Deftere Allah nden no haali fii mojobe ɗiɗi dankiiɗe moftal ngal — “ ardotooɓe e wallitotooɓe ”. (Filipii 1:1.) E moftal kala no woodi sifa ɓen musiɓɓe gomɗinɓe. Ko honɗun e golle wallitotooɓe ɓen waɗata ko nafata men ?

Ɓe wallitoto ardotooɓe ɓen. Woni mawɓe maa sukaaɓe, wallitotooɓe ɓen no hoolaa fii golle maɓɓe ɗen ɓayri hiɓe ɗoftii Allah. Hiɓe waɗude golle hittuɗe buy ka moftal wano sennditugol defte cewɗe maa laɓɓingol Fottirde nden. Ko ɗun wallata ardototooɓe moftal ngal no ɓe wattanira yila e ko ɓe jannata kon e no ɓe dankora moftal ngal.

Hiɓe waɗa golle wonduɗe e nafa. Woɓɓe e maɓɓe jaɓɓoto, ɓe werna arooɓe ɓen ka pottital. Woɓɓe goo no kippi fii mikrooji ɗin, woɓɓe fii sennditugol defte cewɗe, woɓɓe no kippi fii dokkal mbuuɗi ko addetee kon ka pottital e woɓɓe goo kadi fii sennditugol nokkeeli ka waajetee. Hiɓe wallitoo kadi fii moƴƴitingol e laɓɓingol Fottirde nden. Ardotooɓe ɓen nulay ɓe fii yo ɓe wallito mawɓe ɓen ka moftal. Ɓayri hiɓe baɲɲii waɗugol golle ko ɓe halfinaa kon, fow no teddini ɓe. — 1 Timotee 3:13.

Hiɓe holli sifaaji moƴƴi. Wallitotooɓe ɓen no suɓira sabu ko ɓe ɗoftii kon e ko ɓe gomɗini kon. Jannde maɓɓe nden ka pottital ɲiiɓinay gomɗinal amen ngal. Wakkilaare maɓɓe nden ka waajagol jonnay men kadi wakkilaare. Huuwondiral maɓɓe ngal e ardotooɓe ɓen okkay men weltaare e pottal (Efeesi 4:16). Si ɓe jokkiri nii, ɲannde goo kan ɓe kadi ɓe wonay ardotooɓe.

• Ko honno ɓee wallitotooɓe haani wonirde ?

• Ko honno ɓe wallirta moftal ngal fii no ngal yaara yeeso ?