1. Etɛwu mɛ gegě ka nɔ flú?

ÉGBÉ ɔ sinsɛn gegě wɛ nɔ ɖɔ ɖɔ emi nyí Klisanwun, bo nɔ lɛ́ sɛn Mawu lee é ba gbɔn é enyíì. Hwɛjijɔ e wu mɛ gegě flú bǐ é nɛ. Ye nɔ kanbyɔ yeɖée ɖɔ: “Sinsɛn nǔgbo ɖé ka ɖè à? Alǒ sinsɛn lɛ bǐ wɛ nɔ nyɔ́ Mawu nukúnmɛ à?” Mǐ ka kúdeji ɖɔ mǐ mɛ Kúnnuɖetɔ́ Jehovah tɔn lɛ wɛ nɔ kplɔ́n nǔgbo ɔ mɛ, bɔ lee mǐ nɔ sɛn Jehovah gbɔn é wɛ nyí ali ɖokpo e nu mǐ sixu sɛn ɛ ɖè b’ɛ na nyɔ́ nukún tɔn mɛ é à? É ka nyɔ́ bló dóo ɖɔ è ni kú dó nǔ enɛ jí à? Mǐ ni gbéjé kúnnuɖenú ɖé lɛ kpɔ́n.

2. Etɛwu mɛsɛ́dó Pɔlu ka ganjɛ nǔgbo ɔ wu? (1 Tɛsalonikinu lɛ 1:5)

² Mɛsɛ́dó Pɔlu ganjɛ nǔgbo ɔ wu syɛnsyɛn. (Xà 1 Tɛsalonikinu lɛ 1:5.) Ganjɛwu enɛ jinjɔn lee nǔ nɔ cí nú mɛ é jí ǎ. É nyɔ́ wà ɔ, Pɔlu nɔ xwè sɔ dó kplɔ́n Mawuxó ɔ ganji. É ɖi nǔ ɖɔ, “nǔ e è wlán dó Mawuxówema ɔ mɛ ɔ, Mawu wɛ sɔ́ bǐ dó ayi mɛ nú mɛ lɛ.” (2 Tim. 3:16) Etɛ lɛ é ka kplɔ́n? Ðò Mawuxówema ɔ mɛ ɔ, Pɔlu mɔ kúnnuɖenú ɖejid’ewu e xlɛ́ ɖɔ Jezu wɛ nyí Mɛsiya e sín akpá è dó é; kúnnuɖenú enɛ wɛ sinsɛngán Jwifu lɛ tɔn ka xò nyi kɛ́n. Sinsɛngán yɛmɛnúwatɔ́ enɛ lɛ nɔ yí nugo ɖɔ emi sɔ́ Mawu sín afɔ ɖó te, amɔ̌, nǔ e Mawu gbɛ́ wǎn na lɛ é wɛ ye nɔ wà. (Ti. 1:16) Pɔlu cí yeɖɔhun ǎ; é nɔ cyan kɛ́n nú nǔ ɖěɖee é na ɖi nǔ na ɖò Xó Mawu tɔn mɛ lɛ é ǎ. É ɖò gbesisɔmɛ, bo “jlá tito Mawu tɔn ɔ bǐ” mɛ, bo lɛ́ zán gbɛ̀ sɔgbe xá.—Mɛ. 20:27.

3. É ka byɔ ɖɔ mǐ ni mɔ xósin nú nǔkanbyɔ mǐtɔn lɛ bǐ hwɛ̌ cobo kúdeji ɖɔ mǐ mɔ nǔgbo ɔ wɛ à? (Lɛ̌ kpɔ́n gbǎví “ Azɔ̌ Jehovah Tɔn lɛ kpo Linlin Tɔn lɛ kpo ‘Sukpɔ́ Bo Gégé.’”)

