1. Nɛ̌ mɛ gěgé ka nɔ yí wě e nǔnywɛ́ kpé bɔ Biblu nɔ ɖe xá mɛ é gbɔn égbé? (Nǔnywɛ́xó 1:20, 21)

 Ð’AYǏ ɔ, ɖo to gěgé mɛ ɔ, nɔví mǐtɔn lɛ́ nɔ ɖo te ɖo fí ɖěɖěe mɛ gěgé nɔ gbɔn lɛ́ é, bo nɔ xwlé wěma lɛ́ mɛ lɛ́. Vlafo hwiɖésú ko wa mɔ̌ kpɔ́n. Ényí mɔ̌ wɛ ɔ, é ɖo wɛn ɖɔ a ná ko lin tamɛ dó xógbe nǔjlɛ́dónǔwú tɔn e ɖo wěma Nǔnywɛ́xó tɔn mɛ é jí, énɛ́ wɛ nyí, nǔnywɛ́ nɔ ɖo xó sú ylɔ́ gbɛtɔ́ lɛ́ wɛ ɖo agbawungba ɖɔ yě ní ɖótó wěɖexámɛ émítɔn. (Xa Nǔnywɛ́xó 1:20, 21.) È nɔ mɔ “nǔnywɛ́” jɔ nǔnywɛ́ e nyí nǔnywɛ́ Jexóva tɔn é ɖo Biblu kpó wěma mǐtɔn lɛ́ kpó mɛ. Nǔnywɛ́ énɛ́ sín hudó wɛ gbɛtɔ́ lɛ́ ɖó, cóbó ná sixú mɔ gbɛ mavɔmavɔ. Ényí mɛɖé yí wěma mǐtɔn lɛ́ ɖokpó ɔ, xomɛ nɔ hun mǐ tawun. Amɔ̌, mɛ bǐ wɛ nɔ yí ǎ. Mɛɖé lɛ́ tíin bɔ yě nɔ ba ná tuun nǔ e Biblu kplɔ́n mɛ é ǎ. Mɛ ɖěvo lɛ́ nɔ cá nú mǐ. Yě nɔ lin ɖɔ Biblu ko dóxó dín, lé é kún sɔ́ sixú nyɔ́ zán ó. Mɛ ɖěvo lɛ́ nɔ mɔ xó ɖɔ dó nǔ e Biblu kplɔ́n mɛ dó walɔ ɖagbe wú lɛ́ é wú, bo nɔ ɖɔ ɖɔ mɛ ɖěɖěe nɔ xwedó nǔ e Biblu nɔ kplɔ́n mɛ lɛ́ é kún nɔ nyɔ́ xomɛ ó, lobo nɔ lɛ́ mɔ xó ɖɔ dó mɛ ɖěvo lɛ́ wú. É ɖo mɔ̌ có, Jexóva ka kpo ɖo nǔnywɛ́ tɔn ná mɛ lɛ́ bǐ wɛ kpó wǎnyíyí kpó. Ðo ali tɛ́ lɛ́ nu?

2. Fítɛ́ mǐ ka sixú mɔ nǔnywɛ́ jɔ nǔnywɛ́ ɖe ɖo égbé? Gbeta tɛ́ kɔn mɛ gěgé ka nɔ wá?

² Ali e nu Jexóva nɔ ná nǔnywɛ́ jɔ nǔnywɛ́ mɛ lɛ́ bǐ ɖe é ɖokpó wɛ nyí gbɔn Xó tɔn Biblu ɔ gblamɛ. Ðibla nyí mɛ lɛ́ bǐ wɛ sixú mɔ wěma énɛ́. Bɔ wěma mǐtɔn lɛ́ ka lo? Nyɔ̌ná Jexóva tɔn zɔ́n bɔ yě ko tíin dó gbe hú gǎn 1000 mɛ. Mɛ ɖěɖěe nɔ ɖótó nǔnywɛ́ lɛ́ é, énɛ́ wɛ nyí mɛ ɖěɖěe nɔ xa wěma énɛ́ lɛ́, lobo nɔ lɛ́ zán nǔ e yě kplɔ́n lɛ́ é nɔ ɖu le tɔn. Amɔ̌, mɛ gěgé wá gbeta ɔ kɔn ɖɔ émí kún ná ɖótó Jexóva ó. Ényí yě jló ná wá gbeta lɛ́ kɔn ɔ, yě nɔ ba ná ɖeji dó yěɖée wú, alǒ, ɖótó  gbɛtɔ́ yěɖɔhun lɛ́. Yě tlɛ sixú mɔ ɖɔ mǐ kún hwɛ́n nǔɖé ó, ɖó mǐ wá gbeta ɔ kɔn bá xwedó nǔ e Biblu ɖɔ lɛ́ é wútu. Xóta élɔ́ ná ɖɔ xó dó nǔ e wú mɛ lɛ́ nɔ wa nǔ gbɔn mɔ̌ é wú. Amɔ̌, jɛ nukɔn hwɛ̌ ɔ, mi nú mǐ ní ɖɔ xó dó lěe mǐ sixú ɖó nǔnywɛ́ e gosín Jexóva gɔ́n é gbɔn é jí.

