1. Kpɔ́ndéwú tɛ Jezu ka sɔ́ ɖ’ayǐ nú ahwanvu tɔn lɛ? Nɛ̌ ye ka wà nǔ gbɔn? (Kpɔ́n ɖiɖe e ɖò akpa ɔ jí é.)

JEZU ɖó linlin e sɔgbe é ɖò sinsɛnzɔ́ e é wà ɖò ayikúngban jí é bǐ hwenu, b’ɛ lɛ́ jló ɖɔ ahwanvu emitɔn lɛ lɔ ni kpò ɖò linlin e sɔgbe é ɖó dó sinsɛnzɔ́ ɔ wu wɛ. (Jaan 4:35, 36) Hwenu e Jezu kpo ahwanvu tɔn lɛ kpo ɖò kpɔ́ é ɔ, akpakpa nɔ sɔ́ ye dó wɛnjijlazɔ́ ɔ wu. (Luk. 10:1, 5-11, 17) Amɔ̌, wlǐ e è wlí Jezu bo hu i é zɔ́n bɔ jlǒ e ahwanvu lɛ ɖó, bo na jlá wɛn ɔ é bú nú táan ɖé. (Jaan 16:32) Ðò fínfɔ́n sín kú Jezu tɔn gudo ɔ, é dó wusyɛn lanmɛ nú ye ɖɔ ye ni sɔ́ ayi ɖó wɛnjijlazɔ́ ɔ jí. Bɔ hwenu e é lɛkɔ yì jixwé gudo é ɔ, ye jlá wɛn ɔ kpo kanɖodónǔwu kpo sɔmɔ̌ bɔ kɛntɔ́ yetɔn lɛ klán gbè xá ye, bo ɖɔ: “Enɛ nǔ e kplɔ́n mɛ wɛ mi ɖè ɔ . . . gbakpé Jeluzalɛmu tò ɔ bǐ mɛ nɛ.”—Mɛ. 5:28.

2. Nɛ̌ Jehovah ka kɔn nyɔna dó wɛnɖagbejijlazɔ́ ɔ jí gbɔn?

² Jezu nɔ gudo nú azɔ̌ e Klisanwun xwè kanweko nukɔntɔn ɔ tɔn lɛ wà é, bɔ Jehovah kɔn nyɔna dó ye jí, lobɔ mɛ gegě yí wɛn yetɔn. Ði kpɔ́ndéwú ɔ, ɖò Pantekotu xwè 33 H.M. tɔn ɔ, mɛ 3 000 bló baptɛm. (Mɛ. 2:41) Bɔ kɛ́n ahwanvu lɛ tɔn lɛ́ jɛji ɖò ali jiwǔ ɖé nu. (Mɛ. 6:7) É ɖò mɔ̌ có, Jezu ɖɔ ɖ’ayǐ ɖɔ mɛ gegě na yí wɛnɖagbe ɔ, ɖò azǎn gudogudo tɔn lɛ mɛ.—Jaan 14:12; Mɛ. 1:8.

3-4. Etɛwu mɛɖé lɛ ka sixu mɔ ɖɔ wɛnjijlazɔ́ ɔ vɛwǔ? Etɛ lɛ mǐ ka na gbéjé kpɔ́n ɖò xóta elɔ mɛ?

³ Mǐ mɛ bǐ wɛ ɖó na tɛ́n kpɔ́n bá kpò ɖò linlin e sɔgbe é ɖó dó sinsɛnzɔ́ ɔ wu wɛ. Ðò ayǐ ɖé lɛ jí ɔ, mɔ̌ wiwa nɔ vɛwǔ ǎ. Etɛwu? Ðó mɛ gegě nɔ jló ɖɔ è ni wá kplɔ́n Biblu xá emi, kaka bɔ è nɔ byɔ mɛɖé lɛ ɖɔ ye ni nɔte jɛ hwenu e è na mɔ Kúnnuɖetɔ́ e na kplɔ́n nǔ ye é dó é. Amɔ̌, ɖò akpáxwé gbɛ̀ ɔ tɔn ɖevo lɛ ɔ, wɛnjlatɔ́ lɛ nɔ mɔ ɖɔ wɛnjijlazɔ́ ɔ vɛwǔ tawun, ɖó vlafo wɛ è nɔ mɔ mɛɖé lɛ ɖò xwégbe, bɔ mɛ ɖěɖee è nɔ mɔ ɖò xwégbe lɛ é ka nɔ ɖó jlǒ kaka ɖé bá kplɔ́n Biblu ǎ.

