XÓTA NǓKPLƆ́NKPLƆ́N TƆN 46
HAN 49 Hɛn xomɛ hun Jexóva
Nɔví súnnu lɛ́ mi, mi ka ɖo gǎn dó wɛ bá nyí mɛsɛntɔ́ agun tɔn a?
“Nǔnámɛ nɔ ná awǎjijɛ mɛ hú nǔyíɖomɛsí.”—MƐ. 20:35.
XÓNUSƆ́ÐÓTE
Xóta élɔ́ ná dó wǔsyɛ́n lanmɛ nú nɔví súnnu e ko bló batɛ́mu lɛ́ é bɔ yě ná dó gǎn bá jɛxá bá nyí mɛsɛntɔ́ agun tɔn.
1. Nɛ̌ nǔ ka cí nú mɛsɛ́dó Pɔ́lu dó mɛsɛntɔ́ agun tɔn lɛ́ wú?
AZƆ̌ tají wɛ mɛsɛntɔ́ agun tɔn lɛ́ nɔ wa ɖo agun lɛ́ mɛ. É ɖo wɛn ɖɔ súnnu gbejínɔtɔ́ énɛ́ lɛ́ xɔ akwɛ́ ɖo mɛsɛ́dó Pɔ́lu nukúnmɛ. Ði kpɔ́ndéwú ɔ, hwenu e é ɖo nǔ wlán sɛ́dó klisánwun e ɖo Filípu lɛ́ é wɛ é ɔ, é dó gbe sɛ́dó mɛsɛntɔ́ agun tɔn lɛ́ kpó mɛxó agun tɔn lɛ́ kpó ɖó vo.—Filí. 1:1.
2. Nɛ̌ nǔ ka cí nú nɔví súnnu e nɔ nyí Luis é dó sɔ́ e è sɔ́ ɛ bɔ é nyí mɛsɛntɔ́ agun tɔn é wú?
2 Nɔví súnnu e ko bló batɛ́mu lɛ́ é gěgé nɔ mɔ awǎjijɛ ɖaxó ɖó mɛsɛntɔ́ agun tɔn sín azɔ̌ e wa wɛ yě ɖe é wú, yě ná bo nyí mɛ wínnyáwínnyá alǒ mɛxó ɔ nɛ́. Ði kpɔ́ndéwú ɔ, xwe 18 ɖó wɛ Devan ɖe hwenu e è sɔ́ ɛ mɛsɛntɔ́ agun tɔn é. Ðo alɔ ɖěvo mɛ ɔ, xwe 50 jɛjí ɖó wɛ nɔví súnnu e nɔ nyí Luis é ɖe hwenu e è sɔ́ ɛ mɛsɛntɔ́ agun tɔn é. Lěe nǔ nɔ cí nú mɛ gěgé é wɛ é cí n’i, é ɖɔ: “Un mɔ ɖɔ wǔ wɛ è jɔ mì tawun nú má wa mɛsɛntɔ́ agun tɔn sín azɔ̌, ɖo tají ɔ, ényí un lin tamɛ dó wǎnyíyí e agun ɔ ko ɖe xlɛ́ mì é bǐ jí ɔ nɛ́!”
3. Nǔkanbyɔ́ tɛ́ lɛ́ mǐ ka ná gbéjé kpɔ́n?
3 Ényí nɔví súnnu e ko bló batɛ́mu é wɛ nú we bɔ a ma ka ko nyí mɛsɛntɔ́ agun tɔn ǎ ɔ, a sixú sɔ́ dó ɖó nǔ e gbé a ná nya é a? Étɛ́ ka sixú sísɛ́ we bɔ a ná wa mɔ̌? Jijɔ tɛ́ lɛ́ xó Biblu ka ɖɔ bɔ a ɖó ná ɖó? Ðo xóta élɔ́ mɛ ɔ, mǐ ná gbéjé xósin nǔkanbyɔ́ énɛ́ lɛ́ tɔn kpɔ́n. Amɔ̌, jɛ nukɔn hwɛ̌ ɔ, mi nú mǐ ní ɖɔ xó dó azɔ̌ e mɛsɛntɔ́ agun tɔn ɖé nɔ wa é wú.
AZƆ̌ TƐ́ MƐSƐNTƆ́ AGUN TƆN ÐÉ KA NƆ WA?