3. Étɛ́ mǐ ka ɖó ná wa cóbó ná ɖó nǔnywɛ́ jɔ nǔnywɛ́ ɔ?

³ Nǔnywɛ́ sixú dó gesí nǔwúkpíkpé e mǐ ɖó bo nɔ zán nǔ e mǐ tuun lɛ́ é dó wá gbeta ɖagbe lɛ́ kɔn é. É ɖo mɔ̌ có, nǔnywɛ́ jɔ nǔnywɛ́ byɔ́ nǔ hú mɔ̌. Biblu ɖɔ: ‘Sísí ɖó nú Jexóva wɛ nyí fí e nǔnywɛ́ bɛ́sín é; mɛ e tuun Mawu mɛ mímɛ́ ɔ, Mawu nɔ ná mɛ ɔ nukúnnúmɔjɛnǔmɛ.’ (Nǔx. 9:10) Énɛ́ wú ɔ, ényí mǐ ja gbeta tají ɖé kɔn wá gbé ɔ, mǐ ɖó ná bló bɔ gbeta e kɔn wá gbé wɛ mǐ ja é ná jínjɔ́n linlin Jexóva tɔn jí, énɛ́ wɛ nyí tuun e mǐ “tuun Mawu mɛ mímɛ́ ɔ” é jí. Mǐ sixú wa mɔ̌ gbɔn Biblu kpó wěma mǐtɔn lɛ́ kpó kplɔ́nkplɔ́n gblamɛ. Ényí mǐ nɔ wa mɔ̌ hǔn, nǔnywɛ́ jɔ nǔnywɛ́ ɔ ɖe xlɛ́ wɛ mǐ ɖe nɛ́.—Nǔx. 2:5-7.

4. Jexóva kɛ́ɖɛ́ jɛ́n sixú ná mǐ nǔnywɛ́ jɔ nǔnywɛ́. Étɛ́wú?

⁴ Jexóva ɖokpónɔ jɛ́n sixú ná nǔnywɛ́ jɔ nǔnywɛ́ mǐ. (Hlɔ̌. 16:27) Aniwú Jexóva ka nyí Jɔtɛn nǔnywɛ́ tɔn? Nukɔntɔn, ɖó é wɛ nyí Gbɛɖótɔ́ ɔ wútu ɔ, é tuun nǔ bǐ dó nǔ e é dá lɛ́ é wú. (Ðɛh. 104:24) Wegɔ́, nǔ e Jexóva dá lɛ́ é bǐ nɔ xlɛ́ ɖɔ é nyɔ́nǔi. (Hlɔ̌. 11:33) Atɔngɔ́, wěɖexámɛ Jexóva tɔn e nǔnywɛ́ nɔ kpé lɛ́ é nɔ hɛn le wá nú mɛ ɖěɖěe nɔ xwedó lɛ́ é hwebǐnu. (Nǔx. 2:10-12) Ényí mǐ ba ná ɖó nǔnywɛ́ jɔ nǔnywɛ́ ɔ, mǐ ɖó ná yí gbe nú nǔkplɔ́nmɛ nukɔn nukɔntɔn énɛ́ lɛ́, lobo ná tɛn yě bónú yě ná nɔ xlɛ́ ali gbeta e kɔn mǐ nɔ wá lɛ́ é kpó nǔwiwa mǐtɔn lɛ́ kpó.

5. Ényí gbɛtɔ́ lɛ́ ma nɔ yí gbe ɖɔ Jexóva kɛ́ɖɛ́ jɛ́n nyí Jɔtɛn nǔnywɛ́ jɔ nǔnywɛ́ tɔn ǎ ɔ, étɛ́ mɛ é ka nɔ tɔ́n kɔ dó?