 ⁴ Enyi xá e mɛ wɛnɖagbe ɔ jijla nɔ vɛwǔ ɖè é ɖé mɛ wɛ a nɔ nɔ ɔ, alixlɛ́mɛ e ɖò xóta elɔ mɛ lɛ é na ɖibla d’alɔ we. Mǐ na gbéjé nǔ e mɛɖé lɛ ko wà dó ɖɔ xó ɖó kpɔ́ xá mɛ gegě ɖò sinsɛnzɔ́ ɔ mɛ é ɖé lɛ kpɔ́n. Mǐ na lɛ́ mɔ hwɛjijɔ e wu mǐ sixu kpò ɖò linlin e sɔgbe é ɖó wɛ é, enyi mɛ lɛ yí wɛn mǐtɔn, alǒ gbɔ ɔ nɛ.

5. Wuvɛ̌ tɛ lɛ Kúnnuɖetɔ́ gegě ka nɔ mɔ?

⁵ Kúnnuɖetɔ́ gegě mɔ ɖɔ mɛ lɛ mimɔ ɖò xwé yetɔn lɛ gbè fɔ́n bo ɖò wǔ vɛ́ wɛ. Wɛnjlatɔ́ ɖé lɛ nɔ nɔ xá ɖé lɛ mɛ bɔ xwé ɖěɖee è nɔ cɔ́ tawun lɛ é gegě nɔ ɖò finɛ, alǒ xwé ɖěɖee gbè gbɛtɔ́ sukpɔ́ ɖè bɔ è ma sixu nɔ byɔ ǎ lɛ é nɔ ɖò xá mɔ̌hun lɛ mɛ. Xwécɔ́tɔ́ ɖé sixu ɖò hɔntogbo ɔ tá, bo gbɛ́ ɖɔ enyi mɛ e ɖò xwé ɔ gbè lɛ é ɖě ma na gbè tɔn ǎ ɔ, mɛɖé kún na byɔ mɛ ó. Wɛnjlatɔ́ ɖevo lɛ sixu nɔ gbɔn xwégbe xwégbe faa, amɔ̌, mɛ kpɛɖé jɛn ye nɔ mɔ ɖò xwégbe. É ɖò mɔ̌ có, wɛnjlatɔ́ ɖevo lɛ nɔ jlá wɛn ɔ ɖò gletoxo lɛ mɛ, alǒ ɖò xá ɖěɖee jɛ zɔ bɔ mɛ kpɛɖé ɖ’emɛ lɛ é mɛ. Wɛnjlatɔ́ lɛ sixu nɔ zɔn ali nú táan gegě bo na dó yì mɔ xwétɔ́ ɖokpo kpowun, bɔ vlafo wɛ ye ka nɔ lɛ́ yì mɔ ɛ ɖò xwégbe. Enyi wuvɛ̌ mɔ̌hun lɛ mɔ wɛ mǐ ɖè ɔ, mǐ ɖó na jó gbè ǎ. Etɛ mǐ ka sixu wà bo na ɖu ɖò afɔklɛ́nnú mɔ̌hun lɛ jí, bɔ sinsɛnzɔ́ mǐtɔn na kpa mǐ?

6. Nɛ̌ wɛnjlatɔ́ lɛ ka cí hwehutɔ́ lɛ ɖɔhun gbɔn?

⁶ Jezu jlɛ́ wɛnɖagbejijlazɔ́ ɔ dó hwehuhuzɔ́ wu. (Mak. 1:17) Hwehutɔ́ ɖé lɛ nɔ nyi ɖɔ nú azǎn mɔ̌kpan, cobo ka nɔ mɔ nǔɖe wlí ǎ. Amɔ̌, ye nɔ jó gbè ǎ, é nyɔ́ wà ɔ, ye nɔ huzu alɔ. Ye nɔ ɖyɔ gan e mɛ ye na yì tɔ̀ jí é, fí e ye nɔ nɔ dó wlí hweví é, alǒ wlɛnwín e ye nɔ zán dó wlí hweví é. Mǐ sixu bló huzuhuzu mɔ̌hun lɛ ɖò sinsɛnzɔ́ mǐtɔn mɛ. Dìn ɔ, mǐ ni ɖɔ xó dó alixlɛ́mɛ e mǐ sixu tɛ́n kpɔ́n é ɖé lɛ jí.

