1-2. Étɛ́ ka nɔ zɔ́n bɔ mɛsɛntɔ́ Mawu tɔn lɛ́ nɔ j’awǎ? (Jaki 1:22-25)

 JEXÓVA kpó Vǐ vívɛ́ná tɔn kpó ba ɖɔ mǐ ní ɖó awǎjijɛ. Mɛ e wlán Ðɛhan 119:2 é ɖɔ: “Nǔ nyɔ́ nú mɛ e nɔ nyi sɛ́n tɔn lɛ́, mɛ e nɔ ba ɛ kpó ayi yětɔn bǐ kpó lɛ́.” Jezu ɖɔ: “Awǎjijɛnɔ wɛ nyí mɛ e nɔ se xó Mawu tɔn, bo nɔ bló ɖ’é jí lɛ́ é!”—Luk. 11:28.

² Togun awǎjijɛnɔ ɖé wɛ mɛsɛntɔ́ Jexóva tɔn lɛ́ nyí. Étɛ́wú? Hwɛjijɔ gěgé wú wɛ, amɔ̌, tají ɖokpó wɛ nyí ɖɔ mǐ nɔ xa Xó Mawu tɔn ɖo gbesisɔmɛ, bo nɔ dó gǎn lobo nɔ zán nǔ e mǐ kplɔ́n é.—Xa Jaki 1:22-25.

3. Ényí mǐ zán nǔ e mǐ xa ɖo Xó Mawu tɔn mɛ lɛ́ é ɔ, le tɛ́ lɛ́ é ka nɔ hɛn wá nú mǐ?

³ Ényí mǐ “nɔ bló ɖó xó ɔ jí” ɔ, ali gěgé nu wɛ é nɔ hɛn le wá nú mǐ ɖe. Ði kpɔ́ndéwú ɔ, ényí mǐ nɔ zán nǔ e mǐ nɔ kplɔ́n ɖo Xó Mawu tɔn mɛ lɛ́ é ɔ, nǔ mǐtɔn nɔ nyɔ́ Mawu nukúnmɛ, bɔ énɛ́ nɔ ná awǎjijɛ mǐ. (Nǔt. 12:13) Ényí mǐ nɔ zán nǔ e mǐ xa ɖo Xó Mawu tɔn e é sɔ́ d’ayi mɛ nú mɛ bɔ è wlán é mɛ é ɔ, gbɛzán xwédo tɔn mǐtɔn nɔ kpɔ́n te d’é jí, bɔ mǐ nɔ lɛ́ ná hlɔ̌nhlɔ́n xɔ́ntɔn e mǐ zun xá nǔɖitɔ́ hǎtɔ́ mǐtɔn lɛ́ é. Énɛ́ ná ko jɛ wě ɖo gbɛzán towe mɛ. Gɔ́ ná ɔ, mǐ nɔ lɛ́ nyi alɔ nú awě tobutóbú e nɔ xo mɛ ɖěɖěe ma nɔ se tónú nú Jexóva ǎ lɛ́ é. Nǔgbó ɔ, mǐ yí gbe nú xó e axɔ́sú Davídi ɖɔ é. Ée é ɖɔ xó dó  sɛ́n, gbetakɛ́n kpó hwɛɖiɖɔ kpó Jexóva tɔn lɛ́ wú ɖo han mɛ gúdo é ɔ, é sú ta ná ɖɔ: “Mɛ e nɔ xwedó nǔ e a ɖɔ lɛ́ ɔ, le e yě nɔ mɔ ɖ’é mɛ ɔ d’agba.”—Ðɛh. 19:8-12.

4. Étɛ́wú é ka nɔ vɛ́ wǔ bɔ è ná nɔ bló ɖó Xó Mawu tɔn jí?

