1. Táan kléwún ɖé jɛ nukɔn nú kú Piyɛ́ɛ tɔn ɔ, étɛ́ Mawu ka sɔ́ d’ayi mɛ n’i bɔ é wa?

 MƐSƐ́DÓ Piyɛ́ɛ tuun ɖɔ émí ná kú malínmálín mɛ. Ðo xwe e é wa sinsɛnzɔ́ tɔn ná kpó gbejíninɔ kpó lɛ́ é bǐ mɛ ɔ, é zɔn xá Jezu, ɖɔ mawuxó gbɔn fí yɔ̌yɔ́ lɛ́, bo lɛ́ nɔ hǎgbɛ́ alixlɛ́mɛtɔ́ ɔ mɛ. Amɔ̌, sinsɛnzɔ́ Piyɛ́ɛ tɔn ko fó ǎ. Ðo xwe 62 jɛ 64 H.M. tɔn mɔ̌ ɔ, Mawu sɔ́ d’ayi mɛ n’i bɔ é wlán wěmasɛ́dómɛ we; yě wɛ nyí wěma Biblu tɔn e è nɔ ylɔ́ ɖɔ Piyɛ́ɛ 1tɔn kpó Piyɛ́ɛ 2gɔ́ ɔ kpó é. Piyɛ́ɛ ɖó nukún ɖɔ wěmasɛ́dómɛ we énɛ́ lɛ́ ná d’alɔ klisánwun lɛ́ ɖo kú émítɔn gúdo.—2 Pi. 1:12-15.

2. Étɛ́wú wěmasɛ́dómɛ Piyɛ́ɛ tɔn lɛ́ ka wá dó ganmɛ sɔmɔ̌?

² Hwenu e nǔɖitɔ́ hǎtɔ́ Piyɛ́ɛ tɔn lɛ́ ɖo “mɛtɛ́nkpɔ́n vovo lɛ́” mɔ wɛ é wɛ Mawu sɔ́ d’ayi mɛ n’i bɔ é wlán wěmasɛ́dómɛ tɔn lɛ́. (1 Pi. 1:6) Mɛ nyanya lɛ́ ɖo tíntɛ́nkpɔ́n wɛ bo ná dɔn adingban-núkplɔ́nmɛ lɛ́ kpó walɔ blíblí lɛ́ kpó dó agun ɔ mɛ. (2 Pi. 2:1, 2, 14) Klisánwun e ɖo Jeluzalɛ́mu lɛ́ é ná mɔ “vivɔnu nǔ lɛ́ bǐ tɔn,” énɛ́ wɛ nyí kún e ahwankpá Hlɔ̌ma tɔn ná sú dó nú toxo énɛ́ kpó Jwifu lɛ́ kpó é. (1 Pi. 4:7) É ɖo wɛn ɖɔ, wěmasɛ́dómɛ Piyɛ́ɛ tɔn lɛ́ d’alɔ klisánwun lɛ́ bɔ yě mɔ nǔ e yě sixú wa dó dɛ ɖo mɛtɛ́nkpɔ́n e mɔ wɛ yě ɖe din lɛ́ é kpó éé ná lɛ́ wá ɖo sɔgúdo lɛ́ é kpó nu é. b

3. Étɛ́wú mǐ ka ɖó ná gbéjé wěma e Mawu sɔ́ d’ayi mɛ nú Piyɛ́ɛ bɔ é wlán lɛ́ é kpɔ́n?

³ Klisánwun xwe kanweko nukɔntɔn ɔ tɔn lɛ́ wɛ Piyɛ́ɛ sɛ́ wěmasɛ́dómɛ tɔn lɛ́ dó có, Mawu bló bɔ wěmasɛ́dómɛ énɛ́ lɛ́ ɖo Xó tɔn mɛ. Énɛ́ wú ɔ, mǐ sixú ɖu le wěmasɛ́dómɛ énɛ́ lɛ́  tɔn din. (Hlɔ̌. 15:4) Ðó mǐ ɖo gbɛ e nɔ sɔ́ walɔ blíblí lɛ́ ɖ’ajo é mɛ wútu ɔ, mǐ lɔ nɔ gbɔn tagba ɖěɖěe sixú zɔ́n bɔ Jexóva sinsɛn ná vɛ́ wǔ nú mǐ lɛ́ é mɛ. Gɔ́ ná ɔ, ɖo malínmálín mɛ ɔ, mǐ ná gbɔn wǔvɛ́ ɖaxó éé syɛ́n hú éé ɖó nǔ gbɛ Jwifu lɛ́ tɔn nu é mɛ. Mǐ mɔ nǔflínmɛ tají ɖé lɛ́ ɖo wěmasɛ́dómɛ we Piyɛ́ɛ tɔn lɛ́ mɛ. Yě ná d’alɔ mǐ bɔ mǐ ná nɔ te kpɔ́n azǎn Jexóva tɔn, ɖu ɖo xɛsi ɖi nú gbɛtɔ́ jí, lobo lɛ́ tɛ́n kpɔ́n bo ɖó wǎnyíyí e gɔ́ngɔ́n é nú mǐɖée. Nǔflínmɛ mɔ̌hun lɛ́ sixú lɛ́ d’alɔ mɛxó agun tɔn lɛ́ bɔ yě ná mɔ lěe yě sixú kpé nukún dó hudó lɛ̌ngbɔ́kpó ɔ tɔn wú, bɔ é ná kpa yě gbɔn é.

