1. Mǐ ɖó hudó Mawu tɔn cóbá ɖ’awǎjijɛ. Gbɔn nɛ̌ é?

 AWǍJIJƐ adodwé ɔ nyí xomɛ ní hun mɛ sín hweɖénu jɛ hweɖénu kpowun ǎ. É sixú nɔ ayǐ nú gbɛhwenu mɛɖé tɔn bǐ. Gbɔn nɛ̌ é? Jezu tínmɛ ɖo Mawuxó e é ɖɔ ɖo só jí é hwenu bo ɖɔ: “Awǎjijɛnɔ wɛ nyí mɛ e tuun ɖɔ émí ɖó hudó Mawu tɔn lɛ́ é.” (Mat. 5:3) Jezu tuun ɖɔ è dá gbɛtɔ́ lɛ́ kpódó jlǒ ɖaxó ɖé kpó, bónú yě ná tuun Gbɛɖótɔ́ yětɔn Jexóva Mawu, bo lɛ́ sɛn ɛ. Gɔ́ ná ɔ, ɖó “Mawu awǎjijɛnɔ” ɖé wɛ Jexóva nyí wútu ɔ, mɛ e ɖo sinsɛn ɛ wɛ lɛ́ é lɔ sixú ɖó awǎjijɛ.—1 Tim. 1:11, nwt.

2-3. (a) Sɔgbe kpó nǔ e Jezu ɖɔ é kpó ɔ, mɛ ɖěvo tɛ́ lɛ́ ka sixú ɖó awǎjijɛ? (b) Étɛ́ lɛ́ jí mǐ ka ná ɖɔ xó dó ɖo xóta élɔ́ mɛ? Étɛ́wú mǐ ka ɖó ná ɖɔ xó dó nǔ énɛ́ lɛ́ jí?

² É byɔ́ ɖɔ nǔ bǐ ní ɖo yiyi nú mǐ wɛ ganjí ɖo gbɛ mɛ cóbɔ mǐ ná ɖó awǎjijɛ wɛ a? Éǒ. Ðo Mawuxóɖiɖɔ só jí tɔn Jezu tɔn hwenu ɔ, é ɖɔ nǔɖé b’ɛ kpácá mɛ. “Mɛ e ɖo aluwɛ mɛ,” bóyá ɖó hwɛ e yě hu lɛ́ é sín agban ɖo yě kpɛn wɛ, alǒ ɖó yě ɖo wǔvɛ́ se wɛ, ɖó ninɔmɛ vɛ́ wǔ e mɛ gbɔn wɛ yě ɖe lɛ́ é wútu lɛ́ é sixú ɖó awǎjijɛ. Jezu lɛ́ ɖɔ ɖɔ “mɛ e è dó ya ná ɖó nǔjlɔ́jlɔ́wiwa wú,” alǒ mɛ e “zun” wɛ è ɖe ɖó yě nyí ahwanvú Klísu tɔn wútu lɛ́ é lɔ sixú ɖó awǎjijɛ. (Mat. 5:4, 10, 11) Amɔ̌, nɛ̌ è ka sixú ɖo ninɔmɛ mɔ̌hun lɛ́ mɛ bo ɖó awǎjijɛ adodwé ɔ gbɔn?

³ Kplɔ́nkplɔ́n mǐ wɛ Jezu ɖe ɖɔ é kún byɔ́ ɖɔ nǔ bǐ ní ɖo yiyi nú mǐ wɛ ganjí ɖo gbɛ mɛ, cóbɔ mǐ ná ɖó awǎjijɛ ó. É nyɔ́ wa ɔ, ényí mǐ sú hudó Mawu tɔn e mǐ ɖó é sín do, lobo vɛ́ kpó é kpó ɔ, mǐ ná ɖó awǎjijɛ. (Ja. 4:8) Nɛ̌ mǐ ka sixú wa  énɛ́ gbɔn? Ðo xóta élɔ́ mɛ ɔ, mǐ ná ɖɔ xó dó nǔ ɖěɖěe ná zɔ́n bɔ mǐ ná ɖó awǎjijɛ adodwé ɔ é atɔn jí.

