Mɛjitɔ́ ce lɛ́ gosín Estonie ɖo Wɛ̌kɛ́hwan wegɔ́ ɔ hwenu, bo yi Allemagne; fínɛ́ wɛ è ji mì ɖe. È ji mì gúdo é ɔ, mɛjitɔ́ ce lɛ́ jɛ nǔ sɔ́ jí bá sɛ tɛn yi Canada. Xwé mǐtɔn nukɔn nukɔntɔn ɔ ɖo malínmálín dó Ottawa, ɖo Canada; xwé kpɛví ɖé wɛ, bɔ kokló lɛ́ lɔ nɔ nɔ gbe. Mǐ jɛ hɛ̌n tawun, amɔ̌, é hwe bǐ ɔ, mǐ nɔ mɔ azin dó ɖu nǔɖuɖu zǎnzǎn tɔn.

Gbe ɖokpó ɔ, Kúnnuɖetɔ́ Jexóva tɔn lɛ́ xa Nǔɖexlɛ́mɛ 21:3, 4 nú nɔ ce. Nǔ e é se é byɔ́ ayi mɛ n’i káká bɔ é bɛ́ avǐ. Tɔ́ ce kpó nɔ ce kpó bǐ wɛ gbɛ kan dó Biblu kplɔ́nkplɔ́n nu, bɔ táan kpɛɖé gúdo ɔ, yě ɖo gbesisɔmɛ bá bló batɛ́mu.

Mɛjitɔ́ ce lɛ́ se Glɛ̌nsigbe sɔmɔ̌ ǎ, amɔ̌, yě sɔ́ nǔgbó ɔ dó ɖó yětɔn. Ðibla nyí samedi lɛ́ bǐ ɔ, tɔ́ ce ná bo w’azɔ̌ ɖo zǎn ɔ bǐ mɛ ɖo fí e è nɔ sínsín gan dó bló lǎmu ɖe ɖo Sudbury Ontario ɔ, é nɔ lɛ́ kplá nyi kpó nɔví ce nyɔ̌nu Sylvia kpó yi sinsɛnzɔ́ ɔ mɛ. Gɔ́ ná ɔ, ɖo aklúnɔzángbla ɖokpó ɖokpó mɛ ɔ, mǐ nɔ kplɔ́n Atɔxwɛ ɖó kpɔ́ ɖo xwédo mɛ. Papá ce kpó mamáa ce kpó dó wǎn yí nú Mawu dó ayi ce mɛ. Énɛ́ sísɛ́ mì bɔ un sɔ́ gbɛzán ce jó nú Jexóva ɖo 1956, hwenu e un ɖó xwe wǒ é. Wǎnyíyí ɖaxó e yě ɖó nú Jexóva é dó wǔsyɛ́n lanmɛ nú mì ɖo gbɛzán ce bǐ mɛ.

Ée un yí kúnnuɖewéma ɖo wěmaxɔmɛ linsinmɛ tɔn gúdo é ɔ, ayi ce jɛ jǎmijo. Un lin ɖɔ ényí un húzú gběxosín-alijítɔ́ ɔ, un kún ná kpé wú bá mɔ akwɛ́ e sín hudó ná ɖó bá kpé nǔ e gbé nya wɛ un ɖe é wú é gbeɖé ó; énɛ́ wɛ nyí ɖɔ ná dó jɔmɛhún, bo ná ɖi sa gbɔn gbɛ ɔ mɛ. Un mɔ azɔ̌ dó hladíóxwé xá ɔ mɛ tɔn ɖé, bo nɔ nɔ mɔ jí; un yí wǎn nú azɔ̌ énɛ́ tawun. Amɔ̌, gbadanu lɛ́ wɛ un nɔ w’azɔ̌, énɛ́ wú ɔ, hwɛhwɛ wɛ un nɔ gɔn kplé lɛ́, lobo nɔ nɔ kpɔ́ xá mɛ e ma yí wǎn nú Mawu ǎ lɛ́ é. Gǔdo mɛ ɔ, ayi ce e un sɔ́ Biblu dó kplɔ́n é sísɛ́ mì bɔ un bló hǔzúhúzú lɛ́.

