XÓTA NǓKPLƆ́NKPLƆ́N TƆN 43
HAN 90 Mi dó wǔsyɛ́n lanmɛ nú miɖée
Lěe è ná ɖu ɖo nǔxokpɔ́n lɛ́ jí gbɔn é
“Mi ní nɔ gbéjé nǔ lɛ́ bǐ kpɔ́n.”—1 TƐ. 5:21.
XÓNUSƆ́ÐÓTE
Ðo xóta élɔ́ mɛ ɔ, mǐ ná ɖɔ xó dó lěe è sixú ɖe ɖɛ nǔxokpɔ́n ɖěɖěe sixú dó ayimɛya nú mɛ bo sixú wa nǔ dó sinsɛnzɔ́ e wa nú Jexóva wɛ mǐ ɖe é wú gbɔn é lɛ́ é jí.
1-2. (a) Nǔxokpɔ́n tɛ́ lɛ́ mɔ̌ mɛsɛntɔ́ Jexóva tɔn lɛ́ ka sixú ɖí xwi xá? (b) Étɛ́ lɛ́ mǐ ka ná gbéjé kpɔ́n ɖo xóta élɔ́ mɛ?
GBƐTƆ́ lɛ́ bǐ wɛ nɔ xo nǔ kpɔ́n a hweɖélɛ́nu. Ði kpɔ́ndéwú ɔ, wɛnjlátɔ́ wínnyáwínnyá ɖé sixú nɔ kanbyɔ́ éɖée ɖɔ nǔ émítɔn ka nɔ ɖu ayi mɛ nú Jexóva dóó a jí. É sixú nɔ xo nǔ kpɔ́n dó batɛ́mu bíbló wú. Kpɔ́ndéwú ɖěvo wɛ nyí nɔví súnnu e wá gbeta ɔ kɔn ɖo wǐnnyáwínnyá hwenu tɔn ɖɔ émí ná sɔ́ sinsɛnzɔ́ wiwa nú Jexóva ɖó tɛn nukɔntɔn ɔ mɛ ɖo gbɛzán émítɔn mɛ, bo ma nya akwɛ́ gěgé biba gbé ǎ é tɔn. Din e xwe tɔn ko sɛ yi, bɔ akwɛ́ e é ná dó sú hudó xwédo tɔn tɔn sín do ná é kɛ́ɖɛ́ jɛ́n ɖo así tɔn é ɔ, é sixú nɔ kanbyɔ́ éɖée ɖɔ gbeta ɖagbe ɔ kɔn jɛ́n émí wá hwenu e émí ɖo wǐnnyáwínnyá mɛ é a jí. Dǒ nukún nɔví nyɔ̌nu mɛxómɔ e hlɔ̌nhlɔ́n káká ɖé ma sɔ́ ɖo wǔtu tɔn ǎ é sín ninɔmɛ mɛ kpɔ́n. Awakanmɛ sixú kú i, ɖó é sɔ́ nɔ sixú wa nǔ e é ko nɔ wa ɖ’ayǐ lɛ́ é ǎ. A ka ko kan nǔ lěhun lɛ́ byɔ́ hwiɖée kpɔ́n a?: ‘Jexóva ka nɔ ɖ’ayi wǔ ce dóó a? Vɔ̌ ɖěɖěe un sá dó Jexóva tamɛ lɛ́ é ka sɔ mɔ̌ kɔ a? Un ka kpo ɖo nyǐnyɔ́ zán nú Jexóva wɛ a?’
