1-2. Ényí a ma ko ɖo gbesisɔmɛ bo ná bló batɛ́mu ǎ ɔ, étɛ́wú awakanmɛ ma ka ɖó ná kú we ǎ? (Kpɔ́n ɖiɖe e ɖo akpa ɔ jí é.)

 ÉNYÍ a ɖo biba wɛ bo ná bló batɛ́mu hǔn, nǔ ɖagbe ɖé gbé nya wɛ a ɖe nɛ́. A ka ko ɖo gbesisɔmɛ din bá bló batɛ́mu a? Ényí a lin ɖɔ émí ko ɖo gbesisɔmɛ bɔ mɛxó agun tɔn lɛ́ lɔ yí gbe hǔn, ma lɔn nú ali ɖěvo e ná hun nú we é ní yi tɛ we ó. Gbɛzán e nɔ jɛmɛ nú mɛ é ɖé ɖo te kpɔ́n we ɖo sinsɛnzɔ́ Jexóva tɔn mɛ.

² Amɔ̌, mɛɖé ɖɔ nú we ɖɔ a ɖó ná yi nukɔn hú mɔ̌ cóbó bló batɛ́mu wɛ a? Kabǐ hwiɖésúnɔ wɛ ɖ’ayi wú ɖɔ nǔ kpo nú émí. Ényí mɔ̌ hǔn, ma nú awakanmɛ kú we ó. Ényí a ná bo tlɛ nyí mɛ wínnyáwínnyá, alǒ mɛxó ɔ, a sixú yi nukɔn bo kpé nǔ tají énɛ́ e gbé nya wɛ a ɖe é wú.

3. Étɛ́ nya Etiopíinu ɖé ka kanbyɔ́ Filípu? Nǔkanbyɔ́ tɛ́ énɛ́ ka fɔ́n nyi te? (Mɛsɛ́dó 8:36, 38)

³ Xa Mɛsɛ́dó 8:36, 38. Axɔ́súzɔ́watɔ́ Etiopíinu ɖé kanbyɔ́ wɛnɖagbejlátɔ́ Filípu ɖɔ: “Étɛ́ ka gbɛ́ ɖɔ nyi ní ma bló batɛ́mu ó?” Nya Etiopíinu ɔ ba ná bló batɛ́mu, amɔ̌, é ka ko ɖo gbesisɔmɛ dóó bá ɖe afɔ tají énɛ́ a?

4. Nɛ̌ nya Etiopíinu ɔ ka xlɛ́ ɖɔ émí kán ɖ’é jí bo ná kpo ɖo nǔ kplɔ́n wɛ gbɔn?

⁴ Nya Etiopíinu ɔ, “Jeluzalɛ́mu wɛ é yi bo yi sɛn Mawu.” (Mɛ. 8:27) Énɛ́ wú ɔ, é cí ɖɔ é kún nyí Jwifu ó, é wá húzú nǔɖitɔ́ wɛ. É ɖo wɛn ɖɔ, é kplɔ́n nǔ dó Jexóva wú ɖo Nǔwlánwlán mímɛ́ Ebléegbe tɔn lɛ́ mɛ. É ɖo mɔ̌ có, é kpo ɖo biba wɛ vɛ́návɛ́ná bo ná kplɔ́n nǔ d’é jí. Nǔgbó ɔ, hwenu e Filípu xo go axɔ́súzɔ́watɔ́ énɛ́ ɖo ali jí é ɔ, étɛ́ wa wɛ é ka ɖe bɔ Filípu mɔ?  Gbeyíɖɔ Ezayíi sín wěma mlámlá xa wɛ é ɖe. (Mɛ. 8:28) Nǔgbó Biblu tɔn e gɔ́ngɔ́n lɛ́ é wɛ ɖo wěma énɛ́ mɛ. Axɔ́súzɔ́watɔ́ énɛ́ nɔ te dó nǔkplɔ́nmɛ nukɔn nukɔntɔn e ɖo Biblu mɛ lɛ́ é kléwún ɖé jí kpowun ǎ; é ba ná kpo ɖo nǔ kplɔ́n d’é jí wɛ.

5. Étɛ́ nya Etiopíinu ɔ ka sɔ́ nǔ e é kplɔ́n lɛ́ é dó wa?

