1-2. Ényí ninɔmɛ mǐtɔn lɛ́ húzú ɔ, étɛ́wú nǔgbódodó Biblu tɔn ɖé lɛ́ ka sixú lɛ́ wá xɔ akwɛ́ nú mǐ tawun?

 ÉNYÍ súnnu ɖé kpó nyɔ̌nu ɖé kpó jló ná wlí alɔ ɔ, hwɛhwɛ ɔ, mɛxó agun tɔn ɖé nɔ xwlé xóɖiɖɔ jínjɔ́n Biblu jí e ɖɔ xó dó alɔwlíwlí jí é yě, bɔ yě nɔ ɖótó kpó sɔxwixwe kpó. Nǔgbódodó ɖěɖěe jí è nɔ ɖɔ xó dó ɖo xóɖiɖɔ énɛ́ hwenu lɛ́ é sɔ́ nyí nǔ yɔ̌yɔ́ nú yě ǎ. Amɔ̌, bɛ́sín azǎn énɛ́ jí ɔ, wěmafɔ énɛ́ lɛ́ nɔ lɛ́ xɔ akwɛ́ nú yě ɖésú. Étɛ́wú? Ðó yě ko húzú asú kpó asi kpó, bó ná zán wěmafɔ énɛ́ lɛ́ ɖo gbɛzán yětɔn mɛ wútu.

² Nǔ ɖokpó ɔ wɛ nɔ lɛ́ jɛ hwenu e asú kpó asi kpó ɖé húzú mɛjitɔ́ é. Ðo xwe lɛ́ vlamɛ ɔ, yě sixú ko se xóɖiɖɔ gěgé dó lěe yě ná kplɔ́n vǐ lɛ́ gbɔn é wú. Amɔ̌, vo wɛ yě ná mɔ nǔgbódodó énɛ́ lɛ́ gbɔn din. Zaanɖé din ɔ, yě lɔmɔ̌ ná ɖó vǐ yěɖésúnɔ tɔn bó ná kplɔ́n. Azɔ̌ kpinkpɛn ɖé wɛ nyí azɔ̌ énɛ́! É ɖo wɛn ɖɔ ninɔmɛ yɔ̌yɔ́ lɛ́ sixú zɔ́n bɔ lěe mǐ mɔ nukúnnú jɛ nǔgbódodó Biblu tɔn lɛ́ mɛ gbɔn ɖ’ayǐ é ná lɛ́ kpɔ́n te d’é jí. Nǔ e wú mɛsɛntɔ́ Jehovah tɔn lɛ́ nɔ xa Mawuxówéma ɔ é ɖokpó nɛ́; gɔ́ ná ɔ, lěe è byɔ́ axɔ́sú Izlayɛ́li tɔn lɛ́ gbɔn é ɔ, yě ná nɔ lin tamɛ dó nǔ e yě xa lɛ́ é jí “hwebǐnu” ɖo gbɛzán yětɔn mɛ.—Sɛ́n. 17:19.

3. Étɛ́ lɛ́ jí mǐ ka ná ɖɔ xó dó ɖo xóta élɔ́ mɛ?

³ Mɛjitɔ́ lɛ́ mi, wǔjɔmɛ ɖaxó hú gǎn e Klisánwun ɖé sixú ɖó é ɖokpó wɛ mi ɖó, énɛ́ wɛ nyí ɖɔ mi ná kplɔ́n nǔ vǐ mitɔn lɛ́ dó Jehovah wú. Amɔ̌, mi ba ná wa nǔ hú nǔgbó ɖěɖěe kúnkplá Mawu mǐtɔn é kpínkplɔ́n yě kpowun. Mi ba ná d’alɔ vǐ mitɔn lɛ́ bɔ yě ná yí wǎn nú Jehovah kpó ayi yětɔn bǐ kpó. Étɛ́ mi ka sixú wa, bó ná dó wǎn yí nú  Jehovah dó vǐ mitɔn lɛ́ sín ayi mɛ? Ðo xóta élɔ́ mɛ ɔ, mǐ ná ɖɔ xó dó nǔgbódodó Biblu tɔn e sixú d’alɔ mi mɛ mɛjitɔ́ lɛ́ é ɛnɛ wú. (2 Tim. 3:16) Mi ná lɛ́ mɔ lěe mɛjitɔ́ ɖé lɛ́ ko ɖu le wěɖexámɛ Biblu tɔn lɛ́ zínzán tɔn gbɔn é.

