1-2. Étɛ́wú é ka nyɔ́ ɖɔ mǐ ní kplɔ́n nǔ dó tan Sanmusɔ́ɔn tɔn wú?

 ÉNYÍ a se nyǐkɔ Sanmusɔ́ɔn ɔ, étɛ́ ka nɔ wá ayi mɛ nú we? Ayi towe sixú ko nɔ yi lě do é dó hlɔ̌nhlɔ́n sɔ é jí. Nǔgbó ka wɛ. Amɔ̌, Sanmusɔ́ɔn wá gbeta nyanya ɖé kɔn bɔ énɛ́ dɔn wǔvɛ́ gěgé wá n’i. É ɖo mɔ̌ có, Jexóva sɔ́ ayi ɖó nǔ ɖagbe e Sanmusɔ́ɔn wa dó sɛn ɛ lɛ́ é bǐ jí. Gɔ́ ná ɔ, Mawu yí gbe bɔ è wlán kpɔ́ndéwú gbejíninɔ tɔn Sanmusɔ́ɔn tɔn dó Biblu mɛ nú ɖagbe mǐtɔn.

² Jexóva zán Sanmusɔ́ɔn dó bló nǔjíwǔ gěgé dó d’alɔ Izlayɛ́li e nyí togun Tɔn e é sɔ́ é. Sanmusɔ́ɔn kú bɔ é bló xwe kanweko mɔ̌kpán gúdo é ɔ, Jexóva sɔ́ d’ayi mɛ nú mɛsɛ́dó Pɔ́lu bɔ é wlán nyǐkɔ tɔn dó mɛ ɖěɖěe ɖe nǔɖiɖi nukúnɖéjí xlɛ́ lɛ́ é mɛ. (Ebl. 11:​32-34) Kpɔ́ndéwú Sanmusɔ́ɔn tɔn sixú dó wǔsyɛ́n lanmɛ nǔ mǐ. É ɖeji dó Jexóva wú, é ná bo tlɛ nyí ɖo ninɔmɛ e vɛ́ wǔ lɛ́ é mɛ ɔ nɛ́. Ðo xóta élɔ́ mɛ ɔ, mǐ ná ɖɔ xó dó nǔ e kpɔ́ndéwú Sanmusɔ́ɔn tɔn sixú kplɔ́n mǐ é kpó lěe kpɔ́ndéwú tɔn sixú dó wǔsyɛ́n lanmɛ nú mǐ gbɔn é kpó jí.

3. Azɔ̌ tɛ́ è ka sɔ́ dó así nú Sanmusɔ́ɔn?

³ Hwenu e è ji Sanmusɔ́ɔn é ɔ, Filisitɛ́ɛn lɛ́ wɛ ɖo acɛ kpa dó togun Izlayɛ́li tɔn ɔ nu wɛ, bo nɔ hɛn gbɔ̌ gúngún kan gúngún yětɔn. (Hwɛ. 13:1) Acɛ gannaganna e yě nɔ kpa é dɔn wǔvɛ́ gěgé wá nú Izlayɛ́li ví lɛ́. Jexóva sɔ́ Sanmusɔ́ɔn bónú é “ná jɛ Izlayɛ́li ví lɛ́ hwlɛ́n sín Filisitɛ́ɛn lɛ́ sí jí.” (Hwɛ. 13:5) Azɔ̌ e vɛ́ wǔ tawun é ɖé wɛ. Bo ná dó kpé azɔ̌ syɛ́nsyɛ́n énɛ́  wú bá wa ɔ, Sanmusɔ́ɔn ɖó ná ɖeji dó Jexóva wú.

