1-2. Ali ɖagbe hú gǎn tɛ́ nu è ka sixú xa Biblu bo lɛ́ kplɔ́n ɖe? Jlɛ̌ dó nǔɖé wú.

 DǑ NUKÚN mɛ kpɔ́n ɖɔ a ɖo linlin wɛ bo ná xɔ xwé ɖé. Étɛ́ a ka ba ná mɔ cóbó wá gbeta towe kɔn? Fɔtóo e xlɛ́ xwé ɔ nukɔn é ɖé kpowun wɛ a? É ɖo wɛn ɖɔ, hwiɖésúnɔ mɛtún ɔ ná ba ná zɔn afɔ te yi xwé ɔ gbe, ɖi zɔnlin lɛ́ lɛ̌ dó, byɔ́ mɛ, bo kpɔ́n xɔ lɛ́ ɖokpó ɖokpó mɛ, káká jɛ nǔ e kunkplá xɔ ɔ lɛ́ é bǐ jí. A tlɛ sixú ba ná gbéjé tuto (plan), ée è xwedó dó gbá xɔ ɔ é kpɔ́n, bo ná dó tuun lěe è gbá gbɔn é. Nǔgbó ɔ, a ná ba ná tuun gǒflɛ́mɛ e kunkplá xwé e xɔ gbé a ja é lɛ́ é bǐ.

² Mǐ sixú wa nǔ ɖokpó ɔ, hwenu e mǐ ɖo Biblu xa wɛ, bo lɛ́ ɖo kplɔ́nkplɔ́n wɛ é. Akɔwé Biblu tɔn ɖé ɖɔ ɖɔ Biblu cí “xwé e d’agba tawun, bɔ dǒ tɔn lɛ́ yi jǐ, lobɔ dodónú tɔn lɛ́ syɛ́n ganjí é ɖé ɖɔhun.” Énɛ́ wú ɔ, nɛ̌ mǐ ka sixú bló gbɔn bɔ nǔ e ɖo Biblu mɛ lɛ́ é bǐ ná má dó mǐ ganjí? Ényí a nɔ zɔn kplakpla jí dó xa Biblu ɔ kpowun ɔ, nǔgbó bǐbɛ́mɛ tɔn lɛ́ kɛ́ɖɛ́ jɛ́n a sixú kplɔ́n, énɛ́ wɛ nyí “xó mímɛ́ Mawu tɔn lɛ́ sín nǔ dodónú tɔn lɛ́.” (Ebl. 5:12) Amɔ̌, lěe é byɔ́ ɖɔ è ní “byɔ́” xɔ ɖé mɛ, bá mɔ tɛn dó tuun gǒflɛ́mɛ tɔn lɛ́ hú gǎn gbɔn é ɔ, é byɔ́ ɖɔ a ní xwe sɔ dó kplɔ́n Biblu bá mɔ tɛn dó mɔ nǔ jɛ mɛ bǐ dégbédégbé. Ali ɖagbe hú gǎn e nu è sixú kplɔ́n Biblu ɖe é ɖokpó wɛ nyí ɖɔ è ní kpɔ́n lěe akpáxwé vovo wɛn e ɖ’é mɛ é tɔn lɛ́ xo nǔ dó akpa ɖokpó ɔ mɛ gbɔn é. Tɛ́n kpɔ́n bo mɔ nǔ jɛ nǔgbó ɖěɖěe a ɖi nǔ ná lɛ́ é mɛ, bo lɛ́ tɛ́n kpɔ́n bo tuun nǔ e wú a ɖi nǔ nú nǔ énɛ́ lɛ́ é.

