1. Étɛ́wú mǐ bǐ ka ɖó hudó nǔnywɛ́ e gosín Mawu gɔ́n é tɔn? (Nǔnywɛ́xó 4:7)

 ÉNYÍ a ko wá gbeta tají ɖé kɔn kpɔ́n ɔ, é ɖo wɛn ɖɔ a xo ɖɛ dó byɔ́ nǔnywɛ́, ɖó a tuun ɖɔ émí ɖó hudó tɔn. (Ja. 1:5) Axɔ́sú Salomɔ́ɔ wlán ɖɔ: “Nǔnywɛ́ wɛ nyí nǔ e ɖo tají hú gǎn é.” (Xa Nǔnywɛ́xó 4:7, nwt.) É ɖo wɛn ɖɔ Salomɔ́ɔ kún ɖo xó ɖɔ dó nǔnywɛ́ ɖé kpowun wú wɛ ó. Nǔnywɛ́ e gosín Jehovah Mawu gɔ́n é wú ɖɔ xó dó wɛ é ɖe. (Nǔx. 2:6) Amɔ̌, nǔnywɛ́ e gosín Mawu gɔ́n é ka sixú d’alɔ mǐ bɔ mǐ ná ɖí xwi xá wǔvɛ́ e mǐ nɔ mɔ égbé lɛ́ é a? Nǔ sixú nyí mɔ̌, bɔ nǔ e mǐ ná mɔ ɖo xóta élɔ́ mɛ é nɛ́.

2. Ðɔ ali e nu mǐ sixú ɖó nǔnywɛ́ jɔ nǔnywɛ́ ɖe é ɖokpó.

² Ali e nu mǐ sixú ɖó nǔnywɛ́ jɔ nǔnywɛ́ ɖe é ɖokpó wɛ nyí ɖɔ mǐ ní kplɔ́n nǔ dó nǔ ɖěɖěe súnnu e ɖó nǔnywɛ́ tawun, bɔ è nɔ ɖó sísí nú yě ɖó nǔnywɛ́ yětɔn wú lɛ́ é we ɖɔ lɛ́ é wú, bó lɛ́ zán nǔ énɛ́ lɛ́. Mǐ ná ɖɔ xó dó Salomɔ́ɔ wú jɛ nukɔn. Biblu ɖɔ: “Mawu ná nǔnywɛ́ kpó nukúnnúmɔjɛnǔmɛ kpó Salomɔ́ɔ titewungbe.” (1 Axɔ́. 5:9) Mɛ wegɔ́ e xó mǐ ná ɖɔ é wɛ nyí Jezu; è ko mɔ nǔnywɛ́tɔ́ éɖɔhun ɖě ɖo ayǐkúngban jí kpɔ́n ǎ. (Mat. 12:42) È ɖɔ ɖ’ayǐ dó Jezu wú ɖɔ: ‘Gbigbɔ Jehovah tɔn ná nɔ jǐ tɔn; gbigbɔ e nɔ ná nǔnywɛ́ mɛ, bó nɔ́ ná nukúnnúmɔjɛnǔmɛ mɛ é wɛ.’—Eza. 11:2.

3. Étɛ́ lɛ́ jí mǐ ka ná ɖɔ xó dó ɖo xóta élɔ́ mɛ?

³ Mawu ná nǔnywɛ́ Salomɔ́ɔ kpó Jezu kpó bɔ é túnflá; énɛ́ zɔ́n bɔ yě kpé wú bó ɖe wě ɖaaɖagbe lɛ́ xá mǐ dó nǔ e ɖo tají nú mǐ lɛ́ é wú. Ðo xóta élɔ́ mɛ ɔ, mǐ ná ɖɔ xó dó nǔ énɛ́ lɛ́ atɔn wú: linlin e ɖo jlɛ̌ jí é ɖíɖó dó akwɛ́, agbazazɔ́, kpó mǐɖésúnɔ kpó wú.

