1. Etɛ è ka ɖɔ nú mɛ wɔbuwɔbu ɖé ɖò xwè kanweko nukɔntɔn ɔ mɛ ɖɔ é ni wà?

MƐ WƆBUWƆBU ɖé kplé; sunnu kpo nyɔnu kpo e gosin tò vovo mɛ, bo nɔ lɛ́ dó gbè vovo lɛ é wɛ ɖ’emɛ. Nǔjiwǔ ɖé jɛ gbè enɛ gbè. Ajijimɛ kpowun ɔ, Jwifu ɖé lɛ kpéwú bo jɛ toɖevomɛnu lɛ sín gbè dó jí. Nǔ enɛ kpaca ye tawun. Amɔ̌, nǔ e Jwifu enɛ lɛ ɖò ɖiɖɔ wɛ lɛ é kpo nǔ e mɛsɛ́dó Piyɛ́ɛ ɖɔ nú ye lɛ é kpo lɛ́ jiwǔ hugǎn. Ye mɛ e ɖò finɛ lɛ é lɛ́ sè ɖɔ enyi emi ɖi nǔ nú Jezu Klisu ɔ, emi sixu gán. Wɛn ɔ byɔ ayi mɛ nú ye tawun. Nǔgbo ɔ, é sɔ́ akpakpa ye sɔmɔ̌, bɔ ye kanbyɔ ɖɔ: “Etɛ mǐ ka ɖó na wà?” Bɔ Piyɛ́ɛ yí gbè nú ye ɖɔ: “Ðokpo ɖokpo mitɔn ni [bló baptɛm].”—Mɛ. 2:37, 38.

2. Etɛ mǐ ka na gbéjé kpɔ́n ɖò xóta elɔ mɛ? (Kpɔ́n ɖiɖe e ɖò akpa ɔ jí é.)

² Nǔ e jɛ bɔ d’ewu é sɔ́ akpakpa mɛ tawun. Mɛ 3 000 mɔ̌ bló baptɛm gbè enɛ gbè, bo huzu ahwanvu Klisu tɔn lɛ. Fí e nǔ kplɔnkplɔn mɛ lɛ bonu ye na huzu ahwanvu sín azɔ̌ ɖaxó e Jezu byɔ ahwanvu tɔn lɛ ɖɔ ye ni wà é bɛ́sín é nɛ. Azɔ̌ enɛ gbló ada kaka wá jɛ azǎn mǐtɔn gbè. Égbé ɔ, mǐ sixu ɖɔ xó xá mɛɖé nú ganxixo yɔywɛ ɖé, bɔ enɛ gudo ɔ, é na ɖò gbesisɔmɛ bo na bló baptɛm ǎ. É sixu byɔ sun lɛ, xwè ɖokpo alǒ hú mɔ̌ ɖò Biblu kplɔntɔ́ ɖé sí cobɔ é na kpé enɛ wu. Nǔ kplɔnkplɔn mɛ lɛ bonu ye na huzu ahwanvu nɔ byɔ azɔ̌. Enyi a ɖò Biblu kplɔ́n xá mɛɖé wɛ ɖò alɔnu dìn ɔ, a na ko mɔ nǔ jɛ enɛ wu ganji. Ðò xóta elɔ mɛ ɔ, mǐ na gbéjé nǔ e a sixu wà dó d’alɔ Biblu kplɔntɔ́ towe bɔ é na jɛxa bo na bló baptɛm é kpɔ́n.

3. Etɛ Matie 28:19, 20 ka ɖɔ ɖɔ Biblu kplɔntɔ́ ɖé ɖó na wà bo na yì nukɔn bo bló baptɛm?

³ Cobonu Biblu kplɔntɔ́ ɖé na bló baptɛm ɔ, é ɖó na nɔ zán gbɛ̀ sɔgbe xá nǔ e Biblu kplɔ́n mɛ lɛ é. (Xà Matie 28:19, 20.)  Enyi Biblu kplɔntɔ́ ɖé nɔ zán nǔ e é kplɔ́n lɛ é ɔ, é na cí “gbɛtɔ́ ayiɖotenanɔ” e xó Jezu ɖɔ ɖò nǔjlɛdonǔwu tɔn mɛ, b’ɛ kun dò tawun, bo dó xɔ tɔn nyi dò ɖò só jí é ɖɔhun. (Mat. 7:24, 25; Luk. 6:47, 48) Nɛ̌ mǐ ka sixu d’alɔ Biblu kplɔntɔ́ ɖé b’ɛ na nɔ zán nǔ e kplɔ́n wɛ é ɖè lɛ é gbɔn? Mi nú mǐ ni gbéjé lee mǐ sixu wà mɔ̌ gbɔn é atɔn kpɔ́n.

