1-2. Étɛ́ ka nɔ jɛ hwɛhwɛ ɖo batɛ́mu bíbló hwenu? Étɛ́ lɛ́ a ka ɖó ná gbéjé kpɔ́n?

 A KA ko mɔ gbɛ̌ta mɛ ɖěɖěe jló ná bló batɛ́mu lɛ́ é tɔn ɖé kpɔ́n a? A ná ko ɖ’ayi wú ɖɔ hwenu e è ɖo nǔ we e è nɔ kanbyɔ́ mɛ cóbɔ è nɔ bló batɛ́mu lɛ́ é kanbyɔ́ yě wɛ é ɔ, lě do yě kú dó gbeta e kɔn yě wá é jí sɔ é tɔ́n ɖo xósin yětɔn lɛ́ mɛ. A mɔ lěe mɛ e ɖo xwédo yětɔn mɛ lɛ́ é kpó xɔ́ntɔn yětɔn lɛ́ kpó gó ɖó yě wú tawun sɔ é. Nú è ɖe ta yětɔn tɔ́n sín sin ɔ mɛ lě ɔ, a nɔ se asíkpɛ́ gbe, bo nɔ mɔ awǎjijɛ ɖo nukún yětɔn ta. Nú è má ɖó zɛ̌nzɛ̌n ɔ, mɛ afatɔ́n mɔ̌kpán wɛ nɔ sɔ́ yěɖée jó nú Jexóva Mawu, lobo nɔ bló batɛ́mu ɖo aklúnɔzángbla ɖokpó ɖokpó mɛ.

² Hwɛ ka lo? Ényí a ɖo tamɛ lin dó batɛ́mu blóbló jí wɛ hǔn, mɛ bǔnɔ ɖé wɛ nú we ɖo gbɛ nyanya élɔ́ mɛ, ɖó a ɖo ‘Jexóva ba wɛ wútu.’ (Ðɛh. 14:1, 2) Mɛ wínnyáwínnyá wɛ nú we a, alǒ mɛxómɔ wɛ nú we hǔn, hwi wú wɛ è sɔ́ nǔ nú xóta élɔ́. Amɔ̌, mǐ mɛ ɖěɖěe ko bló batɛ́mu lɛ́ é lɔ ba ná kpo ɖo hlɔ̌nhlɔ́n ná kán e mǐ kán ɖ’é jí, bo ná sɛn Jexóva káká sɔ́yi é wɛ. Énɛ́ wú ɔ, mi nú mǐ ní gbéjé hwɛjijɔ ɖěɖěe mǐ ɖó bo ná sɛn Jexóva lɛ́ é atɔn kpowun kpɔ́n ɖó kpɔ́.

3. Étɛ́wú mɛsɛntɔ́ Jexóva tɔn lɛ́ ka nɔ yí wǎn nú nǔgbóɖiɖɔ kpó nǔjlɔ́jlɔ́wiwa kpó? (Ðɛhan 119:128, 163)

