1. Wuvɛ̌ alɔkpa tɛ lɛ ka sixu kpannukɔn togun Jehovah tɔn?

WUVƐ̌ syɛnsyɛn ɖé mɛ gbɔn dín wɛ a ɖè à? Bɔya, mɛ e ɖò agun towe mɛ é ɖé wà nǔ nyi dò dó we. (Ja. 3:2) Alǒ azɔ̌gbɛ́, kabǐ wemaxɔmɛvígbɛ́ lɛ nɔ cá we ko ɖó Jehovah e sɛn wɛ a ɖè é wu. (1 Pi. 4:3, 4) Alǒ mɛ e ɖò xwédo towe mɛ lɛ é sixu ɖò tintɛnkpɔn wɛ bo na sú ali dó we bonu a ni ma yì kplé lɛ ó, alǒ ma ɖekúnnu ó. (Mat. 10:35, 36) Enyi wuvɛ̌ e mɔ wɛ a ɖè é syɛn ɔ, a sixu lin ɖɔ é na nyɔ́ hugǎn ɖɔ emi ni jó Jehovah sinsɛn dó. Amɔ̌, enyi wuvɛ̌ e mɔ wɛ a ɖè é na bo tlɛ syɛn ɔ, a sixu kúdeji ɖɔ Jehovah na na we nǔnywɛ e na d’alɔ we bɔ a na ɖí xwi xá é kpo hlɔnhlɔn e na zɔ́n bɔ a na dɛ é kpo.

2. Sɔgbe xá Hlɔmanu lɛ 15:4 ɔ, ɖagbe tɛ Xó Mawu tɔn xixa ka sixu wà nú mǐ?

² Jehovah tinmɛ lee gbɛtɔ́ hwɛhutɔ́ lɛ ɖí xwi xá wuvɛ̌ syɛnsyɛn lɛ gbɔn é hlɛ́nhlɛ́n ɖò Xó tɔn mɛ. Etɛwu? Bonu ye ni kplɔ́n nǔ mǐ. Enɛ wɛ zɔ́n bɔ Jehovah sísɛ́ mɛsɛ́dó Pɔlu bɔ é wlán xó e ɖò Hlɔmanu lɛ 15:4 mɛ lɛ é. (Xà.) Enyi mǐ xà tan enɛ lɛ ɔ, ye sixu dó gbɔ nú mǐ, bo lɛ́ na mǐ nukúnɖiɖó ɖó bǎ ɖé mɛ. Amɔ̌, enyi mǐ jló na ɖu tan enɛ lɛ sín lè ɔ, mǐ ɖó na wà nǔ hú Biblu xixa kpowun. Mǐ ɖó na na tɛn Xó Mawu tɔn, b’ɛ na huzu linlin mǐtɔn kpo lee nǔ nɔ cí nú mǐ é kpo. Enyi mǐ ɖò alixlɛ́mɛ ba wɛ dó lee mǐ na ɖí xwi xá wuvɛ̌ ɖé gbɔn é wu wɛ ɔ, etɛ mǐ ka sixu wà? Mǐ sixu wà nǔ ɛnɛ elɔ lɛ: (1) Ðɛxixo, (2) Nukún didó nǔ lɛ mɛ kpɔ́n, (3) Tamɛ linlin, kpo (4) Nǔ e è kplɔ́n lɛ é zinzan kpo. Mi nú mǐ ni ɖɔ xó dó nǔ e nǔ enɛ lɛ ɖokpo ɖokpo wiwa nɔ byɔ é jí. * Enɛ gudo ɔ, mǐ na zán wlɛnwín nǔkplɔnkplɔn tɔn enɛ bo na  kplɔ́n nǔ dó nǔ ɖěɖee jɛ ɖò gbɛzán Axɔ́su Davidi kpo mɛsɛ́dó Pɔlu kpo tɔn mɛ lɛ é wu.

3. Cobonu a na jɛ Biblu xà jí ɔ, etɛ a ka ɖó na wà? Aniwu?

³ (1) Ðɛxixo. Cobonu a na jɛ Biblu xà jí hǔn, xoɖɛ sɛ́dó Jehovah ɖɔ é ni d’alɔ we bonu a na mɔ lee nǔ e xà wɛ a ɖè é sixu hɛn lè wá nú we gbɔn é. Ði kpɔ́ndéwú ɔ, enyi a ɖò wěɖexámɛ ba wɛ dó lee a na ɖí xwi xá tagba ɖé gbɔn é wu hǔn, byɔ̌ Jehovah ɖɔ é ni d’alɔ we bonu a na mɔ nǔgbododó ɖěɖee ɖò Xó tɔn mɛ, bo sixu d’alɔ we lɛ é.—Fili. 4:6, 7; Ja. 1:5.