⁵ Mɛ ɖěɖěe mǐ nɔ xo go ɖo sinsɛnzɔ́ ɔ mɛ lɛ́ é gěgé nɔ yí gbe ɖɔ nǔ e lɛ́ lɛ̌ dó émí lɛ́ é nyɔ́ ɖɛkpɛ, có yě ka nɔ ɖɔ ɖɔ Gbɛɖótɔ́ ɖě kún ɖe ó. Mɛ ɖěvo lɛ́ nɔ ɖɔ ɖɔ émí ɖi nǔ nú Mawu, amɔ̌, yě nɔ lin ɖɔ nǔkplɔ́nmɛ Biblu tɔn lɛ́ ko dóxó, bo nɔ wá gbeta ɔ kɔn bá zán gbɛ lěe é jló yě gbɔn é. Étɛ́ mɛ é ka ko tɔ́n kɔ dó? Ðó gbɛtɔ́ lɛ́ nɔ gán jɛ nǔnywɛ́ yěɖésúnɔ tɔn wú, bo nɔ gbɛ́ nǔnywɛ́ Mawu tɔn wú ɔ, gbɛ ɔ ka ko kpɔ́n te d’é jí a? Yě ka ko ɖ’awǎjijɛ jɔ awǎjijɛ, alǒ ɖó nukúnɖíɖó sɔgúdo tɔn ɖejidéwú a? Nǔ e mɔ wɛ mǐ ɖe lɛ́ lɛ̌ dó mǐ lɛ́ é bló bɔ mǐ kú d’é jí ɖɔ nǔgbó wɛ nyí xó élɔ́: ‘Nǔnywɛ́ gbɛtɔ́ tɔn, bǐbí gbɛtɔ́ tɔn abǐ tamɛ linlin gbɛtɔ́ tɔn nɔ te Jexóva nukɔn ǎ.’ (Nǔx. 21:30) Énɛ́ nɔ sísɛ́ mǐ bɔ mǐ nɔ kpo ɖo byɔ̌byɔ́ Jexóva wɛ ɖɔ é ní ná mǐ nǔnywɛ́ jɔ nǔnywɛ́! É blá wǔ ɖɔ mɛ gěgé kún nɔ wa mɔ̌ ó. Aniwú?

6. Sɔgbe xá Nǔnywɛ́xó 1:22-25 ɔ, mɛ̌ mɛ̌ e ka nɔ dó tókúse xó e sú wɛ nǔnywɛ́ jɔ nǔnywɛ́ ɖe é mɛ?

⁶ Ényí nǔnywɛ́ jɔ nǔnywɛ́ “ɖo xó sú wɛ gbɔn alixo alixo” ɔ, mɛ gěgé nɔ dó tókúse mɛ. Sɔgbe xá Biblu ɔ, gbɛtɔ́ gbɛ̌nu atɔn e nɔ gbɛ́ nǔnywɛ́ lɛ́ é wɛ nyí: “Gɔgɔnɔ lɛ́,” “mɛcákotɔ́ lɛ́,” kpó “xlonɔ lɛ́” kpó. (Xa Nǔnywɛ́xó 1:22-25.) Mi nú mǐ ní gbéjé nǔ e wú mɛ énɛ́ lɛ́ nɔ gbɛ́ nǔnywɛ́ Mawu tɔn é kpó lěe mǐ sixú wa gbɔn bo ma ná cí yě ɖɔhun ǎ é kpó kpɔ́n.

7. Étɛ́wú mɛɖé lɛ́ ka nɔ wá gbeta ɔ kɔn bá kpo ɖo “gɔgɔnɔ” nyí wɛ?

⁷ “Gɔgɔnɔ lɛ́” wɛ nyí mɛ ɖěɖěe nɔ ɖi nǔ nú nǔ e yě nɔ se lɛ́ é bǐ, bɔ è nɔ yá wǔ dɔn yě yi bú lɛ́ é. (Nǔx. 14:15.) Hwɛhwɛ wɛ mǐ nɔ xo go mɛ énɛ́ lɛ́ ɖo sinsɛnzɔ́ ɔ mɛ. Ði kpɔ́ndéwú ɔ, lin tamɛ dó gbɛtɔ́ lǐvi mɔ̌kpán e  sinsɛngán lɛ́, alǒ toxóɖɔtɔ́gán lɛ́ nɔ flú lɛ́ é wú. Mɛɖé lɛ́ tíin bɔ ényí yě wá ɖ’ayi wú ɖɔ adingban ɖó nú émí wɛ gǎn énɛ́ lɛ́ ɖe ɔ, é nɔ vɛ́ nú yě tawun. Amɔ̌, mɛ ɖěɖěe xó Nǔnywɛ́xó 1:22 ɖɔ lɛ́ é wá gbeta ɔ kɔn bá kpo ɖo gɔgɔnɔ nyí wɛ ɖó é nɔ nyɔ́ yě nukúnmɛ mɔ̌ wútu. (Jel. 5:31) Yě nɔ wa nǔ e jló yě lɛ́ é, bo nɔ ba ná kplɔ́n nǔ e Biblu ɖɔ lɛ́ é, alǒ nyi sɛ́n tɔn lɛ́ ǎ. Lěe nǔ cí nú nǎwe e nyí sinsɛnnɔ akowunká ɖo Quebec ɖo Canada é wɛ é nɔ cí nú mɛ gěgé ɖo égbé; é ɖɔ xó élɔ́ nú Kúnnuɖetɔ́ e wá ba ɛ kpɔ́n lɛ́ é: “Ényí sinsɛngán mǐtɔn ɖ’adingban nú mǐ ɔ, é kɔ wɛ hwɛ ɔ ná nɔ, é nyí mǐdɛɛ lɛ́ kɔ ǎ!” É ɖo wɛn ɖɔ mǐ kún ná jló ná wa nǔ mɛ énɛ́ lɛ́ e nɔ sɔ́ jlǒ dó dóvɛ̌ nú nǔ lɛ́ é ɖɔhun ó!—Nǔx. 1:32; 27:12.