4. Sɔgbe xá 2 Piyɛ́ɛ 3:3, 4 ɔ, étɛ́ ka sixú dán nǔɖiɖi mǐtɔn?

⁴ Mɛ ɖěɖěe ma ɖi nǔ nú nǔɖɔɖayǐ Biblu tɔn lɛ́ ǎ lɛ́ é wɛ lɛ́ lɛ̌ dó mǐ. Gbeklánxámɛtɔ́ lɛ́ sixú nɔ cá mǐ ko, ɖó mǐ ɖo nukún ɖó vivɔnu ɔ wɛ kpó akpakpa sɔ́ mɛ kpó sín xwe mɔ̌kpán ɖíe wú. Mɛɖé lɛ́ nɔ ɖɔ ɖɔ nǔ kún ná nyí mɔ̌ gbeɖé ó. (Xa 2 Piyɛ́ɛ 3:3, 4.) Ényí xwétɔ́ ɖé, azɔ̌gbɛ́ ɖé, alǒ mɛ e ɖo xwédo mǐtɔn mɛ é ɖé ɖɔ xó mɔ̌hun nú mǐ ɔ, énɛ́ sixú dán nǔɖiɖi mǐtɔn. Piyɛ́ɛ tínmɛ nǔ e sixú d’alɔ mǐ é.

5. Étɛ́ ka sixú d’alɔ mǐ bɔ mǐ ná kpo ɖo linlin e sɔgbe é ɖó dó vivɔnu gbɛ élɔ́ tɔn wú wɛ? (2 Piyɛ́ɛ 3:8, 9)

⁵ Mɛɖé lɛ́ sixú lin ɖɔ Jexóva ɖo lɛjɛlɛjɛ dán wɛ dó kún súsú dó nú gbɛ nyanya élɔ́ wú. Xó Piyɛ́ɛ tɔn lɛ́ sixú d’alɔ mǐ bɔ mǐ ná kpo ɖo linlin ɖagbe ɖó wɛ, lobo hɛn d’ayi mɛ ɖɔ linlin e Jexóva nɔ ɖó dó hwenu wú é gbɔn vo nú gbɛtɔ́ lɛ́ tɔn flaflá tɔn. (Xa 2 Piyɛ́ɛ 3:8, 9.) Azǎn ɖokpó ɖɔhun wɛ xwe afatɔ́n cí nú Jexóva. Jexóva ɖo suúlu ɖó wɛ, ɖó é ba ɖɔ mɛ ɖěbǔ ní dɔn ǎ. Amɔ̌, hwenu e azǎn Jexóva tɔn ná wá é ɔ, gbɛ élɔ́ sín xó ná fó. Wǔjɔmɛ ɖé wɛ é nyí ɖɔ mǐ ní zán hwenu e kpo é dó ɖe kúnnu nú mɛ e ɖo akɔta lɛ́ bǐ mɛ lɛ́ é.