4. Etɛ ka sixu d’alɔ we bɔ a na bló bɔ tan Biblu tɔn ɖé na ɖò gbɛ̀?

⁴ (2) Nukún didó nǔ lɛ mɛ kpɔ́n. Jehovah na mǐ nǔwukpíkpé jiwǔ ɖé, b’ɛ nɔ zɔ́n bɔ mǐ nɔ dó nukún nǔ lɛ mɛ kpɔ́n. Enyi a dó nukún nǔ lɛ mɛ kpɔ́n, bo sɔ́ hwiɖée dó mɛ e xó tan ɔ ɖɔ lɛ é sín tɛnmɛ ɔ, é na zɔ́n bɔ tan Biblu tɔn ɔ na ɖò gbɛ̀. Tɛ́n kpɔ́n bo mɔ nǔ e mɛ e xó tan ɔ ɖɔ lɛ é mɔ é, bonu lee nǔ sixu ko cí nú ye é ni cí mɔ̌ nú hwi lɔ.

5. Etɛ ka nyí tamɛ linlin? Nɛ̌ a ka sixu wà mɔ̌ gbɔn?

⁵ (3) Tamɛ linlin. Tamɛ linlin sín tinmɛ wɛ nyí ɖɔ è ni lin tamɛ dó nǔ e xà wɛ è ɖè é kpo lee é kan mɛ gbɔn é kpo jí kpo sɔxwixwe kpo. É na d’alɔ we bɔ a na cá nǔ e jí a lin tamɛ dó lɛ é ɖó kpɔ́, bo mɔ nukúnnú jɛ nǔ e kplɔ́n wɛ a ɖè é mɛ hugǎn. Enyi è ɖó ajɔxanú tɛnmɛ tɛnmɛ bo ma ka cáká ye ɖó kpɔ́ ǎ ɔ, è sixu ɖa nǔɖuɖu víví ɖé ǎ. Mɔ̌ ɖokpo ɔ wɛ é nɔ nyí gbɔn nú Biblu xixa bo ma lin tamɛ d’eji. Bo na dó d’alɔ we bɔ a na nɔ lin tamɛ kpɔ́n ɔ, a sixu kan nǔ elɔ lɛ byɔ hwiɖée bo na xósin nú ye: ‘Etɛ lɛ mɛ taji e xó tan ɔ ɖɔ é ka wà dó ɖeɖɛ tagba tɔn lɛ? Nɛ̌ Jehovah ka d’alɔ ɛ gbɔn? Nɛ̌ un ka sixu zán nǔ e un kplɔ́n é dó dɛ ɖò tagba ce lɛ nu gbɔn?’

6. Etɛwu mǐ ka ɖó na nɔ zán nǔ e mǐ nɔ kplɔ́n lɛ é?

⁶ (4) Nǔ e è kplɔ́n lɛ é zinzan. Jezu ɖɔ ɖɔ enyi mǐ ma nɔ wà nǔ sɔgbe xá nǔ e mǐ kplɔ́n lɛ é ǎ ɔ, mǐ cí nya e gbá xɔ tɔn sɔ́ nyi kɔ́gudu mɛ é ɖɔhun. É w’azɔ̌ syɛnsyɛn, é ka hɛn lè ɖé wá n’i ǎ. Etɛwu? Ðó hwenu e jɔhɔn nyi, bɔ jǐ ja bɔ tɔ̀ ɖi sin é ɔ, xwé tɔn gbà hánnyá. (Mat. 7:24-27) Ðò ali ɖokpo ɔ nu ɔ, enyi mǐ nɔ xoɖɛ, dó nukún nǔ lɛ mɛ kpɔ́n, bo nɔ lɛ́ lin tamɛ kpɔ́n, lobo ma ka nɔ zán nǔ e mǐ kplɔ́n lɛ é ǎ ɔ, tagba vɔ̌tɔ́ wɛ é na nyí. Enyi nǔɖiɖi mǐtɔn gbɔn mɛtɛnkpɔn lɛ, alǒ yadonúmɛ nu ɔ, é na vɔ́da. Ðò alɔ ɖevo mɛ ɔ, enyi mǐ kplɔ́n nǔ, bo zán nǔ e mǐ kplɔ́n lɛ é ɔ, mǐ na wá gbeta ɖagbe lɛ kɔn, mǐ na ɖó fífá hugǎn, bɔ nǔɖiɖi mǐtɔn na lidǒ. (Eza. 48:17, 18) Mǐ na zán nǔ ɛnɛ enɛ lɛ e xó mǐ ko ɖɔ wá yì é bo na kpɔ́n lee nǔ e jɛ ɖò gbɛzán Axɔ́su Davidi tɔn mɛ é sixu kplɔ́n nǔ mǐ gbɔn é.