³ Jexóva ɖe gbe nú mɛ e ɖo togun tɔn mɛ lɛ́ é ɖɔ yě ní “yí wǎn nú nǔgbóɖiɖɔ.” (Zak. 8:19) Jezu dó wǔsyɛ́n lanmɛ nú ahwanvú tɔn lɛ́ ɖɔ yě ní nɔ nya nǔjlɔ́jlɔ́wiwa gbé. (Mat. 5:6) Énɛ́ sín tínmɛ wɛ nyí ɖɔ è ní ɖó jlǒ syɛ́nsyɛ́n bá wa nǔ e sɔgbe, nǔ e nyɔ́, bo lɛ́ mɛ́ ɖo Mawu nukúnmɛ é. A ka yí wǎn nú nǔgbóɖiɖɔ kpó nǔjlɔ́jlɔ́wiwa kpó a? Mǐ kán ɖ’é jí ɖɔ nǔ nyí mɔ̌. A gbɛ́ wǎn nú adingban kpó nǔ nyanya alɔkpa lɛ́ bǐ kpó. (Xa Ðɛhan 119:128, 163.) Ényí mɛɖé nɔ ɖó adingban hǔn, kpɔ́ndéwú Satáan e nyí  gǎn gbɛ élɔ́ tɔn é tɔn xwedó wɛ é ɖe mɔ̌ nɛ́. (Jaan 8:44; 12:31) Nǔ e gbé nya wɛ Satáan ɖe é ɖokpó wɛ nyí ɖɔ é ní kɔn cí dó nyǐkɔ mímɛ́ Jexóva Mawu tɔn wú. Sín gǔ e è fɔ́n ɖo Edɛ́ni é hwenu ɖokpóo wɛ Satáan ko jɛ adingban fúnfún kpé dó Mawu wú jí. É nɔ tɛ́n kpɔ́n bo nɔ bló bɔ mɛ lɛ́ nɔ lin ɖɔ Jexóva ɔ, Acɛkpatɔ́ cejɛ́nnábínɔ e ma nɔ wa nǔ jlɔ́jlɔ́ ǎ, bo nɔ tɛ nǔ ɖagbe gbɛtɔ́ lɛ́ é wɛ é nyí. (Bǐb. 3:1, 4, 5) Adingban e Satáan ɖó dó Jexóva wú é zɔ́n bɔ mɛ lɛ́ kpo ɖo linlin masɔgbe ɖó dó wǔ tɔn wɛ káká jɛ égbé. Ényí mɛ lɛ́ wá gbeta ɔ kɔn bo ma ná “yí wǎn nú nǔgbóɖiɖɔ” ǎ ɔ, Satáan sixú sísɛ́ yě bɔ yě ná ɖ’alɔ ɖo nǔagɔwiwa kpó dǎkaxixo kpó alɔkpa bǐ mɛ.—Hlɔ̌. 1:25-31.

4. Nɛ̌ Jexóva ka ɖe xlɛ́ ɖɔ émí nyí “Mawu nǔgbóɖɔtɔ́” gbɔn? (Lɛ̌ kpɔ́n ɖiɖe ɔ.)

⁴ Jexóva ɔ, “Mawu nǔgbóɖɔtɔ́” wɛ, bo nɔ kplɔ́n nǔgbó ɔ mɛ ɖěɖěe yí wǎn n’i lɛ́ é kpó xomɛnyínyɔ́ kpó. (Ðɛh. 31:5, nwt) Jexóva nɔ wa mɔ̌ dó d’alɔ yě bónú adingban Satáan tɔn lɛ́ ma flú yě ó. Jexóva nɔ lɛ́ kplɔ́n mɛsɛntɔ́ tɔn lɛ́ ɖɔ yě ní nɔ ɖɔ nǔgbó, bo nɔ lɛ́ wa nǔ jlɔ́jlɔ́. Mɔ̌ mɛ ɔ, yě nɔ ɖó sísí mɛɖésúnɔ tɔn kpó fífá ayi mɛ tɔn kpó hú gǎn. (Nǔx. 13:5, 6) Bóyá Jexóva gbɔn Biblu e a kplɔ́n é gblamɛ, bo ɖe we sín adingban Satáan tɔn lɛ́ kannu, lobo ná we fífá ayi mɛ tɔn. A kplɔ́n ɖɔ ali Jexóva tɔn lɛ́ wɛ nyɔ́ bɔ nǔ bǐ vɔ ɖ’é wú nú gbɛtɔ́ lɛ́ bǐ kpaa, bo lɛ́ nyɔ́ nú hwiɖésúnɔ mɛtún ɔ. (Ðɛh. 77:14) Énɛ́ wú ɔ, a jló ná wa nǔ e nyɔ́ ɖo Mawu nukúnmɛ é. (Mat. 6:33) A ba ná jɛ hun dó nǔgbó ɔ jí, bo ná d’alɔ bónú è ná ɖe xlɛ́ ɖɔ adingban wɛ nyí nǔ e Satáan ɖɔ dó Jexóva Mawu mǐtɔn wú é. Nɛ̌ a ka sixú wa mɔ̌ gbɔn?