3. Étɛ́ mɛsɛ́dó Pɔ́lu ka byɔ́ klisánwun hǎtɔ́ tɔn lɛ́ ɖɔ yě ní wa? Aniwú? (Efɛ́zinu lɛ́ 3:14-19)

³ Bo ná dó mɔ nǔ jɛ Xó Mawu tɔn mɛ bǐ hlɛ́nhlɛ́n ɔ, mǐ ɖó ná kplɔ́n nǔgbó Biblu tɔn e gɔ́ngɔ́n lɛ́ é. Mɛsɛ́dó Pɔ́lu byɔ́ klisánwun hǎtɔ́ tɔn lɛ́ ɖɔ yě ní kplɔ́n Xó Mawu tɔn kpó kanɖódónǔwú kpó, bá mɔ tɛn dó “mɔ nukúnnú jɛ lěe nǔgbó ɔ gbló,  ɖi ga, yi jǐ, bo gɔ́ngɔ́n sɔ é wú bǐ mlɛ́mlɛ́.” Énɛ́ ɔ, yě ná “dó ɖɔ do, bo lí dǒ” ɖo nǔɖiɖi mɛ d’é jí. (Xa Efɛ́zinu lɛ́ 3:14-19.) É byɔ́ ɖɔ mǐ lɔmɔ̌ ní nɔ wa nǔ ɖokpó ɔ. Mi nú mǐ ní kpɔ́n lěe mǐ sixú nɔ gbéjé Xó Mawu tɔn kpɔ́n kpó sɔxwixwe kpó, bá mɔ tɛn dó mɔ nǔ jɛ dɔkun xɔ akwɛ́ e ɖ’é mɛ lɛ́ é wú céɖécéɖé gbɔn é.

4. Étɛ́ mǐ ka sixú wa bo ná vɛ́ kpó Jexóva kpó? Nǎ kpɔ́ndéwú ɖé lɛ́.

⁴ Ðó mǐ nyí klisánwun lɛ́ wútu ɔ, mǐ nɔ ba ná nɔ te ɖó nǔkplɔ́nmɛ nukɔn nukɔntɔn e ɖo Biblu mɛ lɛ́ é kɛ́ɖɛ́ tuuntuun jí kpowun ǎ. Alɔ e gbigbɔ mímɛ́ Mawu tɔn nɔ dó mǐ é nɔ zɔ́n bɔ akpakpa nɔ sɔ́ mǐ dó nǔkplɔ́nkplɔ́n wú “káká jɛ nǔ Mawu tɔn e gɔ́ngɔ́n lɛ́ é jí.” (1 Kɔ. 2:9, 10) A sixú ba do nú nǔ ɖé lɛ́ kpó sɔxwixwe kpó ɖo nǔkplɔ́nkplɔ́n mɛɖésúnɔ tɔn towe hwenu kpó linlin ɔ kpó, bá dó vɛ́ xá Jexóva d’é jí. Ði kpɔ́ndéwú ɔ, a sixú gbéjé lěe é ɖe wǎnyíyí xlɛ́ mɛsɛntɔ́ tɔn hwexónu tɔn lɛ́ gbɔn é kpó lěe é nɔ wa mɔ̌ nú hwiɖésúnɔ ɖo égbé gbɔn é kpó kpɔ́n. A sixú lɛ́ kplɔ́n nǔ dó lěe Jexóva ba ɖɔ è ní sɛn émí gbɔn ɖo Izlayɛ́li é wú, bo sɔ́ jlɛ́ dó lěe é ba ɖɔ è ní nɔ sɛn émí gbɔn ɖo égbé é wú. Bóyá, a sixú xwe sɔ bo kplɔ́n nǔ dó gǒflɛ́mɛ e kunkplá nǔɖɔɖayǐ ɖěɖěe ɖɔ xó dó gbɛ ninɔ Jezu tɔn kpó sinsɛnzɔ́ tɔn kpó ɖo ayǐkúngban jí lɛ́ é wú.

