1-2. Nɛ̌ mǐ ka sixu xwedó wěɖexámɛ e ɖò Nǔnywɛxó 4:25 mɛ é gbɔn? Na kpɔ́ndéwú ɖé.

LIN tamɛ dó kpɔ́ndéwú atɔn elɔ lɛ jí. Nɔví nyɔnu mɛxomɔ ɖé lin tamɛ dó nǔ ɖagbe e jɛ wá yì ɖò gbɛzán tɔn mɛ é ɖé lɛ jí. É ɖò wuvɛ̌ gegě mɔ wɛ dìn có, é kpò ɖò nǔ e wu é kpé é bǐ wà nú Jehovah wɛ. (1 Kɔ. 15:58) Gbè bǐ gbè ɔ, é nɔ dó nukún mɛ kpɔ́n, bo nɔ mɔ éɖée, xwédo tɔn kpo xɔ́ntɔn tɔn lɛ kpo ɖò gbɛ̀ yɔyɔ̌ ɔ mɛ. Nɔví nyɔnu ɖevo flín ɖɔ nǔɖitɔ́ hatɔ́ ɖé dó xomɛsin nú emi, amɔ̌, é wá gbeta ɔ kɔn bo na wɔn xó enɛ. (Kolo. 3:13) Nɔví sunnu ɖé flín nǔ e é wà nyi dò wá yì lɛ é, amɔ̌, é sɔ́ ayi tɔn ɖó nǔ e é sixu wà bo na nɔ gbeji nú Jehovah lɛ é jí.—Ðɛh. 51:12.

² Etɛ Klisanwun atɔn enɛ lɛ ka ɖó ɖò bǔ? Ye bǐ flín nǔ e jɛ wá yì ɖò gbɛzán yetɔn mɛ lɛ é, amɔ̌, ye sɔ́ ayi ɖ’eji ǎ. É nyɔ́ wà ɔ, ye ‘sɔ́ nukún yetɔn lɛ ɖó nǔ e ɖò nukɔn’ ɖò sɔgudo lɛ é jí.—Xà Nǔnywɛxó 4:25, nwt.

3. Aniwu mǐ ka ɖó na nɔ ‘sɔ́ nukún mǐtɔn lɛ ɖó nǔ e ɖò nukɔn’ ɖò sɔgudo lɛ é jí?

³ Etɛwu é ka ɖò taji ɖɔ mǐ ni ‘sɔ́ nukún mǐtɔn lɛ ɖó nǔ e ɖò nukɔn’ ɖò sɔgudo lɛ é jí? Mɛ e ɖò ali jlɔjlɔ ɖé jí gbɔn wɛ bo ɖò gudo kpɔ́n wɛ gbɛmɛ é sixu yì nukɔn ǎ. Mɔ̌ ɖokpo ɔ, enyi mǐ nɔ ɖò nǔ e jɛ wá yì ɖò gbɛzán mǐtɔn mɛ lɛ é flín wɛ gbɛmɛ ɔ, mǐ sixu yì nukɔn ɖò sinsɛnzɔ́ e wà nú Jehovah wɛ mǐ ɖè é mɛ ǎ.—Luk. 9:62.

4. Ðɔ nǔ e jí mǐ na ɖɔ xó dó ɖò xóta elɔ mɛ lɛ é.

⁴ Ðò xóta elɔ mɛ ɔ, mǐ na ɖɔ xó dó mɔ e sixu zɔ́n bɔ mǐ na nɔ ɖò nǔ e jɛ wá yì ɖò gbɛzán mǐtɔn mɛ lɛ é flín wɛ é atɔn jí. Ye wɛ nyí: (1) lee gbɛ̀ mɛtɔn cí ɖ’ayǐ é jlojló, (2) mɛhɛndóxomɛ,  (3) hwɛ didó mɛɖée zɛ xwé wu. Ðò ninɔmɛ ɖokpo ɖokpo mɛ ɔ, mǐ na mɔ lee nǔgbododó Biblu tɔn lɛ sixu d’alɔ mǐ, bɔ mǐ na wɔn “nǔ e ɖò gudo” lɛ é, lobo sɔ́ ayi ɖó “nǔ e ɖò nukɔn” lɛ é jí gbɔn é.—Fili. 3:13.

