1. Nɛ̌ nǔ ka nɔ cí nú Jexóva dó mɛsɛntɔ́ tɔn lɛ́ wú?

 ÉNYÍ Jexóva nyi kɔ kpɔ́n mɛsɛntɔ́ tɔn lɛ́ ɖo ayǐkúngban jí ɔ, étɛ́ é ka nɔ mɔ? É nɔ ɖ’ayi awǎjijɛ mǐtɔn lɛ́ kpó aluwɛ mǐtɔn lɛ́ kpó wú. (Ðɛh. 37:18) Ényí é ɖ’ayi wú ɖɔ mǐ ɖo wǔvɛ́ se wɛ ɖo lěe nǔ nɔ cí nú mɛ é linu cóbó ka kpo ɖo sinsɛn émí wɛ lěe mǐ kpé wú gbɔn é bǐ ɔ, xomɛ nɔ hun i tawun. Hú gǎn bǐ ɔ, akpakpa nɔ sɔ́ ɛ bónú é ná nɔ gǔdo nú mǐ, bo lɛ́ dó gbɔ nú mǐ.

2. Étɛ́ Jexóva ka nɔ wa nú mɛ ɖěɖěe ayi yětɔn gba dó lɛ́ é? Nɛ̌ mǐ ka sixú ɖu nukúnkpédómɛwú tɔn sín le gbɔn?

² Ðɛhan 147:3 ɖɔ ɖɔ Jexóva ‘nɔ blá akpa’ mɛ ɖěɖěe ayi yětɔn xo akpa lɛ́ é tɔn. È jlɛ́ Jexóva dó nukúnkpémɛwútɔ́ xomɛnyɔ́tɔ́ wú ɖo fí nú mɛ ɖěɖěe akpa jɛ yě wú ɖo lěe nǔ nɔ cí nú mɛ é kpáxwé lɛ́ é. Étɛ́ mǐ ka ɖó ná wa bá ɖu nukúnkpémɛwú Jexóva tɔn sín le? Nǔjlɛ́dónǔwú ɖé ɖíe. Dotóo alɔsekpɛ́nnánɔ ɖé sixú wa nǔ gěgé dó d’alɔ mɛ e wú akpa jɛ é ɖé bónú akpa ɔ ná kú. Amɔ̌, cóbónú mɛ e wú akpa jɛ é ná ɖu le tɔn ɔ, é ɖó ná xwedó wěɖexámɛ dotóo ɔ tɔn lɛ́ kpó sɔxwixwe kpó. Ðo xóta élɔ́ mɛ ɔ, mǐ ná mɔ nǔ e Jexóva ɖɔ ɖo Xó tɔn mɛ nú mɛ ɖěɖěe ɖo wǔvɛ́ se wɛ ɖo lěe nǔ nɔ cí nú mɛ é linu lɛ́ é, bo ná lɛ́ gbéjé lěe mǐ sixú xwedó wěɖexámɛ tɔn e wǎnyíyí kpé é gbɔn é kpɔ́n.

JEXÓVA NƆ NÁ JIÐE MǏ ÐƆ MǏ XƆ AKWƐ́

3. Étɛ́wú mɛɖé lɛ́ ka nɔ lin ɖɔ émí kún xɔ akwɛ́ káká ɖé ó?

³ Mǐ ɖo gbɛ nɔ wɛ ɖo gbɛ e mɛ wǎnyíyí ma ɖe ǎ é, b’ɛ blá wǔ  ɖɔ lěe è wa nǔ xá mɛ gěgé gbɔn é zɔ́n bɔ yě nɔ mɔ ɖɔ émí kún xɔ akwɛ́ káká ɖé ó. Nɔví nyɔ̌nu ɖé nɔ nyí Helen a bo ɖɔ: “Xwédo e mɛ wǎnyíyí ma ɖe ǎ é ɖé mɛ wɛ un su ɖe. Tɔ́ ce nylá hun tawun, bo nɔ ɖɔ nú mì gbe bǐ gbe ɖɔ nyi kún hwɛ́n nǔtí ó.” Bóyá, Helen ɖɔhun ɔ, è wa nǔ xá we ɖo ali agɔ nu, nɔ mɔ xó ɖɔ dó wǔ we hwɛhwɛ, alǒ bló bɔ a mɔ ɖɔ è kún yí wǎn nú émí ó. Ényí mɔ̌ wɛ é nyí ɔ, é sixú vɛ́ wǔ bɔ a ná ɖi ɖɔ nǔ émítɔn nɔ ɖu ayi mɛ nú mɛɖé nǔgbó nǔgbó.