5. Xóta ɖé ka ɖe bɔ a ba ná ba do nú nǔ d’é wú ɖo nǔkplɔ́nkplɔ́n mɛɖésúnɔ tɔn towe hwenu a?

⁵ È kan nǔ byɔ́ Biblu kplɔ́ntɔ́ kanɖódónǔwútɔ́ ɖé lɛ́ dó nǔ e gɔ́ngɔ́n, bɔ yěɖésúnɔ jló ná ba do ná ɖo Xó Mawu tɔn mɛ lɛ́ é wú. A sixú mɔ nǔ e yě ɖɔ é ɖé lɛ́ ɖo gbǎví “ Nǔ ɖěɖěe a sixú kplɔ́n ɖo nǔkplɔ́nkplɔ́n mɛɖésúnɔ tɔn towe hwenu é ɖé lɛ́” mɛ. Index des publications des Témoins de Jéhovah, alǒ Alixlɛ́mɛwéma dobanúnǔ tɔn nú Kúnnuɖetɔ́ Jexóva tɔn lɛ́ zínzán sixú zɔ́n bɔ nǔ kplɔ́nkplɔ́n dó xóta énɛ́ lɛ́ wú ná víví nú we tawun. Biblu kplɔ́nkplɔ́n kpó sɔxwixwe kpó sixú ná hlɔ̌nhlɔ́n nǔɖiɖi towe, bo lɛ́ d’alɔ we bɔ a ná mɔ nǔ jɛ “lěe è nɔ tuun Mawu gbɔn é wú.” (Nǔx. 2:4, 5) Din ɔ, mǐ ná ɖɔ xó dó nǔgbó Biblu tɔn e gɔ́ngɔ́n, bɔ è sixú kplɔ́n kpó sɔxwixwe kpó é ɖé lɛ́ wú.

6. (a) Vogbingbɔn tɛ́ ka ɖo tuto kpó linlin kpó tɛ́ntin? (b) Étɛ́wú è ka sixú ɖɔ ɖɔ linlin e Jexóva ɖó nú gbɛtɔ́ lɛ́ kpó ayǐkúngban ɔ kpó é ɔ, linlin “mavɔmavɔ” wɛ? (Efɛ́zinu lɛ́ 3:11)

⁶ Ði kpɔ́ndéwú ɔ, mǐ ní kpɔ́n nǔ e Biblu ɖɔ dó linlin Mawu tɔn wú é. Vogbingbɔn tají ɖé ɖo tuto kpó linlin kpó tɛ́ntin. Tuto cí nǔ tají, alǒ nǔ ɖěɖěe sín nǔ è ko sɔ́ ɖ’ayǐ, bɔ yě sixú kplá mɛ yi nǔ e gbé nya wɛ è ɖe é kɔn lɛ́ é ɖɔhun. É ɖo mɔ̌ có, tuto ɖé sixú gɔn jijɛnu hwenu e nǔɖé gbo kpo nyi ali jí n’i é. Nǔ e gbé nya wɛ è ɖe é wɛ ka ɖo linlin ɔ nyí wɛ. Mǐ tuun fí e mǐ xwe é pɛ́pɛ́pɛ́, amɔ̌, ali e yi fí ɔ é hú ɖokpó. Ali ɖé sú ɔ, mǐ sixú sɔ́ ɖěvo. É su nukún mǐtɔn mɛ ɖɔ, Jexóva ɖe “linlin mavɔmavɔ” e é ɖó é xlɛ́ mǐ kpɛɖé kpɛɖé ɖo Biblu mɛ. (Efɛ́. 3:11.) Jexóva sixú gbɔn ali vovo nu dó bló bɔ linlin tɔn ná jɛnu; é ka nɔ kpa ɛ hwebǐnu, ɖó é “tuun nǔ e wú é bló nǔ ɖokpó ɖokpó é.” (Nǔx. 16:4) Gɔ́ ná ɔ, nǔ e Jexóva bló lɛ́ é ná nɔ ayǐ káká sɔ́yi. Étɛ́ ka nyí linlin Jexóva tɔn? Hǔzúhúzú tɛ́ lɛ́ é ka bló bónú é ná dó jɛnu?