³ Mɛɖé lɛ nɔ ɖó nukún ɖɔ sinsɛn nǔgbo ɔ ɖó na kpéwú, bo na xósin nú nǔkanbyɔ lɛ bǐ, é na bo tlɛ nyí nǔkanbyɔ ɖěɖee Biblu ma na xósin na ǎ lɛ é ɔ nɛ. Nǔ enɛ e ye nɔ ɖó nukún é ka ɖò jlɛ̌ jí à? Mǐ ni ɖɔ xó dó kpɔ́ndéwú Pɔlu tɔn  jí. É dó wusyɛn lanmɛ nú nǔɖitɔ́ hatɔ́ tɔn lɛ ɖɔ ye ni “ba dò nú nǔ bǐ céɖécéɖé,” amɔ̌, éɖesunɔ yí gbè ɖɔ nǔ gegě tíìn bɔ emi kún mɔ nǔ jɛ mɛ ó. (1 Tɛ. 5:21) É wlán ɖɔ, “mǐ tuùn nǔ yì kpé ǎ,” bo lɛ́ ɖɔ gɔ́ na ɖɔ, “nǔ e mɔ wɛ mǐ ɖè ɔ cí è ɖò nǔ mɔ wɛ vlivli ɖò nǔkpɛ́n e kú ɔ mɛ ɖɔhun.” (1 Kɔ. 13:9, 12) Pɔlu mɔ nǔ jɛ nǔ lɛ bǐ mɛ ǎ; nǔ ɖokpo ɔ wɛ é nyí nú mǐɖesu. Amɔ̌, Pɔlu mɔ nǔ jɛ nǔ taji taji gegě wu, b’ɛ kúnkplá linlin Jehovah tɔn. É tuùn nǔ gegě, enɛ wɛ zɔ́n bɔ é ganjɛwu ɖɔ emi mɔ nǔgbo ɔ.

4. Nɛ̌ mǐ ka sixu na hlɔnhlɔn kán e mǐ kánɖeji ɖɔ mǐ mɔ nǔgbo ɔ é gbɔn? Etɛ lɛ mǐ ka na gbéjé kpɔ́n, b’ɛ kúnkplá Klisanwun nǔgbo lɛ?

⁴ Ali e nu a sixu na hlɔnhlɔn kán e a kánɖeji ɖɔ emi mɔ nǔgbo ɔ ɖè é ɖokpo ɖíe: nɔ jlɛ́ lee Jezu sɛn Jehovah gbɔn, lee Jehovah ɖesunɔ ba gbɔn é dó lee Kúnnuɖetɔ́ Jehovah tɔn lɛ ɖ’ewu gbɔn égbé é wu. Ðò xóta elɔ mɛ ɔ, mǐ na mɔ ɖɔ Klisanwun nǔgbo lɛ (1) nɔ hɔn nú vodunsinsɛn, (2) nɔ ɖó sísí nú nyikɔ Mawu tɔn, (3) nɔ yí wǎn nú nǔgbo ɔ, (4) bo nɔ lɛ́ ɖó wanyiyi ɖaxó nú yeɖée.

5. Etɛ kpɔ́ndéwú Jezu tɔn ka kplɔ́n mǐ dó ali ɖagbe hugǎn e nu è ɖó na sɛn Mawu ɖè é wu? Nɛ̌ mǐ ka sixu zán nǔ e é kplɔ́n mɛ é gbɔn?