4. Étɛ́ ka nyí nǔ nukɔntɔn e mǐ ná wa bo ná ɖó awǎjijɛ adodwé ɔ é? (Ðɛhan 1:1-3)

⁴ AFƆ 1TƆN E È NÁ ÐE É: Bo ná dó ɖó awǎjijɛ adodwé ɔ ɔ, mǐ ɖó ná nɔ xa Biblu, bo ná nɔ lɛ́ kplɔ́n. Gbɛtɔ́ lɛ́ kpó kanlin lɛ́ kpó bǐ wɛ ɖó nǔɖuɖu agbaza tɔn sín hudó, cóbá nɔ gbɛ. Amɔ̌, gbɛtɔ́ lɛ́ kɛ́ɖɛ́ jɛ́n sixú ɖu nǔɖuɖu gbigbɔ tɔn. Nǔgbó ɔ, mǐ ka ɖó hudó tɔn. Énɛ́ wú wɛ Jezu ɖɔ: “Nǔɖuɖu kɛ́ɖɛ́ wɛ nɔ hɛn mɛ ɖó gbɛ ǎ, loɔ, xó e nɔ tɔ́n sín Jexóva nu mɛ é bǐ wɛ nɔ hɛn mɛ ɖó gbɛ.” (Mat. 4:4) Hǔn, mǐ ɖó ná lɔn bónú ayǐ ɖé ná hɔ́n bɔ mǐ ná gɔn Xó xɔ akwɛ́ Mawu tɔn Biblu ɔ xa ǎ. Ðɛhanwlántɔ́ ɖokpó ɖɔ: ‘Nǔ nyɔ́ nú mɛ e nɔ yí wǎn nú kplɔ́n Jexóva tɔn, bo nɔ ɖo tamɛ lin d’é wú wɛ zǎn kéze é.’—Xa Ðɛhan 1:1-3.

5-6. (a) Étɛ́ lɛ́ mǐ ka sixú kplɔ́n ɖo Biblu mɛ? (b) Ali tɛ́ lɛ́ nu Biblu xixa ka sixú d’alɔ mǐ ɖe?

⁵ Ðó Jexóva yí wǎn nú mǐ wútu ɔ, é ɖɔ nǔ e mǐ ɖó ná wa, bo ná ɖó gbɛzán awǎjijɛnɔ é nú mǐ ɖo Xó tɔn Biblu ɔ mɛ. Mǐ nɔ kplɔ́n linlin e é ɖó nú mǐ mɛ gbɛtɔ́ lɛ́ é ɖo Biblu mɛ. Mǐ nɔ kplɔ́n lěe mǐ kpó é kpó sixú vɛ́ gbɔn é kpó nǔ e mǐ ná wa b’ɛ ná sɔ́ hwɛ mǐtɔn lɛ́ kɛ mǐ é kpó. Gɔ́ ná ɔ, mǐ nɔ lɛ́ kplɔ́n nǔ dó nukúnɖíɖó ɖaaɖagbe sɔgúdo tɔn e sín akpá é dó nú mǐ é wú. (Jel. 29:11) Nǔgbó énɛ́ lɛ́ e mǐ nɔ kplɔ́n ɖo Biblu mɛ é nɔ zɔ́n bɔ mǐ nɔ ɖó awǎjijɛ!

⁶ Lěe mǐ tuun gbɔn é ɔ, wěɖexámɛ tawun tawun e mǐ sixú zán ɖo gbɛ zínzán gbe bǐ gbe tɔn mǐtɔn mɛ lɛ́ é gěgé lɛ́vɔ́ ɖo Biblu  mɛ. Ényí mǐ nɔ xwedó wěɖexámɛ énɛ́ lɛ́ ɔ, mǐ ná ɖó awǎjijɛ. Ényí gbɛ mɛ tagba lɛ́ zɔ́n bónú awakanmɛ kú we hweɖébǔnu hǔn, nɔ zán hwenu gěgé dó xa Xó Jexóva tɔn, bo nɔ lɛ́ lin tamɛ d’é jí. Jezu ɖɔ: “É nyɔ́ wa ɔ, mɛ e se Mawuxó ɔ, bo bló ɖ’é jí lɛ́ wɛ nǔ nyɔ́ ná.”—Luk. 11:28.