4. Nɛ̌ Salomɔ́ɔ ka gbɔn vo nú Jezu ɖo nǔ agbaza tɔn lɛ́ kpáxwé gbɔn?

⁴ Salomɔ́ɔ jɛ dɔkun tawun, bó lɛ́ nɔ xwé ɖɛkpɛ ɖɛkpɛ e gbe nǔɖé ma nɔ hwedó mɛ ɖe ǎ é gbe. (1 Axɔ́. 10:7, 14, 15) Ðo alɔ ɖěvo mɛ ɔ, Jezu ɖó nǔ káká ɖé ǎ; é tlɛ ɖó xwé éɖésúnɔ tɔn ɖé lɔ ǎ. (Mat. 8:20) É ɖo mɔ̌ có, súnnu we énɛ́ lɛ́ bǐ ɖó linlin e ɖo jlɛ̌ jí é dó nǔ agbaza tɔn lɛ́ wú, ɖó Jehovah Mawu wɛ nyí jɔtɛn nǔnywɛ́ yětɔn tɔn.

5. Linlin e ɖo jlɛ̌ jí é tɛ́ Salomɔ́ɔ ka ɖó dó akwɛ́ wú?

⁵ Salomɔ́ɔ ɖɔ ɖɔ akwɛ́ nɔ “nya xɛ ɖo mɛ jí.” (Nǔt. 7:12) Akwɛ́ sixú d’alɔ mǐ bɔ mǐ ná ɖó dandannú gbɛmɛ tɔn lɛ́ kpó nǔ e nɔ jló mǐ é ɖé lɛ́ kpó. Amɔ̌, Salomɔ́ɔ jɛ dɔkun tawun có, é ka ɖ’ayi wú ɖɔ nǔ ɖěvo lɛ́vɔ́ ɖo tají tawun hú akwɛ́. Ði kpɔ́ndéwú ɔ, é wlán ɖɔ: “È mlá nyǐkɔ ɖagbe mɛɖé ɔ, é nyɔ́ hú mɛ ɔ jɛ dɔkun gbɔn tókɔ awɔnkɔ.” (Nǔx. 22:1) Salomɔ́ɔ lɛ́ ɖ’ayi wú ɖɔ, é kún nɔ yá bónú nǔ e mɛ ɖěɖěe yí wǎn nú akwɛ́ lɛ́ é ɖó lɛ́ é nɔ d’awǎjijɛ nú yě ó. (Nǔt. 5:9, 11) Gɔ́ ná ɔ, é lɛ́ gb’akpá nú mǐ ɖɔ mǐ ní ma nɔ ɖeji bǐ mlɛ́mlɛ́ dó akwɛ́ wú ó, ɖó mǐ ná bó ɖó akwɛ́ gbɔn ɖěbǔ ɔ, mǐ sixú ba bǐ kpo ajijimɛ.—Nǔx. 23:4, 5.

6. Linlin e ɖo jlɛ̌ jí é tɛ́ Jezu ka ɖó dó nǔ agbaza tɔn lɛ́ wú? (Matíe 6:31-33)

⁶ Jezu ɖó linlin e ɖo jlɛ̌ jí é dó nǔ agbaza tɔn lɛ́ wú. É nɔ ɖu nǔ bó nɔ lɛ́ nu ahan. (Luk. 19:2, 6, 7) Ðo nǔwiwa ɖé hwenu ɔ, é bló vɛ̌ɛn ɖagbe hú gǎn ɖé; nǔjíwǔ tɔn nukɔntɔn ɔ nɛ́. (Jaan 2:10, 11) Gɔ́ ná ɔ, gbe e gbe é kú é ɔ, awu axivɛ́nú ɖé mɛ wɛ é ɖe. (Jaan 19:23, 24) Amɔ̌, Jezu jó nǔ agbaza tɔn lɛ́ dó bónú yě húzú nǔ tají hú gǎn ɔ ɖo gbɛzán tɔn mɛ ǎ. É ɖɔ nú ahwanvú tɔn lɛ́ ɖɔ: “Mɛɖé sixú sɛn gǎn we ǎ; . . . Mi sixú sɛn Mawu bó lɛ́ sɛn dɔkun ǎ.” (Mat. 6:24) Jezu kplɔ́n mɛ ɖɔ ényí mǐ ba Axɔ́súɖuto ɔ jɛ nukɔn ɔ, Jehovah ná ná nǔ e hudó mǐ lɛ́ é mǐ.—Xa Matíe 6:31-33.

7. Ðó nɔví súnnu ɖé ɖó linlin e ɖo jlɛ̌ jí é dó akwɛ́ wú wútu ɔ, ɖagbe tɛ́ é ka wa n’i?