5. Nɛ̌ a ka sixú jɛ hun dó nǔgbóɖiɖɔ kpó nǔjlɔ́jlɔ́wiwa kpó jí gbɔn?

⁵ Lěe a nɔ zán gbɛ gbɔn é sixú ɖe xlɛ́ nyi wɛn nú mɛ lɛ́ bǐ ɖɔ, a gbɛ́ adingban Satáan tɔn lɛ́, lobo nɔ nɔ gǔdo nú nǔgbó ɔ. A sixú ɖe xlɛ́ ɖɔ émí ba ɖɔ Jexóva ní nyí Gǎn nú émí, bɔ émí ba ná wa nǔ e sɔgbe ɖo nukún tɔn mɛ é. Nɛ̌ a ka sixú wa mɔ̌ gbɔn? Xo ɖɛ sɛ́dó Jexóva bo zé hwiɖée jó n’i, énɛ́ gúdo hǔn, blǒ batɛ́mu dó ɖe zě e a zé hwiɖée jó n’i é xlɛ́ ɖo agbawungba. Wǎn yí nú nǔgbó kpó nǔ jlɔ́jlɔ́ kpó nɔ sísɛ́ mɛ tawun bɔ è nɔ wá gbeta ɔ kɔn bá bló batɛ́mu.

6. Sɔgbe xá Ðɛhan 45:4 ɔ, hwɛjijɔ tɛ́ lɛ́ a ka ɖó bo ná yí wǎn nú Jezu Klísu?

⁶ Étɛ́wú a ka yí wǎn nú Jezu Klísu? Ð’ayi hwɛjijɔ ɖagbe ɖé lɛ́ wú ɖo Ðɛhan 45:4, nwt mɛ. (Xa.) Jezu yí wǎn nú nǔgbóɖiɖɔ,  mɛɖéesɔ́hwe kpó nǔjlɔ́jlɔ́wiwa kpó. Ényí a yí wǎn nú nǔgbóɖiɖɔ kpó nǔjlɔ́jlɔ́wiwa kpó ɔ, é ɖo gaan ɖɔ a ná lɛ́ yí wǎn nú Jezu Klísu. Lin tamɛ dó lěe Jezu kpankɔ́n bo jɛ hun dó nǔ e nyí nǔgbó é kpó nǔ e sɔgbe é kpó jí gbɔn é jí. (Jaan 18:37) Bɔ nɛ̌ Jezu ka ɖe xlɛ́ ɖɔ è ɖó ná nɔ sɔ́ mɛɖée hwe gbɔn?

7. Étɛ́ ka dɔn we ɖo lěe Jezu nɔ sɔ́ éɖée hwe gbɔn é mɛ?

⁷ Jezu ɖe xlɛ́ ɖɔ è ɖó ná nɔ sɔ́ mɛɖée hwe gbɔn kpɔ́ndéwú tɔn gblamɛ. Ði kpɔ́ndéwú ɔ, é nɔ ba susu éɖésúnɔ tɔn gbeɖé ǎ, Tɔ́ tɔn wɛ é nɔ sɔ́ susu ɔ bǐ jó ná. (Mak. 10:17, 18; Jaan 5:19) Nɛ̌ nǔ ka nɔ cí nú we dó mɛɖéesɔ́hwe Jezu tɔn wú? Énɛ́ sísɛ́ we bɔ a ná yí wǎn nú Vǐ Mawu tɔn, bo lɛ́ xwedó kpɔ́ndéwú tɔn ǎ cé? É ɖo wɛn ɖɔ mɔ̌ wɛ. Étɛ́wú Jezu ka nɔ sɔ́ éɖée hwe? É yí wǎn nú Tɔ́ tɔn e nɔ sɔ́ éɖée hwe é, bo nɔ lɛ́ xwedó kpɔ́ndéwú tɔn wú wɛ. (Ðɛh. 18:35, nwt; Ebl. 1:3) Ðó Jezu nɔ ɖe jijɔ Jexóva tɔn lɛ́ xlɛ́ bɔ nǔ bǐ vɔ ɖ’é wú wútu ɔ, énɛ́ zɔ́n bɔ a sɛkpɔ́ ɛ ǎ cé?