7. Enyi mǐ nɔ jlá wɛn ɔ ɖò táan vovo mɛ ɔ, ɖagbe tɛ enɛ ka sixu wà?

⁷ Tɛ́n kpɔ́n bo nɔ yì mɛ lɛ gɔ́n ɖò táan vovo mɛ. Enyi mǐ nɔ jlá wɛn ɔ hwenu e mɛ lɛ sixu ɖò xwégbe é ɔ, mǐ na ɖɔ xó nú mɛ gegě. È na ɖɔ ɔ, enyi mɛ lɛ na bo tlɛ tɔ́n sín xwégbe ɔ, é lín oo, é yá oo, ye nɔ lɛkɔ jɛn wɛ. Nɔví sunnu kpo nɔví nyɔnu kpo gegě nɔ jlá wɛn ɔ ɖò hwelɛkɔ alǒ ɖò gbadanu, bo na dó sixu mɔ mɛ gegě. Gɔ́ na ɔ, xwétɔ́ lɛ sixu vo ganji, alǒ ɖò gbesisɔmɛ hugǎn bá ɖɔ xó xá mɛ ɖò gan enɛ lɛ mɛ. Alǒ vlafo ɔ, a na mɔ ɖɔ wě e mɛxo agun tɔn e nɔ nyí David é ɖè xá mɛ é zinzán na d’alɔ we. É ɖɔ enyi emi jlá wɛn ɔ ɖò fí ɖé nú é ɖó táan ɖé gudo ɖò kéze ɔ mɛ ɔ, emi kpo mɛ e kpodo emi kpo w’azɔ̌ é kpo nɔ lɛkɔ yì xwé ɖěɖee gbè ye ma mɔ mɛɖé ɖè ǎ lɛ é. É ɖɔ: “Enyi mǐ lɛkɔ yì ɔ, mǐ nɔ mɔ mɛ lɛ ɖò xwégbe kpɔ́, b’ɛ nɔ kpaca mǐ tawun.” *

8. Nɛ̌ mǐ ka sixu zán Nǔnywɛtɔ́xó 11:6 ɖò sinsɛnzɔ́ mǐtɔn mɛ gbɔn?

⁸ Mǐ ɖó na jó gbè ǎ. Wemafɔ e jí xóta mǐtɔn jinjɔn é flín mǐ lee mǐ ɖó na wà nǔ gbɔn é. (Xà Nǔnywɛtɔ́xó 11:6.) David e xó mǐ ɖɔ wá yì é jó gbè ǎ. É lɛkɔ yì xwé ɖé gbè azɔn mɔ̌kpan gudo é ɔ, é wá mɔ xwétɔ́ ɔ lo. Nya e é xò gò é ɖó jlǒ bo na kplɔ́n Biblu, bo ɖɔ: “Sín xwè tantɔn mɔ̌ ɖíe wɛ un ko ɖò fí, Kúnnuɖetɔ́ Jehovah tɔn ɖě ka wá ba mì kpɔ́n kpɔ́n ǎ.” David ɖɔ: “Un mɔ ɖɔ, wǎgbɔ tɔn ɔ, enyi è wá yì mɔ mɛ lɛ ɖò xwé yetɔn lɛ gbè ɔ, hwɛhwɛ wɛ ye nɔ ɖótó wɛn mǐtɔn.”