4. Sɔgbe xá Ðɛhan 34:19 ɔ, gǎnjɛwú tɛ́ Jexóva ka ná mǐ?

⁴ Ényí mɛ ɖěvo lɛ́ ná bo wa nǔ xá we ɖo ali agɔ nu ɔ, a sixú kú d’é jí ɖɔ Jexóva yí wǎn nú we, bɔ a lɛ́ xɔ akwɛ́ n’i. É “ɖo kpɔ́ xá mɛ e ayi yětɔn gbadó lɛ́” é. (Xa Ðɛhan 34:19.) Ényí a mɔ ɖɔ émí kún “hwɛ́n nǔtí ó” hǔn, flín ɖɔ Jexóva mɔ jijɔ ɖagbe e a ɖó lɛ́ é, bo dɔn we wá éɖée gɔ́n. (Jaan 6:44) É ɖo gbesisɔmɛ hwebǐnu bá d’alɔ we, ɖó a xɔ akwɛ́ n’i.

5. Étɛ́ lěe Jezu wa nǔ xá mɛ ɖěɖěe mɛ ɖěvo lɛ́ ma nɔ ké ya káká ɖé ná ǎ lɛ́ é gbɔn é ka sixú kplɔ́n mǐ?

⁵ Mǐ sixú kplɔ́n nǔ dó lěe nǔ nɔ cí nú Jexóva é wú gbɔn kpɔ́ndéwú Jezu tɔn gbígbéjé kpɔ́n gblamɛ. Hwenu e Jezu ɖo sinsɛnzɔ́ tɔn wa wɛ ɖo ayǐkúngban jí é ɔ, é ɖ’ayi mɛ ɖěɖěe mɛ ɖěvo lɛ́ ma nɔ ké ya káká ɖé ná ǎ lɛ́ é wú, bo wa nǔ xá yě kpó wǔvɛ́sexámɛ kpó. (Mat. 9:9-12) Hwenu e nǎwe ɖé ɖ’alɔ awu Jezu tɔn wú kpó linlin ɔ kpó ɖɔ azɔn syɛ́nsyɛ́n émítɔn ná gbɔ é ɔ, Jezu dó gbɔ n’i, bo lɛ́ kpa ɛ ɖó nǔɖiɖi tɔn wú. (Mak. 5:25-34) Jezu nɔ ɖe jijɔ Tɔ́ tɔn tɔn lɛ́ xlɛ́ bɔ nǔ bǐ nɔ vɔ ɖ’é wú. (Jaan 14:9) Énɛ́ wú ɔ, a sixú kú d’é jí ɖɔ a xɔ akwɛ́ nú Jexóva bɔ é nɔ ɖ’ayi jijɔ towe ɖagbe lɛ́ wú, káká jɛ nǔɖiɖi kpó wǎnyíyí kpó e a ɖó n’i é jí.