8. Étɛ́wú é ka víví nú mǐ ɖɔ Jezu nyí Axɔ́sú mǐtɔn?

⁸ Mǐ yí wǎn nú Jezu e nyí Axɔ́sú mǐtɔn é, ɖó é wɛ nyí Gǎn ɖagbe hú gǎn ɔ. Jexóva ɖésúnɔ wɛ kplɔ́n azɔ̌ Vǐ tɔn, bo sɔ́ ɛ nú é ná kp’acɛ. (Eza. 50:4, 5) Lɛ̌ lin tamɛ dó wǎnyíyí e ma ɖó cejɛ́nnábí ǎ e Jezu ɖe xlɛ́ é jí. (Jaan 13:1) Ðó Jezu nyí Axɔ́sú towe wútu ɔ, é jɛxá ɖɔ a ní yí wǎn n’i. É tínmɛ ɖɔ mɛ ɖěɖěe yí wǎn nú émí nǔgbó nǔgbó lɛ́ é, énɛ́ wɛ nyí mɛ ɖěɖěe émí nɔ ylɔ́ ɖɔ xɔ́ntɔn lɛ́ é nɔ ɖe xlɛ́ ɖɔ yě yí wǎn nú émí gbɔn tónúsise nú gbeɖiɖe émítɔn lɛ́ gblamɛ. (Jaan 14:15; 15:14, 15) Wǔjɔmɛ ɖaxó wɛ é nyí ɖɔ è ní nyí xɔ́ntɔn Vǐ Jexóva tɔn tɔn!

9. Ali tɛ́ nu batɛ́mu klisánwun lɛ́ tɔn ka ɖi Klísu tɔn ɖe?

⁹ Gbeɖiɖe Jezu tɔn lɛ́ ɖokpó wɛ nyí ɖɔ ahwanvú tɔn lɛ́ ní bló batɛ́mu. (Mat. 28:19, 20) É sɔ́ kpɔ́ndéwú ɔ ɖ’ayǐ. Ðo ali ɖé lɛ́ nu ɔ, batɛ́mu Jezu tɔn gbɔn vo nú ahwanvú tɔn lɛ́ tɔn. (Kpɔ́n gbǎví “ Lěe batɛ́mu Jezu tɔn gbɔn vo nú batɛ́mu ahwanvú tɔn lɛ́ tɔn gbɔn é.”) Amɔ̌, yě ɖi yěɖée lɛ́ ɖo ali ɖěvo lɛ́ nu. Gbɔn batɛ́mu e Jezu bló é gblamɛ ɔ, é ɖe xlɛ́ ɖɔ émí jló ná wa jlǒ Tɔ́ émítɔn tɔn. (Ebl. 10:7) Mɔ̌ ɖokpó ɔ, ahwanvú Klísu tɔn lɛ́ nɔ bló batɛ́mu, bo nɔ dó ɖe xlɛ́ ɖo agbawungba ɖɔ yě sɔ́ yěɖée jó nú Jexóva Mawu. Din ɔ, nǔ e nyí nǔ tají hú gǎn ɖo gbɛzán yětɔn mɛ é wɛ nyí jlǒ Mawu tɔn wiwa, ényí jlǒ yěɖésúnɔ tɔn wiwa ǎ. Kpɔ́ndéwú Gǎn yětɔn tɔn xwedó wɛ yě ɖe mɔ̌ nɛ́.