4. Azɔ̌ tɛ́ mɛsɛntɔ́ agun tɔn ɖé ka nɔ wa? (Kpɔ́n ɖiɖe ɔ lɔmɔ̌.)
4 Nɔví súnnu e ko bló batɛ́mu é ɖé wɛ mɛsɛntɔ́ agun tɔn ɖé nɔ nyí bɔ gbigbɔ mímɛ́ sɔ́ ɛ nú é ná d’alɔ mɛxó agun tɔn lɛ́ bónú yě ná kpé nukún dó nǔ tají gěgé wú ɖo agun ɔ mɛ. Mɛsɛntɔ́ agun tɔn ɖé lɛ́ nɔ tɛ́n kpɔ́n bo nɔ bló bɔ fí e wɛnjlátɔ́ lɛ́ ná ɖɔ mawuxó gbɔn é kpó wěma lɛ́ kpó gěgé nɔ tíin nú yě. Yě mɛ ɖěvo lɛ́ nɔ d’alɔ bɔ è nɔ hɛn kpléxɔ Axɔ́súɖuto ɔ tɔn ɖó mǐmɛ́ jí bo nɔ lɛ́ kpé nukún d’é wú. Mɛsɛntɔ́ agun tɔn lɛ́ nɔ lɛ́ wa tɛnmɛnámɛtɔ́ sín azɔ̌, bo nɔ lɛ́ kpé nukún dó mɔ gbezéyiaga tɔn wú ɖo kplé agun tɔn lɛ́ sín hwenu. Azɔ̌ e mɛsɛntɔ́ agun tɔn lɛ́ nɔ wa é gěgé nɔ nyí azɔ̌ tawun tawun lɛ́. Amɔ̌, tají hú gǎn bǐ ɔ, súnnu e yí wǎn nú Jexóva bo nɔ lɛ́ zán gbɛ lěe é ba gbɔn lɛ́ é wɛ mɛsɛntɔ́ agun tɔn lɛ́ nɔ nyí. Yě nɔ lɛ́ yí wǎn nú nɔví súnnu kpó nɔví nyɔ̌nu kpó yětɔn lɛ́ tawun. (Mat. 22:37-39) Nɛ̌ súnnu e ko bló batɛ́mu é ɖé ka sixú dó gǎn bo nyí mɛsɛntɔ́ agun tɔn gbɔn?
Mɛsɛntɔ́ agun tɔn lɛ́ nɔ wa nǔ Jezu ɖɔhun gbɔn yěɖée sísɔ́ jó bá wa mɛsɛntɔ́zɔ́ nú mɛ ɖěvo lɛ́ gblamɛ (Kpɔ́n akpáxwé 4)
5. Nɛ̌ nɔví súnnu ɖé ka sixú dó gǎn bá jɛxá bá nyí mɛsɛntɔ́ agun tɔn gbɔn?
5 Biblu tínmɛ jijɔ ɖěɖěe mɛ ɖěɖěe è sixú sɔ́ mɛsɛntɔ́ agun tɔn lɛ́ é ɖó ná ɖó lɛ́ é. (1 Tim. 3:8-10, 12, 13) Ényí a kplɔ́n nǔ dó jijɔ énɛ́ lɛ́ e xó Biblu ɖɔ lɛ́ é wú bo dó gǎn syɛ́nsyɛ́n bo ɖó yě ɔ, a sixú kpé wǔjɔmɛzɔ́ énɛ́ wú. Amɔ̌, jɛ nukɔn hwɛ̌ ɔ, a ɖó ná ɖó ayi te dó nǔ ɖěɖěe nɔ sísɛ́ we bɔ a nɔ ba ná nyí mɛsɛntɔ́ agun tɔn lɛ́ é wú.
ÉTƐ́WÚ A KA BA NÁ NYÍ MƐSƐNTƆ́ AGUN TƆN?
6. Étɛ́ ka ɖó ná sísɛ́ we bɔ a ná wa mɛsɛntɔ́zɔ́ alɔkpa ɖěbǔ nú nɔví súnnu kpó nɔví nyɔ̌nu kpó towe lɛ́? (Matíe 20:28; kpɔ́n ɖiɖe e ɖo jí é lɔmɔ̌.)
6 Wǎnyíyí wɛ sísɛ́ kpɔ́ndéwú ɖaxó hú gǎn mǐtɔn Jezu Klísu ɔ, énɛ́ wɛ nyí wǎn e é yí nú Tɔ́ tɔn kpó gbɛtɔ́ lɛ́ kpó é. Wǎnyíyí énɛ́ wɛ sísɛ́ ɛ bɔ é wa azɔ̌ syɛ́nsyɛ́n, bo lɛ́ wa azɔ̌ e sɔ́ mɛ hwe lɛ́ é nú mɛ ɖěvo lɛ́. (Xa Matíe 20:28; Jaan 13:5, 14, 15) Ényí wǎnyíyí wɛ nɔ sísɛ́ we ɔ, Jexóva ná kɔn nyɔ̌ná dó jǐ towe bo ná d’alɔ we bɔ a ná jɛ mɛsɛntɔ́ agun tɔn nyínyí e gbé nya wɛ a ɖe é kɔn.—1 Kɔ. 16:14; 1 Pi. 5:5.
