È jì mì ɖò 1983. Hwenu e un ɖò kpɛví é ɔ, un ɖò ganji, amɔ̌, hwenu e un ɖó xwè wǒ é ɔ, un jɛ wuvɛ̌ syɛnsyɛn sè jí ɖò lanmɛ. Xwè we mɔ̌ gudo ɔ, un fɔ́n zǎnzǎn gbè ɖokpo bo sɔ́ sixu dánwǔ ǎ. Un dó gǎn e wu un kpé é bǐ bonu afɔ ce na dánwǔ có, é ka kpa mì ǎ. Sín gbè nɛ gbè ɔ, un sɔ́ ɖi zɔnlin kpɔ́n ǎ. Azɔn ce zɔ́n bɔ un sɔ́ sixu sù ǎ. Kaka jɛ égbé ɔ, un cí vǐ kpɛví ɖé ɖɔhun.

Ee un bɛ́ azɔn b’ɛ na ɖó sun yɔywɛ ɖé gudo é ɔ, è glɔ́n mì dó xwégbe, finɛ wɛ un ɖè bɔ kúnnuɖetɔ́ Jehovah tɔn we wá ba mì kpɔ́n. Enyi jonɔ lɛ wá ɔ, hwɛhwɛ wɛ un nɔ hwlá nyiɖée, amɔ̌, gbè nɛ gbè ɔ, un jó nyɔnu we enɛ lɛ dó, bɔ ye ɖɔ xó e hɛn ye wá é nú mì. Ee ye ɖɔ xó dó Palaɖisi wu é ɔ, un flín ɖɔ un sè xó mɔ̌hun hwenu e un ɖò xwè atɔ́ɔ́n ɖó wɛ é. Hwenɛnu ɔ, mɛsɛ́dó e nɔ nyí Jethro, bo nɔ nɔ Suriname é nɔ wá gletoxo mǐtɔn mɛ, bo nɔ kplɔ́n Biblu xá tɔ́ ce. Jethro nyɔ́ xomɛ dó wǔ yè tawun. Un yí wǎn n’i ɖesu. Gɔ́ na ɔ, gǎn’páa ce kpo gǎn’máa ce kpo kplá mì yì kplé e Kúnnuɖetɔ́ lɛ bló ɖò gletoxo mǐtɔn mɛ lɛ é ɖé lɛ tɛnmɛ. Enɛ wu ɔ, ee Florence e ɖò nɔví nyɔnu e wá ba mì kpɔ́n gbè nɛ gbè lɛ é mɛ é kanbyɔ mì ɖɔ un jló na kplɔ́n nǔ d’eji à jí é ɔ, un yí gbè.

Florence kpo asú tɔn Justus kpo lɛkɔ wá gɔ̌n ce, bo jɛ Biblu kplɔ́n xá mì jí. Ee ye ɖ’ayi wu ɖɔ un kún tuùn nǔ xà ó é ɔ, ye kplɔ́n nǔ xixa mì. Táan ɖé gudo ɔ, un kpéwú bo nɔ xà nǔ nyiɖokponɔ. Gbè ɖokpo ɔ, asú kpo asì kpo ɔ ɖɔ nú mì ɖɔ è sɛ́ ye dó Suriname bonu ye na yì ɖɔ Mawuxó. É blawǔ ɖɔ mɛɖé kún ɖò Orealla bo sixu gbɛkan dó Biblu kplɔnkplɔn ɔ nu xá mì ó. Amɔ̌, é víví nú mì ɖɔ Jehovah kún wɔn mì ó.

