1. Enyi è ɖè mɛvívɛ́ mɛtɔn ɖé sín agun mɛ ɔ, nɛ̌ enɛ ka sixu wà nǔ dó mɛ wu gbɔn?

È ÐÈ mɛ vívɛ́ná towe ɖé sín agun mɛ wɛ à? É nɔ ɖó wuvɛ̌ nú mɛ tawun! Nɔví nyɔnu ɖé nɔ nyí Hilda, * bo ɖɔ, “Mǐ wlí alɔ bɔ é na bló xwè 41 gudo é ɔ, asú ce kú. Un mɔ ɖɔ wuvɛ̌ e syɛn hugǎn bɔ un sè ɖò gbɛ̀ mɛ é nɛ. Amɔ̌, hwenu e vǐ ce sunnu jó nǔgbo ɔ dó, bo lɛ́ jó asì tɔn kpo vǐ tɔn lɛ kpo dó é ɔ, wuvɛ̌ e un sè é lɛ́ syɛn tawun.”

2-3. Sɔgbe xá Ðɛhan 78:40, 41 ɔ, enyi mɛsɛntɔ́ Jehovah tɔn ɖé ma sɔ́ ɖò sinsɛn ɛ wɛ ǎ ɔ, nɛ̌ nǔ ka nɔ cí n’i?

² Hwenu e wɛnsagun e ɖò xwédo Jehovah tɔn mɛ é ɖé lɛ jó Jehovah dó é ɔ, dǒ nukún lě dò é na ko vɛ́ n’i sɔ é mɛ kpɔ́n! (Ju. 6) Bo lɛ́ dó nukún lee xomɛ na ko sin i sɔ é mɛ kpɔ́n, hwenu e Izlayɛli-ví e é yí wǎn na lɛ é fɔ́n gǔ dó jǐ tɔn azɔn mɔ̌kpan é. (Xà Ðɛhan 78:40, 41.) A sixu ɖeji ɖɔ enyi mɛvívɛ́ towe ɖé jó Tɔ́ mǐtɔn jixwé tɔn wanyiyinɔ ɔ dó ɔ, é nɔ lɛ́ vɛ́ n’i tawun. É mɔ nǔ jɛ wuvɛ̌ e mɛ a ɖè é wu. É na dó wusyɛn lanmɛ nú we, bo lɛ́ nɔ gudo nú we dó kú nǔblawu nú we.

³ Ðò xóta elɔ mɛ ɔ, mǐ na ɖɔ xó dó nǔ e mǐ sixu wà bɔ Jehovah na d’alɔ mǐ hwenu e mɛvívɛ́ mǐtɔn ɖé ma sɔ́ ɖò sinsɛn ɛ wɛ ǎ lɛ é jí. Mǐ na lɛ́ gbéjé lee mǐ sixu d’alɔ mɛ ɖevo e kpò ɖò agun ɔ mɛ, bo ɖò xwi ɖí xá wuvɛ̌ enɛ wɛ é gbɔn é kpɔ́n. Amɔ̌, jɛ nukɔn hwɛ̌ ɔ, mi nú mǐ ni ɖɔ xó dó linlin e mǐ ma ɖó na ɖó ǎ é ɖé lɛ jí.