7. Ée asú kpó asi kpó nukɔntɔn ɔ fɔ́n gú dó Jexóva jí gúdo é ɔ, nɛ̌ Jexóva ka w’azɔ̌ ɖo ali e nu é ná bló bɔ linlin tɔn ná jɛnu ɖe é wú gbɔn? (Matíe 25:34)

⁷ Mawu ɖɔ linlin e é ɖó é nú súnnu nukɔntɔn ɔ kpó nyɔ̌nu nukɔntɔn ɔ kpó. Yě ɖó ná ‘ji, gba kún, bo kpé ayǐkúngban ɔ jí, bo sɔ́ ɛ ɖó acɛ yětɔn glɔ́, bo sɔ́ kanlin e ɖo ayǐkúngban jí lɛ́ é bǐ ɖó acɛ yětɔn glɔ́.’ (Bǐb. 1:28) Adámu kpó Ɛvu kpó fɔ́n gǔ, bɔ hwɛhuhu byɔ́ gbɛtɔ́ lɛ́ mɛ, amɔ̌, énɛ́ sixú sú ali dó Jexóva bónú linlin tɔn gɔn jijɛnu ǎ. É bló hǔzúhúzú lɛ́ bónú linlin tɔn ná dó jɛnu. Tlóló jɛ́n é wá gbeta ɔ kɔn bo ná wá ɖó Axɔ́súɖuto ɖé ayǐ ɖo jǐxwé, bɔ é ná bló bɔ linlin e É ɖó ɖo bǐbɛ́mɛ nú gbɛtɔ́ lɛ́ kpó ayǐkúngban ɔ kpó é ná jɛnu. (Xa Matíe 25:34.) Hwenu e Jexóva ɖó dó é su é ɔ, wǎnyíyí sísɛ́ ɛ bɔ é sɛ́ Nukɔngbéví tɔn dó ayǐkúngban jí, b’ɛ kplɔ́n nǔ gbɛtɔ́ lɛ́ dó Axɔ́súɖuto ɔ wú, lobo sɔ́ gbɛ tɔn dó sá vɔ̌ dó xɔ gbɛ nú mǐ sín hwɛhuhu kpó kú kpó sí. Énɛ́ gúdo ɔ, Jexóva fɔ́n Jezu dó jǐxwé, bɔ é ná nyí Axɔ́sú nú Axɔ́súɖuto Mawu tɔn. Amɔ̌, é lɛ́ kpo nǔ gěgé bɔ mǐ ná kplɔ́n dó linlin Mawu tɔn wú.

8. (a) Étɛ́ ka nyí xóta tají Biblu tɔn? (b) Lěe è tínmɛ gbɔn ɖo Efɛ́zinu lɛ́ 1:8-11 mɛ é ɔ, étɛ́ ka nyí linlin tají Jexóva tɔn? (Kpɔ́n ɖiɖe e ɖo akpa ɔ jí é.)

⁸ Xóta tají Biblu tɔn wɛ nyí ɖɔ Jexóva ná klɔ́ cí sín nyǐkɔ tɔn wú, hwenu e é ná bló bɔ linlin e é ɖó nú ayǐkúngban ɔ é ná jɛnu gbɔn Axɔ́súɖuto tɔn e nu kp’acɛ dó wɛ Klísu ɖe é gblamɛ é. Linlin Jexóva tɔn sixú húzú ǎ. É dó akpá ɖɔ nǔ lɛ́ bǐ ná jɛ, lěe émí ko ɖɔ gbɔn é. (Eza. 46:10, 11; Ebl. 6:17, 18) Hwetɔnnu su ɔ, ayǐkúngban ɔ ná húzú palaɖísi; fínɛ́ wɛ mɛ e jɔ ɖo kúnkan Adámu kpó Ɛvu kpó tɔn mɛ, bo ná nyí mɛ maɖóblɔ̌ kpó nǔjlɔ́jlɔ́watɔ́ kpó lɛ́ é “ná dɔ́ ji” ɖe. (Ðɛh. 22:27) Linlin e Jexóva ɖó é tlɛ lɛ́ gbló ada hú énɛ́ flaflá tɔn. É ná lɛ́ xo mɛsɛntɔ́ tɔn e ɖo jǐxwé kpó ayǐkúngban jí kpó lɛ́ é bǐ kplé. Énɛ́ ɔ gúdo ɔ, nǔɖíɖó énɛ́ lɛ́ bǐ ná hwihwɛ́ yěɖée dó Nǔbǐwúkpétɔ́ e é nyí é glɔ́ kpó gbejíninɔ kpó. (Xa Efɛ́zinu lɛ́ 1:8-11.) Ali ɖagbe e nu Jexóva ɖo blǒbló wɛ bɔ linlin tɔn ɖo jijɛnu wɛ ɖe é jí wǔ nú we ǎ cé?