6. Nɛ̌ mɛɖé ka sixú ɖí xwi xá linlin un hwɛ́n nǔɖé ǎ tɔn gbɔn?

⁶ Ényí a kpo ɖo nǔ xo kpɔ́n wɛ ɖɔ émí kún  hwɛ́n nǔtí ó ɔ, étɛ́ a ka sixú wa? Xa wěmafɔ Biblu tɔn ɖěɖěe nɔ ná gǎnjɛwú we ɖɔ a xɔ akwɛ́ nú Jexóva lɛ́ é, bo lin tamɛ dó yě jí. b (Ðɛh. 94:19) Ényí a ma kpé nǔ e gbé nya wɛ a ɖe é wú ǎ, alǒ awakanmɛ kú we ɖó a sɔ́ sixú wa nǔ gěgé mɛ ɖěvo lɛ́ ɖɔhun ǎ wútu hǔn, ma dó hwɛ hwiɖée syɛ́nsyɛ́n ó. Jexóva nɔ ɖó nukún ɖɔ a ní wa nǔ zɛ nǔ e wú a kpé é wiwa wú ǎ. (Ðɛh. 103:13, 14) Ényí è xo dǎka wǔ we wá yi hǔn, ma dó hwɛ hwiɖée ɖó nǔ e alǎnnúwatɔ́ ɔ wa é wú ó. Hwɛ towe wɛ ǎ! Flín ɖɔ nǔnyanyawatɔ́ lɛ́ wɛ Jexóva ná byɔ́ axɔ́, é nyí mɛ e wú è wa nǔ dó lɛ́ é ǎ. (1 Pi. 3:12) Sandra e è wa alǎnnú xá hwenu e é ɖo vǔ é ɖɔ: “Un nɔ byɔ́ Jexóva hwɛhwɛ ɖɔ é ní d’alɔ mì nú má nɔ ɖ’ayi jijɔ ɖagbe e un ɖó bɔ éyɛ́ nɔ mɔ lɛ́ é wú.”

7. Nɛ̌ mǐ ka sixú zán nǔ e jɛ dó mǐ jí wá yi lɛ́ é ɖo sinsɛnzɔ́ Jexóva tɔn mɛ gbɔn?

⁷ Ma xo nǔ kpɔ́n gbeɖé ɖɔ Jexóva ka sixú zán émí dó d’alɔ mɛ ɖěvo lɛ́ a jí ó. É wlí yɛ̌yi nú we, bɔ a nyí azɔ̌watɔ́gbɛ́ tɔn ɖo sinsɛnzɔ́ ɔ mɛ. (1 Kɔ. 3:9) Nǔ e xá we ɖo gbɛzán towe mɛ lɛ́ é sixú zɔ́n bɔ a ná nɔ se wǔvɛ́ xá mɛ ɖěvo lɛ́, bo ná nɔ lɛ́ mɔ nukúnnú jɛ lěe nǔ sixú cí nú yě é mɛ. A sixú wa nǔ gěgé dó d’alɔ yě. È d’alɔ Helen e xó mǐ ɖɔ wá yi é, bɔ din ɔ, é kpé nǔ wú hú gǎn bo ná d’alɔ mɛ ɖěvo lɛ́. É ɖɔ: “Jexóva bló bɔ mɛ énɛ́ e ma nyí ‘mɛɖé ǎ’ é nɔ mɔ ɖɔ è yí wǎn nú émí, bɔ émí lɛ́ nyɔ́ zán.” Kpó awǎjijɛ kpó wɛ Helen ɖo gběxosín-alijítɔ́ hwebǐnu tɔn sín azɔ̌ wa wɛ.