7. Nɛ̌ a ka sixú ɖu le hwenu e a nɔ zán dó xa Xó Mawu tɔn ná é tɔn hú gǎn gbɔn?

⁷ Ényí a ɖo Xó Mawu tɔn xa wɛ hǔn, nɔ zán hwenu dó se vǐví nǔ e xa wɛ a ɖe é tɔn. A ko gbɔn ninɔmɛ lěhun mɛ kpɔ́n a? Mɛɖé ɖa nǔɖuɖu e a yí wǎn ná tawun é ɖé nú we. Amɔ̌, ɖó a ɖo hwlɛndó jí, alǒ a ma hwíhwɛ́ hǔn ǎ wútu ɔ, a zɔn kplakpla jí bo ɖu nǔ ɔ, ma tɛ aɖǔ jí. Amɔ̌, ée a ɖu nǔ ɔ fó é ɔ, a ɖ’ayi wú ɖɔ émí hwlɛndó dín, b’ɛ ná ko jló we ɖɔ a ní ɖu dɛ̌dɛ̌ bo ɖu vǐví tɔn. Mɔ̌ ɖokpó ɔ, a ka ko zɔn kplakpla jí, bo xa Biblu kpɔ́n bɔ énɛ́ zɔ́n bɔ a gɔn vǐví wɛn e ɖ’é mɛ é tɔn ɖu a? Nɔ zán hwenu dó ɖu vǐví Xó Mawu tɔn xixa tɔn, nɔ dó nukún nǔ lɛ́ mɛ kpɔ́n, nɔ ɖótó gbe lɛ́, bo nɔ lin tamɛ dó nǔ e a xa é jí. Mɔ̌ wiwa ná gɔ́ so nú awǎjijɛ towe.

8. Nɛ̌ “mɛsɛntɔ́ gbejínɔtɔ́ ayiɖotenánɔ” ɔ ka ɖo azɔ̌ tɔn wa wɛ gbɔn? (Lɛ̌ kpɔ́n tínmɛ e ɖo do é.)

⁸ Jezu sɔ́ “mɛsɛntɔ́ gbejínɔtɔ́ ayiɖotenánɔ” ɔ bónú é ná ná nǔɖuɖu gbigbɔ tɔn mǐ dó hwetɔnnu, bɔ mǐ ka nɔ mɔ nǔ ɖu ɖo gbigbɔ lixo ganjí. * (Mat. 24:45) Biblu wɛ nyí ajɔxanú tají e jí nǔɖuɖu e mɛsɛntɔ́ gbejínɔtɔ́ ɔ nɔ sɔ́ nǔ ná lɛ́ é bǐ nɔ jínjɔ́n é. (1 Tɛ. 2:13) Mɔ̌ mɛ ɔ, nǔɖuɖu gbigbɔ tɔn énɛ́ nɔ d’alɔ mǐ bɔ mǐ nɔ tuun linlin Jexóva tɔn e ɖo Biblu mɛ lɛ́ é. Énɛ́ wú wɛ mǐ nɔ xa xójláwéma Atɔxwɛ kpó Fɔ́n! kpó, gɔ́ nú xóta ɖěɖěe ɖo jw.org jí lɛ́ é. Mǐ nɔ sɔ́ nǔ nú kplé aklúnɔzángbla tɛ́ntin tɔn lɛ́ kpó aklúnɔzángbla fífó tɔn lɛ́ kpó. Gɔ́ ná ɔ, mǐ nɔ kpɔ́n tuto sunmɛ sunmɛ tɔn televizyɔn JW^® tɔn lɛ́ bǐ, ényí é ɖo gbe mǐtɔn mɛ ɔ nɛ́. Ényí mǐ nɔ ɖu nǔɖuɖu gbigbɔ tɔn e túnflá é ganjí ɔ, é ná d’alɔ mǐ bɔ mǐ ná ɖe afɔ wegɔ́ e ná zɔ́n bɔ mǐ ná ɖó awǎjijɛ adodwé ɔ é.

9. Ðɔ afɔ wegɔ́ e è ná ɖe bo ná ɖó awǎjijɛ adodwé ɔ é.