Táan kpɛɖé gudo ɔ, gbexosin-alijitɔ́ e nɔ nyí Floyd é wá Orealla, bɔ mǐ xò gò mǐɖée hwenu e é ɖò Mawuxó ɖɔ wɛ sín hɔn ɖé kɔn jɛ hɔn ɖé kɔn é. Hwenu e é ɖɔ Biblu kplɔnkplɔn xó nú mì é ɔ, un ko nǔ dó nu kpá. É kanbyɔ mì ɖɔ: “Tɛwu a ka ɖò nǔ ko wɛ?” Un ɖɔ n’i ɖɔ un ko kplɔ́n alɔnuwema Etɛwɛ Mawu Byɔ Ðò Mǐ Sí? bo ko bɛ́ wema Oyọnẹn He Nọ Planmẹ Sọyi Ogbẹ̀ Madopodo Mẹ. * Un tinmɛ nǔ e wu Biblu kplɔnkplɔn ɔ ɖó te é n’i. Floyd fó wema Oyọnẹn e un ma ko fó ǎ é xá mì, amɔ̌, è lɛ́ sɛ́ éɖesu dó fí ɖevo. Dìn ɔ, mɛ e na kplɔ́n Biblu xá mì é ko lɛ́ hán.

 Amɔ̌, ɖò 2004 ɔ, è sɛ́ Granville kpo Joshua kpo e nyí gbexosin-alijitɔ́ titewungbe lɛ é dó Orealla. Ye ɖò kúnnu ɖè wɛ sín hɔn ɖé kɔn jɛ hɔn ɖé kɔn, bo wá xwé ce gbè. Ee ye kanbyɔ mì ɖɔ un jló na kplɔ́n Biblu à jí é ɔ, un ko nǔ dó nu kpá. Un byɔ ye ɖɔ ye ni kplɔ́n wema Oyọnẹn xá mì sín bǐbɛ̌mɛ. Un jló na kpɔ́n ɖɔ ye ka na kplɔ́n nǔ ɖokpo ɔ mì mɛ̌si ce xóxó lɛ ɖɔhun à jí. Granville ɖɔ nú mì ɖɔ è ko ɖò kplé lɛ bló ɖò gletoxo ɔ mɛ wɛ. Un sɔ́ sɛ̀ tɛn sín xwé ce gbè sín xwè na yì wǒ ɖíe ǎ có, un ka jló na yì. Enɛ wu ɔ, Granville sɔ́ mì dó afɔtɔ́nɔ lɛ sín kɛkɛví ɖé mɛ, bo sísɛ́ kaka yì Kpléxɔ Axɔ́suɖuto ɔ tɔn mɛ.

Nukɔnmɛ ɔ, Granville dó wusyɛn lanmɛ nú mì ɖɔ nyi ni na nyikɔ ɖò Wemaxɔmɛ Azɔ̌ Yɛhwexɔ́suɖuto ɔ tɔn. É ɖɔ: “A kú sé wɛ nyí ɖɔ a kú ɖɛ̌ ǎ. Gbè ɖokpo ɔ, a na wá xwlé xóɖiɖɔ nú mɛ bǐ mɛ. Kúdeji ɖɔ nǔ na wá nyí mɔ̌.” Xógbe wusyɛn dó lanmɛ nú mɛ tɔn enɛ lɛ vɔ́ jiɖe na mì.

Un jɛ alɔ ɖó ɖò wɛnɖagbejijlazɔ́ ɔ mɛ jí xá Granville. Amɔ̌, ali e ɖò gletoxo ɔ mɛ lɛ é vɛ́ gbɔn tawun nú afɔtɔ́nɔ lɛ sín kɛkɛví ce. Enɛ wu ɔ, un ɖɔ nú Granville ɖɔ ni sɔ́ mì dó kɛkɛví (brouette) mɛ bo sísɛ́. Tuto enɛ w’azɔ̌ tawun. Ðò avril 2005 ɔ, un bló baptɛm. Enɛ gudo zaan ɔ, nɔví sunnu lɛ kplɔ́n azɔ̌ mì bɔ un nɔ kpé nukún dó wema lɛ kpo macinu e nɔ zé gbè yì aga é kpo wu ɖò Kpléxɔ Axɔ́suɖuto ɔ tɔn mɛ.

É blawǔ ɖɔ ɖò 2007 ɔ, tɔ́ ce j’ayǐ sín tɔjihun ɖé mɛ, bo kú. Ahwi xò xwédo mǐtɔn. Granville xoɖɛ xá mǐ, bo lɛ́ má wemafɔ Biblu tɔn e dó gbɔ nú mɛ lɛ é xá mǐ. Xwè we gudo ɔ, awě ɖevo lɛ́ xò mǐ. Tɔjihun e mɛ Granville ɖè é syɔ, bɔ é kú.