2 Ényí mǐ ma ba xósin nú nǔkanbyɔ́ mɔ̌hun lɛ́ ǎ ɔ, yě sixú dó afɔgblɛ́gblɛ̌ afɔ mɛ nú mǐ ɖo mawusinsɛn mǐtɔn kɔn. Ðo xóta élɔ́ mɛ ɔ, mǐ ná gbéjé lěe mǐ sixú sɔ́ ayi ɖó nǔgbódodó Biblu tɔn ɖěɖěe sixú d’alɔ mǐ hwenu e mǐ xo nǔ kpɔ́n ɖɔ (1) nǔ mǐtɔn ka nɔ ɖu ayi mɛ nú Jexóva a, (2) nǔnywɛ́ ka kpé gbeta e kɔn mǐ wá wá yi lɛ́ é a, alǒ (3) mǐ ka kpo ɖo nyǐnyɔ́ zán nú Jexóva wɛ a jí é gbɔn é kpɔ́n.
LĚE A NÁ ÐE ÐƐ NǓXOKPƆ́N TOWE LƐ́ GBƆN É
3. Ðɔ ali e nu mǐ sixú ɖe ɖɛ nǔxokpɔ́n mǐtɔn lɛ́ ɖe é ɖokpó.
3 Ali e nu mǐ sixú ɖe ɖɛ nǔxokpɔ́n mǐtɔn lɛ́ ɖe é ɖokpó wɛ nyí ɖɔ mǐ ná ba xósin nú nǔkanbyɔ́ mǐtɔn lɛ́ ɖo Xó Mawu tɔn mɛ. Ényí mǐ wa mɔ̌ ɔ, mǐ ná ɖó hlɔ̌nhlɔ́n, su ɖo gbigbɔ lixo, bo lɛ́ ɖo gbesisɔmɛ hú gǎn bá “lí dǒ ɖo nǔɖiɖi mɛ.”—1 Kɔ. 16:13.
4. Nɛ̌ mǐ ka nɔ “gbéjé nǔ lɛ́ bǐ kpɔ́n” gbɔn? (1 Tɛsaloníkinu lɛ́ 5:21)
4 Xa 1 Tɛsaloníkinu lɛ́ 5:21. Ð’ayi wú ɖɔ Biblu byɔ́ mǐ ɖɔ mǐ ní “nɔ gbéjé nǔ lɛ́ bǐ kpɔ́n.” Nɛ̌ mǐ ka sixú wa mɔ̌ gbɔn? Ényí mǐ ɖo nǔ xo kpɔ́n wɛ dó nǔɖé wú ɔ, mǐ ɖó ná gbéjé nǔ e Biblu ɖɔ d’é wú é kpɔ́n. Ði kpɔ́ndéwú ɔ, mǐ ní gbéjé ninɔmɛ mɛ wínnyáwínnyá e nɔ kanbyɔ́ éɖée ɖɔ émí ka xɔ akwɛ́ ɖo Mawu nukúnmɛ a jí é tɔn kpɔ́n. É ná gɔn xósin ba nú nǔkanbyɔ́ tɔn kpowun wɛ a? Éǒ, é ɖó ná “gbéjé nǔ lɛ́ bǐ kpɔ́n” gbɔn linlin e Jexóva ɖó dó xó ɔ wú é biba gblamɛ.