JEXÓVA BA ÐƆ MǏ NÍ YÍ GBE NÚ HWƐSƆ́KƐMƐ ÉMÍTƆN

8. Gǎnjɛwúxó tɛ́ mǐ ka mɔ ɖo Ezayíi 1:18 mɛ?

⁸ Nǔ e mɛsɛntɔ́ Jexóva tɔn ɖé lɛ́ wa nyi do wá yi lɛ́ é nɔ ɖó linkpɔ́n nú yě tawun, é sixú nyí nǔ e yě ko wa cóbó bló batɛ́mu alǒ ɖo batɛ́mu yětɔn gúdo lɛ́ é. Amɔ̌, é ná nyɔ́ ɖɔ mǐ ní flín ɖɔ Jexóva sɔ́ nǔ nú gbɛxixɔ ɔ, ɖó wǎn ɖaxó e é yí nú mǐ é wú. É ɖo wɛn ɖɔ, é ba ɖɔ mǐ ní yí gbe nú nǔníná émítɔn. Jexóva ná gǎnjɛwú mǐ ɖɔ ényí mǐ kpó émí kpó “se nǔ jɛ mǐɖée gbe mɛ” ɔ, c émí ná sɔ́ hwɛ kɛ mǐ bǐ mlɛ́mlɛ́. (Xa Ezayíi 1:18.) É su nukún mǐtɔn mɛ tawun ɖɔ Tɔ́ wǎnyíyínɔ mǐtɔn Jexóva nɔ wɔn hwɛ e mǐ hu wá yi lɛ́ é. Ðo hwe ɖokpó ɔ nu ɔ, é nɔ wɔn nǔ ɖagbe e mǐ ko wa wá yi lɛ́ é gbeɖé ǎ.—Ðɛh. 103:9, 12; Ebl. 6:10.

9. Étɛ́wú mǐ ka ɖó ná wa nǔ e wú mǐ kpé é bǐ bo sɔ́ ayi ɖó égbé kpó sɔgúdo kpó jí, b’ɛ ma ná nyí ɖó nǔ e ko wá yi lɛ́ é jí ǎ?

⁹ Ényí a byɔ́ linkpɔ́n mɛ ɖó nǔ e a wa nyi do wá yi lɛ́ é wú hǔn, wa nǔ e wú a kpé é bǐ bo sɔ́ ayi ɖó égbé kpó sɔ e ja é kpó jí, ní ma nyí ɖó nǔ e ko jɛ wá yi lɛ́ é jí ó. Kpɔ́n kpɔ́ndéwú mɛsɛ́dó Pɔ́lu tɔn. É vɛ́ n’i ɖɔ é dó ya nú klisánwun lɛ́ syɛ́nsyɛ́n wá yi, amɔ̌, é tuun ɖɔ Jexóva ko sɔ́ hwɛ kɛ émí. (1 Tim. 1:12-15) É ka nɔ ɖo tamɛ lin dó nǔ e é ko wa nyi do wá yi lɛ́ é jí wɛ wɛ a? É ɖo wɛn ɖɔ, é gbɛ́ ɖɔ émí kún ná wa mɔ̌ ó, lěe é ma nɔ ɖo hwenu zán dó lin tamɛ dó nǔ ɖěɖěe é ko wa dó húzú Falizyɛn e è nɔ ɖó sísí ná é ɖé jí wɛ gbɔn ǎ é ɖɔhun. (Filí. 3:4-8, 13-15) É nyɔ́ wa ɔ, Pɔ́lu wa sinsɛnzɔ́ tɔn kpó kanɖódónǔwú kpó, bo sɔ́ ayi ɖó sɔgúdo jí. Pɔ́lu ɖɔhun ɔ, a sixú húzú nǔ e ko jɛ wá yi lɛ́ é ǎ. Amɔ̌, a sixú zán ninɔmɛ towe din tɔn lɛ́ dó wlí yɛ̌yi nú Jexóva, bo sɔ́ ayi ɖó sɔgúdo ɖaaɖagbe e sín akpá é dó nú we é jí.

10. Ényí nǔ e mǐ wa nyi do wá yi lɛ́ é wa nǔ dó mɛ ɖěvo lɛ́ wú ɔ, étɛ́ mǐ ka sixú wa?

¹⁰ Nǔ e a wa nyi do wá yi bɔ yě wa nǔ dó mɛ ɖěvo lɛ́ wú é ɖé lɛ́ sixú nɔ ɖó linkpɔ́n nú we. Étɛ́ ka sixú d’alɔ? Wa nǔ e wú a kpé é dó jlá nǔ e a hɛn gblé é ɖó, káká jɛ kɛnklɛ́n dídó dó nǔjɔnǔ  mɛ jí. (2 Kɔ. 7:11) Nɔ byɔ́ Jexóva ɖɔ é ní d’alɔ mɛ ɖěɖěe wú nǔwanyido émítɔn wa nǔ dó lɛ́ é. É hɛn ɔ, é ná d’alɔ hwi kpó mɛ e wú a wa nǔ dó lɛ́ é kpó bɔ mi ná dɛ, bo lɛ́ ɖó fífá ayi mɛ tɔn.

