1. Gbeta tají tɛ́ kɔn gbɛtɔ́ lɛ́ bǐ ka ɖó ná wá?

 GBƐTƆ́ lɛ́ bǐ ɖó ná wá gbeta tají ɖé kɔn ɖo égbé. Yě ná nɔ gǔdo nú Jehovah Mawu e ɖ’acɛ bó ná kp’acɛ dó gbɛ ɔ nu é, alǒ yě ná nɔ gǔdo nú Satáan Awǒvi éé nyí kɛntɔ́ tɔn dǎkaxotɔ́ ɔ é. Mɛ ɖokpó ɖokpó ná sɔ́ akpáxwé ɖé dandan. Ényí yě ná nɔ gbɛ káká sɔ́yi kpó yě ná gbɔ kpó ɔ, é ná sín gbeta e kɔn yě ná wá é wú. (Mat. 25:31-33, 46) Ðo “ya ɖaxó ɔ” hwenu ɔ, è ná ɖó wuntun e ná zɔ́n bɔ yě ná gán é, alǒ wuntun e ná zɔ́n bɔ è ná sú kún yětɔn dó é yě.—Nǔɖe. 7:14; 14:9-11; Ezek. 9:4, 6.

2. (a) Étɛ́ Eblée lɛ́ 10:35-39 ka dó wǔsyɛ́n lanmɛ nú mǐ ɖɔ mǐ ní wa? (b) Nɛ̌ wěma Nǔɖexlɛ́mɛ tɔn ka sixú d’alɔ mǐ gbɔn?

² Xa Eblée lɛ́ 10:35-39. Ényí a wá gbeta ɔ kɔn bá nɔ gǔdo nú acɛ e Jehovah ɖó bó ná kpa acɛ é hǔn, gbeta e nǔnywɛ́ kpé é ɖé kɔn wɛ a wá nɛ́. Din ɔ, akpakpa ɖo sísɔ́ we wɛ bónú a ná d’alɔ mɛ ɖěvo lɛ́, bɔ yě lɔ ná wá gbeta ɖagbe ɔ kɔn. Bó ná dó kpé énɛ́ wú ɔ, a sixú zán nǔ ɖěɖěe ɖo wěma Nǔɖexlɛ́mɛ tɔn mɛ lɛ́ é. Wěma nukúnɖéjí énɛ́ ɖe nǔ e ná jɛ dó mɛ e klán gbe xá Jehovah lɛ́ é wú lɛ́ é xlɛ́, amɔ̌, é lɛ́ tɛɖɛ̌ nyɔ̌ná ɖěɖěe sín vǐví gbejínɔtɔ́ e nɔ gǔdo nú acɛ e é ɖó, bó ná kp’acɛ é ná ɖu lɛ́ é jí. Mǐ ɖó ná kplɔ́n nǔgbó tají énɛ́ lɛ́. Mɔ̌ wiwa ná ná hlɔ̌nhlɔ́n kán e mǐ kán ɖ’é jí bó ná kpo ɖo Jehovah sɛn wɛ é. Gɔ́ ná ɔ, mǐ sixú zán nǔ e mǐ ko kplɔ́n lɛ́ é dó d’alɔ mɛ ɖěvo lɛ́ bónú yě ná wá gbeta ɔ kɔn bá sɛn Jehovah, lobo lɛ́ tɛ́dó wǔtu tɔn.

3. Étɛ́ lɛ́ mǐ ka ná gbéjé kpɔ́n ɖo xóta élɔ́ mɛ?

³ Ðo xóta élɔ́ mɛ ɔ, mǐ ná gbéjé nǔkanbyɔ́ élɔ́ lɛ́ kpɔ́n: Étɛ́ lɛ́ ka ɖo sɛxwetɛn nú mɛ ɖěɖěe nɔ nɔ gǔdo nú acɛ e Mawu ɖó bó ná kpa acɛ lɛ́ é? Ðo alɔ ɖěvo mɛ ɔ, étɛ́ ka ná jɛ dó mɛ ɖěɖěe wá gbeta ɔ kɔn bá nɔ gǔdo nú kanlin vɔvɔ cɛ́cɛ́ e xó è ɖɔ ɖo wěma Nǔɖexlɛ́mɛ tɔn mɛ lɛ́ é jí?