 ⁷ Nɔví súnnu mǐtɔn lɛ́ kpó nɔví nyɔ̌nu mǐtɔn lɛ́ kpó gěgé ko ɖu wě e Jehovah ɖe xá mɛ dó akwɛ́ wú, bɔ nǔnywɛ́ kpé é sín le. Kpɔ́n kpɔ́ndéwú nɔví súnnu tlɛnnɔ e è nɔ ylɔ́ ɖɔ Daniel é tɔn. É ɖɔ: “Hwenu e un ɖo wǐnnyáwínnyá mɛ é ɔ, un wá gbeta ɔ kɔn bó ná sɔ́ Jehovah sinsɛn dó ɖó nǔ e ɖo tají hú gǎn é ɖo gbɛzán ce mɛ.” Ðó Daniel zán gbɛ e bɔkun é wútu ɔ, é kpé wú bó zán hwenu tɔn kpó nǔwúkpíkpé tɔn lɛ́ kpó ɖo azɔ̌ tutoblónúnǔ ɔ tɔn gěgé kɔn. É ɖɔ gɔ́ ná ɖɔ: “Un sixú ɖɔ kpó ayi ce bǐ kpó ɖɔ gbeta énɛ́ e kɔn un wá é kún vɛ́ nú mì kpɔ́n ó. Nǔgbó ɔ, ényí akwɛ́ wɛ nyí nǔ e ɖo tají hú gǎn ɖo gbɛzán ce mɛ é ɔ, un ná ko jɛ dɔkun. Amɔ̌, akwɛ́ sixú nɔ xɔ́ntɔn ɖaaɖagbe e un zun din lɛ́ é tɛnmɛ ǎ. Mɔ̌ jɛ́n é ma ka sixú lɛ́ bló bónú un ɖ’awǎjijɛ e un ɖó din, ɖó un sɔ́ Axɔ́súɖuto ɔ ɖó tɛn nukɔntɔn ɔ mɛ wútu é ǎ é nɛ́. Jehovah ná mì awǎjijɛ tawun hú gǎn awǎjijɛ e akwɛ́ sixú hɛn wá nú mì é.” É ɖo wɛn ɖɔ ényí mǐ sɔ́ ayi ɖó nǔ gbigbɔ tɔn lɛ́ jí, bɔ é ma nyí ɖó akwɛ́ jí ǎ ɔ, mǐ nɔ ɖu le tɔn.

8. Nɛ̌ mǐ ka wa gbɔn bó tuun ɖɔ Salomɔ́ɔ ɖó linlin e ɖo jlɛ̌ jí é dó azɔ̌ wú? (Nǔnywɛ́tɔ́xó 5:18, 19)

⁸ Salomɔ́ɔ ylɔ́ awǎjijɛ e sixú tɔ́n sín azɔ̌syɛ́nsyɛ́nwiwa mɛ é ɖɔ ‘nǔníná Mawu tɔn.’ (Xa Nǔnywɛ́tɔ́xó 5:17, 18.) É wlán ɖɔ: “Azɔ̌ syɛ́nsyɛ́n alɔkpa lɛ́ bǐ wɛ ɖó le.” (Nǔx. 14:23, nwt) Salomɔ́ɔ tuun ɖɔ xó énɛ́ nyí nǔgbó. Azɔ̌syɛ́nsyɛ́nwatɔ́ wɛ n’i! É sá xwé, tun vǐwun, bló jikpá, bó lɛ́ kun tɔ gěgé. É lɛ́ gbá toxo ɖaxó gěgé. (1 Axɔ́. 9:19; Nǔt. 2:4-6) Azɔ̌ syɛ́nsyɛ́n wɛ nyí énɛ́ lɛ́ bɔ é wa, b’ɛ ɖo wɛn ɖɔ yě gɔ́ so nú awǎjijɛ tɔn. Amɔ̌, Salomɔ́ɔ tuun ɖɔ bónú émí ná ɖó awǎjijɛ jɔ awǎjijɛ ɔ, émí ɖó ná wa nǔ hú mɔ̌. Énɛ́ wú ɔ, é lɛ́ wa nǔ gěgé nú Jehovah. Ði kpɔ́ndéwú ɔ, é kpé nukún dó tɛ́npli susunɔ e mɛ è ná sɛn Jehovah ɖe é gbígbá wú; xwe tɛ́nwe wɛ azɔ̌ ɔ ɖu! (1 Axɔ́. 6:38; 9:1) Hwenu e Salomɔ́ɔ ko wa nǔ vovo énɛ́ lɛ́ bǐ gúdo é ɔ, é wá mɔ ɖɔ nǔ tají hú gǎn e gbɛtɔ́ sixú wa é wɛ nyí ɖɔ é ní sɛn Jehovah. É wlán ɖɔ: “Xó e ka sú ta nú xó énɛ́ lɛ́ bǐ é ɖíe: Ðǒ sísí nú Mawu bó bló nǔ e é zɔ́n lɛ́.”—Nǔt. 12:13.