4. Enyi vǐ sunnu alǒ vǐ nyɔnu ɖé jó Jehovah dó ɔ, nɛ̌ nǔ ka nɔ cí nú mɛjitɔ́ gegě?

⁴ Enyi vǐ sunnu alǒ vǐ nyɔnu vívɛ́ ɖé jó Jehovah dó ɔ, hwɛhwɛ wɛ mɛjitɔ́ lɛ nɔ kan nǔ e ye sixu ko wà hugǎn bo na d’alɔ vǐ ɔ bɔ é na kpò ɖò Jehovah sɛn wɛ é byɔ yeɖée. Ee è ɖè nɔví sunnu e nɔ nyí Luke é sín vǐ sunnu sín agun mɛ gudo é ɔ, é ɖɔ: “Un dóhwɛ nyiɖée. Un tlɛ nɔ kú dlɔ̌ nyanya lɛ dó ninɔmɛ ɔ wu. Hweɖelɛnu ɔ, un nɔ ɖó linkpɔ́n tawun bo nɔ  y’avǐ dó nǔjɔnǔ mɛ.” Nɔví nyɔnu ɖé nɔ nyí Elizabeth, bɔ é lɔ gbɔn ninɔmɛ mɔ̌hun mɛ, bɔ hwɛhwɛ ɔ, é nɔ lin nǔ gbɔn lě: “Etɛ un ka wà nyi dò? É nɔ cí nú mì ɖɔ un kún kplɔ́n nǔgbo ɔ vǐ ce ganji ó.”

5. Enyi mɛɖé jó Jehovah sinsɛn dó ɔ, mɛ̌ sín hwɛ ka wɛ?

⁵ Mǐ ɖó na flín ɖɔ Jehovah na mɛɖesúsíninɔ mǐ mɛ ɖokpo ɖokpo. Enɛ wu ɔ, mǐ sixu wá gbeta ɔ kɔn bo na setónú n’i alǒ gbɔ. Mɛ winnyawinnya ɖé lɛ tíìn bɔ mɛjitɔ́ yetɔn lɛ sɔ́ kpɔ́ndéwú ɖagbe ɖ’ayǐ nú ye ǎ có, ye ka wá gbeta ɔ kɔn bo na sɛn Jehovah, bo lɛ́ nɔ gbeji n’i. Mɛ ɖevo lɛ tíìn bɔ mɛjitɔ́ yetɔn lɛ wà nǔ e wu ye kpé é bǐ bo sɔ́ nǔgbododó Jehovah tɔn lɛ dó kplɔ́n ye có, ye sɔ́ sɛn Jehovah hwenu e ye sù é ǎ. È na ɖɔ ɔ, mǐ mɛ ɖokpo ɖokpo wɛ na wá gbeta ɔ kɔn bo na sɛn Jehovah. (Joz. 24:15) Enɛ wu ɔ, mi mɛjitɔ́ ɖěɖee wǔ kú ɖó vǐ mitɔn ma sɔ́ ɖò Jehovah sɛn wɛ ǎ wutu lɛ é mi, mi ma lin ɖɔ hwɛ mitɔn wɛ ó.

6. Enyi mɛjitɔ́ ɖé jó Mawu sinsɛn dó ɔ, nɛ̌ é ka sixu wà nǔ dó mɛ winnyawinnya ɖé wu gbɔn?

⁶ Hweɖelɛnu ɔ, mɛjitɔ́ ɖé sixu jó nǔgbo ɔ dó, lobo tlɛ sixu lɛ́ jɛ zɔ nú xwédo tɔn. (Ðɛh. 27:10) Enɛ sixu dó kpò awakanmɛ nú vǐ ɖěɖee nɔ sí mɛjitɔ́ yetɔn lɛ, bo lɛ́ yí wǎn nú ye lɛ é. Esther e è ɖè tɔ́ tɔn sín agun mɛ é ɖɔ: “Hwɛhwɛ wɛ un nɔ y’avǐ ɖó un tuùn ɖɔ é kún nyí zɔ sɛyi nú nǔgbo ɔ wɛ é ɖè kpowun ó. É wá gbeta ɔ kɔn ɖɔ emi kún sɔ́ na sɛn Jehovah ɖě ó. Un yí wǎn nú tɔ́ ce, enɛ wu ɔ, hwenu e è ɖè è sín agun mɛ é ɔ, hwebǐnu wɛ ganjininɔ tɔn nɔ ɖu ayi mɛ nú mì. Hǔn ce tlɛ nɔ zɛ hweɖelɛnu.”

