ALLA tagi aduna on no moƴƴiri fii tagaaɗo ka wuura. Daaluyee makko on holli : « Ko fii kammuuli ɗin, ko Yahuwah jey ɗi, kono leydi ndin o okkii ɓiɓɓe aaden » (Zabuura 115:16).

Ado yo Alla tagude gorko arano on, o suɓino nokkuure noddaande Adni e hoore ndii leydi e o waɗi nde tutateeri labaandi. Deftere Alla nden no haali fii canɗi nay. Inɗe ɗiɗi e majji ko Furaatiwol e Hiddaaqiluwol. Hari canɗi ɗin ko ka tutateeri Adni ɗi tubbinoo. No miijaa tutateeri Adni ndin ko e nokkuure ka senngo funnaange leydi noddaandi hannde Turki wonunoo a. Ko goonga, tutateeri Adni ndin hari ko e hoore ndii leydi wonunoo !

Alla tagi baaba Aadama « o honni mo ka tutateeri Adni ɗon fii yo on remu ɗon, [o] ayna » (Fuɗɗooɗe nden 2:15, VPFJ). Ɓawto ɗun, Alla tagani baaba Aadama ɓeyngu, neene Hawaa. Alla daalani ɓe : « Heɓee ɓiɓɓe, ɗuuɗon, hebbinon aduna on, huɓindoɗon mo » (Fuɗɗooɗe nden 1:28, VPFJ). Tigi tigi on, Alla « tagiraali [leydi ndin] fii meere, kono ko o tagiri ndi ko fii ka hoɗee » (Isaaya 45:18).

Kono, baaba Aadama e neene Hawaa yedduno Alla. E hoore tewaare ɓe teddinaali sariya makko on. Ko ɗun wadi Alla raɗii ɓe ka tutateeri Adni. Ko nii faɗirɗen Aljanna. Junuubu ko baaba Aadama waɗunoo kon hattaano ɗon. Deftere alla nden wi’i : « Sabu aaden gooto, junuubu naatiri e aduna on, e sabu on junuubu kadi mayde nden ari, ko wano non kadi mayde nden rewiri e hoore yimɓe ɓen fow, ko fii fow waɗii junuubu » (Roomu 5:12).

Kono Yahuwah tertino faale makko arano on, fii yo aduna on wonu aljanna ka yimɓe weltiiɓe hoɗa ? Oo’o ! Alla daali : « Daaluyee yaltuɗo ka karaho an [...] artoytaa e an hara ko mi wi’i kon waɗaali, kono kala ko mi faalaa aroyay waɗude, e fii ko mi daali kon laatoyto » (Isaaya 55:11). Aljanna wattoyte e oo aduna !

Ko honno ngurndan woniroyta ka Aljanna ? Ndaaren ko Deftere Alla nden holli kon e cenɗe ɗeri ɗiɗi jokkituɗi ɗin.