9. Nɛ̌ Kúnnuɖetɔ́ ɖé lɛ ka ko ɖɔ xó ɖó kpɔ́ xá mɛ ɖěɖee é vɛwǔ bɔ è na mɔ lɛ é gbɔn?

 ⁹ Tɛ́n fí ɖevo kpɔ́n. Bo na dó mɔ mɛ ɖěɖee é nɔ vɛwǔ bɔ è na mɔ ɖò xwégbe lɛ é ɔ, wɛnjlatɔ́ ɖé lɛ ko jɛ Mawuxó ɖɔ jí ɖò xá ɖevo lɛ mɛ. Ði kpɔ́ndéwú ɔ, kúnnuɖiɖe ɖò alitó kpo kɛkɛví ɖé zinzán dó ɖɔ Mawuxó na kpo nyí wlɛnwín e ko w’azɔ̌, bɔ è ko zán dó mɔ mɛ ɖěɖee nɔ nɔ xwé ɖaxó ɖaxó e gbè è ma na gbè ɖɔ è ni ɖɔ Mawuxó ɖè ǎ lɛ é. Wlɛnwín enɛ lɛ nɔ zɔ́n bɔ Kúnnuɖetɔ́ lɛ nɔ kpéwú bo nɔ ɖɔ xó tlɔlɔ xá mɛ ɖěɖee nɔ nɔ xwé enɛ lɛ gbè lɛ é. Gɔ́ na ɔ, wɛnjlatɔ́ gegě ko mɔ ɖɔ mɛ lɛ nɔ ba na ɖɔ xó ɖó kpɔ́ xá mɛ ɖò tokplétɛn lɛ, axi lɛ mɛ, kpo ajɔ̌watɛn lɛ kpo, alǒ ye nɔ ba na yí wema mǐtɔn lɛ ɖò fí enɛ lɛ. Floiran ee nyí nukúnkpénuwutɔ́ ɖé ɖò Bolivie é ɖɔ: “Mǐ nɔ yì axi lɛ mɛ, bo nɔ lɛ́ yì ajɔ̌watɛn lɛ ɖò gan ɖokpo kpo gan atɔn kpo vlamɛ hwemɛ, ɖò hwenu e nǔsatɔ́ lɛ sín alɔnu nɔ vo kpɛɖé é. Hwɛhwɛ ɔ, mǐ nɔ ɖɔ xó ɖó kpɔ́ xá ye ganji, bo tlɛ nɔ bɛ́ Biblu kplɔnkplɔn lɛ.”

10. Wlɛnwín tɛ lɛ a ka sixu zán dó jlá wɛn ɔ mɛ lɛ?

¹⁰ Tɛ́n wlɛnwín ɖevo kpɔ́n. Mǐ ni ɖɔ ɖɔ a ko tɛ́n kpɔ́n bo na ɖɔ xó ɖó kpɔ́ xá mɛɖé lě tlɔlɔ azɔn mɔ̌kpan. A ko yì ba ɛ kpɔ́n ɖò táan vovo mɛ, bo ka nɔ mɔ ɛ ǎ jɛn wɛ. Wlɛnwín ɖevo lɛ ka ɖè bɔ è na zán dó ɖɔ xó ɖó kpɔ́ xá mɛ mɔ̌hun à? Katarína ɖɔ: “Un nɔ wlán wema sɛ́dó mɛ ɖěɖee un ma nɔ mɔ ɖò xwégbe gbeɖé ǎ lɛ é, bo nɔ ɖɔ nǔ ɖěɖee un mɔ ye tlɔlɔ lě ɔ, un na ɖɔ nú ye lɛ é d’emɛ.” Etɛ nǔ e é wà é ka kplɔ́n mǐ? Ee a na ɖò sinsɛnzɔ́ towe wà wɛ é ɔ, nɔ tɛ́n kpɔ́n, bo nɔ ba ali vovo e nu a na mɔ mɛ  ɖěɖee ɖò fí e mi nɔ ɖɔ Mawuxó ɖè lɛ é ɖè é.

11. Etɛwu mɛɖé lɛ ka nɔ gbɛ́ wɛn mǐtɔn?

¹¹ Mɛɖé lɛ nɔ jló na sè wɛn mǐtɔn ǎ. Ye nɔ lin ɖɔ emi kún ɖó hudo Mawu, alǒ Biblu tɔn ó. Ðó ye mɔ bɔ wuvɛ̌ mimɔ sukpɔ́ tawun ɖò gbɛ̀ ɔ mɛ wutu ɔ, ye ɖi nǔ nú Mawu ǎ. Ðó ye nɔ mɔ yɛmɛnúwiwa sinsɛngán e nɔ ɖɔ ɖɔ emi nɔ zán gbɛ̀ sɔgbe xá nǔ e ɖò Biblu mɛ lɛ é tɔn wutu ɔ, ye nɔ gbɛ́ nǔ e ɖò Biblu mɛ lɛ é. Agbazazɔ́, xwédo, alǒ tagba mɛɖesunɔ tɔn lɛ wɛ ɖò jɔ dó nú mɛ ɖevo lɛ wɛ, bɔ ye nɔ lin ɖɔ Biblu kún sixu d’alɔ ó. Enyi mɛ ɖěɖee mǐ nɔ jlá wɛn ɔ lɛ é nɔ mɔ ɖɔ wɛn mǐtɔn kún xɔ akwɛ kaka ɖé ó ɔ, nɛ̌ mǐ ka sixu kpò ɖò awǎjijɛ ɖó wɛ gbɔn?