Mɛxo agun tɔn, alǒ devízɔ́watɔ́ sinsɛnzɔ́wiwa tɔn ɖě sɔ́ ɖò agun mǐtɔn kpɛví e ɖò aluwɛ mɛ é mɛ ǎ. Kú e Granville kú é vɛ́ nú mì tawun ɖó xɔ́ntɔn vívɛ́ ce ɖé wɛ é nyí. É d’alɔ mì hwebǐnu, bɔ un kpé nukún dó hudo ce gbigbɔ tɔn kpo agbaza tɔn lɛ kpo wu. Ðò kplé e bɔ dó kú tɔn wu é hwenu ɔ, è ɖè azɔ̌ nú mì ɖɔ nyi ni xà akpáxwé lɛ ɖò Atɔxwɛ Kplɔnkplɔn hwenu. Un kpéwú bo xà akpáxwé we nukɔntɔn lɛ, amɔ̌, enɛ gudo ɔ, un jɛ avǐ ya jí, bɔ ɖasin jɛ wiwa yì jí, bo gbɛ́ gbigbɔ. Un ɖó na jɛte sín atáa ɔ jí.

Hwenu e nɔví sunnu lɛ nɔ gosin agun ɖevo lɛ mɛ, bo nɔ wá d’alɔ mǐ ɖò Orealla é ɔ, un jɛ nyiɖée mɛ mɔ jí. Gɔ́ na ɔ, alaxɔ sɛ́ Kojo e nyí gbexosin-alijitɔ́ titewungbe ɖé é dó mǐ. É víví nú mì ɖɔ nɔ ce kpo nɔví sunnu ce kpɛví ɖokpo kpo jɛ nǔ kplɔ́n jí, bo wá bló baptɛm. Enɛ gudo ɔ, ɖò mars 2015 ɔ, è jɔwǔ mì bɔ un nyí devízɔ́watɔ́ sinsɛnzɔ́wiwa tɔn ɖé. É na bló táan ɖé gudo é ɔ, un xwlé xóɖiɖɔ nú mɛ bǐ ce nukɔntɔn ɔ agun ɔ. Gbè nɛ gbè ɔ, un flín xó e Granville ɖɔ nú mì xwè ɖé lɛ ɖíe é, é wɛ nyí: “Gbè ɖokpo ɔ, a na wá xwlé xóɖiɖɔ nú mɛ bǐ mɛ. Kúdeji ɖɔ nǔ na wá nyí mɔ̌.”

Gbɔn tuto Televiziɔn JW^® jí tɔn lɛ gblamɛ ɔ, un nɔ mɔ nɔví ɖěɖee ɖò ninɔmɛ ce ɖɔhun mɛ lɛ é. Ye ɖó wɔ̌n ɖò wǔ có, ye ka nɔ kpéwú bo nɔ wà nǔ gegě, lobo nɔ ɖ’awǎjijɛ. Nyi lɔmɔ̌ sixu kpò ɖò nǔɖe lɛ wà wɛ. Un jló na na nǔ ɖebǔ e wu un kpé é Jehovah, enɛ wu ɔ, un bɛ́ gbexosin-alijitɔ́zɔ́. Ðò septembre 2019 ɔ, un sè wɛn maɖónukún ɖé. Ðò sun enɛ mɛ ɔ, un sè ɖɔ è jɔwǔ mì, bɔ un nyí mɛxo agun tɔn ɖò agun e mɛ wɛnjlatɔ́ 40 mɔ̌ ɖè é ɖé mɛ.

Nɔví vívɛ́ ɖěɖee kplɔ́n nǔ xá mì, bo d’alɔ mì, bɔ un ɖò sinsɛnzɔ́ ce wà wɛ lɛ é sín nǔ sù nukún ce mɛ. Taji bǐ ɔ, é sù nukún ce mɛ tawun ɖɔ Jehovah kpò ɖò flínflín mì wɛ.