4. Ðɔ nǔgbódodó e sixú d’alɔ mɛjitɔ́ lɛ́ bɔ yě ná dó wǎn yí nú Jehovah dó vǐ yětɔn lɛ́ sín ayi mɛ é ɖokpó. (Jaki 1:5)

⁴ Nǔgbódodó 1tɔn: Mi nɔ ba alixlɛ́mɛ Jehovah tɔn. Mi nɔ byɔ́ Jehovah ɖɔ é ní ná mi nǔnywɛ́ e sín hudó mi ɖó, bó ná d’alɔ vǐ mitɔn lɛ́ bɔ yě ná yí wǎn n’i é. (Xa Jaki 1:5.) É wɛ nyí mɛ e jɛxá hú gǎn bó sixú ɖe wě xá mɛ é. Hwɛjijɔ gěgé wú wɛ mǐ sixú ɖɔ mɔ̌. We ɖíe. Nukɔntɔn, vǐtɔ́ e mɔ nǔ kpɔ́n hú vǐtɔ́ ɖěvo ɖěbǔ é wɛ Jehovah nyí. (Ðɛh. 36:10) Wegɔ́, wě e nǔnywɛ́ kpé bɔ é nɔ ɖe xá mɛ lɛ́ é nɔ hɛn le wá hwebǐnu.—Eza. 48:17.

5. (a) Étɛ́ lɛ́ tutoblónúnǔ Jehovah tɔn ka nɔ sɔ́ nǔ ná bó ná dó d’alɔ mɛjitɔ́ lɛ́? (b) Lěe mi ná ko mɔ gbɔn ɖo video ɔ mɛ é ɔ, étɛ́ lěe nɔví súnnu Amorim kpó nɔví nyɔ̌nu Amorim kpó kplɔ́n vǐ yětɔn lɛ́ gbɔn é ka kplɔ́n we?

⁵ Jehovah nɔ gbɔn Xó tɔn kpó tutoblónúnǔ tɔn kpó gblamɛ bó nɔ sɔ́ nǔ nú nǔɖuɖu gbigbɔ tɔn e jínjɔ́n Biblu jí, bó sixú d’alɔ mi bɔ mi ná kplɔ́n vǐ mitɔn lɛ́ bɔ yě ná yí wǎn n’i é gěgé. (Mat. 24:45) Ði kpɔ́ndéwú ɔ, mi sixú mɔ wěɖexámɛ e nyɔ́ zán é gěgé ɖo xóta ɖěbɔdóɖěwú “Alɔdó nú xwédo lɛ́,” éé tɔ́n ɖo xójláwéma Fɔ́n! mɛ nú xwe mɔ̌kpán, bɔ din ɔ, é nɔ tɔ́n ɖo tɛn Ɛntɛnɛ́ti tɔn mǐtɔn jí é mɛ. Gɔ́ ná ɔ, video gěgé ɖo jw.org jí, bó sixú d’alɔ mɛjitɔ́ lɛ́ bɔ yě ná xwedó wěɖexámɛ Jehovah tɔn dó kplɔ́n vǐ yětɔn lɛ́. *—Nǔx. 2:4-6.