⁴ È ná ɖɔ xójɔxó ɔ, é nɔ bɔ wǔ nú mǐ hwebǐnu bónú mǐ ná xa Xó Mawu tɔn bo lɛ́ bló ɖ’é jí ǎ. Alɔnu mǐtɔn nɔ ján tawun có, mǐ ɖó ná nɔ ba hwenu bo ná nɔ xa Xó Mawu tɔn bo lɛ́ kplɔ́n bá dó mɔ nukúnnú jɛ nǔ e Jexóva ba ɖɔ mǐ ní wa é wú. Énɛ́ wú ɔ, mi nú mǐ ní gbéjé wěɖexámɛ e sixú d’alɔ mǐ bɔ mǐ ná nɔ xa Biblu ɖo gbesisɔmɛ lɛ́ é ɖé lɛ́ kpɔ́n. Mǐ ná lɛ́ gbéjé nǔ e ná d’alɔ mǐ bɔ mǐ ná nɔ lin tamɛ dó nǔ e mǐ xa é jí é kpɔ́n, bo ná lɛ́ mɔ ali ɖěɖěe nu mǐ sixú zán nǔ e mǐ kplɔ́n lɛ́ é ɖe ɖo gbɛzán mǐtɔn mɛ lɛ́ é.

NƆ ÐE HWENU ÐÓ VO BÁ DÓ XA XÓ MAWU TƆN

5. Azɔ̌ tɛ́ lɛ́ ka nɔ ɖu hwenu gěgé ɖo mǐ sí?

⁵ Gěgé mɛ e ɖo togun Jexóva tɔn mɛ lɛ́ é tɔn sín alɔnu nɔ ján tawun. Mǐ nɔ zán hwenu gěgé ɖo azɔ̌ ɖěɖěe Biblu ɖɔ ɖɔ yě ɖo tají lɛ́ é kɔn. Ði kpɔ́ndéwú ɔ, gěgé mǐtɔn nɔ wa agbazazɔ́ bá dó kpé nukún dó hudó mǐɖésúnɔ kpó xwédo mǐtɔn kpó tɔn lɛ́ wú. (1 Tim. 5:8) Klisánwun gěgé nɔ kpé nukún dó hɛ̌nnumɔ yětɔn e ɖo azɔn jɛ wɛ, alǒ ko nyí mɛxómɔ lɛ́ é wú. Gɔ́ ná ɔ, mǐ mɛ bǐ wɛ ɖó ná nɔ kpé nukún dó mǐɖée wú ɖo lanmɛ ná nɔ ganjí kpáxwé, é ka nɔ byɔ́ hwenu. Gɔ́ nú azɔ̌ énɛ́ lɛ́ ɔ, mǐ lɛ́ ɖó azɔ̌ bo ná wa ɖo agun ɔ mɛ. Azɔ̌ tají ɖokpó wɛ nyí ɖɔ mǐ ní wa nǔ e wú mǐ kpé é bǐ bo jlá wɛn ɖagbe ɔ. Kpó nǔ tobutóbú énɛ́ lɛ́ e a ɖó ná wa lɛ́ é bǐ kpó ɔ, nɛ̌ a ka sixú lɛ́ mɔ hwenu bo xa Biblu ɖo gbesisɔmɛ, lin tamɛ dó nǔ e a xa é jí, bo lɛ́ zán nǔ e é ɖɔ é gbɔn?