10. Hwɛjijɔ tɛ́ lɛ́ a ka ɖó bo ná yí wǎn nú Jezu? Étɛ́ wǎnyíyí énɛ́ ka ɖó ná sísɛ́ we bɔ a ná wa?

¹⁰ A ɖi nǔ ɖɔ Jezu nyí Vǐɖokpónɔ Jexóva tɔn, bo lɛ́ nyí Axɔ́sú e Mawu sɔ́ bɔ é ná kp’acɛ dó mǐ nu é. A tuun ɖɔ Jezu nɔ sɔ́ éɖée hwe, bo nɔ lɛ́ wa nǔ Tɔ́ tɔn ɖɔhun bɔ nǔ bǐ nɔ vɔ ɖ’é wú. A kplɔ́n ɖɔ é ná nǔɖuɖu mɛ e xovɛ́ sin lɛ́ é, dó gbɔ nú mɛ e awakanmɛ kú lɛ́ é, bo tlɛ gbɔ azɔn nú azinzɔnnɔ lɛ́. (Mat. 14:14-21) A mɔ lěe é ɖo ali xlɛ́ agun tɔn wɛ ɖo égbé gbɔn é. (Mat. 23:10) Gɔ́ ná ɔ, a tuun ɖɔ ɖó é lɛ́ nyí Axɔ́sú nú Axɔ́súɖuto Mawu tɔn wútu ɔ, é ná lɛ́ wa nǔ nú mǐ hú mɔ̌ flaflá tɔn ɖo sɔgúdo. Nɛ̌ a ka sixú ɖe xlɛ́ ɖɔ a yí wǎn n’i gbɔn? A sixú wa mɔ̌ gbɔn kpɔ́ndéwú tɔn xwixwedó gblamɛ. (Jaan 14:21) Nǔ tají e a sixú wa dó xwedó kpɔ́ndéwú tɔn é ɖokpó wɛ nyí ɖɔ a ná sɔ́ hwiɖée jó nú Jexóva, bo bló batɛ́mu.

11. Hwɛjijɔ tɛ́ ka nyí tají hú gǎn e wú è ɖó ná bló batɛ́mu é? Aniwú nǔ ka nyí mɔ̌?

¹¹ Hwɛjijɔ tají hú gǎn tɛ́ wú è ka ɖó ná bló batɛ́mu? Jezu ɖɔ ɖɔ sɛ́n Mawu tɔn élɔ́ wɛ ɖo tají hú gǎn: “A ɖó ná yí wǎn nú Jexóva Mawu towe kpó ayi towe bǐ kpó, kpó lǐndɔ̌n towe bǐ kpó, kpó linlin towe bǐ kpó, kpó hlɔ̌nhlɔ́n towe bǐ kpó.” (Mak. 12:30) Hwi lɔ ka yí wǎn nú Mawu yi ɖó bǎ énɛ́ mɛ a?

12. Étɛ́wú a ka yí wǎn nú Jexóva? (Lɛ̌ kpɔ́n ɖiɖe ɔ.)

¹² Hwɛjijɔ e wú è ná yí wǎn nú Jexóva lɛ́ é sukpɔ́.  Ði kpɔ́ndéwú ɔ, a wá mɔ nǔ jɛ wú ɖɔ é “gɔ́n wɛ gbɛ ɔ jɔ sín,” bɔ é gɔ́n wɛ “nǔníná ɖagbe ɖagbe bǐ kpó nǔníná e nǔ bǐ vɔ ɖ’é wú é bǐ kpó” gosín. (Ðɛh. 36:10; Ja. 1:17) Mawu mǐtɔn wǎnyíyínɔ e nɔ hun alɔ dó ná nǔ mɛ é gɔ́n wɛ nǔ ɖagbe ɖěɖěe sín vǐví a nɔ ɖu lɛ́ é bǐ gosín.

13. Étɛ́wú gbɛxixɔ ɔ ka nyí nǔníná ɖaaɖagbe ɖé?

