E le’aise fakataga loa e le Atua-la ke ’aga a le fenua agaveli-la o maumau’i a le Palatiso la. Ko ’ona fa’i kau soa ka ma’u’uli i ai la. Kolea loa le ne’a ka soko ki le fenua agaveli la? Ke tou iloa le tali kiai, tou tio’i ake mu’a le isitolia o Noe. Na ma’uli a Noe kua sili nei kiai a fētu’u e lau’i afe. Na ko ia ko le tagata agamalie na faiga tu’uma’u ke ina ’aga o fai le finegalo o le Atua. Kae ki fenua ake alā na lātou fai a aga e veveli. Koia na pati ai a Seova kia Noe E aga a ia o tuku mai se tulivio mo matemate’i ai a le fenua fuli leia e agaveli la. Na pati ake a ia kia Noe ke fa’u se aleka, ti ko ia mo lona famili e le’aise lātou mamate i le temi leia ka soko mai ai a le Tulivio la.​—Senesi 6:​9-18.

Na fa’u e Noe mo lona famili a le aleka. Na fakatokaga e Noe ki le fenua-la e iai le Tulivio ka soko mai, kae na le’aise lātou fakalogo ki teia. Na soko atu fa’i lalātou fai le ne’a leia e veli la. I le ’oki o le fa’u o le aleka la, na faka ulu e Noe a manu ki loto o le aleka, ti ko ia mo lona famili na lātou toe ulu mo lātou ki loto. I lenā le temi la, na ’aga a Seova o fai a le toe afa lasi. Na ’ua aso e 40 mo pō e 40. Kua ’aofi a le kele kātoa e le vai la.​—Senesi 7:​7-12.

 Na mamate le fenua agaveli, kae ko Noe mo lo’ona famili na saofaki lātou. Na saofaki lātou e Seova mei le Tulivio o tuku lātou ki se kele me’ā kua puli i ai a le kau agaveli. (Senesi 7:​22, 23) E pati a le Tosi-Tapu e koi toe ake le temi leia ka ’aga ai loa a Seova o puli’i alātou alā e fakafiti ki le fai leia o ne’a e totonu la. Ko le fenua leia e agamalie-la e le’aise mate’i loa lātou. E ma’uli loa lātou o talu ai i le Palatiso i le kele la.​—2 Petelo 2:​5, 6, 9.

Toka’api lātou i le temi nei e lātou fai a ne’a e veveli. Ko le malama e apele i le faigata’a’ia. E tu’atu’ani a le kakau e Seova o ana kau Fakamā’oki mo fakatokaga ki le fenua, kae toka’api e le’aise lātou fia logo ki māsau a Seova. E le’aise fia fetogi lalātou aga. E le’aise lātou fia tali a ne’a alā e pati mai e le Atua o uiga mo le fai leia o le ne’a e totonu ti mo le fai leia o le ne’a e veli. Kolea loa le ne’a ka soko ki fenua anā? E lātou fetogi koia i se temi? Toka’api e se lātou fetogi loa i se temi. E kaku mai loa le temi leia e puli’i ai a le kau agaveli ti e le’aise lātou toe ma’uli loa.​—Pesalemo 92:7.

E le’aise puli’i le kele-la ia; e liliu loa ia ko le palatiso. Ko lātou alā ka liliu o kau soa mo le Atua la, e ma’u’uli loa lātou o talu ai i le Palatiso i le kele la.​—Pesalemo 37:29.