4. Nɛ̌ mǐ ka sixu d’alɔ nǔkplɔntɔ́ ɖé b’ɛ na kpò ɖò gǎn dó wɛ bo na jɛxa bá bló baptɛm gbɔn? (Lɛ̌ kpɔ́n gbǎví “ D’alɔ Nǔkplɔntɔ́ Towe Bonu É Ni Nya Nǔɖe lɛ Gbé Lobo Kpéwú.”)

⁴ D’alɔ Biblu kplɔntɔ́ towe bonu é ni sɔ́ nǔɖe lɛ dó nukɔn nú éɖée, bo nya gbě yetɔn. Etɛwu a ka ɖó na wà mɔ̌? Ðǒ ayi nǔjlɛdonǔwu elɔ wu: Enyi a xwè fí línlín ɖé ɔ, a sixu wá gbeta ɔ kɔn, bo na nɔ nɔte ɖò fí e dɔn mɛ é ɖé lɛ. Enɛ ɔ, fí e a xwè ɔ sɔ́ na lín nukún towe mɛ dín bɔ akpɔ na ɖó we ǎ. Mɔ̌ ɖokpo ɔ, enyi Biblu kplɔntɔ́ ɖé nɔ sɔ́ nǔ klewun klewun lɛ ɖó nukɔn nú éɖée bo nɔ jɛ kɔn ɖò táan klewun ɖé mɛ ɔ, é na ɖibla mɔ ɖɔ emi sixu kpé baptɛm e gbé nya wɛ emi ɖè é wu. Zǎn gbǎví “Nǔ E Gbé A Sixu Nya É” ee ɖò wema Ðu Gbɛ̀ Víví Kaka Sɔyi! ɔ mɛ é, dó d’alɔ nǔkplɔntɔ́ towe bonu é ni yì nukɔn. Ðò nǔkplɔnkplɔn ɖokpo ɖokpo sín vivɔnu hǔn, mi ɖɔ xó ɖó kpɔ́ dó lee gbǎví “Nǔ E Gbé A Sixu Nya É” cá kan xá nǔ e nǔkplɔntɔ́ ɔ kplɔ́n ɖò nǔkplɔnkplɔn ɔ mɛ é gbɔn é jí. Enyi a lin nǔ ɖevo lɛ, bo mɔ ɖɔ nǔkplɔntɔ́ towe na nya gbě yetɔn hǔn, wlǎn ye dó akpáxwé “Nǔ ɖevo” glɔ́. Nɔ zán akpáxwé nǔkplɔnkplɔn ɔ tɔn enɛ hwɛhwɛ dó vɔ́ nǔ klewun klewun e gbé nya wɛ nǔkplɔntɔ́ towe ɖè lɛ é kpo nǔ ɖěɖee na ɖu hwenu ɖò así tɔn cobɔ é na kpé ye wu lɛ é kpo gbéjé kpɔ́n xá ɛ.