6. Nɛ̌ a ka sixú sɔ́ Biblu xixa ɖó tɛn nukɔntɔn ɔ mɛ gbɔn? (Kpɔ́n ɖiɖe ɔ lɔmɔ̌.)

⁶ Biblu xixa nyí ɖokpó ɖo “nǔ e nyí nǔ tají hú gǎn” nú klisánwun lɛ́ é mɛ. Énɛ́ wú ɔ, mǐ ɖó ná sɔ́ ɛ ɖó tɛn nukɔntɔn ɔ mɛ. (Filí. 1:10) Ðɛhan nukɔntɔn ɔ ɖɔ dó mɛ e nǔ nyɔ́ ná é wú ɖɔ: ‘Nǔ e é nɔ yí wǎn ná ɔ wɛ nyí kplɔ́n Jexóva tɔn, bo nɔ ɖo tamɛ lin d’é wú wɛ zǎn  kéze.’ (Ðɛh. 1:1, 2) É ɖo wɛn ɖɔ, è ɖó ná nɔ ɖe hwenu ɖó vo nú Biblu xixa. Hwetɛ́nu ka nyɔ́ hú gǎn nú Biblu xixa? Xósin mǐtɔn lɛ́ sixú gbɔn vovo. Amɔ̌, nǔ e ɖo tají é wɛ nyí ɖɔ mǐ ní ba hwenu e ná nyɔ́ nú mǐ bɔ mǐ ná nɔ xa Biblu ɔ ɖo gbesisɔmɛ é. Nɔví súnnu ɖé nɔ nyí Victor bo ɖɔ: “Un yí wǎn nú Biblu xixa ɖo zǎnzǎn lɛ́. Un tlɛ nyí zǎnfɔ́ntɔ́ ɖé ǎ có, nǔ e nɔ fɛ́ ayi ce ɖo zǎnzǎn lɛ́ é kpítí ǎ. Taglo ce mɛ nɔ fá, bɔ un nɔ sixú sɔ́ ayi ɖó nǔ jí hú gǎn.” Énɛ́ ka ná sixú kpa we a? Kanbyɔ́ hwiɖée ɖɔ: ‘Hwetɛ́nu ka ná nyɔ́ nú mì hú gǎn bɔ un ná nɔ xa Biblu?’

NƆ LIN TAMƐ DÓ NǓ E A XA É JÍ

7-8. Étɛ́ ka sixú zɔ́n bɔ mǐ ná gɔn nǔ e mǐ xa lɛ́ é sín le ɖu bǐ mlɛ́mlɛ́? Jlɛ̌ dó nǔɖé wú.

⁷ Amɔ̌, nǔ ɔ wɛ nyí ɖɔ, mǐ sixú nɔ xa nǔ gěgé hwɛhwɛ, bo ka ná nɔ lin tamɛ d’é jí vo ɖé ǎ. A ka ko xa nǔɖé bɔ táan kpɛɖé gúdo ɔ, a sɔ́ flín nǔ e a xa é káká ɖé ǎ kpɔ́n a? Mǐ bǐ wɛ é xá kpɔ́n. É blá wǔ ɖɔ, nǔ mɔ̌hun sixú jɛ dó Biblu xixa mǐtɔn lɔmɔ̌ wú. Bóyá, nǔ e gbé nya wɛ mǐ ɖe é wɛ nyí ɖɔ mǐ ná nɔ xa wěmata Biblu tɔn nabí ɖé gbe ɖokpó. Nǔ ɖagbe wɛ. Mǐ ɖó ná ɖó tuto bo lɛ́ tɛ́n kpɔ́n bo xwedó. (1 Kɔ. 9:26) É ɖo mɔ̌ có, Biblu xixa ɔ, bǐbɛ́mɛ nǔ lɛ́ tɔn wɛ, bǐbɛ́mɛ ɖagbe wɛ, amɔ̌, bǐbɛ́mɛ nyí wɛ jɛ́n é kpo ɖe. Ényí mǐ ba ná ɖu le Xó Mawu tɔn xixa tɔn bǐ mlɛ́mlɛ́ ɔ, mǐ ɖó ná wa nǔ hú mɔ̌.