6. Nɛ̌ mǐ ka sixú “hɛn” azǎn Jexóva tɔn “ayi mɛ ganjí” gbɔn? (2 Piyɛ́ɛ 3:11, 12)

⁶ Piyɛ́ɛ byɔ́ mǐ ɖɔ mǐ ní “hɛn” azǎn Jexóva tɔn “ayi mɛ ganjí.” (Xa 2 Piyɛ́ɛ 3:11, 12.) Nɛ̌ mǐ ka sixú wa énɛ́ gbɔn? É ná nyɔ́ ɖɔ ayǐhɔ́ngbe ayǐhɔ́ngbe ɔ, mǐ ní nɔ dó gǎn bo nɔ lin tamɛ dó nyɔ̌ná ɖěɖěe mǐ ná mɔ ɖo gbɛ yɔ̌yɔ́ ɔ mɛ lɛ́ é jí. Dǒ nukún mɛ kpɔ́n ɖɔ a ɖo jɔhɔn ɖagbe gbɔ́n d’awɔntín mɛ wɛ, ɖo nǔɖuɖu hunsin ɖagbe tɔn ɖu wɛ, ɖo doo dó nú mɛ vívɛ́ná towe e fɔ́n sín kú lɛ́ é wɛ, bo lɛ́ ɖo nǔ kplɔ́n mɛ ɖěɖěe ko kú sín xwe kanweko mɔ̌kpán ɖíe lobo fɔ́n sín kú lɛ́ é wɛ, dó nǔɖɔɖayǐ Biblu tɔn e ko jɛnu lɛ́ é wú. Tamɛ linlin mɔ̌hun ná d’alɔ we bɔ a ná kpo ɖo nukún ɖó nǔ wɛ, bo lɛ́ kú d’é jí ɖɔ azǎn gǔdo gúdo tɔn lɛ́ mɛ nɔ gbɛ ɖe wɛ mǐ ɖe. Ðó “[mǐ] ko tuun nǔ énɛ́ lɛ́ dó nukɔn wútu ɔ,” mǐ ná “zɛ gbě” ɖó adingban-núkplɔ́nmɛ lɛ́ wú ǎ.—2 Pi. 3:17.

7. Nɛ̌ xɛsi ɖi nú gbɛtɔ́ ka sixú wa nǔ dó mǐ wú gbɔn?

⁷ Ényí mǐ hɛn azǎn Jexóva tɔn ayi mɛ ganjí ɔ, é nɔ sísɛ́ mǐ bɔ mǐ nɔ jlá wɛn ɖagbe ɔ mɛ ɖěvo lɛ́. Amɔ̌, hweɖélɛ́nu ɔ, xɛsi sixú ɖi mǐ bɔ mǐ gɔn xó ɖɔ. Aniwú? Xɛsi ɖi nú gbɛtɔ́ sixú wa nǔ dó mǐ wú nú hwenu ɖé. Nǔ e xá Piyɛ́ɛ é nɛ́. Ðo zǎn e mɛ è wlí Jezu é ɔ, Piyɛ́ɛ ɖi xɛsi dó ɖiɖɔ ɖɔ émí nyí ahwanvú Jezu tɔn wú, bo tlɛ gbɛ́ azɔn mɔ̌kpán ɖɔ émí kún tuun i ó. (Mat. 26:69-75) Amɔ̌, mɛsɛ́dó ɖokpó énɛ́ ɔ lɛ́vɔ́ wá ɖɔ xó élɔ́ kpó jiɖiɖe kpó ɖo nukɔnmɛ: “Xɛsi ní ma ɖi mi dó nǔ e nɔ dó xɛsi yě lɛ́ é wú ó, ayi mitɔn ní ma gba dó ó.” (1 Pi. 3:14) Xógbe Piyɛ́ɛ tɔn lɛ́ ná mǐ gǎnjɛwú ɖɔ mǐ sixú ɖu ɖo xɛsi ɖi nú gbɛtɔ́ jí.

8. Étɛ́ ka sixú d’alɔ mǐ bɔ mǐ ná ɖu ɖo xɛsi ɖi nú gbɛtɔ́ jí? (1 Piyɛ́ɛ 3:15)