⁵ Axɔ́súzɔ́watɔ́ nukúnɖéjí ɖé wɛ n’i, ɖo hɔnmɛ axɔ́si Etiopíi tɔn tɔn; é nɔ “kpé nukún dó axɔ́si ɔ sín dɔkun lɛ́ wú.” (Mɛ. 8:27) Énɛ́ wú ɔ, alɔnu tɔn ná ko nɔ ján tawun, ɖó azɔ̌ gěgé ɖo así tɔn. É ɖo mɔ̌ có, é nɔ ba hwenu bo nɔ sɛn Jexóva. É ka kpo nú nǔgbó ɔ kplɔ́nkplɔ́n kpowun ǎ; é wa nǔ sɔgbe xá nǔ e é kplɔ́n é. É nɔ zɔn ali sín Etiopíi bo nɔ yi káká Jeluzalɛ́mu bo nɔ yi sɛn Jexóva ɖo tɛ́npli mɛ. Tomɛyiyi énɛ́ ɖó ná ko nɔ byɔ́ hwenu gěgé kpó akwɛ́ gěgé kpó, amɔ̌, nya énɛ́ ba ná sɛn Jexóva, ényí mɔ̌ wiwa ná bo tlɛ byɔ́ nǔ ɖěbǔ ɖo así tɔn ɔ nɛ́.

6-7. Nɛ̌ wǎnyíyí e Etiopíinu ɔ ɖó nú Jexóva é ka kpo ɖo jijɛjí wɛ gbɔn?

⁶ Filípu d’alɔ nya Etiopíinu ɔ, bɔ é kplɔ́n nǔgbó yɔ̌yɔ́ tají ɖé lɛ́, nǔgbó énɛ́ lɛ́ ɖokpó wɛ nyí ɖɔ Jezu wɛ nyí Mɛsíya ɔ. (Mɛ. 8:34, 35) É ɖo wɛn ɖɔ nǔ e axɔ́súzɔ́watɔ́ énɛ́ se ɖɔ Jezu wa n’i é víví n’i tawun. Énɛ́ gúdo ɔ, étɛ́ é ka wa? É hɛn ɔ, é ná kpo ɖo Kosi e mɛ lɛ́ nɔ ɖó sísí ná é nyí wɛ. Amɔ̌, nǔ énɛ́ lɛ́ e é kplɔ́n é zɔ́n bɔ wǎnyíyí e é ɖó nú Jexóva kpó Vǐ tɔn kpó é jɛjí. Énɛ́ sísɛ́ ɛ bɔ é wá gbeta ɔ kɔn bo ná bló batɛ́mu, lobo húzú ahwanvú Jezu Klísu tɔn; gbeta tají ɖé kɔn wɛ nyí énɛ́ bɔ é wá. Mɔ e Filípu mɔ ɖɔ nya ɔ ɖo gbesisɔmɛ é zɔ́n bɔ é bló batɛ́mu n’i.

⁷ Ényí a xwedó kpɔ́ndéwú Etiopíinu énɛ́ tɔn ɔ, a sixú ɖo gbesisɔmɛ nú batɛ́mu. Hwi lɔ ná kpé wú bá ɖɔ kpó jiɖiɖe kpó ɖɔ: “Étɛ́ ka gbɛ́ ɖɔ nyi ní ma bló batɛ́mu ó?” Mǐ ní gbéjé lěe a sixú ɖe afɔ ɖokpó ɔ éɖɔhun gbɔn é kpɔ́n: É kpo ɖo nǔ kplɔ́n wɛ, nɔ wa nǔ sɔgbe xá nǔ e é kplɔ́n é, bɔ wǎnyíyí e é ɖó nú Mawu é lɛ́ ɖo jijɛjí wɛ.

8. Étɛ́ Jaan 17:3 ka ɖɔ ɖɔ a ɖó ná wa?