5. Mɔ tɛ wu Nǔnywɛtɔ́xó 7:10 ka gb’akpá nú mǐ dó?

⁵ Xà Nǔnywɛtɔ́xó 7:10. Ð’ayi wu ɖɔ wemafɔ ɔ kún ɖɔ ɖɔ é nyla ɖɔ è ni kan nǔ lěhun byɔ ó: “Etɛwu gbɛ̀ ɖ’ayǐ tɔn ka nyɔ́?” Nǔ e nyɔ́ lɛ é flínflín ɔ, nǔnina Jehovah tɔn wɛ. Amɔ̌, wemafɔ ɔ ɖɔ: “Ma nɔ kanbyɔ ɖɔ: ‘Etɛwu gbɛ̀ ɖ’ayǐ tɔn ka nyɔ́ hú gbɛ̀ dìn tɔn?’ ó.” Enɛ wu ɔ, mǐ ɖó na ɖ’ayi te, bo na nɔ jlɛ́ nǔ e jɛ ɖò gbɛzán mǐtɔn mɛ wá yì lɛ é dó dìn tɔn ɔ wu, bo na nɔ mɔ ɖɔ nǔ bǐ wɛ nyla dìn ǎ. Lilɛdógbeɖevomɛ Biblu tɔn ɖevo lilɛ wemafɔ enɛ gbɔn lě: “Ma nɔ kanbyɔ gbeɖé ɖɔ: ‘Có, etɛwu nǔ lɛ ka nyɔ́ tawun wá yì? ó.’ Nǔkanbyɔ enɛ nyí nǔnywɛnú ǎ.”

6. Etɛwu tamɛ linlin dó nǔ e jɛ ɖò gbɛzán mǐtɔn mɛ wá yì lɛ é jí, bo mɔ ɖɔ é nyɔ́ hugǎn ma ka nyí nǔnywɛnú ǎ? Nǎ kpɔ́ndéwú ɖé.

⁶ Etɛwu tamɛ linlin dó nǔ e jɛ ɖò gbɛzán mǐtɔn mɛ wá yì lɛ é jí, bo mɔ ɖɔ é nyɔ́ hugǎn ma ka nyí nǔnywɛnú ǎ? Lee gbɛ̀ mǐtɔn cí ɖ’ayǐ é jlojló sixu zɔ́n bɔ mǐ na nɔ flín nǔ ɖagbe e jɛ wá yì ɖò gbɛzán mǐtɔn mɛ lɛ é kɛɖɛ, lobo wɔn nyanya lɛ. Mǐ ni kpɔ́n kpɔ́ndéwú Izlayɛli-ví hwexónu tɔn lɛ tɔn. Ee ye gosin Ejipu é ɔ, ye yawǔ wɔn lee gbɛ̀ yetɔn vɛwǔ sɔ ɖò dɔ̌n é. Bo sɔ́ ayi ɖó nǔɖuɖu ɖagbe e ye nɔ ɖu ɖò dɔ̌n é jí. Ye nɔ ɖɔ: “Mǐ ɖò nǔ e mǐ nɔ ɖu vɔ̌nu ɖ’ayǐ ɖò Ejipu lɛ flín wɛ: hweví, kɔnkɔ́nbu, ayǐkpɛn, mǎ, ayomása, ayo.” (Kɛ́n. 11:5) Amɔ̌, “vɔ̌nu” jɛn ye ka nɔ ɖu nǔ enɛ lɛ dóo à? Eǒ. Izlayɛli-ví lɛ nɔ sè wuvɛ̌ tawun cobo nɔ mɔ nǔ enɛ lɛ; hwe ɔ nu ɔ, Ejipunu lɛ sɔ́ ye dó ɖó kannumɔ, bo nɔ dóya nú ye tawun. (Tín. 1:13, 14; 3:6-9) É ɖò mɔ̌ có, nukɔnmɛ ɔ, ye wɔn wuvɛ̌ syɛnsyɛn enɛ lɛ, bo lɛ́ jɛ gbɛ̀ ɖ’ayǐ tɔn ɔ jló jí. Ye sɔ́ ayi ɖó nǔ ɖaaɖagbe e Jehovah wà  nú ye tlolo lɛ é jí ǎ, é nyɔ́ wà ɔ, ye sɔ́ ayi ɖó nǔ ɖagbe e jɛ wá yì ɖò gbɛzán yetɔn mɛ é jí. Nǔwalɔ yetɔn nyɔ́ Jehovah nukúnmɛ ǎ.—Kɛ́n. 11:10.