8. Étɛ́ ka ná d’alɔ mǐ bɔ mǐ ná húzú nǔnywɛ́tɔ́?

⁸ Hwɛ Biblu tɔn jɔ b’ɛ dó wǔsyɛ́n lanmɛ nú mǐ ɖɔ mǐ ní ma kpo ɖo gɔgɔnɔ nyí wɛ ó, loɔ, ‘mǐ ní nyí mɛxó ɖo linlin mǐtɔn lɛ́ mɛ.’ (1 Kɔ. 14:20) Ényí mǐ nɔ zán nǔgbódodó Biblu tɔn lɛ́ ɖo gbɛzán mǐtɔn mɛ ɔ, mǐ nɔ húzú nǔnywɛ́tɔ́. Ényí mǐ nɔ wa mɔ̌ ɔ, mǐ ná mɔ lěe Biblu nɔ d’alɔ mǐ bɔ mǐ nɔ nyi alɔ nú tagba lɛ́, lobo nɔ wá gbeta e nǔnywɛ́ kpé lɛ́ é kɔn gbɔn é. É ná nyɔ́ ɖɔ mǐ ní nɔ lin tamɛ dó gbeta e kɔn mǐ ko wá lɛ́ é jí. Ényí mǐ ko ɖo Biblu kplɔ́n wɛ, bo ko lɛ́ jɛ kplé lɛ́ yi jí din é ɔ, é ko nɔ zaan ɔ, mǐ sixú kan nǔ e wú mǐ ma ko sɔ́ mǐɖée jó nú Jexóva bo bló batɛ́mu ǎ é byɔ́ mǐɖée. Ényí mǐ ko bló batɛ́mu wɛ ɔ, mǐ ka ɖo blǒbló wɛ bɔ nǔwúkpíkpé e mǐ ɖó bo nɔ ɖɔ Mawuxó, lobo nɔ lɛ́ kplɔ́n nǔ mɛ é ɖo te kpɔ́n d’é jí wɛ a? Gbeta e kɔn mǐ nɔ wá lɛ́ é ka nɔ xlɛ́ ɖɔ mǐ nɔ jó nǔgbódodó Biblu tɔn lɛ́ dó bónú yě nɔ xlɛ́ ali mǐ a? Mǐ ka nɔ ɖe jijɔ klisánwun tɔn lɛ́ xlɛ́ hwenu e mǐ ɖo nǔ wa ɖó kpɔ́ xá mɛ ɖěvo lɛ́ wɛ é a? Ényí mǐ ɖó ayi wú ɖɔ mǐ ɖó ná bló hǔzúhúzú lɛ́ ɔ, mǐ ɖó ná lin tamɛ dó nǔflínmɛ Jexóva tɔn e nɔ “ná nǔnywɛ́ mɛ e ma ɖó nǔnywɛ́ ɖě ǎ” lɛ́ é jí dó nǔjɔnǔ mɛ.—Ðɛh. 19:8.

9. Nɛ̌ “mɛcákotɔ́ lɛ́” ka nɔ xlɛ́ ɖɔ émí xo nǔnywɛ́ nyi kɛ́n gbɔn?

⁹ Gbɛ̌nu wegɔ́ e ma nɔ ɖó kɔ ɖě nǔnywɛ́ Mawu tɔn wú ǎ é wɛ nyí “mɛcákotɔ́ lɛ́.” Hweɖélɛ́nu ɔ, mǐ nɔ xo go mɛ mɔ̌hun lɛ́ ɖo sinsɛnzɔ́ ɔ mɛ. Mɛ ɖěvo lɛ́ cícá ko wɛ nɔ víví nú yě. (Ðɛh. 123:4) Biblu gb’akpá nú mǐ ɖɔ mɛcákotɔ́ lɛ́ ná sukpɔ́ ɖo azǎn gǔdo gúdo tɔn lɛ́ mɛ. (2 Pi. 3:3, 4) Lɔti sín vǐ lɛ́ sín asú xɔ́ntɔn lɛ́ ɖɔhun ɔ, mɛɖé lɛ́ nɔ ɖótó akpágbanúmɛ Mawu tɔn lɛ́ ɖo égbé ǎ. (Bǐb. 19:14) Mɛ gěgé nɔ cá mɛ ɖěɖěe nɔ zán gbɛ sɔgbe xá nǔgbódodó Biblu tɔn lɛ́ é ko. Yě nɔ wa mɔ̌, ɖó yě nɔ ba ná zán gbɛ yětɔn lěe “jlǒ nyanya yětɔn lɛ́” zɔ́n yě gbɔn é. (Ju. 7, 17, 18) Lěe Biblu ɖɔ xó dó mɛcákotɔ́ lɛ́ wú gbɔn é sɔgbe pɛ́pɛ́pɛ́ xá lěe gǔfɔ́ndómawujítɔ́ lɛ́ kpó mɛ ɖěvo e gbɛ́ Jexóva lɛ́ é kpó nɔ wa nǔ gbɔn é!