Un sɛ tɛn yi Oshawa, ɖo Ontario. Fínɛ́ wɛ un xo go Ray Norman, nɔví nyɔ̌nu tɔn Lesli, gɔ́ nú gběxosín-alijítɔ́ ɖěvo lɛ́ ɖe. Yě bǐ wɛ bló bɔ un vo ganjí. Ée un mɔ lěe yě ɖó awǎjijɛ sɔ é ɔ, un vɔ́ nǔ e gbé nya wɛ un ɖe lɛ́ é gbéjé kpɔ́n. Yě dó wǔsyɛ́n lanmɛ nú mì ɖɔ nyi ní bɛ́ gběxosín-alijítɔ́zɔ́; nǔ e un ka wa nǔgbó é nɛ́ ɖo septembre 1966. Un ɖó awǎjijɛ; gbɛ e zán wɛ un ɖe é víví nú mì tawun. É ɖo mɔ̌ có, hǔzúhúzú e un ma ɖó nukún tɔn ǎ é ɖé lɛ́ wá xwetɔ́n.

Sín hwenu e un ɖo wěmaxɔmɛ linsinmɛ tɔn é ɖokpóo wɛ un ko d’alɔ wěma mɛ bo ná yi Betɛ́li ɖo Toronto, ɖo Canada. Nukɔnmɛ, hwenu e un jɛ  gběxosín-alijítɔ́zɔ́ wa jí é ɔ, è ylɔ́ mì ɖɔ má wá wa sinsɛnzɔ́ ɖo Betɛ́li nú xwe ɛnɛ. Amɔ̌, un yí wǎn nú Lesli tawun, bɔ ado hu mì ɖɔ ényí un yí gbe nú ylɔ̌ énɛ́ e è ylɔ́ mì é ɔ, mǐ kún sɔ́ ná wá xo go mǐɖée kpɔ́n ó. Ée un xo ɖɛ vívɛ́ nú hwenu gěgé gúdo é ɔ, un wá gbeta ɔ kɔn bá yi Betɛ́li, amɔ̌, é blá wǔ tawun ɖɔ un jó Lesli dó.

Un w’azɔ̌ ɖo avɔnyaxɔsá ɖo Betɛ́li, bɔ nukɔnmɛ ɔ, un wá nyí wěgbójínɔtɔ́. Ðo hwe ɖokpó ɔ nu ɔ, Lesli húzú gběxosín-alijítɔ́ titewungbe ɖo Gatineau, ɖo Québec. Un nɔ kan nǔ e wa wɛ é ɖe é byɔ́ nyiɖée hwɛhwɛ, bo nɔ kanbyɔ́ nyiɖée ɖɔ gbeta ɖagbe kɔn jɛ́n un ka wá a jí. Énɛ́ gúdo ɔ, nǔ ɖagbe e un ma lin kpɔ́n gbeɖé ǎ é ɖé jɛ ɖo gbɛzán ce mɛ. È ylɔ́ Lesli sín nɔví súnnu e nɔ nyí Ray é, bɔ é wá Betɛ́li, bɔ xɔ ɖokpó ɔ mɛ wɛ mǐ lɛ́ nɔ. Énɛ́ zɔ́n bɔ nyi kpó Lesli kpó lɛ́ jɛ xó ɖɔ jí. Xwe ɛnɛ ɔ wɛ ɖo gbe sɔ wɛ lě pɛ́pɛ́pɛ́ bɔ mǐ da mǐɖée ɖo 27 février 1971.