7. Nɛ̌ nǔ ka nɔ cí nú Jehovah dó mɛ winnyawinnya e è ɖè mɛjitɔ́ tɔn ɖé sín agun mɛ é wu?

⁷ Mɛ winnyawinnya lɛ mi, enyi è ɖè mɛjitɔ́ mitɔn lɛ ɖě sín agun mɛ wɛ ɔ, mǐ jló na ɖɔ nú mi ɖɔ é vɛ́ nú mǐ tawun! Mi sixu lɛ́ ɖeji ɖɔ Jehovah mɔ nǔ jɛ wuvɛ̌ e sè wɛ mi ɖè lɛ é wu céɖécéɖé. É yí wǎn nú mi, bɔ gbeji e mi ɖè é nɔ lɛ́ sù nukún tɔn mɛ; lee nǔ nɔ cí nú mǐ mɛ nɔví mitɔn lɛ lɔ é nɛ. Mi lɛ́ flín ɖɔ é kún nyí mi wɛ zɔ́n bɔ mɛjitɔ́ mitɔn lɛ wá gbeta enɛ kɔn ó. Lee mǐ ko ɖɔ gbɔn wá yì é ɔ, Jehovah na mɛɖesúsíninɔ mɛ ɖokpo ɖokpo, bɔ mǐ sixu wá gbeta ɔ kɔn bo na sɛn ɛ, alǒ gbɔ. Gɔ́ na ɔ, mɛ ɖěɖee sɔ́ yeɖée jó nú Jehovah bo bló baptɛm lɛ é ɖokpo ɖokpo “ɖó na wà azɔ̌ e nyí étɔn é.”—Ga. 6:5

8. Etɛ mɛ ɖevo e kpò ɖò gbeji ɖò xwédo ɖé mɛ lɛ é ka sixu kpò ɖò wiwa wɛ hwenu e ye ɖò te kpɔ́n kɔlilɛ mɛ e ye yí wǎn na é ɖé tɔn é? (Lɛ̌ kpɔ́n gbǎví, “ Lɛ̌kɔ Wá Jehovah Gɔ́n” ɔ.)

⁸ Enyi mɛvívɛ́ towe ɖé jó Jehovah dó ɔ, jɔwamɔnú wɛ é nyí ɖɔ a ni ɖò nukún ɖó wɛ ɖɔ é na lɛkɔ wá. Ee a na ɖò te kpɔ́n kɔlilɛ tɔn é ɔ, etɛ a ka sixu ɖò wiwa wɛ? Wà nǔ e wu a kpé é bǐ bo bló bonu nǔɖiɖi towe ni lidǒ. Mɔ̌ wiwa na zɔ́n bɔ a na sɔ́ kpɔ́ndéwú ɖagbe ɖé ɖ’ayǐ nú mɛ ɖevo e kpò ɖò xwédo ɔ mɛ lɛ é, bo tlɛ sixu lɛ́ nyí kpɔ́ndéwú ɖagbe nú mɛ e è ɖè sín agun mɛ é. A na lɛ́ mɔ hlɔnhlɔn e sín hudo a ɖó bá dó ɖí xwi xá wuvɛ̌ e sè wɛ a ɖè lɛ é é. Mǐ ni ɖɔ xó dó afɔ tawun tawun e a sixu ɖè é ɖé lɛ jí.

9. Etɛ lɛ a ka sixu wà, bo na dó kpò ɖò nǔɖiɖi towe hɛn lidǒ wɛ? (Lɛ̌ kpɔ́n gbǎví “ Wemafɔ Ðěɖee Sixu Dó Gbɔ nú We Hwenu E Mɛvívɛ́ Towe ɖé Jó Jehovah Dó É ɖé Lɛ” ɔ.)