Jezu kplɔ́n mɛsɛ́dó tɔn lɛ́ gbɔn kpɔ́ndéwú éɖésúnɔ tɔn gblamɛ ɖɔ yě ní nɔ wa mɛsɛntɔ́zɔ́ nú mɛ ɖěvo lɛ́ kpó mɛɖéesɔ́hwe kpó, bo ma nɔ nya tɛn nukúnɖéjí ɖé mɛ ninɔ gbé ó (Kpɔ́n akpáxwé 6)
7. Étɛ́wú é ka nylá ɖɔ nɔví súnnu ɖé ní ba ná nyí mɛsɛntɔ́ agun tɔn ɖó é jló ɖɔ mɛ ɖěvo lɛ́ ní xɔ susu nú émí wútu?
7 Ðo gbɛ ɔ mɛ ɔ, mɛ ɖěɖěe nɔ ba ɖɔ mɛ ɖěvo lɛ́ ní ɖó ayi émí wú lɛ́ é wɛ mɛ lɛ́ nɔ sɔ́ su hwɛhwɛ. Ðo gbɛ ɔ mɛ ɔ, mɛ ɖěɖěe nɔ sɔ́ yěɖée ɖ’ajo lɛ́ é wɛ mɛ lɛ́ nɔ yí wǎn ná hwɛhwɛ. Nǔ ka ɖo mɔ̌ ɖo tutoblónúnǔ Jexóva tɔn mɛ ǎ. Acɛ ɖíɖó dó mɛ ɖěvo lɛ́ jí, alǒ tɛn ɖě mɛ ninɔ wɛ nɔ gbo vɛ̌ nɔví súnnu e wǎnyíyí nɔ sísɛ́ Jezu ɖɔhun é ɖé ǎ. Ényí è sɔ́ mɛ e nǔ nɔ jló gbɔn mɔ̌ é ɖé ɖo agun ɔ mɛ ɔ, é ná ɖibla gbɛ́ ɖɔ émí kún ná wa azɔ̌ e nɔ sɔ́ mɛ hwe bɔ è ɖó ná wa dó kpé nukún dó lɛ̌ngbɔ́ xɔ akwɛ́ Jexóva tɔn lɛ́ wú é ɖé lɛ́ ó. É sixú mɔ ɖɔ azɔ̌ mɔ̌hun lɛ́ wiwa ná ɖe émí kpo. (Jaan 10:12) Jexóva ná kɔn nyɔ̌ná dó gǎn ɖěɖěe mɛ ɖěbǔ e goyíyí alǒ cejɛ́nnábí nɔ sísɛ́ b’ɛ nɔ wa nǔ é tɔn lɛ́ jí ǎ.—1 Kɔ. 10:24, 33; 13:4, 5.
8. Wě tɛ́ Jezu ka ɖe xá mɛsɛ́dó tɔn lɛ́?
8 Hweɖélɛ́nu ɔ, hǎgbɛ́ Jezu tɔn e tlɛ sɛkpɔ́ ɛ hú gǎn lɛ́ é nya wǔjɔmɛzɔ́ lɛ́ gbé ɖó hwɛjijɔ e ma sɔgbe ǎ é wú. Lin tamɛ dó nǔ e mɛsɛ́dó Jaki kpó Jaan kpó wa é jí. Yě byɔ́ Jezu ɖɔ é ní sɔ́ émí ɖó tɛn nukúnɖéjí ɖé mɛ ɖo Axɔ́súɖuto tɔn mɛ. Jezu kpa yě ɖó nǔjlómɛ yětɔn wú ǎ. É nyɔ́ wa ɔ, Jezu tínmɛ nú mɛsɛ́dó 12 lɛ́ bǐ ɖɔ: “Mɛ ɖěbǔ e ba ná ɖó acɛ hú mɛ bǐ ɖo tɛ́ntin mitɔn é ɖó ná nyí mɛsɛntɔ́ mitɔn, bɔ mɛ ɖěbǔ e ba bo ná nyí mɛ nukɔntɔn ɖo tɛ́ntin mitɔn é ɖó ná nyí mɛsɛntɔ́ mi bǐ tɔn.” (Mak. 10:35-37, 43, 44) Nɔví súnnu ɖěɖěe ɖo nǔɖé gbé nya wɛ ɖó linlin ɖagbe wú, énɛ́ wɛ nyí bo ná dó wa mɛsɛntɔ́zɔ́ nú mɛ ɖěvo lɛ́ é ná nyí nyɔ̌ná nú agun ɔ.—1 Tɛ. 2:8.