10. Lěe Ðɛhan 1:1 ɖɔ gbɔn é ɔ, nɛ̌ mǐ ka sixú cɔ́ mǐɖée bo ma wá jɛ nǔ wa jí mɛcákotɔ́ lɛ́ ɖɔhun ó gbɔn?

¹⁰ Nɛ̌ mǐ ka sixú cɔ́ mǐɖée bo ma ná wá jɛ nǔ wa jí mɛcákotɔ́ lɛ́ ɖɔhun ǎ gbɔn? Ali e nu mǐ sixú cɔ́ mǐɖée ɖe é ɖokpó wɛ nyí ɖɔ mǐ ní nyi alɔ nú gbɛ̌dídó xá mɛ ɖěɖěe nɔ ɖɔ slamɛ mɛ wú lɛ́ é. (Xa Ðɛhan 1:1.) Tínmɛ tɔn wɛ nyí ɖɔ mǐ ná nɔ ɖótó, alǒ xa nǔ ɖěbǔ e ná gosín gǔfɔ́ndómawujítɔ́ lɛ́ gɔ́n lɛ́ é ǎ. Mǐ tuun ɖɔ ényí mǐ ma cɔ́ mǐɖée ǎ ɔ, bléwún jɛ́n mǐ ná jɛ nǔ húnhún ɖɔ jí, lobo ná jɛ nǔ xo kpɔ́n dó Jexóva kpó ali e é nɔ xlɛ́ mǐ gbɔn tutoblónúnǔ tɔn jí é kpó wú jí. Bo ná dó nyi alɔ nú aca énɛ́ ɔ, mǐ sixú nɔ kan nǔ élɔ́ lɛ́ byɔ́ mǐɖée: ‘Ényí è ɖe wě yɔ̌yɔ́ lɛ́ xá mǐ, alǒ è tínmɛ nǔ lɛ́ nú mǐ ɖo ali yɔ̌yɔ́ ɖé nu ɔ, un ka nɔ mɔ xó ɖɔ d’é wú hwɛhwɛ wɛ a? Un ka nɔ ɖo do jijɛ mɔ nú mɛ ɖěɖěe ɖo nukún kpé dó nǔ lɛ́ wú wɛ é wɛ a?’ Ényí ‘ɛɛn’ wɛ nyí xósin nǔkanbyɔ́ énɛ́ lɛ́ tɔn ɔ, mǐ ɖó ná yá wǔ w’azɔ̌ ɖo mǐɖée wú ɖo ali énɛ́ lɛ́ nu bónú nǔ mǐtɔn ná nyɔ́ Jexóva nukúnmɛ.—Nǔx. 3:34, 35.

11. Linlin tɛ́ “xlonɔ lɛ́” ka nɔ ɖó dó nǔgbódodó walɔ ɖagbe tɔn Jexóva tɔn lɛ́ wú?

 ¹¹ Gbɛtɔ́ gbɛ̌nu atɔngɔ́ e nɔ xo nǔnywɛ́ nyi kɛ́n é wɛ nyí “xlonɔ lɛ́.” Yě nyí xlonɔ ɖó yě gbɛ́ ɖɔ émí kún ná nɔ zán gbɛ sɔgbe xá nǔgbódodó walɔ ɖagbe tɔn Mawu tɔn lɛ́ ó. Nǔ e nyɔ́ nukún yěɖésúnɔ tɔn mɛ lɛ́ é wɛ yě nɔ wa. (Nǔx. 12:15) Mɛ énɛ́ lɛ́ nɔ gbɛ́ Jexóva e nyí Jɔtɛn nǔnywɛ́ tɔn é. (Ðɛh. 53:2) Ényí mǐ xo go mɛ énɛ́ lɛ́ ɖo sinsɛnzɔ́ ɔ mɛ ɔ, hwɛhwɛ wɛ yě nɔ mɔ xó ɖɔ dó sísí e mǐ nɔ ɖó nú nǔgbódodó Biblu tɔn lɛ́ é wú dó nǔjɔnǔ mɛ. Nǔ ɖo mɔ̌ có, yě ka sixú bló bónú mǐ ɖó gbɛzán e nyɔ́ hú gǎn é ɖé ǎ. Biblu ɖɔ: “Nǔnywɛ́ ɖíɖó ɔ, nǔɖé wɛ é nyí bɔ xlonɔ ná ɖó ɔ é ná vɛ́ wǔ; énɛ́ ɔ wú wɛ to kplé ɔ, yě ma nɔ sixú kɛ nu dó xó mɛ ǎ.” (Nǔx. 24:7) Xlonɔ ɖó wě e nǔnywɛ́ kpé é ɖě bá ɖe xá mɛ ǎ. Nǔ e wú Jexóva gb’akpá nú mǐ ɖɔ mǐ ní “ma dó xlonɔ há ó” é nɛ́!—Nǔx. 14:7.