⁸ Étɛ́ ka sixú d’alɔ mǐ bɔ mǐ ná ɖu ɖo xɛsi ɖi nú gbɛtɔ́ jí? Piyɛ́ɛ ɖɔ nú mǐ ɖɔ: “Mi ní tuun dó ayi mitɔn mɛ ɖɔ Klísu nyí Aklúnɔ bo nyí  mɛ mímɛ́.” (Xa 1 Piyɛ́ɛ 3:15.) Mǐ sixú nɔ flín nǔ mǐɖée ɖɔ Jezu Klísu wɛ nyí Axɔ́sú mǐtɔn, bo ka ɖó hlɔ̌nhlɔ́n aditi. Ényí a nɔ mɔ ɖɔ ado nɔ hu émí, alǒ xɛsi nɔ ɖi émí hwenu e ali ɔ hun bɔ a ná jlá wɛn ɖagbe ɔ mɛ ɖěvo lɛ́ é hǔn, nɔ flín Axɔ́sú mǐtɔn. Dǒ nukún mɛ kpɔ́n ɖɔ é ɖo acɛ kpa wɛ ɖo jǐxwé, bɔ wɛnsagun wɔ̌blíwɔ̌va lɛ́ lɛ́ lɛ̌ dó è. Flín ɖɔ è ko ná ɛ “acɛ lɛ́ bǐ ɖo jǐxwé kpó ayǐkúngban jí kpó,” bɔ é ná ɖo “kpɔ́ xá [we] ɖo azǎn lɛ́ bǐ jí, káká jɛ azǎn gǔdo gúdo tɔn gbɛ élɔ́ tɔn lɛ́ mɛ.” (Mat. 28:18-20) Piyɛ́ɛ byɔ́ mǐ ɖɔ mǐ ní ɖo “gbesisɔmɛ hwebǐnu” bá jɛ hun dó nǔɖiɖi mǐtɔn jí. A ka ɖo gbesisɔmɛ bo ná ɖe kúnnu ɖo azɔ̌mɛ, ɖo wěmaxɔmɛ, alǒ ɖo fí ɖěbǔ e a ɖe é a? Lin tamɛ dó hwenu e a sixú kpé wú bo wa mɔ̌ é jí jɛ nukɔn, énɛ́ gúdo hǔn, sɔ́ nǔ ɖ’ayǐ nú nǔ e a ná ɖɔ é. Xo ɖɛ bo byɔ́ akɔ́nkpinkpan, lobo ɖeji ɖɔ Jexóva ná d’alɔ we bɔ a ná ɖu ɖo xɛsi ɖi nú gbɛtɔ́ jí.—Mɛ. 4:29.

9. Ðo ninɔmɛ ɖé mɛ ɔ, nɛ̌ Piyɛ́ɛ ma ka kpé wú bo ɖe wǎnyíyí xlɛ́ ǎ gbɔn? (Lɛ̌ kpɔ́n ɖiɖe ɔ.)

⁹ Piyɛ́ɛ kplɔ́n lěe è sixú ɖe wǎnyíyí xlɛ́ gbɔn é. É ɖo fínɛ́ hwenu e Jezu ɖɔ xó élɔ́ lɛ́ é: “Un ɖo sɛ́n yɔ̌yɔ́ ɖokpó ná mi wɛ, é wɛ nyí ɖɔ mi ní yí wǎn nú miɖée lɛ́; lěe un yí wǎn nú mi gbɔn é ɔ, mi lɔ ní yí wǎn nú miɖée lɛ́ gbɔn mɔ̌.” (Jaan 13:34) Nǔ ɖo mɔ̌ có, Piyɛ́ɛ wá jɛ kɔgbídínúmɛ sín mɔ mɛ ɖo nukɔnmɛ, bo gbɛ́ ɖɔ émí kún sɔ́ ná ɖu nǔ xá nɔví  ɖěɖěe ma nyí Jwifu ǎ lɛ́ é ó. Pɔ́lu ylɔ́ nǔ énɛ́ e Piyɛ́ɛ wa é ɖɔ “yɛmɛnúwiwa.” (Ga. 2:11-14) Piyɛ́ɛ yí gbe nú nǔgbɛ́númɛ ɔ, bɔ é lɛ́ kplɔ́n nǔ i. Ðo wěma we e é wlán lɛ́ é bǐ mɛ ɔ, é tɛ ɖɛ̌ jí ɖɔ mǐ kún ɖó ná yí wǎn nú nɔví mǐtɔn lɛ́ ɖo ayi mɛ kpowun ó, loɔ, mǐ ɖó ná lɛ́ ɖe wǎnyíyí mɔ̌hun xlɛ́.