5. Nɛ̌ mǐ ka nɔ “se” xósin e Jexóva nɔ ná nú ɖɛ mǐtɔn lɛ́ é gbɔn?
5 Ényí mǐ ɖo Xó Mawu tɔn xa wɛ ɔ, mǐ nɔ “se,” bɔ Jexóva nɔ ɖo xó ɖɔ nú mǐ wɛ. Amɔ̌, linlin tɔn tuuntuun dó nǔkanbyɔ́ tají ɖé wú nɔ byɔ́ gǎndídó ɖo mǐ sí. Mǐ ɖó ná sɔ́ Biblu xixa mǐtɔn jínjɔ́n nǔ e ɖo adɔ̌vɛ́ ɖó nú mǐ wɛ é jí. Mǐ sixú zán azɔ̌wanú nǔkplɔ́nkplɔ́n tɔn e tutoblónúnǔ Jexóva tɔn sɔ́ nǔ ná lɛ́ é dó ba do nú nǔ dó xó ɔ wú. (Nǔx. 2:3-6) Mǐ sixú xo ɖɛ ɖɔ Jexóva ní xlɛ́ ali mǐ ɖo dobanúnǔ mǐtɔn mɛ, bo lɛ́ d’alɔ mǐ bónú mǐ ní tuun linlin e é ɖó dó nǔkanbyɔ́ mǐtɔn wú é. Énɛ́ gúdo ɔ, mǐ sixú ba nǔgbódodó Biblu tɔn lɛ́ kpó mɔjɛmɛ tawun tawun ɖěɖěe kunkplá ninɔmɛ mǐtɔn é kpó. Tan ɖěɖěe ɖo Biblu mɛ bo ɖɔ xó dó mɛ ɖěɖěe ɖí xwi xá ninɔmɛ ɖokpó ɔ mǐɖɔhun lɛ́ é tɔn gbígbéjé kpɔ́n sixú lɛ́ hɛn le wá nú mǐ.
6. Nɛ̌ kplé mǐtɔn lɛ́ ka nɔ d’alɔ mǐ bɔ mǐ nɔ ɖu ɖo nǔxokpɔ́n mǐtɔn lɛ́ jí gbɔn?
6 Mǐ nɔ lɛ́ “se” bɔ Jexóva nɔ ɖo xó ɖɔ nú mǐ wɛ ɖo kplé mǐtɔn lɛ́ jí. Ényí mǐ nɔ yi kplé lɛ́ ɖo gbesisɔmɛ ɔ, mǐ sixú se nǔɖé ɖo xóɖiɖɔ ɖé mɛ, alǒ nɔví e wá kplé ɔ lɛ́ é ɖé sixú ná xósin ɖé bɔ é ná nyí nǔ e sín hudó mǐ ɖó, bo ná ɖu ɖo nǔxokpɔ́n mǐtɔn lɛ́ jí é pɛ́ɛ́. (Nǔx. 27:17) Din ɔ, mi nú mǐ ní gbéjé lěe è sixú ɖe ɖɛ nǔxokpɔ́n tawun tawun ɖé lɛ́ gbɔn é kpɔ́n.
HWENU E A XO NǓ KPƆ́N ÐƆ NǓ TOWE KA NƆ ÐU AYI MƐ NÚ JEXÓVA A JÍ É
7. Étɛ́ mɛɖé lɛ́ ka sixú kanbyɔ́?
7 A ka ko kan nǔ élɔ́ byɔ́ hwiɖée kpɔ́n a?: ‘Jexóva ka nɔ ɖ’ayi wǔ ce dóó a?’ Ényí a nɔ mɔ ɖɔ émí kún hwɛ́n nǔɖé ó ɔ, xɔ́ntɔn zunzun xá Gbɛɖótɔ́ wɛ̌kɛ́ ɔ tɔn sixú cí nǔ e ma ɖo jlɛ̌ jí ǎ, kabǐ, nǔ e wú a ma sixú kpé ǎ é ɖɔhun nú we. Axɔ́sú Davídi sixú ko ɖó linlin mɔ̌hun ɖé. É jí wǔ n’i ɖɔ Jexóva tlɛ nɔ ɖó ayi gbɛtɔ́ yǎyá wú, bo kanbyɔ́ ɖɔ: ‘Jexóva, étɛ́ gbɛtɔ́ ka nyí lɔ tawun bɔ a ka ná tuun i? Jinukánɖutɔ́ alɔ atɔ́ɔ́n ɔ, étɛ́ é ka nyí bɔ a ka ná flín i?’ (Ðɛh. 144:3) Fítɛ́ a ka sixú mɔ xósin nǔkanbyɔ́ énɛ́ tɔn ɖe?