4. Nɛ̌ Jexóva ka d’alɔ Sanmusɔ́ɔn bɔ é xo gló Filisitɛ́ɛn lɛ́ gbɔn? (Hwɛɖɔtɔ́ lɛ́ 15:14-16)

⁴ Ð’ayi kpɔ́ndéwú lěe Sanmusɔ́ɔn ɖeji dó Jexóva wú, bɔ Mawu nɔ gǔdo n’i gbɔn é tɔn ɖokpó wú. Ðo ninɔmɛ ɖé mɛ ɔ, ahwankpá Filisitɛ́ɛn lɛ́ tɔn ɖokpó wá bo ná wlí Sanmusɔ́ɔn ɖo Lɛ́xi; Judáa yíkúngban jí wɛ fí énɛ́ ná ko ɖe. Súnnu Judáa tɔn lɛ́ ɖo xɛsi ɖi wɛ, énɛ́ wú ɔ, yě wá gbeta ɔ kɔn bo ná kplá Sanmusɔ́ɔn yi jó nú kɛntɔ́ tɔn lɛ́. Yě blá Sanmusɔ́ɔn ganjí kpó kan yɔ̌yɔ́ we kpó, bo kplá ɛ yi jó nú Filisitɛ́ɛn lɛ́. (Hwɛ. 15:​9-13) Amɔ̌, ‘gbigbɔ Jexóva tɔn wá Sanmusɔ́ɔn jí’ bɔ kan e yě blá alɔ tɔn lɛ́ ná lɛ́ é j’ayǐ sín alɔ tɔn. Énɛ́ gúdo ɔ, é “mɔ tócí sín aglan yaɖéyaɖé ɖé,” bo sɔ́ dó hu Filisitɛ́ɛn 1000 ná!—Xa Hwɛɖɔtɔ́ lɛ́ 15:​14-16.

5. Nɛ̌ tócí sín aglan e Sanmusɔ́ɔn zán é ka xlɛ́ jiɖe e é ɖó dó Jexóva wú é gbɔn?

⁵ Tócí sín aglan nyí ahwanlyánnú ǎ có, Sanmusɔ́ɔn ka zán dó fun ahwan. Aniwú é ka wa mɔ̌? É ɖo wɛn ɖɔ, Sanmusɔ́ɔn tuun ɖɔ Jexóva wɛ nyí tɔn bɔ émí ɖu ɖ’é jí, é kún nyí alyánnú e émí zán é ó. Ɛɛn, nya gbejínɔtɔ́ énɛ́ zán nǔ e é mɔ é dó wa jlǒ Jexóva tɔn. É ɖo wɛn ɖɔ, gǎn e Sanmusɔ́ɔn gán jɛ Jexóva wú é wɛ zɔ́n bɔ é ɖu ɖo mɛ énɛ́ lɛ́ bǐ jí.

6. Ée mǐ ná ɖo azɔ̌ ɖěɖěe è sɔ́ dó así nú mǐ ɖo tutoblónúnǔ ɔ mɛ lɛ́ é wa wɛ é ɔ, étɛ́ kpɔ́ndéwú Sanmusɔ́ɔn tɔn ka sixú kplɔ́n mǐ?

⁶ Jexóva sixú ná hlɔ̌nhlɔ́n mǐ lɔmɔ̌ bɔ mǐ ná kpé azɔ̌ mǐtɔn lɛ́ wú, ényí yě ná bo tlɛ cí nǔ e wú è ma sixú kpé ǎ é ɖɔhun ɔ nɛ́. Mawu hɛn ɔ, é ná wa mɔ̌ ɖo ali ɖé nu bɔ é ná jí wǔ nú mǐ. Ðeji ɖɔ Jexóva e ná hlɔ̌nhlɔ́n Sanmusɔ́ɔn é ná d’alɔ we bɔ a ná wa jlǒ Tɔn, ényí a vɛ́ ko ɖo jiɖe ɖó dó wǔ Tɔn wɛ ɔ nɛ́.—Nǔx. 16:3.