12. Nɛ̌ xó e ɖò Filipunu lɛ 2:4 mɛ lɛ é ka sixu d’alɔ mǐ ɖò sinsɛnzɔ́ mǐtɔn mɛ gbɔn?

¹² Nɔ ɖexlɛ́ mɛ ɖevo lɛ ɖɔ nǔ yetɔn nɔ ɖu ayi mɛ nú we. Mɛ ɖěɖee gbɛ́ wɛn mǐtɔn ɖò bǐbɛ̌mɛ lɛ é gegě nɔ wá yí wɛn ɔ, enyi ye mɔ ɖɔ nǔ yetɔn nɔ ɖu ayi mɛ nú mǐ ɔ nɛ. (Xà Filipunu lɛ 2:4.) Ði kpɔ́ndéwú ɔ, David e xó mǐ ɖɔ wá yì é ɖɔ: “Enyi mɛɖé ɖɔ ɖɔ emi kún ba na sè wɛn mǐtɔn ó ɔ, mǐ nɔ sɔ́ Biblu kpo wema mǐtɔn lɛ kpo nyi kɛ́n ɖokpo, bo nɔ ɖɔ: ‘Mi kɛnklɛn mɛ, un sixu tuùn nǔ e wu nǔ cí mɔ̌ nú mi é à?’” Enyi è kéya nú mɛ lɛ ɔ, ye sixu ɖ’ayi wu. Ye sixu nɔ ma flín nǔ e mǐ ɖɔ nú ye é pɛ́pɛ́pɛ́, amɔ̌, ye na ɖibla flín lee nǔ yetɔn ɖu ayi mɛ nú mǐ gbɔn é. Enyi xwétɔ́ lɛ ma tlɛ jó mǐ dó bonu mǐ ɖɔ xó ǎ ɔ, mǐ sixu wà nǔɖe, alǒ ɖè lee nǔ cí nú mǐ é xlɛ́ ɖò nukúnta dó xlɛ́ ɖɔ nǔ yetɔn ɖu ayi mɛ nú mǐ.

13. Nɛ̌ mǐ ka sixu huzu wɛn mǐtɔn, b’ɛ na sɔgbe xá hudo xwétɔ́ lɛ ɖokpo ɖokpo tɔn gbɔn?

¹³ Enyi mǐ huzu wɛn mǐtɔn sɔgbe xá hudo kpo jlǒ e xwétɔ́ ɖé ɖó é kpo ɔ, mǐ nɔ xlɛ́ ɖɔ nǔ tɔn ɖu ayi mɛ nú mǐ. Ði kpɔ́ndéwú ɔ, kúnnuɖenú xlɛ́ ɖɔ xwétɔ́ ɔ ɖó vǐ wɛ à? Mɛjitɔ́ lɛ sixu ba ɖɔ è ni ɖɔ xó nú emi dó wěɖexámɛ Biblu tɔn e ɖɔ xó dó vǐ kplɔnkplɔn wu lɛ é jí, alǒ alixlɛ́mɛ tawun tawun lɛ dó lee è sixu ɖó gbɛzán xwédo tɔn awǎjijɛnɔ ɖé gbɔn é wu. Agaságó gegě ɖò hɔn yetɔn lɛ jí wɛ à? Mǐ sixu wá gbeta ɔ kɔn bá ɖɔ xó nú ye dó wɔ̌nxixogbɛwu kpo xɛsi e kpé gbɛ̀ ɔ mɛ é kpo wu. Enɛ sixu zɔ́n bɔ xwétɔ́ ɔ na ba na kplɔ́n nǔ dó lee wɔ̌nxixogbɛwu na ɖó te bǐ xwíi gbɔn é wu. Ðebǔ wɛ é na bo nyí ɔ, nɔ tɛ́n kpɔ́n bo nɔ d’alɔ mɛ ɖěɖee ba na tuùn lee wěɖexámɛ Biblu tɔn sixu d’alɔ ye gbɔn é lɛ é. Katarína e xó mǐ ɖɔ wá yì é ɖɔ: “Un nɔ lin tamɛ  dó lee nǔgbo ɔ bló bɔ gbɛzán ce kpɔ́n te d’eji gbɔn é jí.” Wǎgbɔ tɔn ɔ, Katarína nɔ ɖɔ xó kpodo jiɖiɖe kpo, bɔ mɛ ɖěɖee é nɔ ɖɔ xó na lɛ é nɔ mɔ enɛ vaan.

