1-2. Lɔti ɖɔhun ɔ, wǔvɛ́ tɛ́ klisánwun lɛ́ ka sixú mɔ ɖo égbé?

 ÉNYÍ mǐ mɔ nǔ e mɛ lɛ́ nɔ sɔ́ dó ɖó nǔgbódodó walɔ ɖagbe tɔn ɖo gbɛ ɔ mɛ égbé bo nɔ xwedó lɛ́ é ɔ, lěe nǔ cí nú Lɔti é wɛ é nɔ cí nú mǐ lɔmɔ̌. “Wunhínhɔ́nnúwiwa mɛ nyanya lɛ́ tɔn ɖó wǔvɛ́ [nú Lɔti] tawun,” ɖó é tuun ɖɔ Tɔ́ mǐtɔn jǐxwé tɔn ɔ gbɛ́ wǎn nú walɔ nyanya. (2 Pi. 2:7, 8) Ðó Lɔti nɔ ɖó sísí e gɔ́ngɔ́n é nú Mawu, bo lɛ́ yí wǎn n’i tawun wútu ɔ, é gbɛ́ wǎn nú nǔwalɔ blíblí mɛ ɖěɖěe lɛ́ lɛ̌ dó è lɛ́ é tɔn. Mǐ lɔmɔ̌ ɔ, mɛ ɖěɖěe lɛ́ lɛ̌ dó mǐ lɛ́ é nɔ ɖó sísí káká ɖé nú nǔgbódodó walɔ ɖagbe tɔn Jexóva tɔn lɛ́ ǎ; mɛɖé lɛ́ tlɛ nɔ ɖó sísí ɖě ná ǎ tawun. Ényí mǐ kpo ɖo wǎn yí nú Mawu wɛ, bo lɛ́ kpo ɖo tíntɛ́nkpɔ́n wɛ, bo ɖó sísí e jɛxá é n’i ɔ, nǔ ná ɖo mɔ̌ có, mǐ ka sixú kpo ɖo mǐmɛ́ jí ɖo walɔ lixo.—Nǔx. 14:2.

² Jexóva nɔ d’alɔ mǐ bɔ mǐ nɔ kpé énɛ́ wú gbɔn wǔsyɛ́n dó lanmɛ nú mɛ e mǐ mɔ ɖo wěma Nǔnywɛ́xó tɔn mɛ é gblamɛ. Klisánwun lɛ́ bǐ, súnnu kpó nyɔ̌nu kpó, yɔkpɔ́vú kpó mɛxó kpó sixú ɖu le wěɖexámɛ e nǔnywɛ́ kpé, bɔ yě ɖo wěma énɛ́ mɛ é gbígbéjé kpɔ́n tɔn nǔgbó nǔgbó.

3. Sɔgbe xá Nǔnywɛ́xó 17:3 ɔ, ɖɔ hwɛjijɔ e wú é byɔ́ ɖɔ mǐ ní nya xɛ ɖo ayi mǐtɔn jí é ɖokpó. (Lɛ̌ kpɔ́n fɔtóo ɔ.)

³ Hwɛjijɔ tají e wú mǐ nɔ nya xɛ ɖo ayi nǔjlɛ́dónǔwú tɔn mǐtɔn jí é ɖokpó wɛ nyí ɖɔ Jexóva nɔ gbéjé ayi mǐtɔn kpɔ́n. Tínmɛ énɛ́ tɔn wɛ nyí ɖɔ Jexóva nɔ mɔ nǔ zɛ mɛ alɔkpa e mǐ nyí ɖo wěxo bɔ mɛ ɖěvo lɛ́ nɔ mɔ é wú, bo nɔ ɖ’ayi mɛ alɔkpa e mǐ nyí nǔgbó nǔgbó ɖo xomɛ é wú. (Xa Nǔnywɛ́xó 17:3.) Ényí mǐ bɛ́ nǔnywɛ́ tɔn e nɔ ná gbɛ mɛ é gɔ́ ayi mǐtɔn mɛ ɔ, é ná yí wǎn nú mǐ. (Jaan 4:14) Mɔ̌ wiwa ná zɔ́n bɔ nǔgbódodó walɔ ɖagbe tɔn enyíi gbɛ ɔ tɔn lɛ́, adingban Satáan tɔn lɛ́ kpó mɛ nyanya e ɖo gbɛ ɔ mɛ lɛ́ é kpó ná wa nǔ dó mǐ wú ǎ. (1 Jaan 5:18, 19) Ényí mǐ vɛ́ xá Jexóva  ɔ, wǎn e mǐ yí n’i é kpó sísí e mǐ ɖó n’i é kpó ná jɛjí. Ðó mǐ ma ba ná dó xomɛsin nú Tɔ́ mǐtɔn ǎ wútu ɔ, mǐ ná gbɛ́ wǎn nú linlin ɖěɖěe tlɛ sixú dɔn mǐ dó hwɛhuhu mɛ lɛ́ é. Ényí mǐ jló ná jɛ hwɛ mɛ ɔ, mǐ ná nɔ kan nǔ élɔ́ byɔ́ mǐɖée: ‘Nɛ̌ un ka sixú sɔ́ jlǒ dó dó xomɛsin nú mɛ e ɖe wǎnyíyí ɖaxó mɔ̌hun xlɛ́ mì é gbɔn?’—1 Jaan 4:9, 10.

