Ð’ayi xósin e Biblu ná nú nǔkanbyɔ́ énɛ́ lɛ́ é wú.

Mɛsɛ́dó 24:15 ɖɔ nú mǐ ɖɔ è “ná wá fɔ́n mɛ ɖagbe lɛ́, kpódó mɛ nyanya lɛ́ kpó sín kú.” Mɛ ɖagbe lɛ́ wɛ nyí mɛ ɖěɖěe se tónú nú Mawu cóbó kú lɛ́ é, énɛ́ wú ɔ, è wlán nyǐkɔ yětɔn dó gbɛwéma ɔ mɛ. (Mal. 3:16) Mɛ ɖěɖěe ali ɔ ma hun nú yě bɔ yě kplɔ́n nǔ káká ɖé dó Jexóva wú ǎ lɛ́ é ɖo mɛ nyanya lɛ́ mɛ, énɛ́ wú ɔ, è wlán nyǐkɔ yětɔn dó gbɛwéma ɔ mɛ ǎ.

Gbɛtɔ́ gbɛ̌nu we e xó è ɖɔ ɖo Jaan 5:28, 29 mɛ lɛ́ é xó ɖɔ wɛ jɛ́n è lɛ́ ɖe ɖo Mɛsɛ́dó 24:15 mɛ. Jezu ɖɔ ɖɔ “mɛ e wa nǔ ɖagbe lɛ́ ɔ, Mawu ná fɔ́n yě sín kú, bo ná ná yě gbɛ mavɔmavɔ. Loɔ, mɛ e wa nǔ nyanya lɛ́ ná fɔ́n sín kú, bónú Mawu ná ɖó hwɛ nú yě.” Mɛ ɖagbe lɛ́ ko wa nǔ ɖagbe lɛ́ cóbó kú. Bɔ ɖó nyǐkɔ yětɔn kpo ɖo gbɛwéma ɔ mɛ wútu ɔ, è ná fɔ́n yě sín kú, bo ná ná yě gbɛ mavɔmavɔ. Amɔ̌, mɛ nyanya lɛ́ ɔ, nǔ nyanya lɛ́ wɛ yě wa cóbó kú. Énɛ́ wɛ zɔ́n bɔ è ná fɔ́n yě bá ɖó hwɛ nú yě. È ko wlán nyǐkɔ yětɔn dó gbɛwéma ɔ mɛ ǎ, énɛ́ wú ɔ, è ná kpɔ́n yě kpó sɔxwixwe kpó nú hwenu ɖé, alǒ dó yě kpɔ́n. Hwenɛ́nu ɔ, ali ná hun nú yě bɔ yě ná kplɔ́n nǔ dó Jexóva wú, bɔ énɛ́ ná zɔ́n bɔ è ná wlán nyǐkɔ yětɔn dó gbɛwéma ɔ mɛ.

Nǔɖexlɛ́mɛ 20:12, 13 tínmɛ ɖɔ mɛ ɖěɖěe è ná fɔ́n sín kú lɛ́ é bǐ ɖó ná se tónú nú “nǔ e è wlán dó wěma-mlámlá lɛ́ mɛ lɛ́ é,” énɛ́ wɛ nyí sɛ́n ɖěɖěe Mawu ná ná mǐ ɖo gbɛ yɔ̌yɔ́ ɔ mɛ lɛ́ é. Jexóva ná sú mɛ ɖěɖěe ma ná se tónú ǎ lɛ́ é sín kún dó.—Eza. 65:20.

Sɔgbe xá Lẹdogbedevomẹ Aihọn Yọyọ Tọn ɔ Daniyɛ́li 12:2 ɖɔ ɖ’ayǐ ɖɔ mɛ ɖěɖěe ɖo amlɔ dɔ́ wɛ ɖo yɔdo mɛ lɛ́ é gěgé ná fɔ́n, bɔ è “ná ná yě gbɛ mavɔmavɔ, bɔ mɛ ɖěvo lɛ́ ka ná ɖu winnyá, bɔ wi ɖě sɔ́ ná nɔ yě ta ǎ káká sɔ́yi.” Gbeta gǔdo tɔn e kɔn è ná wá dó mɛ ɖěɖěe ná fɔ́n sín kú lɛ́ é wú é xó ɖɔ wɛ wěmafɔ énɛ́ ɖe, énɛ́ wɛ nyí ɖɔ yě ná mɔ “gbɛ mavɔmavɔ” alǒ, “wi ɖě sɔ́ ná nɔ yě ta ǎ káká sɔ́yi.” Hǔn, ɖo xwe 1000 ɔ sín vivɔnu ɔ, è ná dó gbɛ mavɔmavɔ sín ajɔ mɛɖé lɛ́, bo ná sú kún dó nú mɛ ɖěvo lɛ́ bǐ mlɛ́mlɛ́.—Nǔɖe. 20:15; 21:3, 4.