7. Tan Biblu tɔn tɛ mǐ ka na gbéjé kpɔ́n dìn?

⁷ Xɔ́ntɔn towe ɖé, alǒ mɛ e ɖò xwédo towe mɛ é ɖé wà nǔ nyi dò dó we wɛ à? Enyi mɔ̌ wɛ hǔn, nǔ e sixu d’alɔ we é wɛ nyí ɖɔ a na kplɔ́n nǔ e Axɔ́su Davidi wà hwenu e vǐ sunnu tɔn Abusalɔmu wà nǔ nyi dò d’è, bo lɛ́ tɛ́n kpɔ́n bo na huzu axɔ́su é.—2 Sam. 15:5-14, 31; 18:6-14.

8. Etɛ lɛ a ka sixu wà bɔ Jehovah na d’alɔ we?

⁸ (1) Ðɛxixo. Tan ɔ ni nɔ ayi mɛ nú we bonu a ni xoɖɛ sɛ́dó Jehovah, bo ɖɔ lee nǔ cí nú we dó nǔ agɔ e è wà xá we é wu é n’i. (Dɛh. 6:7-10) Ðɔ lee nǔ cí nú we pɛ́ɛ é n’i. Enɛ gudo hǔn, byɔ̌ Jehovah ɖɔ é ni d’alɔ we bonu a na tuùn nǔgbododó Biblu tɔn ɖěɖee sixu xlɛ́ ali we hwenu e a na ɖò tintɛnkpɔn wɛ bo na ɖí xwi xá ninɔmɛ vɛwǔ enɛ é.

9. Nɛ̌ mǐ ka sixu sɛ̀ sin xwè nú nǔ e jɛ ɖò Davidi kpo Abusalɔmu kpo tɛntin é gbɔn?

 ⁹ (2) Nukún didó nǔ lɛ mɛ kpɔ́n. Lin tamɛ dó nǔ e jɛ ɖò tan enɛ ɔ mɛ lɛ é jí, bo dó nukún lee enɛ wà nǔ dó Axɔ́su Davidi wu gbɔn é mɛ kpɔ́n. Vǐ sunnu Davidi tɔn Abusalɔmu ba wlɛnwín vovo lɛ nú xwè mɔ̌kpan bonu togun ɔ na dó yí wǎn n’i. (2 Sam. 15:7) Ee Abusalɔmu mɔ ɖɔ hwe ɔ nu sù é ɔ, é sɛ́ amɛ̌ lɛ dó Izlayɛli tò ɔ bǐ mɛ nú ye na bló bɔ mɛ lɛ na yí gbè bo sɔ́ ɛ dó ɖó axɔ́su yetɔn. É tlɛ lɛ́ bló bɔ Axitofɛli e nyí xɔ́ntɔn kpo wěɖexámɛtɔ́ vívɛ́ ɖé kpo nú Davidi é xò kpóɖó n’i ɖò gǔfínfɔ́n tɔn mɛ. Abusalɔmu sɔ́ éɖée dó ɖó axɔ́su, enɛ gudo ɔ, é tɛ́n kpɔ́n bá wlí Davidi e sixu ko ɖò azɔn syɛnsyɛn jɛ wɛ hwenɛnu é bá hu i. (Ðɛh. 41:2-10) Davidi wá sè gbě e blá wɛ Abusalɔmu ɖè é, bo hɔn sín Jeluzalɛmu. Nukɔnmɛ ɔ, ahwankpá Abusalɔmu tɔn fun ahwan xá ahwankpá Davidi tɔn. Ahwankpá gǔfɔntɔ́ ɔ cí ahwan, bɔ Davidi sín vǐ sunnu Abusalɔmu kú.