7. Tɛ ka d’alɔ nɔví nyɔnu ɖé, b’ɛ nyi alɔ nú lee gbɛ̀ tɔn cí ɖ’ayǐ é jlojló?

⁷ Nɛ̌ mǐ ka sixu nyi alɔ nú lee gbɛ̀ mǐtɔn cí ɖ’ayǐ é jlojló gbɔn? Kpɔ́n kpɔ́ndéwú Nɔví nyɔnu ɖé tɔn. É jɛ sinsɛnzɔ́ wà jí ɖò Betɛli Brooklyn tɔn ɖò 1945. Xwè ɖé lɛ gudo ɔ, é wlí alɔ xá nɔví sunnu e nɔ w’azɔ̌ ɖò Betɛli éɖɔhun é ɖé, bɔ ye bǐ wà sinsɛnzɔ́ ɖó kpɔ́ nú xwè gegě. Amɔ̌, ɖò 1976 ɔ, asú tɔn bɛ́ azɔn ɖé. Nɔví nyɔnu ɔ ɖɔ ɖɔ hwenu e asú emitɔn mɔ ɖɔ kú tɔn sɛkpɔ́ é ɔ, é ɖè wě ɖaaɖagbe e na d’alɔ emi ɖò kú tɔn gudo lɛ é xá emi. É ɖɔ nú asì tɔn ɖɔ: “Mǐ ɖ’awǎjijɛ ɖò alɔwliwli mǐtɔn mɛ. Mɛ gegě tíìn bo ɖu vivǐ enɛ kpɔ́n ǎ.” É lɛ́ ɖɔ nú asì tɔn ɖɔ: “Nǔ enɛ lɛ na nɔ wá ayi mɛ nú we, amɔ̌, ma sɔ́ ayi ɖó ye jí ó. Nú hwenu ɖò yiyi wɛ ɔ, wuvɛ̌ towe lɛ na ɖò ɖiɖekpo wɛ. Akpɔ ni ma ɖó we bonu nǔ towe ni nɔ blawǔ nú we ó. Xomɛ ni hun we ɖɔ mǐ ɖu vivǐ awǎjijɛ kpo nyɔna gegě kpo tɔn. Nǔ e jɛ wá yì lɛ é flínflín ɔ, nǔnina Mawu tɔn wɛ.” Wěɖexámɛ ɖagbe ɖé wɛ nyí enɛ à cé?

8. Nɛ̌ nɔví nyɔnu mǐtɔn ka ɖu lè wě e asú tɔn ɖè xá ɛ é tɔn gbɔn?

⁸ Nɔví nyɔnu mǐtɔn hɛn xó enɛ lɛ ayi mɛ. É sɛn Jehovah kpo gbejininɔ kpo kaka jɛ hwenu e é ɖó xwè 92 bo kú é. Xwè yɔywɛ ɖé jɛ nukɔn nú kú tɔn ɔ, é ɖɔ: “Nú un kpɔ́n gudo sɛ́dó bo flín xwè 63 jɛji e un zán ɖò sinsɛnzɔ́ hwebǐnu tɔn mɛ lɛ é ɔ, un sixu ɖɔ ɖɔ un ɖó gbɛzán e ɖó awǎjijɛ tawun é ɖé.” Etɛwu? É tinmɛ ɖɔ: “Nǔ e nɔ zɔ́n bɔ gbɛzán mǐtɔn nɔ ɖó awǎjijɛ tawun é wɛ nyí ɖɔ mǐ ɖò kplékplé nɔví lɛ tɔn ɖaaɖagbe ɖé mɛ, bo ɖó nukúnɖiɖó ɔ bo na nɔ kpɔ́ xá nɔví enɛ lɛ ɖò Palaɖisi mɛ ɖò ayikúngban jí, lobo sɛn Gbɛɖotɔ́ Ðaxó mǐtɔn, Mawu nǔgbo ɖokpo géé ɔ, Jehovah kaka sɔyi.” * Mɛ e sɔ́ nukún tɔn lɛ  ɖó nǔ e ɖò nukɔn ɖò sɔgudo lɛ é jí é sín kpɔ́ndéwú ɖaaɖagbe tɛ ɖíe!