4. Nɛ̌ sísí ɖíɖó nú Jexóva ka nya xɛ nɔví nyɔ̌nu ɖokpó jí, bɔ é ma jɛ hwɛ mɛ ǎ gbɔn?

⁴ Nɔví nyɔ̌nu ɖokpó nɔ nyí Marta, bo nɔ nɔ Croatie bɔ è tɛ́n ɛ kpɔ́n bónú é ná wa nǔblíblí; é wlán ɖɔ: “É nɔ vɛ́ wǔ nú mì ɖɔ má lin tamɛ ganjí, bo lɛ́ ɖí xwi xá linlin masɔgbe e un nɔ ɖó bá wa nǔ nyanya é. Amɔ̌, sísí ɖíɖó nú Jexóva cyɔ́n alɔ jǐ ce.” b Nɛ̌ sísí ɖíɖó nú Mawu ka cyɔ́n alɔ jǐ tɔn gbɔn? Marta ɖɔ ɖɔ émí nɔ lin tamɛ dó nǔ nyanya e mɛ gbeta nyanya ɖé kɔn wíwá ná dɔn émí dó lɛ́ é jí. Mǐ lɔmɔ̌ sixú wa nǔ ɖokpó ɔ. Nǔ e tlɛ nylá hú gǎn é wɛ nyí ɖɔ, mǐ ná dɔn Jexóva dó aluwɛ mɛ, bo sɔ́ ná kpé wú, bo ná sɛn ɛ káká sɔ́yi ǎ.—Bǐb. 6:5, 6.

5. Étɛ́ tan Leo tɔn ka sixú kplɔ́n we?

⁵ Ényí mǐ nɔ ɖó sísí nú Jexóva ɔ, mǐ ná zun xɔ́ntɔn xá mɛ ɖěɖěe nɔ wa nǔ nyanya lɛ́ é ǎ. Nǔ e Leo e nɔ nɔ Congo é kplɔ́n é nɛ́. Ée é bló batɛ́mu bɔ é bló xwe ɛnɛ gúdo é ɔ, é zun xɔ́ntɔn xá mɛ ɖěɖěe nɔ wa nǔ nyanya lɛ́ é. É lin ɖɔ gbɛ̌ mɔ̌hun lɛ́ dídó kún nylá ó, ɖó nú émí ma vɛ́ ko ɖo nǔ nyanya e yě nɔ wa lɛ́ é wa wɛ ǎ ɔ, émí kún ɖo hwɛ hu dó Jexóva wɛ ó. Amɔ̌, é lín ǎ bɔ é mɔ ɖɔ xɔ́ntɔn émítɔn nyanya énɛ́ lɛ́ zɔ́n bɔ émí jɛ ahan nu mú jí, lobo jɛ nǔblíblí wa jí. Énɛ́ gúdo ɔ, é jɛ tamɛ lin dó nǔ e mɛjitɔ́ tɔn e nyí klisánwun lɛ́ é kplɔ́n ɛ é kpó lě do é ɖ’awǎjijɛ sɔ hwenu e é ɖo Jexóva sɛn wɛ é kpó jí jí. Nɛ̌ nǔ lɛ́ ka wá yi gbɔn? Wǎgbɔ tɔn ɔ, é lɛ́ jɛ nǔ lɛ́ wa jí ganjí. Mɛxó agun tɔn lɛ́ d’alɔ ɛ bɔ é lɛ́ kɔ wá Jexóva gɔ́n. Égbé din ɔ, mɛxó agun tɔn kpó  gběxosín-alijítɔ́ titewungbe kpó wɛ n’i, bɔ é ɖo vǐví wǔjɔmɛ énɛ́ lɛ́ tɔn ɖu wɛ.