10. Nɛ̌ Axɔ́su Davidi ka sixu ko wà nǔ gbɔn?

¹⁰ Enɛ gudo ɔ, dǒ nukún lee nǔ na ko cí nú Davidi hwenu e nǔ enɛ lɛ bǐ ɖò jijɛ dó wǔ tɔn wɛ é mɛ kpɔ́n. É yí wǎn nú Abusalɔmu, bo ɖeji dó Axitofɛli wu. É ɖò mɔ̌ có, xɔ́ntɔn vívɛ́ tɔn we enɛ lɛ bǐ flú i. Ye bló bɔ wǔ kú i tawun, bo tlɛ lɛ́ tɛ́n kpɔ́n bá hu i. Davidi sixu ko jɛ nǔ vɛ́ dó xɔ́ntɔn tɔn ɖevo lɛ jí, ɖɔ ye lɔ ko xò kpóɖó nú Abusalɔmu. É sixu ko lin éɖokponɔ tɔn kpɔ́n, bo tɛ́n kpɔ́n bá hɔn sín tò ɔ mɛ. Alǒ, é sixu ko jó éɖée dó bɔ awakanmɛ na kú i bǐ. Amɔ̌, Davidi wà nǔ enɛ lɛ ɖebǔ ǎ. É nyɔ́ wà ɔ, é ɖu ɖò mɛtɛnkpɔn syɛnsyɛn enɛ jí. Etɛwu é ka kpéwú bo wà mɔ̌?

11. Etɛ Davidi ka wà ɖò ninɔmɛ syɛnsyɛn enɛ mɛ?

¹¹ (3) Tamɛ linlin. Nǔgbododó tɛ lɛ a ka mɔ ɖò tan enɛ mɛ? Nǎ xósin nú nǔkanbyɔ elɔ: “Etɛ Davidi ka wà dó nya xɛ ɖò éɖée jí?” Ado hu Davidi bɔ é wá gbeta e nǔnywɛ hwedó lɛ é kɔn ǎ. É ɖó nǎ nǎ nú nǔ e é na wà lɛ é ǎ. Mɔ̌ jɛn xɛsi ma ka lɛ́ ɖi i zɛ xwé wu ǎ é nɛ. É nyɔ́ wà ɔ, é xoɖɛ sɛ́dó Jehovah, bo byɔ alɔdó. É lɛ́ byɔ xɔ́ntɔn tɔn lɛ ɖɔ ye ni d’alɔ emi. É lɛ́ yawǔ wà nǔ sɔgbe xá gbeta e kɔn é wá lɛ é. Nǔ e è wà nú Davidi é vɛ́ n’i có, é ka blawǔ, alǒ sin xomɛ ǎ. É kpò ɖò jiɖe ɖó dó Jehovah kpo xɔ́ntɔn tɔn lɛ kpo wu wɛ.

12. Etɛ Jehovah ka wà dó d’alɔ Davidi?

¹² Nɛ̌ Jehovah ka d’alɔ Davidi gbɔn? Enyi a ba dò nú nǔ kpɛɖé ɔ, a na mɔ ɖɔ Jehovah na hlɔnhlɔn e sín hudo Davidi ɖó é è, bɔ é dɛ ɖò wuvɛ̌ lɛ nu. (Ðɛh. 3:1-9) Jehovah kɔn nyɔna dó gbeta e kɔn Davidi wá lɛ é jí. É lɛ́ nɔ gudo nú xɔ́ntɔn gbejinɔtɔ́ Davidi tɔn lɛ hwenu e ye ɖò ahwan fun wɛ, bo na nya xɛ axɔ́su yetɔn jí é.