10. Étɛ́ ka nɔ zɔ́n bɔ è nɔ ɖó “wǎnyíyí nɔví nɔví tɔn e ma nyí yɛmɛnúwiwa tɔn ǎ é”? Tínmɛ. (1 Piyɛ́ɛ 1:22)

¹⁰ Piyɛ́ɛ ɖɔ ɖɔ mǐ ɖó ná ɖó “wǎnyíyí nɔví nɔví tɔn e ma nyí yɛmɛnúwiwa tɔn ǎ é” nú nǔɖitɔ́ hǎtɔ́ mǐtɔn lɛ́. (Xa 1 Piyɛ́ɛ 1:22.) “Tónúsise nú nǔgbó ɔ” wɛ nɔ zɔ́n bɔ è nɔ ɖó wǎnyíyí mɔ̌hun. Nǔkplɔ́nmɛ e ɖɔ ɖɔ “Mawu kún nɔ ɖe mɛɖé ɖó vo ɖo mɛɖé mɛ ó” é ɖo nǔgbó énɛ́ mɛ. (Mɛ. 10:34, 35) Ényí mǐ nɔ ɖe wǎnyíyí xlɛ́ mɛɖé lɛ́ ɖo agun ɔ mɛ, bo ma ka nɔ ɖe wǎnyíyí xlɛ́ mɛ ɖěvo lɛ́ ǎ ɔ, mǐ sixú ɖɔ ɖɔ mǐ ɖo tónú se nú gbe e Jezu ɖe nú mǐ ɖɔ mǐ ní yí wǎn nú mǐɖée lɛ́ é wɛ ǎ. É ɖo wɛn ɖɔ, mǐ sixú mɔ ɖɔ mǐ kpó mɛɖé lɛ́ kpó vɛ́ tawun hú mɛ ɖěvo lɛ́, lěe é nyí gbɔn nú Jezu é ɖɔhun. (Jaan 13:23; 20:2) Amɔ̌, Piyɛ́ɛ flín mǐ ɖɔ mǐ ɖó ná tɛ́n kpɔ́n bo yí wǎn nú “kplékplé nɔví lɛ́ tɔn,” énɛ́ wɛ nyí, mǐ ná tɛ́ dó yě wú xwédo ɖé ɖɔhun.—1 Pi. 2:17.

11. Étɛ́ wǎnyíyí ‘ɖaxó ɖíɖó nú mɛ ɖěvo lɛ́ sín ayi mɛ’ ka nɔ byɔ́?

¹¹ Piyɛ́ɛ byɔ́ mǐ ɖɔ mǐ ní yí “wǎn ɖaxó nú mɛ sín ayi mɛ.” Ðo ninɔmɛ élɔ́ mɛ ɔ, wǎnyíyí “ɖaxó” ɔ sín tínmɛ wɛ nyí è ní yí wǎn nú mɛɖé, ényí é ná bo tlɛ vɛ́ wǔ bɔ è ná ɖe wǎnyíyí xlɛ́ ɛ ɔ nɛ́. Ði kpɔ́ndéwú ɔ, ényí nɔví ɖé wa nǔ nyi do nú mǐ, alǒ dó xomɛsin nú mǐ ɔ ka lo? Ðo bǐbɛ́mɛ ɔ, mǐ sixú ba ná ba hlɔn, bo ná ba ná ɖe wǎnyíyí xlɛ́ ɛ ǎ. Amɔ̌, Jezu kplɔ́n Piyɛ́ɛ ɖɔ Mawu kún yí wǎn nú hlɔnbiba ó. (Jaan 18:10, 11) Piyɛ́ɛ wlán ɖɔ: “Mi ma sɔ́ nyanya dó sú nyanya xɔ́ ná ó, mi ma sɔ́ zun dó sú zun xɔ́ ná ó. É nyɔ́ wa hǔn, mi nɔ xo nyɔ̌ná ɖɛ dó sú axɔ́ ná.” (1 Pi. 3:9) Tɛ́n kpɔ́n bónú wǎnyíyí ɖaxó ní sísɛ́ we nú a nɔ nyɔ́ xomɛ, bo nɔ lɛ́ ké ya nú mɛ ɖěɖěe tlɛ ko dó xomɛsin nú we lɛ́ é.

12. (a) Nǔ ɖěvo tɛ́ wǎnyíyí e gɔ́ngɔ́n é ka nɔ sísɛ́ mǐ bɔ mǐ nɔ wa? (b) Lěe è ɖɔ gbɔn ɖo video Wlebòna Nunina Họakuẹ Pọninọ Tọn ɔ mɛ é ɔ, étɛ́ a ka jló ná tɛ́n kpɔ́n bá wa?