⁵ Wanyiyi e gɔ́ngɔ́n e Jezu ɖó nú Jehovah é zɔ́n bɔ é sɛn Jehovah ɖokponɔ hwenu e é ɖò jixwé é kpo hwenu e é wá ayikúngban jí é kpo. (Luk. 4:8) É kplɔ́n ahwanvu tɔn lɛ ɖɔ Jehovah ɖokponɔ wɛ è ɖó na sɛn. Jezu kpo ahwanvu tɔn gbejinɔtɔ́ lɛ kpo ɖě zán ɖiɖe lɛ gbeɖé dó sɛn Mawu ǎ. È nɔ mɔ Mawu ǎ, enɛ wu ɔ, mɛɖé sixu bló nǔɖe b’ɛ na cí éɖɔhun ǎ. (Eza. 46:5) Bɔ ɖiɖe mɛ mímɛ́ enyíì lɛ tɔn e mɛ lɛ ka nɔ bló, bo nɔ sɔ́ dó nukɔn dó xoɖɛ é ka lo? Ðò sɛ́n wegɔ́ e ɖò Sɛ́n Wǒ lɛ mɛ é  mɛ ɔ, Jehovah ɖɔ: “Ma kpa bocyɔ ó; ma ka kpa nǔ e ɖò jinukúnsin aga lɛ, nǔ e ɖò ayikúngban jí ɖò dò lɛ . . . ɖě sín akpajlɛ ó. Ma jɛkpo bo ɖekɔ́ nú ye ó.” (Tín. 20:4, 5) Xó enɛ lɛ ɖò wɛn nú mɛ ɖěɖee ba na nyɔ́ Mawu nukúnmɛ lɛ é.

6. Kpɔ́ndéwú Mawusinsɛn tɔn tɛ Kúnnuɖetɔ́ Jehovah tɔn lɛ ka nɔ xwedó ɖò égbé?

⁶ Hwenuxó-wlantɔ́ lɛ yí gbè ɖɔ Klisanwun bǐbɛ̌mɛ tɔn lɛ sɛn Mawu kpo ayi bǐ kpo. Ði kpɔ́ndéwú ɔ, hwenuxó-wema ɖé ɖɔ ɖɔ Klisanwun enɛ lɛ “gbɛ́ wǎn nú” ɖiɖe lɛ zinzán ɖò fí ɖěɖee è nɔ sɛn Mawu ɖè lɛ é. Égbé ɔ, Kúnnuɖetɔ́ Jehovah tɔn lɛ nɔ xwedó kpɔ́ndéwú e Klisanwun xwè kanweko nukɔntɔn ɔ tɔn lɛ sɔ́ ɖ’ayǐ é. Mǐ nɔ sɔ́ ɖiɖe mɛ mímɛ́ enyíì lɛ tɔn dó nukɔn dó xoɖɛ ǎ; mǐ nɔ xoɖɛ sɛ́dó wɛnsagun lɛ ǎ. Mǐ tlɛ nɔ lɛ́ xoɖɛ sɛ́dó Jezu ǎ. Gɔ́ na ɔ, mǐ nɔ dó gbè asya ǎ, mɔ̌ jɛn mǐ ma ka nɔ lɛ́ wà nǔ ɖevo ɖebǔ b’ɛ nɔ xlɛ́ ɖɔ mǐ ɖò acɛkpikpa e ɖò tò nu lɛ é sɛn wɛ ǎ é nɛ. Ðebǔ wɛ é na bo nyí ɔ, mǐ nɔ kánɖeji bo nɔ setónú nú xó Jezu tɔn elɔ lɛ: “Aklunɔ Mawu towe wɛ a na ɖekɔ́ na.”—Mat. 4:10.