9. Biblu xixa nɔ d’alɔ mɛ bɔ è nɔ mɔ sɔgúdo sɛ́dó. Bǎ tɛ́ mɛ nǔ ka nɔ nyí mɔ̌ yi ɖó?

⁹ Mǐ ní ɖɔ xó dó nǔɖɔɖayǐ e xó Jexóva ɖɔ ɖo jikpá Edɛ́ni tɔn mɛ, bɔ è wlán dó Bǐbɛ́mɛ 3:15 mɛ é wú. b Wěmafɔ ɔ ɖɔ xó dó nǔ ɖěɖěe ná bló bɔ linlin tɔn ná jɛnu lɛ́ é wú, amɔ̌, xwe  afatɔ́n mɔ̌kpán gúdo jɛ́n nǔ énɛ́ lɛ́ ná jɛnu. Ði kpɔ́ndéwú ɔ, Mawu ɖɔ nú Ablaxámu ɖɔ kúnkan tɔn lɛ́ ɖokpó mɛ wɛ Klísu ɔ ná tɔ́n sín. (Bǐb. 22:15-18) Nukɔnmɛ, ɖo xwe 33 H.M. tɔn ɔ, è hɛn aɖǔ afɔgbɛnnu nú Jezu lěe è ko ɖɔ ɖ’ayǐ gbɔn é. (Mɛ. 3:13-15) Nǔ gǔdo tɔn e ɖo nǔɖɔɖayǐ énɛ́ mɛ é wɛ nyí ɖɔ “kúnkan ɔ” ná só Satáan sín ta, xwe 1000 jɛjí wɛ ka lɛ́ kpo cóbɔ nǔ ná nyí mɔ̌. (Nǔɖe. 20:7-10) Gɔ́ ná ɔ, Biblu ɖe nǔ gěgé xlɛ́ dó nǔ e ná jɛ hwenu e kɛn e ɖo gbɛ Satáan tɔn kpó tutoblónúnǔ Jexóva tɔn kpó tɛ́ntin é ná syɛ́n bǐ é wú.

10. (a) Nǔ tɛ́ lɛ́ ka ná jɛ ɖo malínmálín mɛ? (b) Nɛ̌ mǐ ka sixú sɔ́ nǔ nú linlin mǐtɔn kpó ayi mǐtɔn kpó gbɔn? (Kpɔ́n tínmɛ e ɖo do é.)

