Rifqatu ko debbo yiɗunooɗo Yahuwah. Moodi makko ko Issaaqa o innetenoo. Kanko kadi o yiɗuno Yahuwah. Ko honno ɓe yiidiri ? Ko honno o hollirnoo himo faalaa weltinde Yahuwah ? Etoɗen annden fii makko.

Ko annabi Ibraahiima e Saarata wonunoo mawɓe Issaaqa ɓen. Ko leydi Kanaana ɓe wonunoo, hakkunde yimɓe ɓe rewataano Yahuwah. Kono annabi Ibrahiima no faalanoo yo ɓiɗɗo makko on jommbu debbo rewoowo Yahuwah. Ko ontuma, o nuli mbatulaajo makko mawɗo on Elieesa, fii ɗaɓangol Issaaqa ɓeyngu e leydi inneteendi Haraana ka musiɓɓe annabi Ibraahiima ɓen wonunoo ton.

Elieesa yaaduno e mbatulaaɓe annabi Ibraahiima goo. Ka ɓe yahaynoo ton no woɗi moƴƴa. Ɓe naɓuno ngelooɗi sappo ronndinooɗi ɲaameete e fanndaaji. Ko honno Elieesa anndirayno debbo mo o ƴamanta Issaaqa on ? Ko Elieesa e mbatulaaɓe ɓe o yaadi ɓen hewti Haraana, ɓe darino takko woyndu ɓayri Elieesa annduno yimɓe aroyay jooni fii ƴoogugol ndiyan. O torii Yahuwah o wi’i : « Si mi torike jiwo yo okkoran ndiyan e si o okkoriilan min e ngelooɗi an ɗin ndiyan, mi annday ko on jiwo suɓiɗaa. »

Ko onsay jiwo inneteeɗo Rifqatu ari ka woyndu. Deftere Allah nden wi’i hari ko  o jiwo labaaɗo. Elieesa torii mo ndiyan yareteeɗan, e jiwo on wi’i : « Awa. Mi okkoray on ndiyan e mi ƴooganoyay kadi fii ngelooɗi mon ɗin. » Miijitee yarnugol ngelooɗi wonduɗi e ɗonka ! Rifqatu no haanuno yiltitaade ƴooga, ƴoogita. On yi’ii e oo fotoo ɗoo honno o woni e ƴoogirde ? — Elieesa ɲalduno no Yahuwah jaabori toraare makko nden.

Elieesa okki Rifqatu piiji moƴƴuɗi buy. Rifqatu yaadi e Elieesa e mbatulaaɓe ɓe o ardi ɓen ka suudu maɓɓe. Elieesa sifii fii honɗun annabi Ibraahiima nuliri mo haa ka maɓɓe e honno Yahuwah jaabori toraare makko nden. Mawɓe Rifqatu ɓen weltino fii ko Issaaqa faalaa jommbude jiwo maɓɓe on.

Hiɗon sikkude Rifqatu no faalanoo yo Issaaqa jommbu mo ? — Rifqatu annduno ko Yahuwah addi Elieesa haa ka maɓɓe. Ko ɗun waɗi ɓay mawɓe Rifqatu ɓen lanndike mo si mo faalaa yahude leydi Kanaana, Issaaqa jommba mo, o jaabi : « Hiihi, hilan faalaa yahude. » Ontuma o yaadi e Elieesa. Ɓayri ɓe hewtii leydi Kanaana, Issaaqa jommbi Rifqatu.

Yahuwah barkinno Rifqatu fii ko o waɗi ko Yahuwah faalanoo kon. Duuɓi heewuɗi feƴƴuno, annabi Iisaa ko ka nder beynguure makko o heɓa ! Si on wa’ii wa Rifqatu e si on weltinii Yahuwah, o barkinay on onon kadi.