8. Sɔgbe xá 1 Samuwɛ́li 16:6, 7, 10-12 ɔ, étɛ́ wú Jexóva ka nɔ ɖ’ayi ɖo gbɛtɔ́ lɛ́ wú?
8 Ðo Biblu mɛ ɔ, mǐ kplɔ́n ɖɔ Jexóva nɔ ɖ’ayi mɛ ɖěɖěe é cí ɖɔ yě kún ɖo tají sɔmɔ̌ ɖo mɛ ɖěvo lɛ́ nukúnmɛ ó é wú. Ði kpɔ́ndéwú ɔ, Jexóva sɛ́ Samuwɛ́li dó Jɛsée sín xwégbe nú é ná kɔn ami dó ta nú vǐ tɔn lɛ́ ɖokpó, bónú é ná wá húzú axɔ́sú ɖo Izlayɛ́li. Jɛsée ylɔ́ vǐ súnnu tántɔn e é ɖó lɛ́ é tɛ́nwe ɖɔ yě ní wá Samuwɛ́li gɔ́n, bo ka ylɔ́ Davídi e nyí mɛ kpɛví bǐ ɔ é ǎ. b É ɖo mɔ̌ có, Davídi wɛ Jexóva sɔ́. (Xa 1 Samuwɛ́li 16:6, 7, 10-12.) Jexóva mɔ mɛ alɔkpa e Davídi nyí tawun ɖo ayi mɛ é, é wɛ nyí mɛ wínnyáwínnyá e nǔ gbigbɔ tɔn lɛ́ nɔ xɔ akwɛ́ ná é.
9. Étɛ́wú a ka sixú kú d’é jí ɖɔ nǔ towe nɔ ɖu ayi mɛ nú Jexóva? (Kpɔ́n ɖiɖe ɔ lɔmɔ̌.)
9 Lin tamɛ dó lěe Jexóva ko xlɛ́ ɖɔ émí nɔ ɖ’ayi wǔ we gbɔn é jí. É nɔ ɖe wě e sɔgbe lɛ́ é xá we sɔgbe xá ninɔmɛ e mɛ a ɖe é. (Ðɛh. 32:8) Ényí é ma tuun we ganjí ǎ ɔ, nɛ̌ é ka sixú wa mɔ̌ gbɔn? (Ðɛh. 139:1) Ényí a nɔ zán wěɖexámɛ Jexóva tɔn, bo nɔ mɔ lěe é nɔ d’alɔ we gbɔn é ɔ, a ná wá kú d’é jí ɖɔ nǔ émítɔn nɔ ɖu ayi mɛ nú Jexóva. (1 Tan 28:9; Mɛ. 17:26, 27) Jexóva nɔ ɖ’ayi gǎn e a nɔ dó lɛ́ é wú. É nɔ lɛ́ mɔ jijɔ ɖagbe e a ɖó lɛ́ é, bo ba ná nyí xɔ́ntɔn towe. (Jel. 17:10) É ba ɖɔ a ní yí gbe nú ali e é hun nú we bɔ a ná húzú xɔ́ntɔn tɔn é.—1 Jaan 4:19.
“Ényí a ba [Jexóva] ɔ, é ná jó éɖée dó bɔ a nǎ mɔ ɛ.”—1 Tan 28:9 (Kpɔ́n akpáxwé 9) c
HWENU E A XO NǓ KPƆ́N ÐƆ NǓNYWƐ́ KA KPÉ GBETA E KƆN ÉMÍ KO WÁ WÁ YI LƐ́ É A JÍ É
10. Ényí mǐ lin tamɛ dó gbeta e kɔn mǐ wá wá yi lɛ́ é jí ɔ, nǔ tɛ́ lɛ́ mɔ̌ mǐ ka sixú kanbyɔ́ mǐɖée?