⁹ Tɛ́dó aca gbigbɔ tɔn ɖagbe ɖé wu. É ɖò taji tawun ɖɔ a ni kpò ɖò hlɔnhlɔn na  hwiɖée wɛ, bo ka lɛ́ kpò ɖò mɔ̌ wà nú mɛ ɖevo e kpò ɖò xwédo ɔ mɛ lɛ é wɛ. Nɛ̌ a ka sixu wà mɔ̌ gbɔn? Nɔ xà Biblu ayihɔngbe ayihɔngbe bo nɔ lɛ́ lin tamɛ d’eji, lobo nɔ lɛ́ yì kplé Klisanwun tɔn lɛ bá dó mɔ hlɔnhlɔn e Jehovah nɔ na mɛ é. Joanna e sín tɔ́ kpo nɔví nyɔnu kpo jó nǔgbo ɔ dó é ɖɔ: “Enyi un xà tan mɛ ɖěɖee xó Biblu ɖɔ lɛ é tɔn, ɖi Abigayilu, Ɛsitɛ́ɛ, Jɔbu, Jozɛfu kpo Jezu kpo tɔn ɔ, agbɔ̌n ce nɔ jɛ dò tawun. Kpɔ́ndéwú yetɔn lɛ nɔ dó wusyɛn lanmɛ nú mì, bo nɔ lɛ́ d’alɔ mì bɔ un nɔ ɖó linlin e sɔgbe é hugǎn. Han bǔnɔ mǐtɔn lɛ lɔ nɔ dó wusyɛn lanmɛ nú mì tawun.”

10. Enyi wǔ kú mǐ ɔ, nɛ̌ Ðɛhan 32:6-8 ka d’alɔ mǐ bɔ mǐ na ɖí xwi xá gbɔn?

¹⁰ Ðɔ nǔ e ɖò ayi mɛ ɖu nú we wɛ lɛ é nú Jehovah. Enyi wǔ kú we hǔn, ma nɔ gɔn ɖɛ xò ó. Savo nú Mawu wanyiyinɔ mǐtɔn ɖɔ é ni d’alɔ we, bonu a ni ɖó linlin ɖokpo ɔ e é nɔ ɖó dó nǔ lɛ wu é, bo lɛ́ savo n’i ɖɔ é ni ‘na nukúnnúmɔjɛnǔmɛ we, bo lɛ́ xlɛ́ ali e a ɖó na gbɔn é we.’ (Xà Ðɛhan 32:6-8.) É ɖò gaan ɖɔ lee nǔ cí nú mɛ nǔgbo é ɖiɖɔ nú Jehovah sixu vɛwǔ tawun. Amɔ̌, Jehovah mɔ nǔ jɛ wuvɛ̌ e sè wɛ a ɖè ɖò ayi towe mɛ lɛ é bǐ mɛ dégbédégbé. É yí wǎn nú we tawun, bo lɛ́ byɔ we ɖɔ a ni nɔ ɖɔ nǔ e ɖò ayi towe mɛ lɛ é bǐ nú emi.—Tín. 34:6; Ðɛh. 62:8, 9.

11. Sɔgbe xá Eblée lɛ 12:11 ɔ, etɛwu mǐ ka ɖó na ɖeji dó nǔ e Jehovah nɔ gbɛ́ nú mɛ kpo wanyiyi kpo é wu? (Lɛ̌ kpɔ́n gbǎví “ Mɛ Ðiɖe Sín Agun Mɛ Nyí Nǔgbɛnúmɛ Jehovah Tɔn E Wanyiyi Kpé É” ɔ.)

¹¹ Nɔ gudo nú gbeta e kɔn mɛxo lɛ wá lɛ é. Ali e nu Jehovah nɔ gbɛ́ nǔ nú mɛ kpo wanyiyi kpo ɖè é ɖokpo wɛ mɛ ɖiɖe sín agun mɛ nyí. Enɛ nɔ wà ɖagbe nú mɛ lɛ bǐ tawun, kaka jɛ nǔwanyidotɔ́ ɔ jí. (Xà Eblée lɛ 12:11.) Mɛ e ɖò agun ɔ mɛ é ɖé lɛ sixu ɖɔ ɖɔ ɖè e mɛxo agun tɔn lɛ ɖè mɛɖé sín agun mɛ é ɔ, é kún nyí gbeta ɖagbe ɔ kɔn nɛ ye wá nɛ ó. Amɔ̌, flín ɖɔ hwɛhwɛ ɔ, mɛ e nɔ ɖɔ mɔ̌ lɛ é kún nɔ ba na ɖɔ nǔ nyanya e hwɛhutɔ́ ɔ  wà lɛ é ɖě ó. Mǐ ɖó kúnnuɖenú lɛ bǐ ǎ kpowun bɔ xó fó. Enɛ wu ɔ, nǔnywɛnú wɛ é nyí ɖɔ è ni ɖeji dó mɛxo agun tɔn ɖěɖee nɔ wěɖegbɛ́ hwɛɖiɖɔ tɔn mɛ lɛ é wu. Ðó mɛxo agun tɔn lɛ nɔ wà nǔ e wu ye kpé lɛ é bǐ, bo nɔ xwedó nǔgbododó Biblu tɔn lɛ, lobo nɔ ɖɔ hwɛ ‘ɖò Jehovah nyikɔ mɛ.’—2 Tan 19:6.