5. Lee Maki 10:17-22 ɖɔ gbɔn é ɔ, etɛ Jezu ka ɖɔ nú nya dɔkunnɔ ɖé ɖɔ é ni wà? Etɛwu?

⁵ D’alɔ nǔkplɔntɔ́ towe bonu é ni bló huzuhuzu e sixu vɛwǔ n’i lɛ é ɖò gbɛzán tɔn mɛ. (Xà Maki 10:17-22.) Jezu tuùn ɖɔ é na vɛwǔ nú dɔkunnɔ ɖé ɖɔ é ni sà nǔɖokan tɔn lɛ bǐ. (Mak. 10:23) É ka ɖò mɔ̌ có, Jezu ɖɔ nú nya ɔ  ɖɔ é ni bló huzuhuzu ɖaxó enɛ ɖò gbɛzán tɔn mɛ. Etɛwu? Ðó Jezu yí wǎn n’i. Hweɖelɛnu ɔ, mǐ sixu gɔn wusyɛn dó lanmɛ nú nǔkplɔntɔ́ ɖé ɖɔ é ni zán nǔ e kplɔ́n wɛ é ɖè lɛ é, ɖó mǐ mɔ ɖɔ é kún ɖò gbesisɔmɛ bo na bló huzuhuzu e jɛxa é ɖé ó. É sixu byɔ hwenu cobɔ mɛ lɛ na bló huzuhuzu lɛ ɖò gbɛzán yetɔn mɛ, bo sɔ́ gbɛtɔ́ yɔyɔ̌ ɔ dó. (Kolo. 3:9, 10) Amɔ̌, lee a yawǔ ɖɔ xó dó xó ɔ jí xá nǔkplɔntɔ́ ɔ gbɔn é ɔ, mɔ̌ wɛ é na yawǔ jɛ huzuhuzu lɛ bló jí gbɔn é nɛ. Gbɔn xóɖɔɖókpɔ́ mɔ̌hun gblamɛ ɔ, a na ɖexlɛ́ ɖɔ nǔ tɔn nɔ ɖu ayi mɛ nú we.—Ðɛh. 141:5; Nǔx. 27:17.

6. Etɛwu mǐ ka ɖó na nɔ kan nǔ e nǔkplɔntɔ́ mǐtɔn lin é byɔ ɛ?

⁶ É ɖò taji ɖɔ mǐ ni nɔ kan nǔ e Biblu kplɔntɔ́ mǐtɔn lin dó nǔɖe wu é byɔ ɛ. É na zɔ́n bɔ a na tuùn nǔ e mɛ nǔkplɔntɔ́ towe mɔ nǔ jɛ lɛ é kpo nǔ e é ɖi nǔ na lɛ é kpo. Enyi a nɔ wà mɔ̌ hwɛhwɛ ɔ, a na mɔ ɖɔ xóɖɔɖókpɔ́ dó nǔkplɔnmɛ ɖěɖee sixu vɛwǔ n’i, bɔ é na yí gbè na lɛ é jí na wá bɔwǔ ɖò nukɔnmɛ. Nǔkanbyɔ ɖěɖee na zɔ́n bɔ nǔkplɔntɔ́ ɔ na ɖɔ linlin tɔn lɛ é gegě wɛ ɖò wema Ðu Gbɛ̀ Víví Kaka Sɔyi! ɔ mɛ. Ði kpɔ́ndéwú ɔ, nǔkplɔnkplɔn 04gɔ́ ɔ kanbyɔ ɖɔ: “Enyi a nɔ zán nyikɔ Jehovah tɔn ɔ, nɛ̌ nǔ ka nɔ cí n’i bɔ a lin? Nǔkplɔnkplɔn 09gɔ́ ɔ kanbyɔ ɖɔ: “Nǔ ɖě tɛ lɛ mɔ̌ takúnmɛ a ka jló na xoɖɛ dó?” Ðò bǐbɛ̌mɛ ɔ, é sixu byɔ hwenu ɖò nǔkplɔntɔ́ towe sí, bɔ é na lin tamɛ dó lee é na na xósin nú nǔkanbyɔ enɛ lɛ gbɔn é jí. A sixu d’alɔ ɛ gbɔn kplɔnkplɔn ɛ bonu é na nɔ lin tamɛ dó wemafɔ lɛ kpo ɖiɖe ɖěɖee ɖò wema ɔ mɛ lɛ é kpo jí gblamɛ.

