SÍN dò wɛ Izlayɛli-ví lɛ ko ɖó aca ɔ bo nɔ sú akwɛ dó nɔ gudo nú Mawu sinsɛn nǔgbo ɔ. Amɔ̌, ɖò Jezu hwenu ɔ, takwɛ vovo gegě wɛ Jwifu lɛ ɖó na sú, bɔ enɛ hɛn gbɛ̀ vɛwǔ nú ye.

Bo na dó nɔ gudo nú azɔ̌ vovo e è nɔ wà ɖò goxɔ e wá huzu tɛmpli ɔ é mɛ ɔ, Jwifu sunnu e nyí mɛxo lɛ é bǐ ɖó na na kpatagan glamu atɔ́ɔ́n. Ðò xwè kanweko nukɔntɔn ɔ mɛ ɔ, è nɔ zán nǔnina enɛ lɛ dó jlá tɛmpli e Elodu gbá é ɖó na, lobo nɔ lɛ́ zán dó vɔsisa lɛ sín kanta. Jwifu ɖé lɛ kan linlin e Jezu ɖó dó takwɛxó ɔ wu é byɔ Piyɛ́ɛ, Jezu ka ɖɔ ɖɔ é kún nyla ɖɔ è ni sú takwɛ o. Nǔgbo ɔ, Jezu ɖɔ fí e Piyɛ́ɛ na mɔ akwɛ ɔ ɖè, bo na dó sú takwɛ ɔ é n’i.—Mat. 17:24-27.

Hwenɛnu ɔ, togun Mawu tɔn lɔ ɖó na na maɖówǒ, enɛ wɛ nyí, nǔ e nyɔ́ ɖò gle yetɔn mɛ lɛ é bǐ sín maɖówǒ, alǒ nǔ e ye wà bo mɔ lɛ é sín maɖówǒ. (Lev. 27:30-32; Kɛ́n. 18:26-28) Sinsɛngán lɛ nɔ zyan vǎ d’eji ɖɔ è ɖó na sú maɖówǒ jinukún lɛ bǐ tɔn hlɛ́nhlɛ́n, kaka jɛ “nǔhwɛ́nkún” lɛ tɔn jí. Jezu mɔ xó ɖɔ dó maɖówǒ súsú xó ɔ wu ǎ, amɔ̌, yɛmɛnúwiwa sɛ́nkplɔnmɛtɔ́ lɛ kpo Falizyɛn lɛ kpo tɔn wɛ é ɖè gbà.—Mat. 23:23.

Hwenɛnu ɔ, Hlɔmanu lɛ wɛ ɖò acɛ kpa wɛ, bo nɔ yí takwɛ gegě ɖò toví lɛ sí. Ði kpɔ́ndéwú ɔ, ye nɔ yí takwɛ ɖò mɛ ɖěɖee ɖó ayikúngban yeɖesunɔ tɔn lɛ é sí, bɔ mɛ enɛ lɛ sixu na akwɛ, alǒ nǔɖokan yetɔn lɛ dó sú takwɛ enɛ. È da kpɔ́n bo mɔ ɖɔ nú è má ɖó zɛ̌nzɛ̌n ɔ, ɖò kanweko jí ɔ, ye nɔ yí jinukún e ayikúngban ɔ na é 20 jɛ 25. Jwifu ɖokpo ɖokpo ɖó na lɛ́ na takwɛ éɖesunɔ tɔn. Takwɛ enɛ wu wɛ Falizyɛn lɛ kan xó byɔ Jezu dó. É sɛ̀ sin xwè nú nǔ e éɖesunɔ lin dó xó ɔ wu é gbɔn lě: “Mi bo sɔ́ nǔ e nyí Dada Hlɔma tɔn tɔn ɔ jó nú Dada Hlɔma tɔn, bo sɔ́ nǔ e nyí Mawu tɔn ɔ jó nú Mawu.”—Mat. 22:15-22.

È nɔ lɛ́ yí takwɛ ɖò agban ɖěɖee nɔ byɔ tò ɖé mɛ, alǒ tɔ́n sín tò ɔ mɛ lɛ é jí. Zohunglíntɛn lɛ, anǎ lɛ jí, alikpléhɔ̌nkantɛn lɛ, alǒ fí ɖěɖee è nɔ gbɔn dó byɔ tò lɛ, kabǐ axi lɛ mɛ lɛ é wɛ è nɔ cyan akwɛ enɛ lɛ ɖè.

Kplékplé takwɛ ɖěɖee è nɔ yí ɖò mɛ ɖěɖee ɖò acɛkpikpa Hlɔma tɔn glɔ́ lɛ é sí lɛ é sukpɔ́ tawun bo túnflá. Hwenuxó-wlántɔ́ Hlɔma tɔn Tacitus ɖɔ ɖɔ hwenu e Tokpɔngán Tibɛ́ɛ ɖò acɛ kpa wɛ, hwenu e Jezu ɖò ayikúngban jí é ɔ, “Silíi tò ɔ kpo Judée tò ɔ kpo savo ɖɔ è ni ɖè takwɛ emitɔn kpò, ɖó súsú tɔn hú agbɔ̌n emi.”

Lee è nɔ cyan takwɛ enɛ lɛ gbɔn é zɔ́n bɔ é nɔ hú agbɔ̌n mɛ lɛ tawun. Mɛ ɖěɖee nɔ sú akwɛ gegě bo na dó mɔ azɔ̌ enɛ lɛ é wɛ è nɔ na gbè, bɔ ye nɔ cyan takwɛ. Mɛ ɖěɖee nɔ na akwɛ gegě dó azɔ̌ enɛ takúnmɛ, bo na dó ɖu nǔ ɖò nǔ mɛ lɛ é nɔ tò xá mɛ ɖevo lɛ, bonu ye na nɔ cyan takwɛ enɛ lɛ nú ye, lobɔ ye bǐ nɔ tɛ́n kpɔ́n bo nɔ mɔ yetɔn d’eji. É cí ɖɔ tokwɛyitɔ́ mɔ̌hun lɛ ko nɔ acɛ Zacée tɔn glɔ́ kpɔ́n. (Luki 19:1, 2) É ɖò wɛn ɖɔ mɛ lɛ ɖó ayi enɛ wu, bo gbɛ́ wǎn nú mɛ ɖěɖee nɔ cyan takwɛ ɖò ye sí lɛ é.