9. Nɛ̌ Jezu ka sɔ́ agbazazɔ́ tɔn ɖó tɛn e jɛxá é mɛ gbɔn?

⁹ Azɔ̌syɛ́nsyɛ́nwatɔ́ wɛ Jezu nyí. Hwenu e é ɖo wǐnnyáwínnyá mɛ é ɔ, é wa xwlɛkpikpazɔ́. (Mak. 6:3) É ɖo wɛn ɖɔ alɔ e é nɔ dó mɛjitɔ́ tɔn e nɔ w’azɔ̌ syɛ́nsyɛ́n dó kpé nukún dó xwédo ɖaxó e mɛ yě ɖe é wú é nɔ su nukún yětɔn mɛ tawun. Jezu nyí mɛ maɖóblɔ̌ bɔ azɔ̌ e é nɔ wa lɛ́ é nɔ mɛ́ bɔ xó bǐ nɔ vɔ ɖ’é wú; énɛ́ wú ɔ, mɛ gěgé ná ɖibla nɔ ba ná xɔ nǔ e é nɔ bló lɛ́ é. Jezu ná ko mɔ awǎjijɛ tawun ɖo azɔ̌ e é wa é mɛ. Nǔgbó wɛ ɖɔ Jezu nɔ w’azɔ̌ syɛ́nsyɛ́n có, é nɔ mɔ nǔ jɛ wú ɖɔ émí ɖó hwenu e émí ná nɔ zán dó sɛn Jehovah ná é. (Jaan 7:15) Nukɔnmɛ e é jɛ Mawuxó ɖɔ jí hwebǐnu é ɔ, é ɖɔ nú tóɖóetɔ́ lɛ́ ɖɔ: “Mi ma nɔ jɛ tagba dó nǔɖuɖu e nɔ gblé ɔ tamɛ ó; loɔ, mi ní nɔ jɛ tagba dó nǔɖuɖu e nɔ nɔ ayǐ sɔ́yi gbɛ mavɔmavɔ é tamɛ.” (Jaan 6:27) Gɔ́ ná ɔ, ɖo Mawuxóɖiɖɔ só jí tɔn Jezu tɔn hwenu ɔ, é ɖɔ: “Mi kplé dɔkun mitɔn lɛ́ ɖó [jǐxwé].”—Mat. 6:20.

10. Wǔvɛ́ tɛ́ mɛɖé lɛ́ ka sixú mɔ ɖo agbazazɔ́ yětɔn mɛ?

¹⁰ Nǔnywɛ́ e gosín Mawu gɔ́n é nɔ d’alɔ mǐ bɔ mǐ nɔ ɖó linlin e ɖo jlɛ̌ jí é dó agbazazɔ́ mǐtɔn wú. Ðó mǐ nyí Klisánwun wútu ɔ, è kplɔ́n mǐ ɖɔ mǐ ní nɔ ‘w’azɔ̌ syɛ́nsyɛ́n.’ (Efɛ́. 4:28) Hwɛhwɛ ɔ, mɛ e yí  mǐ d’azɔ̌ mɛ lɛ́ é nɔ ɖ’ayi nǔgbó e mǐ nɔ ɖɔ é kpó azɔ̌ syɛ́nsyɛ́n e mǐ nɔ wa é kpó wú, bó sixú nɔ ɖɔ nú mǐ ɖɔ lěe mǐ nɔ w’azɔ̌ gbɔn é nɔ su nukún émítɔn mɛ tawun. Énɛ́ sixú sísɛ́ mǐ bɔ mǐ nɔ w’azɔ̌ nú ganxixo gěgé ɖó mǐ ba ɖɔ mɛ e yí mǐ d’azɔ̌ mɛ é ní nɔ ɖɔ xó ɖagbe dó Kúnnuɖetɔ́ Jehovah tɔn lɛ́ wú. Amɔ̌, tlóló jɛ́n mǐ sixú jɛ ayi ɖ’é wú jí ɖɔ mǐ jɛ vɛ̌ dó nú azɔ̌ e mǐ nɔ wa ɖo xwédo mɛ lɛ́ é kpó azɔ̌ e mǐ nɔ wa ɖo agun mɛ lɛ́ é kpó jí. Mǐ ɖó ná bló hǔzúhúzú e ɖo dandan lɛ́ é bó ná mɔ tɛn nú nǔ e ɖo tají hú gǎn lɛ́ é.