6. Nɛ̌ nǔ ka cí nú vǐtɔ́ ɖé dó ali e tutoblónúnǔ Jehovah tɔn nɔ xlɛ́ é kpó asi tɔn kpó é wú?

⁶ Mɛjitɔ́ gěgé ɖɔ ɖɔ alɔ e Jehovah nɔ dó émí gbɔn tutoblónúnǔ tɔn gblamɛ é nɔ su nukún émítɔn mɛ tawun. Vǐtɔ́ ɖé nɔ nyí Joe, bó ɖɔ: “È ná kplɔ́n vǐ atɔn dó nǔgbó ɔ mɛ nyí nǔ d’ayihún ǎ. Nyi kpó asi ce kpó nɔ xo ɖɛ sɛ́dó Jehovah hwebǐnu ɖɔ é ní d’alɔ mǐ. Bɔ mǐ nɔ ɖ’ayi wú ɖɔ hwɛhwɛ ɔ, xóta ɖé alǒ video ɖé nɔ wá dó ganmɛ, bó nɔ d’alɔ mǐ bɔ mǐ nɔ ɖí xwi xá  ninɔmɛ e mɛ gbɔn wɛ mǐ ɖe é. Hwebǐnu wɛ mǐ nɔ ɖeji dó wěɖexámɛ Jehovah tɔn lɛ́ wú.” Joe kpó asi tɔn kpó mɔ ɖɔ xóta énɛ́ lɛ́ kpó video énɛ́ lɛ́ kpó nɔ d’alɔ vǐ émítɔn lɛ́ bɔ yě nɔ sɛkpɔ́ Jehovah.

7. Étɛ́wú é ka ɖo tají ɖɔ mɛjitɔ́ lɛ́ ní wa nǔ e wú yě kpé é bǐ bó sɔ́ kpɔ́ndéwú ɖagbe ɖ’ayǐ? (Hlɔ̌manu lɛ́ 2:21)

⁷ Nǔgbódodó 2gɔ́: Mi nyí kpɔ́ndéwú ɖagbe. Vǐ lɛ́ nɔ kpɔ́n mɛjitɔ́ yětɔn lɛ́ tlítlí, bɔ hwɛhwɛ ɔ, yě nɔ wa nǔ yě ɖɔhun. É ɖo wɛn ɖɔ mɛjitɔ́ ɖě kún nyí mɛ maɖóblɔ̌ ó. (Hlɔ̌. 3:23) É ɖo mɔ̌ có, mɛjitɔ́ e ɖó nǔnywɛ́ lɛ́ é nɔ wa nǔ e wú yě kpé lɛ́ é bǐ, bó nɔ sɔ́ kpɔ́ndéwú ɖagbe ɖ’ayǐ nú vǐ yětɔn lɛ́. (Xa Hlɔ̌manu lɛ́ 2:21.) Vǐtɔ́ ɖé ɖɔ dó vǐ tɔn lɛ́ wú ɖɔ: “Avɔkanfún e nɔ ba ná xwí nǔ e lɛ̌ lɛ́ dó è lɛ́ é bǐ é ɖɔhun wɛ yě cí.” É ɖɔ gɔ́ ná ɖɔ: “Ényí nǔ e wa wɛ mǐ ɖe é ma sɔgbe xá nǔ e kplɔ́n yě wɛ mǐ ɖe ɖɔ yě ní wa é ǎ ɔ, yě ná ɖɔ nú mǐ.” Énɛ́ wú ɔ, ényí mǐ ba ɖɔ vǐ mǐtɔn lɛ́ ní yí wǎn nú Jehovah ɔ, wǎn e mǐɖésúnɔ yí n’i é ɖó ná gɔ́ngɔ́n, bó lɛ́ jɛ wě.

8-9. Étɛ́ nǔ e Andrew kpó Emma kpó ɖɔ é ka kplɔ́n we?