È sɛ́ nyi kpó Lesli kpó dó agun e nɔ dó Flanségbe ɖo Québec é ɖokpó mɛ. Xwe yɔywɛ ɖé gúdo ɔ, é kpácá mì ɖɔ è byɔ́ mì ɖɔ má wa nukúnkpénǔwútɔ́ lɛ̌dó tɔn sín azɔ̌ hwenu e un ɖó xwe 28 é. Un lin ɖɔ un kpo ɖo wǐnnyáwínnyá mɛ dín, bo kún ko mɔ nǔɖé kpɔ́n sɔmɔ̌ bá nyí nukúnkpénǔwútɔ́ lɛ̌dó tɔn ó, amɔ̌, xó e ɖo Jelemíi 1:7, 8 mɛ é dó wǔsyɛ́n lanmɛ nú mì. Nǔ ɔ wɛ ka nyí ɖɔ Lesli bló alitawoví kpó mɔ̌to kpó azɔn mɔ̌kpán, bɔ énɛ́ zɔ́n bɔ amlɔ dídɔ́ nɔ vɛ́ wǔ n’i. Énɛ́ wú ɔ, mǐ lin ɖɔ é ná vɛ́ wǔ tawun ɖɔ mǐ ní wa nukúnkpénǔwútɔ́ lɛ̌dó tɔn sín azɔ̌. É ɖo mɔ̌ có, é ɖɔ: “Ényí Jexóva byɔ́ mǐ ɖɔ mǐ ní wa nǔɖé ɔ, étɛ́wú mǐ ma ka ɖó ná tɛ́n kpɔ́n ǎ?” Mǐ yí gbe nú azɔ̌ e è sɔ́ d’así nú mǐ é, bo ɖu tomɛyiyizɔ́ wiwa sín vǐví nú xwe 17.

Hwenu e un nyí nukúnkpénǔwútɔ́ lɛ̌dó tɔn é ɔ, alɔnu ce nɔ ján tawun, bɔ un nɔ mɔ hwenu sɔmɔ̌ bo nɔ zán ɖó kpɔ́ xá Lesli ǎ. Un ɖó ná kplɔ́n nǔ yɔ̌yɔ́ ɖěvo. Lundi zǎnzǎn tɛɛn ɖokpó ɔ, gan e ɖo hɔntogbó mǐtɔn jí é ɖɔ nǔ. Mɛ ɖě ɖo hɔntogbó ɔ ta ǎ, nǔɖuɖuhɛnnú (glacière) ɖokpó kpó távojívɔ kpó, atínsínsɛ́n, nǔ e è nɔ dó ɖu pɛ́ɛn ná é (fromage), pɛ́ɛn, vɛ̌ɛn go ɖokpó, kɔ́fu kpó wěma ɖokpó kpó jɛ́n ɖo fínɛ́, bɔ è wlán nǔ élɔ́ d’é jí: “Kplá asi towe nú é ní yi ɖe ayi ɖ’ayǐ.” Azǎn ɖagbe ɖé wɛ, bɔ hwesivɔ́ lɛ́ hun. Amɔ̌, un tínmɛ nú Lesli ɖɔ un jló ná sɔ́ nǔ nú xóɖiɖɔ ɖé lɛ́, lé un kún ná sixú yi ó. É mɔ nǔ jɛ mɛ, amɔ̌, é kú wǔ n’i kpɛɖé. Un jínjɔ́n távo e tó un nɔ w’azɔ̌ ɖe é, bɔ ayixa ce jɛ hun xo xá mì jí. Un lin tamɛ dó Efɛ́zinu lɛ́ 5:25, 28 jí. Fínɛ́ ɔ, Jexóva dó wǔsyɛ́n lanmɛ nú mì ɖɔ nyi ní nɔ wlíbo nú asi ce, bónú nǔ e nɔ hudó è ɖo lěe nǔ nɔ cí nú mɛ é linu é, ní nɔ ɖu ayi mɛ nú mì. Ée un xo ɖɛ gúdo é ɔ, un ɖɔ nú Lesli ɖɔ “wǎ mǐ ní yi,” bɔ é víví n’i tawun. Mǐ kun mɔ̌to káká yi fí ɖɛkpɛ ɖɛkpɛ ɖé ɖo tɔsisa ɖé kpá, bo tɛ́ távojívɔ ɔ; azǎn e sín vǐví mǐ ɖu ɖó kpɔ́ tawun lɛ́ é ɖokpó nɛ́. Mǐ zán hwenu ɖó kpɔ́ có, un ka lɛ́ kpé wú bo sɔ́ nǔ nú xóɖiɖɔ ce lɛ́.