7. Nɛ̌ mǐ ka sixu zán kpɔ́ndéwú mɛ ɖevo lɛ tɔn ganji gbɔn?

⁷ Enyi nǔkplɔntɔ́ towe mɔ nǔ jɛ nǔ e é ɖó na wà é mɛ hǔn, zǎn kpɔ́ndéwú nǔ e jɛ ɖò gbɛzán mɛɖé tɔn mɛ é tɔn lɛ dó dó wusyɛn lanmɛ n’i bonu é ni wà mɔ̌. Ði kpɔ́ndéwú ɔ, enyi nǔkplɔntɔ́ towe ma nɔ wá kplé lɛ hwɛhwɛ ǎ ɔ, a sixu xlɛ́ ɛ video Jehovah Kpé Nukún Dó Wǔ Ce ee ɖò akpáxwé “Kíjé” mɛ ɖò nǔkplɔnkplɔn 14gɔ́ ɔ mɛ é. Ðò nǔkplɔnkplɔn wema Ðu Gbɛ̀ Víví Kaka Sɔyi! ɔ tɔn lɛ gegě mɛ ɔ, a na mɔ kpɔ́ndéwú mɔ̌hun lɛ ɖò akpáxwé “Ba Dò nú Nǔ D’eji” alǒ “Kíjé” glɔ́. * Ðǒ ayi te bo ma nɔ jlɛ́ nǔkplɔntɔ́ towe dó mɛ ɖevo wu bo nɔ ɖɔ, “Enyi é kpéwú ɔ, hwi lɔ sixu kpéwú” ó. Nǔ nǔkplɔntɔ́ ɔ ɖesu ni wá gbeta mɔ̌hun kɔn. Ðɔ xó dó nǔ taji ɖěɖee d’alɔ mɛ e xó è ɖɔ ɖò video ɔ mɛ, b’ɛ zán nǔkplɔnmɛ Biblu tɔn lɛ é jí. Vlafo, a sixu kɛnu dó wemafɔ taji ɖé alǒ nǔ e mɛ ɔ wà b’ɛ sixu d’alɔ é ɖé wu. Enyi é nyɔ́ bló hweɖebǔnu hǔn, nɔ tɛɖɛ̌ lee Jehovah d’alɔ mɛ ɔ gbɔn é jí.

8. Nɛ̌ mǐ ka sixu d’alɔ nǔkplɔntɔ́ mǐtɔn b’ɛ na wá yí wǎn nú Jehovah gbɔn?

⁸ D’alɔ nǔkplɔntɔ́ towe bonu é ni wá yí wǎn nú Jehovah. Gbɔn nɛ̌ è? Ba ali ɖěɖee nu a sixu dɔn ayi nǔkplɔntɔ́ towe tɔn wá jijɔ Jehovah tɔn lɛ jí ɖè é. D’alɔ nǔkplɔntɔ́ towe bonu é ni mɔ ɖɔ Jehovah ɔ, Mawu awǎjijɛnɔ wɛ, bo nɔ nɔ gudo nú mɛ ɖěɖee yí wǎn n’i lɛ é. (1 Tim. 1:11, nwt; Ebl. 11:6) Xlɛ́ nǔkplɔntɔ́ ɔ ɖɔ nǔ e kplɔ́n wɛ é ɖè lɛ é zinzán na hɛn lè wá n’i. Enɛ gudo hǔn, tinmɛ n’i ɖɔ lè enɛ lɛ e é na mɔ é nɔ xlɛ́ ɖɔ Jehovah yí wǎn n’i. (Eza. 48:17, 18) Enyi wǎn e nǔkplɔntɔ́ towe yí nú Jehovah é ɖò jijɛji wɛ ɔ, akpakpa na lɛ́ sɔ́ ɛ hugǎn dó huzuhuzu lɛ biblo wu.—1 Jaan 5:3.