⁸ Ali gěgé nu wɛ mɛjitɔ́ lɛ́ sixú kplɔ́n nǔ vǐ yětɔn lɛ́ bɔ yě ná yí wǎn nú Jehovah ɖe. Ð’ayi nǔ e nɔví súnnu xwe 17 mɛví e nɔ nyí Andrew é ɖɔ é wú: “Mɛjitɔ́ ce lɛ́ nɔ tɛɖɛ̌ nǔ e wú é ɖo tají ɖɔ è ní nɔ xo ɖɛ é jí hwebǐnu. Gbadanu lɛ́ bǐ wɛ Papá nɔ xo ɖɛ ɖó kpɔ́ xá mì, nú un ná bo tlɛ ko xo nyiɖésúnɔ ɔ nɛ́. Mɛjitɔ́ ce lɛ́ nɔ flín nǔ élɔ́ mǐ hwebǐnu: ‘Mi sixú ɖɔ xó nú Jehovah azɔn nabí e jló mi é bǐ.’ Ðɛ̌ énɛ́ e yě nɔ tɛ́ ɖɛxixo jí é byɔ́ lanmɛ nú mì tawun, bɔ din ɔ, un ɖo ɖɛ xo sɛ́dó Jehovah wɛ ɔ, un nɔ vo, bó nɔ lɛ́ mɔ ɖɔ Tɔ́ wǎnyíyínɔ ɖé wɛ n’i.” Mɛjitɔ́ lɛ́ mi, mi nɔ flín hwelɛ́bǐnu ɖɔ wǎn e mi yí nú Jehovah é sixú d’alɔ vǐ mitɔn lɛ́ bɔ yě lɔ ná yí wǎn n’i.

⁹ Ð’ayi kpɔ́ndéwú Emma tɔn wú. Tɔ́ tɔn ɖu axɔ́ blí, bó jó bǐ nyi kɔ nú Mamáa tɔn, lobo jó xwédo ɔ dó. Emma ɖɔ: “Azɔn gěgé wɛ akwɛ́yózo hɛn Mamáa ce, amɔ̌, hwelɛ́bǐnu wɛ é nɔ ɖɔ xó dó lěe Jehovah nɔ kpé nukún dó mɛsɛntɔ́ tɔn lɛ́ wú gbɔn é wú. Un mɔ nǔgbó ɖɔ, lěe é zán gbɛ tɔn gbɔn é xlɛ́ ɖɔ é ɖi nǔ nú xó énɛ́ dóó. Nǔ e Mamáa ce nɔ kplɔ́n mì é wɛ é nɔ wa.” Nǔkplɔ́nmɛ ɔ ɖíe: Mɛjitɔ́ lɛ́ ná bó tlɛ ɖo ninɔmɛ vɛ́ wǔ lɛ́ mɛ ɔ, yě sixú sɔ́ kpɔ́ndéwú ɖagbe ɖ’ayǐ.—Ga. 6:9.

10. Ali tɛ́ lɛ́ ka hun nú mɛjitɔ́ Izlayɛ́li ví gěgé bɔ yě ná ɖɔ xó ɖó kpɔ́ xá vǐ yětɔn lɛ́? (Sɛ́nflínmɛ 6:6, 7)

¹⁰ Nǔgbódodó 3gɔ́: Mi nɔ ɖɔ xó ɖó kpɔ́ xá vǐ mitɔn lɛ́ hwɛhwɛ. Jehovah byɔ́ Izlayɛ́li ví hwexónu tɔn lɛ́ ɖɔ yě ní nɔ kplɔ́n nǔ vǐ yětɔn lɛ́ dó émí wú hwɛhwɛ. (Xa Sɛ́nflínmɛ 6:6, 7.) Ali gěgé wɛ hun nú mɛjitɔ́ énɛ́ lɛ́ ɖo kéze ɔ mɛ bɔ yě ná ɖɔ xó ɖó kpɔ́ xá vǐ yětɔn lɛ́, lobo lɛ́ dó wǎn yí nú Jehovah dó ayi yětɔn mɛ. Ði kpɔ́ndéwú ɔ, Izlayɛ́li ví súnnu e kpo ɖo wǐnnyáwínnyá mɛ é ɖé sixú zán hwenu gěgé dó d’alɔ tɔ́ tɔn, bɔ yě ná dó nǔkún alǒ ya nǔkún. Nɔví tɔn nyɔ̌nu sixú zán hwenu gěgé ɖo kéze ɔ mɛ dó d’alɔ Mamáa tɔn bɔ yě ná tɔ nǔ, lɔn avɔ, alǒ wa xwégbezɔ́ ɖěvo lɛ́. Mɛjitɔ́ lɛ́ kpó vǐ lɛ́ kpó ɖo azɔ̌ wa ɖó kpɔ́ wɛ ɔ, yě sixú ɖɔ xó dó nǔ tají gěgé jí. Ði kpɔ́ndéwú ɔ, yě sixú ɖɔ xó ɖó kpɔ́ dó lěe Jehovah nyɔ́ sɔ é jí, bó lɛ́ ɖɔ xó dó lěe é ɖo alɔ dó xwédo ɔ wɛ gbɔn é jí.