ÉTƐ́ KA SIXÚ D’ALƆ WE BƆ A NÁ BA NÁ WA MƐSƐNTƆ́ZƆ́ NÚ NƆVÍ TOWE LƐ́?
9. Nɛ̌ a ka sixú ná hlɔ̌nhlɔ́n jlǒ e a ɖó bá dó gǎn bá jɛxá mɛsɛntɔ́ agun tɔn nyínyí é gbɔn?
9 É ɖo wɛn ɖɔ a yí wǎn nú Jexóva bo ba ná wa mɛsɛntɔ́zɔ́ nú mɛ ɖěvo lɛ́. É ɖo mɔ̌ có, a sixú gɔn jlǒ ɔ ɖó bá wa azɔ̌ e mɛsɛntɔ́ agun tɔn ɖé ɖó ná wa é. Étɛ́ ka sixú d’alɔ we bɔ a ná ba ná wa azɔ̌ énɛ́? Étɛ́wú a ma ka ná lin tamɛ dó awǎjijɛ e a ná mɔ ɖo mɛsɛntɔ́zɔ́ wiwa nú nɔví súnnu kpó nɔví nyɔ̌nu kpó towe lɛ́ mɛ lɛ́ é jí a? Jezu ɖɔ: “Nǔnámɛ nɔ ná awǎjijɛ mɛ hú nǔyíɖomɛsí.” (Mɛ. 20:35) É zán gbɛ sɔgbe xá nǔgbódodó énɛ́. É mɔ awǎjijɛ jɔ awǎjijɛ ɖo mɛsɛntɔ́zɔ́ wiwa nú mɛ ɖěvo lɛ́ mɛ, bɔ nǔ sixú nyí mɔ̌ nú hwi lɔ.
10. Nɛ̌ Jezu ka ɖe xlɛ́ ɖɔ émí mɔ awǎjijɛ ɖo mɛsɛntɔ́zɔ́ wiwa nú mɛ ɖěvo lɛ́ mɛ gbɔn? (Maki 6:31-34)
10 Mǐ ní kpɔ́n lěe Jezu ɖe xlɛ́ ɖɔ émí mɔ awǎjijɛ ɖo mɛsɛntɔ́zɔ́ wiwa nú mɛ ɖěvo lɛ́ mɛ gbɔn é sín kpɔ́ndéwú ɖokpó. (Xa Maki 6:31-34.) Ðo ninɔmɛ ɖé mɛ ɔ, nǔ ci kɔ nú Jezu kpó mɛsɛ́dó tɔn lɛ́ kpó. Yě xwe fí e ɖo zɔ é ɖé bá gbɔjɛ kpɛɖé. Amɔ̌, ahwan ɖé yi dɔ̌n jɛ nukɔn nú yě bo ɖo nukún ɖó wɛ ɖɔ Jezu ná kplɔ́n nǔ émí. É hɛn ɔ, é ná ko gbɛ́. È ná ɖɔ ɔ, é kpó hǎgbɛ́ tɔn lɛ́ kpó “tlɛ mɔ hwenu kpɛví ɖé vɔ́vɔ́ bo ɖu nǔ ǎ.” Alǒ Jezu hɛn ɔ, é ná ko kplɔ́n nǔgbó ɖokpó alǒ we ɖé mɛ lɛ́ kpowun bo sɛ́ yě dó xwé. Amɔ̌, ɖó wǎnyíyí wɛ sísɛ́ ɛ wútu ɔ, é “jɛ nǔ gěgé kplɔ́n yě jí.” É kpo ɖo nǔ kplɔ́n yě wɛ káká bɔ “ganmɛ . . . yi tawun.” (Mak. 6:35) É wa mɔ̌ ɖó mɔ̌ wɛ é ɖó ná wa wú ǎ, loɔ, ɖó “nǔ yětɔn blá wǔ n’i.” É ba ná kplɔ́n nǔ yě ɖó é yí wǎn nú yě. Mɛsɛntɔ́zɔ́ wiwa nú mɛ ɖěvo lɛ́ ná awǎjijɛ ɖaxó Jezu.
