HAN ɖo tají tawun ɖo Izlayɛ́li hwexónu tɔn. Hwɛhwɛ wɛ Biblu nɔ ɖɔ mɛ lɛ́ xó, bɔ yě nɔ ɖo nǔ xo wɛ lobo nɔ ɖo han ji wɛ. Nǔgbó ɔ, wěma e ɖo Biblu mɛ lɛ́ é ɖibla yi wǒ mɔ̌ wɛ nyí han, kpɔ́ndéwú wěma énɛ́ lɛ́ tɔn e ɖo nukún jí hú gǎn é wɛ nyí wěma Ðɛhan, Hanvíví kpó Gbɛvíhan kpó tɔn. Wěma e ɖɔ xó dó gbɛzínzán ɖo Biblu sín táan mɛ wú é ɖé ɖɔ ɖɔ Biblu xlɛ́ nyi wɛn ɖɔ “Izlayɛ́li ví lɛ́ nɔ xo nǔ bo nɔ ji han ɖo nǔwiwa gěgé hwenu ɖo gbɛzán yětɔn mɛ.”

Nǔxixo kpó hanjiji kpó ɖo gbɛzínzán gbe bǐ gbe tɔn mɛ. Izlayɛ́li ví lɛ́ nɔ xo nǔ bo nɔ ji han dó ɖe lěe nǔ cí nú yě é xlɛ́. (Eza. 30:29) Nyɔ̌nu lɛ́ nɔ xo nǔ, bo nɔ ji han kpó awǎjijɛ kpó, lobo nɔ ɖú we hwenu e è ɖo axɔ́sú sɔ́ wɛ, ɖo xwe ɖu wɛ, alǒ ɖu ɖo ahwan jí é. (Hwɛ. 11:34; 1 Sam. 18:6, 7; 1 Axɔ́. 1:39, 40) Izlayɛ́li ví lɛ́ nɔ lɛ́ ji han dó ɖe aluwɛ xlɛ́ hwenu e mɛɖé kú é. (2 Tan 35:25) Yǎyá wú wɛ ǎ bɔ McClintock and Strong’s Cyclopedia ɖɔ ɖɔ “mɛ nukúnɖéjí lɛ́ wɛ Eblée lɛ́ nyí ɖo hanjiji linu.”

Nǔxixo kpó hanjiji kpó ɖo hɔnmɛ. Axɔ́sú Izlayɛ́li tɔn lɛ́ yí wǎn nú nǔxixo kpó hanjiji kpó. Axɔ́sú Sawúlu ylɔ́ Davídi wá hɔn tɔn mɛ bónú é ná nɔ xo nǔ n’i. (1 Sam. 16:18, 23) Nukɔnmɛ, hwenu e Davídi ɖésú wá húzú axɔ́sú é ɔ, é ɖe nǔxonú lɛ́ tɔ́n, kpa han víví lɛ́, bo lɛ́ bló tuto nú hanjigbɛ́ta e nɔ xo nǔ ɖo tɛ́npli Jexóva tɔn mɛ é. (2 Tan 7:6; Amɔ́. 6:5) Axɔ́sú Salomɔ́ɔ ɖó hansinɔ súnnu kpó nyɔ̌nu kpó ɖo hɔn tɔn mɛ.—Nǔt. 2:8.

Nǔxixo kpó hanjiji kpó ɖo mawusinsɛn linu. Tají hú gǎn bǐ ɔ, Izlayɛ́li ví lɛ́ nɔ xo nǔ, bo nɔ lɛ́ ji han dó sɛn Jexóva. Nǔgbó ɔ, nǔxotɔ́ 4000 wɛ nɔ xo nǔ ɖo tɛ́npli mɛ ɖo Jeluzalɛ́mu. (1 Tan 23:5) Yě nɔ xo agǐdigbo kpó kanhún kpó, bo nɔ lɛ́ kún kpɛn. (2 Tan 5:12) Amɔ̌, nǔxotɔ́ alɔsekpɛ́nnánɔ énɛ́ lɛ́ kɛ́ɖɛ́ wɛ nɔ xo nǔ dó sɛn Jexóva ǎ. É ɖo wɛn ɖɔ Izlayɛ́li ví gěgé nɔ ji han e è nɔ ji hwenu e è nɔ ɖo kpó fán wɛ xwe xwe xwewú xwewú tɔn e è nɔ ɖu ɖo Jeluzalɛ́mu lɛ́ é domɛ é. (Ðɛh. 120-134) Gɔ́ ná ɔ, sɔgbe xá nǔwlánwlán Jwifu lɛ́ tɔn ɔ, Izlayɛ́li ví lɛ́ nɔ ji susu kpikpa sín han lɛ́ a hwenu e yě nɔ ɖo Dǐndínwáyixwe ɔ sín nǔɖuɖu ɖu wɛ é.

Nǔxixo kpó hanjiji kpó kpo ɖo tají nú togun Mawu tɔn. (Ja. 5:13) Hanjiji ɖo mawusinsɛn mǐtɔn mɛ. (Efɛ́. 5:19) Nǔxixo kpó hanjiji kpó nɔ dɔn mǐ kpó klisánwun hǎtɔ́ mǐtɔn lɛ́ kpó ɖó bǔ. (Koló. 3:16) É nɔ lɛ́ ná hlɔ̌nhlɔ́n mǐ hwenu e mǐ ɖo wǔvɛ́ lɛ́ ɖí xwi xá wɛ é. (Mɛ. 16:25) Ali e nu mǐ nɔ ɖe nǔɖiɖi e mǐ ɖó nú Jexóva é kpó wǎn e mǐ yí n’i é kpó xlɛ́ ɖe é ɖagbe ɖokpó wɛ nǔxixo kpó hanjiji kpó nyí.