11. Ðɔ ali e sixú hun nú mɛjitɔ́ Klisánwun lɛ́ bɔ yě ná ɖɔ xó ɖó kpɔ́ xá vǐ yětɔn lɛ́ é ɖokpó.

¹¹ Égbé ɔ, gbɛ ɔ ko húzú. Ðo to gěgé mɛ ɔ, mɛjitɔ́ lɛ́ kpó vǐ lɛ́ kpó sɔ́ sixú nɔ zán hwenu ɖó kpɔ́ ɖo kéze ɔ mɛ ǎ. Mɛjitɔ́ lɛ́ sixú yi azɔ̌ mɛ, bɔ vǐ lɛ́ sixú yi wěmaxɔmɛ. Énɛ́ wú ɔ, mɛjitɔ́ lɛ́ ɖó ná ba ali ɖěɖěe nu yě sixú ɖɔ xó xá vǐ yětɔn lɛ́  ɖe lɛ́ é. (Efɛ́. 5:15, 16; Filí. 1:10, nwt) Hwenu e yě sixú wa mɔ̌ é ɖokpó wɛ nyí sinsɛn-bíbló xwédo tɔn hwenu. Nɔví súnnu wínnyáwínnyá ɖé nɔ nyí Alexander, bó ɖɔ: “Papá ce nɔ bló tuto sinsɛn-bíbló xwédo tɔn tɔn hwelɛ́bǐnu, bó ka nɔ lɔn nú nǔ ɖěbǔ nɔ sú ali dó mǐ bónú mǐ ná gɔn hwenu énɛ́ zán ɖó kpɔ́ ǎ. Mǐ fó ɔ, mǐ nɔ lɛ́ ɖɔ xó ɖó kpɔ́.”

12. Étɛ́ tatɔ́ xwédo tɔn lɛ́ ka ɖó ná tɛ́n kpɔ́n bó ná nɔ wa ɖo sinsɛn-bíbló xwédo tɔn hwenu?

¹² Ényí tatɔ́ xwédo tɔn ɖé wɛ nú we ɔ, étɛ́ a ka sixú wa bɔ vǐ towe lɛ́ ná nɔ ɖu sinsɛn-bíbló xwédo tɔn sín vǐví? A sixú kplɔ́n wěma ɖaaɖagbe mǐtɔn Ðu gbɛ víví káká sɔ́yi! ɔ xá vǐ towe lɛ́. Wěma énɛ́ kplɔ́nkplɔ́n xá yě ná hun xóɖɔɖókpɔ́ ɖagbe lɛ́ sín ali nú we. Ðó a nɔ ba ɖɔ vǐ towe lɛ́ ní nɔ ɖɔ lěe nǔ nɔ cí nú yě é kpó nǔ e ɖo ado hu nú yě wɛ lɛ́ é kpó nú we wútu ɔ, ma nɔ gbɔn sinsɛn-bíbló xwédo tɔn sín yɛdo mɛ dó mɔ xó ɖɔ dó yě wú, alǒ gbɛ́ nǔ nú yě ó. Gɔ́ ná ɔ, ényí vǐ towe lɛ́ ɖɔ nǔɖé bɔ é ma sɔgbe xá nǔgbódodó Biblu tɔn lɛ́ ǎ hǔn, tɛ́n kpɔ́n bó ma nɔ sin xomɛ ó. É nyɔ́ wa hǔn, lěe yě ɖɔ lěe nǔ cí nú yě nǔgbó nǔgbó é nú we gbɔn é ní dó xomɛhunhun nú we, nú a ní dó wǔsyɛ́n lanmɛ nú yě, bónú yě ní nɔ vo fɛɛ bó nɔ ɖɔ xó. Lěe nǔ nɔ cí nú vǐ towe lɛ́ é mɛ jɛ́n a sixú mɔ nǔ jɛ ganjí hwɛ̌, cóbó sixú kpé wú bó d’alɔ yě.