⁸ Lin tamɛ dó nǔjlɛ́dónǔwú élɔ́ jí: Sin ɖo dandan cóbɔ è ná nɔ gbɛ. Amɔ̌, ényí jǐ ja dín ɖo táan kléwún ɖé vlamɛ ɔ, ayǐkúngban ɔ ná zun sin. Ényí nǔ mɔ̌hun jɛ ɔ, jǐ ɖěvo e ná ja gɔ́ ná é sɔ́ ná wa ɖagbe ǎ. É ná byɔ́ hwenu cóbɔ ayǐkúngban ɔ ná nu jǐ e ko ja é sín sin, bo ná bló bɔ jinukún lɛ́ ná su. Mɔ̌ ɖokpó ɔ, mǐ ɖó ná nyi alɔ nú kplakpla jí ninɔ dó xa Biblu, énɛ́ wɛ nyí ɖɔ mǐ ná hwlɛ́n dó dín bo sɔ́ ná mɔ hwenu dó lin tamɛ dó nǔ e mǐ xa é jí ǎ, bɔ énɛ́ ná zɔ́n bɔ mǐ sɔ́ ná flín nǔ e mǐ xa é bo lɛ́ zán ǎ.—Ja. 1:24.

9. Ényí kplakpla jí ninɔ dó xa Biblu ko má mǐ ɔ, étɛ́ mǐ ka ɖó ná wa?

⁹ A ka ko ɖó ayi wú ɖɔ émí zɔn kplakpla jí dó xa Biblu kpowun ɖo ninɔmɛ ɖé mɛ kpɔ́n a? Étɛ́ a ka ɖó ná wa? Wa dɛ̌dɛ̌. Tɛ́n  kpɔ́n bo lin tamɛ dó nǔ e xa wɛ a ɖe é alǒ nǔ e a ko xa é jí. Énɛ́ wiwa ɖó ná vɛ́ wǔ ǎ. A sixú dó hwenu e a nɔ kplɔ́n nǔ ná é jí nú tamɛ linlin mɔ̌hun. Alǒ, a sixú ɖe wěmafɔ nabí e a ná xa é kpo, bo ná zán hwenu e kpo é dó lin tamɛ dó nǔ e a xa é jí. Victor e xó mǐ ɖɔ wá yi é ɖɔ: “Un ɖe wěmata Biblu tɔn nabí e un nɔ xa é kpo, un sixú xa wěmata ɖokpó. Ðó un nɔ xa nǔ zǎnzǎn tɛɛn wútu ɔ, un nɔ kpé wú bo nɔ ɖo tamɛ lin dó nǔ e un xa é jí wɛ ɖo kéze ɔ bǐ mɛ.” É ná bo nyí wlɛnwín ɖěbǔ wɛ a nɔ zán ɔ, é ɖo tají ɖɔ a ní nɔ xa nǔ ɔ ɖó alɔkpa ɖé, nú é ná d’alɔ we nú a ná lin tamɛ dó nǔ e a xa é jí hú gǎn.—Ðɛh. 119:97; kpɔ́n gbǎví “ Nǔkanbyɔ́ e jí è ná lin tamɛ dó lɛ́ é.”