4. Gbɛ̌ta tɛ́ mɛsɛ́dó Jaan ka mɔ bɔ é ɖo kpɔ́ xá Jezu ɖo jǐxwé?

⁴ Ðo nǔmimɔ ɖé mɛ ɔ, mɛsɛ́dó Jaan mɔ mɛ ɖěɖěe nɔ nɔ gǔdo nú acɛ e Jehovah ɖó bá kp’acɛ lɛ́ é sín gbɛ̌ta we, bɔ è dó gbɛ mavɔmavɔ sín ajɔ yě. Mɛ 144 000 wɛ ɖo gbɛ̌ta nukɔntɔn ɔ mɛ. (Nǔɖe. 7:4) Ayǐkúngban ɔ jí wɛ è sɔ́ yě sín, bónú yě ná yi kpa acɛ xá Jezu ɖo jǐxwé. Yě ná wa azɔ̌ xá Jezu, bó ná kpa acɛ dó ayǐkúngban ɔ jí. (Nǔɖe. 5:9, 10; 14:3, 4) Ðo nǔmimɔ ɔ mɛ ɔ, Jaan mɔ bɔ yě kpó Jezu kpó ɖo te ɖo Sinyɔ́ɔ só e ɖo jǐxwé é jí.—Nǔɖe. 14:1.

5. Étɛ́ ka ná jɛ dó mɛ yí ami dó ɖe ɖěɖěe kpo ɖo gbɛ ɖo ayǐkúngban ɔ jí lɛ́ é wú ɖo malínmálín mɛ?

⁵ Sín mɛsɛ́dó lɛ́ hwenu káká jɛ égbé ɔ, gbɛtɔ́ afatɔ́n mɔ̌kpán wɛ è ko sɔ́, bónú yě ná nɔ mɛ 144 000 lɛ́ mɛ. (Luk. 12:32; Hlɔ̌. 8:17) É ɖo mɔ̌ có, è ɖɔ nú Jaan ɖɔ mɛ yí ami dó ɖe kléwún ɖé jɛ́n ná kpo ɖo gbɛ ɖo ayǐkúngban jí ɖo azǎn gǔdo gúdo tɔn lɛ́ mɛ. Yě ‘mɛ énɛ́ lɛ́ e kpo lɛ́’ é ɔ, è ná ɖó “wuntun” gǔdo tɔn e xlɛ́ ɖɔ Jehovah sɔ́ yě é yě, cóbɔ ya ɖaxó ɔ ná bɛ́. (Nǔɖe. 7:2, 3; 12:17) Énɛ́ gúdo ɔ, hweɖénu ɖo ya ɖaxó ɔ hwenu ɔ, è ná bɛ́ mɛ yí ami dó ɖe ɖěɖěe kpo ɖo ayǐkúngban jí lɛ́ é yi jǐxwé, bɔ yé ná yi gɔ́ nú yě mɛ ɖěɖěe nɔ gbejí, bó kú, lobo ko yi jǐxwé lɛ́ é. Yě ná kpa acɛ xá Jezu ɖo Axɔ́súɖuto Mawu tɔn mɛ.—Mat. 24:31; Nǔɖe. 5:9, 10.

6-7. (a) Gbɛ̌ta tɛ́ Jaan ka mɔ bɔ d’é wú? Étɛ́ mǐ ka tuun dó gbɛ̌ta énɛ́ wú? (b) Aniwú nǔ ɖěɖěe xó è ɖɔ ɖo Nǔɖexlɛ́mɛ wěmata 7gɔ́ ɔ mɛ lɛ́ é ka ɖó ná dɔn mɛ yí ami dó ɖe ɖěɖěe kpo ɖo ayǐkúngban ɔ jí lɛ́ é kpó “mɛ wɔ̌búwɔ́bú ɔ” kpó?