Mǐ ɖu vǐví nukúnkpénǔwútɔ́ lɛ̌dó tɔn sín azɔ̌ e mǐ wa gbɔn fí vovo lɛ́ é tɔn, sín Colombie-Britannique  yi Terre-Neuve. Jlǒ e un ɖó bá yi to mɛ é jɛnu. Un lin tamɛ dó wěmaxɔmɛ Galádi tɔn jí, amɔ̌, un jló ɖěbǔ bá nyí mɛsɛ́dó ɖo to ɖěvo mɛ ǎ. É cí ɖɔ mɛ bǔnɔ wɛ mɛsɛ́dó lɛ́ nyí, bɔ un mɔ ɖɔ un kún jɛxá ó. Gɔ́ ná ɔ, xɛsi ɖo ɖiɖi mì wɛ ɖɔ è sixú sɛ́ mǐ dó to ɖé mɛ ɖo Aflíka, fí e azɔn kpó ahwan kpó ɖo nǔ gba ɖe wɛ é ɖé. Un ɖó awǎjijɛ ɖo fí e un ɖe é.

Ðo 1992 ɔ, Kúnnuɖetɔ́ Jexóva tɔn lɛ́ sixú lɛ́ jɛ wɛn ɔ jlá jí ɖo agbawungba ɖo to e ko nɔ Union Soviétique sín acɛ mɛ wá yi é ɖé lɛ́ mɛ; énɛ́ wú ɔ, nɔví lɛ́ kanbyɔ́ mǐ ɖɔ mǐ ka jló ná sɛ tɛn yi Estonie, bá húzú mɛsɛ́dó a jí. É kpácá mǐ tawun, bɔ mǐ xo ɖɛ dó takún tɔn mɛ. Mǐ lɛ́vɔ́ lin tamɛ gbɔn lě: ‘Ényí Jexóva byɔ́ mǐ ɖɔ mǐ ní wa nǔɖé ɔ, aniwú mǐ ma ka ná tɛ́n kpɔ́n ǎ?’ Mǐ yí gbe nú azɔ̌ ɔ, bɔ agbɔ̌n ce jɛ do ɖɔ ‘é kún nyí Aflíka wɛ è sɛ́ mǐ dó ó.’

Tlóló jɛ́n mǐ jɛ Estonie sín gbe kplɔ́n jí. Mǐ nɔ to ɔ mɛ xɔ sun ɖé lɛ́ gúdo é ɔ, è byɔ́ mǐ ɖɔ mǐ ní wa nukúnkpénǔwútɔ́ lɛ̌dó tɔn sín azɔ̌. Mǐ ɖó ná ba agun 46 mɔ̌ kpó gbɛ̌ta ɖé lɛ́ kpó kpɔ́n ɖo Pays Baltes atɔn mɛ, bo lɛ́ yi Kaliningrad ɖo Russie. Énɛ́ byɔ́ ɖɔ mǐ ɖó ná tɛ́n kpɔ́n bo lɛ́ kplɔ́n Latvian, Lituanie sín gbe kpó Russie sín gbe kpó. É vɛ́ wǔ tawun. Amɔ̌, gǎn e mǐ nɔ dó lɛ́ é nɔ su xɔ́ntɔn lɛ́ nukúnmɛ, bɔ yě d’alɔ mǐ. Ðo 1999 ɔ, è ɖó alaxɔ ɖokpó ayǐ ɖo Estonie, bɔ è byɔ́ mì ɖɔ nyi ní wa azɔ̌ ɖo wěɖegbɛ́ alaxɔ tɔn mɛ xá Toomas Edur, Lembit Reile kpó Tommi Kauko kpó.

Mǐ wá tuun Kúnnuɖetɔ́ e è bɛ́ yi Sibérie ɖ’ayǐ lɛ́ é gěgé. È xo dǎka yě wú ɖo gankpá mɛ, bo lɛ́ ɖe yě ɖó vo nú xwédo yětɔn lɛ́ có, yě húzú kanɖutɔ́, alǒ mɛhɛndóxomɛtɔ́ ǎ. Yě kpo ɖo awǎjijɛ ɖó wɛ, bo nɔ lɛ́ ɖó kan dó nǔ wú ɖo sinsɛnzɔ́ ɔ mɛ. Kpɔ́ndéwú yětɔn xlɛ́ mǐ ɖɔ mǐ sixú dɛ, lobo lɛ́ ɖó awǎjijɛ ɖo ninɔmɛ vɛ́ wǔ lɛ́ mɛ.