11. Étɛ́ kpɔ́ndéwú gbeyíɖɔ Jonási tɔn ka sixú kplɔ́n mǐ? (Kpɔ́n ɖiɖe e ɖo lɔmɔ̌.)

¹¹ Afɔ e a ɖe nyi do wá yi lɛ́ é ní kplɔ́n nǔ we, bónú a ní ɖo gbesisɔmɛ nú Jexóva ná zán we ɖo ali ɖěbǔ e é ba é nu. Ð’ayi kpɔ́ndéwú gbeyíɖɔ Jonási tɔn wú. Jonási yi Ninívu lěe Mawu ɖe gbe tɔn n’i gbɔn é ǎ, é nyɔ́ wa ɔ, fí vo sésé wɛ é tunta. Jexóva gbɛ́ nǔ nú Jonási bɔ afɔ e é ɖe nyi do é kplɔ́n nǔ i. (Joná. 1:1-4, 15–2:1; 2:8-11) Jexóva jó gbe dó Jonási wú ǎ. Mawu lɛ́ hun ali nú Jonási b’ɛ ná yi Ninívu, bɔ gayɛnu tɔn ɔ, é yá wǔ se tónú. É lɔn bónú afɔ e é ɖe nyi do wá yi é sú ali d’è bónú é gɔn gbe yí nú azɔ̌ énɛ́ e Jexóva sɔ́ d’así n’i é ǎ.—Joná. 3:1-3.

JEXÓVA NƆ GBƆN GBIGBƆ MÍMƐ́ TƆN GBLAMƐ BO NƆ DÓ GBƆ NÚ MǏ

12. Ényí nǔ baɖabaɖa ɖé jɛ dó mǐ jí ɔ, nɛ̌ Jexóva ka nɔ ná mǐ fífá gbɔn? (Filípunu lɛ́ 4:6, 7)

¹² Ényí nǔ baɖabaɖa ɖé xá mǐ ɔ, Jexóva nɔ gbɔn gbigbɔ mímɛ́ tɔn gblamɛ dó dó gbɔ nú mǐ. Kpɔ́n kpɔ́ndéwú Ron kpó Carol kpó tɔn. É blá wǔ ɖɔ vǐ súnnu yětɔn hu éɖée. Yě ɖɔ: “Mǐ ko gbɔn ninɔmɛ syɛ́nsyɛ́n lɛ́ mɛ wá yi, amɔ̌, élɔ́ tɔn sɛ hǔn d’aga. Mǐ nɔ amlɔ ma dɔ́ bo xo ɖɛ nú zǎn gěgé, bo ka mɔ fífá e xó Filípunu lɛ́ 4:6, 7 ɖɔ é nǔgbó nǔgbó.” (Xa.) Ényí a ɖo ninɔmɛ e nɔ gba ayi dó nú mɛ é ɖé ɖí xwi xá wɛ hǔn, ɖɔ lěe nǔ cí nú we tawun é nú Jexóva ɖo ɖɛ mɛ. A sixú ɖɔ xó n’i azɔn nabí e a ba é kpó táan nabí e a ba ná ɖɔ ná é kpó. (Ðɛh. 86:3; 88:2) Nɔ byɔ́ gbigbɔ mímɛ́ Jexóva hwɛhwɛ. É ná wɔn ya nú nǔ e byɔ́ wɛ a ɖe lɛ́ é gbeɖé ǎ.—Luk. 11:9-13.