7. Kpɔ́ndéwú tɛ́ ka xlɛ́ ɖɔ é ɖo tají ɖɔ mǐ ní nɔ ba alɔdó Jexóva tɔn?

⁷ Nɔví súnnu kpó nɔví nyɔ̌nu kpó gěgé wɛ ko ɖ’alɔ ɖo xɔ e tutoblónúnǔ ɔ nɔ gbá lɛ́ é mɛ; nɔví énɛ́ lɛ́ xlɛ́ ɖɔ émí ɖeji dó Jexóva wú. Ð’ayǐ ɔ, hwɛhwɛ wɛ nɔví lɛ́ nɔ ɖe desɛ́ɛn kpléxɔ Axɔ́súɖuto ɔ tɔn yɔ̌yɔ́ lɛ́ kpó xɔ ɖěvo lɛ́ kpó tɔn lɛ́ gěgé, lobo nɔ lɛ́ gbá. Amɔ̌, ɖó mɛ gěgé ɖo batɛ́mu bló wɛ wútu ɔ, é byɔ́ ɖɔ  tutoblónúnǔ Jexóva tɔn ní bló hǔzúhúzú ɖé lɛ́. Nɔví ɖěɖěe ɖo nukún kpé dó nǔ lɛ́ wú wɛ lɛ́ é nɔ xo ɖɛ, bo nɔ byɔ́ alɔdó Jexóva tɔn lobo nɔ tɛ́n wlɛnwín yɔ̌yɔ́ lɛ́ kpɔ́n. Ði kpɔ́ndéwú ɔ, yě nɔ xɔ xwé ɖé lɛ́ lobo nɔ vɔ́ yě jlá ɖó. Robert e ɖ’alɔ ɖo xɔ e è gbá agaɖanu din ɖo awa vovo gbɛ ɔ tɔn lɛ́ xwé lɛ́ é gěgé mɛ é ɖɔ: “Ðo bǐbɛ́mɛ ɔ, é bɔ wǔ nú mɛ ɖé lɛ́ bónú yě ná wa nǔ lɛ́ ɖo ali yɔ̌yɔ́ énɛ́ nu ǎ.” É ɖɔ gɔ́ ná ɖɔ: “É gbɔn vo tawun nú lěe mǐ nɔ wa nǔ lɛ́ gbɔn ɖ’ayǐ é. Amɔ̌, nɔví lɛ́ ɖo gbesisɔmɛ bo ná húzú sɔgbe xá, bɔ é ka jɛ wě ɖɔ Jexóva ɖo nyɔ̌ná kɔn dó hǔzúhúzú énɛ́ lɛ́ jí wɛ.” Lěe Jexóva ɖo ali xlɛ́ togun tɔn wɛ, bɔ é ɖo jlǒ tɔn wa wɛ gbɔn é sín kpɔ́ndéwú ɖokpó kpowun wɛ nyí énɛ́. É ná nyɔ́ ɖɔ, mǐ mɛ bǐ ní nɔ kan nǔ élɔ́ byɔ́ mǐɖée sín hweɖénu jɛ hweɖénu: ‘Un ka nɔ ba wěɖexámɛ Jexóva tɔn, lobo nɔ húzú sɔgbe xá ninɔmɛ lɛ́ ɖo lěe sɛn ɛ gbɔn wɛ un ɖe é kpáxwé a?’

8. Ðo ninɔmɛ ɖé mɛ hwenu e kɔ xú Sanmusɔ́ɔn tawun é ɔ, étɛ́ é ka wa?

⁸ A sixú ko flín nǔ ɖěvo e Sanmusɔ́ɔn wa, bɔ yě jí wǔ lɛ́ é. É hɛn nǔɖé alɔ mɛ cóbó hu kinnikínní ɖokpó ǎ, mɔ̌ jɛ́n é ma lɛ́ hɛn nǔɖé alɔ mɛ cóbó hu súnnu Filisitɛ́ɛn 30 ɖo toxo Acikelɔ́ni tɔn mɛ ǎ é nɛ́. (Hwɛ. 14:​5, 6, 19) Sanmusɔ́ɔn tuun ɖɔ émí kún sixú wa nǔ énɛ́ lɛ́ ɖě gbeɖé alɔdó Jexóva tɔn mɛvo ó. Énɛ́ jɛ wě ɖo ninɔmɛ ɖé mɛ hwenu e é hu Filisitɛ́ɛn 1000, bɔ kɔ xú i é. Étɛ́ é ka wa? É gán jɛ hlɔ̌nhlɔ́n éɖésúnɔ tɔn wú bá dó mɔ sin bo nu ǎ, é nyɔ́ wa ɔ, é sú xó ylɔ́ Jexóva bo byɔ́ alɔdó.—Hwɛ. 15:18.