7. Vogbingbɔn e jɛ wě é tɛ lɛ ka ɖò Kúnnuɖetɔ́ Jehovah tɔn lɛ kpo sinsɛn ɖevo lɛ kpo tɛntin?

⁷ Égbé ɔ, mɛ gegě nɔ ba na ɖótó sinsɛngán nukúnɖeji lɛ. Ye nɔ yí wǎn nú ye kaka bo nɔ ɖibla sɛn ye. Mɛ gegě nɔ yì amǐsa yetɔn lɛ, nɔ xɔ wema yetɔn lɛ, bo nɔ lɛ́ na kɛ́ti gegě dó nɔ gudo nú ye. Mɛɖé lɛ nɔ ɖi nǔ nú nǔ e ye nɔ ɖɔ lɛ é bǐ. Enyi sinsɛnnɔ enɛ lɛ mɔ Jezu ɖesunɔ ɔ, akpakpa ka na sɔ́ ye mɔ̌ à? Amɔ̌, mɛ ɖěɖee nɔ sɛn Mawu nǔgbo ɔ lɛ é gbɔn vo nú mɛ enɛ lɛ, ɖó yedɛɛ lɛ ɖó sinsɛngán ǎ. Nǔgbo wɛ ɖɔ mǐ nɔ ɖó sísí nú mɛ ɖěɖee nɔ kpé nukún dó nǔ lɛ wu ɖò tɛntin mǐtɔn lɛ é, amɔ̌, mǐ yí gbè nú nǔkplɔnmɛ Jezu tɔn elɔ e zawě é: “Nɔví nɔví wɛ mi bǐ nyí.” (Mat. 23:8-10) Mǐ nɔ sɛn gbɛtɔ́ ǎ; sinsɛngán lɛ oo, toxóɖɔtɔ́gán lɛ oo, mǐ nɔ sɛn ye ɖě ǎ. Mɔ̌ jɛn mǐ ma ka nɔ lɛ́ nɔ gudo nú ye ǎ é nɛ. É nyɔ́ wà ɔ, mǐ nɔ ɖó wǔ zɔ nú gbɛ̀ ɔ. Ðò akpá enɛ lɛ bǐ xwé ɔ, mǐ gbɔn vo bǐ mlɛ́mlɛ́ nú sinsɛn ɖevo e nɔ ɖɔ ɖɔ emi nyí Klisanwun lɛ é.—Jaan 18:36.

8. Nɛ̌ mǐ ka wà gbɔn bo tuùn ɖɔ Jehovah ba ɖɔ è ni sɔ́ nyikɔ emitɔn sù, bo lɛ́ bló bonu mɛ bǐ ni tuùn?

⁸ Ðò ninɔmɛ ɖé mɛ ɔ, Jezu xoɖɛ ɖɔ: “Daa, . . . sɔ́ nyikɔ towe sù.” Jehovah ɖesunɔ sɔ́ gbè dó jǐ, bo na sinkɔn nú ɖɛ enɛ sín jixwé, bo d’akpá ɖɔ emi na sɔ́ nyikɔ emitɔn sɔ́ sù. (Jaan 12:28) Ðò sinsɛnzɔ́ Jezu tɔn bǐ hwenu ɔ, é sɔ́ nyikɔ Tɔ́ tɔn tɔn sù. (Jaan 17:26) Enɛ wu ɔ, é sɔgbe ɖɔ è ni ɖó nukún ɖɔ Klisanwun nǔgbo lɛ ni gó dó zán nyikɔ Mawu tɔn, lobo lɛ́ ɖè nyikɔ enɛ xlɛ́ mɛ ɖevo lɛ.

9. Nɛ̌ Klisanwun xwè kanweko nukɔntɔn ɔ tɔn lɛ ka ɖexlɛ́ ɖɔ emi ɖó sísí nú nyikɔ Mawu tɔn gbɔn?

⁹ È ɖó agun Klisanwun tɔn ɔ ayǐ ɖò xwè kanweko nukɔntɔn ɔ mɛ, b’ɛ na nɔ zaan é ɔ, Jehovah “kpé nukún dó mɛ e ma nyí Jwifu ǎ lɛ wu . . ., bo sɔ́ togun ɖokpo ɖò ye mɛ, bɔ é nyí étɔn.” (Mɛ. 15:14) Klisanwun enɛ lɛ nɔ gó dó zán nyikɔ Mawu tɔn, lobo nɔ lɛ́ ɖexlɛ́ mɛ ɖevo lɛ. Ye nɔ zán nyikɔ Mawu tɔn titewungbe ɖò sinsɛnzɔ́ ɔ kpo wema e ye nɔ wlán lɛ é kpo mɛ. * Mɔ̌ mɛ ɔ, ye nɔ ɖexlɛ́ ɖɔ emiɖokpo wɛ nɔ ɖè nyikɔ Mawu tɔn xlɛ́.—Mɛ. 2:14, 21.