12. Étɛ́ ka ná d’alɔ mǐ bɔ mǐ ma ná wa nǔ xlonɔ lɛ́ ɖɔhun a?

¹² Mǐ cí mɛ ɖěɖěe nɔ gbɛ́ wǎn nú wěɖexámɛ Mawu tɔn lɛ́ é ɖɔhun ǎ, é nyɔ́ wa ɔ, mǐ nɔ kplɔ́n bo nɔ yí wǎn nú lěe Jexóva nɔ wa nǔ gbɔn é káká jɛ nǔgbódodó tɔn walɔ ɖagbe tɔn lɛ́ jí. Ényí mǐ nɔ sɔ́ le e ɖo tónúsise nú nǔgbódodó walɔ ɖagbe tɔn Jexóva tɔn lɛ́ mɛ é jlɛ́ dó nǔ e tónúmase nú yě nɔ ji lɛ́ é wú ɔ, mǐ sixú ná hlɔ̌nhlɔ́n wǎn e mǐ yí nú nǔgbódodó énɛ́ lɛ́ é. Lin tamɛ dó tagba e mɛ mɛ lɛ́ nɔ dɔn yěɖée dó, ɖó xloyixa yětɔn zɔ́n bɔ yě gbɛ́ wěɖexámɛ Jexóva tɔn e nǔnywɛ́ kpé lɛ́ é wú. Énɛ́ gúdo hǔn, kpɔ́n lěe gbɛ towe nyɔ́ sɔ ɖó a ɖo tónú se nú Mawu wɛ wútu é.—Ðɛh. 32:8, 10.

13. Jexóva ka nɔ hɛn mǐ gǎnnugǎnnu bónú mǐ ná se tónú nú wěɖexámɛ tɔn e nǔnywɛ́ kpé lɛ́ é wɛ a?

¹³ Jexóva hun ali nú mɛ lɛ́ bǐ bónú yě ná mɔ nǔnywɛ́ tɔn, amɔ̌, é nɔ hɛn mɛ ɖěbǔ gǎnnugǎnnu bónú é ná yí nǔnywɛ́ tɔn ǎ. Nǔ ɖo mɔ̌ có, é nɔ tínmɛ nǔ e tónúmase nú nǔnywɛ́ tɔn nɔ ji é nú mɛ ɖěɖěe ma nɔ ɖótó ǎ lɛ́ é. (Nǔx. 1:29-32) Mɛ ɖěɖěe wá gbeta ɔ kɔn ɖɔ émí kún ná se tónú nú Jexóva ó lɛ́ é ɔ, “lěe [yě] jɔ ɔ, [yě] ná ɖu le tɔn.” Yě ná wá se wǔvɛ́ tawun, bo ji ya titewungbe tɔn ɖó lěe yě zán gbɛ yětɔn gbɔn é wútu, bɔ ɖo vivɔnu ɔ, Jexóva ná sú kún yětɔn dó. Ðo alɔ ɖěvo mɛ ɔ, è dó akpá élɔ́ nú mɛ ɖěɖěe nɔ ɖótó wěɖexámɛ Jexóva tɔn, lobo nɔ lɛ́ zán gbɛ sɔgbe xá lɛ́ é: “Mɛ e nɔ ɖótó mì é ná nɔ vivo mɛ; ayi tɔn ná jɛ ayǐ; nǔ nyanya ɖé ná dó adohu n’i ǎ.”—Nǔx. 1:33.

14-15. Étɛ́ Nǔnywɛ́xó 4:23 ka kplɔ́n mǐ?

¹⁴ Hwebǐnu wɛ nǔnywɛ́ Mawu tɔn zínzán nɔ hɛn le wá nú mǐ. Lěe mǐ ko ɖɔ gbɔn wá yi é ɔ, mɛ bǐ wɛ Jexóva hun ali ɔ ná bɔ yě ná mɔ wě e nǔnywɛ́ kpé, b’ɛ nɔ ɖe xá mɛ lɛ́ é. Ði kpɔ́ndéwú ɔ, ɖo wěma Nǔnywɛ́xó tɔn blěbú mɛ ɔ, é ɖe wě e nyɔ́ zán, bo nɔ w’azɔ̌ tɛgbɛ lɛ́ é xá mɛ. Mi nú mǐ ní ɖɔ xó dó wěɖexámɛ énɛ́ lɛ́ e nǔnywɛ́ kpé é ɛnɛ kpowun wú.