⁸ Xa Jaan 17:3. Xó énɛ́ lɛ́ e Jezu ɖɔ é wɛ ka d’alɔ we bɔ a wá gbeta ɔ kɔn bo ná kplɔ́n Biblu a? Xó énɛ́ lɛ́ wɛ zɔ́n bɔ mǐ mɛ gěgé jɛ Biblu kplɔ́n jí. Amɔ̌, xó énɛ́ lɛ́ e Jezu ɖɔ é lɛ́ ɖo xlɛ́xlɛ́ wɛ ɖɔ mǐ ɖó ná kpo ɖo nǔ kplɔ́n wɛ wɛ a? Ganjí. Mǐ ná gɔn ‘nǔ kplɔ́n dó Mawu nǔgbó ɖokpó ɔ’ wú gbeɖé ǎ. (Nǔt. 3:11, nwt) Mǐ ná kpo ɖo nǔ kplɔ́n wɛ tɛgbɛ. Lě do mǐ kplɔ́n nǔ sɔ é ɔ, mɔ̌ do wɛ mǐ kpó Jexóva kpó ná vɛ́ sɔ.—Ðɛh. 73:28.

9. Ényí mǐ kplɔ́n nǔgbó nukɔn nukɔntɔn e ɖo Biblu mɛ lɛ́ é gúdo ɔ, étɛ́ mǐ ka ɖó ná wa?

⁹ Ényí mǐ jɛ nǔ kplɔ́n dó Jexóva wú jí ɔ, nǔkplɔ́nmɛ bǐbɛ́mɛ tɔn e ɖo Biblu mɛ lɛ́ é jɛ́n mǐ  nɔ kplɔ́n. Nǔkplɔ́nmɛ bǐbɛ́mɛ tɔn énɛ́ lɛ́ wɛ mɛsɛ́dó Pɔ́lu ylɔ́ ɖɔ “nǔ nukɔn nukɔntɔn lɛ́,” ɖo wěma e é sɛ́ dó Eblée lɛ́ é mɛ. Ðiɖɔ wɛ é ɖe ɖɔ “nǔ nukɔn nukɔntɔn” énɛ́ lɛ́ kún ɖo tají ó ǎ; é nyɔ́ wa ɔ, anɔ̌sin e vǐ kpɛví lɛ́ nɔ nu é wú wɛ é sɔ́ nǔkplɔ́nmɛ énɛ́ lɛ́ jlɛ́ dó. (Ebl. 5:12; 6:1) Énɛ́ wú wɛ é dó wǔsyɛ́n lanmɛ nú klisánwun lɛ́ bǐ ɖɔ yě ní kplɔ́n nǔ zɛ nǔ nukɔn nukɔntɔn lɛ́ wú, bo kplɔ́n nǔgbó e gɔ́ngɔ́n ɖo Xó Mawu tɔn mɛ lɛ́ é. Nǔkplɔ́nmɛ Biblu tɔn e gɔ́ngɔ́n lɛ́ é kplɔ́nkplɔ́n ka nɔ sɔ́ akpakpa we a? A ka ɖo gbesisɔmɛ bo ná kpo ɖo susu d’é jí wɛ, énɛ́ wɛ nyí ɖɔ bo ná kpo ɖo nǔ kplɔ́n dó Jexóva kpó linlin tɔn lɛ́ kpó wú wɛ a?

10. Étɛ́wú nǔ kplɔ́nkplɔ́n ka nɔ vɛ́ wǔ nú mɛɖé lɛ́?

¹⁰ Amɔ̌, mǐ mɛ gěgé tíin bɔ nǔ kplɔ́nkplɔ́n nɔ vɛ́ wǔ nú mǐ. Hwɛ ka lo? A ka kplɔ́n lěe è nɔ xa nǔ ganjí, bo nɔ lɛ́ kplɔ́n nǔ ganjí gbɔn é ɖo wěmaxɔmɛ a? A ka nɔ ɖu vǐví nǔ kplɔ́nkplɔ́n tɔn, bo nɔ lɛ́ mɔ nǔ ɖagbe lɛ́ ɖ’é mɛ a? Alǒ a nɔ mɔ ɖɔ nǔ kplɔ́nkplɔ́n kún nyí alɔ émítɔn xwé nú ɖé ó wɛ a? Ényí a nɔ mɔ ɖɔ nǔ kplɔ́nkplɔ́n kún nyí alɔ émítɔn xwé nú ɖé ó hǔn, tuun ɖɔ é kún nyí émíɖokpónɔ wɛ nǔ nɔ cí mɔ̌ ná ó. É ná bo tlɛ nyí mɔ̌ wɛ é nyí ɔ, Jexóva sixú d’alɔ we. Mɛ maɖóblɔ̌ wɛ n’i, bo lɛ́ nyí nǔkplɔ́nmɛtɔ́ e nyɔ́ bɔ nǔ bǐ vɔ ɖ’é wú é.