6. Nyɔ̌nu nǔjlɛ́dónǔwú tɔn vovo we tɛ́ lɛ́ xó ná ɖɔ wɛ mǐ ɖe din?

⁶ Mi nú mǐ ní gbéjé Nǔnywɛ́xó wěmata 9gɔ́ ɔ kpɔ́n; wěmata énɛ́ ɖɔ xó dó nyɔ̌nu we wú; mɛ ɖokpó nɔ te nú nǔnywɛ́, bɔ mɛ wegɔ́ ɔ nɔ te nú xlojijɔ. (Sɔ́ jlɛ́ dó Hlɔ̌manu lɛ́ 5:14 kpó Galátinu lɛ́ 4:24 kpó wú.) Ée mǐ ná ɖo wěmata ɔ gbéjé kpɔ́n wɛ é ɔ, hɛn d’ayi mɛ ɖɔ nǔblíblíwiwa kpó fɔtóo nǔblíblíwiwa tɔn kpó wɛ gba tamɛ nú mɛ lɛ́ ɖo gbɛ Satáan tɔn mɛ. (Efɛ́. 4:19) Énɛ́ wú ɔ, é ɖo tají ɖɔ mǐ ní kpo ɖo tíntɛ́nkpɔ́n wɛ, bo ɖó sísí e jɛxá é nú Mawu, lobo nyi alɔ nú nǔnyanyawiwa. (Nǔx. 16:6) Mɔ̌ mɛ ɔ, súnnu wɛ mǐ nyí oo, alǒ nyɔ̌nu wɛ mǐ nyí ɔ, mǐ mɛ bǐ sixú ɖu le nǔ e wěmata énɛ́ ɖɔ é tɔn. È tínmɛ ɖɔ nyɔ̌nu we énɛ́ lɛ́ bǐ wɛ ɖo mɛ e ma ko mɔ nǔ ɖě kpɔ́n ǎ lɛ́ é, alǒ “xlonɔ” lɛ́ ylɔ́ wɛ. Yě bǐ wɛ ɖɔ xó lěhun ɖé: ‘Mi wá xwé ce gbe, bo wá ɖu nǔ.’ (Nǔx. 9:1, 5, 6, 13, 16, 17) Amɔ̌, nǔ e mɛ gbeyíyí nú mɛylɔ́ylɔ́ vovo we énɛ́ lɛ́ nɔ tɔ́n kɔ dó é gbɔn vovo.

7. Sɔgbe xá Nǔnywɛ́xó 9:13-18 ɔ, étɛ́ ka nɔ jɛ dó mɛ e yí gbe nú ylɔ̌ e nyɔ̌nu tagbanɔ ɔ ylɔ́ yě lɛ́ é wú? (Lɛ̌ kpɔ́n ɖiɖe ɔ.)

⁷ Mi nú mǐ ní ɖɔ xó kpɛɖé dó mɛylɔ́ylɔ́ “nyɔ̌nu tagbanɔ” ɔ tɔn wú. (Xa Nǔnywɛ́xó 9:13-18.) É kpankɔ́n, bo sú xó sɛ́dó xlonɔ lɛ́ ɖɔ yě “ní wá fí,” bo wá ɖu agɔ̌. Étɛ́ ka jɛ dó mɛ e yí gbe nú mɛylɔ́ylɔ́ tɔn lɛ́ é wú? “Kú wɛ” yě kú. A sixú ko lɛ́ flín ɖɔ wěma Nǔnywɛ́xó tɔn ɖɔ xó dó xógbe nǔjlɛ́dónǔwú tɔn mɔ̌hun ɖěvo wú ɖo wěmata e jɛ nukɔn nú énɛ́ lɛ́ é mɛ. È gb’akpá nú mǐ dó mɛ e nyí mɛsi, bo ka lɛ́ nyí “[nyɔ̌nu gblégblé, nwt]” é wú. È ɖɔ nú mǐ ɖɔ: “Xwé tɔn ɔ, kú lixo wɛ é ɖe.” (Nǔx. 2:11-19) È gb’akpá nú mǐ ɖo Nǔnywɛ́xó 5:3-10 mɛ dó nyɔ̌nu ɖěvo wú, mɛsi wɛ n’i cóbó ka lɛ́ nyí “banawatɔ́”; “walɔ nyɔ̌nu mɔ̌hun tɔn ɔ, kú wɛ é nɔ kplá mɛ yi.”