⁶ Ée Jaan mɔ gbɛ̌ta jǐxwé tɔn ɔ gúdo é ɔ, é lɛ́ mɔ “mɛ wɔ̌búwɔ́bú ɖé.” È sixú sɔ́ kɛ́n yětɔn ǎ, ɖó yě sukpɔ́ tawun hú mɛ 144 000 lɛ́. (Nǔɖe. 7:9, 10) Étɛ́ mǐ ka tuun dó yě wú? È ɖɔ nú Jaan ɖɔ: “Mɛ e è dó ya ɖaxó ɔ ná lɛ́ é wɛ. Yě nya awu gaga yětɔn lɛ́, bó bɛ́ dó Lɛ̌ngbɔ́ví ɔ sín hun mɛ, bɔ awu lɛ́ wé.” (Nǔɖe. 7:14) Ényí “mɛ wɔ̌búwɔ́bú ɔ” xo ya ɖaxó ɔ zlɛ́ gúdo ɔ, yě ná nɔ gbɛ ɖo ayǐkúngban jí fí, bó ná ɖu nyɔ̌ná jí wǔ lɛ́ sín vǐví.—Ðɛh. 37:9-11, 27-29; Nǔx. 2:21, 22; Nǔɖe. 7:16, 17.

⁷ Ényí è sɔ́ mǐ bónú mǐ ná yi nɔ gbɛ ɖo jǐxwé, alǒ ayǐkúngban ɔ jí ná nɔ gbé wɛ mǐ ja ɔ, mǐ ka nɔ mɔ mǐɖée ɖo nǔ e xó è ɖɔ ɖo Nǔɖexlɛ́mɛ wěmata 7gɔ́ ɔ mɛ é mɛ a? Nǔ ɖó ná nyí mɔ̌. Awǎjijɛ sín hwenu titewungbe ɖé wɛ hwe énɛ́ nu ná nyí nú gbɛ̌ta we énɛ́ lɛ́ e nɔ sɛn Mawu é! Gbeta e kɔn mǐ wá, bó nɔ gǔdo nú acɛ e Jehovah ɖó bá kpa acɛ é ná d’awǎjijɛ nú mǐ kpɔ́n! Nǔ ɖěvo tɛ́ xó wěma Nǔɖexlɛ́mɛ tɔn ka ɖɔ nú mǐ dó ya ɖaxó ɔ wú?—Mat. 24:21.

8. Nɛ̌ ya ɖaxó ɔ ka ná bɛ́ gbɔn? Nɛ̌ mɛ gěgé ka ná wa nǔ gbɔn?

⁸ Lěe mǐ ko ɖɔ gbɔn ɖo xóta e wá yi é mɛ é ɔ, ɖo malínmálín mɛ ɔ, acɛkpikpa ɖěɖěe ɖo gbɛ ɔ mɛ lɛ́ é ná tɔ́n ahwan Babilɔ́nu Ðaxó ɔ, éé nyí kplékplé sinsɛn nǔvú lɛ́ bǐ tɔn é. (Nǔɖe. 17:16, 17) Wuntun e ná xlɛ́ ɖɔ ya ɖaxó ɔ bɛ́ é nɛ́. Amɔ̌, énɛ́ ka ná zɔ́n bɔ mɛ gěgé ná jɛ Jehovah sɛn jí wɛ a? Éǒ! É nyɔ́ wa ɔ, Nǔɖexlɛ́mɛ wěmata 6gɔ́ ɔ xlɛ́ ɖɔ ɖo táan syɛ́nsyɛ́n énɛ́ mɛ ɔ, mɛ ɖěɖěe ma ɖo Jehovah sɛn wɛ ǎ lɛ́ é ná ba alɔcyɔ́nmɛjí tutomɛ toxóɖiɖɔ kpó ajɔ̌wiwa kpó tɔn gbɛ ɔ tɔn e è sɔ́ jlɛ́ dó só wú lɛ́ é tɔn. Ðó mɛ énɛ́ lɛ́ wá gbeta ɔ kɔn bó nɔ gǔdo nú Axɔ́súɖuto Mawu tɔn ǎ wútu ɔ, Jehovah ná mɔ ɖɔ yě klán gbe xá émí.—Luk. 11:23; Nǔɖe. 6:15-17.