11. Nɛ̌ Jezu ka wa mɛsɛntɔ́zɔ́ nú tóɖóetɔ́ lɛ́ ɖo ali tají ɖé nu gbɔn? (Kpɔ́n ɖiɖe ɔ lɔmɔ̌.)
11 Hwenu e Jezu ɖɔ mawuxó nú ahwan ɔ é ɔ, é wa nǔ hú nǔ kplɔ́nkplɔ́n yě kpowun. É lɛ́ kpé nukún dó hudó agbaza tɔn yětɔn wú. É bló nǔɖuɖu gbɔn nǔjíwǔ gblamɛ bo byɔ́ ahwanvú tɔn lɛ́ ɖɔ yě ní má nú yě. (Mak. 6:41) Mɔ̌ mɛ ɔ, é kplɔ́n ahwanvú tɔn lɛ́ lěe yě ná nɔ wa mɛsɛntɔ́zɔ́ nú mɛ ɖěvo lɛ́ gbɔn é. É lɛ́ xlɛ́ ɖɔ azɔ̌ tawun tawun lɛ́ wiwa ɖi éé mɛsɛntɔ́ agun tɔn lɛ́ nɔ wa lɛ́ é ɖo tají. Dǒ nukún awǎjijɛ e mɛsɛ́dó lɛ́ ná ko ɖó ɖó yě ɖ’alɔ ɖo nǔɖuɖu énɛ́ e Jezu bló gbɔn nǔjíwǔ gblamɛ é mímá mɛ káká bɔ “mɛ lɛ́ bǐ ɖu bo gɔ́ xo” é mɛ kpɔ́n! (Mak. 6:42) É ɖo wɛn ɖɔ é kún nyí azɔn nukɔntɔn e nǔ mɛ lɛ́ tɔn ɖu ayi mɛ nú Jezu hú éɖésúnɔ tɔn é nɛ́ ó. É zán gbɛzán tɔn ayǐkúngban jí tɔn ɔ blěbú dó wa mɛsɛntɔ́zɔ́ nú mɛ ɖěvo lɛ́. (Mat. 4:23; 8:16) Sɔ́ e Jezu sɔ́ éɖée hwe bo kplɔ́n nǔ mɛ lɛ́, bo lɛ́ kpé nukún dó hudó yětɔn lɛ́ wú é d’awǎjijɛ n’i, bɔ lɛ́ jɛmɛ n’i. É ɖo wɛn ɖɔ hwi lɔ ná mɔ awǎjijɛ ɖaxó ényí a ɖo gbesisɔmɛ bo ná nyí mɛsɛntɔ́ agun tɔn lobo ná wa mɛsɛntɔ́zɔ́ nú mɛ ɖěvo lɛ́ ɔ nɛ́.
Wǎn yí nú Jexóva kpó jlǒ e a ɖó bá wa mɛsɛntɔ́zɔ́ nú mɛ ɖěvo lɛ́ é kpó ná sísɛ́ we bɔ a ná wa mɛsɛntɔ́zɔ́ ɖo agun ɔ mɛ lěe a kpé wú gbɔn é (Kpɔ́n akpáxwé 11) a
12. Étɛ́wú mǐ mɛ ɖě ma ka ɖó hwɛjijɔ bo ná ɖɔ mǐ kún ɖó nǔ káká ɖé bo ná wa ɖo agun ɔ mɛ ó ǎ?
12 Ényí a mɔ ɖɔ émí kún ɖó nǔwúkpíkpé bǔnɔ ɖé ó hǔn, ma nú awakanmɛ kú we ó. É ɖo wɛn ɖɔ a ɖó jijɔ e sixú zɔ́n bɔ a ná nyɔ́ zán ɖo agun ɔ mɛ lɛ́ é. Lin tamɛ dó nǔ e Pɔ́lu ɖɔ ɖo 1 Kɔlɛ́ntinu lɛ́ 12:12-30 mɛ é jí, énɛ́ gúdo hǔn, byɔ́ Jexóva ɖɔ é ní d’alɔ émí bónú émí ná mɔ lěe é kan émí gbɔn é. Xó Pɔ́lu tɔn lɛ́ xlɛ́ nyi wɛn ɖɔ mɛsɛntɔ́ Jexóva tɔn lɛ́ bǐ ɖɔhun ɔ, a ɖó azɔ̌ tají éé lɛ́ xɔ akwɛ́ é ɖé ɖo agun ɔ mɛ. Ényí a ma ko ɖó jijɔ ɖěɖěe ná zɔ́n bɔ a ná nyí mɛsɛntɔ́ agun tɔn ɖé lɛ́ é din ǎ hǔn, ma nú awakanmɛ kú we ó. É nyɔ́ wa ɔ, étɛ́wú a ma ka ná wa nǔ e wú a kpé é bǐ bo ná nyɔ́ zán nú Jexóva kpó nɔví towe lɛ́ kpó ǎ? Ðeji ɖɔ mɛxó agun tɔn lɛ́ ná ɖó ayi nǔwúkpíkpé towe lɛ́ wú bo ná zé azɔ̌ ɖěbǔ e a sixú wa é dó así nú we.—Hlɔ̌. 12:4-8.
