Ke Liliu o kau soa mo le Atua, e ’aoga ke koutou sekolā o uiga mo ia. Ko okotou kau soa-la e lātou iloa koia lokotou igoa-la ti mo lātou to’o? Eio. E toe fela’aki mo le Atua, e loto a ia ke koutou iloa lona suafa-la ti mo koutou māsau kiai. Ko le suafa o le Atua ko Seova. (Pesalemo 83:18; Mateo 6:9) E tonu ke koutou toe ako’i mo ne’a alā e loto a ia ki ai-la ti mo ne’a alā e vesi’a a ia ki ai la. E toe ’aoga ke koutou iloa pe ko ai ’ona kau soa, pe ko ai ’ona fesagai. E mafai fa’i ke fualoa sakita sakili ke kita iloa se tasi. E pati a le Tosi-Tapu-la e ko se aga fakapotopoto a le ma’ua o se temi mo ako’i o uiga mo Seova.​—Efeso 5:​15, 16.

Ko kau soa o le Atua-la e lātou fai a ne’a alā e malilie-la kiate ia la. Koutou fakakaukau’i o uiga mo okotou kau soa la. Kapau e koutou fai fakaveliveli’i lātou ti mo fai a ne’a alā e lātou vesi’a ki ai la, e lātou kau soa tu’uma’u koia mo koutou? Le’ai! Ti e toe fela’aki fa’i mo kapau e koutou fia liliu o kau soa mo le Atua la, e ’aoga ke koutou fai a ne’a alā e malie kiate ia la.​—Soane 4:24.

Ko lotu fuli a nei e se ’aga lātou o taki tātou ke tou kau soa mo le Atua. Ko Sesu, a ia leia ko le kau soa malie o le Atua la, na māsau a ia ki ala e lua. Ko le tasi a ala e laulasi ti e toka’api a fenua e fano i ai. Ko le ala lenā e taki ki le mate la. Ko le ala ake leia e lau’iki’iki ti e toka te’iki a fenua alā e fano i ai la. Ko le ala lenā e taki ki le ma’uli le’egato la. Ko lona faka’uiga, kapau e koutou fia liliu o kau soa mo le Atua, e tonu ke koutou ako a le fa’asiga tausi leia e mālie kiate ia la.​—Mateo 7:​13, 14.