11. Nɛ̌ Jexóva ka nɔ ɖe xlɛ́ ɖɔ émí wɛ nyí “Mɛ̌si Ðaxó” ɔ gbɔn?

¹¹ Jexóva ylɔ́ éɖée ɖɔ “Mɛ̌si Ðaxó towe.” (Eza. 30:20, 21, nwt) Mɛ̌si e nɔ ɖó suúlu, nɔ nyɔ́ xomɛ, bo nɔ lɛ́ mɔ nukúnnú jɛ ninɔmɛ mɛtɔn mɛ é wɛ n’i. Jijɔ ɖagbe e azɔ̌mɛví tɔn lɛ́ ɖó é wú wɛ é nɔ ɖ’ayi. (Ðɛh. 130:3) Gɔ́ ná ɔ, é nɔ ɖó nukún gbeɖé ɖɔ mǐ ní wa nǔ zɛ nǔwúkpíkpé mǐtɔn wú ǎ. Flín ɖɔ é bló tamɛfɔn towe bɔ é nyí nǔníná jí wǔ ɖé. (Ðɛh. 139:14) Ðo jɔwámɔ linu ɔ, mǐ nɔ ba ná kplɔ́n nǔ. Gbɛɖótɔ́ mǐtɔn ba ɖɔ mǐ ní nɔ ɖo nǔ kplɔ́n wɛ tɛgbɛ, bo nɔ ɖu vǐví nǔ e kplɔ́n wɛ mǐ ɖe é tɔn. Énɛ́ wú ɔ, nǔnywɛ́nú wɛ é ná nyí ɖɔ mǐ ní ɖó “jlǒ syɛ́nsyɛ́n” nú nǔgbó e ɖo Biblu mɛ lɛ́ é din. (1 Pi. 2:2) Nya nǔ e wú a sixú kpé lɛ́ é gbé, bo nɔ xa Biblu lobo nɔ lɛ́ kplɔ́n ɖo gbesisɔmɛ. (Joz. 1:8) Kpó alɔdó Jexóva tɔn kpó ɔ, a ná kplɔ́n bo ná nɔ ɖu vǐví nǔ e a nɔ xa dó Jexóva wú lɛ́ é tɔn hú gǎn, lobo ná nɔ lɛ́ kplɔ́n nǔ dó wǔ tɔn hú gǎn.

12. Étɛ́wú mǐ ka ɖó ná nɔ kplɔ́n nǔ dó gbɛzán Jezu tɔn kpó sinsɛnzɔ́ tɔn kpó wú?

¹² Nɔ zán hwenu dó lin tamɛ dó gbɛzán Jezu tɔn kpó sinsɛnzɔ́ tɔn kpó jí hwɛhwɛ. Ényí mǐ ba ná sɛn Jexóva ɔ, é ɖo tají ɖɔ mǐ ní nɔ sɔ́ afɔ dó afɔdo Jezu tɔn lɛ́ mɛ tlélé, tají ɔ, ɖo hwenu vɛ́ wǔ élɔ́ lɛ́ mɛ. (1 Pi. 2:21) Jezu ɖɔ xó dó wǔvɛ́ e ahwanvú tɔn lɛ́ ná mɔ lɛ́ é wú nyi wɛn. (Luk. 14:27, 28) Amɔ̌, é kú d’é jí ɖɔ ahwanvú émítɔn nǔgbó lɛ́ ná nɔ gbejí nú Mawu émíɖɔhun. (Jaan 16:33) Kplɔ́n nǔ dó gǒflɛ́mɛ e kúnkplá gbɛzán Jezu tɔn lɛ́ é wú, bo wá gbeta ɔ kɔn bá zán gbɛ éɖɔhun ayǐhɔ́ngbe ayǐhɔ́ngbe.

13. Étɛ́ a ka ɖó ná ɖo byɔ̌byɔ́ Jexóva wɛ? Étɛ́wú?