11. Étɛ́ nɔví súnnu ɖé ka kplɔ́n dó linlin e ɖo jlɛ̌ jí é ɖíɖó dó azɔ̌ wú wú?

¹¹ Nɔví súnnu wínnyáwínnyá ɖé nɔ nyí William, bó mɔ ɖɔ é ɖo tají ɖɔ è ní ɖó linlin e sɔgbe é dó azɔ̌ wú. É ɖɔ dó nɔví súnnu mɛxó agun tɔn e yí i d’azɔ̌ mɛ ɖ’ayǐ é wú ɖɔ: “Kpɔ́ndéwú ɖaxó mɛ e nɔ ɖó linlin e ɖo jlɛ̌ jí é dó azɔ̌ wú é tɔn wɛ [nɔví súnnu énɛ́] nyí. É nɔ w’azɔ̌ syɛ́nsyɛ́n, bó ɖó kancícá ɖagbe xá axisinɔ tɔn lɛ́, ɖó é nɔ w’azɔ̌ tɔn ganjí. Amɔ̌, ényí é su gbadanu ɔ, é nɔ jó azɔ̌ tɔn dó, bó nɔ zán hwenu tɔn kpó hlɔ̌nhlɔ́n tɔn kpó nú xwédo tɔn kpó Jehovah kpó. Un ma ná blɛ́ mi ǎ ɔ, mɛ e ɖ’awǎjijɛ hú gǎn, bɔ un tuun lɛ́ é ɖokpó nɛ́!” *

12. Nɛ̌ Salomɔ́ɔ ka xlɛ́ ɖɔ émí ɖó linlin e ɖo jlɛ̌ jí é dó émíɖée wú gbɔn? Nɛ̌ é ma ka sɔ́ wá wa mɔ̌ ǎ gbɔn?

¹² Hwenu e Salomɔ́ɔ kpo ɖo Jehovah sɛn wɛ kpó gbejíninɔ kpó é ɔ, é nɔ ɖó linlin e ɖo jlɛ̌ jí é dó éɖée wú. Hwenu e é ɖo wǐnnyáwínnyá mɛ é ɔ, é yí gbe kpó mɛɖéesɔ́hwe kpó ɖɔ émí hwe dó nǔ wú, lobo ba alixlɛ́mɛ Jehovah tɔn. (1 Axɔ́. 3:7-9) Salomɔ́ɔ jɛ acɛ kpa jí bɔ é ná nɔ zaan é ɔ, é lɛ́ ɖ’ayi wú ɖɔ goyíyí ɔ awǒvinú wɛ. É wlán ɖɔ: “Mɛɖé ja cu kpé gbé ɔ, goyíyí wɛ é nɔ bɛ́. Mɛ e nɔ mɔ éɖée ɔ nɔ sɔ́ éɖée nyi gbě.” (Nǔx. 16:18)  Nukɔnmɛ ɔ, é blá wǔ ɖɔ Salomɔ́ɔ kún kpé wú bó zán wě e éɖésúnɔ ɖe xa mɛ é ó. É wá su hweɖénu bɔ é jɛ éɖée mɛ mɔ jí, bó sɔ́ nɔ xwedó alixlɛ́mɛ Mawu tɔn lɛ́ ǎ. Ði kpɔ́ndéwú ɔ, sɛ́n e Mawu dó lɛ́ é ɖokpó ɖɔ ɖɔ axɔ́sú Eblée ɖé kún ɖó ná “ɖó asi gěgé ó; é táá jó Mawu dó.” (Sɛ́n. 17:17) Salomɔ́ɔ xwedó sɛ́n énɛ́ ǎ, bó da asi 700, lobo lɛ́ ɖó xɔnnɔ 300; vodun wɛ nyɔ̌nu énɛ́ lɛ́ gěgé ka nɔ sɛn! (1 Axɔ́. 11:1-3) Vlafo Salomɔ́ɔ sixú ko lin ɖɔ yě kún ná dɔn émí dó ali nyanya jí ó. Amɔ̌, Salomɔ́ɔ wá sún sin tónú e é ma se nú Jehovah ǎ é tɔn.—1 Axɔ́. 11:9-13.