⁹ AFƆ 2GƆ́ E È NÁ ÐE É: Bo ná dó ɖó awǎjijɛ adodwé ɔ ɔ, mǐ ɖó ná nɔ zán gbɛ sɔgbe xá nǔgbódodó Jexóva tɔn lɛ́. Ðɛhanwlántɔ́ ɖokpó ɖɔ: “Awǎjijɛnɔ wɛ nyí mɛ e nɔ ɖi xɛsi nú Jexóva lɛ́ é bǐ, mɛ e nɔ zun zɔnlin gbɔn ali Tɔn lɛ́ jí lɛ́ é.” (Ðɛh. 128:1, nwt) È ní ɖi xɛsi nú Jexóva sín tínmɛ wɛ nyí ɖɔ è ní ɖó sísí e gɔ́ngɔ́n é n’i, bɔ énɛ́ ná zɔ́n bɔ è ná nyi alɔ nú nǔ ɖěbǔ e ná vɛ́ n’i é wiwa. (Nǔx. 16:6) Énɛ́ wú ɔ, mǐ nɔ ɖo gǎn dó wɛ hwebǐnu, bo ná zán gbɛ sɔgbe xá nǔgbódodó Mawu tɔn e kúnkplá nǔ ɖagbe kpó nǔ nyanya kpó, bɔ è tínmɛ ɖo Biblu mɛ lɛ́ é. (2 Kɔ. 7:1) Ényí mǐ nɔ wa nǔ ɖěɖěe Jexóva yí wǎn ná lɛ́ é, bo nɔ nyi alɔ nú nǔ ɖěɖěe é gbɛ́ wǎn ná lɛ́ é ɔ, mǐ ná ɖ’awǎjijɛ tawun.—Ðɛh. 37:27; 97:10; Hlɔ̌. 12:9.

10. Sɔgbe xá Hlɔ̌manu lɛ́ 12:2 ɔ, azɔ̌ tɛ́ mǐ ka ɖó?

¹⁰ Xa Hlɔ̌manu lɛ́ 12:2. Mɛɖé sixú tuun ɖɔ Jexóva ɖó acɛ bo ná ɖɔ nǔ e nyɔ́ é kpó nǔ e nylá é kpó, amɔ̌, é ɖó ná lɛ́ wá gbeta ɔ kɔn bá xwedó nǔgbódodó Mawu tɔn lɛ́. Ði kpɔ́ndéwú ɔ, mɛɖé sixú tuun ɖɔ acɛkpikpa ɖó acɛ bo ná ɖɔ bǎ e mɛ è ná kán wezun yi ɖó ɖo ali ɖaxó lɛ́ jí é, cóbó ka sixú sɔ́ jlǒ dó gbɛ́ dogbó énɛ́ lɛ́ xwedó. Wǎgbɔ tɔn ɔ, é nɔ kán wezun zɛ bǎ e mɛ é ɖó ná kán wezun yi ɖó é wú. Mǐ nɔ xlɛ́ gbɔn nǔwiwa mǐtɔn lɛ́ gblamɛ ɖɔ mǐ kú d’é jí bǐ mlɛ́mlɛ́ ɖɔ nǔgbódodó Jexóva tɔn lɛ́ xwixwedó wɛ nyí nǔ ɖagbe hú gǎn e mǐ sixú wa é. (Nǔx. 12:28)  Mɔ̌ wɛ nǔ cí nú Davídi. Nǔ e wú é ɖɔ xó élɔ́ dó Jexóva wú é nɛ́: “A ná xlɛ́ gbɛ li mì; awǎjijɛ ɖo gɔ̌n towe bo túnflá, gbɛ wɛ è nɔ ɖu ɖo gɔ̌n towe káká sɔ́yi.”—Ðɛh. 16:11.

11-12. (a) Ényí mǐ flú, alǒ awakanmɛ kú mǐ ɔ, étɛ́ wú mǐ ka ɖó ná ɖó ayi te dó? (b) Nɛ̌ xó e ɖo Filípunu lɛ́ 4:8 mɛ é ka sixú d’alɔ mǐ hwenu e mǐ ɖo ayiɖeɖayǐ mǐtɔn lɛ́ cyán wɛ é gbɔn?

¹¹ Ényí mǐ flú, alǒ awakanmɛ kú mǐ ɔ, é sixú jló mǐ ɖɔ mǐ ní wa nǔ e ná zɔ́n bɔ mǐ ná ɖó wǔvɛ́ mǐtɔn lɛ́ te afɔjíafɔjí é. Nǔ sixú cí mɔ̌ nú mǐ nǔgbó, amɔ̌, mǐ ɖó ná ɖó ayi te bo ma wá wa nǔ e Jexóva gbɛ́ wǎn ná é ɖé ó.—Efɛ́. 5:10-12, 15-17.

