MIIJITEE wano dokteerjo keso no ari ka nokkuure mon. Ka fuɗɗoode haray hiɗon sikkitii mo. Si tawii non woɓɓe e njaatigiiɓe mon ɓen yahii ka makko e o ɲawndii ɓe ? Ɗun waɗataa on onon kadi faaleɗon yahugol ka on dokteerjo ?

Deftere Alla nden no wa’i wano on dokteerjo. Woɓɓe goo no sikkitii janngugol nde. Kono si en huutorii waajuuji wonuɗi e nder mayre ɗin, ɗun wallay en no wuuriren no haaniri. Ndaaren ɗee mise ɗoo.

Sumiatun wi’i : « Ko mi jommbaa pet, mi sikkuno Dumas, moodi an no welsindii e an. E nder ko mi monotoo kon, wonnde mi sonkayno mi yenna mo, mi feroo mo piiji, mi tappayno mo hay. Wonnde mi monotono haa mi hitee.

« Fewndo ko Dumas fuɗɗii janngude Deftere Alla nden, mi jalayno mo. Kono mi bakitotono mi jentoo ko o janngata kon. Ɲannde goo, mi nani aayeeje no janngee : “ Onon kadi, yo sonnaaɓe, mo kala yo yankinano moodi mun wano yankinorani non Joomiraaɗo on [...] Awa kadi yo sonnaajo on teddin moodi mun ” (Efeesi 5:22, 33). Ɗii konnguɗi hewtuno ɓernde an nden. Mi torii Alla yaafuyee fii ko mi yenni moodi an kon. Mi torii mo kadi fii yo o wallan no mi wonira ɓeyngu moƴƴo. Ɓawto ɗun, min e moodi an men watti janngidude Deftere Alla nden. »

Deftere Alla nden wi’i : « Wano non kadi, duhiiɓe ɓen haani yiɗirde sonnaaɓe mun ɓen wa ɓalli maɓɓe ɗin tigi » (Efeesi 5:28). Sumiatun sifii : « Anndugol ɗun wallii men ɗiɗoo non. Mi fuɗɗii ɓannande moodi an ataaya si o iwtii golle e mi yewta mo konnguɗi moƴƴi. Moodi an kanko kadi, ɓurtimmi yiɗude e o wallitoo lan gollugol ka suudu. Menen ɗiɗo men etino fii no men moƴƴondirana, men yurmondirana e men yaafondirana (Efeesi 4:32). Neeɓaali men ɓurti yiɗindirde e mo kala e amen teddina oya. Ko ɓuri duuɓi 40 nii hannde meɗen wondi e hoore weltaare. Ko waajuuji Daaluyee Alla ɗin danndi dewgal amen ngal ! »

Tayib wi’i : « Hari miɗo hunƴi haa. Mi piiridayno e yimɓe buy e mi hulɓinirayno woɓɓe goo finkaari. Mi piyayno kadi ɓeyngu an, Kustriyah, mi liɓa mo ka leydi hara hilan tikki. Yimɓe buy hulayno lan.

« Ɲannde goo, mi janngi konnguɗi annabi Iisaa ɗin : “ Miɗo yamirde on yamiroore heyre : Yiɗindiree. Wano mi yiɗiri on non, onon kadi yiɗindiree ” (Yuuhanna 13:34). Ɗun waɗi mi anngisii accitugol ko mi jokkunoo kon. Saa’i mo mi monii woo, mi torotono Alla fii yo ɓernde an nden waalo. Ko mi moninoo kon iwa kisan. Min e ɓeyngu an men huutorno waaju wonngu e nder Efeesi 4:26, 27 : “ Wota naange ngen mutu hiɗon tikki. Wota on jonnu Ibuliisa yolnde. ” Men janngi aayeeje ɗen e men torii Alla jemmaare kala. Ɗun woni sabu accitugol pooɗondiral amen ngal e men ɓurti yiɗindirde.

« Hannde, miɗo anndaa wa aaden ɓuttuɗo. Ɓeyngu an e ɓiɓɓe an ɓen no yiɗimmi e hiɓe teddinimmi. Hilan mari njaatigiiɓe buy e hilan ɓurti ɓadaade Alla. Tigi tigi on, ko mi aaden weltiiɗo. »

Goin wi’i : « Mi jokkondirayno e sentere sukaaɓe. Mi fiimayno buy e mi yanayno jemmaare kala ka ɗate hara miɗo manndili. Mi ƴettayno doroogu e mi yeeyayno kadi. Mi suuɗayno ɗun ka ley dolokke an hiwirɗo kure. Fii kala mi hollayno ngorgu kono hari miɗo hulani hoore an.