¹³ Nǔníná ɖaaɖagbe ɖé wɛ gbɛxixɔ ɔ nyí bɔ Jexóva ná mǐ. Aniwú mǐ ka sixú ɖɔ mɔ̌? Lin tamɛ dó lě do Jexóva kpó Vǐ tɔn kpó vɛ́ sɔ é jí. Jezu ɖɔ: “Tɔ́ ɔ yí wǎn nú mì,” bɔ “un yí wǎn nú Tɔ́ ɔ.” (Jaan 10:17; 14:31) Xɔ́ntɔn e yě mɛ we lɛ́ zun é lɛ́ lí dǒ d’é jí, ɖo xwe lǐva mɔ̌kpán e yě zán ɖó kpɔ́ lɛ́ é mɛ. (Nǔx. 8:22, 23, 30) Din ɔ, lin tamɛ dó lě do Mawu ná ko se wǔvɛ́ sɔ hwenu e é yí gbe bɔ Vǐ tɔn ji ya bo kú é jí. Jexóva yí wǎn nú gbɛtɔ́ lɛ́, káká jɛ hwi lɔ jí sɔmɔ̌, bɔ éɖésúnɔ jló bo sɔ́ Vǐ vívɛ́ tɔn dó sá vɔ̌, bónú hwi kpó mɛ ɖěvo lɛ́ kpó ná nɔ gbɛ káká sɔ́yi. (Jaan 3:16; Ga. 2:20) Hwɛjijɔ e wú mǐ ná yí wǎn nú Mawu é ɖěvo sɔ́ ɖe bo hú gǎn énɛ́ ǎ.

14. Nǔ ɖagbe hú gǎn tɛ́ gbé a ka sixú nya ɖo gbɛ mɛ?

¹⁴ Wǎn e a yí nú Jexóva é lɛ́ jɛjí, ɖó nǔ e a kplɔ́n dó wǔ tɔn d’é jí é wú. É ɖo wɛn ɖɔ, a ba ná sɛkpɔ́ ɛ d’é jí din, bo ná lɛ́ kpo ɖo mɔ̌ wa wɛ káká sɔ́yi. É ka sixú kpa we. É dó wǔsyɛ́n lanmɛ nú we kpó xomɛnyínyɔ́ kpó ɖɔ a ní hɛn xomɛ émítɔn hun. (Nǔx. 23:15, 16) A sixú wa  mɔ̌ gbɔn xó towe lɛ́ kpó nǔwiwa towe lɛ́ kpó gblamɛ. Lěe a nɔ zán gbɛ gbɔn é ná xlɛ́ ɖɔ a yí wǎn nú Jexóva nǔgbó nǔgbó. (1 Jaan 5:3) Nǔ ɖagbe hú gǎn e gbé a sixú nya ɖo gbɛ mɛ é nɛ́.

15. Nɛ̌ a ka sixú xlɛ́ ɖɔ émí yí wǎn nú Jexóva gbɔn?

¹⁵ Nɛ̌ a ka sixú ɖe xlɛ́ ɖɔ émí yí wǎn nú Jexóva gbɔn? Nukɔntɔn ɔ, xo ɖɛ bǔnɔ ɖé sɛ́dó Mawu nǔgbó ɖokpó e tíin é bo sɔ́ hwiɖée jó n’i. (Ðɛh. 40:9) Énɛ́ gúdo hǔn, blǒ batɛ́mu dó ɖe xlɛ́ ɖo agbawungba ɖɔ émí sɔ́ émíɖée jó nú Jexóva. Lěe mǐ ko mɔ gbɔn ɖo bǐbɛ́mɛ xóta élɔ́ tɔn é ɔ, hwenu awǎjijɛ tɔn ɖé wɛ batɛ́mu e a bló é nyí ɖo gbɛzán towe mɛ, bo lɛ́ nyí hwenu tají. A jɛ gbɛ yɔ̌yɔ́ ɖé zán jí, é ka nyí nú hwiɖée ǎ, loɔ, nú Jexóva. (Hlɔ̌. 14:8; 1 Pi. 4:1, 2) Afɔ énɛ́ ɖiɖe sixú cí gbeta ɖaxó e kɔn a ná wá é ɖé ɖɔhun; mɔ̌ ka wɛ nǔgbó. É ka nɔ hun gbɛ ɖagbe hú gǎn e è sixú zán é sín ali nú mɛ. Gbɔn nɛ̌ é?