¹² Ðo wěma nukɔntɔn e Piyɛ́ɛ wlán é mɛ ɔ, é zán xógbe “wǎnyíyí e gɔ́ngɔ́n é.” Wǎnyíyí mɔ̌hun nɔ cyɔ́n nǔ dó hwɛ, é ka nyí kpɛɖé ǎ, loɔ, “wɔ̌búwɔ́bú.” (1 Pi. 4:8) Bóyá Piyɛ́ɛ flín nǔ e Jezu kplɔ́n ɛ dó hwɛsɔ́kɛmɛ wú xwe ɖé lɛ́ ɖíe é. Hwenu e Piyɛ́ɛ ɖɔ ɖɔ émí ná sɔ́ hwɛ kɛ nɔví émítɔn “azɔn tɛ́nwe” é ɔ, é sixú ko lin ɖɔ ényí émí wa mɔ̌ hǔn, nǔgɛ́n wɛ émí wa; mɔ̌ wɛ nǔ sixú ko nɔ cí n’i hwe ɔ nu. Amɔ̌, Jezu kplɔ́n ɛ, é ka nyí éɖokpónɔ ǎ, loɔ, mǐ lɔmɔ̌ ɖɔ mǐ ɖó ná nɔ sɔ́ hwɛ kɛ mɛ “azɔn 77”; tínmɛ énɛ́ tɔn wɛ nyí ɖɔ hwɛsɔ́kɛmɛ mǐtɔn ɖó ná ɖó dogbó ǎ. (Mat. 18:21, 22) Ényí é nɔ vɛ́ wǔ nú we bónú a ná xwedó wěɖexámɛ énɛ́ hǔn, ma nú awakanmɛ kú we ó! Ðó hwɛhutɔ́ wɛ mɛsɛntɔ́ Jexóva tɔn lɛ́ nyí wútu ɔ, é nɔ vɛ́ wǔ nú yě hweɖélɛ́nu bónú yě ná sɔ́ hwɛ kɛ mɛ. Nǔ e ɖo tají din bɔ a sixú wa é wɛ nyí ɖɔ a ní wa nǔ e wú a kpé é bǐ bo sɔ́ hwɛ kɛ nɔví towe, lobo nɔ fífá mɛ xá ɛ. c

13. Étɛ́ ka sixú zɔ́n bɔ nukún kpíkpé dó nɔví lɛ́ wú ná vɛ́ wǔ nú mɛxó agun tɔn lɛ́?

¹³ É ɖo wɛn ɖɔ, Piyɛ́ɛ kún wɔn nǔ élɔ́ e Jezu ɖɔ n’i ɖo fínfɔ́n sín kú tɔn gúdo é gbeɖé ó: “Kpé nukún dó lɛ̌ngbɔ́ví ce lɛ́ wú.” (Jaan 21:16) Ényí mɛxó agun tɔn wɛ nú we ɔ, a tuun ɖɔ wěɖexámɛ énɛ́ lɛ́ kan hwi lɔ. Amɔ̌, é sixú vɛ́ wǔ bɔ mɛxó agun tɔn ɖé ná mɔ hwenu bo wa azɔ̌ tají énɛ́. Mɛxó agun tɔn lɛ́ ɖó ná tó kpé nukún dó xwédo yěɖésúnɔ tɔn lɛ́ wú ɖo  agbaza, lěe nǔ nɔ cí nú mɛ é kpó gbigbɔ kpó lixo hwɛ̌. Yě ɖó ná lɛ́ nɔ nukɔn nú mawuxóɖiɖɔzɔ́ ɔ, bo ná nɔ lɛ́ sɔ́ nǔ nú azɔ̌ e yě ɖó ɖo kplé lɛ́ kpó kpléɖókpɔ́ lɛ́ kpó jí lɛ́ é, lobo lɛ́ xwlé yě mɛ. Yě mɛ ɖé lɛ́ lɛ́vɔ́ ɖo Wěɖegbɛ́ e nɔ kpé nukún dó dotóoxwéxó lɛ́ wú lɛ́ é mɛ, alǒ nɔ d’alɔ Azɔ̌xɔsá e nɔ bló tuto xɔgbígbá tɔn ɖo alaxɔ mɛ é. Nǔgbó ɔ, mɛxó agun tɔn lɛ́ sín alɔnu nɔ ján tawun!