13. Nɛ̌ jijɔ e súnnu e è sɔ́ lɛ́ é ɖó ná ɖó lɛ́ é gěgé ka kan klisánwun lɛ́ bǐ gbɔn?
13 Lin tamɛ dó hwɛjijɔ ɖěvo e wú a ɖó ná dó gǎn bá jɛxá lobo ná nyí mɛsɛntɔ́ agun tɔn é jí: Jijɔ kpó nǔwúkpíkpé kpó e é byɔ́ lɛ́ é gěgé kan klisánwun lɛ́ bǐ. Nǔgbó ɔ, klisánwun lɛ́ bǐ wɛ ɖó ná sɛkpɔ́ Jexóva, ná nɔ ná nǔ mɛ kpó xomɛhunhun kpó, bo lɛ́ sɔ́ kpɔ́ndéwú ɖagbe ɖ’ayǐ ɖo gbɛzínzán klisánwun tɔn kpáxwé. Amɔ̌ din ɔ, mi nú mǐ ní kpɔ́n nǔ e nɔví súnnu ɖé sixú wa tawun bá dó kpé wú lɛ́ é.
LĚE È SIXÚ KPÉ WÚ GBƆN É
14. Étɛ́ ka nyí tínmɛ è ní nyí “mɛ e sísí jɛxá é” tɔn? (1 Timɔtée 3:8-10, 12)
14 Mi nú mǐ ní kpɔ́n jijɔ e xó è ɖɔ ɖo 1 Timɔtée 3:8-10, 12 mɛ é ɖé lɛ́. (Xa.) Mɛsɛntɔ́ agun tɔn ɖé ɖó ná “nyí mɛ e sísí jɛxá é.” È sixú lɛ́ tínmɛ nukɛgbe énɛ́ dó “mɛ e ma nyí fanfúnnɔ ǎ é”, “bowlínúnǔtɔ́ alǒ bowlínúazɔ̌tɔ́”, kabǐ “mɛ e nɔ wa nǔ ɖo ali ɖé nu bɔ mɛ lɛ́ sixú ɖó sísí n’i” é. Énɛ́ ɖo xlɛ́xlɛ́ wɛ ɖɔ a kún sixú ko nǔ, alǒ ɖɔ fanfún gbeɖé ó ǎ. (Nǔt. 3:1, 4) É ɖo mɔ̌ có, a ɖó ná nɔ kpé nukún dó azɔ̌ e è sɔ́ dó así nú we lɛ́ é bǐ wú dó nǔjɔnǔ mɛ. Ényí è nɔ mɔ we dó mɔ mɛ ɖejidéwú ɔ, agun ɔ ná nɔ ɖó sísí nú we.
15. Étɛ́ ka nyí tínmɛ è “nyí gbɛtɔ́ nuwenɔ ǎ” kpó è “ná yí wǎn nú afu ǎ” kpó tɔn?
15 É ɖó ná “nyí gbɛtɔ́ nuwenɔ ǎ,” énɛ́ ɖo xlɛ́xlɛ́ wɛ ɖɔ a nɔ ɖɔ nǔgbó, bo lɛ́ nyí mɛ ɖejidéwú. A nɔ ɖɔ gbe bo nɔ wa gbe, bo nɔ flú mɛ ɖěvo lɛ́ ǎ. (Nǔx. 17:20) É ɖó ná “yí wǎn nú afu ǎ,” énɛ́ ɖo xlɛ́xlɛ́ wɛ ɖɔ a nɔ ɖɔ nǔgbó hwenu e a kpé kwɛ́nú xá mɛ ɖěvo lɛ́ é kpó lěe a nɔ zán akwɛ́ gbɔn é kpó mɛ. A ɖó ná zɔn dó xɔ́ntɔn ɖagbe e a zun xá klisánwun hǎtɔ́ lɛ́ é jí dó ba akwɛ́ ǎ.
16. (a) Étɛ́ ka nyí tínmɛ é “nɔ jó [éɖée] dó nú vɛ̌ɛn gěgé nunu ǎ” tɔn? (b) Étɛ́ ka nyí tínmɛ è ní ɖó “ayixa mímɛ́” ɖé tɔn?
16 É ɖó ná “nɔ jó [éɖée] dó nú vɛ̌ɛn gěgé nunu ǎ,” énɛ́ ɖo xlɛ́xlɛ́ wɛ ɖɔ a kún nɔ nu ahan syɛ́nsyɛ́n zɛ xwé wú ó, alǒ è kún tuun we dó tuun ahannumúnɔ ó. É ɖó ná ɖó “ayixa mímɛ́,” énɛ́ ɖo xlɛ́xlɛ́ wɛ ɖɔ a nɔ zán gbɛ sɔgbe xá nǔgbódodó Jexóva tɔn lɛ́. A nyí mɛ maɖóblɔ̌ ǎ có, a nɔ ɖu vǐví fífá e xɔ́ntɔn vívɛ́ zunzun xá Mawu nɔ ná mɛ é tɔn.