13. Ali ɖěvo tɛ́ lɛ́ ka hun nú mɛjitɔ́ lɛ́ bɔ yě ná zán dó d’alɔ vǐ yětɔn lɛ́ bɔ yě ná vɛ̌ kpó Jehovah kpó?

¹³ Mɛjitɔ́ lɛ́ mi, mi nɔ ba ali vovo lɛ́ ɖo kéze ɔ mɛ, bó nɔ d’alɔ vǐ mitɔn lɛ́ bónú yě ná vɛ́ kpó Jehovah kpó. A ɖó ná nɔ te kpɔ́n tuto Biblu kplɔ́nkplɔ́n tɔn ɖé, cóbó ná kplɔ́n nǔ yě dó Mawu wǎnyíyínɔ mǐtɔn wú ǎ. Ð’ayi nǔ e vǐnɔ e nɔ nyí Lisa é ɖɔ é wú: “Mǐ nɔ d’alɔ vǐ mǐtɔn lɛ́, bɔ yě nɔ mɔ kancícá e ɖo Jehovah kpó nǔɖíɖó lɛ́ kpó tɛ́ntin é. Ði kpɔ́ndéwú ɔ, ényí cukú mǐtɔn bló nǔɖé bónú é hwɛ́n ɔ, mǐ nɔ dɔn ayi yětɔn wá lěe nǔ e cukú ɔ wa é xlɛ́ ɖɔ Gbɛɖótɔ́ mǐtɔn nyí awǎjijɛnɔ, bó lɛ́ yí wǎn nú gbɛ mǐ ɖɔhun gbɔn é jí.”

14. Étɛ́wú é ka ɖo tají ɖɔ mɛjitɔ́ lɛ́ ní d’alɔ vǐ yětɔn lɛ́ bónú yě ná nɔ cyán mɛ e yě ná zun xɔ́ntɔn xá lɛ́ é kpó nǔnywɛ́ kpó? (Nǔnywɛ́xó 13:20)

¹⁴ Nǔgbódodó 4gɔ́: Mi nɔ d’alɔ vǐ mitɔn lɛ́ bónú yě ní zun xɔ́ntɔn ɖagbe lɛ́. Xó Mawu  tɔn ɖe xlɛ́ nyi wɛn ɖɔ xɔ́ntɔn mǐtɔn lɛ́ sixú wa ɖagbe nú mǐ, alǒ wa nǔ dó mǐ wú. (Xa Nǔnywɛ́xó 13:20.) Mɛjitɔ́ lɛ́ mi, mi ka tuun xɔ́ntɔn vǐ mitɔn lɛ́ tɔn lɛ́ a? Mi ka ko xo go yě, bó zán hwenu ɖó kpɔ́ xá yě kpɔ́n a? Étɛ́ mi ka sixú wa dó d’alɔ vǐ mitɔn lɛ́ bɔ yě ná zun xɔ́ntɔn xá mɛ e yí wǎn nú Jehovah lɛ́ é? (1 Kɔ. 15:33) Mi hɛn ɔ, mi ná nɔ ylɔ́ mɛ ɖěɖěe ɖó kancícá ɖagbe xá Jehovah lɛ́ é bónú yě ná wa nǔɖé lɛ́ xá mi kpó vǐ mitɔn lɛ́ kpó dó d’alɔ vǐ mitɔn lɛ́ bónú yě ná zun xɔ́ntɔn ɖagbe lɛ́.—Ðɛh. 119:63.