 ¹⁵ Cyɔ́n alɔ ayi towe nǔjlɛ́dónǔwú tɔn ɔ jí. Biblu ɖɔ: “Hɛn ayi towe hú nǔ bǐ, ɖó fí e gbɛ towe sín azinkan ɖe ɔ nɛ́.” (Nǔx. 4:23) Lin tamɛ dó nǔ e é byɔ́ ɖɔ mǐ ní wa cóbó ná cyɔ́n alɔ ayi e ɖo xo mǐtɔn mɛ é jí é wú. Mǐ ɖó ná nɔ ɖu nǔɖuɖu hunsin ɖagbe tɔn lɛ́, nɔ ba lanmɛ kpɔ́n, lobo lɛ́ nyi alɔ nú aca baɖabaɖa lɛ́. Nǔ ɖokpó ɔ lɛ́ wɛ mǐ ɖó ná lɛ́ wa dó cyɔ́n alɔ ayi nǔjlɛ́dónǔwú tɔn mǐtɔn jí. Mǐ ɖó ná nɔ xa Xó Mawu tɔn ayǐhɔ́ngbe ayǐhɔ́ngbe. Mǐ ɖó ná nɔ sɔ́ nǔ nú kplé klisánwun tɔn lɛ́, nɔ yi yě domɛ, lobo nɔ lɛ́ ɖ’alɔ ɖo yě mɛ. Gǎn e mǐ nɔ dó dó ɖ’alɔ ɖo sinsɛnzɔ́ ɔ mɛ hwɛhwɛ é nɔ zɔ́n bɔ mǐ nɔ kpo ɖo ganjí. Gɔ́ ná ɔ, mǐ nɔ ɖó wǔ zɔ nú nǔ ɖěbǔ e sixú wa nǔ dó ayi mǐtɔn wú é, ɖi ayiɖeɖayǐ ɖěɖěe mɛ nǔblíblíwiwa ɖe lɛ́ é kpó gbɛ̌ nyanya lɛ́ kpó, dó nyi alɔ nú nǔsísɔ́ nú aca baɖabaɖa lɛ́.

16. Aniwú nǔ e Nǔnywɛ́xó 23:4, 5 ɖɔ é ka nyɔ́ zán sɔmɔ̌ égbé?

¹⁶ Nǔ e a ɖó é ní nɔ kpé we. Biblu ɖe wě élɔ́ xá mǐ: “Ma nɔ ɖo hlɔ̌nhlɔ́n dó wɛ ɖɔ dɔkun jɛ́n émí ná jɛ dandan ó; . . . dɔkun jijɛ wú wɛ nukún towe ɖe a? Ma sɔ́ ɖó nukún ó; awa wɛ é wú, bo ko zɔn yi jǐxwé gangan ɖɔhun.” (Nǔx. 23:4, 5) Nǔɖókan lɛ́ nɔ nɔ ayǐ sɔ́yi ǎ. É ɖo mɔ̌ có, dɔkun jijɛ ka nɔ myá nukún nú dɔkunnɔ kpó wamamɔnɔ kpó bǐ. Énɛ́ nɔ zɔ́n bɔ hwɛhwɛ ɔ, yɛ ɖě sɔ́ nɔ ɖo ta nú yě ǎ, xɔ́ntɔn e yě zun lɛ́ é nɔ gblé, b’ɛ tlɛ nɔ lɛ́ wa nǔ dó lanmɛ yětɔn wú. (Nǔx. 28:20; 1 Tim. 6:9, 10) Ðo alɔ ɖěvo mɛ ɔ, nǔnywɛ́ nɔ d’alɔ mǐ bɔ mǐ nɔ ɖó linlin e ɖo jlɛ̌ jí é dó akwɛ́ wú. Linlin mɔ̌hun ɖíɖó nɔ d’alɔ mǐ bɔ mǐ nɔ kpá kɛ́n nú nukúnkɛn, nǔ e mǐ ɖó é nɔ kpé mǐ, bɔ mǐ nɔ lɛ́ ɖó awǎjijɛ.—Nǔt. 7:12.

17. Sɔgbe xá Nǔnywɛ́xó 12:18 ɔ, nɛ̌ mǐ ka sixú ɖó “nǔnywɛ́” gbɔn?

¹⁷ Nɔ lin tamɛ cóbó nɔ ɖɔ xó. Ényí mǐ ma cɔ́ mǐɖée ǎ ɔ, xó mǐtɔn lɛ́ sixú hɛn nǔ gěgé gblé. Biblu ɖɔ: “Mɛ e nɔ ɖɔ xó dín ɔ, xó tɔn nɔ gblé wǔ mɛ hwǐ ɖɔhun; mɛ e ka ɖó nǔnywɛ́ ɔ, xó tɔn nɔ gbɔ azɔn.” (Nǔx. 12:18) Ényí mǐ ma nɔ ɖo nǔ e mɛ ɖěvo lɛ́ wa nyi do lɛ́ é fúnfún kpé wɛ ǎ hǔn, hun jɛ dó fífá jí wɛ mǐ ɖe mɔ̌ nɛ́. (Nǔx. 20:19) Ðó mǐ ba ɖɔ xó mǐtɔn lɛ́ ní nɔ gbɔ azɔn, bo ma nɔ gblé wǔ mɛ ó wútu ɔ, mǐ ɖó ná nɔ xa Xó  Mawu tɔn, bo ɖó ná nɔ lɛ́ lin tamɛ d’é jí. (Luk. 6:45) Ényí mǐ nɔ lin tamɛ dó nǔ e Biblu ɖɔ é jí ɔ, xó mǐtɔn lɛ́ sixú cí “nǔnywɛ́ sín jɔtɛn” e nɔ fá kɔ nú mɛ ɖěvo lɛ́ é ɖɔhun.—Nǔx. 18:4.

