná mɔ ɛ, bɔ é ná ná mɔjɛmɛ gěgé yě dó nǔ e wú yě cí Bɛteleyɛ́mu hwenu e è ji Jezu gúdo é wú.