9. Sɔgbe xá Maki 10:29, 30 ɔ, etɛ ka sixu d’alɔ mɛɖé b’ɛ na savɔ̌ lɛ, bo bló baptɛm?

⁹ Bonu Biblu kplɔntɔ́ ɖé na yì nukɔn bo bló baptɛm ɔ, é ɖó na savɔ̌ ɖé lɛ. Nya  dɔkunnɔ e xó mǐ ɖɔ ɖò bǐbɛ̌mɛ é ɖɔhun ɔ, é sixu byɔ ɖɔ Biblu kplɔntɔ́ ɖé lɛ ni sɔ́ nǔɖokan yetɔn lɛ dó savɔ̌. Enyi azɔ̌ yetɔn lɛ ma sɔgbe xá nǔgbododó Biblu tɔn lɛ ǎ ɔ, é tlɛ sixu byɔ ɖɔ ye ni ba azɔ̌ ɖevo. É sixu byɔ ɖɔ mɛ gegě ni jó xɔ́ntɔn yetɔn ɖěɖee ma yí wǎn nú Jehovah ǎ lɛ é dó. Mɛ ɖevo lɛ tíìn bɔ ɖó mɛ e ɖò xwédo yetɔn mɛ lɛ é ma yí wǎn nú Kúnnuɖetɔ́ Jehovah tɔn lɛ ǎ wutu ɔ, ye sixu gbɛ́ ye. Jezu yí gbè ɖɔ é sixu vɛwǔ nú mɛɖé lɛ bɔ ye na savɔ̌ mɔ̌hun lɛ. Amɔ̌, é d’akpá ɖɔ mɛ ɖěɖee nɔ xwedó emi lɛ é kún na ɖu winnya gbeɖé ó. È na d’ajɔ ye b’ɛ na túnflá gbɔn xwédo gbigbɔ tɔn ɖé nina ye gblamɛ. (Xà Maki 10:29, 30.) Nɛ̌ a ka sixu d’alɔ Biblu kplɔntɔ́ towe b’ɛ na ɖu lè nǔnina ɖaaɖagbe enɛ tɔn gbɔn?

10. Etɛ nǔ e Manuel ɖɔ é ka kplɔ́n we?

¹⁰ Dǒ xɔ́ntɔn nǔkplɔntɔ́ towe. É ɖò taji ɖɔ a ni xlɛ́ nǔkplɔntɔ́ towe ɖɔ nǔ tɔn nɔ ɖu ayi mɛ nú we. Aniwu? Ð’ayi nǔ e Manuel e nɔ nɔ Mexique é ɖɔ é wu. É flín hwenu e é kpò ɖò Biblu kplɔ́n wɛ é, bo ɖɔ: “Jɛ nukɔn nú nǔkplɔnkplɔn lɛ ɖokpo ɖokpo ɔ, nǔkplɔnmɛtɔ́ ce nɔ kan lee un ɖè gbɔn é byɔ mì. É nɔ d’alɔ mì bɔ un nɔ vo, lobo nɔ lɛ́ na tɛn mì bɔ un nɔ ɖɔ xó dó nǔ ɖevo lɛ wu. Un nɔ mɔ ɖɔ nǔ ce nɔ ɖu ayi mɛ n’i nǔgbo nǔgbo.”

11. Nɛ̌ nǔkplɔntɔ́ mǐtɔn lɛ ka sixu ɖu lè hwenu zinzán ɖó kpɔ́ xá mǐ tɔn gbɔn?

¹¹ Nɔ zán hwenu ɖó kpɔ́ xá nǔkplɔntɔ́ towe lɛ lee Jezu nɔ zán hwenu ɖó kpɔ́ xá ahwanvu tɔn lɛ gbɔn é. (Jaan 3:22) Enyi é nyɔ́ bló hǔn, ylɔ̌ Biblu kplɔntɔ́ towe e ko ɖò nukɔn yì wɛ é wá xwé towe gbé bonu mi ba nǔɖe ɖu ɖó kpɔ́, alǒ kpɔ́n tuto sunmɛ sunmɛ tɔn Televiziɔn JW tɔn ɖé ɖó kpɔ́. É na sù nǔkplɔntɔ́ towe nukúnmɛ tawun enyi a ylɔ́ ɛ ɖò xwezán lɛ gbè hwenu e a mɔ ɖɔ é na ɖò éɖokpo é. Kazibwe e nɔ nɔ Ouganda é ɖɔ: “Un lin ɖɔ hwenu zinzán ɖó kpɔ́ xá nǔkplɔnmɛtɔ́ ce nɔ zɔ́n bɔ un nɔ kplɔ́n nǔ gegě dó Jehovah wu hú ɖò nǔkplɔnkplɔn mǐtɔn hwenu. Un mɔ lě dò Jehovah nɔ kpé nukún dó togun tɔn wu sɔ é kpo lě dò ye ɖó awǎjijɛ sɔ é kpo. Nǔ e ba wɛ un ɖè ɖò gbɛ̀ ce mɛ é nɛ.”