9. Lee è ɖɔ gbɔn ɖò Levíi ví lɛ 19:18 mɛ é ɔ, hwetɛnu é ka sixu vɛwǔ tawun bɔ mǐ na gbɔ mɛ hɛn dó xomɛ?

⁹ Xà Levíi ví lɛ 19:18. Enyi nǔɖitɔ́ hatɔ́ ɖé, xɔ́ntɔn vívɛ́ ɖé, alǒ hɛ̌nnumɔ mǐtɔn ɖé wɛ wà nǔ agɔ xá mǐ ɔ, hwɛhwɛ ɔ, é nɔ vɛwǔ bɔ mǐ na jó xó dó. Ði kpɔ́ndéwú ɔ, nǔɖitɔ́ hatɔ́ ɖé dóhwɛ agɔ nɔví nyɔnu ɖé ɖɔ é fin akwɛ emitɔn. Nukɔnmɛ ɔ, nɔví nyɔnu e dóhwɛ mɛ é wá yì savo nú nɔví nyɔnu e é dóhwɛ é, amɔ̌, nɔví nyɔnu e é dóhwɛ é kpò ɖò ayi sɔ́ ɖó nǔ e jɛ é jí wɛ. Nǔ ko cí mɔ̌ nú we kpɔ́n à? Enyi ninɔmɛ ɖokpo ɔ lɛ na bo ma tlɛ kpan nukɔn mǐ ǎ ɔ, mǐ mɛ gegě wɛ sixu hɛn xó dó xomɛ gbɔn mɔ̌, bo mɔ ɖɔ mǐ kún sixu jó xó dó gbeɖé ó.

10. Enyi mǐ mɔ ɖɔ mǐ hɛn mɛ dó xomɛ ɔ, tɛ ka sixu d’alɔ mǐ?

¹⁰ Enyi mǐ mɔ ɖɔ mǐ hɛn mɛ dó xomɛ ɔ, tɛ ka sixu d’alɔ mǐ? Mǐ ɖó na flín ɖɔ Jehovah nɔ mɔ nǔ bǐ. É tuùn nǔ e mɛ gbɔn dín wɛ mǐ ɖè lɛ é kaka jɛ hwɛ agɔ e è sixu dó mǐ lɛ é ɖebǔ jí. (Ebl. 4:13) Nú mǐ ɖò wuvɛ̌ mɔ wɛ ɔ, é nɔ vɛ́ nú é lɔ. (Eza. 63:9) É d’akpá ɖɔ emi na ɖè wuvɛ̌ e nǔagɔwiwa nɔ dó nú mǐ lɛ é bǐ síìn.—Nǔɖe. 21:3, 4.

11. Enyi mǐ ma hɛn mɛ dó xomɛ ǎ ɔ, nɛ̌ é ka nɔ wà ɖagbe nú mǐɖesunɔ gbɔn?

¹¹ Mǐ ɖó na lɛ́ flín ɖɔ enyi mǐ ma hɛn mɛ dó xomɛ ǎ ɔ, é nɔ wà ɖagbe nú mǐɖesunɔ. Nǔ e wu nɔví nyɔnu e è dóhwɛ agɔ é wá ɖ’ayi é nɛ. Nukɔnmɛ ɔ, nɔví nyɔnu ɔ wá jó xó dó. É mɔ nǔ jɛ wu ɖɔ enyi mǐ sɔ́ hwɛ kɛ mɛ ɖevo lɛ ɔ, Jehovah nɔ sɔ́ hwɛ kɛ mǐ lɔ. (Mat. 6:14) É tuùn ɖɔ nǔ e nɔví nyɔnu ɖě ɔ wà nú emi é nyla có, é wá gbeta ɔ kɔn bo jó xó dó. Wǎgbɔ tɔn ɔ, nɔví nyɔnu mǐtɔn ɖó awǎjijɛ hugǎn, lobo sɔ́ ayi ɖó sinsɛnzɔ́ e wà nú Jehovah wɛ é ɖè é jí.