8. Gbeta tɛ́ kɔn mǐ ka ɖó ná wá?

⁸ Mɛ ɖěɖěe se xó e sú wɛ “nyɔ̌nu tagbanɔ ɔ” ɖe lɛ́ é ɖó ná wá gbeta ɖé kɔn: Yě ná yí gbe nú ylɔ̌ e ylɔ́ yě wɛ é ɖe é alǒ gbɔ. É sixú byɔ́ ɖɔ mǐ lɔmɔ̌ ní wá gbeta mɔ̌hun ɖé kɔn. Ényí mɛɖé tɛ́n kpɔ́n bo ná bló bɔ mǐ ná wa nǔblíblí ɖé, alǒ ényí fɔtóo nǔblíblíwiwa tɔn ɖé wá xwetɔ́n ɖo nukɔn mǐtɔn ajijimɛ ɔ, étɛ́ mǐ ka ɖó ná wa?

9-10. Ðɔ hwɛjijɔ e wú mǐ ɖó ná nyi alɔ nú nǔblíblíwiwa é ɖé lɛ́.

⁹ Mǐ ɖó hwɛjijɔ ɖagbe e wú mǐ ná nyi alɔ nú nǔblíblíwiwa lɛ́ é. È tínmɛ ɖɔ “nyɔ̌nu tagbanɔ” ɔ ɖɔ xó élɔ́: “Sin e è fin ɔ nɔ nyɔ́ nu tawun!” Étɛ́ xó ɖɔ gbé è ka ja tawun bo ɖɔ “sin e è fin” é xó? Biblu jlɛ́ vǐví e súnnu kpó nyɔ̌nu kpó e ko wlí alɔ lɛ́ é nɔ se, ɖo xó e yě nɔ ɖó xá yěɖée mɛ é dó sin e nɔ fá kɔ nú mɛ é wú.  (Nǔx. 5:15-18) Súnnu kpó nyɔ̌nu kpó e wlí alɔ ɖo sɛ́n lixo é ɖó acɛ bo ná nɔ ɖóxó xá yěɖée. Amɔ̌, énɛ́ gbɔn vo tawun nú “sin e è fin” é. È hɛn ɔ, è ná ylɔ́ “sin e è fin ɔ” ɖɔ nǔ e sín gbe è ma ná ǎ é, alǒ agalilɛ. Mɛ ɖěɖěe nɔ wa mɔ̌ lɛ́ é nɔ lɔn nú mɛɖé nɔ tuun ǎ, lěe ajotɔ́ ɖé nɔ fin nǔ gbɔn é ɖɔhun. Mɛ e ɖo ‘sin ɔ’ fin nu wɛ lɛ́ é ɔ, é sixú cí nú yě ɖɔ é víví tawun, tají ɔ, ényí yě lin ɖɔ mɛɖé kún ná mɔ nǔ jɛ nǔ nyanya e wa wɛ émí ɖe é wú ó ɔ nɛ́. Amɔ̌, yěɖée blɛ́ wɛ yě ɖe, ɖó Jexóva mɔ nǔ e dó sin wɛ yě ɖe é bǐ. Nǔ ɖě sɔ́ nylá hú è ní ba fɛ́nú Mawu tɔn kpo ǎ, énɛ́ wú ɔ, nǔ ɖě “nyɔ́” ɖo fínɛ́ ǎ, alǒ yě mɔ vǐví ɖě bo se ǎ. (1 Kɔ. 6:9, 10) É ka nyí énɛ́ kɛ́ɖɛ́ ǎ, nǔ nɔ lɛ́ xá yě hú mɔ̌.