¹² Ðo wěma e mɛsɛ́dó Pɔ́lu sɛ́ dó Filípunu lɛ́ é mɛ ɔ, é byɔ́ klisánwun lɛ́ ɖɔ yě ní nɔ lin tamɛ dó “nǔ e nyí nǔgbó ɔ bǐ, . . . nǔ e mɛ́ é, nǔ e nɔ nyɔ́ mɛ nukúnmɛ é kpódó nǔ e wlí yɛ̌yi ɔ kpan” jí. (Xa Filípunu lɛ́ 4:8.) Nǔ e Pɔ́lu wlán é ɖɔ xó dó ayiɖeɖayǐ wú tlɔlɔ ǎ có, mǐ ka ɖó ná nɔ lin tamɛ dó yě wú hwenu e mǐ ɖo ayiɖeɖayǐ mǐtɔn lɛ́ cyán wɛ é. Tɛ́n nǔ élɔ́ kpɔ́n: Fí ɖěbǔ e xókwín “nǔ” ɔ tɔ́n ɖe ɖo wěmafɔ ɔ mɛ é ɔ, nɔ ɖyɔ́ kpó xógbe élɔ́ lɛ́ kpó: “Han lɛ́,” “video lɛ́,” “wěma lɛ́,” alǒ “ayihúndida video jí tɔn lɛ́.” Mɔ̌ wiwa sixú d’alɔ we bɔ a ná tuun ayiɖeɖayǐ ɖěɖěe sixú nyɔ́ Mawu nukúnmɛ lɛ́ é kpó ɖěɖěe ma sixú nyɔ́ nukún tɔn mɛ ǎ lɛ́ é kpó. Mǐ nɔ ba ná zán gbɛ sɔgbe xá nǔgbódodó jlɔ́jlɔ́ Jexóva tɔn lɛ́. (Ðɛh. 119:1-3) Mɔ̌ mɛ ɔ, mǐ ná ɖó ayixa mímɛ́ ɖé, bo sixú ɖe afɔ atɔngɔ́ e ná zɔ́n bɔ mǐ ná ɖó awǎjijɛ adodwé ɔ é.—Mɛ. 23:1.

13. Ðɔ afɔ atɔngɔ́ e è sixú ɖe, bo ná ɖó awǎjijɛ adodwé ɔ é. (Jaan 4:23, 24)

¹³ AFƆ 3GƆ́ E È NÁ ÐE É: Tɛ́n kpɔ́n bónú Jexóva sinsɛn ní nɔ tɛn nukɔntɔn ɔ mɛ ɖo gbɛzán towe mɛ. Ðó Jexóva wɛ nyí Gbɛɖótɔ́ mǐtɔn wútu ɔ, é wɛ mǐ ɖó ná sɛn. (Nǔɖe. 4:11; 14:6, 7) Nǔ tají hú gǎn e gbé mǐ ɖó ná nya ɖo gbɛzán mǐtɔn mɛ é wɛ nyí ɖɔ, mǐ ɖó ná sɛn Jexóva lěe é ba ɖɔ è ní sɛn émí gbɔn é; énɛ́ wɛ nyí ‘ɖo gbigbɔ kpó nǔgbó kpó mɛ.’ (Xa Jaan 4:23, 24.) Mǐ ba ɖɔ gbigbɔ mímɛ́ Mawu tɔn ní xlɛ́ ali lěe sɛn Mawu gbɔn wɛ mǐ ɖe é, énɛ́ ɔ, lěe sɛn ɛ gbɔn wɛ mǐ ɖe é ná sɔgbe xá nǔgbó ɖěɖěe ɖo Xó tɔn mɛ lɛ́ é. Ényí mǐ ná bo tlɛ ɖo to e mɛ è ɖó dogbó nú azɔ̌ mǐtɔn, alǒ gbɛ́ ɖe é ɖé mɛ ɔ, mawusinsɛn ɖó ná nɔ tɛn nukɔntɔn ɔ mɛ nú mǐ. Alɔnu din ɔ, nɔví súnnu kpó nɔví nyɔ̌nu kpó mǐtɔn lɛ́ 100 jɛjí wɛ è sú dó gankpá mɛ ɖó yě nyí Kúnnuɖetɔ́ Jexóva tɔn kpowun wútu. * Nǔ ɖo mɔ̌ có, yě nɔ wa nǔ e wú yě kpé é bǐ, bo nɔ xo ɖɛ, kplɔ́n nǔ, bo nɔ ɖɔ xó nú mɛ ɖěvo lɛ́ dó Mawu mǐtɔn kpó Axɔ́súɖuto tɔn kpó wú kpó awǎjijɛ kpó. Ényí è ɖo mǐ zun wɛ, alǒ è ɖo ya dó nú mǐ wɛ ɔ, mǐ sixú ɖó awǎjijɛ, ɖó mǐ tuun ɖɔ Jexóva ɖo kpɔ́ xá mǐ, bo ná lɛ́ dó ajɔ mǐ wútu.—Ja. 1:12; 1 Pi. 4:14.

