Ko dewgal waɗata ɓeynguure heyre. Fii kala hiɗon yiɗi mawɓe mon ɓen, teddini ɓe, ko ɓeyngu mon maa moodi mon woni jooni aaden ɓuranɗo on hittande ka hoore leydi. Haray hino sattani siɓɓe mon goo fii jaɓugol ɗun. Kono tugaale Deftere Allah nden wallay on fii no wondiron e siɓɓe mon ɓen e hoore ɓuttu si on wakkilike fii no ɓeynguure mon heyre nden weldira.

KO DEFTERE ALLAH NDEN WI’I KON : « Teddin yumma maa e ben maa » (Efeesi 6:2). Hay si on nawyi, hiɗon haani teddinde mawɓe mon ɓen soono woo. Annditee kadi, ɓeyngu mon maa moodi mon, no haani dankaade mawɓe mun ɓen. « Giggol nawlataa », ko ɗun waɗi wota on hulu si ɓeyngu mon maa moodi mon no huuwondirde e mawɓe mun ɓen (1 Korenti 13:4 ; Galaasi 5:26).

KO HAANUƊON KON WAƊUDE :

• Accee haalugol piiji wano « Siɓɓe maa ɓen no hayfinde lan soono woo soono » maa « Kala ko mi waɗi neene maa yiɗaa »

• Etee wattannon yila e ko ɓeyngu mon maa moodi mon yewtata on kon

KO DEFTERE ALLAH NDEN WI’I KON : « Gorko selay ben mun e yumma mun, ɓannita ɓeyngu mun, kamɓe ɗiɗo ɓe wona gooto » (Fuɗɗoode nden 2:24). Si on jommbii maa on jommbaama, mawɓe mon ɓen sikkay haa jooni hiɓe haani dankagol on e ɓe faalete wallitagol on ka dewgal mon ɓuri ko ɓe wallaynoo on kon.

Ko onon e ɓeyngu mon maa moodi anndi honno gerdirton fii mawɓe mon ɓen e anndinon ɓe e hoore teddungal. Hiɗon waawi ɓe yewtude goonga hara on yawaaki ɓe (Tindi 15:1, TMN). Yankinaare, newaare, e muɲɲaare wallay on no huuwondiron e mawɓe mon ɓen e « [muɲɲondiranon] e nder giggol ». (Efeesi 4:2.)

KO HAANUƊON KON WAƊUDE :

• Si tawii ko mawɓe ɓen woni e waɗude kon no sonnjude on, accon haa deƴƴa, yewtidon e ɓeyngu mon maa moodi mon fii mun

• Fottanee huunde wootere fii no anndiron honno gerdirton fii ɗi alhaaliiji mon