Klisanwun ɖé lɛ nɔ zán nǔ e nǔnywɛ xwitixwiti gayɛnu tɔn ɖetɔ́n lɛ é dó nɔ ɖɔ xó ɖó kpɔ́ xá mɛ e ɖò xwédo yetɔn mɛ lɛ é kpo Kúnnuɖetɔ́ ɖevo lɛ kpo. Amɔ̌, Klisanwun e zin lɛ é ɖó na hɛn wěɖexámɛ elɔ ayi mɛ: “Gbɛtɔ́ e ayi tɔn ɖò te ɔ mɔ nǔ nyanya ja ɔ, é nɔ hɔn bɛ; xlonɔ ka nɔ zɔn mɔ̌ bo nɔ yì zɔn mɛ.”—Nǔx. 27:12.

É sù nukún mǐtɔn mɛ ɖɔ Jehovah nɔ ba na nya xɛ ɖò mǐ jí. Enɛ wu ɔ, mǐ nɔ dó gbɛ̌ xá mɛ ɖěɖee nɔ dɔn kínklán wá lɛ é, mɛ e è ɖè sín agun mɛ lɛ é, alǒ mɛ e nɔ sɔ́ nǔkplɔnmɛ abǐ linlin agɔ lɛ ɖ’ajo lɛ é ǎ. (Hlɔ. 16:17; 1 Kɔ. 5:11; 2 Jaan 10, 11) Nɔví ɖé lɛ, alǒ, mɛ ɖěɖee nɔ dó gbɛ̌ xá agun ɔ lɛ é ɖé lɛ sixu nɔ gɔn sɛ́n ɖěɖee ɖò Biblu mɛ lɛ é nyi. (2 Tim. 2:20, 21) Mǐ nɔ hɛn enɛ d’ayi mɛ hwenu e mǐ ɖò xɔ́ntɔn mǐtɔn lɛ cyan wɛ é. Xɔ́ntɔn ɖagbe lɛ cyancyan sixu vɛwǔ, enyi tɛn Ɛntɛnɛti tɔn ɖěɖee è nɔ zán dó ɖɔ xó ɖó kpɔ́ xá mɛ lɛ é ɖé zán wɛ è ɖè ɔ nɛ.

Enɛ lɛ́ ɖò taji tawun enyi mɛ ɖěɖee ɖò gbɛ̌ta e mɛ mǐ nɔ wlán nǔ dó lɛ é sukpɔ́ tawun ɔ nɛ. Klisanwun ɖé lɛ ko byɔ gbɛ̌ta e mɛ gbɛtɔ́ sukpɔ́ ɖè tawun lɛ é mɛ, bɔ enɛ ka wà nǔ dó ye wu. Enyi mɛ kanweko mɔ̌kpan alǒ afatɔ́n mɔ̌kpan wɛ ɖò gbɛ̌ta ɖé mɛ ɔ, nɛ̌ nɔví sunnu ɖé alǒ nɔví nyɔnu ɖé ka sixu nɔ acéjí gbɔn? Mǐ na tuùn mɛ alɔkpa e ɖò gbɛ̌ta ɔ mɛ tawun lɛ é, kpo lee ye ɖè gbɔn ɖò gbigbɔ lixo é kpo gbeɖé ǎ. Ðɛhan 26:4 ɖɔ: “Un nɔ dó gbɛtɔ́ nuwenɔgbɛ́ ǎ, un nɔ zɔn xá gbɛtɔ́ yɛmɛnúwatɔ́ ǎ.” Enɛ xlɛ́ ɖɔ nǔ winwlán xá mɛ e è tuùn lɛ é kɛɖɛ ɔ, nǔnywɛnú wɛ.

Enyi mɛ kpɛví ɖé wɛ na bo tlɛ ɖò gbɛ̌ta ɖé mɛ ɔ, Klisanwun ɖé ɖó na da táan nabi e é nɔ zán ɖò gbɛ̌ta ɔ mɛ é kpo nǔ e gbé nya wɛ è ɖè ɖò gbɛ̌ta ɔ mɛ lɛ é kpo kpɔ́n. Enyi nǔ e è wlán sɛ́dó é na bo ɖɔ xó dó nǔ ɖebǔ wu, alǒ na bo ɖu hwenu ɖebǔ ɔ, dandan jɛn mǐ na na xósin na ǎ. Pɔlu gb’akpá nú Timɔtée dó mɛ e nyí “xóɖɔxóɖɔ, bo [ma] nɔ hɛn xó ɖé xomɛ ǎ” lɛ é wu. (1 Tim. 5:13) Égbé ɖesu ɔ, è sixu wà nǔ mɔ̌hun gbɔn Ɛntɛnɛti jí.