14. Étɛ́ ka jɛ dó nɔví súnnu wínnyáwínnyá ɖokpó wú ɖo Tajikistan? Étɛ́wú?

¹⁴ Nǔ e jɛ ɖo gbɛzán mɛɖé lɛ́ tɔn mɛ é dó zǒgbe jí ɖɔ nǔ atɔn e jí mǐ ɖɔ xó dó wá yi lɛ́ é nɔ zɔ́n bɔ è nɔ ɖó awǎjijɛ adodwé ɔ, ényí mǐ ná bo tlɛ ɖo ninɔmɛ ɖěbǔ mɛ ɔ nɛ́. Ð’ayi nǔ e jɛ dó Jovidon Bobojonov wú é wú. É ɖó xwe 19, bo nɔ nɔ Tajikistan, lobo gbɛ́ ɖɔ émí kún ná wa ahwanzɔ́ ó. Ðo 4 octobre 2019 ɔ, è yi wlí i ɖo xwé tɔn gbe, bo sú i dó gankpá mɛ nú sun mɔ̌kpán, lobo nɔ wa nǔ xá ɛ wɔ̌nxogbɛwútɔ́ ɖɔhun. To gěgé wɛ se nǔ agɔ énɛ́ e è wa xá ɛ é. È ɖɔ ɖɔ è xo è, bo gbídí kɔ n’i, bónú é ná d’akpá ɖɔ  émí ná dó awu bá byɔ́ ahwan mɛ. Énɛ́ gúdo ɔ, è ɖɔ hwɛ tɔn, bo sɛ́ ɛ dó yadónúmɛkpá ɖé mɛ, káká jɛ hwenu e togán to ɔ tɔn wá sɔ́ hwɛ kɛ ɛ, bo ɖe gbe ɖɔ è ní jó è é. Ðo táan énɛ́ lɛ́ bǐ mɛ ɔ, Jovidon kpo ɖo gbejí, bo lɛ́ kpo ɖo awǎjijɛ ɖó wɛ. Gbɔn nɛ̌ é? É nɔ tuun hwelɛ́bǐnu ɖɔ émí ɖó hudó Mawu tɔn.

15. Nɛ̌ Jovidon ka nɔ ɖu nǔɖuɖu gbigbɔ tɔn hwenu e é ɖo ganxó é gbɔn?

¹⁵ Hwenu e Jovidon ɖo ganxó é ɔ, é ɖó Biblu ǎ, é ka lɛ́ ɖó wěma mǐtɔn lɛ́ ɖě ǎ có, é kpo ɖo nǔ kplɔ́n dó Jexóva wú wɛ. Nɛ̌ énɛ́ ka nyɔ́ bló gbɔn? Nɔví súnnu kpó nɔví nyɔ̌nu kpó e ɖo xá ɔ mɛ lɛ́ é nɔ hɛn nǔɖuɖu wá n’i, bo nɔ wlán tɛ́si azǎn ɖokpó ɖokpó tɔn dó nǔɖuɖu sín sáki lɛ́ wú. Mɔ̌ mɛ ɔ, é kpé wú bo nɔ xa Biblu, lobo nɔ lɛ́ lin tamɛ d’é jí gbe bǐ gbe. Ée é tɔ́n sín gankpá mɛ gúdo é ɔ, é ɖe wě élɔ́ xá mɛ ɖěɖěe ma ko gbɔn tagba syɛ́nsyɛ́n mɛ kpɔ́n ǎ lɛ́ é: “É ɖo dandan ɖɔ è ní zán vivomɛhwenu mɛtɔn bǐ mlɛ́mlɛ́ dó bló bónú nǔ e è tuun dó Jexóva wú é ní gɔ́ngɔ́n, gbɔn Xó tɔn kpó wěma mǐtɔn lɛ́ kpó xixa gblamɛ.”