Mǐ w’azɔ̌ syɛ́nsyɛ́n nú xwe gěgé; mǐ zán hwenu gěgé dó gbɔjɛ́ ǎ, énɛ́ zɔ́n bɔ nǔ wá cikɔ nú Lesli bǐ. Mǐ yá wǔ ɖ’ayi wú ɖɔ azɔn e nɔ zɔ́n bɔ nǔ nɔ yá wǔ cikɔ nú mɛ bɔ è nɔ ylɔ́ ɖɔ fibromyalgie é jɛ wɛ é ɖe ǎ. Mǐ lin tamɛ dó nǔjɔnǔ mɛ bo mɔ ɖɔ mǐ ɖó ná yá wǔ lɛ́ kɔ yi Canada. Hwenu e è ylɔ́ mǐ ɖɔ mǐ ní wá Patterson, ɖo New York États-Unis bá kplɔ́n nǔ d’é jí é ɔ, un xo nǔ kpɔ́n ɖɔ mǐ ka sixú yi a jí. Amɔ̌, ée mǐ xo ɖɛ vívɛ́ gěgé gúdo é ɔ, mǐ yí gbe. Jexóva kɔn nyɔ̌ná dó gbeta e kɔn mǐ wá é jí. Wěmaxɔmɛ énɛ́ hwenu wɛ Lesli wá mɔ nukúnkpémɛwú dotóoxwé tɔn e sín hudó é ɖó é ɖe. Énɛ́ wú ɔ, mǐ kpé wú bo lɛ́ jɛ azɔ̌ mǐtɔn lɛ́ wú ganjí.

Gbadanu ɖokpó ɖo 2008 ɔ, mǐ ɖo Estonie bɔ è ylɔ́ mì sín Hɔ̌nkan gbɛ ɔ tɔn mǐtɔn, bo kanbyɔ́ mì ɖɔ nyi ka ná jló bo ná yi Congo a jí. É kpácá mì tawun, tají ɔ, ɖó é byɔ́ ɖɔ má sɛ́ xósin ɔ dó ayǐhɔ́ngbe tɔn. Tlóló hwɛ̌ ɔ, un ɖɔ xó ɖé nú Lesli ǎ, ɖó un tuun ɖɔ é kún ná d’amlɔ zǎn énɛ́ mɛ ó. Nyi wɛ ma ka d’amlɔ zǎn énɛ́ mɛ ǎ; un ɖo ɖɛ xo sɛ́dó Jexóva wɛ, ɖó nǔ e nɔ ɖó adohu adohu nú mì dó Aflíka yiyi wú lɛ́ é wú.

Ayǐhɔ́ngbe tɔn e un ɖɔ nú Lesli é ɔ, mǐ lin tamɛ gbɔn lě: “Jexóva ɖo byɔ̌byɔ́ mǐ wɛ ɖɔ mǐ ní yi Aflíka. Ényí mǐ ma yi dɔ̌n ǎ ɔ, nɛ̌ mǐ ka sixú wa gbɔn bo tuun ɖɔ mǐ kún sixú kpé wú bo lɛ́ ɖu vǐví tɔn ó?” Énɛ́ wú ɔ,  ée mǐ nɔ Estonie nú xwe 16 gúdo é ɔ, mǐ yi Kinshasa, ɖo Congo. Jikpá ɖagbe ɖagbe ɖé ɖo alaxɔ ɔ mɛ, bɔ fí ɔ lɛ́ nyí fí e fá tawun é ɖé. Nǔ nukɔn nukɔntɔn e Lesli sɔ́ ɖó xɔ mǐtɔn mɛ lɛ́ é ɖokpó wɛ nyí káti e é hɛn sín hwenu e é gosín Canada é ɖokpóo é. Xó élɔ́ lɛ́ wɛ ɖo káti ɔ jí: “Ðǒ awǎjijɛ ɖo fí e è sɔ́ we ɖó é.” Ée mǐ ko xo go nɔví lɛ́, kpé nukún dó Biblu kplɔ́nkplɔ́n lɛ́ wú, lobo lɛ́ ɖu vǐví mɛsɛ́dózɔ́ wiwa tɔn gúdo é ɔ, awǎjijɛ e mǐ ɖó ɖo Jexóva sinsɛn mɛ é lɛ́ jɛ jí. É wá su hweɖénu bɔ è jɔ wǔ mǐ, bɔ mǐ yi ba alaxɔ 13 mɔ̌ kpɔ́n ɖo Aflíkato ɖěvo lɛ́ mɛ. Énɛ́ hun ali nú mǐ bɔ mǐ tuun mɛ gěgé ɖěvo lɛ́; kpɔ́ ninɔ xá yě víví kpɔ́n! Ado sɔ́ nɔ hu mì dó Aflíka ninɔ wú ǎ, bɔ mǐ nɔ dó kú nú Jexóva nú sɛ́ e é sɛ́ mǐ dó azɔ̌ wa n’i gbé ɖo Aflíka é.