12. Etɛwu mǐ ka ɖó na nɔ kplá wɛnjlatɔ́ vovo lɛ yì Biblu kplɔnkplɔn ɖé domɛ?

 ¹² Nɔ ylɔ́ wɛnjlatɔ́ vovo lɛ wá nǔkplɔnkplɔn ɔ domɛ. Hweɖelɛnu ɔ, mǐ sixu nɔ mɔ ɖɔ é na nyɔ́ hugǎn ɖɔ mǐɖokpo ni yì, alǒ kplá wɛnjlatɔ́ e kpo mǐ kpo ko nɔ yì tɛgbɛ é hɛn yì. Mǐ sixu nɔ lin ɖɔ mɔ̌ wiwa bɔwǔ có, enyi ali hun nú mǐ bonu mǐ nɔ kplá wɛnjlatɔ́ vovo lɛ yì ɔ, enɛ na d’alɔ Biblu kplɔntɔ́ mǐtɔn tawun. Dmitrii e nɔ nɔ Moldavie é ɖɔ: “Wɛnjlatɔ́ e nɔ wá nǔkplɔnkplɔn ce domɛ lɛ é ɖokpo ɖokpo ɖó lee ye nɔ tinmɛ nǔ lɛ gbɔn é. Enɛ d’alɔ mì bɔ un mɔ ali vovo e nu un sixu zán nǔ e kplɔ́n wɛ un ɖè lɛ é ɖè lɛ é. Hwenu e un wá kplé azɔn nukɔntɔn ɔ é ɔ, winnya sɔ́ hu mì dín ǎ, ɖó un ko xò gò nɔví sunnu kpo nɔví nyɔnu kpo gegě ɖ’ayǐ.”

13. Etɛwu mǐ ka ɖó na nɔ d’alɔ nǔkplɔntɔ́ mǐtɔn, b’ɛ na nɔ wá kplé lɛ?

¹³ D’alɔ Biblu kplɔntɔ́ towe bonu é ni nɔ wá kplé agun tɔn lɛ. Etɛwu? Ðó Jehovah ɖegbe nú mɛsɛntɔ́ tɔn lɛ ɖɔ ye ni nɔ kplé ɖó kpɔ́ wutu; akpáxwé ɖé wɛ enɛ nyí ɖò Mawusinsɛn mǐtɔn mɛ. (Ebl. 10:24, 25) Gɔ́ na ɔ, xwédo gbigbɔ tɔn mǐtɔn wɛ nɔví sunnu kpo nɔví nyɔnu kpo mǐtɔn lɛ nyí. Enyi mǐ kpo ye kpo kplé ɖò kplé lɛ jí ɔ, é nɔ cí ɖɔ xwégbe wɛ mǐ kpo ye kpo ɖè, bo ɖò nǔɖuɖu ɖagbe ɖé ɖu ɖó kpɔ́ wɛ ɖɔhun. Enyi a nɔ d’alɔ Biblu kplɔntɔ́ towe b’ɛ nɔ wá kplé lɛ hǔn, alɔ dó è wɛ a ɖè, bɔ é na ɖè afɔ taji hugǎn ɖé bo na dó kpéwú bo bló baptɛm. Amɔ̌, afɔ enɛ ɖiɖe sixu vɛwǔ n’i. Nɛ̌ wema Ðu Gbɛ̀ Víví Kaka Sɔyi! ɔ ka sixu d’alɔ nǔkplɔntɔ́ towe b’ɛ na ɖu ɖò wuvɛ̌ ɖebǔ e é sixu mɔ lɛ é jí gbɔn?

