1, 2. Ko misal honngal hollaa fii anndugol goonga on fii diina ?

KO HONNO anndirten Allah ? Hino haani ka taskoɗen ko diinaaji ɗin woni e jannude kon fow ? Ɗun waawataa gasude. Hay si hiɗen waawi waɗude ɗun, honno anndirten ko jannetee kon ko goonga ?

² Ko pellet, sabu ɗii miijooji sertuɗi fii rewugol Allah, hiɗen haani heɓude feere fii anndugol goonga on, huunde ko yimɓe ɓen fow fottani. Ƴetten misal : wano si yeddondiral memminike ka maakiti fii junndi baggi. Yeeyoowo on wi’a ko meeter tati, kono soodoowo on wi’a ɗun timmaa. Ko honno ɓe jittirta ɗun ? Ko yo ɓe eɓɓir baggi on santimeeter.

3. Ko fii honɗun Deftere Allah nden winndiraa ?

³ Feere no woodi fii anndugol goonga on fii diina ? Hiihi, ko Deftere Allah nden. Allah no faalaa yo fow anndu goonga on fii makko, ko fii ɗun o yamiri annabaaɓe makko ɓen fii yo ɓe winndu Deftere makko nden. Miliyaarji mayre no muulaa. Hinde waylaa nde fow maa pecce pecce e nder haalaaji ɓuruɗi 2 100. Ko ɗun wallata yimɓe buy janngugol Deftere Allah nden ka haala maɓɓe.

4. Ko piiji honɗi Deftere Allah nden yewti fii mun ?

⁴ Deftere Allah nden ko dokkal hittungal iwrungal ka Allah. Hinde sifii piiji ko en waawataano anndude fii mun. Hinde yewti fii wonuɓe ɓen ka kammu. Hinde  holli miijooji Allah ɗin, no o siforii non e faale makko on. Hinde holli honno Allah huuwondiraynoo e yimɓe ɓen e nder duuɓi guluuji guluuji. Hinde yewti fii ko aroyta janngo. E hinde holli honno yiireten laawol nawrayngol ngol e ngurndan poomayankejan.

5. Ko misal honngal holli Deftere Allah nden no yiitidi e antaaku ?

⁵ Piiji buy no woodi ko holli fii honɗun hoolantoɗen Deftere Allah nden ko Daaluyee Allah on. Ko fii Deftere Allah nden no yiitidi e antaaku. Ko feƴƴi, yimɓe ɓen sikkuno leydi ndin ko e hoore goɗɗun ndi jooɗii. E nder Afrik senngo hirnaange, yimɓe ɓen no hoolinoo leydi ndin ko e hoore mboddi taariindi ndi jooɗii, taariindi nde laabi 3 500 dow leydi ndin e nde laabi 3 500 ley mayri. Kono ko ɓuri duuɓi 3 500 ɓaawo ɗoo, Deftere Allah nden holluno leydi ndin yowaaki « e hoore huunde ». (Ayyuuba 26:7, Traduction du monde nouveau.)

6. Ko honɗun holli Deftere Allah nden ko ka Allah nde iwri ?

⁶ No Deftere Allah nden yewtiri non fii ko aroyta kon no holli ko ka Allah nde iwri. Allah no serti e banii-Aadama ɓayri himo anndi fii ko aroyta kon e kala ko o daali aray e waɗude.

7. Ko piiji honɗi Deftere Allah nden yewti fii mun ko ari e waɗude ?

⁷ Piiji buy ko Allah daalunoo ɓaawo ɗoo aruno e waɗude. E piide misal, duuɓi 700 ado yo annabi Iisaa jibineede, Deftere Allah nden wi’uno annabi Iisaa jibinte e nder saare Bayti-Lahiimi, e ko ɗun tigi waɗunoo (Mikaa 5:2, TMN ; Matta 2:3-9). E hoore ɗun kadi, Deftere Allah nden yewtuno piiji buy fii annabi Iisaa. Nde wi’i, jibinoowo annabi Iisaa on wonay jiwo mo anndaa gorko e ɓe janfoto annabi Iisaa fii tammaaji cappanɗe tati kaalisi. Ɗun ɗoo fow aruno e waɗude. Hay gooto waawataano anndude fii ko aroyta wano nii (Isaaya 7:14, TMN ; Zakariyaa’u 11:12, 13, TMN ; Matta 1:22, 23 ; 27:3-5).

8. Ko piiji honɗi Deftere Allah nden yewti fii mun ko woni e laataade hannde e ko honɗun ɗi holli ?

⁸ Piiji buy ko Allah daalunoo no laataade hannde. Hino goɗɗi e majji :

•   « Hareeji waɗoyay hakkunde leƴƴi ɗin. Laameteeriiji ɗin kadi immondirana. Awa kadi dimbanɗe leydi tiiɗuɗe waɗa, heege e ɲabbeeli raaɓooji waɗa e nokkeeli goo » (Luuka 21:10, 11).

• « Anngal peewal ngal » ɗuuɗay. (Matta 24:12.)

• « Ka sakkitoode aduna, [...] yimɓe ɓen laatoyto ɓurtintiniiɓe, yiɗuɓe kaalisi, [...] dartotooɓe mawɓe mun, [...] ɓe waawataa hoore mun, hunƴuɓe, ayɓe moƴƴere, [...] heewuɓe townitaare, yiɗuɓe faale mun on ɓuri Alla » (2 Timotee 3:1-5).

Hiɗon sikki ɗii piiji fow alaa e waɗude hannde ? Ɗii konnguɗi goonga e selluɗi-finnde no holli Deftere Allah nden wonaa deftere meere. Ko Daaluyee Allah on (2 Timotee 3:16).

9, 10. Ko honɗun holli Allah newnanaali yimɓe ɓen wattitugol Deftere makko nden ?

⁹ Miijitee wano ko on jom iisin e hiɗon waɗi sariyaaji fii gollooɓe mon ɓen. Si tawii gaɲo mon on ittii ko winnduɗon kon, ko honɗun waɗoton ? Hinaa on wattay ko o itti kon ? Ko wano non kadi, Allah newnanaali yimɓe ɓen wattitugol goonga Daaluyee makko on ka nder Deftere makko.

¹⁰ Ɓee faalanooɓe ittude ko Daaluyee Allah on janni kon waawaali. Si en eɓɓindirii Deftere Allah nde jogiɗen nden hannde e egganɗe Deftere Allah nden ɓaawo ɗoo, en taway fow ko gootun. Ko ɗun holli Deftere Allah nden ko haqiiqa.