Ðo Congo ɔ, nǔɖuɖu hǔnmɛ vovo lɛ́ wɛ è nɔ xwlé mǐ, nǔvínúví lɛ́ lɔ ɖ’é mɛ, bɔ mǐ nɔ lin ɖɔ ɖuɖu tɔn ná vɛ́ wǔ nú mǐ. Amɔ̌, hwenu e mǐ mɔ bɔ nɔví mǐtɔn lɛ́ nɔ ɖo nǔ énɛ́ lɛ́ sín vǐví ɖu wɛ é ɔ, mǐ lɔmɔ̌ tɛ́n kpɔ́n bo yí wǎn ná.

Mǐ dó wǔsyɛ́n lanmɛ nú nɔví lɛ́ ɖo zǎnzǎnhwe jí to ɔ tɔn, bo hɛn nǔ e hudó yě lɛ́ é ɖé lɛ́ yi jó nú yě; ɖo to ɔ sín akpáxwé énɛ́ lɛ́ ɔ, hǎ lɛ́ nɔ zɔn mɛ e ɖo gletoxo lɛ́ mɛ lɛ́ é jí, bo nɔ xo dǎka nyɔ̌nu lɛ́ kpó vǐ lɛ́ kpó wú. Nɔví lɛ́ gěgé ɖó nǔ nabí ɖé ǎ. É ɖo mɔ̌ có, nukúnɖíɖó syɛ́nsyɛ́n e yě ɖó nú fínfɔ́n sín kú é, wǎn e yě yí nú Jexóva é kpó gbejí e yě ɖe nú tutoblónúnǔ tɔn é kpó dó wǔsyɛ́n lanmɛ nú mǐ tawun. Kpɔ́ndéwú yětɔn sísɛ́ mǐ bɔ mǐ lin tamɛ dó nǔ e wú mǐ ɖo Jexóva sɛn wɛ é jí, bo lɛ́ ná hlɔ̌nhlɔ́n nǔ e mǐ ɖi n’i é. Nɔví ɖé lɛ́ ba xwé yětɔn kpó gle yětɔn kpó kpo. Énɛ́ flín mǐ ɖɔ mǐ sixú ba nǔɖókan mǐtɔn lɛ́ kpo ɖo cɛ́jú mɛ. Vɛ̌ e mǐ vɛ́ xá Jexóva é wɛ nyí nǔ tají hú gǎn ɔ. Nɔví mǐtɔn lɛ́ ɖo wǔvɛ́ syɛ́nsyɛ́n lɛ́ mɔ wɛ có, yě nɔ sa xwexwe ǎ. Lěe yě nɔ lin nǔ gbɔn é dó wǔsyɛ́n lanmɛ nú mǐ, bɔ mǐ sixú ɖó akɔ́nkpinkpan bo ɖí xwi xá tagba mǐtɔn lɛ́ kpó azɔn e mǐ nɔ jɛ lɛ́ é kpó.