12. Ðó mɛɖé lɛ nɔ gudo nú tuto nǔgbɛnúmɛ tɔn e Jehovah sɔ́ ɖ’ayǐ é wutu ɔ, lè tɛ ye ka mɔ ɖ’emɛ?

¹² Enyi a nɔ nɔ gudo nú gbeta e kɔn mɛxo agun lɛ wá, bo ɖè mɛvívɛ́ towe ɖé sín agun mɛ é ɔ, a sixu d’alɔ ɛ nǔgbo nǔgbo bɔ é na lɛkɔ wá Jehovah gɔ́n. Elizabeth e xó mǐ ɖɔ wá yì é ɖɔ: “Kancica ɖebǔ e mǐ ma sɔ́ nɔ ɖó xá vǐ mǐtɔn ǎ é vɛwǔ nú mǐ tawun. Amɔ̌, ee é lɛkɔ wá Jehovah gɔ́n gudo é ɔ, é yí gbè ɖɔ gbeta ɖagbe kɔn wɛ è wá, bo ɖè emi sín agun mɛ. Nukɔnmɛ ɔ, é ɖɔ ɖɔ emi kplɔ́n nǔ ɖagbe gegě. Un wá mɔ ɖɔ nǔgbɛnúmɛ Jehovah tɔn nɔ sɔgbe hwebǐnu.” Asú tɔn Mark ɖɔ gɔ́ na ɖɔ: “Ee táan gegě wá yì gudo é ɔ, vǐ sunnu mǐtɔn wá ɖɔ nú mì ɖɔ nǔ e zɔ́n bɔ emi ba na lɛkɔ é wɛ nyí kancica ɖebǔ e mǐ ma sɔ́ nɔ ɖó xá emi ǎ é. É víví nú mì tawun ɖɔ Jehovah d’alɔ mǐ, bɔ mǐ setónú.”

13. Etɛ ka sixu d’alɔ we bɔ a na ɖí xwi xá wuvɛ̌ e mɔ wɛ a ɖè ɖò lee nǔ nɔ cí nú mɛ é sín ali nu é?

¹³ Nɔ ɖɔ xó ɖó kpɔ́ xá xɔ́ntɔn ɖěɖee nɔ mɔ nǔ jɛ lee nǔ cí nú we é wu lɛ é. Nɔ zán hwenu ɖó kpɔ́ xá Klisanwun ɖěɖee ko mɔ nǔ kpɔ́n, bo sixu d’alɔ we bɔ a na kpò ɖò linlin ɖagbe ɖó wɛ lɛ é. (Nǔx. 12:25; 17:17, nwt) Joanna e xó mǐ ɖɔ wá yì é ɖɔ: “Un nɔ mɔ ɖɔ un ɖò nyiɖokpo. Amɔ̌, xó ɖɔ ɖó kpɔ́ xá xɔ́ntɔn ɖejid’ewu lɛ d’alɔ mì tawun.” Enyi mɛ ɖěɖee ɖò agun ɔ mɛ é ɖé lɛ ka jɛ nǔ ɖěɖee sixu zɔ́n bɔ a na mɔ ɖɔ emi kún vó nǔɖe ó lɛ é ɖɔ jí ɔ, etɛ a ka sixu wà?