9. Nɛ̌ Jexóva ka wa nǔ gbɔn hwenu e Sanmusɔ́ɔn sa vo n’i bo byɔ́ ɛ alɔdó é? (Hwɛɖɔtɔ́ lɛ́ 15:19)

⁹ Jexóva ná xósin nú xó e Sanmusɔ́ɔn sú ylɔ́ ɛ dó byɔ́ alɔdó é gbɔn nǔjíwǔ ɖé blóbló dó ná ɛ sin gblamɛ. Hwenu e Sanmusɔ́ɔn nu sin ɔ é ɔ, “hlɔ̌nhlɔ́n lɛ́ wá n’i.” (Xa Hwɛɖɔtɔ́ lɛ́ 15:19.) É cí ɖɔ tɔjɔtɛn yɔ̌yɔ́ énɛ́ kpo ɖo ayǐ káká jɛ hwenu e Jexóva sɔ́ dó ayi mɛ nú gbeyíɖɔ Samuwɛ́li bɔ é wlán wěma Hwɛɖɔtɔ́ lɛ́ tɔn, xwe mɔ̌kpán gúdo é ɖɔhun. Sin énɛ́ e ɖo sisa wɛ é sixú ko flín Izlayɛ́li ví lɛ́ ɖɔ yě hɛn ɔ, yě ná ɖeji ɖɔ Jexóva ná d’alɔ mɛsɛntɔ́ tɔn gbejínɔtɔ́ lɛ́ hwenu e yě ɖó hudó tɔn é.

10. Étɛ́ mǐ ka ɖó ná wa bo ná ɖu alɔdó Jexóva tɔn sín le? (Lɛ̌ kpɔ́n fɔtóo ɔ.)

¹⁰ Ényí mǐ lɔ ná bo ɖó nǔwúkpíkpé ɖěbǔ alǒ ko kpé wú bo wa nǔ ɖěbǔ ɖo sinsɛnzɔ́ Jexóva tɔn mɛ ɔ, é byɔ́ ɖɔ mǐ ní nɔ ba alɔdó Jexóva tɔn. Mǐ ɖó ná nɔ nɔ jlɛ̌ jí bo ná nɔ yí gbe ɖɔ ji jɛ́n mǐ sixú ɖe dó Jexóva wú cóbó ná ɖó ɖuɖéjí jɔ ɖuɖéjí ɔ. Lěe Sanmusɔ́ɔn mɔ hlɔ̌nhlɔ́n hwenu e é nu sin e Jexóva ná ɛ é gúdo gbɔn é ɔ, ényí mǐ lɔmɔ̌ nɔ ɖu le nǔ ɖěɖěe Jexóva sɔ́ nǔ tɔn nú mǐ lɛ́ é bǐ tɔn ɔ, mǐ ná mɔ hlɔ̌nhlɔ́n ɖo gbigbɔ lixo.—Mat. 11:28.

