Sɔgbe xá 1 Kɔlɛ́ntinu lɛ́ 15:8 ɔ, Pɔ́lu ɖɔ: “Ée é sɔ́ éɖée xlɛ́ yě bǐ ɔ, é wá sɔ́ éɖée xlɛ́ nyɛ lɔmɔ̌ gbɔn gǔdo; có mɛ e azǎn ma sɔgbe bɔ è ji ɖɔhun wɛ un cí.” Ð’ayǐ ɔ, mǐ nɔ tínmɛ ɖɔ é cí ɖɔ nǔ e jɛ dó Pɔ́lu ɖésúnɔ wú hwenu e é mɔ Jezu ɖo jǐxwé ɖo susu tɔn mɛ ɖo nǔmimɔ ɖé mɛ é xó ɖɔ wɛ é ɖe. É cí ɖɔ è jɔ wǔ i, bo ji i, alǒ fɔ́n ɛ sín kú dó agbaza gbigbɔ tɔn mɛ jɛ nukɔn nú hwenu e nǔ ná nyí mɔ̌ é, énɛ́ wɛ nyí xwe kanweko mɔ̌kpán jɛ nukɔn nú hwenu e fínfɔ́n sín kú mɔ̌hun bɛ́ é. Amɔ̌, ée è ba do nú nǔ dó wěmafɔ énɛ́ jí hú gǎn gúdo é ɔ, è wá mɔ ɖɔ é ɖo dandan ɖɔ è ní vɔ́ azɔ̌ wa ɖo nukúnnúmɔjɛnǔmɛ e mǐ ɖó dó wěmafɔ énɛ́ jí é wú.

Nǔgbó ɔ, nǔ e dó gesí wɛ Pɔ́lu ɖe ɖo fí é wɛ nyí nǔ e jɛ hwenu e é húzú klisánwun é. Amɔ̌, étɛ́ ɖɔ gbé wɛ é ka já hwenu e é ɖɔ ɖɔ “mɛ e azǎn ma sɔgbe bɔ è ji ɖɔhun wɛ un cí” é? È sixú tínmɛ ɖo ali gěgé nu.

Hazawun wɛ é húzú klisánwun, bɔ lěe é nyí gbɔn é lɛ́ syɛ́n tawun. Hwɛhwɛ ɔ, vǐ e azǎn tɔn ma kpé ǎ é jiji ɔ, nǔ wɛ nyí bo nɔ fyán mɛ. Ée Sólu e è wá ylɔ́ ɖɔ Pɔ́lu é xwe Damási bo ná yi dó ya nú klisánwun e ɖo dɔ̌n lɛ́ é ɔ, é lin ɖɔ émí ná mɔ Jezu e è ko fɔ́n sín kú é ɖo nǔmimɔ mɛ ǎ. Lěe Pɔ́lu húzú klisánwun gbɔn é fyán éɖésúnɔ mɛtún ɔ; é ka nyí éɖokpónɔ ǎ, mɔ̌ wɛ nǔ cí nú klisánwun e é xwe ya dó ná gbé lɛ́ é lɔ. Gɔ́ ná ɔ, nǔ énɛ́ e jɛ dó jǐ tɔn é syɛ́n sɔmɔ̌ bɔ é ba nukúnnú kpo nú hwenu ɖé.—Mɛ. 9:1-9, 17-19.

É húzú klisánwun hwenu e mɛɖé ma ɖó nukún tɔn dó ǎ é. È sixú lɛ́ tínmɛ xógbe dodó Glɛ̌kigbe tɔn e è tínmɛ bɔ é nyí “mɛ e azǎn ma sɔgbe bɔ è ji ɖɔhun wɛ un cí” é gbɔn lě: “Mɛ e è ma ji ɖo gan ɖagbe mɛ ǎ é.” La Bible de Jérusalem tínmɛ gbɔn lě: “É cí ɖɔ hwenu e mɛ ɖěbǔ ma ɖó nukún tɔn ǎ é wɛ è ji mì ɖɔhun.” Hwenu e Pɔ́lu húzú klisánwun é ɔ, Jezu ko lɛ́ kɔ yi jǐxwé nɛ́. Pɔ́lu gbɔn vo nú mɛ ɖěɖěe xó é ɖɔ ɖo wěmafɔ e jɛ nukɔn lɛ́ é mɛ é, ɖó é mɔ Jezu e fɔ́n sín kú é cóbónú é yi jǐxwé ǎ. (1 Kɔ. 15:4-8) Tɔ́n e Jezu tɔ́n dó Pɔ́lu jí bɔ é ma ɖó nukún tɔn ǎ é hun ali ɔ nú Pɔ́lu bɔ é mɔ Jezu ɖo fínfɔ́n sín kú tɔn gúdo, ényí é ná bo tlɛ cí ɖɔ é kún nyí dó “gan ɖagbe mɛ” ó, alǒ hwenu e mɛ ɖěvo lɛ́ ná bo ma tlɛ ɖó nukún tɔn dó ǎ é ɔ nɛ́.

Xó ɖɔ dó éɖée wú wɛ é ɖe ɖo ali e ɖo jlɛ̌ jí é nu. Sɔgbe xá nǔ e akɔwé ɖé lɛ́ ɖɔ é ɔ, xógbe e Pɔ́lu zán ɖo fí é sixú ko ɖo xlɛ́xlɛ́ wɛ ɖɔ mɛ lɛ́ nɔ mɔ xó ɖɔ dó wǔ tɔn. Ényí nǔ mɔ̌hun wɛ ɖo ayi tɔn mɛ hǔn, é tuun ɖɔ émí kún jɛxá wǔ énɛ́ e è jɔ émí é ó nɛ́. Énɛ́ wú wɛ é ɖɔ: “Nyɛ wɛ nyí mɛ e gbɔn gǔdo bǐ ɖo mɛsɛ́dó lɛ́ mɛ é. Ényí è ná ɖɔ nǔgbó ɔ, é jɛxá ɖɔ è ní ylɔ́ mì ɖɔ mɛsɛ́dó ǎ, ɖó un dó ya nú agun Mawu tɔn. Amɔ̌, gbɔn nyɔ̌ná Mawu tɔn gblamɛ ɔ, un húzú mɛ e un nyí din é.”—1 Kɔ. 15:9, 10.

Hǔn, é cí ɖɔ ninɔmɛ élɔ́ lɛ́ wú ɖɔ xó dó wɛ Pɔ́lu sixú ko ɖe ɖɔhun: tɔ́n e Jezu tɔ́n dó jǐ tɔn ɖo ajijimɛ é, nukún tɔn e é ma ɖó ǎ, bo húzú klisánwun é, alǒ nǔjíwǔ énɛ́ e è ɖe xlɛ́ ɛ b’ɛ ma jɛxá ǎ é. Ðěbǔ wɛ é ná bo nyí gbɔn ɔ, é ɖo wɛn ɖɔ nǔ énɛ́ e jɛ dó Pɔ́lu jí é xɔ akwɛ́ nukún tɔn mɛ tawun. Nǔxokpɔ́n ɖ’é mɛ ǎ, é mɔ vaan ɖɔ Jezu ko fɔ́n sín kú. É ɖo wɛn ɖɔ hwɛhwɛ wɛ é nɔ kɛ nu dó nǔ énɛ́ e jɛ dó jǐ tɔn é wú hwenu e é ɖo wɛn ɖagbe ɔ jlá mɛ ɖěvo lɛ́ wɛ dó fínfɔ́n sín kú Jezu tɔn wú é.—Mɛ. 22:6-11; 26:13-18.