10. Jlɛ̌ lěe a sixú zán nǔ e kplɔ́n wɛ a ɖe lɛ́ é gbɔn é dó nǔɖé wú. (1 Tɛsaloníkinu lɛ́ 5:17, 18)

¹⁰ A na bo nɔ xa Biblu hweɖébǔnu, bo ná bo nɔ zán táan nabí ɖěbǔ dó xa hǔn, tɛ́n kpɔ́n bo nɔ ba ali e nu a ná zán nǔ e a xa é ɖe lɛ́ é. Ényí a ɖo akpáxwé Xó Mawu tɔn tɔn ɖé xa wɛ hǔn, nɔ kanbyɔ́ hwiɖée ɖɔ: ‘Nɛ̌ un ka sixú zán mɔjɛmɛ élɔ́ din alǒ ɖo malínmálín mɛ gbɔn?’ Mǐ ní ɖɔ ɖɔ 1 Tɛsaloníkinu lɛ́ 5:17, 18 ɖo akpáxwé Biblu tɔn e xa wɛ a ɖe é mɛ. (Xa.) Ényí a xa wěmafɔ we énɛ́ lɛ́ gúdo ɔ, a sixú nɔ te bo lin tamɛ dó azɔn nabí e a nɔ xo ɖɛ é kpó lěe a nɔ xo ɖɛ vívɛ́ gbɔn é kpó jí. Gɔ́ ná ɔ, a sixú lin tamɛ dó nǔ ɖěɖěe su nukún towe mɛ lɛ́ é jí. Bóyá a sixú mɔ ɖɔ émí ná dó kú nú Jexóva ɖó nǔ tawun tawun atɔn wú. A na bo tlɛ nɔ zán cɛ́jú kléwún ɖé dó lin tamɛ mɔ̌hun ɔ, é ná d’alɔ we bɔ a ná mɔ nukúnnú jɛ Xó Mawu tɔn mɛ bo lɛ́ bló nǔ e é ɖɔ é. Gɔ́ ná ɔ, ényí a nɔ zán nǔ e a nɔ xa ɖo Biblu mɛ lɛ́ é gbe bǐ gbe ɔ, hwenu ɖo yiyi wɛ ɔ, a ná húzú mɛsɛntɔ́ Jexóva tɔn ɖagbe ɖé. Amɔ̌, nú é cí ɖɔ nǔ e jí a ɖó ná wa azɔ̌ dó lɛ́ é kún hwe xwɛ ɖěbǔ ó ɔ ka lo?

NƆ NYA NǓ E ÐO JLƐ̌ JÍ LƐ́ É GBÉ

11. Étɛ́wú a ka sixú mɔ ɖɔ nǔ lɛ́ hú agbɔ̌n émí hweɖélɛ́nu? Nǎ kpɔ́ndéwú ɖé.

¹¹ Ényí a nɔ xa Biblu bo nɔ ba ali ɖěɖěe nu a ná zán wěɖexámɛ tɔn lɛ́ ɖe é ɔ, nǔ lɛ́ sixú wá hú agbɔ̌n we hweɖélɛ́nu. Lin tamɛ dó nǔ élɔ́ wú: A xa Biblu égbé, bɔ é ɖɔ xó dó lěe è ma ná ɖe mɛɖé ɖó vo ɖo mɛɖé mɛ ǎ gbɔn é wú. (Ja. 2:1-8) A mɔ ɖɔ émí ɖó ná wa azɔ̌ ɖo lěe émí nɔ wa nǔ xá mɛ ɖěvo lɛ́ gbɔn é wú. Énɛ́ wú ɔ, a wá gbeta ɔ kɔn bo ná bló hǔzúhúzú ɖé lɛ́. Alɔ towe ɖíe! Énɛ́ gúdo ɔ, ayǐhɔ́ngbe tɔn ɔ, a xa akpáxwé ɖé b’ɛ tɛ ɖɛ̌ nǔ e wú é ɖo tají ɖɔ è ní nɔ kpɔ́n xó bo ɖɔ é jí. (Ja. 3:1-12) A mɔ ɖɔ xó émítɔn lɛ́ kún nɔ nyí xomɛnyínyɔ́xó, alǒ wǔsyɛ́n dó lanmɛ nú mɛ sín xó hwebǐnu ó. Énɛ́ wú ɔ, a wá gbeta ɔ kɔn ɖɔ émí ná nɔ ɖɔ xó e ná nɔ dó wǔsyɛ́n lanmɛ nú mɛ ɖěvo lɛ́ é hú gǎn. Ayǐ ɖěvo e hɔ́n é ɔ,  Biblu xixa towe gba akpá nú we dó xɔ́ntɔn zunzun xá gbɛ ɔ wú. (Ja. 4:4-12) A ɖ’ayi wú ɖɔ émí ɖó ná nɔ cyán nǔ e émí nɔ sɔ́ dó ɖe ayi ɖ’ayǐ ná lɛ́ é hú gǎn. Azǎn ɛnɛgɔ́ ɔ gbe ɔ, a sixú mɔ ɖɔ nǔ énɛ́ lɛ́ bǐ jí e émí ɖó ná wa azɔ̌ dó é hú agbɔ̌n émí.