13. Nɛ̌ gbigbɔ mímɛ́ ka sixú d’alɔ mǐ bɔ mǐ ná kpo ɖo Jexóva sɛn wɛ kpó gbejíninɔ kpó gbɔn? (Efɛ́zinu lɛ́ 3:16)

¹³ A ko ɖí xwi xá ninɔmɛ syɛ́nsyɛ́n ɖé wá yi, bo wá mɔ din ɖɔ hlɔ̌nhlɔ́n káká ɖé kún sɔ́ kpo ɖo émí wú ó wɛ a? Gbigbɔ mímɛ́ sixú ná hlɔ̌nhlɔ́n we bɔ a ná kpo ɖo Jexóva sɛn wɛ kpó gbejíninɔ kpó. (Xa Efɛ́zinu lɛ́ 3:16.) Kpɔ́n nǔ e jɛ dó nɔví nyɔ̌nu e nɔ nyí Flora é jí é. Mɛsɛ́dó wɛ é kpó asú ɔ kpó nyí bo ɖo sinsɛnzɔ́ wa ɖó kpɔ́ wɛ, bɔ asú ɔ wá ba nyɔ̌nu ɖěvo, bɔ yě gbɛ́ yěɖée. É ɖɔ: “Awakanmɛ kú mì tawun ɖó gbejí e é ma nɔ nú mì ǎ é wú. Un xo ɖɛ sɛ́dó Jexóva bo byɔ́ gbigbɔ mímɛ́ tɔn bá dó dɛ ɖ’é nu. Jexóva dó gbɔ nú mì, bo ná mì nǔ e sín hudó un ɖó bá ɖí xwi xá nǔ e un lin ɖo bǐbɛ́mɛ ɖɔ un kún sixú ɖí xwi xá ó é.” Flora mɔ ɖɔ Mawu d’alɔ émí bɔ émí ɖeji dó wǔ tɔn d’é jí, bo lɛ́ kú d’é jí ɖɔ Mawu ná nɔ gǔdo nú émí ɖo mɛtɛ́nkpɔ́n émítɔn lɛ́ bǐ mɛ. É ɖɔ: “Nǔ e Ðɛhan 119:32 ɖɔ é ɖi wǔ ce: ‘Nǔ e a zɔ́n lɛ́ sín wezun jí wɛ un ɖe, ɖó a nǎ ɖo nukúnnúmɔjɛnǔmɛ ná mì d’é jí wɛ.’”

14. Nɛ̌ mǐ ka sixú ná tɛn gbigbɔ Mawu tɔn b’ɛ ná d’alɔ mǐ gbɔn?

¹⁴ Nɛ̌ a ka sixú wa nǔ sɔgbe xá byɔ̌ e byɔ́ gbigbɔ mímɛ́ wɛ a ɖe é gbɔn? Nɔ ɖ’alɔ ɖo azɔ̌ ɖěɖěe ná zɔ́n bɔ gbigbɔ mímɛ́ Mawu tɔn ná nɔ kpɔ́ xá we lɛ́ é mɛ. Kplé lɛ́ yiyi kpó mawuxó ɖiɖɔ nú mɛ ɖěvo lɛ́ kpó ɖo nǔ énɛ́ lɛ́ mɛ. Nɔ xa Xó Jexóva tɔn gbe bǐ gbe, énɛ́ ná d’alɔ we bɔ a ná nɔ lin tamɛ dó linlin tɔn lɛ́ jí. (Filí. 4:8, 9) Ée a ná ɖo Biblu xa wɛ é ɔ, ɖ’ayi mɛ ɖěɖěe xó é ɖɔ bɔ yě ɖí xwi xá wǔvɛ́ lɛ́ é wú, bo lin tamɛ dó lěe Jexóva d’alɔ yě bɔ yě dɛ gbɔn é jí. Sandra e xó mǐ ɖɔ wá yi é se wǔvɛ́ ɖó é ɖí xwi xá wǔvɛ́ gěgé ɖo gbɛzán tɔn mɛ. É ɖɔ: “Tan Jozɛ́fu tɔn nɔ dó wǔsyɛ́n lanmɛ nú mì tawun. É lɔn bónú mɛtɛ́nkpɔ́n kpó nǔagɔwaxámɛ kpó sín wǔvɛ́ e é se lɛ́ é dó avaja xɔ́ntɔn e é zun xá Jexóva é mɛ ǎ.”—Bǐb. 39:21-23.

