Mǐ ɖó ná lin kpowun ɖɔ ɖó ahwanvú 70 lɛ́ ma ɖo fínɛ́ hwenu e Jezu ɖó gbadanu núɖuɖu Aklúnɔ tɔn ɔ ayǐ é ǎ wútu ɔ, nǔ yětɔn kún sɔ́ nyɔ́ nukún tɔn mɛ ó, alǒ yě ko jó è dó ǎ. Jezu ba kpowun bo ná nɔ kpɔ́ xá mɛsɛ́dó tɔn lɛ́ hwe énɛ́ nu wú wɛ.

Yě mɛ 12 lɛ́ kpó mɛ 70 lɛ́ kpó bǐ wɛ nyí ahwanvú Jezu tɔn. Jezu kpɔ́n ahwanvú tɔn tootóbú lɛ́ mɛ bo cyán súnnu 12 lɛ́ jɛ nukɔn, bo ylɔ́ yě ɖɔ mɛsɛ́dó lɛ́. (Luk. 6:12-16) Galilée wɛ é ɖe hwenu e “é ylɔ́ mɛsɛ́dó 12 lɛ́” bo “sɛ́ yě dó, bónú yě ná jlá Axɔ́súɖuto Mawu tɔn, lobo gbɔ azɔn nú mɛ lɛ́” é. (Luk. 9:1-6) Nukɔnmɛ e Jezu wá Judée é ɔ, é “ɖe mɛ 70 ɖěvo lɛ́ bo sɛ́ yě dó webɔwebɔ.” (Luk. 9:51; 10:1) Hǔn, Jezu ɖó ahwanvú lɛ́ gbɔn fí vovo lɛ́, bɔ yě nɔ ɖe kúnnu dó wǔ tɔn.

Jwifu e wá húzú ahwanvú Jezu tɔn lɛ́ é ná kpo ɖo Dǐndínwáyixwe ɔ ɖu wɛ xwewú xwewú, bóyá, yě kpó xwédo yětɔn lɛ́ kpó. (Tín. 12:6-11, 17-20) Ée kú Jezu tɔn sɛkpɔ́ é ɔ, é kpó mɛsɛ́dó tɔn lɛ́ kpó yi Jeluzalɛ́mu. Amɔ̌, é ylɔ́ ahwanvú tɔn lɛ́ bǐ sín Judée, Galilée kpó Pelée kpó, bónú yě ná nɔ kpɔ́ bo ná ɖu Dǐndínwáyixwe gɛnnyigɛnnyi ɖé ǎ. É ɖo wɛn ɖɔ, Jezu ba ná nɔ kpɔ́ xá mɛsɛ́dó tɔn lɛ́ ɖo ninɔmɛ énɛ́ mɛ. É ɖɔ nú yě ɖɔ: “É jló mì tawun ɖɔ má ɖu Dǐndínwáyixwe sín nǔɖuɖu élɔ́ xá mi cóbónú hwenu e un ná se wǔvɛ́ dó é ná su.”—Luk. 22:15.

Hwɛjijɔ ɖagbe ɖé wú wɛ é wa mɔ̌. Jezu ná kú ɖo malínmálín mɛ, ɖó é wɛ nyí “Lɛ̌ngbɔ́ví Mawu tɔn e ná ɖe hwɛ gbɛ ɔ tɔn síin é.” (Jaan 1:29) Jeluzalɛ́mu wɛ nǔ ná nyí mɔ̌ ɖe, fí e è nɔ ko sá vɔ̌ lɛ́ nú Mawu ɖe sín hwenu línlín ɖíe é. Lɛ̌ngbɔ́ví Dǐndínwáyixwe tɔn ɔ nɔ flín Izlayɛ́li ví lɛ́ ɖɔ Jexóva hwlɛ́n yě sín Ejípu, amɔ̌, vɔ̌sísá Jezu tɔn ná wa nǔ hú mɔ̌. É ná hwlɛ́n gbɛtɔ́ lɛ́ bǐ gán sín hwɛhuhu kpó kú kpó sí. (1 Kɔ. 5:7, 8) Nǔ e Jezu wa é ná hun ali nú mɛsɛ́dó 12 lɛ́ bɔ yě ná nɔ mɛ e jí è ná dó agun klisánwun tɔn ɔ do nyi lɛ́ é mɛ. (Efɛ́. 2:20-22) É sɔ́ akpakpa mɛ ɖɔ Jeluzalɛ́mu, toxo mímɛ́ ɔ ɖó “awǐnnya dodónú tɔn 12” bɔ “mɛsɛ́dó Lɛ̌ngbɔ́ví ɔ tɔn 12 lɛ́ sín nyǐkɔ 12 lɛ́ ɖo yě wú.” (Nǔɖe. 21:10-14) Ɛɛn, mɛsɛ́dó gbejínɔtɔ́ lɛ́ ɖó azɔ̌ tají ɖé bo ná wa ɖo linlin Mawu tɔn sín jijɛnu mɛ. Mɔ̌ mɛ ɔ, mǐ mɔ nukúnnú jɛ nǔ e wú Jezu ba ná nɔ kpɔ́ xá yě ɖo Dǐndínwáyixwe gǔdo tɔn énɛ́ kpó nǔ e ná bɔ d’é wú tlóló é hwenu é kpó wú, énɛ́ wɛ nyí Aklúnɔ sín gbadanu núɖuɖu ɔ.

Mɛ 70 lɛ́ kpó ahwanvú ɖěvo lɛ́ kpó ɖo nǔɖuɖu énɛ́ domɛ xá Jezu ǎ. É ɖo mɔ̌ có, gbadanu núɖuɖu Aklúnɔ tɔn e Jezu ɖó ayǐ é ná hɛn le wá nú ahwanvú e xlɛ́ ɖɔ émí ɖo gbejí lɛ́ é bǐ. È ná jɛ akɔ axɔ́súɖuto ɖé tɔn xá klisánwun e gbigbɔ sɔ́ lɛ́ é bǐ; akɔjijɛ énɛ́ xó wɛ Jezu ɖɔ nú mɛsɛ́dó tɔn lɛ́ ɖo zǎn énɛ́ mɛ.—Luk. 22:29, 30