12. Etɛ 1 Jaan 3:19, 20 ka kplɔ́n mǐ?

¹² Xà 1 Jaan 3:19, 20. Mǐ bǐ wɛ nɔ dóhwɛ mǐɖée hweɖelɛnu. Ði kpɔ́ndéwú ɔ, mɛɖé lɛ nɔ dóhwɛ yeɖée ɖó nǔ ɖěɖee ye ko wà, cobo wá mɔ nǔgbo ɔ lɛ é wu. Mɛ ɖevo lɛ nɔ dóhwɛ yeɖée ɖó afɔ ɖěɖee ye ɖè nyi dò ɖò baptɛm yetɔn gudo lɛ é wu. (Hlɔ. 3:23) É ɖò wɛn ɖɔ mǐ ba na wà nǔ e sɔgbe é. Amɔ̌, “mǐ mɛ bǐ wɛ nɔ wà nǔ nyi dò gbɔn alɔkpa gegě mɛ.” (Ja. 3:2; Hlɔ. 7:21-23) Nǔgbo wɛ ɖɔ hwɛ didó mɛɖée nɔ nyí xomɛhunhunnú ǎ, amɔ̌, é sixu wà ɖagbe ɖé lɛ nú mǐ. Etɛwu? Ðó é sixu sísɛ́ mǐ bɔ mǐ na bló huzuhuzu lɛ ɖò gbɛzán mǐtɔn mɛ, lobo kánɖeji bo sɔ́ na vɔ́ nǔ mɔ̌hun wà nyi dò ǎ.—Ebl. 12:12, 13.

13. Etɛwu mǐ ka ɖó na ɖ’ayi te, bo ma wá jɛ hwɛ didó mɛɖée zɛ xwé wu sín mɔ mɛ ó?

¹³ Ðò alɔ ɖevo mɛ ɔ, mǐ sixu nɔ dóhwɛ mǐɖée zɛ xwé wu, enɛ wɛ nyí ɖɔ, enyi mǐ tlɛ ko lɛkɔ sín hwɛ mǐtɔn lɛ gudo bɔ Jehovah ko xlɛ́ ɖɔ emi ko sɔ́ hwɛ kɛ mǐ ɔ, mǐ sixu kpò ɖò hwɛ dó mǐɖée wɛ. Hwɛ didó mɛɖée mɔ̌hun sixu wà nǔ dó mǐ wu. (Ðɛh. 31:11; 38:4, 5) Gbɔn nɛ̌ é? Kpɔ́n kpɔ́ndéwú nɔví nyɔnu e nɔ ɖò hwɛ dó éɖée wɛ ɖó hwɛ e é hu wá yì lɛ é wu é ɖé tɔn. É ɖɔ: “Un mɔ ɖɔ nǔ yayǎ wɛ kan ván bo wà nǔ ɖò sinsɛnzɔ́ Jehovah tɔn mɛ na nyí nú mì, ɖó é cí ɖɔ un kún ɖò na gán wɛ ó ɖɔhun.” Mǐ mɛ gegě wɛ nǔ sixu cí mɔ̌ na. É ɖò taji ɖɔ mǐ ni ɖ’ayi te, bo ma wá jɛ hwɛ didó mɛɖée zɛ xwé wu sín mɔ mɛ ó. È na ɖɔ ɔ, enyi Jehovah kpò ɖò hwɛ sɔ́ kɛ mǐ wɛ bɔ mǐdɛɛ lɛ ka jó sinsɛn ɛ dó ɔ, kpɔ́n lě dò xomɛ na hun Satáan sɔ é!—Sɔ́ jlɛ́ dó 2 Kɔlɛntinu lɛ 2:5-7, 11 wu.

14. Nɛ̌ mǐ ka sixu wà gbɔn bo kánɖeji ɖɔ Jehovah kún ɖè alɔ sín kan mǐtɔn mɛ ó?

¹⁴ É ɖò mɔ̌ có, mǐ sixu kanbyɔ mǐɖée ɖɔ: ‘Nɛ̌ un ka sixu wà gbɔn bo kánɖeji ɖɔ Jehovah kún ɖè alɔ sín kan ce mɛ ó?’ Enyi a nɔ  kan nǔ mɔ̌hun byɔ hǔn, é xlɛ́ ɖɔ Jehovah sixu sɔ́ hwɛ kɛ we. Xwè ɖé lɛ ɖíe wá yì ɔ, Atɔxwɛ ɖɔ: “Mǐ sixu mɔ ɖɔ mǐ nɔ fɔ́n bo nɔ ɖò hwɛ ɖokpo ɔ lɛ hu wɛ azɔn mɔ̌kpan, bɔ é sixu cí nú mǐ ɖɔ mǐ kún na jó nǔwalɔ nyanya e dó ɖɔ dò ɖò gbɛzán mǐtɔn mɛ lɛ é dó gbeɖé ó wɛ ɖɔhun. . . . Ma nú awakanmɛ kú we ó. Ma lin ɖɔ hwɛ e emi hu é ɔ, è kún sixu sɔ́ kɛ emi gbeɖé ó ó. Lee Satáan ba ɖɔ a ni lin nǔ gbɔn é pɛ́ɛ nɛ. Lee hwɛ e a hu é vɛ́ nú we sɔ é kɔ́kɔ́ɖɔ́kɔ́ ko xlɛ́ ɖɔ a kún ko zɛ gbě ó. Nɔ sɔ́ hwiɖée hwe, bo kpò ɖò ɖɛ vívɛ́ xò sɛ́dó Mawu wɛ ɖɔ é ni sɔ́ hwɛ kɛ we, bo bló bonu a ni lɛ́ ɖó ayixa mímɛ́ ɖé, lobo lɛ́ d’alɔ we nú a ni gɔn nǔ ɖokpo ɔ wà nyi dò. Enyi a tlɛ wà nǔ ɖokpo ɔ nyi dò azɔn mɔ̌kpan hǔn, nɔ sɛkpɔ́ Mawu lee vǐ ɖé nɔ sɛkpɔ́ tɔ́ tɔn gbɔn hwenu e é ɖò wuvɛ̌ mɛ é ɖɔhun. Enɛ ɔ, Jehovah na zɔn dó xomɛnyínyɔ́ tɔn wu dó d’alɔ we.” *