¹⁰ Lin tamɛ dó nǔ ɖěɖěe ná jɛ bo ná kpácá gbɛ ɔ bǐ, bɔ Biblu ɖɔ ɖ’ayǐ lɛ́ é wú. Nukɔntɔn, akɔta lɛ́ ná jlá ɖɔ “fífá tíin, bɔ ayi j’ayǐ!” (1 Tɛ. 5:2, 3) “Ajijimɛ” kpowun ɔ, wǔvɛ́ ɖaxó ɔ ná bɛ́ hwenu e akɔta lɛ́ ná tɔ́n ahwan sinsɛn nǔvú lɛ́ bǐ é. (Nǔɖe. 17:16) Énɛ́ gúdo ɔ, è sixú mɔ nǔ e jí wǔ é ɖé, bo mɔ bɔ “gbɛtɔ́ví ɔ jawě ɖo akpɔ́kpɔ́ mɛ, kpó hlɔ̌nhlɔ́n kpó, kpódó susu ɖaxó kpán.” (Mat. 24:30) Jezu ná ɖɔ hwɛ xá gbɛtɔ́ lɛ́, bo ɖe lɛ̌ngbɔ́ lɛ́ ɖó vo nú gbɔ̌ lɛ́. (Mat. 25:31-33, 46) Hwenɛ́nu ɔ, Satáan ná blá alɔ dó wǔ ǎ. Ðó é gbɛ́ wǎn ɖaxó nú togun Mawu tɔn wútu ɔ, é ná sísɛ́ kplékplé akɔta lɛ́ tɔn e Biblu ylɔ́ ɖɔ ‘Gɔ̌gu e ɖo Magɔ́gi tomɛ é,’ b’ɛ ná tɔ́n ahwan togun Jexóva tɔn. (Ezek. 38:2, 10, 11) Hweɖénu ná wá su bɔ è ná kplé mɛ ɖěɖěe gbigbɔ ɔ sɔ́ bɔ yě kpo ɖo ayǐkúngban jí lɛ́ é dó jǐxwé, bɔ yě ná gɔ́ nú Klísu kpódó ahwankpá jǐxwé tɔn ɔ kpó, lobɔ yě ná fun ahwan e è nɔ ylɔ́ ɖɔ Aamagedɔ́ni é; ahwan énɛ́ wɛ ná nyí akpáxwé gǔdo tɔn wǔvɛ́ ɖaxó ɔ tɔn. c (Mat. 24:31; Nǔɖe. 16:14, 16) Énɛ́ gúdo ɔ, Axɔ́súɖuɖu xwe afatɔ́n tɔn Klísu tɔn ná bɛ́.—Nǔɖe. 20:6.

11. Nɛ̌ nukúnɖíɖó gbɛ ninɔ káká sɔ́yi tɔn ka kan we gbɔn? (Lɛ̌ kpɔ́n ɖiɖe ɔ.)

¹¹ Din ɔ, dǒ nukún lěe nǔ lɛ́ ná yi gbɔn ɖo xwe afatɔ́n ɔ gúdo é mɛ kpɔ́n. Biblu ɖɔ ɖɔ Gbɛɖótɔ́ mǐtɔn “tlɛ sɔ́ mavɔmavɔ dó ayi [mǐtɔn] mɛ.” (Nǔt. 3:11, nwt) Lin tamɛ dó lěe énɛ́ kan hwiɖésúnɔ mɛtún ɔ kpó  xɔ́ntɔn e a zun xá Jexóva é kpó gbɔn é jí. Wěma Dọnsẹpọ Jehovah, wěxwɛ 319, ɖɔ xó élɔ́ e sɔ́ akpakpa mɛ é: “Ényí mǐ nɔ gbɛ nú xwe kanweko mɔ̌kpán, afatɔ́n mɔ̌kpán, lǐvi mɔ̌kpán, alǒ lǐva mɔ̌kpán gúdo ɔ, mǐ ná tuun nǔ gěgé dó Jexóva Mawu wú hú lěe mǐ tuun gbɔn ɖo égbé é. Amɔ̌, mǐ ná lɛ́ kpo ɖo mimɔ wɛ ɖɔ é lɛ́ kpo nǔ ɖaaɖagbe gěgé bɔ mǐ ná lɛ́ kplɔ́n. . . . Mǐ tlɛ sixú dó nukún lěe gbɛ ná víví, bo lɛ́ sɔ́ akpakpa mɛ sɔ ɖo palaɖísi mɛ é mɛ kpɔ́n ǎ. Gɔ́ ná ɔ, nǔ ɖagbe hú gǎn e sín vǐví mǐ ná ɖu hwebǐnu é wɛ nyí vɛ̌ e mǐ ná nɔ ɖo vǐvɛ́ wɛ xá Jexóva é.” Din hwɛ̌ e mǐ ná kpo ɖo Xó Mawu tɔn kplɔ́n wɛ é ɔ, nǔ ɖěvo tɛ́ mǐ ka sixú gbéjé kpɔ́n?