16. Étɛ́ Ðɛhan 41:13 ka ɖɔ ɖɔ Jexóva ná wa nú mɛ ɖěɖěe nɔ zán gbɛ yětɔn dó sɛn ɛ lɛ́ é?

¹⁶ Jexóva wɛ nyí Mɛ e nɔ hun alɔ dó ná nǔ mɛ hú gǎn é. A na bo tlɛ nɔ ná nǔ i gbɔn ɖěbǔ ɔ, nǔ e é nɔ ná we é nɔ zɛ nǔ ɖěbǔ e a nɔ ná ɛ é wú flaflá tɔn hwebǐnu. (Mak. 10:29, 30) Gbɛ ɖagbe hú gǎn e ná sɔ́ akpakpa we, ɖó le, bo ná lɛ́ jɛmɛ nú we é wɛ é ná ná we; nǔ tlɛ sixú nyí mɔ̌ din ɖo gbɛ nyanya élɔ́ mɛ. Bǐbɛ́mɛ nǔ lɛ́ tɔn kpowun wɛ ka nyí énɛ́. Gbɛ e a jɛ zǐnzán jí ɖo batɛ́mu towe gúdo é ɖó ná wá vivɔnu ǎ. A sixú ɖo Tɔ́ wǎnyíyínɔ towe sɛn wɛ káká sɔ́yi. Wǎnyíyí e ɖo hwi kpó Tɔ́ towe kpó tɛ́ntin é ná ɖo syɛ́nsyɛ́n d’é jí wɛ, bɔ a ná wá nɔ gbɛ káká sɔ́yi éɖɔhun.—Xa Ðɛhan 41:13.

17. Nǔɖé ɖe bɔ Jexóva ko ɖó ǎ bɔ a sixú ná ɛ. Étɛ́ ka nyí nǔ ɔ?

¹⁷ Ényí a zé hwiɖée jó nú Mawu bo bló batɛ́mu ɔ, ali wɛ hun nú we bɔ a ná ná nǔ e xɔ akwɛ́ tawun é ɖé Tɔ́ towe. É wɛ ná nǔ ɖagbe lɛ́ kpó hwenu awǎjijɛ tɔn e sín vǐví a ɖu lɛ́ é kpó bǐ we. Nú a ná ɖe nǔsumɛnukúnmɛ xlɛ́ Mɛ e ɖó jǐnukúnsin kpó ayǐkúngban kpó é ɔ, a sixú ná ɛ nǔ e é ma ko ɖó ǎ é ɖé, énɛ́ wɛ nyí ɖɔ a ná ɖo gbesisɔmɛ bá sɛn ɛ kpó gbejíninɔ kpó. (Jɔb. 1:8; 41:3; Nǔx. 27:11) Ali ɖagbe hú gǎn e nu a sixú zán gbɛ towe ɖe é nɛ́. Nǔxokpɔ́n ɖ’é mɛ ǎ, wǎn  e a yí nú Jexóva é wɛ nyí hwɛjijɔ tají hú gǎn e wú a ná bló batɛ́mu é.

18. Étɛ́ lɛ́ a ka sixú kanbyɔ́ hwiɖée?