13. Étɛ́ tamɛ linlin dó kpɔ́ndéwú mɛɖéesɔ́hwe tɔn e Jezu sɔ́ ɖ’ayǐ é jí ka sixú kplɔ́n mǐ?

¹³ Jezu nɔ ɖó linlin e ɖo jlɛ́ jí é dó éɖée wú, bó nɔ lɛ́ sɔ́ éɖée hwe hwebǐnu. Cóbónú é ná wá ayǐkúngban jí ɔ, é ko wa nǔ ɖagbe gěgé nú Jehovah. Jezu jí wɛ “Mawu bló nǔ e ɖo jǐnukúnsin lɛ́ kpódó éé ɖo ayǐkúngban jí lɛ́ bǐ kpán gbɔn.” (Koló. 1:16) Ðo batɛ́mu Jezu tɔn hwenu ɔ, é cí ɖɔ é flín nǔ ɖěɖěe é ko wa hwenu e é ɖo kpɔ́ xá Tɔ́ tɔn lɛ́ é bǐ. (Mat. 3:16; Jaan 17:5) Amɔ̌, nǔ énɛ́ lɛ́ e Jezu flín é zɔ́n bónú é húzú goyítɔ́ ǎ. É nyɔ́ wa ɔ, é nɔ wa nǔ ɖo ali ɖé nu gbéɖé b’ɛ nɔ xlɛ́ ɖɔ é nɔ lin ɖɔ émí kpɔ́n te hú mɛ ɖěvo lɛ́ ǎ. É ɖɔ xó élɔ́ nú ahwanvú tɔn lɛ́: “È ná sɛn mì wú wɛ un wá ǎ; loɔ, mɛ sɛn gbé wɛ un tɔ́n bó wá, bó ná sɔ́ gbɛ ce jó dó xɔ gbɛ nú mɛ gěgé.” (Mat. 20:28) É lɛ́ ɖɔ kpó mɛɖéesɔ́hwe kpó ɖɔ émí kún sixú nɔ émíɖóɖó bó wa nǔ ɖokpó vɔ́vɔ́ ó. (Jaan 5:19) É nɔ sɔ́ éɖée hwe tawun! Jezu sɔ́ kpɔ́ndéwú ɖagbe hú gǎn ɔ ɖ’ayǐ bɔ mǐ ná xwedó.

14. Étɛ́ kpɔ́ndéwú Jezu tɔn ka sixú kplɔ́n mǐ dó linlin e sɔgbe é ɖíɖó dó mǐɖée wú wú?

¹⁴ Jezu kplɔ́n tóɖóetɔ́ lɛ́ ɖɔ yě ní nɔ ɖó linlin e ɖo jlɛ̌ jí é dó yěɖée wú. Ðo ninɔmɛ ɖé mɛ ɔ, Jezu ná gǎnjɛwú yě, bó ɖɔ: “Ða e ɖo ta nú mi ɔ ɖésú ɔ, Mawu tuun nabí e é nyí é.” (Mat. 10:30) Xó énɛ́ lɛ́ e Jezu ɖɔ é dó gbɔ nú mǐ tawun, tají ɔ, ényí mǐ nɔ mɔ ɖɔ mǐ nɔ ɖó linlin e ma sɔgbe ǎ lɛ́ é dó mǐɖée wú ɔ nɛ́. Énɛ́ ɖo xlɛ́xlɛ́ wɛ ɖɔ nǔ mǐtɔn nɔ ɖu ayi mɛ nú Tɔ́ mǐtɔn jǐxwé  tɔn ɔ tawun; mǐ xɔ akwɛ́ ɖo nukún tɔn mɛ. Ényí Jehovah yí gbe ɖɔ mǐ ní sɛn émí, bó lɛ́ wá gbeta ɔ kɔn ɖɔ mǐ jɛxá bá nɔ gbɛ káká sɔ́yi ɖo gbɛ yɔ̌yɔ́ ɔ mɛ ɔ, mǐ ɖó ná xo nǔ kpɔ́n gbeɖé dó gbeta énɛ́ e kɔn é wá é wú ǎ.