14. Sɔgbe xá Nǔnywɛxó 27:17 ɔ, enyi mǐ kpo mɛɖé kpo ɖò Mawuxó ɖɔ wɛ ɔ, nɛ̌ mǐ ka sixu d’alɔ mǐɖée gbɔn?

¹⁴ Nǔ mɛ ɖevo lɛ ni d’alɔ we. Ðò xwè kanweko nukɔntɔn ɔ mɛ ɔ, Pɔlu xlɛ́ wlɛnwín e é nɔ zán dó ɖɔ Mawuxó, bo nɔ lɛ́ kplɔ́n nǔ mɛ lɛ é Timɔtée, bo dó wusyɛn lanmɛ nú Timɔtée ɖɔ é ni zán wlɛnwín enɛ lɛ dó d’alɔ nɔví ɖevo lɛ. (1 Kɔ. 4:17) Timɔtée ɖɔhun ɔ, mǐ sixu ɖu lè mɛ e ko mɔ nǔ kpɔ́n ɖò agun mǐtɔn mɛ lɛ é tɔn. (Xà Nǔnywɛxó 27:17.) Ð’ayi kpɔ́ndéwú nɔví sunnu e nɔ nyí Shawn é tɔn wu. Nú táan ɖé ɔ, é wà gbexosin-alijitɔ́zɔ́ ɖò gletoxo e mɛ mɛ gegě yí wǎn nú sinsɛn yeɖesunɔ tɔn lɛ ɖè é ɖé. Nɛ̌ é ka kpò ɖò awǎjijɛ ɖó wɛ gbɔn? É ɖɔ: “Hweɖebǔnu e é nyɔ́ bló é ɔ, un nɔ ɖɔ Mawuxó kpo mɛɖé kpo. Mǐ nɔ zán táan e mǐ nɔ dó ɖi zɔnlin yì xwé ɖevo gbè na é dó d’alɔ mǐɖée bonu nǔwukpíkpé mɛkplɔnkplɔn tɔn mǐtɔn na kpɔ́n te d’eji. Ði kpɔ́ndéwú ɔ, mǐ nɔ ɖɔ xó dó lee mǐ ɖɔ xó ɖó kpɔ́ xá xwétɔ́ e mǐ xò gò wá yì é gbɔn é jí. Enɛ gudo ɔ, mǐ nɔ ɖɔ xó dó nǔ e mǐ sixu ɖɔ hwenu e xwétɔ́ ɖevo e mǐ na mɔ é na ɖɔ nǔ ɖokpo ɔ é jí.”

15. Etɛwu ɖɛxixo ka ɖò taji nú sinsɛnzɔ́ mǐtɔn?

¹⁵ Xoɖɛ bo byɔ Jehovah ɖɔ é ni d’alɔ we. Nɔ ba alixlɛ́mɛ Jehovah tɔn hweɖebǔnu e a ɖò wɛnɖagbe ɔ jlá wɛ é. Gbigbɔ mímɛ́ tɔn agbɔ̌nnɔ ɔ mɛvo ɔ, mǐ ɖě sixu kpé nǔɖe wu bo wà ɖò sinsɛnzɔ́ ɔ mɛ ǎ. (Ðɛh. 127:1; Luk. 11:13) Enyi a ɖò alɔdó byɔ Jehovah ɖò ɖɛ mɛ wɛ hǔn, nɔ nɔ tlɔlɔ. Ði kpɔ́ndéwú ɔ, nɔ byɔ ɛ ɖɔ é ni xlɛ́ ali we yì mɛ ɖěɖee ɖó ninɔmɛ ayi mɛ tɔn e jɛxa, bo ɖò gbesisɔmɛ bo na sè xó ɔ lɛ é gɔ́n. Enɛ gudo hǔn, wà nǔ sɔgbe xá ɖɛ towe, bo jlá wɛnɖagbe ɔ mɛ ɖěɖee a xò gò lɛ é bǐ.