¹⁰ Agalilɛ sixú zɔ́n bɔ wi ɖě sɔ́ ná nɔ mɛ ta ǎ, è sixú mɔ ɖɔ è kún sɔ́ vó nǔɖé ó, mɔ xo maɖónukún, alǒ é tlɛ sixú zɔ́n bɔ xwédo mɛtɔn gba. É za wě din ɖɔ nǔnywɛ́nú wɛ é nyí ɖɔ è ní ma yí gbe nú ylɔ̌ e ylɔ́ mɛ wɛ nyɔ̌nu xlonɔ ɔ ɖe é ó. Gbɔn vo nú gblě e xɔ́ntɔn e mɛ e nɔ ɖ’alɔ ɖo nǔblíblíwiwa mɛ lɛ́ é zun xá Jexóva é nɔ gblé é ɔ, yě mɛ gěgé nɔ lɛ́ sɔ́ azɔn e nɔ zɔ́n bɔ yě nɔ yá wǔ kú lɛ́ é. (Nǔx. 7:23, 26) Wěmata 9, wěmafɔ 18gɔ́ ɔ fó gbɔn lě: “Yě tuun ɖɔ mɛ e xlojijɔ ylɔ́ lɛ́ ɔ, kútomɛ wɛ yě ko ɖe ǎ.” Bɔ aniwú mɛ gěgé ka nɔ yí gbe nú mɛylɔ́ylɔ́ tɔn e nɔ wá tɔ́n kɔ dó awě mɛ é?—Nǔx. 9:13-18.

11. Aniwú fɔtóo nǔblíblíwiwa tɔn lɛ́ kpínkpɔ́n ka nylá tawun?

¹¹ Nǔ e wú mǐ mɛ bǐ ɖó ná cɔ́ mǐɖée dó é ɖokpó wɛ nyí fɔtóo nǔblíblíwiwa tɔn lɛ́. Mɛɖé lɛ́ lin ɖɔ fɔtóo nǔblíblíwiwa tɔn lɛ́ kpínkpɔ́n kún nɔ wa nǔ ɖě dó mɛ wú ó. Amɔ̌, fɔtóo nǔblíblíwiwa tɔn lɛ́ kpínkpɔ́n nɔ wa nǔ dó mɛ lɛ́ wú, nɔ zɔ́n bɔ yě nɔ mɔ ɖɔ émí kún sɔ́ hwɛ́n nǔɖé ó, bɔ mɛ ɖěvo lɛ́ sɔ́ nɔ mɔ yɛ ɖě ɖo ta nú yě ǎ; gɔ́ ná ɔ, ta ɖiɖe sín mɛ nɔ lɛ́ vɛ́ wǔ nú yě. Ényí mɛ lɛ́ kpɔ́n fɔtóo nǔblíblíwiwa tɔn ɔ, é nɔ vɛ́ wǔ tawun ɖɔ yě ní wɔn. Nǔ e blá wǔ é wɛ nyí ɖɔ, fɔtóo nǔblíblíwiwa tɔn lɛ́ nɔ sú kún dó nú jlǒ nyanya lɛ́ ǎ, é nyɔ́ wa ɔ, zo wɛ yě nɔ lɛ́ flɔ́ dó glɔ̌ ná. (Koló. 3:5; Ja. 1:14, 15) Nǔgbó ɔ, mɛ ɖěɖěe nɔ kpɔ́n fɔtóo nǔblíblíwiwa tɔn lɛ́ é gěgé wɛ nɔ wá wa nǔblíblí.

12. Nɛ̌ mǐ ka nɔ xlɛ́ ɖɔ mǐ ɖo tíntɛ́nkpɔ́n wɛ bá nyi alɔ nú fɔtóo ɖěɖěe sixú zɔ́n bɔ linlin blíblí lɛ́ ná wá ayi mǐtɔn mɛ é gbɔn?