Klisanwun e zin é ɖé nɔ mɔ xó ɖɔ dó Klisanwun ɖevo lɛ wu ǎ, é ka nɔ ɖótó xó e mɔ ɖɔ dó ye wu wɛ è ɖè é ǎ, mɔ̌ jɛn é ma ka nɔ lɛ́ ɖè kpáxó yetɔn lɛ gbà ǎ é nɛ. (Ðɛh. 15:3; Nǔx. 20:19) É nɔ lɛ́ dó sin xó jí, bo na dó dó xɛsi nú mɛ lɛ, alǒ ɖɔ xó e ma sɔgbe ǎ lɛ é ǎ. (Efɛ. 4:25) Mǐ ɖó linlin e jinjɔn Biblu jí lɛ é kpo gbeɖiɖó e wu è sixu ɖeji dó lɛ é kpo gegě ɖò tɛn Ɛntɛnɛti tɔn mǐtɔn jw.org kpo tuto sunmɛ sunmɛ tɔn Televiziɔn JW^® tɔn kpo jí.

Kúnnuɖetɔ́ ɖé lɛ nɔ zán tɛn Ɛntɛnɛti tɔn e è nɔ zán dó ɖɔ xó ɖó kpɔ́ xá mɛ lɛ é dó sà nǔ, xɔ nǔ, alǒ jlá ajɔ̌, abǐ xwlé azɔ̌ mɛ ɖevo lɛ. Ajɔ̌xó wɛ nyí xó enɛ lɛ, ye kan Jehovah sinsɛn ǎ. Klisanwun ɖěɖee ma ba na jó yeɖée dó nú “wanyiyi nú akwɛ” ǎ lɛ é nɔ zán nɔví yetɔn lɛ dó ba akwɛ gbeɖé ǎ.—Ebl. 13:5.

Mǐ ka ɖó na zán tɛn Ɛntɛnɛti tɔn ɖěɖee è nɔ zán dó ɖɔ xó ɖó kpɔ́ xá mɛ lɛ é dó xò akwɛ kplé nú nɔví ɖěɖee ɖò hudo mɛ lɛ é, alǒ mɛ ɖěɖee awě ɖé xò lɛ é wɛ à? Mǐ yí wǎn nú nɔví mǐtɔn lɛ bɔ nǔ yetɔn nɔ lɛ́ ɖu ayi mɛ nú mǐ, enɛ wu ɔ, mǐ nɔ d’alɔ mɛ ɖěɖee ɖò hudo alɔdó kpo wusyɛn dó lanmɛ nú mɛ kpo tɔn mɛ lɛ é hwɛhwɛ. (Ja. 2:15, 16) Amɔ̌, tintɛnkpɔn bo na wà mɔ̌ gbɔn gbɛ̌ta nǔ winwlán sɛ́dó mɛɖée tɔn e mɛ gbɛtɔ́ sukpɔ́ ɖè é ɖé gblamɛ sixu zɔ́n bɔ é na vɛwǔ nú alaxɔ xá ɔ mɛ tɔn, alǒ mɛxo agun tɔn lɛ bɔ ye na d’alɔ ye. (1 Tim. 5:3, 4, 9, 10, 16) É ɖò wɛn ɖɔ mǐ mɛ ɖebǔ kún ba ɖɔ nɔví mǐtɔn lɛ ni lin ɖɔ mǐdɛɛ lɛ wɛ è ɖè azɔ̌ na ɖò ali bǔnɔ ɖé nu, bɔ mǐ na kpé nukún dó lɛngbɔ̌ Mawu tɔn lɛ wu ó.

Nǔ e nɔ kpa susu nú Mawu lɛ é wɛ mǐ nɔ ba na wà. (1 Kɔ. 10:31) Enɛ wu ɔ, enyi tɛn Ɛntɛnɛti tɔn e è nɔ zán dó ɖɔ xó ɖó kpɔ́ xá mɛ lɛ é ɖé zán wɛ a ɖè oo, alǒ nǔ mɔ̌hun ɖevo zán wɛ a ɖè hǔn, da awovínú lɛ kpɔ́n, bo nɔ acéjí.