Nǔ e mǐ ma ɖó ayi tɔn ǎ é ɖěvo jɛ. È byɔ́ mǐ ɖɔ mǐ ní sɛ tɛn yi alaxɔ Hong Kong tɔn mɛ. Mǐ lin gbeɖé ná nɔ Azíi ǎ. Amɔ̌, ée mǐ mɔ alɔ wǎnyíyínɔ Jexóva tɔn ɖo azɔ̌ e mǐ wa lɛ́ é bǐ mɛ gúdo é ɔ, mǐ yí gbe nú ylɔ̌ énɛ́ e è ylɔ́ mǐ é. Ðo 2013 ɔ, kpó avǐ kpó wɛ mǐ jó xɔ́ntɔn vívɛ́ mǐtɔn lɛ́ kpó nǔ ɖɛkpɛ ɖɛkpɛ e ɖo Aflíka lɛ́ é kpó dó, mǐ ka tuun nǔ e ɖo te kpɔ́n mǐ ɖo nukɔn é ǎ.

 Hǔzúhúzú ɖaxó wɛ Hong Kong ninɔ byɔ́ ɖo mǐ sí, ɖó gbɛtɔ́ sukpɔ́ tawun ɖo fínɛ́, bɔ mɛ e gosín awa gbɛ ɔ tɔn vovo lɛ́ xwé lɛ́ é wɛ ɖo fínɛ́. Chinois Cantonais kpínkplɔ́n nyí nǔ d’ayihún ɖěbǔ ǎ. É ɖo mɔ̌ có, nɔví lɛ́ dó kúabɔ nú mǐ kpó akpakpa sɔ́ mɛ kpó, bɔ mǐ lɛ́ ɖu vǐví nǔɖuɖu xá ɔ mɛ tɔn ɖé lɛ́ tɔn tawun. È w’azɔ̌ gěgé ɖo alaxɔ mɛ hwe ɔ nu, amɔ̌, hwe ɖokpó ɔ nu ɔ, xɔ lɛ́ sín akwɛ́ jɛ jí hazawun. Énɛ́ wú ɔ, Hǎgbɛ́ alixlɛ́mɛtɔ́ ɔ wá gbeta e nǔnywɛ́ kpé é ɖé kɔn, bo ɖɔ è ní sa alaxɔ ɔ sín xɔ lɛ́ hǎbǔ. Táan kpɛɖé ɖo énɛ́ gúdo ɖo 2015 ɔ, mǐ sɛ tɛn yi Corée du sud, bo gbɛ kan dó sinsɛnzɔ́ mǐtɔn nu. Mǐ ɖó ná lɛ́ kplɔ́n gbe e vɛ́ wǔ é ɖěvo; ɖo bǐbɛ́mɛ ɔ, mǐ nɔ sixú dó ganjí ǎ, énɛ́ wú ɔ, nɔví lɛ́ nɔ dó wǔsyɛ́n lanmɛ nú mǐ, bo nɔ ɖɔ mǐ ɖo gǎn dó dó Corée-gbe ɔ dídó wú wɛ tawun.

Xɔ́ntɔn yɔ̌yɔ́ lɛ́ zunzun nɔ bɔ wǔ hwebǐnu ǎ, amɔ̌, mǐ mɔ ɖɔ ényí è ɖe afɔ nukɔntɔn ɔ bo nɔ yí jǒnɔ mɛ ɖěvo lɛ́ tɔn ɔ, è sixú yá wǔ tuun yě. Mǐ mɔ ɖɔ vogbingbɔn nabí ɖé kún ɖo nɔví mǐtɔn lɛ́ tɛ́ntin ó, bo lɛ́ mɔ ɖɔ Jexóva dá mǐ ɖo ali jí wǔ ɖé nu bɔ mǐ sixú kpé wú bo zun xɔ́ntɔn xá mɛ gěgé, lobo lɛ́ yí wǎn nú yě.—2 Kɔ. 6:11.

Mǐ mɔ ɖɔ é byɔ́ ɖɔ mǐ ní nɔ yí mɛ lɛ́ lěe Jexóva nɔ wa gbɔn é, bo lɛ́ mɔ kúnnuɖenú ɖěɖěe xlɛ́ ɖɔ Jexóva yí wǎn nú mǐ, bo lɛ́ ɖo ali xlɛ́ mǐ wɛ lɛ́ é ɖo gbɛzán mǐtɔn mɛ. Hweɖébǔnu e awakanmɛ kú mǐ, alǒ mǐ ɖo kinkanbyɔ́ mǐɖée wɛ ɖɔ nɔví lɛ́ ka yí wǎn nú mǐ a jí é ɔ, mǐ nɔ vɔ́ káti ɖěɖěe xɔ́ntɔn lɛ́ sɛ́ dó mǐ lɛ́ é, alǒ wěmasɛ́dómɛ yětɔn e dó wǔsyɛ́n lanmɛ nú mǐ lɛ́ é xa. Jexóva ná xósin nú ɖɛ mǐtɔn lɛ́, vɔ́ gǎnjɛwú ná mǐ ɖɔ émí yí wǎn nú mǐ, lobo lɛ́ dó wǔsyɛ́n lanmɛ nú mǐ ɖɔ mǐ ní kpo ɖo nukɔn yi wɛ.