14. Étɛ́ ka sixú sísɛ́ mɛxó agun tɔn lɛ́ bɔ yě ná kpé nukún dó lɛ̌ngbɔ́kpó ɔ wú? (1 Piyɛ́ɛ 5:1-4)

¹⁴ Piyɛ́ɛ byɔ́ nǔ élɔ́ mɛxó agun tɔn gbɛ̌ tɔn lɛ́: “Mi nyi lɛ̌ngbɔ́ Mawu tɔn” lɛ́. (Xa 1 Piyɛ́ɛ 5:1-4.) Ényí mɛxó agun tɔn ɖé wɛ nú we ɔ, mǐ tuun ɖɔ a yí wǎn nú nɔví towe lɛ́, bo ba ná kpé nukún dó yě wú. Amɔ̌, hweɖélɛ́nu ɔ, a sixú nɔ mɔ ɖɔ alɔnu émítɔn ján dín, alǒ nǔ ci kɔ nú émí dín bɔ émí kún sixú kpé azɔ̌ énɛ́ wú bo wa ó. Étɛ́ a ka sixú wa? Ðɔ lěe nǔ cí nú we é nú Jexóva. Piyɛ́ɛ wlán ɖɔ: “Ényí mɛɖé ɖo sinsɛnzɔ́ wa wɛ hǔn, é ní gán jɛ hlɔ̌nhlɔ́n e Mawu nɔ ná mɛ é wú.” (1 Pi. 4:11) Nɔví towe lɛ́ sixú wá gbɔn tagba e è ma sixú ɖe ɖɛ bǐ mlɛ́mlɛ́ ɖo gbɛ élɔ́ mɛ din ǎ lɛ́ é mɛ. Amɔ̌, flín ɖɔ Jezu Klísu e nyí “lɛ̌ngbɔ́nyitɔ́gán” ɔ é sixú wa nǔ zɛ nǔ e hwɛ sixú wa dó d’alɔ yě é wú. É hɛn ɔ, é ná d’alɔ yě din, bo lɛ́ d’alɔ yě ɖo gbɛ yɔ̌yɔ́ ɔ mɛ. Nǔ e Mawu byɔ́ mɛxó agun tɔn lɛ́ kpowun é wɛ nyí ɖɔ, yě ní yí wǎn nú nɔví yětɔn lɛ́, kpé nukún dó yě wú, lobo lɛ́ nyí “kpɔ́ndéwú nú lɛ̌ngbɔ́hwan ɔ.”

15. Nɛ̌ mɛxó agun tɔn ɖé ka nɔ kpé nukún dó lɛ̌ngbɔ́kpó ɔ wú gbɔn? (Lɛ̌ kpɔ́n ɖiɖe ɔ.)

¹⁵ William e nyí mɛxó agun tɔn sín hwenu línlín ɖíe é mɔ nukúnnú jɛ lě do nukún kpíkpé dó lɛ̌ngbɔ́ lɛ́ wú ɖo tají sɔ é mɛ. Ée jɛmɛjí Covid-19 bɛ́ é ɔ, é kpó mɛxó agun tɔn gbɛ̌ tɔn lɛ́ kpó bló tuto, bo nɔ ylɔ́ mɛ e ɖo gbɛ̌ta kúnnuɖegbé tɔn yětɔn mɛ lɛ́ é ɖokpó ɖokpó, ɖo aklúnɔzángbla lɛ́ bǐ mɛ. É tínmɛ nǔ e wú wɛ é gbɔn lě: “Nɔví lɛ́ gěgé tíin bɔ yěɖokpónɔ wɛ ɖo xwégbe, bɔ bléwún jɛ́n yě sixú jɛ linlin masɔgbe lɛ́ ɖó jí.” Ényí nǔɖitɔ́ hǎtɔ́ ɖé ɖo tagba ɖé mɛ gbɔn wɛ ɔ, William nɔ ɖótó è kpó sɔxwixwe kpó, bo ná dó tuun hudó tɔn lɛ́, alǒ nǔ e ɖo adohu adohu ɖó n’i wɛ lɛ́ é. Énɛ́ gúdo ɔ, é nɔ tɛ́n kpɔ́n bo nɔ ba wěma alǒ video e ɖo tɛn Ɛntɛnɛ́ti tɔn mǐtɔn jí, bo sixú dó wǔsyɛ́n lanmɛ nú nǔɖitɔ́ hǎtɔ́ tɔn é. É ɖ’ayi nǔ élɔ́ wú: “Nukún kpíkpé dó lɛ̌ngbɔ́ lɛ́ wú ɖo tají tawun din hú ɖ’ayǐ tɔn. Mǐ nɔ wa nǔ e wú mǐ kpé é bǐ dó d’alɔ mɛ lɛ́ bónú yě ná  kplɔ́n nǔ dó Jexóva wú; é byɔ́ ɖɔ mǐ ní dó gǎn ɖokpó ɔ lɛ́ bo kpé nukún dó lɛ̌ngbɔ́ Jexóva tɔn lɛ́ wú, ɛɛn, mǐ ná d’alɔ yě, bɔ yě ná kpo ɖo nǔgbó ɔ mɛ.”