¹³ Nukúnnúmɔjɛnǔmɛ kɛ́ɖɛ́ ko kpé ǎ. Nǔ e wú a ɖó hudó nukúnnúmɔjɛnǔmɛ tɔn é wɛ nyí ɖɔ é sixú d’alɔ we bɔ a ná kplɔ́n nǔ gěgé dó Jexóva wú, bo lɛ́ tɛ́n kpɔ́n bo ɖó jijɔ ɖé lɛ́. Ði kpɔ́ndéwú ɔ, é ná zɔ́n bɔ a ná yí wǎn n’i, bo lɛ́ ɖi nǔ n’i. (1 Kɔ. 8:1-3) Ée a ná ɖo nǔ kplɔ́n wɛ é ɔ, kpo ɖo byɔ̌byɔ́ Jexóva wɛ ɖɔ é ní dó nǔɖiɖi nǔɖiɖi jí nú émí. (Luk. 17:5) É nɔ ná xósin nú ɖɛ mɔ̌hun lɛ́ kpó xomɛhunhun kpó. Nǔɖiɖi adodwé e jínjɔ́n nukúnnúmɔjɛnǔmɛ e sɔgbe dó Mawu mǐtɔn wú é jí é ná d’alɔ we bɔ a ná yi nukɔn.—Ja. 2:26.

14. Nɛ̌ mɛsɛ́dó Piyɛ́ɛ ka tɛ ɖɛ̌ jí ɖɔ é ɖo tají ɖɔ mǐ ní nɔ zán nǔ e mǐ kplɔ́n lɛ́ é gbɔn? (Lɛ̌ kpɔ́n ɖiɖe ɔ.)

¹⁴ Mɛsɛ́dó Piyɛ́ɛ tɛ ɖɛ̌ nǔ e wú é ɖo tají ɖɔ ahwanvú Klísu tɔn lɛ́ ní kpo ɖo nǔ e yě kplɔ́n lɛ́ é zán wɛ é jí. É kɛ nu dó tan e ɖo Biblu mɛ  bo ɖɔ xó dó Nɔwée wú é wú. Jexóva ɖɔ nú Nɔwée ɖɔ émí ɖo sin ná zán dó sú kún dó nú mɛ nyanya e nɔ gbɛ hwe énɛ́ nu lɛ́ é wɛ. Tuun e Nɔwée tuun kpowun ɖɔ sin ná vɔ gbɛ ɔ é ko kpé bónú é kpó xwédo tɔn kpó ná gán ǎ. Ð’ayi wú ɖɔ táan e jɛ nukɔn nú Sinvɔgbɛ ɔ é, énɛ́ wɛ nyí “hwenu e è ɖo tɔjíhún” ɔ gbá wɛ é dó gesí wɛ Piyɛ́ɛ ɖe. (1 Pi. 3:20) È ná ɖɔ ɔ, Nɔwée kpó xwédo tɔn kpó wa nǔ e Mawu zɔ́n yě é, bo gbá tɔjíhún ɔ; gbǎ hoyahoya ɖé wɛ. (Ebl. 11:7) Piyɛ́ɛ wá jlɛ́ nǔ e Nɔwée wa é dó batɛ́mu bíbló wú, bo ɖɔ: “Batɛ́mu, éé sɔgbe xá énɛ́ é lɛ́ ɖo mi lɔ hwlɛ́n wɛ din.” (1 Pi. 3:21) Mɔ̌ ɖokpó ɔ, mǐ sixú jlɛ́ gǎn e dó wɛ a ɖe din bá jɛxá bá bló batɛ́mu é dó azɔ̌ e Nɔwée kpó xwédo tɔn kpó wa nú xwe mɔ̌kpán dó bló tɔjíhún ɔ é wú. Étɛ́ a ka ɖó ná wa bá ɖo gbesisɔmɛ bá bló batɛ́mu?

15. Étɛ́ hwɛ mɛtɔn ní vɛ́ nú mɛ nǔgbó nǔgbó ka nyí?