14. Nɛ̌ mǐ ka sixu bló gbɔn bɔ akpakpa na nɔ sɔ́ nǔkplɔntɔ́ mǐtɔn lɛ dó kplé lɛ wíwá wu?

¹⁴ Nɔ zán nǔkplɔnkplɔn 10gɔ́, wema Ðu Gbɛ̀ Víví Kaka Sɔyi! ɔ tɔn dó bló bonu akpakpa ni nɔ sɔ́ nǔkplɔntɔ́ towe. È byɔ wɛnjlatɔ́ ɖěɖee ko mɔ nǔ kpɔ́n é ɖé lɛ ɖɔ ye ni tɛ́n nǔkplɔnkplɔn enɛ kpɔ́n cobonu è na ɖè wema ɔ tɔ́n. Bɔ zǎn e ye zán dó d’alɔ nǔkplɔntɔ́ yetɔn lɛ bonu ye na wá kplé lɛ é hɛn lè gegě wá. Nǔgbo ɔ, ma nɔte kaka bo wá nǔkplɔnkplɔn 10gɔ́ ɔ jí cobo ylɔ́ Biblu kplɔntɔ́ towe wá kplé lɛ ó. Yawǔ ylɔ́ ɛ wá kplé lɛ dó mɛhwenu, bo lɛ́ kpò ɖò mɔ̌ wà wɛ hwɛhwɛ. Wuvɛ̌ ɖokpo ɔ lɛ wɛ Biblu kplɔntɔ́ lɛ bǐ nɔ mɔ ǎ. Enɛ wu ɔ, ɖ’ayi hudo nǔkplɔntɔ́ towe tɔn lɛ wu, bo kpɔ́n ɖɔ emi sixu d’alɔ ɛ ɖò ali tawun tawun ɖé lɛ nu à jí. Enyi é ma tlɛ yawǔ jɛ kplé lɛ wá jí ǎ hǔn, ma nú awakanmɛ kú we ó. Ðǒ suúlu, amɔ̌, ma ka gɔn ylɔylɔ́ ɛ ó.

15. Xɛsi tɛ lɛ nǔkplɔntɔ́ mǐtɔn ka sixu ɖi?

¹⁵ A ka flín lě dò xɛsi ɖi we sɔ hwenu e a jló na huzu Kúnnuɖetɔ́ Jehovah tɔn ɖé é à? Bɔya a nɔ mɔ ɖɔ emi kún na kpéwú, bo ɖɔ Mawuxó gbɔn xwégbe xwégbe gbeɖé kpɔ́n ó. Alǒ, vlafo xɛsi nɔ ɖi we ɖɔ xwédo towe alǒ xɔ́ntɔn towe lɛ sixu klán gbè xá we. Enyi mɔ̌ wɛ hǔn, a sixu mɔ nǔ jɛ lee nǔ cí nú Biblu kplɔntɔ́ towe é wu. Jezu yí gbè ɖɔ xɛsi mɔ̌hun lɛ sixu ɖi mɛ. É ka ɖò mɔ̌ có, é gb’akpá nú ahwanvu tɔn lɛ ɖɔ ye ni ma lɔn nú xɛsi zɔ́n bonu ye gɔn Jehovah sɛn ó. (Mat. 10:16, 17, 27, 28) Nɛ̌ Jezu ka d’alɔ ahwanvu tɔn lɛ, bɔ ye ɖu ɖò xɛsi e nɔ ɖi ye lɛ é jí gbɔn? Nɛ̌ a ka sixu xwedó kpɔ́ndéwú tɔn gbɔn?

16. Nɛ̌ mǐ ka sixu kplɔ́n Biblu kplɔntɔ́ mǐtɔn b’ɛ na má nǔ e é ɖi nǔ na lɛ é gbɔn?

¹⁶ D’alɔ nǔkplɔntɔ́ towe dɛ̌dɛ̌ dɛ̌dɛ̌ bonu é ni má nǔ e é ɖi nǔ na lɛ é xá mɛ ɖevo lɛ. Hwenu e Jezu sɛ́ ahwanvu tɔn lɛ dó Mawuxó ɖɔ gbé é ɔ, ado sixu ko hu ye. Jezu ɖɔ fí e ye na jlá Mawuxó ɔ ɖè lɛ é kpo wɛn e ye na jlá é kpo nú ye dó d’alɔ ye. (Mat. 10:5-7) Nɛ̌ a ka sixu xwedó kpɔ́ndéwú Jezu tɔn gbɔn? D’alɔ nǔkplɔntɔ́ towe bonu é ni tuùn fí e é  na ɖɔ Mawuxó gbɔn lɛ é. Ði kpɔ́ndéwú ɔ, kanbyɔ ɛ ɖɔ é ka tuùn mɛɖé, bɔ nǔgbo Biblu tɔn tawun ɖé lě sixu d’alɔ ɛ à jí. Enɛ gudo hǔn, d’alɔ ɛ bonu é ni sɔnǔ nú nǔ e é na ɖɔ é gbɔn lee é na má nǔgbo enɛ xá mɛɖé gbɔn ɖò ali e bɔkun é ɖé nu é xíxlɛ́ ɛ gblamɛ. Hwenu e é jɛxa dó é ɔ, a sixu zán akpáxwé, “Mɛɖé lɛ Ðɔ” kpo “Mɛɖé Sixu Kanbyɔ Ðɔ” kpo e ɖò wema Ðu Gbɛ̀ Vivǐ Kaka Sɔyi! ɔ mɛ lɛ é, bonu mi ni nɔ kpɔ́ dó vɔ́ lee é na má nǔgbo enɛ xá mɛ ɖevo lɛ gbɔn é bló. Enyi a ɖò mɔ̌ wà wɛ hǔn, zě ayi ɖó lee a na d’alɔ Biblu kplɔntɔ́ towe b’ɛ na zán Biblu dó na xósin e bɔkun lɛ é mɛ, lobo lɛ́ ɖó ayi te dó wà mɔ̌ gbɔn é jí.