11. Nɛ̌ mǐ ka sixú ɖu alɔdó Jexóva tɔn sín le bǐ mlɛ́mlɛ́ gbɔn? Jlɛ̌ dó nǔɖé wú.

¹¹ Ð’ayi kpɔ́ndéwú Aleksey tɔn wú. É ɖo nɔví mǐtɔn ɖěɖěe ɖo Russie, bo ɖo didɛ wɛ ɖo yadónúmɛ syɛ́nsyɛ́n nu lɛ́ é mɛ. Étɛ́ ka d’alɔ ɛ bɔ é dɛ ɖo ninɔmɛ syɛ́nsyɛ́n lɛ́ nu? É kpó asi tɔn kpó tɛ́n kpɔ́n bɔ nǔ gbigbɔ tɔn e yě nɔ wa ayǐhɔ́ngbe ayǐhɔ́ngbe lɛ́ é sɛ do ǎ. É ɖɔ: “Un tɛ́n kpɔ́n bo kpo ɖo nǔ kplɔ́n wɛ nyiɖésúnɔ, lobo nɔ lɛ́ xa Biblu gbe bǐ gbe. Nyi kpó asi ce kpó nɔ bló tɛ́si zǎnzǎn lɛ́ bǐ, lobo nɔ lɛ́ nɔ kpɔ́ dó xo ɖɛ sɛ́dó Jexóva.” Étɛ́ énɛ́ ka kplɔ́n mǐ? Mǐ ɖó ná nɔ ɖeji dó mǐɖée wú ǎ, é nyɔ́ wa ɔ, mǐ ɖó ná nɔ gán jɛ Jexóva wú. Gbɔn nɛ̌ é? Gbɔn nǔ ɖěɖěe nɔ ná hlɔ̌nhlɔ́n nǔɖiɖi mǐtɔn lɛ́ é wiwa hwɛhwɛ gblamɛ; yě wɛ nyí: Biblu kplɔ́nkplɔ́n, ɖɛ xixo, kplé lɛ́ yiyi kpó mawuxó ɖiɖɔ kpó. Énɛ́ ɔ, Jexóva ná kɔn nyɔ̌ná dó gǎn e dó wɛ mǐ ɖe bo  ná sɛn ɛ é jí bɔ é ná túnflá. É ná hlɔ̌nhlɔ́n Sanmusɔ́ɔn, bɔ é ɖo wɛn ɖɔ, é sixú ná hlɔ̌nhlɔ́n mǐ lɔmɔ̌.

12. Gbeta nyanya tɛ́ kɔn Sanmusɔ́ɔn ka wá? Nɛ̌ kancícá e é ɖó xá Dalíla é ka gbɔn vo nú ée é ɖó jɛ nukɔn é gbɔn?

¹² Gbɛtɔ́ hwɛhutɔ́ mǐɖɔhun wɛ Sanmusɔ́ɔn nyí, énɛ́ wú ɔ, é wá gbeta nyanya lɛ́ kɔn hweɖélɛ́nu. Gbeta nyanya e kɔn é wá lɛ́ é ɖokpó dɔn ɛ dó hɔzɔ gěgé mɛ. Ée Sanmusɔ́ɔn wa hwɛɖɔtɔ́zɔ́ nú hwenu ɖé gúdo é ɔ, é “wá mɔ nyɔ̌nu ɖé bo yí wǎn n’i. Dalíla wɛ nyɔ̌nu ɔ nɔ nyí, bo nɔ nɔ Sɔlɛ́ku tɔdo mɛ.” (Hwɛ. 16:4) Sanmusɔ́ɔn ko da nyɔ̌nu Filisitɛ́ɛn ɖé ɖ’ayǐ; ‘Jexóva wɛ zé linlin énɛ́ ɔ dó ayi mɛ n’i . . . bo ná mɔ nǔɖé wú bo ɖó dó, bo ná dó ba xó Filisitɛ́ɛn lɛ́.’ Nukɔnmɛ ɔ, Sanmusɔ́ɔn yi nɔ agalɛtɔ́ ɖé xwé ɖo toxo Filisitɛ́ɛn lɛ́ tɔn e è nɔ ylɔ́ ɖɔ Gaza é mɛ. Ðo ninɔmɛ énɛ́ mɛ ɔ, Mawu ná hlɔ̌nhlɔ́n Sanmusɔ́ɔn bɔ é ɖe hɔntogbó toxo ɔ tɔn lɛ́ síin, bɔ énɛ́ zɔ́n bɔ toxo ɔ vɔ́ da. (Hwɛ. 14:1-4; 16:1-3) Amɔ̌, é cí ɖɔ Izlayɛ́li ví wɛ Dalíla nyí ɖɔhun, énɛ́ wú ɔ, xɔ́ntɔn e é zun xá ɛ é hun ali n’i bónú é ná fun ahwan xá Filisitɛ́ɛn lɛ́ ǎ.