12. Ényí Biblu xixa towe xlɛ́ we ɖɔ a ɖó ná bló hǔzúhúzú lɛ́ ɔ, étɛ́wú awakanmɛ ma ka ɖó ná kú we ǎ? (Kpɔ́n tínmɛ e ɖo do é lɔmɔ̌.)

¹² Ényí a mɔ ɖɔ émí ɖó ná bló hǔzúhúzú ɖé lɛ́ hǔn, awakanmɛ ní ma kú we ó. Énɛ́ xlɛ́ nyi wɛn ɖɔ a ɖó ninɔmɛ ayi mɛ tɔn e sɔgbe é. Mɛ e nɔ sɔ́ éɖée hwe bo nɔ lɛ́ ɖɔ nǔgbó nú éɖée é nɔ xa Mawuxówéma ɔ kpó linlin ɔ kpó ɖɔ émí ná mɔ nǔ e jí émí ná wa azɔ̌ dó é. a Lɛ̌ flín ɖɔ “gbɛtɔ́ yɔ̌yɔ́ ɔ” sísɔ́ dó kún nyí zǎnto ɖokpó mɛ nú ó. (Koló. 3:10) Étɛ́ ka ná d’alɔ we bɔ a ná nɔ zán nǔ e a xa ɖo Xó Mawu tɔn mɛ é?

13. Nɛ̌ a ka sixú nya nǔ e ɖo jlɛ̌ jí é ɖé lɛ́ gbé gbɔn? (Kpɔ́n ɖiɖe ɔ lɔmɔ̌.)

¹³ Ma nɔ ɖɔ ɖɔ nǔ e émí xa lɛ́ é bǐ jɛ́n émí ná zán ɖo tɛndo ɖokpó ɔ mɛ ó. Nya nǔ e ɖo jlɛ̌ jí é ɖé lɛ́ gbé. (Nǔx. 11:2) A sixú tɛ́n wlɛnwín élɔ́ kpɔ́n. Slɛ́ nǔ e jí a ɖó ná wa azɔ̌ dó lɛ́ é. Énɛ́ gúdo hǔn, sɔ́ ɖokpó alǒ we bá w’azɔ̌ d’é jí jɛ nukɔn, bo jó éé kpo é dó bá w’azɔ̌ d’é jí hweɖévonu. Fítɛ́ a ka ɖó ná bɛ́ sín?

14. Étɛ́ lɛ́ gbé a ka sixú nya jɛ nukɔn?

¹⁴ A sixú wá gbeta ɔ kɔn bá bɛ́ sín nǔ e bɔ wǔ nú we hú gán bɔ a ná kpé wú é ɖé gbé nyinya jí. Alǒ, a sixú wá gbeta ɔ kɔn bá wa azɔ̌ dó akpá e xwé a mɔ ɖɔ émí ɖó ná jlá émíɖée ɖó ɖe hú gǎn é jí. Ényí a ɖó ayi nǔ e gbé a ɖó ná nya é wú gúdo hǔn, ba do nú nǔ ɖo wěma mǐtɔn lɛ́ mɛ, é sixú nyí Index des publications des Témoins de Jéhovah alǒ Alixlɛ́mɛwéma dobanúnǔ tɔn nú Kúnnuɖetɔ́ Jexóva tɔn lɛ́. Xo ɖɛ dó nǔ e gbé nya wɛ a ɖe é tamɛ, bo byɔ́  Jexóva ɖɔ é ní ná émí “jlǒ kpó hlɔ̌nhlɔ́n kpó bǐ, bónú [émí] ná wa nǔ.” (Filí. 2:13) Énɛ́ gúdo hǔn, tɛ́n kpɔ́n bo zán nǔ e a kplɔ́n é. Ényí a kpé nǔ e gbé a nya jɛ nukɔn é wú ɔ, akpakpa ná ɖibla sɔ́ we hú gǎn bɔ a ná w’azɔ̌ dó nǔ ɖěvo jí. Nǔgbó ɔ, ényí a jlá hwiɖée ɖó ɖo gbɛzán klisánwun tɔn sín akpá ɖé xwé alǒ jijɔ klisánwun tɔn sín akpá ɖé xwé ɔ, é ná bɔ wǔ nú we hú gǎn bɔ a ná wa mɔ̌ ɖo akpá ɖěvo lɛ́ xwé.