16. Etɛwu nǔkplɔnkplɔn mɛɖesunɔ tɔn ka ɖò taji nú sinsɛnzɔ́ mǐtɔn?

¹⁶ Nɔ ba hwenu nú nǔkplɔnkplɔn mɛɖesunɔ tɔn. Xó Mawu tɔn ɖɔ: ‘Miɖesunɔ ni tuùn jlǒ Mawu tɔn: é wɛ nyí nǔ ɖagbe; nǔ e nɔ nyɔ́ nukún tɔn mɛ é; nǔ e sɔgbe bɔ nǔ bǐ vɔ ɖ’ewu é.’ (Hlɔ. 12:2) Lee mǐ kánɖeji ɖɔ mǐ tuùn nǔgbo ɔ sɔ é ɔ, mɔ̌ wɛ jiɖiɖe mǐtɔn nɔ syɛn sɔ hwenu e mǐ ɖò xó ɖɔ nú mɛ ɖevo lɛ wɛ ɖò sinsɛnzɔ́ ɔ mɛ é. Katarína e xó mǐ ɖɔ ɖò bǐbɛ̌mɛ é ɖɔ: “É ko nɔ zaan dìn bɔ un mɔ ɖɔ é byɔ ɖɔ má na hlɔnhlɔn nǔɖiɖi ce gbɔn nǔkplɔnmɛ bǐbɛ̌mɛ tɔn e ɖò Biblu mɛ lɛ é ɖé lɛ vívɔ́ kplɔ́n gblamɛ. Enɛ wu ɔ, un xwè sɔ bo kplɔ́n kúnnuɖenú ɖěɖee xlɛ́ ɖɔ Gbɛɖotɔ́ ɖé tíìn, bɔ Biblu nyí Xó Mawu tɔn nǔgbo, lobɔ Mawu lɛ́ ɖó tutoblonunu ɖé, b’ɛ sɔ́ afɔ tɔn ɖó te ɖò égbé é.” Katarína ɖɔ ɖɔ nǔkplɔnkplɔn mɛɖesunɔ tɔn na hlɔnhlɔn nǔɖiɖi emitɔn, bo lɛ́ gɔ́ sò nú awǎjijɛ emitɔn ɖò sinsɛnzɔ́ ɔ mɛ.

17. Etɛwu Jezu ka kpò ɖò linlin e sɔgbe é ɖó dó sinsɛnzɔ́ tɔn wu wɛ?

¹⁷ Jezu kpò ɖò linlin e sɔgbe é ɖó wɛ, bo nɔ lɛ́ jlá Mawuxó ɔ, é na bo tlɛ nyí hwenu e mɛ lɛ gbɛ́ wɛn tɔn é ɔ nɛ. Aniwu? É tuùn lě dò mɛ lɛ ɖó hudo nǔgbo ɔ tɔn sɔ é, bo jló na dó wɛn Axɔ́suɖuto ɔ tɔn mɛ gegě lee é kpéwú gbɔn é. É lɛ́ tuùn ɖɔ mɛ e gbɛ́ wɛn ɔ ɖò bǐbɛ̌mɛ é ɖé lɛ na wá yí wɛn ɔ ɖò nukɔnmɛ. Ðǒ ayi nǔ e jɛ ɖò xwédo éɖesu tɔn mɛ é wu. Ðò xwè atɔn adaɖé e Jezu zán dó ɖɔ Mawuxó na lɛ é mɛ ɔ, nɔví tɔn ɖokpo lě huzu ahwanvu tɔn ǎ. (Jaan 7:5) Amɔ̌, ɖò fínfɔ́n sín kú tɔn gudo ɔ, ye huzu Klisanwun.—Mɛ. 1:14.

18. Etɛwu mǐ ka nɔ kpò ɖò wɛnɖagbe ɔ jlá wɛ?

 ¹⁸ Mǐ tuùn mɛ e na wá sɛn Jehovah lɛ é ǎ. Mɛɖé lɛ nɔ yawǔ yí wɛn mǐtɔn, mɛ ɖevo lɛ ka nɔ wà mɔ̌ ǎ. Mɛ ɖěɖee ma tlɛ nɔ ba na sè xó mǐtɔn ǎ lɛ é nɔ ɖó ayi walɔ ɖagbe kpo linlin ɖagbe e mǐ ɖó é kpo wu, bo sixu wá ‘jɛ susu kpa nú Mawu jí.’—1 Pi. 2:12.