17. Étɛ́ ka nyí tínmɛ è ní ‘tɛ́n ɛ kpɔ́n ɖɔ é jɛxá a jí’ tɔn? (1 Timɔtée 3:10; kpɔ́n ɖiɖe ɔ lɔmɔ̌.)
17 È ní ‘tɛ́n ɛ kpɔ́n ɖɔ é jɛxá a jí,’ énɛ́ ɖo xlɛ́xlɛ́ wɛ ɖɔ a ko ɖe xlɛ́ ɖɔ è hɛn ɔ, è ná sɔ́ wǔjɔmɛzɔ́ lɛ́ dó así nú émí. Énɛ́ wú ɔ, ényí mɛxó agun tɔn lɛ́ ɖe azɔ̌ ɖé nú we hǔn, nɔ xwedó wěɖexámɛ yětɔn lɛ́ kpó ali e tutoblónúnǔ ɔ nɔ xlɛ́ mɛ lɛ́ é kpó, kpó sɔxwixwe kpó. Tɛ́n kpɔ́n bo mɔ nukúnnú jɛ nǔ e azɔ̌ e è sɔ́ dó así nú we é byɔ́ é kpó hwenu e a ɖó ná fó é kpó wú. Ényí a nɔ kpé nukún dó azɔ̌ e è sɔ́ dó así nú we lɛ́ é ɖokpó ɖokpó wú kpó kanɖódónǔwú kpó ɔ, mɛ ɖěvo e ɖo agun ɔ mɛ lɛ́ é ná ɖ’ayi nukɔnyiyi towe wú, b’ɛ ná lɛ́ su nukún yětɔn mɛ. Mɛxó agun tɔn lɛ́ mi, mi nɔ tɛ́n kpɔ́n bo nɔ kplɔ́n azɔ̌ nɔví e ko bló batɛ́mu lɛ́ é. (Xa 1 Timɔtée 3:10.) Nɔví súnnu e ko bló batɛ́mu bo ɖo wǐnnyáwínnyá wɛ vɛlɛɛ, alǒ ko wínnyá lɛ́ é ɖo agun mitɔn mɛ wɛ a? Yě ka ɖó kpɔ́ndéwú ɖagbe ɖo lěe yě nɔ kplɔ́n nǔ yěɖésúnɔ gbɔn é linu a? Yě ka nɔ ná xósin ɖo kplé lɛ́ jí, bo nɔ lɛ́ ɖ’alɔ ɖo sinsɛnzɔ́ ɔ mɛ ɖo gbesisɔmɛ a? Ényí mɔ̌ hǔn, mi nɔ ɖe azɔ̌ e jɛxá xwe yětɔn lɛ́ kpó ninɔmɛ yětɔn lɛ́ kpó é nú yě. Mɔ̌ mɛ ɔ, nɔví súnnu wínnyáwínnyá énɛ́ lɛ́ sixú nyí mɛ e è ko “tɛ́n kpɔ́n” bo mɔ ɖɔ yě “jɛxá” lɛ́ é. Énɛ́ ɔ, yě sixú jɛxá bo nyí mɛsɛntɔ́ agun tɔn hwenu e yě ná kpo ɖo wǐnnyáwínnyá mɛ é.
Mɛxó agun tɔn lɛ́ sixú tɛ́n nɔví súnnu e ko bló batɛ́mu lɛ́ é kpɔ́n ɖɔ yě “jɛxá a jí” gbɔn azɔ̌ lɛ́ sísɔ́ d’así nú yě gblamɛ (Kpɔ́n akpáxwé 17)
18. Étɛ́ ka nyí tínmɛ mɛ e wú ‘è ma mɔ nǔ ɖě ɖɔ dó ǎ’ é tɔn?
18 É ɖó ná nyí mɛ e wú ‘è ma mɔ nǔ ɖě ɖɔ dó ǎ’ é, énɛ́ ɖo xlɛ́xlɛ́ wɛ ɖɔ mɛ ɖěbǔ sixú dó hwɛ we ɖɔ a wa nǔ nyanya syɛ́nsyɛ́n ɖé, bɔ kúnnuɖenú lɛ́ xlɛ́ ǎ. É ɖo wɛn ɖɔ è sixú dó hwɛ klisánwun lɛ́ dó acɛ jí. È dó hwɛ gěgé Jezu dó acɛ jí, bɔ é lɛ́ ɖɔ ɖ’ayǐ ɖɔ è ná wa nǔ ɖokpó ɔ nú ahwanvú émítɔn lɛ́ lɔmɔ̌. (Jaan 15:20) É ɖo mɔ̌ có, ényí a kpo ɖo walɔ mímɛ́ zán wɛ Jezu ɖɔhun ɔ, a ná ɖó nyǐkɔ ɖagbe ɖo agun ɔ mɛ.—Mat. 11:19.