15. (a) Linlin e ɖo jlɛ̌ jí é tɛ́ Atɔxwɛ ka dó wǔsyɛ́n lanmɛ nú mǐ ɖɔ mǐ ní nɔ ɖó? (b) Lěe ɖiɖe e ɖo wěxwɛ 24gɔ́ ɔ jí é xlɛ́ gbɔn é ɔ, ényí mǐ nɔ zé ayi ɖó mǐɖée jí dín ɔ, nyɔ̌ná tɛ́ lɛ́ ka ná gbɔ mǐ wú?

¹⁵ Xwe 15 mɔ̌ ɖíe ɔ, Atɔxwɛ ɖɔ ɖɔ mǐ ɖó ná ɖó linlin e sɔgbe é dó mǐɖée wú; é ɖɔ: “Mǐ ɖó ná nɔ mɔ mǐɖée zɛ nǔ e mǐ nyí é wú káká bó ná wá húzú goyítɔ́ ǎ. Mɔ̌ jɛ́n mǐ ma ka ɖó ná lin ɖɔ mǐ kún hwɛ́n nǔɖé ó káká bó ná lɛ́ wá flú bǐ ǎ é nɛ́. Hǔn, mǐ ɖó ná tɛ́n kpɔ́n bó ɖó linlin e sɔgbe é dó mǐɖée wú, énɛ́ wɛ nyí ɖɔ, mǐ ná tuun nǔwúkpíkpé mǐtɔn lɛ́ kpó fí e mǐ vɔ́ da ɖe lɛ́ é kpó. Lěe nɔví nyɔ̌nu ɖokpó wa mɔ̌ gbɔn é ɖíe; é ɖɔ: ‘Un nylá dín ǎ, un ka lɛ́ kpɔ́n te dín ǎ. Un kpé nǔɖé lɛ́ wú, bó ka lɛ́ vɔ́ da ɖo fí ɖé lɛ́ mɛ bǐ ɖɔhun.’” * Mǐ mɔ gaan din ɖɔ é ɖo tají ɖɔ mǐ ní ɖó linlin e ɖo jlɛ̌ jí é dó mǐɖésúnɔ wú.

16. Étɛ́wú Jehovah ka nɔ ná alixlɛ́mɛ e nǔnywɛ́ kpé lɛ́ é mǐ?

¹⁶ Jehovah nɔ gbɔn Xó tɔn gblamɛ, bó nɔ ná mǐ alixlɛ́mɛ e nǔnywɛ́ kpé lɛ́ é. É yí wǎn nú mǐ, bó lɛ́ ba ɖɔ mǐ ní ɖó awǎjijɛ. (Eza. 48:17, 18) Gbeta ɖagbe hú gǎn e kɔn mǐ sixú wá, bɔ é wɛ lɛ́ nyí gbeta ɖokpó e ná zɔ́n bɔ mǐ ná ɖó awǎjijɛ nǔgbó ɔ é wɛ nyí ɖɔ mǐ ní kpo ɖo nǔ ɖěɖěe ná dó xomɛhunhun nú Jehovah lɛ́ é wa wɛ. Ényí mǐ wa mɔ̌ ɔ, mǐ ná nyi alɔ nú tagba e mɛ ɖěɖěe nɔ zé ayi ɖó akwɛ́, agbazazɔ́ alǒ yěɖésúnɔ jí zɛ xwé wú lɛ́ é nɔ mɔ lɛ́ é gěgé. Mi nú mǐ mɛ ɖokpó ɖokpó ní kán ɖ’é jí, bá nyí nǔnywɛ́tɔ́, bá hɛn xomɛ Jehovah tɔn hun!—Nǔx. 23:15.