15. Étɛ́ mɛjitɔ́ lɛ́ ka sixú wa dó d’alɔ vǐ yětɔn lɛ́, bɔ yě ná zun xɔ́ntɔn ɖagbe lɛ́?

¹⁵ Ð’ayi nǔ e vǐtɔ́ e nɔ nyí Tony é mɔ kpɔ́n é wú. É tínmɛ nǔ e é kpó asi tɔn kpó wa dó d’alɔ vǐ yětɔn lɛ́ bɔ yě zun xɔ́ntɔn ɖagbe lɛ́ é, bó ɖɔ: “Ðo xwe lɛ́ vlamɛ ɔ, nyi kpó asi ce kpó nɔ ylɔ́ nɔví súnnu kpó nɔví nyɔ̌nu kpó e ɖó xwe vovo, bó lɛ́ ɖó ninɔmɛ vovo lɛ́ é wá xwé mǐtɔn gbe. Mǐ kpó yě kpó nɔ ɖu nǔ ɖó kpɔ́, bó nɔ lɛ́ bló sinsɛn-bíbló xwédo tɔn mǐtɔn ɖó kpɔ́. Ali tají hú gǎn e nu è sixú tuun mɛ ɖěɖěe yí wǎn nú Jehovah, bó nɔ lɛ́ sɛn ɛ kpó awǎjijɛ kpó ɖe lɛ́ é ɖokpó nɛ́. Mǐ nɔ yí nukúnkpénǔwútɔ́ lɛ̌dó tɔn lɛ́, mɛsɛ́dó lɛ́ kpó mɛ ɖěvo lɛ́ kpó dó xwé mǐtɔn gbe, bɔ énɛ́ hɛn le gěgé wá nú mǐ. Nǔ e yě ko mɔ kpɔ́n lɛ́ é, kanɖódónǔwú yětɔn kpó sɔ́ e yě nɔ sɔ́ yěɖée dó sá vɔ̌ dó mɛ ɖěvo lɛ́ tamɛ é kpó d’alɔ vǐ mǐtɔn lɛ́ tawun, bó lɛ́ zɔ́n bɔ yě vɛ́ kpó Jehovah kpó.” Mɛjitɔ́ lɛ́ mi, mi nɔ ɖo gbesisɔmɛ bá d’alɔ vǐ mitɔn lɛ́ bónú yě ná zun xɔ́ntɔn ɖagbe lɛ́.

16. Ényí vǐ ɖé ɖɔ ɖɔ émí kún ba ná sɛn Jehovah ó ɔ, étɛ́ è ma ka ná lin ǎ?

¹⁶ Ényí a ko wa nǔ e wú a kpé é bǐ bɔ vǐ towe lɛ́ ɖě ɖɔ ɖɔ émí kún ɖo Jehovah ná sɛn wɛ ó ɔ ka lo? Ma lin ɖɔ émí gɔn mɛjitɔ́zɔ́ émítɔn wa ó. Mǐ mɛ bǐ wɛ Jehovah ná mɛɖésúsíninɔ, káká jɛ vǐ towe lɔ jí; mɛɖésúsíninɔ ɔ, nǔwúkpíkpé ɖé wɛ, bó nɔ d’alɔ mǐ bɔ mǐ nɔ wá gbeta ɔ kɔn ɖɔ mǐ ná sɛn Mawu alǒ gbɔ. Ényí vǐ towe wá gbeta ɔ kɔn bó jó Jehovah dó hǔn, ma gɔn nukún ɖó ɖɔ é ná lɛ́ kɔ wá gbe ɖokpó ó. Nɔ flín kpɔ́ndéwú vǐ ɖuvanɔ ɔ  tɔn. (Luk. 15:11-19, 22-24) Dɔ̌nkpɛvú énɛ́ zɛ gbě sín nǔjlɔ́jlɔ́wiwa sín ali ɔ jí tawun, amɔ̌, gǔdo mɛ ɔ, é wá lɛ́ kɔ. Mɛɖé lɛ́ sixú ɖɔ: “Tan kpowun wɛ nǔ énɛ́ nyí. Nǔ énɛ́ ka sixú jɛ dóó a?” Ganjí, nǔ sixú nyí mɔ̌. Kpɔ́ndéwú dɔ̌nkpɛvú e nɔ nyí Elie é tɔn xlɛ́ mɔ̌.