¹² Ðó mǐ nyí klisánwun wútu ɔ, ényí fɔtóo nǔblíblíwiwa tɔn ɖé wá xwetɔ́n ɖo tablɛ́ti, alǒ alǒkan mǐtɔn jí ajijimɛ ɔ, étɛ́ mǐ ka ɖó ná wa? Mǐ ɖó ná yá wǔ ɖe nukún sín jí. Ényí mǐ flín ɖɔ nǔ e xɔ akwɛ́ nú mǐ hú gǎn é wɛ nyí xɔ́ntɔn e mǐ zun xá Jexóva é ɔ, énɛ́ sixú d’alɔ mǐ bɔ mǐ ná yá wǔ ɖe afɔ mɔ̌hun. Fɔtóo e ma tlɛ nyí nǔblíblíwiwa tɔn ǎ é ɖé lɛ́ sixú zɔ́n bɔ linlin blíblí lɛ́ ná byɔ́ ayi mǐtɔn mɛ. Aniwú mǐ ka ɖó ná nyi alɔ nú yě? Ðó mǐ tlɛ ba ná lin tamɛ dó nǔ e ma sɔgbe ǎ é ɖé wiwa jí ǎ. (Mat. 5:28, 29) Mɛxó agun tɔn ɖokpó nɔ nɔ Thaïlande, bo nɔ nyí David; é ɖɔ: “Un nɔ kanbyɔ́ nyiɖée ɖɔ: ‘Ényí fɔtóo lɛ́ ná bo ma tlɛ nyí fɔtóo nǔblíblíwiwa tɔn lɛ́ ǎ, bɔ un ka ɖo kpínkpɔ́n wɛ ɔ, é ka ná víví nú Jexóva a?’ Tamɛ linlin gbɔn mɔ̌ nɔ d’alɔ mì bɔ un nɔ wa nǔ kpó nǔnywɛ́ kpó.”

13. Étɛ́ ka nɔ d’alɔ mǐ bɔ mǐ nɔ wa nǔ kpó nǔnywɛ́ kpó?

¹³ Ényí xɛsi nɔ ɖi mǐ dó nǔ ɖěbǔ e wiwa tɔn ná zɔ́n bɔ xomɛ ma ná hun Jexóva ǎ é wú ɔ, é ná d’alɔ mǐ bɔ mǐ ná wa nǔ kpó nǔnywɛ́ kpó. Xɛsi ɖiɖi nú Mawu, alǒ sísí ɖíɖó nú Mawu wɛ nyí “fí e” “nǔnywɛ́” bɛ́sín é, alǒ jɔtɛn nǔnywɛ́ tɔn. (Nǔx. 9:10) Mǐ mɔ énɛ́ ɖo bǐbɛ́mɛ Nǔnywɛ́xó wěmata 9gɔ́ ɔ tɔn, fí e è sɔ́ ‘nǔnywɛ́ jɔ nǔnywɛ́’ jlɛ́ dó nyɔ̌nu ɖěvo wú ɖe é.

14. Mɛylɔ́ylɔ́ e gbɔn vo nú éé xó mǐ se wá yi é tɛ́ xó è ka ɖɔ ɖo Nǔnywɛ́xó 9:1-6 mɛ?

¹⁴ Xa Nǔnywɛ́xó 9:1-6. Fínɛ́ ɔ, Jexóva e nyí Gbɛɖótɔ́ mǐtɔn, bo lɛ́ nyí jɔtɛn nǔnywɛ́ bǐ tɔn é  wɛ ylɔ́ mǐ. (Nǔx. 2:6; Hlɔ̌. 16:27) Ðo nǔjlɛ́dónǔwú élɔ́ mɛ ɔ, è ɖɔ xó nú mǐ dó xwé ɖaxó e ɖó dotín tɛ́nwe é wú. Énɛ́ xlɛ́ ɖɔ Jexóva nɔ hun alɔ dó ná nǔ mɛ, lobo nɔ lɛ́ dó doo nú mɛ ɖěɖěe ba ná zán gbɛ sɔgbe xá nǔnywɛ́ tɔn lɛ́ é bǐ.

15. Étɛ́ Mawu ka byɔ́ mǐ ɖɔ mǐ ní wa?