16. Ani jí Jovidon ka nɔ sɔ́ ayi ɖó?

¹⁶ Nɔví mǐtɔn nɔ zán gbɛ sɔgbe xá nǔgbódodó Jexóva tɔn lɛ́. É nɔ lin tamɛ dó jlǒ masɔgbe lɛ́ jí, bónú énɛ́ zɔ́n bɔ é wa nǔ  nyanya ǎ, é nyɔ́ wa ɔ, é nɔ sɔ́ ayi ɖó Jexóva kpó nǔ e nɔ nyɔ́ nukún tɔn mɛ lɛ́ é kpó jí. Ðɛkpɛ e nǔɖíɖó Mawu tɔn lɛ́ nyɔ́ é nɔ jí wǔ nú Jovidon. Han e ji wɛ xɛví lɛ́ nɔ ɖe é wɛ nɔ fɔ́n ɛ zǎnzǎn lɛ́ bǐ. Zǎn kú ɔ, é nɔ kpɔ́n sun kpó sunví lɛ́ kpó. É ɖɔ: “Nǔníná Jexóva tɔn énɛ́ lɛ́ nɔ d’awǎjijɛ nú mì, bo nɔ lɛ́ dó wǔsyɛ́n lanmɛ nú mì.” Ényí nǔ e Jexóva nɔ ná mǐ ɖo gbigbɔ kpó agbaza kpó lixo lɛ́ é nɔ su nukún mǐtɔn mɛ ɔ, mǐ nɔ ɖ’awǎjijɛ bɔ awǎjijɛ énɛ́ sixú ná hlɔ̌nhlɔ́n nǔwúkpíkpé e mǐ ɖó bo nɔ dɛ é.

17. È sixú zán xó e ɖo 1 Piyɛ́ɛ 1:6, 7 mɛ é nú mɛ e sixú ɖo ninɔmɛ Jovidon tɔn ɖɔhun mɛ é. Nɛ̌ nǔ ka sixú nyí mɔ̌ gbɔn?

¹⁷ Jovidon lɛ́ sɔ́ Jexóva sinsɛn ɖó tɛn nukɔntɔn ɔ mɛ. É tuun ɖɔ gbejíninɔ nú Mawu nǔgbó ɔ ɖo tají tawun. Jezu ɖɔ: “Aklúnɔ Mawu towe wɛ a ná ɖe kɔ́ ná, lobo ná sɛn éɖokpónɔ géé.” (Luk. 4:8) Ahwangán lɛ́ kpó sɔ́ja lɛ́ kpó jló ɖɔ Jovidon ní jó sinsɛn tɔn dó. Amɔ̌, é nɔ xo ɖɛ vívɛ́ sɛ́dó Jexóva gbe bǐ gbe, bo nɔ byɔ́ ɛ ɖɔ é ní d’alɔ émí bónú émí ma jó gbe ó, émí ma ka sɔ́ nǔɖiɖi émítɔn sa ó. È ɖo nǔ agɔ wa xá Jovidon wɛ có, é kpo ɖo gbejí. Wǎgbɔ tɔn ɔ, é sixú ɖ’awǎjijɛ din tawun, ɖó é ɖó nǔ e é ma ko ɖó cóbɔ è wlí i, xo è, bo sú i dó gankpá mɛ ǎ é ɖé din. Ðó è tɛ́n ɛ kpɔ́n wútu ɔ, nǔɖiɖi tɔn lí dǒ.—Xa 1 Piyɛ́ɛ 1:6, 7.

18. Nɛ̌ mǐ ka sixú kpo ɖo awǎjijɛ ɖó wɛ gbɔn?

¹⁸ Jexóva tuun nǔ e sín hudó mǐ ɖó bo ná ɖó awǎjijɛ adodwé ɔ é. Tagba lɛ́ sixú ɖo fínɛ́ có, ényí a ɖe afɔ atɔn e è ná ɖe bo ná ɖó awǎjijɛ adodwé ɔ lɛ́ é ɔ, awǎjijɛ towe ná kpo ɖo te. Énɛ́ ɔ, hwi lɔ hɛn ɔ, a ná ɖɔ: ‘Nǔ nyɔ́ nú togun e sɔ́ Jexóva dó ɖó Mawu é.’—Ðɛh. 144:15.