¹⁸ A ka ná bló batɛ́mu a? Hwiɖésúnɔ wɛ ná ná xósin nú nǔkanbyɔ́ énɛ́. É ɖo mɔ̌ có, nǔkanbyɔ́ élɔ́ sixú d’alɔ we: ‘Étɛ́wú un ka ɖo lɛjɛlɛjɛ dán wɛ dó batɛ́mu blóbló wú?’ (Mɛ. 8:36) Flín hwɛjijɔ atɔn e wú mǐ ɖɔ xó dó lɛ́ é. Nukɔntɔn ɔ, a yí wǎn nú nǔgbóɖiɖɔ kpó nǔjlɔ́jlɔ́wiwa kpó. Kanbyɔ́ hwiɖée ɖɔ: ‘Un ka ba ná mɔ hwenu e mɛ lɛ́ bǐ ná nɔ ɖɔ nǔgbó, bo nɔ lɛ́ wa nǔ jlɔ́jlɔ́ é a?’ Wegɔ́ ɔ, a yí wǎn nú Jezu Klísu. Kanbyɔ́ hwiɖée ɖɔ: ‘Un ka ba ɖɔ Vǐ Mawu tɔn ní nyí Axɔ́sú ce a? Un ka ba ná xwedó kpɔ́ndéwú tɔn a?’ Atɔngɔ́ e hú gǎn bǐ é wɛ nyí ɖɔ a yí wǎn nú Jexóva. Kanbyɔ́ hwiɖée ɖɔ, ‘Un ka ba ná sɔ́ Jexóva dó ɖó Mawu ce, bo ná sɛn ɛ dó hɛn xomɛ tɔn hun a?’ Ényí “ɛɛn” wɛ a ɖɔ nú nǔkanbyɔ́ énɛ́ lɛ́ ɔ, aniwú a ma ka ná bló batɛ́mu ǎ? Étɛ́wú a ka ɖo lɛjɛlɛjɛ dán wɛ?—Mɛ. 16:33.

19. Étɛ́wú a ma ka ɖó ná xo nǔ kpɔ́n dó batɛ́mu bíbló wú ǎ? Jlɛ̌ dó nǔɖé wú. (Jaan 4:34)

¹⁹ Ényí a ɖo nǔ xo kpɔ́n wɛ dó batɛ́mu blóbló wú hǔn, lin tamɛ dó nǔjlɛ́dónǔwú Jezu tɔn élɔ́ wú. (Xa Jaan 4:34.) Ð’ayi wú ɖɔ Jezu jlɛ́ jlǒ Tɔ́ tɔn tɔn wiwa dó nǔɖuɖu wú. Étɛ́wú? Nǔɖuɖu nɔ wa ɖagbe nú mǐ. Jezu tuun ɖɔ nǔ ɖěbǔ e Jexóva nɔ byɔ́ mǐ ɖɔ mǐ ní wa é nɔ wa ɖagbe nú mǐ. Jexóva nɔ ba ɖɔ mǐ ní wa nǔ ɖěbǔ e ná wa nǔ dó mǐ wú é ǎ. Batɛ́mu bíbló lɔ ka ɖo nǔ ɖěɖěe Jexóva ba ɖɔ mǐ ní wa lɛ́ é mɛ wɛ a? Ganjí. (Mɛ. 2:38) Énɛ́ wú ɔ, a sixú kú d’é jí ɖɔ tónúsise nú gbeɖiɖe e ɖɔ ɖɔ è ní bló batɛ́mu é ná hɛn le wá nú we. Ényí a ma ná dán lɛjɛlɛjɛ dó nǔɖuɖu ɖagbe hú gǎn ɖé ɖuɖu wú ǎ ɔ, étɛ́wú a ka ná dán lɛjɛlɛjɛ dó batɛ́mu bíbló wú?

20. Étɛ́ jí mǐ ka ná ɖɔ xó dó ɖo xóta e bɔ d’é wú é mɛ?

²⁰ Étɛ́wú mɛɖé lɛ́ ka nɔ ɖó nǎ nǎ nú batɛ́mu blóbló? Mɛ gěgé sixú ɖɔ: “Un ko ɖo gbesisɔmɛ ǎ.” Nǔ ɔ wɛ ka nyí ɖɔ gbeta e kɔn a ná wá, bo sɔ́ hwiɖée jó nú Jexóva lobo bló batɛ́mu é wɛ nyí gbeta tají hú gǎn e kɔn a ná wá é. Énɛ́ wú ɔ, é byɔ́ hwenu, tamɛ linlin kpó gǎndídó gěgé kpó cóbɔ a ná ɖo gbesisɔmɛ. Amɔ̌, ényí a jló tawun, bo ná bló batɛ́mu ɔ, étɛ́ a ka sixú wa din, bo ná dó sɔ́ nǔ nú hwiɖée? Mǐ ná mɔ xósin nǔkanbyɔ́ énɛ́ tɔn ɖo xóta e bɔ d’é wú é mɛ.