15-16. Enyi mɛɖé lɛ wá mɔ nukúnnú jɛ mɛ ɖɔ Jehovah kún ɖè alɔ sín kan yetɔn mɛ ó ɔ, nɛ̌ nǔ ka nɔ cí nú ye?

¹⁵ Mɛ e ɖò togun Jehovah tɔn mɛ lɛ é gegě wá mɔ ɖɔ Jehovah kún ɖè alɔ sín kan yetɔn mɛ ó, bɔ enɛ dó gbɔ nú ye tawun. Ði kpɔ́ndéwú ɔ, xwè ɖé lɛ ɖíe ɔ, nǔ e nɔví sunnu ɖé xà ɖò xóta ɖebɔdoɖewu “Biblu Nɔ Huzu Gbɛzán Mɛtɔn” mɛ é dó wusyɛn lanmɛ n’i tawun. Ðò xóta ɔ mɛ ɔ, nɔví nyɔnu ɖé ɖɔ ɖɔ nǔ nyanya e jɛ ɖò gbɛzán emitɔn mɛ lɛ é zɔ́n bɔ é vɛwǔ nú emi bɔ emi na ɖi ɖɔ Jehovah sixu yí wǎn nú emi. É bló baptɛm é ɔ, xwè ko jɛ có, é ka kpò ɖò xwi ɖí xá linlin mɔ̌hun lɛ wɛ. Amɔ̌, ee é lin tamɛ dó gbɛxixɔ ɔ jí é ɔ, enɛ d’alɔ ɛ bɔ é mɔ ɖɔ Jehovah yí wǎn nú emi. *

¹⁶ Nɛ̌ nǔ enɛ e jɛ dó nɔví nyɔnu ɔ jí é ka d’alɔ nɔví sunnu ɔ gbɔn? É wlán ɖɔ: “Hwenu e un ɖò winnyawinnya mɛ é ɔ, un huzu kannumɔ nú fɔtóo nǔbliblíwiwa tɔn kpinkpɔn. Agaɖanu dìn ɔ, un ko lɛ́ kpɔ́n. Un ba alɔdó mɛxo agun tɔn lɛ tɔn, bo dó gǎn bá dó ɖu ɖò tagba ce jí. Mɛxo lɛ na mì ganjɛwu ɖɔ Jehovah yí wǎn nú mì, bo jló na sɔ́ hwɛ kɛ mì. Amɔ̌, hweɖelɛnu ɔ, un nɔ mɔ ɖɔ un kún hwɛ́n nǔɖe ó, cí nǔ ɖɔ Jehovah kún sɔ́ sixu yí wǎn nú mì ó ɖɔhun. [Nɔví nyɔnu enɛ] e sín tan un xà é d’alɔ mì tawun. Dìn ɔ, un mɔ nukúnnú jɛ mɛ ɖɔ enyi un ɖɔ  ɖɔ Mawu kún sixu sɔ́ hwɛ kɛ mì ó ɔ, ɖiɖɔ wɛ un ɖè ɖɔ vɔ̌ e vǐ tɔn sá é kún ko kpé bo na súnsún hwɛ ce lɛ ó. Un sɛ̀ xóta enɛ xwè, bo na nɔ xà, lobo nɔ lin tamɛ d’eji hweɖebǔnu e un mɔ ɖɔ Jehovah kún yí wǎn nú mì ó é.”