12. Nɛ̌ a ka sixú kpɔ́n nǔ e ɖo jǐxwé lɛ́ é sɛ́dó dáán gbɔn? Nǎ kpɔ́ndéwú ɖokpó.

¹² Xó Mawu tɔn ɖe nǔ kpɛɖé xlɛ́ mǐ dó lěe nǔ lɛ́ ɖe ɖo “jǐ aga” é wú. (Eza. 33:5) Biblu ɖɔ nǔ e sɔ́ akpakpa mɛ lɛ́ é dó Jexóva kpó tutoblónúnǔ tɔn sín akpáxwé e ɖo jǐxwé é kpó wú. (Eza. 6:1-4; Dan. 7:9, 10; Nǔɖe. 4:1-6) Ði kpɔ́ndéwú ɔ, mǐ sixú xa nǔ dó nǔjíwǔ ɖěɖěe Ezekiyɛ́li mɔ, hwenu e “jǐnukúnsin hun, bɔ Mawu ɖe nǔ xlɛ́” ɛ é wú.—Ezek. 1:1.

13. Sɔgbe xá Eblée lɛ́ 4:14-16 ɔ, nɛ̌ nǔ ka cí nú we dó azɔ̌ e wa wɛ Jezu ɖe ɖo jǐxwé é wú?

¹³ Lin tamɛ dó azɔ̌ e wa wɛ Jezu ɖe ɖo jǐxwé, bo nyí Axɔ́sú mǐtɔn e ɖo acɛ kpa wɛ é kpó Vɔ̌sánúxwlémawutɔ́ ɖaxó e nɔ se wǔvɛ́ xá mɛ é kpó é wú. Mǐ sixú gbɔn Jezu jí bo sɛkpɔ́ “axɔ́súzinkpo fɛ́nú tɔn” Mawu tɔn gbɔn ɖɛ xixo gblamɛ, bo byɔ́ nǔbláwǔkúnúmɛ kpó alɔdó kpó “ɖo hwetɔnnu.” (Xa Eblée lɛ́ 4:14-16.) Ðo azǎn ɖokpó ɖokpó jí ɔ, é byɔ́ ɖɔ mǐ ní nɔ lin tamɛ dó nǔ e Jexóva kpó Jezu kpó wa nú mǐ, bo lɛ́ kpo ɖo wiwa nú mǐ wɛ sín jǐxwé lɛ́ é wú. Wǎn e yě yí nú mǐ é ɖó ná su nukún mǐtɔn mɛ tawun, bo sísɛ́ mǐ bɔ mǐ ná wa sinsɛnzɔ́ mǐtɔn kpó kanɖódónǔwú kpó, bo lɛ́ sɛn Jexóva kpó akpakpa sɔ́ mɛ kpó.—2 Kɔ. 5:14, 15.

14. Ðɔ nǔ ɖagbe ɖěɖěe mǐ sixú wa dó xlɛ́ ɖɔ nǔ e Jexóva kpó Jezu kpó wa nú mǐ é su nukún mǐtɔn mɛ tawun é ɖokpó. (Lɛ̌ kpɔ́n fɔtóo lɛ́.)