19. Étɛ́ ka nyí tínmɛ ‘asi ɖokpó wɛ é ɖó ná ɖó’ tɔn?
19 ‘Asi ɖokpó wɛ é ɖó ná ɖó.’ Ényí a ko wlí alɔ ɔ, a ɖó ná tɛ́ dó tuto alɔwlíwlí tɔn dodó e Jexóva ɖó é wú, é wɛ nyí asú ɖokpó, asi ɖokpó. (Mat. 19:3-9) Súnnu klisánwun ɖé ɖó ná lɛ aga gbeɖé ǎ. (Ebl. 13:4) É ka lɛ́ kpo xó. A ɖó ná nɔ gbejí nú asi towe; a ɖó ná wa nǔ xá nyɔ̌nu ɖěvo lɛ́ gbeɖé ɖo ali e ma sɔgbe ǎ é nu ǎ.—Jɔb. 31:1.
20. Nɛ̌ súnnu ɖé ka nɔ kpé nukún dó xwédo tɔn wú “ɖo ali ɖagbe nu” gbɔn?
20 É ‘ɖó ná nɔ kpé nukún dó vǐ tɔn lɛ́ kpó xwédo éɖésúnɔ tɔn kpó wú ɖo ali ɖagbe nu.’ Ényí tatɔ́ xwédo tɔn ɖé wɛ a nyí ɔ, a ɖó ná nɔ kpé nukún dó azɔ̌ towe lɛ́ wú dó nǔjɔnǔ mɛ. Nɔ nɔ nukɔn nú mawusinsɛn ɖo xwédo mɛ mitɔn ɖo gbesisɔmɛ. Nɔ jlá wɛn ɔ hwɛhwɛ xá hǎgbɛ́ xwédo towe tɔn lɛ́ ɖokpó ɖokpó lěe a kpé wú gbɔn é. D’alɔ vǐ towe lɛ́ bónú yěɖésúnɔ ní tɛ́n kpɔ́n bo zun xɔ́ntɔn vívɛ́ xá Jexóva. (Efɛ́. 6:4) Súnnu e nɔ kpé nukún dó xwédo tɔn wú é nɔ xlɛ́ ɖɔ émí sixú kpé nukún dó agun ɔ wú.—Sɔ́ jlɛ́ dó 1 Timɔtée 3:5 wú.
21. Ényí a ma ko nyí mɛsɛntɔ́ agun tɔn ǎ ɔ, étɛ́ a ka sixú wa?
21 Nɔví súnnu lɛ́ mi, ényí mi ma ko nyí mɛsɛntɔ́ agun tɔn ǎ hǔn, mi kɛnklɛ́n xa xóta élɔ́ ganjí, bo xo ɖɛ sɛ́dó Jexóva dó xó ɔ wú. Mi kplɔ́n nǔ dó jijɔ ɖěɖěe mɛsɛntɔ́ agun tɔn lɛ́ ɖó ná ɖó lɛ́ é wú, bo wa azɔ̌ syɛ́nsyɛ́n dó ɖó yě. Mi lin tamɛ dó lě do mi yí wǎn nú Jexóva, gɔ́ nú nɔví súnnu kpó nɔví nyɔ̌nu kpó mitɔn lɛ́ sɔ é jí. Mi ná hlɔ̌nhlɔ́n jlǒ e mi ɖó bá wa mɛsɛntɔ́zɔ́ nú yě é. (1 Pi. 4:8, 10) Mi tɛ́n kpɔ́n bo ɖu vǐví awǎjijɛ e mi ná mɔ ɖo mɛsɛntɔ́zɔ́ wiwa nú xwédo gbigbɔ tɔn mitɔn mɛ é tɔn. Jexóva ní kɔn nyɔ̌ná dó gǎn ɖěɖěe dó wɛ mi ɖe bá jɛxá bá nyí mɛsɛntɔ́ agun tɔn lɛ́ é jí nú é ní túnflá!—Filí. 2:13.
HAN 17 “Un jló”
a ÐIÐE LƐ́ SÍN TÍNMƐ: Ðo amyɔxwé ɔ, Jezu ɖo mɛsɛntɔ́zɔ́ wa nú ahwanvú tɔn lɛ́ wɛ kpó mɛɖéesɔ́hwe kpó; ɖo aɖisíxwé ɔ, mɛsɛntɔ́ agun tɔn ɖé ɖo alɔ dó nɔví súnnu mɛxómɔ ɖé wɛ ɖo agun ɔ mɛ.