9. Nɛ̌ togun Jehovah tɔn ka ná gbɔn vo ɖo ya ɖaxó ɔ hwenu gbɔn? Étɛ́ mɛ é ka ná tɔ́n kɔ dó?

⁹ Nǔgbó ɔ, mɛsɛntɔ́ gbejínɔtɔ́ Jehovah  tɔn lɛ́ ná gbɔn vo ɖo táan énɛ́ lɛ́ e ná syɛ́n tawun é mɛ. Yě jɛ́n ná kpo ɖo gbɛ̌ta ɖokpó géé e ɖo ayǐkúngban ɔ jí, bó ɖo Jehovah Mawu sɛn wɛ, lobo lɛ́ gbɛ́ ɖɔ émí kún ná nɔ gǔdo nú “kanlin ɔ” ó lɛ́ é nyí wɛ. (Nǔɖe. 13:14-17) Ðó yě kpo ɖo gbejí nú Jehovah wútu ɔ, nǔ yětɔn ná vɛ́ mɛ ɖěɖěe klán gbe xá Jehovah lɛ́ é wú titewungbe tɔn. Wǎgbɔ tɔn ɔ, kplékplé akɔta lɛ́ tɔn ná tɔ́n ahwan togun Mawu tɔn gbɔn ayǐkúngban ɔ bǐ jí. Biblu ylɔ́ ahwantɔ́nmɛ énɛ́ ɖɔ ahwantɔ́nmɛ Gɔ̌gu Magɔ́gi tɔn tɔn.—Ezek. 38:14-16.

10. Lěe è tínmɛ gbɔn ɖo Nǔɖexlɛ́mɛ 19:19-21 mɛ é ɔ, nɛ̌ Jehovah ka ná wa nǔ gbɔn ɖo ahwan énɛ́ e è ná tɔ́n togun tɔn é hwenu?

¹⁰ Ahwantɔ́nmɛ syɛ́nsyɛ́n énɛ́ bɛ́ ɔ, nɛ̌ Jehovah ka ná wa nǔ gbɔn? É ɖɔ nú mǐ ɖɔ: ‘Xomɛsin ce ná jɛ te dó jǐ tɔn.’ (Ezek. 38:18, 21-23) Nǔɖexlɛ́mɛ wěmata 19gɔ́ ɔ tínmɛ nǔ e jɛ bɔ d’é wú é. Jehovah sɛ́ Vǐ tɔn dó bónú é ná jɛ hun dó togun tɔn jí, lobo sú kɛntɔ́ yětɔn lɛ́ sín kún dó. “Ahwangɔnu jǐxwé tɔn” e mɛ wɛnsagun gbejínɔtɔ́ lɛ́ kpó mɛ 144 000 lɛ́ kpó ɖe lɛ́ é ná nɔ kpɔ́ xá Jezu, bɔ yě ná tɔ́n ahwan Gɔ̌gu Magɔ́gi tɔn. (Nǔɖe. 17:14; 19:11-15) Nɛ̌ ahwan énɛ́ ka ná fó gbɔn? Mɛ ɖěɖěe klán gbe xá Jehovah lɛ́ é bǐ sín kún wɛ è ná sú dó mlɛ́mlɛ́!—Xa Nǔɖexlɛ́mɛ 19:19-21.

