TOƁERE 5
Honɗun woni miijo Allah ngon fii oo aduna ?
1. Fii honɗun Allah tagani leydi ndin ?
Yahuwah okkii tagaaɗo oo aduna. Aduna on ko wonunnde men. Ko ɗun waɗi, baaba Aadama e nene Hawaa ko tagaa, ko fii yo ɓe wuuru ɓe heɓa ɓiɓɓe e oo aduna. Malaa’ikaaɓe ɓen ko tagiraa ko no ɓe wonira ka kammu (Ayyuuba 38:4, 7, TMN). Ko sabu ɗun Allah ƴetti baaba Aadama, waɗi mo e nokkuure fotunde noddaande tutateeri Adni (Fuɗɗooɗe nden 2:15-17). Yahuwah okkuno mo moƴƴere kanko e ɓiɓɓe makko ɓen, ngurndan weluɗan luttaynooɗan e oo aduna. — Janngee 1 Yuuhanna 2:17 ; Fuɗɗooɗe nden 1:28.
Ka fuɗɗoode, hari ka tutateeri Adni tun wonunoo aljanna. Baaba Aadama e nene Hawaa hari ko yo ɓe heɓu ɓiɓɓe, ɓe hebbina aduna on fii yo aduna on fow wontu aljanna (Fuɗɗooɗe nden 1:28). Leydi ndin halketaake. Leydi ndin luttay wonude wonunnde tagaaɗo. — Janngee Zabuura 104:5, TMN.
Ndaaree vidio on Fii hondun Allah tagani leydi ndin ?
2. Honɗun waɗi aduna on wonaa aljanna ?
Baaba Aadama e nene Hawaa yedduno Allah. Ko ɗun waɗi, Yahuwah raɗiiɓe ka tutateeri Adni. Ɓe faɗi Aljanna. Hay gooto waawaali wattude ko ɓe faɗi kon. Gila onsay, ko yimɓe bonɓe laami oo aduna. — Janngee Fuɗɗooɗe nden 3:23, 24.
Yahuwah selii ko o miijaninoo en on kon ? Oo’o. Kanko woni Joomiraaɗo on. O fenataa (Isaaya 45:18, TMN). O wattoyay tagaaɗo no o wonirnoo non ka fuɗɗoode. — Janngee Zabuura 37:11, 34, TMN.
3. Ko honno Aljanna wattiroytee ?
Aljanna wattoyte e oo aduna e saa’i laamu annabi Iisaa ngun, mo Allah suɓii on. E oo gere inneteeɗo Har-Magadaana, annabi Iisaa wonoyay hoore malaa’ikaaɓe Allah ɓen fii mulugol kala mo wonanaa Allah. Ontuma, annabi Iisaa sokoyay Seytaane fii duuɓi 1 000. Yimɓe Allah ɓen daɗoyay ɓayri annabi Iisaa ɗowoyay ɓe, o dannda ɓe. Ɓe heɓoyay ngurndan weluɗan luttayɗan ka Aljanna e hoore ndii leydi. — Janngee Feɲɲinannde 20:1-3 ; 21:3, 4.
4. Saa’i hommbo tampere lannata ?
Saa’i hommbo Allah lannata ko boni hoore ndii leydi ? Annabi Iisaa jonnuno maande hollugol saa’i fii ko boni kon fow lannata. Ko woni e feƴƴude kon hannde no hulɓinanii tagaaɗo. No holli kadi, fewndike ka oo aduna ɗoo lannata. — Janngee Matta 24:3, 7-14, 21, 22.
Saa’i laamu annabi Iisaa ngun e nder duuɓi 1 000, o lannoyay tampereeji ɗin fow (Isaaya 9:6, 7 ; 11:9, TMN). E hoore wonugol lanɗo, o wonoyay “ Yottinoowo ” e o montoyay junuubaaji ɓee yiɗuɓe Allah. Allah rewray annabi Iisaa fii lannugol ɲabbeeli, nawyugol e mayde. — Janngee Isaaya 33:24, TMN ; Feɲɲinannde 21:4.
5. Homɓe wuuroyta ka Aljanna ?
Ka Fottirde Seedeeɓe Yahuwah ɓen, on taway yimɓe yiɗuɓe Allah e faalaaɓe janngude honno ɓe ɗoftortoo mo.
Ko yimɓe ɗoftiiɓe Allah ɓen wuuroyta ka Aljanna (1 Yuuhanna 2:17). Annabi Iisaa no nuli taalibaaɓe makko ɓen yo waajo, ɓe janna yimɓe ɓen fii no ɓe wonira jiyaaɓe Allah. Hannde, Yahuwah no wallude yimɓe buy fii no ɓe hebilano fii ngurndan ko o okkoyta en janngo ka Aljanna hoore ndii leydi (Safaniiya 2:3, TMN). Ka Fottirde Seedeeɓe Yahuwah ɓen, yimɓe no janngude no ɓe wonira moodi e baaba moƴƴo, e no ɓe wonira ɓeyngu e nene moƴƴo. Paykoy e mawɓe no rewude Allah e hiɓe janngude no ɓe nafitora oo kibaaru moƴƴo. — Janngee Feɲɲinannde 15:4.