16. Ali tɛ́ lɛ́ nu mǐ ka sixú zán nǔkplɔ́nmɛ e mǐ mɔ ɖo wěmasɛ́dómɛ Piyɛ́ɛ tɔn lɛ́ mɛ lɛ́ é ɖe?

¹⁶ Nǔkplɔ́nmɛ e ɖo wěma we e Mawu sɔ́ d’ayi mɛ nú Piyɛ́ɛ b’ɛ wlán lɛ́ é mɛ lɛ́ é kléwún ɖé jí jɛ́n mǐ ɖɔ xó dó. Bóyá, a sixú ko ɖó ayi ali e nu é byɔ́ ɖɔ a ní w’azɔ̌ d’é jí ɖe é ɖé wú. Ði kpɔ́ndéwú ɔ, a hɛn ɔ, a ná nɔ lin tamɛ dó nyɔ̌ná ɖěɖěe gbɛ mavɔmavɔ ɔ ná hɛn wa lɛ́ é jí hwɛhwɛ hú gǎn. A sixú nɔ nya nǔ lěhun lɛ́ gbé: Kúnnuɖiɖe ɖo azɔ̌ jí, ɖo wěmaxɔmɛ, alǒ ɖo fí ɖěvo ɖěbǔ. Tɛ́n kpɔ́n bo ba ali ɖěɖěe nu a sixú ɖe wǎnyíyí e gɔ́ngɔ́n é xlɛ́ nɔví lɛ́ d’é jí ɖe lɛ́ é. Mɛxó agun tɔn lɛ́ mi, mi ka kán ɖ’é jí, bo ná nyi lɛ̌ngbɔ́ Jexóva tɔn lɛ́ kpó jlǒ kpó lobo lɛ́ wa mɔ̌ kpó akpakpa sɔ́ mɛ kpó a? Ényí a gbéjé hwiɖée kpɔ́n nǔgbó nǔgbó ɔ, a sixú ɖó ayi gǎnmaɖó ɖé lɛ́ wú, amɔ̌, ma nú awakanmɛ kú we ó. “Aklúnɔ nɔ nyɔ́ xomɛ,” bo ná d’alɔ we bɔ a ná kpɔ́n te d’é jí. (1 Pi. 2:3) Piyɛ́ɛ ná mǐ gǎnjɛwú élɔ́: “Mawu . . . ɖésúnɔ ná kplɔ́n azɔ̌ mi mlɛ́mlɛ́. É ná bló bɔ mi ná lí dǒ, é ná bló bɔ mi ná ɖó hlɔ̌nhlɔ́n, é ná dó mi do nyi dodónú syɛ́nsyɛ́n jí.”—1 Pi. 5:10.

17. Ényí mǐ nɔ ɖó kan dó nǔ wú, bo lɛ́ yí gbe bɔ Jexóva kplɔ́n azɔ̌ mǐ ɔ, étɛ́ mɛ é ka ná tɔ́n kɔ dó?

¹⁷ Ðo bǐbɛ́mɛ ɔ, Piyɛ́ɛ lin ɖɔ émí kún sixú nɔ kpɔ́ xá Mawuví ɔ ó. (Luk. 5:8) Amɔ̌, ɖó gǔdo e Jexóva kpó Jezu kpó nɔ nú Piyɛ́ɛ kpó wǎnyíyí kpó é wútu ɔ, é xwedó Jezu kpó gbejíninɔ kpó. Énɛ́ wú ɔ, Jexóva yí gbe bɔ Piyɛ́ɛ ná “byɔ́ Axɔ́súɖuto mavɔmavɔ Aklúnɔ mǐtɔn kpó Hwlɛngántɔ́ mǐtɔn Jezu Klísu kpó tɔn mɛ.” (2 Pi. 1:11) Ajɔ ɖaxó ɖé wɛ nyí énɛ́! Ényí a ɖó kan dó nǔ wú Piyɛ́ɛ ɖɔhun, bo lɛ́ yí gbe bɔ Jexóva kplɔ́n azɔ̌ we ɔ, è ná zé gbɛ mavɔmavɔ dó d’ajɔ hwi lɔ. A ná “mɔ nǔ e wú [a] ɖi nǔ é yí, é wɛ nyí hwlɛngán [towe].”—1 Pi. 1:9.