10 Xwe ɖo xwe jí jɛ wɛ ɔ, mɛɖé lɛ́ sixú kpɔ́n gǔdo bo kanbyɔ́ yěɖée ɖɔ gbeta ɖagbe lɛ́ kɔn jɛ́n émí ka wá a jí. Bóyá, yě wá gbeta ɔ kɔn, bo jó azɔ̌ ɖagbe ɖagbe ɖé, alǒ ajɔ̌ e kpé kwɛ́ é ɖé dó, bá dó sɛn Jexóva bǐ mlɛ́mlɛ́. Xwe ko jɛ din, bóyá, xwe gěgé tlɛ ko wá yi. Yě sixú nɔ mɔ xɔ́ntɔn yětɔn e nya nǔ agbaza tɔn lɛ́ gbé lɛ́ é, bɔ din ɔ, akwɛ́ ɖo yě sí kpɔ́. Wǎgbɔ tɔn ɔ, yě sixú nɔ kanbyɔ́ ɖɔ: ‘Vɔ̌ ɖěɖěe un sá dó Jexóva tamɛ lɛ́ é ka xɔ akwɛ́ a? Alǒ, yě zɔ́n bɔ ali ɖěvo lɛ́ gbɔ wǔ ye?’
11. Étɛ́ ka dó ayimɛya nú mɛ e wlán Ðɛhan 73gɔ́ ɔ é?
11 Ényí nǔkanbyɔ́ mɔ̌hun lɛ́ ɖo ayi mɛ ɖu nú we wɛ hǔn, lin tamɛ dó lěe nǔ cí nú mɛ e wlán Ðɛhan 73gɔ́ ɔ é jí. É mɔ bɔ mɛ ɖěɖěe ma nɔ sɛn Jexóva ǎ lɛ́ é ɖo ganjí ɖo agbaza mɛ, jɛ dɔkun, bɔ é cí ɖɔ yě kún ɖó linkpɔ́n ɖě ó ɖɔhun. (Ðɛh. 73:3-5, 12) Ée é mɔ yě kpó dɔkun maɖótaɖé yětɔn lɛ́ kpó é ɔ, é mɔ ɖɔ gǎn ɖěɖěe dó wɛ émí ɖe bo ɖo Jexóva sɛn wɛ é kún hwɛ́n nǔɖé ó. “Ayǐ hɔ́n tɛgbɛ ɔ,” awakanmɛ kú mɛ sín linlin énɛ́ nɔ ɖo xixo è wɛ. (Ðɛh. 73:13, 14) Nɛ̌ é ka ɖí xwi xá linlin masɔgbe e é ɖó lɛ́ é gbɔn?
12. Sɔgbe xá Ðɛhan 73:16-18 ɔ, nɛ̌ ɖɛhanwlántɔ́ ɔ ka ɖí xwi xá linlin masɔgbe tɔn lɛ́ gbɔn?
12 Xa Ðɛhan 73:16-18. Ðɛhanwlántɔ́ ɔ yi tɛn mímɛ́ Jexóva tɔn mɛ. É kpé wú bo lin tamɛ ganjí ɖo fínɛ́. É mɔ ɖɔ ényí é tlɛ cí ɖɔ gbɛ ɖo fɛɛ nú mɛɖé lɛ́ ɔ, yě kún ka ɖó nukúnɖíɖó ɖě nú sɔgúdo ó. Tamɛ linlin gbɔn mɔ̌ zɔ́n bɔ é ɖó fífá ayi mɛ tɔn, bo mɔ ɖɔ nǔ gbigbɔ tɔn lɛ́ gbé nyinya wɛ nyí gbeta ɖagbe hú gǎn ɔ. Wǎgbɔ tɔn ɔ, é lɛ́ ná hlɔ̌nhlɔ́n kán e é kán ɖ’é jí bá kpo ɖo Jexóva sɛn wɛ é.—Ðɛh. 73:23-28.
13. Ényí a nɔ xo nǔ kpɔ́n dó gbeta e kɔn a ko wá wá yi lɛ́ é wú ɔ, nɛ̌ a ka sixú ɖó fífá ayi mɛ tɔn gbɔn? (Kpɔ́n ɖiɖe ɔ lɔmɔ̌.)