11. Nǔ tají hú gǎn tɛ́ xó è ka ɖɔ ɖo wěma Nǔɖexlɛ́mɛ tɔn mɛ?

¹¹ Dǒ nukún lěe nǔ ná cí nú gbejínɔtɔ́ lɛ́ ɖo ayǐkúngban jí hwenu e yě ná ko xo kún e è ná sú dó nú kɛntɔ́ Mawu tɔn lɛ́ é zlɛ́ é mɛ kpɔ́n! Hwenu awǎjijɛ tɔn ɖé wɛ é ná nyí! Nǔgbó wɛ ɖɔ mɛ ɖěɖěe ɖo jǐxwé lɛ́ é ná sú xó ɖaxó dó ɖe awǎjijɛ yětɔn xlɛ́ hwenu e è ná ko sú Babilɔ́nu Ðaxó ɔ sín kún dó é, amɔ̌, nǔ ɖěvo ná ɖe bó ná lɛ́ d’awǎjijɛ ɖaxó nú mɛ hú gǎn. (Nǔɖe. 19:1-3) Nǔ tají hú gǎn e ɖo wěma Nǔɖexlɛ́mɛ tɔn mɛ é wɛ; énɛ́ wɛ nyí “alɔwlíwlí Lɛ̌ngbɔ́ví ɔ tɔn.”—Nǔɖe. 19:6-9.

12. Lěe è ɖe xlɛ́ gbɔn ɖo Nǔɖexlɛ́mɛ 21:1, 2 mɛ é ɔ, hwetɛ́nu Lɛ̌ngbɔ́ví ɔ ka ná wlí alɔ?

¹² Hwetɛ́nu è ka ná wlí alɔ ɔ? Hwenu kléwun ɖé jɛ nukɔn nú ahwan Aamagedɔ́ni tɔn ɔ, mɛ e kpo ɖo mɛ 144 000 lɛ́ mɛ, bó ɖo ayǐkúngban jí lɛ́ é bǐ ná yi jǐxwé. Amɔ̌, hwenɛ́nu wɛ Lɛ̌ngbɔ́ví ɔ ná wlí alɔ ǎ. (Xa Nǔɖexlɛ́mɛ 21:1, 2.) È ná ko fun ahwan Aamagedɔ́ni tɔn ɔ bó ná ko sú kún dó nú kɛntɔ́ Mawu tɔn lɛ́ bǐ gúdo, hwɛ̌ cóbɔ Lɛ̌ngbɔ́ví ɔ ná wlí alɔ.—Ðɛh. 45:4, 5, 14-18.

13. Étɛ́ ka nyí tínmɛ alɔ e Lɛ̌ngbɔ́ví ɔ ná wlí é tɔn tawun nú mɛ ɖěɖěe é kan lɛ́ é?

¹³ Étɛ́ ka nyí tínmɛ alɔ e Lɛ̌ngbɔ́ví ɔ ná wlí é tɔn tawun nú mɛ ɖěɖěe é kan lɛ́ é? Alɔwlíwlí ɖé nɔ dɔn súnnu ɖokpó kpó nyɔ̌nu ɖokpó kpó cá; ɖo ali ɖokpó ɔ nu ɔ, alɔ e Lɛ̌ngbɔ́ví ɔ ná wlí é ná dɔn Jezu Klísu Axɔ́sú ɔ cá kpó “asi” tɔn e nyí mɛ 144 000 lɛ́ é kpó. Nǔwiwa tají énɛ́ ná ɖó acɛkpikpa yɔ̌yɔ́ ɖokpó ayǐ, b’ɛ ná kpa acɛ dó ayǐkúngban ɔ jí xɔ xwe 1 000.—Nǔɖe. 20:6.

14-15. Étɛ́ wú Nǔɖexlɛ́mɛ wěmata 21gɔ́ ɔ ka jlɛ́ mɛ 144 000 lɛ́ dó? (Kpɔ́n ɖiɖe e ɖo akpa ɔ jí é.)

¹⁴ Énɛ́ gúdo ɔ, Nǔɖexlɛ́mɛ wěmata 21gɔ́ ɔ jlɛ́ mɛ 144 000 lɛ́ dó toxo e nyɔ́ ɖɛkpɛ tawun é ɖé wú; “Jeluzalɛ́mu yɔ̌yɔ́” ɔ wɛ è nɔ ylɔ́ toxo énɛ́ ɖɔ. (Nǔɖe. 21:2, 9) Awǐnnya 12 jí wɛ è dó toxo ɔ do nyi, “bó wlán Lɛ̌ngbɔ́ví ɔ sín mɛsɛ́dó wěwe lɛ́ sín nyǐkɔ dó awǐnnya énɛ́ lɛ́ wú.” Aniwú énɛ́ ka dɔn Jaan tawun? Ðó é mɔ bɔ è wlán nyǐkɔ tɔn dó awǐnnya lɛ́ ɖokpó  wú. Wǔjɔmɛ ɖaxó ɖé wɛ nyí énɛ́!—Nǔɖe. 21:10-14; Efɛ́. 2:20.