13. Nɛ̌ Dalíla ka kun Sanmusɔ́ɔn yi dó hɔzɔ mɛ gbɔn?

¹³ Dalíla yí akwɛ́ wǒsúwósú ɖé ɖo Filisitɛ́ɛn lɛ́ sí bo ná dó jó Sanmusɔ́ɔn nú yě. Vlafo wǎnyíyí e Sanmusɔ́ɔn ɖó nú Dalíla é wɛ syɛ́n sɔmɔ̌ bɔ, é ma ka kpé wú bo ɖ’ayi nǔ e wa gbé Dalíla ja é wú ǎ a? Ðěbǔ wɛ é ná bo nyí gbɔn ɔ, Dalíla dó cɔcɔ nú Sanmusɔ́ɔn ɖɔ é ní ɖɔ fí e é nɔ mɔ hlɔ̌nhlɔ́n tɔn ɖe é nú émí, bɔ wǎgbɔ tɔn ɔ, Sanmusɔ́ɔn ɖɔ xomɛ n’i. É blá wǔ ɖɔ, afɔ énɛ́ e Sanmusɔ́ɔn ɖe nyi do é zɔ́n bɔ é ba hlɔ̌nhlɔ́n tɔn kpo, bɔ nǔ tɔn sɔ́ nyɔ́ Jexóva nukúnmɛ ǎ nú hwenu ɖé.—Hwɛ. 16:​16-20.

14. Wǔvɛ́ tɛ́ lɛ́ Sanmusɔ́ɔn ka se ɖó jiɖe e é ɖó dó Dalíla wú é wú?

¹⁴ Sanmusɔ́ɔn se xɔxɔ jiɖe e é ɖó dó Dalíla  wú, bɔ é ma nyí dó Jexóva wú ǎ é tɔn tawun. Filisitɛ́ɛn lɛ́ wlí i, bo tɔ́n nukún i. È sɔ́ ɛ sú dó Gaza, fí e mɛ e é dó winnyá ɖ’ayǐ lɛ́ é nɔ nɔ é, bɔ é nɔ ɖo nǔ li nú yě wɛ. Énɛ́ gúdo ɔ, Filisitɛ́ɛn lɛ́ kplá ɛ yi xwe yětɔn lɛ́ ɖě domɛ bo kɔ́n wi tɔn. Yě sá vɔ̌ gɛnnyigɛnnyi ɖé nú vodún yětɔn Dagɔ́ni, cí nǔ ɖɔ é wɛ jó Sanmusɔ́ɔn nú yě ɖɔhun. Yě kplá Sanmusɔ́ɔn sín gankpá mɛ “bónú é ná dó nǔkiko” nú yě.—Hwɛ. 16:​21-25.

15. Nɛ̌ Sanmusɔ́ɔn ka ɖe xlɛ́ ɖɔ émí lɛ́ vɔ́ jiɖe ɖó dó Jexóva wú gbɔn? (Hwɛɖɔtɔ́ lɛ́ 16:28-30) (Kpɔ́n ɖiɖe e ɖo akpa ɔ jí é.)

¹⁵ Sanmusɔ́ɔn ɖe afɔ syɛ́nsyɛ́n ɖé nyi do có, é ka jó gbe ǎ. É ba ali e nu é ná w’azɔ̌ e Mawu sɔ́ dó así n’i é ɖe é, énɛ́ wɛ nyí é ná fun ahwan xá Filisitɛ́ɛn lɛ́. (Xa Hwɛɖɔtɔ́ lɛ́ 16:​28-30.) Sanmusɔ́ɔn sa vo nú Jexóva ɖɔ: “Nǎ hlɔ̌nhlɔ́n mì . . . bónú má zé Filisitɛ́ɛn lɛ́ dó ba hlɔn.” Mawu nǔgbó ɔ ná xósin nú vo e Sanmusɔ́ɔn sa é, bo bló bɔ é lɛ́ ɖó hlɔ̌nhlɔ́n e é nɔ dó wa nǔjíwǔ ná é. Wǎgbɔ tɔn ɔ, ɖu e Sanmusɔ́ɔn ɖu ɖo Filisitɛ́ɛn lɛ́ jí gayɛnu é hú ɖu e é ko ɖu ɖo yě jí ɖ’ayǐ lɛ́ é bǐ.