10. Nɛ̌ mǐ ka wà gbɔn bo tuùn ɖɔ Kúnnuɖetɔ́ Jehovah tɔn lɛ kɛɖɛ wɛ nɔ ɖè nyikɔ Jehovah ɔ xlɛ́ mɛ lɛ?

¹⁰ Kúnnuɖetɔ́ Jehovah tɔn lɛ kɛɖɛ wɛ  ka nɔ ɖè nyikɔ Jehovah tɔn xlɛ́ ɖò égbé à? Kúnnuɖenú ɖé lɛ ɖíe. Égbé ɔ, sinsɛngán gegě ko wà nǔ e wu ye kpé é bǐ, bo na dó bló bonu mɛɖé ma tuùn nú Mawu ɖó nyikɔ éɖesunɔ tɔn ɖé ó. Ye ɖè nyikɔ Mawu tɔn sín lilɛdógbeɖevomɛ Biblu tɔn yetɔn lɛ mɛ, bɔ ɖò ninɔmɛ ɖé lɛ mɛ ɔ, ye gbɛ́ ɖɔ mɛɖé ni ma zán nyikɔ Mawu tɔn ɖò amǐsa yetɔn lɛ hwenu ó. * É ɖò wɛn ɖɔ Kúnnuɖetɔ́ Jehovah tɔn lɛ kɛɖɛ wɛ nɔ ɖó sísí nú nyikɔ Jehovah tɔn, lobo nɔ lɛ́ wlí yɛ̌yi e jɛxa ɛ é na. Mǐ ɖò nyikɔ Mawu tɔn ɖexlɛ́ wɛ gbɔn gbɛ̀ ɔ bǐ mɛ, hú sinsɛn ɖevo ɖebǔ. Enɛ wu ɔ, mǐ nɔ wà nǔ e wu mǐ kpé lɛ é bǐ dó ɖexlɛ́ ɖɔ Kúnnuɖetɔ́ Jehovah tɔn lɛ wɛ nú mǐ. (Eza. 43:10-12) Mǐ ko zín Biblu Lẹdogbedevomẹ Aihọn Yọyọ Tọn livi 240 jɛji. Biblu enɛ sɔ́ nyikɔ Jehovah ɔ dó tɛn e mɛ é ɖó na nɔ bɔ lilɛdógbeɖevomɛtɔ́ ɖevo lɛ ɖè síìn lɛ é. Gɔ́ na ɔ, mǐ nɔ ɖè wema jinjɔn Biblu jí ɖěɖee mɛ è nɔ zán nyikɔ Jehovah ɔ ɖè lɛ é tɔ́n dó gbè 1 000 jɛji mɛ.

11. Nɛ̌ Klisanwun bǐbɛ̌mɛ tɔn lɛ ka xlɛ́ ɖɔ emi yí wǎn nú nǔgbo ɔ gbɔn?

¹¹ Jezu yí wǎn nú nǔgbo ɔ, enɛ wɛ nyí nǔgbo e kúnkplá Mawu kpo linlin Tɔn lɛ kpo é. Jezu zán gbɛ̀ sɔgbe xá nǔgbo enɛ, bo lɛ́ ɖè nǔgbo enɛ xlɛ́ mɛ ɖevo lɛ. (Jaan 18:37) Ahwanvu nǔgbo Jezu tɔn lɛ lɔ yí  wǎn nú nǔgbo ɔ tawun. (Jaan 4:23, 24) Mɛsɛ́dó Piyɛ́ɛ tlɛ ylɔ́ sinsɛn Klisanwun tɔn ɖɔ “nǔgbo sín ali.” (2 Pi. 2:2) Ðó Klisanwun bǐbɛ̌mɛ tɔn lɛ yí wǎn nú nǔgbo ɔ tawun wutu ɔ, ye gbɛ́ sinsɛn-núkplɔnmɛ lɛ, hwɛndomɛnú lɛ, kpo linlin gbɛtɔ́ lɛ tɔn kpo e ma sɔgbe xá nǔgbo ɔ ǎ lɛ é. (Kolo. 2:8) Mɔ̌ ɖokpo ɔ, égbé ɔ, Klisanwun nǔgbo lɛ nɔ sɔ́ nǔ e ye ɖi nǔ na lɛ é bǐ jinjɔn Xó Jehovah tɔn jí tɛnwin lɛnwin, bo nɔ lɛ́ zán gbɛ̀ sɔgbe xá, enɛ ɔ, ye nɔ ɖexlɛ́ ɖɔ emi ɖò tintɛnkpɔn wɛ bo na ‘zán gbɛ̀ ɖò nǔgbo ɔ mɛ.’—3 Jaan 3, 4.