¹⁵ È sixú jlɛ́ toxo nǔjlɛ́dónǔwú tɔn énɛ́ dó toxo ɖěvo ɖěbǔ wú ǎ. Siká akú wɛ è sɔ́ dó bló ali tají toxo ɔ tɔn ná; jɛ̌ wɛ è sɔ́ dó bló hɔn 12 lɛ́ ná; awǐnnya xɔ akwɛ́ lɛ́ wɛ è zán dó mɛ dǒ toxo ɔ tɔn lɛ́, bó lɛ́ zán dó ba acɔ́ nú dodó toxo ɔ tɔn lɛ́, bɔ jlɛ̌ tɔn lɛ́ lɛ́vɔ́ sɔgbe ganjí. (Nǔɖe. 21:15-21) Amɔ̌, Jaan ɖó ayi wú ɖɔ é hwe nǔɖé! Nǔ e é ɖɔ bɔ d’é wú é ɖíe: “Un mɔ sinsɛnxɔ ɖo toxo énɛ́ ɔ mɛ ǎ, ɖó Aklúnɔ Mawu Nǔbǐwúkpétɔ́ ɔ wɛ nyí sinsɛnxɔ tɔn; mɔ̌ ɖokpó ɔ, Lɛ̌ngbɔ́ví ɔ nyí sinsɛnxɔ tɔn. Toxo ɔ byɔ́ ɖɔ hwe ní ná émí wěziza ǎ; é ka byɔ́ ɖɔ sun ní ná émí wěziza ǎ, ɖó susu Mawu tɔn nɔ ná ɛ wěziza, bɔ Lɛ̌ngbɔ́ví ɔ nyí zogbɛ́n tɔn.” (Nǔɖe. 21:22, 23) Mɛ ɖěɖěe ɖo Jeluzalɛ́mu yɔ̌yɔ́ ɔ mɛ lɛ́ é ná nɔ kpɔ́ xá Jehovah. Énɛ́ wú ɔ, yě sɔ́ ná ɖó hudó tɛ́npli ɖě tɔn ǎ. (Nǔɖe. 22:3, 4) Gɔ́ ná ɔ, ée yě ná ɖo sinsɛnzɔ́ mímɛ́ yětɔn wa nú Mawu wɛ é ɔ, Jezu e ko nyí vɔ̌sánúxwlémawutɔ́ ɖaxó ɖo jǐxwé é ná xlɛ́ ali yě. (Ebl. 7:27) Hwɛjijɔ énɛ́ lɛ́ wú wɛ Jehovah kpó Jezu kpó wɛ nyí tɛ́npli toxo énɛ́ tɔn.

16. Étɛ́ lɛ́ sín le gbɛtɔ́ lɛ́ ka ná ɖu ɖo Axɔ́súɖuɖu xwe afatɔ́n tɔn Axɔ́súɖuto Mawu tɔn tɔn hwenu?