Nǔjlɛ́dónǔwú ɖé ɖíe. È sixú sɔ́ ninɔmɛ gbɛ̌ta we e ná fɔ́n sín kú wɛ è ɖe lɛ́ é tɔn jlɛ́ dó jǒnɔ e ba ná nɔ to ɖěvo mɛ lɛ́ é tɔn wú. Mɛ ɖagbe lɛ́ cí mɛ ɖěɖěe è ná acɛ bɔ yě ná w’azɔ̌ ɖo to ɔ mɛ, alǒ nɔ to ɔ mɛ lɛ́ é ɖɔhun; acɛ énɛ́ e è ná yě é zɔ́n bɔ acɛkpikpa to ɔ tɔn tuun yě, bɔ yě lɛ́ ɖó mɛɖésúsíninɔ ɖó bǎ ɖé mɛ. Mɛ nyanya lɛ́ tɔn ka nyí mɔ̌ ǎ; yědɛɛ lɛ́ cí jǒnɔ e è ná acɛ bɔ yě ná nɔ to ɔ mɛ nú hwenu kléwún é ɖɔhun. Amɔ̌, cóbónú è ná ná gbe yě bónú yě ná kpo ɖo to yɔ̌yɔ́ ɔ mɛ nɔ wɛ ɔ, yě ɖó ná ɖe afɔ ɖé lɛ́ bo ná xlɛ́ ɖɔ émí jɛxá. Ðo ali ɖokpó ɔ nu ɔ, mɛ nyanya ɖěɖěe è ná fɔ́n sín kú lɛ́ é ɖó ná se tónú nú sɛ́n Jexóva tɔn lɛ́, lobo lɛ́ xlɛ́ ɖɔ émí nyí hwɛjijɔnɔ, cóbó ná sixú kpé wú bo nɔ gbɛ ɖo Palaɖísi mɛ. Gɔ́ ná ɔ, jǒnɔ e yi to ɖěvo mɛ lɛ́ é ná bo tlɛ ɖó acɛ ɖěbǔ ɖo bǐbɛ́mɛ ɔ, è sixú wá ná acɛ mɛɖé lɛ́ bɔ yě ná húzú toví to ɔ tɔn, cóbó ka ná nya mɛ ɖěvo lɛ́ sín to ɔ mɛ. Afɔ e ɖe wɛ mɛ lɛ́ ɖe é kpó lěe wa nǔ gbɔn wɛ yě ɖe ɖo to yɔ̌yɔ́ e mɛ yě ɖe é kpó wú wɛ gbeta gǔdo tɔn e kɔn è ná wá dó yě wú é ná sín. Mɔ̌ ɖokpó ɔ, gbeta gǔdo tɔn e kɔn è ná wá dó mɛ ɖěɖěe è ná fɔ́n sín kú lɛ́ é wú é ná sín gbejíninɔ yětɔn kpó lěe yě wa nǔ gbɔn ɖo gbɛ yɔ̌yɔ́ ɔ mɛ é kpó wú.

Jexóva ɔ, Mawu wǔvɛ́sexámɛtɔ́ wɛ é nyí, bo lɛ́ nyí Mawu hwɛjijɔnɔ. (Sɛ́n. 32:4; Ðɛh. 33:5) É ná fɔ́n mɛ ɖagbe kpó mɛ nyanya kpó sín kú dó ɖe wǎnyíyí tɔn xlɛ́. Amɔ̌, é ná ɖó nukún ɖɔ yě bǐ ní se tónú nú nǔgbódodó émítɔn e kúnkplá nǔ ɖagbe kpó nǔ nyanya kpó lɛ́ é. Mɛ ɖěɖěe yí wǎn n’i, bo nɔ lɛ́ zán gbɛ sɔgbe xá nǔgbódodó tɔn lɛ́ é kɛ́ɖɛ́ wɛ é ná ná gbe bɔ yě ná nɔ gbɛ káká sɔ́yi ɖo gbɛ yɔ̌yɔ́ ɔ mɛ.