18. Nɛ̌ Nǔnywɛ́xó 24:6 zínzán ka sixú d’alɔ mǐ bɔ mǐ ná kpé sinsɛnzɔ́ mǐtɔn wú gbɔn?

¹⁸ Nɔ xwedó wěɖexámɛ. Biblu ɖe wě élɔ́ e nyɔ́ zán é xá mɛ: “Nǔgbó ɔ, a ja ahwan fun gbé bo ɖe wě d’é wú ganjí ɔ, a ná ɖu ɖ’é jí; mɛ e ná ɖe wě dó to wú lɛ́ sukpɔ́ ɔ, to nɔ nɔ te.” (Nǔx. 24:6.) Mi nú mǐ ní gbéjé lěe nǔgbódodó énɛ́ zínzán nɔ zɔ́n bɔ Mawuxóɖiɖɔ kpó nǔkplɔ́nkplɔ́n mɛ lɛ́ kpó sín azɔ̌ e mǐ nɔ wa é nɔ kpa mǐ gbɔn é kpɔ́n. Mǐ nɔ xwedó nǔnywɛ́ mǐɖésúnɔ tɔn dó w’azɔ̌ ɔ ǎ, é nyɔ́ wa ɔ, mǐ nɔ tɛ́n kpɔ́n bo nɔ xwedó wě e è nɔ ɖe xá mǐ lɛ́ é dó w’azɔ̌ ɔ. È nɔ ɖe wě e nǔnywɛ́ kpé lɛ́ é xá mǐ ɖo kplé klisánwun tɔn mǐtɔn lɛ́ jí. Ðo kplé énɛ́ lɛ́ domɛ ɔ, mɛ ɖěɖěe ko mɔ nǔ kpɔ́n lɛ́ é nɔ xwlé xóɖiɖɔ jínjɔ́n Biblu jí lɛ́ mǐ, lobo nɔ lɛ́ w’azɔ̌ ɖé lɛ́ dó kplɔ́n azɔ̌ mǐ. Gɔ́ ná ɔ, tutoblónúnǔ Jexóva tɔn nɔ sɔ́ nǔ nú azɔ̌wanú e nyɔ́ zán lɛ́ é, ɖi wěma kpó video kpó mǐtɔn lɛ́; è sixú zán azɔ̌wanú énɛ́ lɛ́ dó d’alɔ mɛ lɛ́ bónú yě ná mɔ nǔ jɛ Biblu mɛ. A ka ɖo kplɔ́nkplɔ́n wɛ bo ná zán azɔ̌wanú énɛ́ lɛ́ ganjí a?

19. Nɛ̌ nǔ ka nɔ cí nú we dó nǔnywɛ́ e Jexóva nɔ ná mɛ é wú? (Nǔnywɛ́xó 3:13-18)

¹⁹ Xa Nǔnywɛ́xó 3:13-18. Wěɖexámɛ ɖaaɖagbe e ɖo Xó Mawu tɔn mɛ lɛ́ é nɔ su nukún mǐtɔn mɛ kpɔ́n! Nɛ̌ gbɛ mǐtɔn ka ná cí wěɖexámɛ énɛ́ lɛ́ mɛvo? Ðo xóta élɔ́ mɛ ɔ, mǐ vɔ́ wěɖexámɛ ɖaaɖagbe e ɖo wěma Nǔnywɛ́xó tɔn mɛ é ɖé lɛ́ gbéjé kpɔ́n. É ɖo wɛn ɖɔ wě e nǔnywɛ́ kpé bɔ Jexóva nɔ ɖe xá mɛ lɛ́ é kɛ́ɖɛ́ wɛ gɔ́ Biblu mɛ. Mi nú mǐ ní kán ɖ’é jí bo ná nɔ zán nǔnywɛ́ e Jexóva nɔ ná mɛ é dó wa nǔ hwebǐnu. Mɛ gěgé nɔ xo nǔnywɛ́ Mawu tɔn nyi kɛ́n, amɔ̌, mǐdɛɛ lɛ́ kú d’é jí ɖɔ “nǔ nɔ nyɔ́ nú mɛ e nɔ hɛn nǔnywɛ́ majómájó lɛ́” é.