¹⁶ É nɔ víví nú mɛ yí ami dó ɖe lɛ́ tawun ɖɔ yě ní lin tamɛ dó toxo énɛ́ jí. Amɔ̌, toxo énɛ́ ɖó ná dɔn mɛ ɖěɖěe ɖó nukúnɖíɖó ayǐkúngban jí tɔn lɛ́ é lɔmɔ̌. Ðo Axɔ́súɖuɖu xwe afatɔ́n tɔn Axɔ́súɖuto Mawu tɔn tɔn hwenu ɔ, Jeluzalɛ́mu yɔ̌yɔ́ ɔ ná bló bɔ nyɔ̌ná maxamaxa lɛ́ ná kpé ayǐkúngban ɔ jí. Jaan mɔ bɔ nyɔ̌ná énɛ́ lɛ́ ɖo sisa wɛ “sin e nɔ ná gbɛ mɛ ɔ sín tɔsisa” ɖɔhun. Gɔ́ ná ɔ, “atín e nɔ ná gbɛ mɛ” bɔ ama tɔn lɛ́ nɔ “gbɔ azɔn nú to lɛ́” é ɖo tɔsisa ɔ sín awa we lɛ́ xwé. (Nǔɖe. 22:1, 2) Ali ɔ ná hun nú gbɛtɔ́ ɖěɖěe ɖo gbɛ hwe ɔ nu lɛ́ é bǐ bɔ yě ná ɖu nǔ ɖaaɖagbe énɛ́ lɛ́ sín le. Kpɛɖé kpɛɖé ɔ, gbɛtɔ́ tónúsetɔ́ lɛ́ bǐ ná húzú mɛ maɖóblɔ̌. Azɔn, wǔvɛ́, avǐ kpó aluwɛ kpó sɔ́ ná tíin ǎ.—Nǔɖe. 21:3-5.

17. Lěe Nǔɖexlɛ́mɛ 20:11-13 xlɛ́ gbɔn é ɔ, mɛ̌ mɛ̌ e ka ná ɖu Axɔ́súɖuɖu xwe afatɔ́n tɔn Klísu tɔn sín le?

¹⁷ Mɛ̌ mɛ̌ e ka ná ɖu nǔ ɖaaɖagbe énɛ́ lɛ́ sín le? Mɛ wɔ̌búwɔ́bú ɖěɖěe ná xo Aamagedɔ́ni zlɛ́ lɛ́ é, gɔ́ nú vǐ ɖěɖěe yě sixú wá ji lɛ́ é wɛ ná ɖu nǔ énɛ́ lɛ́ sín le jɛ  nukɔn. Amɔ̌, Nǔɖexlɛ́mɛ wěmata 20gɔ́ ɔ lɛ́ d’akpá ɖɔ mɛ e ko kú lɛ́ é ná fɔ́n sín kú. (Xa Nǔɖexlɛ́mɛ 20:11-13.) “Mɛ ɖagbe” ɖěɖěe ko kú lɛ́ é, gɔ́ nú “mɛ nyanya” ɖěɖěe ali ma hun nú yě bɔ yě kplɔ́n nǔ dó Jehovah wú ǎ lɛ́ é ɔ, è ná fɔ́n yě bɔ yě ná lɛ́ wá nɔ gbɛ ɖo ayǐkúngban jí fí. (Mɛ. 24:15; Jaan 5:28, 29) Ðiɖɔ wɛ è ɖe ɖɔ è ná fɔ́n mɛ lɛ́ bǐ sín kú ɖo Axɔ́súɖuɖu xwe afatɔ́n tɔn ɔ hwenu a? Éǒ! È ná fɔ́n mɛ ɖěɖěe ali hun nú yě bɔ yě ná sɛn Jehovah, lobɔ yě ka gbɛ́ bǐ lɛ́ é sín kú ǎ. Ali ko hun nú yě wá yi, amɔ̌, yě xlɛ́ ɖɔ émí kún jɛxá bó ná nɔ gbɛ ɖo Palaɖísi mɛ ɖo ayǐkúngban jí ó.—Mat. 25:46; 2 Tɛ. 1:9; Nǔɖe. 17:8; 20:15.