17. Nɛ̌ mɛsɛ́dó Pɔlu ma ka jɛ hwɛ didó mɛɖée zɛ xwé wu sín mɔ mɛ ǎ gbɔn?

¹⁷ Kpɔ́ndéwú enɛ lɛ nɔ flín mǐ tan mɛsɛ́dó Pɔlu tɔn. Cobonu é na huzu Klisanwun ɔ, é hu hwɛ syɛnsyɛn gegě. Pɔlu flín nǔ e é wà wá yì lɛ é, amɔ̌, é nɔ sɔ́ ayi ɖ’eji ǎ. (1 Tim. 1:12-15) É nɔ kpɔ́n dó mɔ nǔnina e Mawu na ɛ é ɖé. (Ga. 2:20) Mɔ̌ mɛ ɔ, Pɔlu jɛ hwɛ didó mɛɖée zɛ xwé wu sín mɔ ɔ mɛ ǎ, loɔ, é sɔ́ ayi tɔn ɖó nǔ e é sixu wà ɖò sinsɛnzɔ́ Jehovah tɔn mɛ é jí.

18. Etɛ lɛ mǐ ka kplɔ́n ɖò xóta elɔ mɛ?

¹⁸ Etɛ lɛ mɔ ɖěɖee xó mǐ ɖɔ ɖò xóta elɔ mɛ lɛ é ka kplɔ́n mǐ? (1) Nǔ ɖaaɖagbe e jɛ wá yì lɛ é flínflín ɔ, nǔnina Jehovah tɔn wɛ; amɔ̌, nǔ e jɛ wá yì ɖò gbɛzán mǐtɔn mɛ lɛ é na bo nyɔ́ gbɔn ɖebǔ ɔ, gbɛ̀ yɔyɔ̌ e ja ɖò sɔgudo é na nyɔ́ hú mɔ̌ jɛn wɛ. (2) Mɛ ɖevo lɛ sixu dó xomɛsin nú mǐ, amɔ̌, enyi mǐ wá gbeta ɔ kɔn bo na sɔ́ kɛ ye ɔ, mǐ na kpéwú bo sɔ́ ayi ɖó Jehovah sinsɛn jí. (3) Hwɛ didó mɛɖée zɛ xwé wu sixu zɔ́n bɔ mǐ gbɔ Jehovah sɛn kpo awǎjijɛ kpo. Enɛ wu ɔ, Pɔlu ɖɔhun ɔ, mǐ ɖó na ganjɛwu ɖɔ Jehovah ko sɔ́ hwɛ kɛ mǐ.

19. Nɛ̌ mǐ ka wà gbɔn bo tuùn ɖɔ ɖò gbɛ̀ yɔyɔ̌ ɔ mɛ ɔ, mǐ kún sɔ́ na flín nǔ ɖebǔ e dó wuvɛ̌ nú mǐ wá yì lɛ é ó?

¹⁹ Mǐ ɖó nukúnɖiɖó ɔ bo na nɔ gbɛ̀ kaka sɔyi. Bɔ ɖò gbɛ̀ yɔyɔ̌ Mawu tɔn mɛ ɔ, mǐ sɔ́ na flín nǔ ɖebǔ e dó wuvɛ̌ nú mǐ lɛ é ǎ. Biblu ɖɔ xó dó hwe enɛ nu wu, bo ɖɔ: “Mɛɖé sɔ́ na flín nǔ xóxó lɛ ǎ.” (Eza. 65:17) Lin tamɛ kpɔ́n kpɛɖé: Mɛɖé lɛ ɖò mǐ mɛ ko sɛn Jehovah kaka bo ko kpò dìn, amɔ̌, ɖò gbɛ̀ yɔyɔ̌ ɔ mɛ ɔ, mǐ na lɛ́ winnya. (Jɔb. 33:25) Enɛ wu ɔ, mi nú mǐ ni kánɖeji, bo ma nɔ sɔ́ ayi ɖó nǔ e jɛ wá yì ɖò gbɛzán mǐtɔn mɛ lɛ é jí ó. É nyɔ́ wà ɔ, mi nú mǐ ni nɔ sɔ́ nukún mǐtɔn lɛ ɖó nǔ e ɖò nukɔn ja ɖò sɔgudo lɛ é jí.