16. Étɛ́ afɔ e Sanmusɔ́ɔn ɖe gbɔ é ka sixú kplɔ́n mǐ?

¹⁶ Sanmusɔ́ɔn se xɔxɔ afɔ e é ɖe gbɔ é tɔn tawun có, é ka kpé wú bo kpo ɖo jlǒ Jexóva tɔn wa wɛ. Ényí mǐ ná bo tlɛ ɖe afɔ gbɔ bɔ é byɔ́ ɖɔ è ní gbɛ́ nǔ nú mǐ, alǒ mǐ ná ba wǔjɔmɛzɔ́ ɖé kpo ɔ, mǐ ɖó ná jó gbe ǎ. Flín ɖɔ, Jexóva kún nɔ jó gbe dó mǐ wú ó. (Ðɛh. 103:​8-10) Nǔwanyido mǐtɔn lɛ́ hɛn ɔ yě ná kpo ɖo fínɛ́ có, mǐ ka hɛn ɔ, mǐ ná kpo ɖo alɔ jɛ nú Jexóva wɛ Sanmusɔ́ɔn ɖɔhun.

17-18. Étɛ́ a ka mɔ ɖo kpɔ́ndéwú Michael tɔn mɛ bɔ é dó wǔsyɛ́n lanmɛ nú we? (Lɛ̌ kpɔ́n fɔtóo ɔ.)

¹⁷ Ð’ayi kpɔ́ndéwú nɔví súnnu wínnyáwínnyá e nɔ nyí Michael é tɔn wú. Alɔnu tɔn nɔ ján tawun ɖo sinsɛnzɔ́ Jexóva tɔn mɛ; mɛsɛntɔ́ agun tɔn b wɛ n’i, bɔ é lɛ́ nyí gběxosín-alijítɔ́ hwebǐnu tɔn. Amɔ̌, é blá wǔ ɖɔ, é ɖe afɔ ɖé nyi do, bɔ énɛ́ zɔ́n bɔ é ba wǔjɔmɛzɔ́ e é ɖó ɖo agun ɔ mɛ lɛ́ é bǐ kpo. É ɖɔ: “Káká jɛ fí ɔ, alɔnu ce nɔ ján tawun ɖo sinsɛnzɔ́ Jexóva tɔn mɛ. Amɔ̌, ajijimɛ kpowun ɔ, é cí ɖɔ un kún sɔ́ sixú wa nǔtí ɖo sinsɛnzɔ́ Jexóva tɔn mɛ ó ɖɔhun. Un nɔ lin gbeɖé ɖɔ Jexóva ná ɖe alɔ sín kan ce mɛ ǎ. Amɔ̌, un nɔ ɖo kinkanbyɔ́ nyiɖée wɛ ɖɔ xɔ́ntɔn e nyi kpó é kpó zun é ka ná lɛ́ wá jɛ tɛn tɔn mɛ a jí. Alǒ, un ka ná lɛ́ wá kpé wú bo wa wǔjɔmɛzɔ́ lɛ́ ganjí ɖo agun ɔ mɛ lěe un ko nɔ kpé wú gbɔn ɖ’ayǐ é a jí.”