18. Hwenu e xwe 1 000 ɔ ná ko wá vivɔnu é ɔ, nɛ̌ nǔ lɛ́ ka ná cí ɖo ayǐkúngban ɔ jí?

¹⁸ Ðo vivɔnu xwe 1 000 ɔ tɔn ɔ, mɛ ɖěɖěe ɖo gbɛ ɖo ayǐkúngban ɔ jí lɛ́ é bǐ ná húzú mɛ maɖóblɔ̌. Hwɛhuhu gú e mǐ ɖu ɖo Adámu gɔ́n é sɔ́ ná wa nǔ dó mɛ ɖěbǔ wú ǎ. (Hlɔ̌. 5:12) È ná ko ɖe nudómɛ e ɖo nǔ wa dó gbɛtɔ́ lɛ́ wú wɛ ɖó hwɛ e Adámu hu é wú é síin bǐ gbídígbídí nɛ́. Hǔn, xlɛ́xlɛ́ wɛ énɛ́ ɖe ɖɔ mɛ ɖěɖěe ɖo ayǐkúngban ɔ jí lɛ́ é ná “wá gbɛ” ɖó yě ná húzú mɛ maɖóblɔ̌ ɖo vivɔnu xwe 1 000 ɔ tɔn.—Nǔɖe. 20:5.

19. Étɛ́wú mɛtɛ́nkpɔ́n gǔdo tɔn ɖé ka ɖó ná tíin?

¹⁹ Mǐ tuun ɖɔ Satáan tɛ́n kpɔ́n bó ná bló bɔ Jezu ná gɔn gbejí nɔ, Jezu ka lɔn nǔ n’i ǎ. É nɔ gbejí ɖo mɛtɛ́nkpɔ́n lɛ́ nukɔn. Amɔ̌, gbɛtɔ́ maɖóblɔ̌ lɛ́ bǐ ka ná kpo ɖo gbejí nú Jehovah, hwenu e Satáan ná tɛ́n yě kpɔ́n é a? Mǐ mɛ ɖokpó ɖokpó ná tɛ́n kpɔ́n bó ná ná xósin nú nǔkanbyɔ́ énɛ́ hwenu e è ná ɖe Satáan nyi te sín domaɖó-azan ɔ mɛ ɖo xwe 1 000 ɔ sín vivɔnu é. (Nǔɖe. 20:7) Mɛ ɖěɖěe ná nɔ gbejí ɖo mɛtɛ́nkpɔ́n gǔdo tɔn énɛ́ hwenu lɛ́ é ná mɔ gbɛ mavɔmavɔ, bɔ gǔdo mɛ ɔ, yě ná ɖu vǐví mɛɖéesíjijɛ nǔgbó ɔ tɔn. (Hlɔ̌. 8:21) È ná sú kún dó nú mɛ ɖěɖěe fɔ́n gǔ lɛ́ é bǐ mlɛ́mlɛ́, gɔ́ nú Satáan kpó awǒvi tɔn lɛ́ kpó.—Nǔɖe. 20:8-10.

20. Nɛ̌ nǔ ka cí nú we dó nǔɖɔɖayǐ ɖaaɖagbe e ɖo wěma Nǔɖexlɛ́mɛ tɔn mɛ lɛ́ é wú?

²⁰ Nɛ̌ nǔ ka cí nú we dó akpáxwé kléwún élɔ́ e mǐ gbéjé kpɔ́n ɖo wěma Nǔɖexlɛ́mɛ tɔn mɛ é wú? Nú a dó nukún lěe gbɛ towe ná cí hwenu e nǔɖɔɖayǐ ɖaaɖagbe énɛ́ lɛ́ ná ko jɛnu é mɛ kpɔ́n ɔ, akpakpa nɔ sɔ́ we ǎ cé? É ɖo wɛn ɖɔ énɛ́ ná sísɛ́ we bɔ a ná ylɔ́ mɛ ɖěvo lɛ́, bónú yě ná gɔ́ nú mǐ bɔ mǐ ná sɛn Mawu mǐtɔn lěe é ba gbɔn é. (Nǔɖe. 22:17) Din e mǐ ko ɖɔ xó dó nǔ énɛ́ lɛ́ e ná wá jɛ ɖo sɔgúdo é wú é ɔ, akpakpa sɔ́ mǐ bɔ mǐ ba ná ɖɔ mɛsɛ́dó Jaan ɖɔhun ɖɔ: “Amǐ! Aklúnɔ Jezu, wǎ!”—Nǔɖe. 22:20.