Xwe lɛ́ vlamɛ ɔ, nyi kpó Lesli kpó mɔ ɖɔ ényí alɔnu mǐtɔn ná bo tlɛ ján gbɔn ɖěbǔ ɔ, é ɖo tají tawun ɖɔ mǐ ní nɔ ba hwenu bo nɔ zán ɖó kpɔ́. Mǐ lɛ́ wá tuun nǔ e wú é nyɔ́ ɖɔ mǐ ní nɔ ko nǔ, tají ɔ, hwenu e mǐ ɖo gbe yɔ̌yɔ́ ɖé kplɔ́n wɛ bɔ mɛɖé gba afɔ ɖo mǐ mɛ é é. Gɔ́ ná ɔ, ɖo zǎn lɛ́ bǐ mɛ ɔ, mǐ nɔ tɛ́n kpɔ́n bo nɔ lin tamɛ dó nǔ e sín vǐví mǐ ɖu é ɖé jí, bo nɔ dó kú tɔn nú Jexóva.

Nú un ná ɖɔ xójɔxó ɔ, un mɔ ɖɔ un kún sixú nyí mɛsɛ́dó, alǒ nɔ to ɖěvo mɛ gbeɖé ó. É ɖo mɔ̌ có, un mɔ awǎjijɛ, ɖó un kplɔ́n ɖɔ kpó alɔdó Jexóva tɔn kpó ɔ, è sixú wa nǔ bǐ. Xó élɔ́ e gbeyíɖɔ Jelemíi ɖɔ é wá ayi ce mɛ: “Jexóva è, a ko blɛ́ mì.” (Jel. 20:7, nwt) Ɛɛn, nyɔ̌ná e mǐ ma ɖó nukún tɔn ǎ é gěgé sín vǐví wɛ é bló bɔ mǐ ɖu, bɔ mǐ tlɛ lin kpɔ́n ɖɔ mǐ ná mɔ nǔ mɔ̌hun lɛ́ ǎ; é tlɛ lɛ́ bló bɔ jlǒ e un ɖó bo ná dó jɔmɛhún gbɔn tomɛ tomɛ é lɔ jɛnu. Mǐ zɔn jɔmɛhún mɛ gbɔn fí gěgé, bo yi ba alaxɔ gěgé kpɔ́n ɖo awa vovo gbɛ ɔ tɔn lɛ́ xwé; un tlɛ lin ná yi fí énɛ́ lɛ́ ɖě kpɔ́n gbeɖé ɖo dlɔ̌ e un nɔ kú hwenu e un ɖo vǔ é lɛ́ é mɛ ǎ. É lɛ́ su nukún ce mɛ tawun ɖɔ Lesli nɔ ɖo gbesisɔmɛ bá nɔ gǔdo nú mì ɖo azɔ̌ e è ɖe nú mì lɛ́ é bǐ kɔn.

Hwebǐnu wɛ mǐ nɔ flín nǔ mǐɖée dó mɛ e wa azɔ̌ ná wɛ mǐ ɖe é kpó nǔ e wú mǐ ɖo azɔ̌ wa n’i wɛ é kpó wú. Nyɔ̌ná e sín vǐví ɖu wɛ mǐ ɖe égbé lɛ́ é ɔ, tɔ́n nǔ e jawě ɖo sɔgúdo hwenu e Jexóva ná ‘hun alɔ tɔn bo ná ná nǔɖuɖu nǔ e ko sixú ɖo gbɛ é bǐ, bɔ yě ná ɖu nǔ gɔ́ xo’ é tɔn kpowun wɛ.—Ðɛh. 145:16.