14. Etɛwu mǐ ka ɖó na ‘nɔ mɔ mǐɖée gbɔ, bo nɔ lɛ́ sɔ́ hwɛ kɛ mǐɖée’?

¹⁴ Nɔ ɖó suúlu dó nɔví sunnu kpo nɔví nyɔnu kpo towe lɛ wu. É ɖò wɛn ɖɔ mǐ kún sixu ɖó nukún ɖɔ mɛ lɛ bǐ ni nɔ ɖɔ xó ɖagbe nú mǐ hwebǐnu ó. (Ja. 3:2) Hwɛhutɔ́ wɛ nú mǐ mɛ bǐ, enɛ wu ɔ, enyi mɛɖé lɛ ma tuùn nǔ e ye na ɖɔ é ǎ, alǒ tlɛ ɖɔ nǔ e ɖó wuvɛ̌ nú we lɛ é nú we ɖò manywɛ mɛ hǔn, ma nú é kpaca we ó. Nɔ flín wěɖexámɛ mɛsɛ́dó Pɔlu tɔn elɔ: “Mi nɔ mɔ miɖée gbɔ; enyi mɛɖé wà nǔ nyi dò nú mɛɖé ɖò mi mɛ hweɖebǔnu hǔn, mi nɔ sɔ́ kɛ miɖée. Mi ɖó na nɔ sɔ́ hwɛ kɛ miɖée lee Aklunɔ sɔ́ kɛ mi é ɖɔhun.” (Kolo. 3:13) Nɔví nyɔnu e è ɖè vǐ tɔn sunnu sín agun mɛ é ɖɔ: “Jehovah d’alɔ mì bɔ un sɔ́ hwɛ kɛ nɔví ɖěɖee tɛ́n kpɔ́n bá dó wusyɛn lanmɛ nú mì, b’ɛ ka nyí nǔ wɛ ye wà dó wǔ ce lɛ é.” Etɛ agun ɔ ka sixu wà dó d’alɔ mɛ ɖevo e kpò ɖò gbeji ɖò xwédo ɔ mɛ lɛ é?

15. Etɛ mǐ ka sixu wà dó d’alɔ mɛ ɖěɖee kpò ɖò xwédo e mɛ è ɖè mɛvívɛ́ yetɔn ɖé sín agun mɛ agaɖanu dìn lɛ é?

¹⁵ Nɔ nyɔ́ xomɛ dó mɛ ɖevo e kpò ɖò gbeji ɖò xwédo ɔ mɛ lɛ é wu, bo nɔ lɛ́ dó xɔ́ntɔn ye. Nɔví nyɔnu ɖé nɔ nyí Miriam bo yí gbè ɖɔ hwenu e è ɖè nɔví emitɔn sunnu sín agun mɛ é ɔ, kplé lɛ yiyi nɔ ɖó linkpɔ́n nú emi. É ɖɔ: “Xɛsi nɔ ɖi mì dó nǔ e mɛ lɛ na ɖɔ é wu. Amɔ̌, nɔví sunnu kpo nɔví nyɔnu kpo gegě sè wuvɛ̌ xá mì, bo ka lɛ́ ɖɔ xó nyanya ɖě dó  nɔví sunnu ce e è ɖè sín agun mɛ é wu ǎ. Kpɔ́ e ye nɔ xá mì é zɔ́n bɔ un mɔ ɖɔ un kún ɖò nyiɖokpo ó.” Nɔví nyɔnu ɖevo flín ɖɔ: “Ee è ɖè vǐ sunnu mǐtɔn sín agun mɛ é ɔ, xɔ́ntɔn vívɛ́ mǐtɔn lɛ wá dó gbɔ nú mǐ. Ye mɛ ɖé lɛ wá ɖɔ nú mǐ ɖɔ emi kún tuùn nǔ e emi na ɖɔ é ó. Ye mɛ ɖé lɛ y’avǐ xá mì, bɔ mɛ ɖevo lɛ sɛ́ wema wusyɛn dó lanmɛ nú mɛ tɔn dó mì. Nǔ e ye wà é ɖ’alɔ akɔ́n jí nú mì tawun.”