¹⁵ Nǔ nukɔn nukɔntɔn e mǐ ɖó ná wa lɛ́ é ɖokpó wɛ nyí ɖɔ hwɛ mǐtɔn lɛ́ ní vɛ́ nú mǐ dó nǔjɔnǔ mɛ. (Mɛ. 2:37, 38) Ényí hwɛ mǐtɔn lɛ́ vɛ́ nú mǐ dó nǔjɔnǔ mɛ ɔ, mǐ ɖó ná bló hǔzúhúzú lɛ́ dó nǔjɔnǔ mɛ. A ka ko jó nǔwalɔ e nɔ vɛ́ Jexóva wú lɛ́ é bǐ dó, ɖi gbɛ blíblí zínzán, azɔ nunu, xó gblégblé ɖiɖɔ, alǒ nǔyáɖɔnúmɛ a? (1 Kɔ. 6:9, 10; 2 Kɔ. 7:1; Efɛ́. 4:29) Ényí a ma ko wa mɔ̌ ǎ hǔn, tɛ́n kpɔ́n bo kpo ɖo hǔzúhúzú lɛ́ bló wɛ. Ðɔ xó xá mɛ e nɔ kplɔ́n Biblu xá we é, alǒ byɔ̌ mɛxó agun tɔn lɛ́ ɖɔ yě ní d’alɔ we, bo lɛ́ ɖe wě xá we. Ényí mɛ wínnyáwínnyá wɛ nú we bɔ a kpo ɖo mɛjitɔ́ towe lɛ́ kpá hǔn, kpo ɖo byɔ̌byɔ́ yě wɛ ɖɔ yě ní d’alɔ émí bónú émí ná jó nǔwalɔ nyanya ɖěbǔ e sixú zɔ́n bɔ émí ná gɔn batɛ́mu bló é dó.

16. Ényí mǐ ba ná nɔ sɛn Jexóva ɖo gbesisɔmɛ ɔ, étɛ́ lɛ́ mǐ ka ɖó ná nɔ wa?

¹⁶ É lɛ́ ɖo tají ɖɔ è ní kpo ɖo nǔ e mǐ nɔ wa dó sɛn Mawu lɛ́ é wa wɛ. Kplé lɛ́ yiyi kpó alɔ ɖíɖó ɖo yě mɛ kpó ɖo nǔ énɛ́ lɛ́ mɛ. (Ebl. 10:24, 25) Gɔ́ ná ɔ, ényí a ko jɛxá bo ná nɔ jlá wɛn ɖagbe ɔ hǔn, nɔ jlá ɖo gbesisɔmɛ. Lě do a nɔ jlá wɛn ɔ sɔ é ɔ, mɔ̌ do wɛ a ná ɖu vǐví tɔn sɔ. (2 Tim. 4:5) Ényí mɛ wínnyáwínnyá wɛ nú we bɔ a kpo ɖo mɛjitɔ́ towe lɛ́ kpá hǔn, nɔ kanbyɔ́ hwiɖée ɖɔ: ‘É ka byɔ́ ɖɔ mɛjitɔ́ ce lɛ́ ní nɔ flín mì ɖɔ un ɖó ná yi kplé lɛ́, alǒ yi kúnnuɖegbé wɛ a? Kabǐ nyiɖésúnɔ wɛ nɔ sí te tɔn a?’ Ényí hwiɖésúnɔ nɔ ɖe afɔ mɔ̌hun lɛ́ hǔn, xlɛ́xlɛ́ wɛ a ɖe ɖɔ émí ɖó nǔɖiɖi nú Jexóva Mawu, yí wǎn n’i bɔ nǔ e é nɔ wa nú we lɛ́ é nɔ lɛ́ su  nukún towe mɛ nɛ́. “Gbejí nɔ nú Mawu sín nǔ” wɛ nǔ énɛ́ lɛ́ nyí bɔ a nɔ ná Jexóva. (2 Pi. 3:11; Ebl. 13:15) Nǔ e mǐ ná Mawu kpó jlǒ kpó bɔ é ma nyí kɔ wɛ è gbídí nú mǐ, bɔ mǐ ná ǎ é bǐ wɛ nɔ nyɔ́ nukún tɔn mɛ. (Sɔ́ jlɛ́ dó 2 Kɔlɛ́ntinu lɛ́ 9:7 wú.) Mǐ nɔ ɖe afɔ mɔ̌hun lɛ́, ɖó nǔ ɖagbe hú gǎn e mǐ ɖó lɛ́ é níná Jexóva nɔ dó xomɛhunhun nú mǐ wútu.