12. Enyi mɛ ɖěɖee nɔ kpé nukún dó nǔ lɛ wu ɖò tɛntin mǐtɔn lɛ é ɖ’ayi wu ɖɔ é byɔ ɖɔ è ni jlá nǔ e mǐ mɔ nukúnnú jɛ mɛ lɛ é ɖě ɖó ɔ, etɛ ka nɔ jɛ? Aniwu ye ka nɔ wà mɔ̌?

¹² Égbé ɔ, togun Mawu tɔn nɔ yí nugo ɖɔ emi mɔ nǔ jɛ nǔ e ɖò Biblu mɛ lɛ é mɛ hlɛ́nhlɛ́n ǎ. Hweɖelɛnu ɔ, lee ye nɔ tinmɛ nǔkplɔnmɛ Biblu tɔn ɖé gbɔn é, alǒ lee ye nɔ bló tuto nú nǔ lɛ gbɔn ɖò agun lɛ mɛ é nɔ sɔgbe ǎ. Enɛ ɖó na kpaca mǐ ǎ. Biblu tinmɛ nyi wɛn ɖɔ nukúnnúmɔjɛnǔmɛ nǔgbo ɔ tɔn na ɖò jijɛji wɛ. (Kolo. 1:9, 10) Kpɛɖé kpɛɖé wɛ Jehovah nɔ ɖè nǔgbo ɔ xlɛ́ mǐ, bɔ mǐ ɖó na ɖò gbesisɔmɛ bá nɔte kaka jɛ hwenu e weziza nǔgbo ɔ tɔn na hɔ́n bǐ é. (Nǔx. 4:18) Enyi mɛ ɖěɖee nɔ kpé nukún dó nǔ lɛ wu ɖò tɛntin mǐtɔn lɛ é ɖ’ayi wu ɖɔ é byɔ ɖɔ è ni jlá nukúnnúmɔjɛnǔmɛ e mǐ ɖó dó nǔgbo Biblu tɔn ɖé wu é ɖó ɔ, ye nɔ dán lɛjɛlɛjɛ cobo nɔ bló huzuhuzu lɛ ǎ. Égbé ɔ, sinsɛn gegě nɔ ɖyɔ nǔkplɔnmɛ yetɔn lɛ, bo na dó nyɔ́ ɖò sinsɛnví yetɔn lɛ sí, alǒ bonu mɛ gegě na dó tuùn ye ɖò gbɛ̀ ɔ mɛ. Amɔ̌, Kúnnuɖetɔ́ Jehovah tɔn lɛ nɔ wà mɔ̌ ǎ; ye nɔ jlá nukúnnúmɔjɛnǔmɛ e ye ɖó é ɖó, bo na dó sɛkpɔ́ Mawu d’eji, lobo sɛn ɛ lee Jezu wà gbɔn é. (Ja. 4:4) Mǐ nɔ kpɔ́n ɖɔ linlin e mɛ lɛ ɖó dó nǔ lɛ wu ɖò gbɛ̀ ɔ mɛ é ɖyɔ, bo nɔ vɔ́ nukúnnúmɔjɛnǔmɛ mǐtɔn jlaɖó ǎ, loɔ, nukúnnúmɔjɛnǔmɛ e mǐ ɖó dó Biblu wu é zawě hugǎn wu wɛ zɔ́n bɔ mǐ nɔ bló huzuhuzu lɛ. Mǐ yí wǎn nú nǔgbo ɔ!—1 Tɛ. 2:3, 4.