19. Sɔgbe xá 1 Kɔlɛntinu lɛ 3:6, 7 ɔ, etɛ mǐ ka ɖó na tuùn?

¹⁹ Nǔgbo wɛ ɖɔ mǐ nɔ tun atín, bo nɔ lɛ́ hú sin na, amɔ̌, mǐ ɖó na nɔ flín ɖɔ Mawu wɛ nɔ bló b’ɛ nɔ sù. (Xà 1 Kɔlɛntinu lɛ 3:6, 7.) Nɔví sunnu ɖé nɔ nɔ Éthiopie, bo ɖɔ: “Nú xwè 20 jɛji ɔ, nyiɖokponɔ wɛ nyí Kúnnuɖetɔ́ ɖò xá e mɛ un nɔ nɔ é. Amɔ̌ dìn ɔ, wɛnjlatɔ́ 14 wɛ ɖò fí. Mɛ 13 bló baptɛm; asì ce kpo vǐ ce atɔn lɛ kpo ɖò mɛ enɛ lɛ mɛ. Mɛ 32 wɛ nɔ wá kplé lɛ hwɛhwɛ.” Xomɛ nɔ hun nɔví sunnu enɛ ɖɔ é kpò ɖò wɛnɖagbe ɔ jlá wɛ, bo nɔ lɛ́ ɖó suúlu, lobo ɖò te kpɔ́n Jehovah ɖɔ é na dɔn ayijlɔjlɔnɔ lɛ wá tutoblonunu Tɔn mɛ.—Jaan 6:44.

20. Ali tɛ nu mǐ ka cí gbɛhwlɛngántɔ́ lɛ ɖɔhun ɖè?

²⁰ Gbɛ̀ gbɛtɔ́ lɛ bǐ tɔn wɛ xɔ akwɛ ɖò Jehovah nukúnmɛ. É jɔwǔ mǐ bonu mǐ na w’azɔ̌ ɖó kpɔ́ xá Vǐ tɔn, bo na xò gbɛtɔ́ e gosin akɔta lɛ bǐ mɛ lɛ é kplé cobonu gbɛ̀ ɔ na vɔ. (Ajée 2:7) Wɛnɖagbejijlazɔ́ mǐtɔn cí gbɛhwlɛngán sín azɔ̌ ɖé ɖɔhun. Mǐ cí mɛ e ɖò gbɛ̌ta gbɛhwlɛngán tɔn ɖé mɛ lɛ é ɖɔhun, bɔ è sɛ́ mǐ dó bonu mǐ na yì hwlɛn mɛ ɖěɖee ɖò tɔjihun e ɖò syɔ́syɔ́ wɛ é mɛ lɛ é. Mɛ e ɖò gbɛ̌ta gbɛhwlɛngán tɔn enɛ mɛ lɛ é klewun ɖé jɛn sixu mɔ mɛɖé bo hwlɛngán có, ye bǐ wɛ ka w’azɔ̌ titewungbe ɖé. Nǔ ɖokpo ɔ wɛ é nyí nú azɔ̌ e mǐ nɔ wà ɖò sinsɛnzɔ́ ɔ mɛ é. Mǐ tuùn mɛ nabi e kpò bɔ è na lɛ́ hwlɛn ɖò gbɛ̀ Satáan tɔn mɛ é ǎ. Jehovah ka sixu zán mǐ mɛ ɖebǔ bɔ mǐ na d’alɔ ye. Andreas e nɔ nɔ Bolivie é ɖɔ, “Enyi mɛɖé kplɔ́n nǔgbo Biblu tɔn lɛ, bo bló baptɛm ɔ, un nɔ mɔ ɖɔ é kún nyí mɛ ɖokpo wɛ wà azɔ̌ ɔ ó.” Mi nú mǐ ni kpò ɖò linlin e sɔgbe é mɔ̌hun ɖó dó sinsɛnzɔ́ mǐtɔn wu wɛ. Enyi mǐ nɔ wà mɔ̌ ɔ, Jehovah na kɔn nyɔna dó mǐ jí, bɔ sinsɛnzɔ́ mǐtɔn na na mǐ awǎjijɛ tawun.