17. Enyi mǐ ɖò alɔ dó nǔkplɔntɔ́ mǐtɔn wɛ bonu é na ɖeji dó Jehovah wu ɔ, nɛ̌ mǐ ka sixu zán Matie 10:19, 20, 29-31 gbɔn?

¹⁷ D’alɔ nǔkplɔntɔ́ towe bonu é ni ɖeji dó Jehovah wu. Jezu na ganjɛwu ahwanvu tɔn lɛ ɖɔ Jehovah na d’alɔ ye, ɖó é yí wǎn nú ye. (Xà Matie 10:19, 20, 29-31.) Nɔ flín nǔkplɔntɔ́ towe ɖɔ Jehovah na d’alɔ é lɔmɔ̌. A sixu d’alɔ ɛ b’ɛ na ɖeji dó Jehovah wu, gbɔn ɖɛ xixo xá ɛ dó nǔ e gbé nya wɛ é ɖè lɛ é takúnmɛ gblamɛ. Franciszek ee nɔ nɔ Pologne é ɖɔ: “Nǔkplɔnmɛtɔ́ ce nɔ ɖɔ xó dó nǔ e gbé nya wɛ un ɖè lɛ é wu hwɛhwɛ ɖò ɖɛ tɔn lɛ mɛ. Ee un mɔ lee Jehovah nɔ na sinkɔn nú ɖɛ nǔkplɔnmɛtɔ́ ce tɔn lɛ gbɔn é ɔ, nyi lɔ yawǔ jɛ ɖɛ xò jí. Ee é byɔ ɖɔ má byɔ gbè ɖò azɔ̌ ce yɔyɔ̌ ɔ mɛ, bá yì kplé lɛ kpo kpléɖókpɔ́ lɛ kpo é ɔ, un mɔ alɔdó Jehovah tɔn.”

18. Nɛ̌ nǔ ka nɔ cí nú Jehovah dó nǔ kplɔnkplɔn mɛ lɛ sín azɔ̌ e wà wɛ Klisanwun lɛ ɖè é wu?

¹⁸ Biblu kplɔntɔ́ mǐtɔn lɛ sín nǔ nɔ ɖu ayi mɛ nú Jehovah tawun. Azɔ̌ syɛnsyɛn e wà wɛ nǔkplɔnmɛtɔ́ lɛ ɖè, bá d’alɔ gbɛtɔ́ lɛ bonu ye na sɛkpɔ́ ɛ é, nɔ sù nukún tɔn mɛ, bɔ é lɛ́ yí wǎn nú ye ɖó enɛ wu. (Eza. 52:7) Enyi a na bo ma tlɛ ɖò nukún kpé dó Biblu kplɔnkplɔn ɖé wu wɛ ɖò alɔnu dìn ǎ ɔ, a sixu kpò ɖò alɔ dó Biblu kplɔntɔ́ lɛ wɛ bɔ ye na yì nukɔn bo bló baptɛm gbɔn wɛnjlatɔ́ ɖevo lɛ kplákplá yì Biblu kplɔnkplɔn yetɔn lɛ gblamɛ.