13 Xó Mawu tɔn sixú d’alɔ we bɔ a ná ɖó fífá ayi mɛ tɔn mɔ̌hun. Gbɔn nɛ̌ é? Flín nǔ xɔ akwɛ́ e a ɖó lɛ́ é, káká jɛ dɔkun e ɖo jǐxwé lɛ́ é jí, bo sɔ́ jlɛ́ dó nǔ e ɖo te kpɔ́n mɛ ɖěɖěe nǔ e gbɛ élɔ́ nɔ xwlé mɛ lɛ́ é kɛ́ɖɛ́ jɛ́n nyí ajɔ yětɔn lɛ́ é wú. Yě sixú nɔ gán jɛ nǔ e wú yě kpé bo wa ɖo gbɛ élɔ́ mɛ lɛ́ é wú bǐ mlɛ́mlɛ́, ɖó yě ɖo nǔ ɖě ɖó nukún wɛ ɖo sɔgúdo ǎ. Amɔ̌, Jexóva dó nyɔ̌ná ɖěɖěe zɛ nǔ ɖěbǔ e mɛ a ma sixú dó nukún kpɔ́n gbeɖé ǎ lɛ́ é sín akpá nú we. (Ðɛh. 145:16) Lɛ̌ lin tamɛ dó nǔ élɔ́ jí: Ényí gbeta e gbɔn vo lɛ́ é kɔn wɛ a ko wá ɔ, a sixú tuun lěe gbɛ towe ná cí ɖo égbé é, bo t’afɔ jí ǎ. Nǔ ɖokpó ɖo wɛn: Mɛ ɖěɖěe nɔ zɔn dó wǎn e yě yí nú Mawu kpó nɔzo yětɔn lɛ́ é kpó jí dó wá gbeta yětɔn lɛ́ kɔn lɛ́ é ɔ, nǔ ɖagbe ɖěbǔ nɔ gbɔ yě wú ǎ.
Nɔ lin tamɛ dó nǔ ɖaaɖagbe gěgé e Jexóva ná ná we ɖo sɔgúdo lɛ́ é jí (Kpɔ́n akpáxwé 13) d
HWENU E A XO NǓ KPƆ́N ÐƆ ÉMÍ KA KPO ÐO NYǏNYƆ́ ZÁN NÚ JEXÓVA WƐ A JÍ É
14. Ninɔmɛ tɛ́ mɛ mɛɖé lɛ́ ka ɖe? Étɛ́ yě ka sixú kanbyɔ́ yěɖée?
14 Mɛsɛntɔ́ Jexóva tɔn ɖé lɛ́ ɖo xwi ɖí xá mɛxóxwe, lanmɛ ma ɖo ganjí, alǒ wɔ̌n ɖo wǔ wɛ. Énɛ́ sixú zɔ́n bɔ yě ná nɔ kú d’é jí ɖɔ émí xɔ akwɛ́ ɖo Jexóva nukúnmɛ ǎ. Yě sixú kanbyɔ́ ɖɔ: ‘Un ka kpo ɖo nyǐnyɔ́ zán nú Jexóva wɛ a?’
15. Étɛ́ jí mɛ e wlán Ðɛhan 71gɔ́ ɔ é ka kú dó?
15 Linkpɔ́n ɖokpó ɔ wɛ mɛ e wlán Ðɛhan 71gɔ́ ɔ é lɔ ɖó. É xo ɖɛ ɖɔ: “Hwenu e hlɔ̌nhlɔ́n ná vɔ ɖo wǔ ce ɔ, ma jó mì dó ó.” (Ðɛh. 71:9, 18) Ðɛhanwlántɔ́ ɔ kpo ɖo gǎnjɛwú ɖó wɛ ɖɔ ényí émí sɛn Mawu émítɔn kpó gbejíninɔ kpó ɔ, Jexóva ná xlɛ́ ali émí, bo lɛ́ nɔ gǔdo nú émí. Lěe ɖɛhanwlántɔ́ ɔ kplɔ́n gbɔn é ɔ, mɛ ɖěɖěe dogbó yětɔn lɛ́ ɖo fínɛ́ có, yě ka nɔ wa nǔ e wú yě kpé é bǐ dó sɛn Jexóva lɛ́ é ɔ, nǔ yětɔn nɔ nyɔ́ nukún tɔn mɛ.—Ðɛh. 37:23-25.