NǓ XÓ MAWU TƆN NÍ ‘ÐO AZƆ̌ WA ÐO WǓ WE WƐ’

15. Nɛ̌ togun Jexóva tɔn ka gbɔn vo nú mɛ e nɔ xa Biblu ɔ lɛ́ é gěgé gbɔn? (1 Tɛsaloníkinu lɛ́ 2:13)

¹⁵ Mɛɖé lɛ́ nɔ ɖɔ ɖɔ émí ko xa Biblu ɔ blěbú azɔn mɔ̌kpán. Amɔ̌, yě ka ɖi nǔ nú nǔ e Biblu kplɔ́n mɛ lɛ́ é dóó a? Yě ka nɔ zán gbɛ sɔgbe xá nǔ e Biblu kplɔ́n mɛ lɛ́ é, alǒ, yí gbe bɔ Biblu ɔ nɔ húzú gbɛzán yětɔn a? É blá wǔ ɖɔ hwɛhwɛ ɔ, éǒ wɛ nɔ nyí xósin ɔ. Togun Jexóva tɔn ka gbɔn vo tawun! Klisánwun xwe kanweko nukɔntɔn ɔ tɔn lɛ́ ɖɔhun ɔ, mǐ yí Biblu ɔ “dó yí xó Mawu tɔn, lěe é nyí gbɔn nǔgbó é.” Hú gǎn bǐ ɔ, mǐ nɔ tɛ́n kpɔ́n bo nɔ xlɛ́ ɖɔ é ɖo azɔ̌ wa wɛ ɖo gbɛzán mǐtɔn mɛ.—Xa 1 Tɛsaloníkinu lɛ́ 2:13.

16. Étɛ́ ka sixú d’alɔ mǐ bɔ mǐ ná nɔ bló ɖó Xó ɔ jí?

¹⁶ É nɔ bɔ wǔ hwebǐnu nú è ná xa Xó Mawu tɔn bo lɛ́ bló ɖ’é jí ǎ. É sixú vɛ́ wǔ nú mǐ bɔ mǐ ná mɔ hwenu dó xa. Alǒ, mǐ sixú nɔ zɔn kplakpla jí dó xa bo sɔ́ ná sixú lin tamɛ dó nǔ e mǐ xa é jí ǎ. Abǐ, mǐ sixú mɔ ɖɔ nǔ tootóbú e jí mǐ ɖó ná wa azɔ̌ dó lɛ́ é hú agbɔ̌n mǐ. É ná bo tlɛ nyí wǔvɛ́ ɖěbǔ wɛ ɔ, a sixú ɖu ɖ’é jí. Kpó alɔdó Jexóva tɔn kpó ɔ, a sixú ɖu ɖ’é jí. Mi nú mǐ ní kán ɖ’é jí bá yí gbe nú alɔdó tɔn bo ma nyí xósetɔ́ nǔwɔntɔ́ ó, loɔ, mǐ ní bló ɖó Xó ɔ jí. É ɖo wɛn ɖɔ, lě do mǐ nɔ xa Xó Mawu tɔn bo nɔ zán ɖ’é jí ɖo gbɛzán mǐtɔn mɛ sɔ é ɔ, mɔ̌ do wɛ mǐ ná ɖó awǎjijɛ sɔ.—Ja. 1:25.