 JEXÓVA NƆ ZÁN NǓÐITƆ́ HǍTƆ́ MǏTƆN LƐ́ DÓ DÓ GBƆ NÚ MǏ

15. Mɛ ɖětɛ́ lɛ́ gɔ́n mǐ ka sixú mɔ gbɔdónúmɛ ɖe? Nɛ̌ yě ka sixú d’alɔ mǐ gbɔn? (Kpɔ́n ɖiɖe ɔ lɔmɔ̌.)

¹⁵ Ényí mǐ ɖo wǔvɛ́ se wɛ ɔ, nǔɖitɔ́ hǎtɔ́ mǐtɔn lɛ́ sixú nyí “jɔtɛn gbɔdónúmɛ tɔn ɖaxó ɖé” nú mǐ. (Koló. 4:11) Nɔví súnnu kpó nɔví nyɔ̌nu kpó mǐtɔn lɛ́ ɔ, ali e nu Jexóva nɔ xlɛ́ ɖɔ émí yí wǎn nú mǐ ɖe nǔgbó nǔgbó é ɖokpó wɛ yě nyí. Nǔɖitɔ́ hǎtɔ́ mǐtɔn lɛ́ sixú dó gbɔ nú mǐ gbɔn tó ɖíɖó mǐ kpó wǔvɛ́sexámɛ kpó gblamɛ, alǒ yě sixú nɔ gǔdo nú mǐ gbɔn hwenu zínzán ɖó kpɔ́ xá mǐ gblamɛ. Yě sixú má wěmafɔ Biblu tɔn e dó gbɔ nú mɛ é ɖé xá mǐ, alǒ, xo ɖɛ ɖó kpɔ́ xá mǐ. d (Hlɔ̌. 15:4) Hweɖélɛ́nu ɔ, nɔví súnnu ɖé alǒ nɔví nyɔ̌nu ɖé sixú flín mǐ linlin Jexóva tɔn, bɔ mɔ̌ mɛ ɔ, é ná d’alɔ mǐ bɔ mǐ ná nɔ jlɛ̌ jí. Klisánwun hǎtɔ́ lɛ́ sixú lɛ́ nɔ gǔdo nú mǐ ɖo ali tawun tawun lɛ́ nu, ɖi nǔɖuɖu hinhɛn wá nú mǐ hwenu e mǐ ɖo linkpɔ́n mɛ é.

16. Étɛ́ é ka sixú byɔ́ ɖɔ mǐ ní wa bónú mɛ ɖěvo lɛ́ ná dó sixú nɔ gúdo nú mǐ?

¹⁶ Bo ná dó mɔ alɔdó mɛ ɖěvo lɛ́ tɔn ɔ, é sixú byɔ́ ɖɔ mǐ ní ɖɔ nú yě. Nɔví súnnu kpó nɔví nyɔ̌nu kpó mǐtɔn lɛ́ yí wǎn nú mǐ bo ba ná d’alɔ mǐ. (Nǔx. 17:17) Amɔ̌, yě sixú nɔ ma tuun lěe nǔ cí nú mǐ é alǒ nǔ e hudó mǐ é. (Nǔx. 14:10) Ényí a ɖo wǔvɛ́ se wɛ ɖo lěe nǔ nɔ cí nú mɛ é linu hǔn, ɖo gbesisɔmɛ bá ɖɔ lěe nǔ cí nú we é nú xɔ́ntɔn e zin ɖo gbigbɔ lixo lɛ́ é. Nǔ yě ní tuun lěe yě ná d’alɔ we gbɔn é.  A sixú wá gbeta ɔ kɔn bá ɖɔ lěe nǔ cí nú we é nú mɛxó agun tɔn e kpá a nɔ vo ɖe é ɖokpó alǒ we. Nɔví nyɔ̌nu ɖé lɛ́ mɔ ɖɔ xó ɖiɖɔ xá nɔví nyɔ̌nu e zin é ɖěvo nɔ dó gbɔ nú mɛ tawun.