13. Enyi mɛɖé hu hwɛ syɛnsyɛn ɖé dó we ɔ, nɛ̌ a ka sixu wà nǔ Davidi ɖɔhun gbɔn? (Matie 18:15-17)

¹³ (4) Nǔ e è kplɔ́n lɛ é zinzan. Kanbyɔ hwiɖée ɖɔ: ‘Nɛ̌ un ka sixu wà nǔ Davidi ɖɔhun gbɔn?’ É na byɔ ɖɔ a ni yawǔ wà nǔɖe bo na dó ɖeɖɛ tagba ɔ. Enyi ninɔmɛ lɛ byɔ ɖó mɔ̌ ɔ, a sixu zán wěɖexámɛ Jezu tɔn e ɖò Matie wemata 18 mɛ é tlɔlɔ, alǒ nǔgbododó e ɖ’emɛ é. (Xà Matie 18:15-17.) Amɔ̌, a ɖó na wá gbeta lɛ kɔn kplakpla hwenu e a ɖò xomɛsin jí é ǎ. A ɖó na byɔ Jehovah ɖò ɖɛ mɛ ɖɔ é ni bló bonu ayi towe ni fá, bo lɛ́ na we nǔnywɛ e sín hudo a ɖó bo na dó ɖí xwi xá tagba ɔ é. Ma gɔn jiɖe ɖó dó nɔví towe lɛ wu ó. É nyɔ́ wà hǔn, sɔ́ jlǒ dó yí gbè nú alɔdó yetɔn. (Nǔx. 17:17) Taji bǐ ɔ, xwedó wě e Jehovah ɖè xá we ɖò Xó tɔn mɛ lɛ é.—Nǔx. 3:5, 6.

14. Ninɔmɛ tɛ lɛ ka sixu zɔ́n, bɔ a na lin tamɛ dó xó e ɖò 2 Timɔtée 1:12-16 kpo 4:6-11, 17-22 kpo mɛ lɛ é jí?

¹⁴ Mɛ e ɖò xwédo towe mɛ lɛ é ɖò gbè klán xá we wɛ bɔ a ɖò didɛ ɖ’enu wɛ wɛ à? Alǒ, tò e mɛ è ɖó dogbó syɛnsyɛn ɖé nú azɔ̌ togun Jehovah tɔn tɔn, alǒ gbɛ́ ɖé é mɛ wɛ a nɔ nɔ à? Enyi mɔ̌ hǔn, 2 Timɔtée 1:12-16 kpo 4:6-11, 17-22 kpo xixa sixu dó wusyɛn lanmɛ nú we. * Pɔlu wlán wema enɛ hwenu e é ɖò ganxó é.

15. Etɛ lɛ a ka sixu byɔ Jehovah?

¹⁵ (1) Ðɛxixo. Cobonu a na xà wemafɔ enɛ lɛ hǔn, ɖɔ tagba e mɔ wɛ a ɖè lɛ é kpo lee ye wà nǔ dó wutu towe gbɔn é kpo nú Jehovah. Ðɔ lee nǔ cí nú we é pɛ́ɛ n’i. Enɛ gudo hǔn, byɔ̌ Jehovah ɖɔ é ni d’alɔ we bonu a na mɔ nǔgbododó ɖěɖee ɖò tan e kúnkplá nǔ e xá Pɔlu é mɛ lɛ é, bonu ye na d’alɔ we bɔ a na tuùn nǔ e a na wà é.

16. Nɛ̌ a ka sixu sɛ̀ sin xwè nú ninɔmɛ Pɔlu tɔn gbɔn?

¹⁶ (2) Nukún didó nǔ lɛ mɛ kpɔ́n. Sɔ́ hwiɖée dó ninɔmɛ Pɔlu tɔn mɛ. È dó wlɔ ɛ bɔ é ɖò gankpá mɛ ɖò Hlɔma. É ko yì gankpá mɛ ɖě ɖ’ayǐ, amɔ̌, dìn tɔn ɔ, é tuùn ɖɔ kú mɛ wɛ é na tɔ́n kɔ dó. Xɔ́ntɔn tɔn ɖé lɛ jó è dó, bɔ agbɔ̌n kpé é.—2 Tim. 1:15.

17. Nɛ̌ Pɔlu ka sixu ko wà nǔ gbɔn?

¹⁷ Pɔlu sixu ko sɔ́ ayi dó nǔ e jɛ wá yì ɖò gbɛzán tɔn mɛ é jí, bo na ko lin ɖɔ enyi emi ko wá gbeta ɖevo lɛ kɔn wɛ nyí ɔ, è sixu ko gɔn emi wlí. Xomɛ sixu ko sin i dó sunnu ɖěɖee ɖò tokpɔn Azíi tɔn mɛ, bo jó è dó lɛ é wu; é sixu ko gɔn jiɖe ɖó dó xɔ́ntɔn tɔn ɖevo lɛ wu. Amɔ̌, Pɔlu wà nǔ enɛ lɛ ɖě ǎ. Etɛwu é ka kúdeji ɖɔ xɔ́ntɔn emitɔn lɛ na kpò ɖò gbeji nɔ nú emi wɛ, bɔ Jehovah na d’ajɔ emi?