13. Jijɔ taji hugǎn tɛ Klisanwun nǔgbo lɛ ka nɔ ɖexlɛ́? Nɛ̌ enɛ ka nɔ jɛ wě ɖò Kúnnuɖetɔ́ Jehovah tɔn lɛ tɛntin égbé gbɔn?

¹³ Jijɔ ɖaaɖagbe gegě wɛ è nɔ sɔ́ dó tuùn Klisanwun xwè kanweko nukɔntɔn ɔ tɔn lɛ na, amɔ̌, ee ɖò taji hugǎn é wɛ nyí wanyiyi. Jezu ɖɔ: “Wanyiyi e mi na ɖó nú miɖée ɔ, wɛ na ɖexlɛ́ mɛ lɛ bǐ ɖɔ mi nyí ahwanvu ce nǔgbo.” (Jaan 13:34, 35) Égbé ɔ, Kúnnuɖetɔ́ Jehovah tɔn e gbɔn gbɛ̀ ɔ bǐ mɛ lɛ é nɔ ɖu vivǐ wanyiyi adodwé ɔ kpo bǔninɔ kpo tɔn. Mǐ gbɔn vo nú sinsɛn ɖě lɛ bǐ, ɖó mǐ gosin tò vovo mɛ, bo lɛ́ ɖó aca vovo lɛ có, xwédo ɖé ɖɔhun wɛ mǐ cí. Mǐ nɔ mɔ enɛ ɖò kplé agun tɔn mǐtɔn lɛ kpo kpléɖókpɔ́ lɛ kpo jí. Kúnnuɖenú enɛ nɔ na hlɔnhlɔn kán e mǐ kánɖeji ɖɔ lee Jehovah ba ɖɔ mǐ ni sɛn emi gbɔn é sɛn ɛ gbɔn wɛ mǐ ɖè.

14. Sɔgbe xá Kolosinu lɛ 3:12-14 ɔ, ali taji tɛ nu mǐ ka sixu ɖè wanyiyi ɖaxó xlɛ́ mǐɖée ɖè?

¹⁴ Biblu byɔ mǐ ɖɔ mǐ ni “ɖó wanyiyi ɖaxó nú [mǐɖée].” (1 Pi. 4:8) Ali e nu mǐ nɔ ɖè wanyiyi mɔ̌hun xlɛ́ ɖè é ɖokpo wɛ nyí ɖɔ mǐ nɔ sɔ́ hwɛ kɛ mǐɖée, bo nɔ lɛ́ kpɔ́n dó nǔwanyido mǐtɔn lɛ wu dó wà nǔ xá mǐɖée ǎ. Mǐ nɔ lɛ́ ba ali ɖěɖee nu mǐ na hun alɔ dó na nǔ mɛ ɖěɖee ɖò agun ɔ mɛ lɛ é bǐ, bo lɛ́ yí ye ɖè lɛ é, é na bo tlɛ nyí mɛ ɖěɖee wà nǔ nyi dò dó mǐ lɛ é ɔ nɛ. (Xà Kolosinu lɛ 3:12-14.) Enyi mǐ ɖò wanyiyi mɔ̌hun ɖexlɛ́ wɛ ɔ, xlɛ́xlɛ́ wɛ mǐ ɖè mɔ̌ ɖɔ mǐ nyí Klisanwun nǔgbo lɛ nɛ.