16. Nɛ̌ agun ɔ ka sixu kpò ɖò gudo nɔ nú mɛ ɖěɖee è ɖè mɛ yetɔn ɖé sín agun mɛ é wɛ gbɔn?

¹⁶ Kpò ɖò gudo nɔ nú mɛ ɖevo e kpò ɖò gbeji ɖò xwédo ɔ mɛ lɛ é wɛ. Ye ɖó hudo wanyiyi kpo wusyɛn dó lanmɛ nú mɛ kpo tɔn towe dìn tawun hú ɖ’ayǐ tɔn. (Ebl. 10:24, 25) Hweɖelɛnu ɔ, mɛ ɖevo e kpò ɖò xwédo e mɛ è ɖè mɛɖé sín agun mɛ ɖè lɛ é nɔ ɖ’ayi wu ɖɔ mɛɖé lɛ kún sɔ́ nɔ ɖɔ xó xá emi ɖò agun ɔ mɛ ó, cí nǔ ɖɔ è ɖè emi lɔ sín agun mɛ wɛ ɖɔhun. Mǐ ba ɖɔ nǔ ni cí mɔ̌ nú ye ǎ. Mǐ ɖó na nɔ kpa mɛ winnyawinnya ɖěɖee mɛjitɔ́ yetɔn lɛ ma sɔ́ kpò ɖò Jehovah sɛn wɛ ǎ lɛ é, bo na nɔ lɛ́ dó wusyɛn lanmɛ nú ye. È ɖè Maria sín asú sín agun mɛ, b’ɛ lɛ́ jó xwédo tɔn dó. Maria ɖɔ: “Xɔ́ntɔn ce ɖé lɛ nɔ wá xwé ce gbè, bo nɔ ɖa nǔɖuɖu nú mǐ, lobo nɔ d’alɔ mì bɔ un nɔ kplɔ́n Biblu xá vǐ ce lɛ. Ye nɔ sè wuvɛ̌ xá mì, bo nɔ lɛ́ y’avǐ xá mì. Hwenu e mɛ lɛ jɛ adingbanxó lɛ fúnfún kpé dó wǔ ce jí é ɔ, ye lɛ́ jɛhun dó jǐ ce. Ye dó wusyɛn lanmɛ nú mì tawun.”—Hlɔ. 12:13, 15.

17. Nɛ̌ mɛxo agun tɔn lɛ ka sixu dó gbɔ nú mɛ ɖěɖee wǔ kú lɛ é dó nɔ gudo nú ye gbɔn?

¹⁷ Mɛxo lɛ emi, mi nɔ zán ali e hun nú mi lɛ é dó dó wusyɛn lanmɛ nú mɛ ɖevo e kpò ɖò gbeji ɖò xwédo ɔ mɛ lɛ é. Wǔjɔmɛ bǔnɔ ɖé wɛ a ɖó bo na ɖó alɔ akɔ́n jí nú nǔɖitɔ́ hatɔ́ ɖěɖee mɛvívɛ́ yetɔn ɖé jó Jehovah dó lɛ é. (1 Tɛ. 5:14) Bo na dó dó wusyɛn lanmɛ nú ye hǔn, nɔ ɖɔ xó ɖó kpɔ́ xá ye jɛ nukɔn nú kplé lɛ, kpo kplé lɛ gudo kpo. Nɔ yì ba ye kpɔ́n, bo nɔ lɛ́ xoɖɛ xá ye. Nɔ w’azɔ̌ ɖó kpɔ́ xá ye ɖò sinsɛnzɔ́ ɔ mɛ. Alǒ, nɔ ylɔ́ ye hweɖelɛnu bonu ye ni wá gɔ́ nú xwédo towe nú sinsɛn-biblo xwédo tɔn mitɔn. Lɛngbɔ̌nyitɔ́ gbigbɔ tɔn lɛ ɖó na ɖè nǔblawukúnúmɛ kpo wanyiyi kpo xlɛ́  lɛngbɔ̌ Jehovah tɔn e ɖò aluwɛ mɛ lɛ é, bo lɛ́ ɖexlɛ́ ye ɖɔ nǔ yetɔn nɔ ɖu ayi mɛ nú emi.—1 Tɛ. 2:7, 8.