 ¹⁴ Ali ɖagbe hú gǎn e nu mǐ ná ɖe xlɛ́ Mawu kpó Vǐ tɔn kpó ɖɔ nǔ e yě wa nú mǐ é su nukún mǐtɔn mɛ tawun ɖe é ɖokpó wɛ nyí ɖɔ, mǐ ná tɛ́n kpɔ́n bo d’alɔ mɛ ɖěvo lɛ́ bɔ yě ná húzú Kúnnuɖetɔ́ Jexóva tɔn, lobo húzú ahwanvú Jezu tɔn. (Mat. 28:19, 20) Nǔ e mɛsɛ́dó Pɔ́lu wa dó xlɛ́ ɖɔ nǔ e Mawu kpó Klísu kpó wa nú émí é su nukún émítɔn mɛ é nɛ́. É tuun ɖɔ jlǒ Jexóva tɔn wɛ nyí ɖɔ “mɛ alɔkpa lɛ́ bǐ ní mɔ hwlɛngán, bo lɛ́ ɖó nukúnnúmɔjɛnǔmɛ e sɔgbe é dó nǔgbó ɔ wú.” (1 Tim. 2:3, 4) É w’azɔ̌ syɛ́nsyɛ́n ɖo sinsɛnzɔ́ tɔn mɛ dó d’alɔ mɛ gěgé lěe é kpé wú gbɔn é, “bo ná dó sixú hwlɛ́n mɛɖé lɛ́ gán gbɔn alɔkpa lɛ́ bǐ mɛ.”—1 Kɔ. 9:22, 23.

15. Sɔgbe xá Ðɛhan 1:2 ɔ, étɛ́ ka ná zɔ́n bɔ mǐ ná nyí awǎjijɛnɔ?

¹⁵ Mɛ e wlán Ðɛhan nukɔntɔn ɔ é ɖɔ xó dó mɛ e ɖ’awǎjijɛ, mɛ e nǔ nyɔ́ ná é wú gbɔn lě: ‘Nǔ e é nɔ yí wǎn ná é wɛ nyí kplɔ́n Jexóva tɔn’ bo “nɔ ɖo tamɛ lin d’é wú wɛ zǎn kéze.” (Ðɛh. 1:1-3.) Biblutínmɛtɔ́ Joseph Rotherham ɖɔ xó dó wěmafɔ énɛ́ wú ɖo wěma tɔn Studies in the Psalms mɛ, bo ɖɔ: “Xó Mawu tɔn ɖó ná nɔ dó xomɛhunhun nú mɛ sɔmɔ̌ bɔ è ná nɔ nya gbě tɔn, kplɔ́n, lobo lɛ́ lin tamɛ d’é jí nú hwenu gěgé.” É lɛ́ ɖɔ gɔ́ ná ɖɔ: “Ényí kéze ɖé wá yi bónú mɛɖé ma xa Biblu ǎ hǔn, kéze énɛ́ gú i kpowun wɛ.” Ayi sísɔ́ ɖó gǒflɛ́mɛ tají e ɖo Biblu mɛ lɛ́ é jí kpó lěe yě cá kan xá yěɖée gbɔn é mimɔ kpó, sixú d’alɔ we bɔ a ná ɖu Biblu xixa towe sín vǐví. Gǒflɛ́mɛ nǔ ɖěɖěe ɖo Xó Mawu tɔn mɛ lɛ́ é bǐ tɔn gbígbéjé kpɔ́n ná víví kpɔ́n!

16. Étɛ́ jí mǐ ka ná ɖɔ xó dó ɖo xóta e bɔ d’é wú é mɛ?

¹⁶ Nǔgbó ɖaaɖagbe e Jexóva nɔ kplɔ́n mǐ ɖo Xó tɔn mɛ lɛ́ é syɛ́n dín bónú nukúnnú mimɔ jɛ yě mɛ ná vɛ́ wǔ nú mǐ ǎ. Ðo xóta e bɔ d’é wú é mɛ ɔ, mǐ ná gbéjé nǔgbó énɛ́ lɛ́ e gɔ́ngɔ́n é ɖokpó kpɔ́n, énɛ́ wɛ nyí tɛ́npli ɖaxó gbigbɔ tɔn Jexóva tɔn e xó Pɔ́lu ɖɔ ɖo wěma e é sɛ́ dó klisánwun Eblée lɛ́ é mɛ é. Xóta énɛ́ gbígbéjé kpɔ́n ná ná we awǎjijɛ tawun.