16. Ali tɛ́ lɛ́ nu mɛxómɔ lɛ́ ka nyɔ́ zán nú Jexóva ɖe? (Ðɛhan 92:12-15)
16 Mɛxómɔ lɛ́ mi, mi nɔ ɖó linlin e Jexóva nɔ ɖó dó ninɔmɛ mitɔn wú é. É sixú d’alɔ mi bɔ dogbó lɛ́ ná bo tlɛ ɖo fínɛ́ ɔ, mi ná vun ɖo gbigbɔ lixo. (Xa Ðɛhan 92:13-16.) Mi ma nɔ sɔ́ ayi ɖó nǔ e wú mi ma sɔ́ sixú kpé bo wa ǎ lɛ́ é jí ó, é nyɔ́ wa hǔn, mi nɔ sɔ́ ayi ɖó nǔ e mi sixú wa lɛ́ é jí. Ði kpɔ́ndéwú ɔ, mi sixú dó wǔsyɛ́n lanmɛ nú mɛ ɖěvo lɛ́ gbɔn kpɔ́ndéwú gbejíninɔ tɔn mitɔn kpó lěe mi nɔ xlɛ́ ɖɔ nǔ mɛ ɖěvo lɛ́ tɔn nɔ ɖu ayi mɛ nú mi gbɔn é kpó gblamɛ. Mi sixú ɖɔ lěe Jexóva ko d’alɔ mi ɖo xwe lɛ́ vlamɛ gbɔn é sín xó nú mɛ ɖěvo lɛ́, bo lɛ́ má akpá Biblu tɔn e mi ɖo nukún ɖó wɛ ɖɔ yě ná jɛnu ɖo sɔgúdo lɛ́ é xá yě. Gɔ́ ná ɔ, mi ma sɔ́ nukún kpɛví dó kpɔ́n lě do ɖɛ e mi nɔ xo kpó ayi bǐ kpó dó mɛ ɖěvo lɛ́ sín tamɛ é sixú wa ɖagbe sɔ é kpɔ́n gbeɖé ó. (1 Pi. 3:12) Ninɔmɛ mǐtɔn lɛ́ ná bo ɖo ɖěbǔ ɔ, mǐ mɛ bǐ ɖó nǔɖé bo sixú ná Jexóva kpó mɛ ɖěvo lɛ́ kpó.
17. Étɛ́wú mǐ ma ka ɖó ná jlɛ́ mǐɖée dó mɛ ɖěvo lɛ́ wú ǎ?
17 Ényí akpɔ nɔ ɖó we ɖɔ a kún sixú wa nǔ gěgé ɖo sinsɛnzɔ́ Jexóva tɔn mɛ ó hǔn, kú d’é jí ɖɔ nǔ ɖěbǔ e a sixú wa é nɔ su nukún tɔn mɛ. A sixú nɔ ba ná jlɛ́ nǔ e wa wɛ a ɖe é dó nǔ e mɛ ɖěvo lɛ́ sixú wa é wú. Ma ka lɔn bo wa mɔ̌ ó! Étɛ́wú? Ðó Jexóva nɔ jlɛ́ mɛɖé dó mɛɖé wú ǎ. (Ga. 6:4) Ði kpɔ́ndéwú ɔ, Mali ná nǔsáwǔ wǎnɖagbenɔ e v’axi tawun é ɖé Jezu. (Jaan 12:3-5) Ðo alɔ ɖěvo mɛ ɔ, asúkúsi leleklélenɔ ɔ ná gankwɛ́ kpɛví kpɛví e ma xɔ akwɛ́ sɔmɔ̌ ǎ é we ɖo tɛ́npli ɔ mɛ. (Luk. 21:1-4) É ɖo mɔ̌ có, Jezu mɔ nǔníná we énɛ́ lɛ́ bǐ dó mɔ nǔɖiɖi núwiwa. Nǔ ɖěbǔ e sɔ́ e a sɔ́ hwiɖée jó nú Jexóva é kpó wǎn e a yí nú Jexóva é kpó sísɛ́ we bɔ a wa é nɔ xɔ akwɛ́ nú Jexóva tawun, ényí é ná bo tlɛ hwe gbɔn ɖěbǔ ɖo nukún towe mɛ ɔ nɛ́.
