Mɛ e xa tan énɛ́ kplakpla bó dín é ɖé lɛ́ kan nǔ mɔ̌hun byɔ́. Amɔ̌, ɖo wěmafɔ énɛ́ lɛ́ mɛ ɔ, súnnu vovo we xó wɛ è ɖɔ, bɔ yě bǐ nɔ nyí Mɛfibáalu; nǔ e jɛ é gbígbéjé kpɔ́n sixú kplɔ́n nǔɖé mǐ.

Vǐ súnnu tɛ́nwe wɛ axɔ́sú Izlayɛ́li tɔn Sawúlu ɖó, bó ɖó vǐ nyɔ̌nu we. Jonatáan wɛ nyí nukɔnví Sawúlu tɔn. Nukɔnmɛ ɔ, axɔ́sú ɔ wá ji vǐ súnnu ɖé ɖo asi tɔn Hlisípa xomɛ, bó sun nyǐ i ɖɔ Mɛfibáalu. É jí wǔ tawun ɖɔ Jonatáan lɔ ɖó vǐ súnnu ɖé bɔ è nɔ ylɔ́ ɛ ɖɔ Mɛfibáalu. Énɛ́ wú ɔ, axɔ́sú Sawúlu ɖó vǐ ɖokpó bɔ è nɔ ylɔ́ ɛ ɖɔ Mɛfibáalu, bó lɛ́ ɖó vǐvú ɖokpó, bɔ è nɔ ylɔ́ ɛ ɖɔ Mɛfibáalu.

Hweɖénu wá su bɔ axɔ́sú Sawúlu tɔ́n ahwan Gabawɔ́ɔnnu e ɖo Izlayɛ́li ví lɛ́ tɛ́ntin lɛ́ é, bó ba ná sú kún yětɔn dó. É cí ɖɔ yě mɛ gěgé wɛ è hu ɖɔhun. Énɛ́ ka nylá tawun. Étɛ́wú? Ðó ɖo Jozuwée hwenu ɔ, gǎn e ɖo Izlayɛ́li lɛ́ é jɛ fífá sín akɔ xá Gabawɔ́ɔnnu lɛ́.—Joz. 9:3-27.

Akɔ énɛ́ kpo ɖo ayǐ káká jɛ axɔ́sú Sawúlu hwenu. Axɔ́sú ɔ ba ná wa nǔ sɔgbe xá akɔ énɛ́ ǎ, bó tɛ́n kpɔ́n bá sú Gabawɔ́ɔnnu lɛ́ sín kún dó. Énɛ́ zɔ́n bɔ Sawúlu kpó mɛ e ɖo xwé tɔn gbe lɛ́ é kpó ɖu hun xɔ́. (2 Sam. 21:1) Gǔdo mɛ ɔ, Davídi wá húzú axɔ́sú. Gabawɔ́ɔnnu e xo gló awě ɔ lɛ́ é wá ɖɔ xó nú Davídi dó nǔ nyanya e jɛ é wú. Davídi kan lěe è ná sú nǔdabaɖa énɛ́ e Sawúlu wa é sín axɔ́ gbɔn é byɔ́ yě, bɔ mɔ̌ mɛ ɔ, é hun ali nú Jehovah bónú é ná kɔn nyɔ̌ná dó ayǐkúngban Izlayɛ́li tɔn ɔ jí. Gabawɔ́ɔnnu lɛ́ byɔ́ akwɛ́ ǎ, é nyɔ́ wa ɔ, yě byɔ́ nya e jló ná “sú kún” yětɔn dó é sín vǐ tɛ́nwe, bó ná dó kan kɔ nú yě, lobo hu yě. (Kɛ́n. 35:30, 31) Davídi yí gbe nú nǔbyɔ́byɔ́ yětɔn.—2 Sam. 21:2-6.

Hwe ɔ nu ɔ, Sawúlu kpó Jonatáan kpó ko kú ɖo ahwangbénu nɛ́, amɔ̌, Jonatáan ví Mɛfibáalu kpo ɖo gbɛ. Sín vǔ tɔn ɖokpóo wɛ awě ɖé ko xo è, bɔ é cɛ́ kplíbɔ́, bó ɖ’alɔ ɖo ahwan e gǎn’páa tɔn fun xá Gabawɔ́ɔnnu lɛ́ é mɛ ǎ. Davídi jɛ xɔ́ntɔn zunzun sín akɔ ɖé xá Jonatáan, bɔ vǐ tɔn lɛ́ ná wá ɖu le tɔn; Mɛfibáalu Jonatáan ví ɔ lɔ ɖo yě mɛ. (1 Sam. 18:1; 20:42) Tan ɔ ɖɔ: “Axɔ́sú ɔ [Davídi] kú nǔbláwǔ nú Mɛfibáalu, Jonatáan ví, Sawúlu vívú ɔ, ɖó alɛ e é nu xá Jonatáan ɖo Jehovah nyíkɔ mɛ é wútu.”—2 Sam. 21:7, nwt.

Nǔgbó ɔ, Davídi bló nǔ e Gabawɔ́ɔnnu lɛ́ byɔ́ ɛ é. É jó Sawúlu ví súnnu we; mɛ ɖokpó ɖo yě mɛ bó nɔ nyí Mɛfibáalu, gɔ́ nú Sawúlu vívú atɔ́ɔ́n. (2 Sam. 21:8, 9) Mɔ̌ e Davídi wa é zɔ́n bɔ nǔ nyanya e nɔ jɛ ɖo Izlayɛ́li yíkúngban jí ɖó adǎka e Sawúlu xo é wú é ɖó te.

Tan élɔ́ nyí tan ɖé kpowun ǎ. Sɛ́n Mawu tɔn ɖo wɛn. É ɖɔ: “È ná hu tɔ́ ɖó vǐ tɔn nu ǎ.” (Sɛ́n. 24:16) Ényí xomɛvɔ́nɔ wɛ Sawúlu ví we lɛ́ kpó vǐvú tɔn atɔ́ɔ́n lɛ́ kpó nyí ɔ, Jehovah ná yí gbe bɔ nǔ mɔ̌hun ná jɛ ǎ. Sɛ́n ɔ ɖɔ gɔ́ ná ɖɔ: “Mɛ e wa nǔ nyi do é wɛ è ná hu ɖó nǔ e é wa ɔ nu.” É cí ɖɔ yě mɛ tɛ́nwe e kú ɖo kúnkan Sawúlu tɔn mɛ lɛ́ é lɔ ɖ’alɔ ɖo gǎn e Sawúlu dó bó ná sú kún dó nú Gabawɔ́ɔnnu lɛ́ é mɛ ɖo ali ɖé nu ɖɔhun. Wǎgbɔ tɔn ɔ, yě mɛ tɛ́nwe lɛ́ sún sin nǔ nyanya e yě wa é tɔn.

Tan élɔ́ xlɛ́ ɖɔ mɛɖé kún sixú lin, alǒ ɖɔ ɖɔ alixlɛ́mɛ lɛ́ wɛ émí xwedó kpowun dó ba hwɛjijɔ nú nǔ e é wa nyi do é ó. Nǔnywɛ́xó ɖé ɖɔ: “Cóbónú a ná sɔ́ ali ɖé hǔn, nɔ lin tamɛ kpɔ́n ganjí; ali e ɖó gǎnjɛwú é wɛ a ná mlɛ́.”—Nǔx. 4:24-27; Efɛ́. 5:15.