15. Klisanwun xwè kanweko nukɔntɔn ɔ tɔn lɛ ɖɔhun ɔ, ali ɖevo tɛ lɛ nu mǐ ka nɔ sɛn Mawu ɖè lee é ba gbɔn é?

¹⁵ Mǐ nɔ lɛ́ sɛn Mawu lee é ba gbɔn é Klisanwun xwè kanweko nukɔntɔn ɔ tɔn lɛ ɖɔhun ɖò ali gegě ɖevo lɛ nu. Ði kpɔ́ndéwú ɔ, lee tutoblonunu mǐtɔn bló tuto nú nǔ lɛ gbɔn é cí Klisanwun enɛ lɛ tɔn ɖɔhun. Mǐ ɖó nukúnkpénuwutɔ́ lɛdo tɔn lɛ, mɛxo agun tɔn lɛ kpo devízɔ́watɔ́ sinsɛnzɔ́wiwa tɔn lɛ kpo yeɖɔhun. (Fili. 1:1; Ti. 1:5) Gɔ́ na ɔ, yeɖɔhun ɔ, mǐ nɔ ɖó sísí nú sɛ́n e Jehovah dó dó xóɖóxámɛ kpo alɔwliwli kpo wu é, nǔ e Mawu ɖɔ dó hun zinzán wu é, bo nɔ lɛ́ cyɔn alɔ agun ɔ jí bonu mɛ ɖěɖee ma ba na xwedó sɛ́n Mawu tɔn lɛ ǎ é ni ma wà nǔ dó wǔ tɔn ó.—Mɛ. 15:28, 29; 1 Kɔ. 5:11-13; 6:9, 10; Ebl. 13:4.

16. Etɛ xó e ɖò Efɛzinu lɛ 4:4-6 mɛ lɛ é ka kplɔ́n mǐ?

¹⁶ Jezu ɖɔ ɖɔ mɛ gegě na ɖɔ ɖɔ emi nyí ahwanvu emitɔn, amɔ̌, é kún nyí ye bǐ sín ayi mɛ wɛ nǔ na nyí mɔ̌ ɖè ó. (Mat. 7:21-23) Biblu lɛ́ ɖɔ nú mǐ ɖɔ ɖò azǎn gudogudo tɔn lɛ mɛ ɔ, mɛ gegě na “nyí Mawusɛntɔ́ ɖò nukúnta.” (2 Tim. 3:1, 5) É ɖò mɔ̌ có, Biblu ɖɔ nú mǐ nyi wɛn ɖɔ “nǔɖiɖi ɖokpo” alǒ sinsɛn ɖokpo wɛ Mawu yí gbè na.—Xà Efɛzinu lɛ 4:4-6.

17. Mɛ̌ mɛ̌ e ka nɔ xwedó Jezu égbé, bo ɖó nǔɖiɖi adodwé ɖokpo e tíìn é, lobo nɔ lɛ́ ɖexlɛ́?

¹⁷ Mɛ̌ mɛ̌ e ka ɖò Mawu sɛn wɛ ɖò sinsɛn nǔgbo ɖokpo e tíìn é mɛ ɖò égbé? Mǐ ko gbéjé kúnnuɖenú ɖé lɛ kpɔ́n. Mǐ ko mɔ lee Mawu ba ɖɔ è ni sɛn emi gbɔn bɔ Jezu kplɔ́n mɛ é, kpo lee Klisanwun xwè kanweko nukɔntɔn ɔ tɔn lɛ sɛn Mawu lee é ba gbɔn é gbɛn é kpo. Enɛ wu ɔ, xósin ɖokpo e nǔkanbyɔ enɛ ɖó é wɛ nyí Kúnnuɖetɔ́ Jehovah tɔn lɛ. Wǔjɔmɛ ɖaxó ɖé wɛ é nyí ɖɔ mǐ ɖò togun Jehovah tɔn mɛ, bo lɛ́ tuùn nǔgbo ɔ dó Jehovah kpo linlin tɔn lɛ kpo wu. Enɛ wu ɔ, mi nú mǐ ni kpò ɖò nǔgbo ɔ wu tɛ́dó wɛ gbánwúngbánwún.