18. Étɛ́ ka ná d’alɔ mǐ bɔ mǐ ná ɖu ɖo nǔxokpɔ́n mǐtɔn lɛ́ jí? (Kpɔ́n gbǎví “ Xó Jexóva tɔn hɛn ɔ, é ná d’alɔ we bɔ a ná ɖu ɖo nǔxokpɔ́n lɛ́ jí” ɔ lɔmɔ̌)
18 Mǐ bǐ wɛ nɔ xo nǔ kpɔ́n hweɖélɛ́nu. Amɔ̌, lěe mǐ ko mɔ gbɔn é ɔ, Xó nǔgbó Mawu tɔn Biblu e wú è sixú ɖeji dó é sixú d’alɔ mǐ bɔ mǐ ná ɖí xwi xá yě. Énɛ́ wú ɔ, tɛ́n kpɔ́n bo ɖe ɖɛ nǔxokpɔ́n towe lɛ́, bónú jiɖiɖe ní jɛ nǔ e ɖo linkpɔ́n ɖó nú we wɛ lɛ́ é sín domɛ. Kú d’é jí ɖɔ Jexóva tuun we ɖó vo. Nǔ e a sɔ́ dó sá vɔ̌ ná lɛ́ é nɔ su nukún tɔn mɛ, bɔ é d’akpá bá d’ajɔ we. Kú d’é jí ɖɔ Jexóva yí wǎn nú mɛsɛntɔ́ tɔn gbejínɔtɔ́ lɛ́ ɖokpó ɖokpó, bɔ nǔ yětɔn nɔ lɛ́ ɖu ayi mɛ n’i.
HAN 111 Hwɛjijɔ ɖěɖěe wú mǐ nɔ j’awǎ é
a TÍNMƐ ÐÉ LƐ́: Ðo xóta élɔ́ mɛ ɔ, mǐ ɖo xó ɖɔ dó nǔxokpɔ́n ɖěɖěe nɔ zɔ́n bɔ mǐ ma nɔ kú d’é jí ɖɔ mǐ xɔ akwɛ́ ɖo Jexóva nukúnmɛ, alǒ kú d’é jí ɖɔ nǔnywɛ́ kpé gbeta e kɔn mǐ wá wá yi lɛ́ é ǎ é jí wɛ. Nǔxokpɔ́n énɛ́ lɛ́ nyí nǔxokpɔ́n alɔkpa ɖěɖěe xó Biblu ɖɔ, bɔ yě sixú xlɛ́ ɖɔ mɛɖé kún ɖi nǔ nú Jexóva kpó akpá tɔn lɛ́ kpó lɛ́ é ó ǎ.
b Biblu ɖɔ xwe nabí e Davídi ɖó pɛ́pɛ́pɛ́ hwenu e Jexóva sɔ́ ɛ é ǎ có, é cí ɖɔ jɔ́lwɛ́ɛ́ wɛ é ná kpo ɖe.—Kpɔ́n Atɔxwɛ (Gungbe) 1er septembre 2011, wěx. 29, akpá. 2.