17-18. Jijɔ tají tɛ́ ka ná d’alɔ we bɔ a ná yi nukɔn ba bló batɛ́mu? Étɛ́wú? (Nǔnywɛ́xó 3:3-6)

¹⁷ Ée a ná ɖo nukɔn yi wɛ bá jɛxá bá bló batɛ́mu é ɔ, a ná mɔ tagba ɖé lɛ́. Mɛɖé lɛ́ sixú ko we, ɖó nǔ e a ɖi nǔ ná din lɛ́ é wútu; yě tlɛ sixú klán gbe xá we, alǒ dó ya nú we. (2 Tim. 3:12) Bóyá a ɖo gǎn dó wɛ syɛ́nsyɛ́n bá ɖó nǔ e a tuun ɖɔ é kún sɔgbe ó é ɖé wiwa te, amɔ̌, hweɖélɛ́nu ɔ, a sixú nɔ lɛ́ wa nǔ ɖokpó ɔ nyi do. Alǒ a sixú nɔ mɔ ɖɔ suúluɖíɖó hwe dó émí, bɔ akpɔ nɔ lɛ́ ɖó we, ɖó nǔ e gbé nya wɛ a ɖe é ko yá we ɖěbǔ ǎ wútu. Étɛ́ ka ná d’alɔ we bɔ a ná dɛ? Wǎn yí nú Jexóva wɛ.

¹⁸ Wǎn e a yí nú Jexóva é ɔ, jijɔ ɖaaɖagbe ɖé wɛ; é wɛ nyí jijɔ ɖagbe hú gǎn e a ɖó é. (Xa Nǔnywɛ́xó 3:3-6.) Wǎnyíyí adodwé e a ɖó nú Mawu é sixú d’alɔ we bɔ a ná ɖí xwi xá gbɛ mɛ tagba lɛ́ bɔ é ná kpa we. Hwɛhwɛ wɛ Biblu nɔ ɖɔ xó dó xomɛ e wǎnyíyí nɔ sísɛ́ Jexóva bɔ é nɔ nyɔ́ dó mɛsɛntɔ́ tɔn lɛ́ wú é wú. Xomɛ e wǎnyíyí nɔ sísɛ́ Jexóva bɔ é nɔ nyɔ́ dó mɛsɛntɔ́ tɔn lɛ́ wú é sín tínmɛ wɛ nyí ɖɔ é kún ná jó mɛsɛntɔ́ tɔn lɛ́ dó gbeɖé ó, é kún ka ná gɔn wǎn yí nú yě gbeɖé ó. (Ðɛh. 100:5) Akpajlɛ́ Mawu tɔn mɛ wɛ è dá we ɖó. (Bǐb. 1:26) Nɛ̌ a ka sixú ɖe wǎnyíyí mɔ̌hun xlɛ́ gbɔn?

19. Nɛ̌ a ka sixú xlɛ́ Jexóva d’é jí ɖɔ nǔ e é nɔ wa nú we lɛ́ é bǐ nɔ su nukún towe mɛ tawun gbɔn? (Galátinu lɛ́ 2:20)

¹⁹ Nǔ e è wa nú we lɛ́ é ní nɔ su nukún towe mɛ. (1 Tɛ. 5:18) Nɔ kanbyɔ́ hwiɖée gbe bǐ gbe ɖɔ: ‘Nɛ̌ Jexóva ka xlɛ́ ɖɔ émí yí wǎn nú mì gbɔn?’ Énɛ́ gúdo hǔn, nɔ xo ɖɛ sɛ́dó Jexóva dó dó kú n’i, bo nɔ slɛ́ nǔ tawun tawun e é wa nú we lɛ́ é. Tuun ɖɔ nǔ énɛ́ lɛ́ e Jexóva wa nú hwiɖésúnɔ mɛtún ɔ lɛ́ é ɔ, wǎn e é yí nú we é wú wɛ, lěe mɛsɛ́dó Pɔ́lu lɔ wá ɖ’ayi énɛ́ wú gbɔn é. (Xa Galátinu lɛ́ 2:20.) Nɔ kanbyɔ́ hwiɖée ɖɔ: ‘Nyi lɔ ka ba ná xlɛ́ ɛ ɖɔ un yí wǎn n’i a?’ Wǎn yí nú Jexóva ná d’alɔ we bɔ a ná nɔ gbí dɔn ɖo mɛtɛ́nkpɔ́n lɛ́ nukɔn, bo ná nɔ lɛ́ dɛ ɖo tagba lɛ́ nu, b’ɛ ná kpa we. É ná sísɛ́ we bɔ a ná nɔ sɛn Jexóva ɖo gbesisɔmɛ dó xlɛ́ éyɛ́ mɛ e nyí Tɔ́ towe é gbe bǐ gbe ɖɔ a yí wǎn n’i.