18. Nɛ̌ Pɔlu ka wà nǔ gbɔn hwenu e mɛtɛnkpɔn ɖé kpannukɔn ɛ é?

¹⁸ (3) Tamɛ linlin. Nǎ xósin nú nǔkanbyɔ elɔ: “Nɛ̌ Pɔlu ka nya xɛ éɖée jí gbɔn?” É tuùn ɖɔ zaanɖé dìn ɔ emi na kú có, é wɔn ɖɔ é ɖò taji tawun ɖɔ è ni kpa susu nú Jehovah ǎ. Gɔ́ na ɔ, é kpò ɖò tamɛ lin dó lee é sixu dó wusyɛn lanmɛ nú mɛ ɖevo lɛ gbɔn é jí wɛ. É nɔ ganjɛ Jehovah wu, gbɔn ɖɛxixo sɛ́dó è hwɛhwɛ gblamɛ. (2 Tim. 1:3) Pɔlu fɔ́n tɛgbɛ bo nɔ ɖò tamɛ lin dó nɔví ɖěɖee jó è dó lɛ é jí wɛ ǎ. É nyɔ́ wà ɔ, é ɖɔ ɖɔ ali e nu xɔ́ntɔn wanyiyinɔ emitɔn lɛ nɔ gudo nú emi, bo lɛ́ d’alɔ emi ɖè é sù nukún emitɔn mɛ tawun. Gɔ́ na ɔ, Pɔlu kpò ɖò Xó Mawu tɔn kplɔ́n wɛ. (2 Tim. 3:16, 17; 4:13) Taji bǐ ɔ, é ɖeji mlɛ́mlɛ́ ɖɔ Jehovah kpo Jezu kpo yí wǎn nú emi. Ye jó è dó ǎ, ye ka lɛ́ d’ajɔ ɛ ɖó sinsɛnzɔ́ e é wà kpo gbejininɔ kpo é wu.

19. Nɛ̌ Jehovah ka d’alɔ Pɔlu gbɔn?

¹⁹ Jehovah gb’akpá nú Pɔlu ɖɔ é na dɛ ɖò yadonúmɛ nu, ɖó Klisanwun e é nyí é wu. (Mɛ. 21:11-13) Nɛ̌ Jehovah ka d’alɔ Pɔlu gbɔn? É na sinkɔn nú ɖɛ Pɔlu tɔn lɛ, bɔ hwenu ɖò yiyi wɛ é ɔ, é na ɛ hlɔnhlɔn. (2 Tim. 4:17) Pɔlu kúdeji ɖɔ emi na mɔ ajɔ e emi dó gǎn syɛnsyɛn bá mɔ é. Jehovah lɛ́ zán xɔ́ntɔn gbejinɔtɔ́ Pɔlu tɔn lɛ, bɔ ye d’alɔ ɛ ɖò ali tawun tawun lɛ nu.

20. Sɔgbe xá Hlɔmanu lɛ 8:38, 39 ɔ, nɛ̌ mǐ ka sixu wà nǔ Pɔlu ɖɔhun gbɔn?

²⁰ (4) Nǔ e è kplɔ́n lɛ é zinzan. Kanbyɔ hwiɖée ɖɔ: ‘Nɛ̌ un ka sixu wà nǔ Pɔlu ɖɔhun gbɔn?’ Pɔlu ɖɔhun ɔ, mǐ ɖó na ɖó nukún yadonúmɛ, ɖó nǔ e mǐ ɖi é wutu. (Mak. 10:29, 30) Bonu mǐ na nɔ gbeji ɖò wuvɛ̌ lɛ hwenu ɔ, mǐ ɖó na ganjɛ Jehovah  wu ɖò ɖɛ mɛ, bo na ɖó aca nǔkplɔnkplɔn tɔn ɖagbe ɖé. Bɔ mǐ ɖó na nɔ flín hwe lɛ bǐ xwíi nu ɖɔ nǔ taji hugǎn e mǐ sixu wà lɛ é ɖokpo wɛ nyí ɖɔ mǐ na kpa susu nú Jehovah. Mǐ sixu kúdeji ɖɔ Jehovah kún na jó mǐ dó gbeɖé ó, bɔ nǔ ɖebǔ kún ka sixu sú ali d’è bɔ é na gɔn wǎn yí nú mǐ ó.—Xà Hlɔmanu lɛ 8:38, 39; Ebl. 13:5, 6.