17. Wǔvɛ́ tɛ́ lɛ́ mɔ̌ ka sixú zɔ́n bɔ mǐ ná gɔn gbe yí nú wǔsyɛ́n dó lanmɛ nú mɛ? Nɛ̌ mǐ ka sixú ɖu ɖo yě jí gbɔn?

¹⁷ Ma nɔ nɔ hwiɖokpó dín ó. Wǔvɛ́ e mɔ wɛ a ɖe ɖo lěe nǔ nɔ cí nú mɛ é linu é sixú zɔ́n bɔ a ná ba ná zán hwenu ɖó kpɔ́ xá mɛ ɖěvo lɛ́ ǎ. Hweɖélɛ́nu ɔ, nɔví súnnu kpó nɔví nyɔ̌nu kpó towe lɛ́ sixú nɔ ma mɔ nukúnnú jɛ lěe nǔ cí nú we é mɛ, alǒ sixú nɔ ma kpé wú bo zán xógbe e jɛ gan lɛ́ é. (Ja. 3:2) Ma lɔn nú wǔvɛ́ mɔ̌hun lɛ́ zɔ́n nú a gɔn gbe yí nú wǔsyɛ́n dó lanmɛ nú mɛ e sín hudó a ɖó é ó. Mɛxó agun tɔn ɖé nɔ nyí Gavin, bo ɖo linkpɔ́nzɔn jɛ wɛ bo ɖɔ: “Hwɛhwɛ ɔ, un nɔ ba ná ɖɔ xó xá xɔ́ntɔn ce lɛ́, alǒ zán hwenu ɖó kpɔ́ xá yě ǎ.” Amɔ̌, Gavin lɔn bónú lěe nǔ cí n’i é ɖu ɖo jǐ tɔn ǎ, bɔ gbɛ̌ dídó xá mɛ ɖěvo lɛ́ nɔ hɛn le wá n’i hwebǐnu. Nɔví nyɔ̌nu ɖé nɔ nyí Amy bo ɖɔ: “Nǔ e xá mì wá yi lɛ́ é zɔ́n bɔ é nɔ vɛ́ wǔ nú mì nú má ɖeji dó gbɛtɔ́ wú. Amɔ̌, un ɖo kplɔ́nkplɔ́n wɛ bá yí wǎn nú nɔví súnnu kpó nɔví nyɔ̌nu kpó ce lɛ́, bo lɛ́ ɖeji dó yě wú Jexóva ɖɔhun. Un tuun ɖɔ énɛ́ nɔ hun xomɛ nú Jexóva, bo nɔ zɔ́n bɔ nyi lɔ nɔ ɖó awǎjijɛ.”

AKPÁ ÐĚÐĚE JEXÓVA DÓ DÓ SƆGÚDO WÚ LƐ́ É SIXÚ DÓ GBƆ NÚ MǏ

18. Étɛ́ mǐ ka sixú ɖó nukún ɖo sɔgúdo? Étɛ́ mǐ ka sixú wa din?

¹⁸ Zaanɖé din ɔ, Jexóva ná ɖe nǔ e nɔ ɖó linkpɔ́n kpó wǔvɛ́ kpó nú mǐ lɛ́ é bǐ síin. (Nǔɖe. 21:3, 4) Hwenɛ́nu ɔ, nǔ nyanya e jɛ dó mǐ jí wá yi lɛ́ é ɖě sɔ́ “ná wá ayi mɛ” nú mǐ ǎ. (Eza. 65:17) Lěe mǐ ko mɔ gbɔn wá yi é ɔ, é ná bo tlɛ nyí ɖo din ɔ, Jexóva nɔ ‘blá akpa mǐtɔn lɛ́ nú mǐ.’ Ðu wǎnyíyí sín nǔ ɖěɖěe Jexóva sɔ́ nǔ ná bá dó fá kɔ nú we, bo lɛ́ hɛn sɔ we lɛ́ é sín le bǐ mlɛ́mlɛ́. Ma xo nǔ kpɔ́n gbeɖé ɖɔ ‘nǔ émítɔn ka nɔ ɖu ayi mɛ n’i’ a jí ó.—1 Pi. 5:7.