« Ontuma goɗɗo hollimmi oo aaya ɗoo : “ Ɓiɗɗo an, wota a yejjitu ko mi jannu maa kon [...] ɓayri a ɓeydante juutu balɗe e duuɓi e ɓuttu ” (Tindi 3:1, 2).   Mi faalano heɓude juutu balɗe e ɓuttu. Mi janngi kadi : “ Ɓay non hiɗen mari wano ɗii fodaariiji, yo yiɓɓe, laɓɓinoɗen e kala ko tuuninta ɓandu ndun e ruuhu on, e hoore timmingol laaɓal ngal e nder kulol Alla ” (2 Korenti 7:1). Ontuma mi acciti doroogu e fiimugol, mi seli sentere nden e mi watti rewugol Alla.

« Ko duuɓi 17 nii hannde gila mi acciti doroogu. Hilan wondi e cellal, ɓeynguure weltiinde, njaatigiiɓe moƴƴuɓe e hilan mari fonndo laaɓungo. Ɗoo yo mi waalaade ka ɗate hara miɗo manndili, hilan ɗaanaade jemmaare kala ka danki an e hoore ɓuttu. »

Bambang wi’i : « Ko mi wonunoo suka, mi waɗayno banndiyaagal. Ɓe mi waɗaynoo ko boni buy no jeyaa e leɲol fanɗungol ngol mi aɲunoo.

Kono, no saa’i on yaaraynoo non, mi fuɗɗii ɗaɓɓitugol Alla. E nder ko mi ɗaɓɓitata kon, mi hawri e mojobere yimɓe tummbondirayɓe fii janngugol Deftere Alla nden. Ko ton yimɓe leɲol ngol mi aɲunoo ngol sannimmi ! Mi yi’i kadi yimɓe leƴƴi goo hakkunde mojobere nden, hiɓe wondi e hiɓe weltii. Mi ŋalɗuno ! Ontuma mi faami aaya wi’uɗo on : “ Fow no fota yeeso Alla. E nder leƴƴi ɗin fow, kala huluɗo mo, jokki peewal, o jaɓanay ontigi ” (Kuuɗe sahaabaaɓe ɓen 10:34, 35).

« Hannde, ɓernde an nden tookaaki e leƴƴi-leƴƴiyaagal. Woɓɓe e njaatigiiɓe an hiɓɓuɓe ɓen no jeyaa e leɲol ngol mi aɲunoo ngol. Alla rewri Daaluyee makko on, o jannimmi fii giggol. »

Garoga wi’i : « Fewndo ko mi wonunoo suka, mi sokano ka kaso nde laabi tati : nde laabi ɗiɗi fii wujjugol e nde wootere fii ko mi tufi gorko laɓi. Ɓawto ɗun, mi tawtuno sentere rebelɓe e mi waruno yimɓe buy. Ko gere on lanni, mi wonuno hooreejo banndiiɓe hulɓinooɓe yimɓe, jatta ɓe mbuuɗi. Ka mi yahaynoo  woo hilan wondunoo e gardiiɓe an ɓen. Hari ko mi aaden siccuɗo e hulɓiniiɗo.

« Ɲannde goo, mi janngi ɗee aayeeje ɗoo : “ Giggol ko muɲal, giggol ko moƴƴuki, giggol nawlataa, giggol mantotaako, hinaa heewungol mawnintinaare. Ngol waasaa needi, ngol ɗaɓɓataa nafa maggol, ngol yaawataa seytinde, ngol marataa bone ” (1 Korenti 13:4, 5). Ɗii konnguɗi hewtuno ɓernde an nden. Mi eggi mi yaari nokku goo, mi janngi Deftere Alla nden e mi huutori waajuuji mayre ɗin e nder ngurndan an ɗan.

« Hannde, wonaa mi aaden siccuɗo. Ko mi jannoowo teddinaaɗo Daaluyee Alla on. Ngurndan an ɗan no foti no moƴƴiri. »

Koo ko sifaa ɗoo e mise goo no holli Daaluyee Alla on « ko wuuruɗo duncoowo » (Yahuudiyankeeɓe 4:12). Waajuuji Daaluyee Alla on sattaa fii, hiɗi kelɗi e hiɗi wondi e nafa.

Deftere Alla nden no waawi on wallude onon kadi ? Hiihi, hinde waawi on wallude fii kala satteendi ndi heɓoton. « Kala daalol windiingol ko foofaango Alla, hingol wondi e nafa fii jannugol e hollugol elaaji e wurtugol e ne’ugol e nder peewal, fii no aaden Alla on eltiree, hebulanoo waɗugol kala kuugal moƴƴal » (2 Timotee 3:16, 17).

Ko ɗun waɗi, ndaaren ko Deftere Alla nden janni kon.