21. Etɛ ka d’alɔ Aya kpo Hector kpo bɔ ye ɖu ɖò wuvɛ̌ yetɔn lɛ jí?

²¹ Kpɔ́ndéwú Biblu tɔn lɛ sixu d’alɔ mǐ bɔ mǐ na ɖó hlɔnhlɔn e sín hudo mǐ ɖó bo na dɛ ɖò ninɔmɛ ɖé nu é. Ði kpɔ́ndéwú ɔ, Aya e nyí gbexosin-alijitɔ́ ɖé ɖò Japon é ɖɔ ɖɔ tan Jonasi tɔn d’alɔ emi bɔ emi ɖu ɖò xɛsiɖiɖi nú kúnnuɖiɖe agbawungba tɔn jí. Hector nyí mɛ winnyawinnya ɖé bo nɔ nɔ Indonésie bɔ mɛjitɔ́ tɔn lɛ nɔ sɛn Jehovah ǎ. Kpɔ́ndéwú Hwliti tɔn d’alɔ ɛ, bɔ é kplɔ́n nǔ dó Jehovah wu, bo ɖò sinsɛn ɛ wɛ.

22. Nɛ̌ a ka sixu ɖu vivǐ nǔkpinkpɔn-dó-kplɔ́n-nǔ lɛ, alǒ xóta ɖebɔdoɖewu “Ði Nǔ Ye Ðɔhun” lɛ tɔn ganji gbɔn?

²² Fitɛ a ka sixu mɔ kpɔ́ndéwú Biblu tɔn ɖěɖee na na hlɔnhlɔn we lɛ é ɖè? Video mǐtɔn lɛ, xóyidókanji lɛ kpo xóta ɖebɔdoɖewu “Ði Nǔ Ye Ðɔhun” lɛ kpo nɔ zɔ́n bɔ tan Biblu tɔn lɛ nɔ ɖò gbɛ̀. * Cobonu a na kpɔ́n, ɖótó, alǒ xà tan enɛ lɛ e è ba dò nú nǔ d’eji ganji é ɔ, byɔ̌ Jehovah ɖɔ é ni d’alɔ we bonu a na mɔ nǔkplɔnmɛ taji e a sixu zán lɛ é. Sɔ́ hwiɖée dó mɛ taji e xó tan ɔ ɖɔ é sín tɛnmɛ. Lin tamɛ dó nǔ e mɛsɛntɔ́ Jehovah tɔn gbejinɔtɔ́ enɛ lɛ wà é kpo lee Jehovah d’alɔ ye bɔ ye ɖu ɖò ninɔmɛ vɛwǔ lɛ jí gbɔn é kpo jí. Enɛ gudo hǔn, zǎn nǔkplɔnmɛ lɛ ɖò ninɔmɛ towe mɛ. Dǒkú nú Jehovah ɖó alɔ e dó we wɛ é ɖè é wu. Xlɛ́ ɖɔ alɔ e é dó we é sù nukún towe mɛ, bo ba ali ɖěɖee nu a sixu dó wusyɛn lanmɛ nú mɛ ɖevo lɛ, bo lɛ́ nɔ gudo nú ye ɖè lɛ é.

23. Sɔgbe xá Ezayíi 41:10, 13 ɔ, etɛ Jehovah ka d’akpá ɖɔ emi na wà nú mǐ?

²³ Gbɛ̀ elɔ e nu Satáan kp’acɛ dó é sixu vɛwǔ bɔ è na ɖí xwi xá, bɔ hweɖelɛnu ɔ, é tlɛ nɔ wá hú agbɔ̌n mɛ. (2 Tim. 3:1) Amɔ̌, é byɔ ɖɔ ado ni hu mǐ alǒ xɛsi ni ɖi mǐ zɛ xwé wu ǎ. Jehovah tuùn nǔ e mɛ gbɔn dín wɛ mǐ ɖè lɛ é. É d’akpá ɖɔ enyi mǐ na bo tlɛ j’ayǐ ɔ, emi na sɔ́ mǐ site kpo aɖisí lɔ emitɔn hlɔnhlɔnnɔ ɔ kpo. (Xà Ezayíi 41:10, 13.) Mǐ kúdeji ɖɔ Jehovah na d’alɔ mǐ, bɔ Biblu na na hlɔnhlɔn e sín hudo mǐ ɖó bo na dɛ ɖò tagba ɖebǔ nu é mǐ.