¹⁵ Jexóva nɔ hun alɔ dó ná nǔ mɛ, alǒ nɔ ná nǔ mɛ bɔ é nɔ túnflá. Nǔjlɛ́dónǔwú e è ná dó nyɔ̌nu e nɔ te nú ‘nǔnywɛ́ jɔ nǔnywɛ́’ é wú ɖo Nǔnywɛ́xó wěmata 9gɔ́ ɔ mɛ é kplɔ́n mǐ ɖɔ Jexóva nɔ hun alɔ dó ná nǔ mɛ, bo nɔ ná nǔ ɖagbe gěgé mǐ. Tan ɔ ɖɔ nú mǐ ɖɔ nyɔ̌nu nǔjlɛ́dónǔwú tɔn énɛ́ ɖa nǔɖuɖu tɔn ganjí, ɖa vɛ̌ɛn tɔn, lobo tɛ́ távo tɔn dó xwé tɔn gbe. (Nǔx. 9:2) Gɔ́ ná ɔ, wěmafɔ 4 kpó 5 kpó ɖɔ: “É [nǔnywɛ́ jɔ nǔnywɛ́] ɖɔ nú xlonɔ lɛ́ ɖɔ: ‘Mi wá bo wá ɖu nǔ e un ɖa é.’” Aniwú mǐ ka ɖó ná yi nǔnywɛ́ jɔ nǔnywɛ́ xwégbe bo ɖu nǔ e é xwlé mǐ é? Ðó Jexóva ba ɖɔ vǐ émítɔn lɛ́ ní ɖó nǔnywɛ́, bo nɔ ayijayǐ mɛ. É ba ɖɔ mǐ ní ɖe afɔ nyi do bónú énɛ́ ná wa nǔ dó mǐ wú ǎ. Énɛ́ wú wɛ “é nɔ sɛ nǔnywɛ́ e nyɔ́ zán é xwe nú nǔjlɔ́jlɔ́watɔ́.” (Nǔx. 2:7, nwt.) Ényí mǐ nɔ ɖó sísí e jɛxá é nú Jexóva ɔ, mǐ ná nɔ ba ná nyɔ́ ɖ’así tɔn. Mǐ nɔ se wě e é nɔ ɖe xá mǐ bɔ nǔnywɛ́ nɔ kpé lɛ́ é, bɔ kpó xomɛhunhun kpó wɛ mǐ nɔ xwedó.—Ja. 1:25.

16. Nɛ̌ sísí e Alain nɔ ɖó nú Mawu é ka d’alɔ ɛ bɔ é wá gbeta e nǔnywɛ́ kpé é ɖé kɔn gbɔn? Étɛ́ mɛ é ka tɔ́n kɔ dó?

¹⁶ Ð’ayi lěe sísí e jɛxá é ɖíɖó nú Mawu d’alɔ Alain, bɔ é wá gbeta e nǔnywɛ́ kpé é ɖé kɔn gbɔn é wú. Mɛxó agun tɔn wɛ n’i, b’ɛ lɛ́ nyí mɛ̌si nǔkplɔ́nmɛtɔ́; é ɖɔ: “Mɛ̌si gbɛ̌ ce lɛ́ gěgé nɔ kpɔ́n fɔtóo nǔblíblíwiwa tɔn lɛ́, bá mɔ tɛn dó tuun lěe è nɔ ɖóxó xá mɛ gbɔn é.” Amɔ̌, Alain tuun ɖɔ nǔ énɛ́ kún nyí nǔ ɖagbe ó. É ɖɔ: “Ðó un nɔ ɖó sísí nú Mawu wútu ɔ, un gbɛ́ bǐ gbídígbídí ɖɔ un kún ná kpɔ́n fímu énɛ́ lɛ́ ó. Un lɛ́ tínmɛ nǔ e wú wɛ é nú mɛ̌si gbɛ̌ ce lɛ́.” Wě e ‘nǔnywɛ́ jɔ nǔnywɛ́’ ɖe xá mɛ ɖɔ è ní “ɖi zɔnlin gbɔn nukúnnúmɔjɛnǔmɛ sín ali ɔ jí” é xwedó wɛ é ɖe mɔ̌. (Nǔx. 9:6) Kú e Alain kú dó gbeta tɔn énɛ́ e kɔn é wá é jí é zɔ́n bɔ mɛ̌si gbɛ̌ tɔn ɖé lɛ́ ɖo Biblu kplɔ́n wɛ din, bo nɔ lɛ́ yi kplé agun tɔn mǐtɔn lɛ́.

17-18. Nǔ ɖagbe tɛ́ lɛ́ sín vǐví ɖu wɛ mɛ ɖěɖěe sɔ ylɔ̌ ‘nǔnywɛ́ jɔ nǔnywɛ́’ tɔn lɛ́ é ka ɖe? Étɛ́ yě ka sixú ɖó nukún? (Lɛ̌ kpɔ́n ɖiɖe ɔ.)