20. Étɛ́ a ka ɖó ná wa bo ná sɔ́ gbɛzán towe jó nú Jexóva? Nɛ̌ gbeta énɛ́ kɔn wíwá ka ɖo tají sɔ?

²⁰ Hwenu ɖo yiyi wɛ ɔ, wǎnyíyí e a ɖó nú Jexóva é ná sísɛ́ we bɔ a ná xo ɖɛ bǔnɔ ɖé sɛ́dó è. A ná sɔ́ hwiɖée jó nú Mawu. Flín ɖɔ ényí a sɔ́ hwiɖée jó nú Jexóva ɔ, ali bǔnɔ élɔ́ ná hun nú we: a sixú húzú étɔn káká sɔ́yi. Ényí a sɔ́ gbɛzán towe jó nú Jexóva hǔn, akpá wɛ a dó bo ná sɛn ɛ, nú hwenu lɛ́ nyɔ́ kpó yě gbɔ kpó ɔ nɛ́. Azɔn ɖokpó géé wɛ a ná dó akpá énɛ́. Ɛɛn, mɛɖée zízé jó nú Jexóva ɔ, gbeta tají ɖé wɛ. Amɔ̌, lin tamɛ dó nǔ élɔ́ jí: A ná wá gbeta gěgé kɔn ɖo gbɛzán towe mɛ bɔ ɖé lɛ́ ná nyɔ́ tawun, amɔ̌, ɖě ná nyɔ́ sɔ zě e a zé gbɛzán towe jó nú Jexóva é gbeɖé ǎ. (Ðɛh. 50:14) Satáan ná tɛ́n kpɔ́n bo ná vɔ́ da nú wǎnyíyí e a ɖó nú Tɔ́ towe é, lobo ná ɖo nukún ɖó wɛ ɖɔ a ná sɔ́ gbejíninɔ towe sa. Ma lɔn nú Satáan ɖu ɖ’é jí gbeɖé ó. (Jɔb. 27:5, nwt) Wǎnyíyí ɖaxó e a ɖó nú Jexóva é ná d’alɔ we bɔ a ná ɖe akpá e a dó n’i ɖɔ émí ná sɛn ɛ káká sɔ́yi é, bo ná lɛ́ vɛ́ kpó Tɔ́ towe jǐxwé tɔn ɔ kpó titewungbe tɔn.

21. Étɛ́wú mǐ ka sixú ɖɔ ɖɔ batɛ́mu kún nyí vivɔnu nǔ lɛ́ tɔn ó, loɔ, bǐbɛ́mɛ nǔ lɛ́ tɔn wɛ?

²¹ Ényí a sɔ́ hwiɖée jó nú Jexóva gúdo hǔn, ɖɔ xó xá mɛxó agun tɔn towe lɛ́ dó afɔ tají e bɔ d’é wú é ɖiɖe wú. Amɔ̌, nɔ flín hwebǐnu ɖɔ émí kún ɖó ná glí hǔn ɖó batɛ́mu jí ó; nɔ flín ɖɔ bǐbɛ́ wɛ jɛ́n nǔ lɛ́ ɖe nɛ́. Bǐbɛ́mɛ ali e hun nú we bɔ a ná sɛn Jexóva káká sɔ́yi é tɔn wɛ. Énɛ́ wú ɔ, din wɛ nyí hwenu ɔ, bɔ a ná bló bɔ wǎn e a yí nú Tɔ́ towe é ná lí dǒ. Nya nǔ e ná zɔ́n bɔ wǎnyíyí énɛ́ ná fɔ́n bo ɖo jijɛjí wɛ ayǐhɔ́ngbe ayǐhɔ́ngbe lɛ́ é gbé. Énɛ́ ná sísɛ́ we bɔ a ná bló batɛ́mu. Azǎn manáwɔn ɖé wɛ azǎn énɛ́ ná nyí. Amɔ̌, bǐbɛ́ wɛ jɛ́n nǔ lɛ́ ɖe nɛ́. Ðɛ mǐtɔn wɛ nyí ɖɔ wǎnyíyí e a ɖó nú Jexóva kpó Vǐ tɔn kpó é ní fɔ́n bo ɖo jijɛjí wɛ tɛgbɛ!