 ¹⁸ É su nukún mǐtɔn mɛ ɖɔ Michael kún jó gbe ó. É ɖɔ gɔ́ ná ɖɔ: “Un dó gǎn syɛ́nsyɛ́n bɔ nyi kpó Jexóva kpó vɛ́ gbɔn nǔ élɔ́ lɛ́ wiwa hwɛhwɛ gblamɛ: Ðɛ xixo sɛ́dó è, nǔ kplɔ́nkplɔ́n kpó tamɛ linlin kpó.” Hwenu ɖo yiyi wɛ é ɔ, Michael lɛ́vɔ́ wá ɖó wǔjɔmɛzɔ́ lɛ́ ɖo agun ɔ mɛ. Mɛxó agun tɔn wɛ é nyí din, bo lɛ́ nyí gběxosín-alijítɔ́ hwebǐnu tɔn. É ɖɔ: “Gǔdo e nɔví lɛ́ nɔ nú mì é kpó wǔsyɛ́n e yě dó lanmɛ nú mì é kpó, tají ɔ, wǔsyɛ́n e mɛxó agun tɔn lɛ́ dó lanmɛ nú mì é d’alɔ mì bɔ un mɔ ɖɔ Jexóva kpo ɖo wǎn yí nú mì wɛ. Un hɛn ɔ, un ná lɛ́ wa wǔjɔmɛzɔ́ lɛ́ ɖo agun ɔ mɛ kpó ayixa mímɛ́ ɖé kpó. Nǔ énɛ́ e jɛ dó jǐ ce é kplɔ́n mì ɖɔ Jexóva hɛn ɔ, é ná sɔ́ hwɛ kɛ mɛ ɖěbǔ e hwɛ tɔn lɛ́ vɛ́ ná nǔgbó nǔgbó é.” Ényí mǐ ná bo tlɛ wa nǔ nyi do bo ka wa nǔ e wú mǐ kpé é bǐ bo vɔ́ nǔ e mǐ wa nyi do lɛ́ é jlá ɖó, lobo kpo ɖo jiɖe ɖó dó Jexóva wú wɛ ɔ, mǐ sixú kú d’é jí ɖɔ, mǐ ná nyɔ́ zán n’i, bɔ é ná lɛ́ kɔn nyɔ̌ná dó mǐ jí.—Ðɛh. 86:5; Nǔx. 28:13.

19. Nɛ̌ kpɔ́ndéwú Sanmusɔ́ɔn tɔn ka dó wǔsyɛ́n lanmɛ nú we gbɔn?

¹⁹ Ðo xóta élɔ́ mɛ ɔ, mǐ gbéjé nǔ ɖěɖěe dɔn mɛ, bo jɛ ɖo gbɛzán Sanmusɔ́ɔn tɔn mɛ lɛ́ é kléwún ɖé kpɔ́n. Ényí mɛ maɖóblɔ̌ ǎ có, é jó gbe ɖo gǎn ɖěɖěe dó wɛ é ɖe bo ná sɛn Jexóva lɛ́ é nu ǎ, é ná bo tlɛ nyí hwenu e é ɖe afɔ nyi do ɖo ninɔmɛ Dalíla tɔn mɛ é ɔ nɛ́. Gɔ́ ná ɔ, Jexóva jó gbe dó wǔ tɔn ǎ. Mawu lɛ́ zán Sanmusɔ́ɔn ɖo ali jí wǔ ɖé nu. Jexóva kpo ɖo Sanmusɔ́ɔn mɔ dó mɔ nya nǔɖitɔ́ téwúngbéjú ɖé wɛ, bo yí gbe bɔ è wlán nyǐkɔ tɔn dó gbejínɔtɔ́ ɖěɖěe sín nyǐkɔ tɔ́n ɖo Eblée lɛ́ wěmata 11​gɔ́ ɔ mɛ lɛ́ é mɛ. Tuun e mǐ tuun ɖɔ Tɔ́ mǐtɔn jǐxwé tɔn wǎnyíyínɔ ɔ nɔ ɖo biba wɛ vɛ́návɛ́ná bo ná dó wǔsyɛ́n lanmɛ nú mǐ, tají ɔ, hwenu e gǎn vɔ ɖo mǐ wú é nɔ dó wǔsyɛ́n lanmɛ nú mǐ kpɔ́n! Énɛ́ wú ɔ, mi nú mǐ ní nɔ sa vo nú Jexóva Sanmusɔ́ɔn ɖɔhun ɖɔ: “Flín mì, áo! Mawu, lɛ̌ ná hlɔ̌nhlɔ́n mì.”—Hwɛ. 16:28.