¹⁷ Jexóva zán kpɔ́ndéwú nyɔ̌nu we énɛ́ lɛ́ tɔn dó xlɛ́ mǐ lěe mǐ ná ɖó awǎjijɛ gbɔn ɖo sɔgúdo é. Mɛ ɖěɖěe sɔ ylɔ̌ “nyɔ̌nu tagbanɔ” ɔ tɔn lɛ́ é nɔ tɛ́n kpɔ́n bo ná se “vǐví” e ɖo nǔblíblíwiwa mɛ lɛ́ é. È ná ɖɔ xójɔxó ɔ, yě tuun ɖɔ lěe zán gbɛ émítɔn gbɔn wɛ émí ɖe égbé é ná wa nǔ dó sɔgúdo émítɔn wú ǎ. Nǔwiwa yětɔn lɛ́ ɔ, “kú” wɛ é kplá yě xwe.—Nǔx. 9:13, 17, 18.

 ¹⁸ Mɛ ɖěɖěe sɔ ylɔ̌ nyɔ̌nu e nɔ te nú ‘nǔnywɛ́ jɔ nǔnywɛ́’ é tɔn lɛ́ é sín sɔgúdo ná gbɔn vo bǐ mlɛ́mlɛ́! Yě ɖ’awǎjijɛ, bo lɛ́ ɖó nǔ e sín hudó yě ná ɖó, bo ná kpo ɖo vǐvɛ́ xá Jexóva wɛ lɛ́ é bǐ. (Eza. 65:13) Jexóva ɖɔ gbɔn gbeyíɖɔ Ezayíi jí ɖɔ: “Mi bo ɖótó mì ganjí, énɛ́ ɔ, mi ná mɔ nǔ ɖagbe ɖu; mi ná ɖu nǔɖuɖu e víví ganjí é.” (Eza. 55:1, 2) Mǐ ɖo kplɔ́nkplɔ́n wɛ bá yí wǎn nú nǔ e Jexóva yí wǎn ná lɛ́ é, bo gbɛ́ wǎn nú nǔ e é gbɛ́ wǎn ná lɛ́ é. (Ðɛh. 97:10) Gɔ́ ná ɔ, ényí mǐ ɖo mɛ ɖěvo lɛ́ ylɔ́ wɛ ɖɔ yě ní wá ɖu vǐví ‘nǔnywɛ́ jɔ nǔnywɛ́’ tɔn ɔ, mǐ nɔ ɖó awǎjijɛ. Mǐ cí mɛsɛntɔ́ ɖěɖěe ná “sú xó bo da mɛ lɛ́ ɖɔ: ‘Mi nǔmanywɛ́tɔ́ e mi, mi wá fí’” lɛ́ é ɖɔhun. Le e ɖ’é mɛ nú mǐ kpó mɛ e ɖo ylɔ̌ mǐtɔn sɔ wɛ lɛ́ é kpó é ɖo din ǎ. Yě ɖo didɛ wɛ, bo nɔ hun ali nú mǐ, bónú mǐ ná “nɔ gbɛ” káká sɔ́yi, ée mǐ ná ɖo ‘zɔnlin zin gbɔn nukúnnúmɔjɛnǔmɛ sín ali ɔ jí’ wɛ é.—Nǔx. 9:3, 4, 6.

19. Sɔgbe xá Nǔnywɛ́tɔ́xó 12:13, 14 ɔ, étɛ́ mǐ ka ɖó ná kán ɖ’é jí bá wa? (Lɛ̌ kpɔ́n gbǎví “ Sísí ɖó nú Mawu nɔ nya xɛ ɖo mǐ jí.”)

¹⁹ Xa Nǔnywɛ́tɔ́xó 12:13, 14. Mi nú sísí ɖíɖó nú Mawu ní kpo ɖo xɛ nya ɖo ayi mǐtɔn jí wɛ, bo kpo ɖo alɔ dó mǐ wɛ bónú mǐ ná nɔ mǐmɛ́ jí ɖo walɔ kpó gbigbɔ kpó lixo ɖo azǎn gǔdo gúdo tɔn gbɛ nyanya élɔ́ tɔn lɛ́ mɛ. Sísí e jɛxá é mɔ̌hun ɖíɖó ná sísɛ́ mǐ bɔ mǐ ná kpo ɖo mɛ gěgé ylɔ́ wɛ lěe mǐ kpé wú gbɔn é, bónú yě ná wá ba ‘nǔnywɛ́ jɔ nǔnywɛ́,’ lobo ɖu le tɔn.