18. Sɔgbe xá 2 Piyɛ́ɛ 3:9 ɔ, etɛ Mawu ka ɖò nukún ɖó wɛ ɖɔ mɛ ɖěɖee ma sɔ́ ɖò emi sɛn wɛ ǎ lɛ é ni wà?

¹⁸ Jehovah “jló ɖɔ mɛ ɖebǔ ni dɔn ǎ; é nyɔ́ wà ɔ, é jló ɖɔ mɛ bǐ ni mɔ ali, bo lɛkɔ sín nǔnyanyawiwa gudo.” (Xà 2 Piyɛ́ɛ 3:9.) Mɛɖé sixu hu hwɛ syɛnsyɛn có, gbɛ̀ tɔn ka nɔ lɛ́ kpò ɖò akwɛ xɔ wɛ ɖò Mawu nukúnmɛ. Flín ɖɔ Jehovah sú axɔ́ ɖaxó ɖé nú mǐ mɛ ɖokpo ɖokpo, enɛ wɛ nyí gbɛ̀ Vǐ vívɛ́ná tɔn tɔn. Kpo wanyiyi kpo wɛ Jehovah ɖò gǎn dó wɛ, bo na d’alɔ mɛ ɖěɖee ko jó è dó lɛ é bonu ye na lɛkɔ wá gɔ̌n tɔn. É nɔ ɖó nukún ɖɔ ye na wá gbeta ɔ kɔn bo na lɛkɔ wá, lee mǐ mɔ gbɔn ɖò lǒ e Jezu dó dó vǐ ɖuvanɔ ɔ wu é mɛ é. (Luk. 15:11-32) Mɛ ɖěɖee jó nǔgbo ɔ dó lɛ é gegě nɔ wá lɛkɔ wá Tɔ́ yetɔn jixwé tɔn wanyiyinɔ ɔ gɔ́n, bɔ agun ɔ nɔ kɛ alɔ bo nɔ yí ye. Xomɛ hun Elizabeth e xó mǐ ɖɔ wá yì é tawun, hwenu e è yí vǐ sunnu tɔn dó agun mɛ é. Ee é dó nukún nǔ e jɛ wá yì é mɛ kpɔ́n é ɔ, é ɖɔ, “Xomɛ hun mì tawun ɖɔ mɛ gegě dó wusyɛn lanmɛ nú mǐ ɖɔ mǐ ni ma gɔn nukúnɖiɖó ɖó ó.”

19. Etɛwu mǐ ka sixu kpò ɖò jiɖe ɖó dó Jehovah wu wɛ?

¹⁹ Hwebǐnu wɛ mǐ sixu ɖeji dó Jehovah wu. É nɔ ɖè wě e na wà nǔ dó mǐ wu lɛ é xá mǐ gbeɖé ǎ. Tɔ́ e nɔ hun alɔ dó na nǔ mɛ, bo nɔ lɛ́ kú nǔblawu nú mɛ é ɖé wɛ n’i. É lɛ́ yí wǎn ɖaxó nú mɛ ɖěɖee yí wǎn n’i bo nɔ sɛn lɛ é bǐ. Kánɖeji ɖɔ Jehovah kún na jó we dó hwenu e a ɖò wuvɛ̌ sè wɛ é ó. (Ebl. 13:5, 6) Mark e xó mǐ ɖɔ wá yì é ɖɔ, “Jehovah jó mǐ dó gbeɖé ǎ. Enyi mǐ ɖò wuvɛ̌ lɛ mɛ gbɔn wɛ ɔ, é na d’alɔ mǐ hwebǐnu.” Jehovah na kpò ɖò “hlɔnhlɔn aditi ɔ” na we wɛ. (2 Kɔ. 4:7) Nǔgbo ɔ, enyi mɛ e a yí wǎn na é ɖé na bo tlɛ jó Jehovah dó ɔ, a sixu kpò ɖò gbeji nɔ wɛ, bo lɛ́ kpò ɖò nukúnɖiɖó ɖó wɛ.