17. Nɛ̌ kpɔ́ndéwú Elie tɔn ka dó wǔsyɛ́n lanmɛ nú we gbɔn?

¹⁷ Elie ɖɔ dó mɛjitɔ́ tɔn lɛ́ wú ɖɔ: “Yě wa nǔ e wú yě kpé lɛ́ é bǐ bó dó wǎn yí nú Jehovah kpó Xó tɔn Biblu ɔ kpó dó ayi ce mɛ. Amɔ̌, hwenu e un ɖo wǐnnyáwínnyá wɛ é ɔ, un bɛ́ gǔfínfɔ́n.” Elie jɛ gbɛ we zán jí, bó lɛ́ gbɛ́ gǎn e dó wɛ mɛjitɔ́ tɔn lɛ́ ɖe bó ná d’alɔ ɛ ɖo gbigbɔ lixo lɛ́ é bǐ. Ée é gosín xwégbe é ɔ, é jɛ gbɛ blíblí zán jí. Nǔ ɖo mɔ̌ có, hweɖélɛ́nu ɔ, é nɔ ɖɔ xó dó Biblu jí xá xɔ́ntɔn tɔn ɖé. Elie ɖ’ayi nǔ élɔ́ wú: “Lě do un nɔ ɖɔ xó dó Jehovah wú nú xɔ́ntɔn ce sɔ é ɔ, mɔ̌ do wɛ nyiɖésúnɔ mɛtún ɔ nɔ lin tamɛ dó Jehovah jí sɔ. Kpɛɖé kpɛɖé ɔ, nǔgbó Biblu tɔn e sín kwín mɛjitɔ́ ce lɛ́ dó gǎn tawun, bó dó dó ayi ce mɛ bɔ é ma su ɖ’ayǐ ǎ lɛ́ é jɛ susu jí.” Hwenu ɖo yiyi wɛ é ɔ, Elie wá lɛ́ kɔ wá nǔgbó ɔ mɛ. * Dǒ nukún lěe xomɛ ná ko hun mɛjitɔ́ tɔn lɛ́ sɔ ɖɔ yě dó gǎn bó kplɔ́n ɛ sín hwenu e é ɖo vǔ é, bɔ é yí wǎn nú Jehovah é mɛ kpɔ́n!—2 Tim. 3:14, 15.

18. Nɛ̌ nǔ ka nɔ cí nú we dó mɛjitɔ́ ɖěɖěe nɔ dó gǎn tawun, bó nɔ kplɔ́n nǔ vǐ yětɔn lɛ́ nú yě ná yí wǎn nú Jehovah lɛ́ é wú?

¹⁸ Mɛjitɔ́ lɛ́ mi, Jehovah sɔ́ azɔ̌ ɖaaɖagbe ɖé d’así nú mi, énɛ́ wɛ nyí ɖɔ mi ná kplɔ́n vǐ e ji wɛ è ɖe din lɛ́ é bɔ yě ná wá sɛn Jehovah. (Ðɛh. 78:4-6) Azɔ̌ énɛ́ bɔ wǔ ǎ, énɛ́ wú wɛ mǐ kpa mi kpó ayi bǐ kpó nú azɔ̌ syɛ́nsyɛ́n e wa wɛ mi ɖe bá d’alɔ vǐ mitɔn lɛ́ é! Ényí mi kpo ɖo nǔ e wú mi kpé é bǐ wa wɛ dó d’alɔ vǐ mitɔn lɛ́ bónú yě ní yí wǎn nú Jehovah, lobo lɛ́ se tónú n’i ɔ, mi sixú kú d’é jí ɖɔ xomɛ ná hun Tɔ́ mǐtɔn jǐxwé tɔn wǎnyíyínɔ ɔ.—Efɛ́. 6:4.