1. Ko honɗun haanuɗen waɗude ko weltinta Allah ?

SI HIƊEN faalaa huuwondirde e Allah no haaniri non, ko yo en selu diina fenaande. Hiɗen haani jokkude diina goonga. Hannde miliyonji yimɓe e nder aduna on fow no waɗude ɗun.

2. Ko honto yi’eten Seedeeɓe Yahuwah ɓen, e ko honɗun woni golle maɓɓe ɗen ?

² Wano no Deftere Allah nden wi’irnoo non, rewooɓe Allah ɓen wonay « jamaa moolanaaɗo [...] mo leƴƴi ɗin fow, mo bolondaaji ɗin fow, mo jamaaji ɗin fow e mo haalaaji ɗin fow ». (Feɲɲinannde 7:9.) E nder leyɗe 239, miliyonji Seedeeɓe Yahuwah no wallude yimɓe goo fii no ɓe anndira Yahuwah, giggol makko ngol e ko o yamiri en kon.

3. Ko hommbo Seedeeɓe Yahuwah ɓen woni e rewude, e ko honɗun ɓe jaɓataa waɗude ?

³ Seedeeɓe Yahuwah ɓen no hoolii ko Yahuwah tun haanuɗen rewude. Ɓe jaɓataa sujjande sanamuuji maa mbodooji (1 Yuuhanna 5:21). Ɓe teddinirtaa mayɓe e hiirangol ɓe, jaarana ɓe maa waɗugol piiji ɗi haanaa fii ɓantugol diina fenaande maa jokka « janndeeji jinna ». (1 Timotee 4:1.) Kono, ɓe multay heɓuɓe faatunnde, ɓe sifanoo ɓe ko Allah fodi kon fii immintingol mayɓe ɓen ka aljanna e hoore ndii leydi (Yuuhanna 5:28, 29 ; Kuuɗe sahaabaaɓe ɓen 24:15).

4. Ko honno yimɓe Allah ɓen yiiri mbileyaagal e ndureyaagal ?

⁴ Seedeeɓe Yahuwah ɓen waɗataa mbileyaagal, ɲanneyaagal maa ndureyaagal ɓayri hiɓe anndi ɗun ko ka Ibuliisa iwri. Ɓe hoolortaako mbileyaagal fii danndugol hoore maɓɓe, ko Yahuwah ɓe hoolii (Tindi 18:10, TMN).

5. Ko wano honno Seedeeɓe Yahuwah ɓen « jeyaaka e oo aduna » ?

⁵ Annabi Iisaa wi’uno taalibaaɓe makko ɓen « jeyaaka e oo aduna ». (Yuuhanna 17:16.) Annabi Iisaa kanko tigi o jaɓaano taweede e politiki e saa’i makko on (Yuuhanna 6:15). Ko wano non kadi, Seedeeɓe Yahuwah ɓen tawaaka e politiki, fii leƴƴi leƴƴi e fii ɓurugol woɓɓe goo e oo aduna. Kono, ɓe yoɓay duuti maɓɓe ɗin e ɓe ɗoftoo sariyaaji leydi ka ɓe woni ɗon (Yuuhanna 15:19 ; Roomu 13:1, 7).

6. Ko sariyaaji honɗi jiyaaɓe Allah ɓen jokki fii tiggugol e fii seedigal ?

⁶ Ɓayri hiɓe teddini sariyaaji laamu ngun, Seedeeɓe Yahuwah ɓen winndoto si ɓe tiggude (Tiituusa 3:1). E hoore ko ɓe ɗoftii sariyaaji Allah ɗin kon, worɓe ɓen jaɓataa jommbude rewɓe ɗiɗo haa tato maa nayo (1 Timotee 3:2). E hoore ɗun kadi, sabu ko jiyaaɓe Allah ɓen huutorta sariyaaji Allah ɗin kon, ɗun haɗay ɓe waɗugol seedigal.

7. Honno Seedeeɓe Yahuwah ɓen hollirta giggol fii ɗimmooɓe maɓɓe ɓen ?

⁷ Seedeeɓe Yahuwah ɓen no yiɗindiri. Ngol giggol, e giggol maɓɓe ngol fii Allah, no fottindini ɓe e neene-gootoyaagal, fii kala hinaa ɓe musidal gootal e leɲol gootol. Si masiibo waɗii maa satteendi heɓike, Seedeeɓe Yahuwah ɓen wallindiray heɲa. No Seedeeɓe Yahuwah ɓen wuurirta non no holli giggol maɓɓe ngol fii ɗimmooɓe maɓɓe ɓen (Yuuhanna 13:35).

8. Ko honɗun e piiji bonɗi woni ko jamaa Allah on waɗataa ?

⁸ Jamaa Yahuwah on no wakkilii gollugol fii no ɓe wuurira ngurndan laaɓuɗan e hoore peewal. Ɓe wujjataa, ɓe fenataa, ɓe jeenataa, ɓe manndilataa e ɓe waɗataa haajuuji ɗi laaɓaa. Gorko piyataa ɓeyngu mun. Ado yo ɓe wonude Seedeeɓe Yahuwah, woɓɓe e maɓɓe waɗayno sifa ɗii piiji, kono e hoore ballal Yahuwah ngal ɓe accitii waɗugol sifa ɗun. Yeeso Allah ɓe wonii laɓɓinaaɓe (1 Korenti 6:9-11).

9. Ko honɗun deftere goo wi’i fii iglisiiji ruuhuyanke Afriken ?

⁹ Ko goonga, diinaaji buy no wi’a ko kamɓe jogii goonga on. Ɓe holliray ɗun golle maɓɓe ɗuuɗuɗe ko ɓe waɗata kon. E piide misal, wano ko noddaa igliisiiji ruuhuyanke Afriken, deftere goo wi’i : « Golle mbileeɓe ɓen maa ndureeɓe ɓen ko [mojobe kese almasiiyaaɓe] [...] ƴettiti ɗe. Ɓe wi’a hiɓe waɗude hiitanɗe e kaawakeeji. Annabaaɓe maɓɓe ɓen no wi’a hiɓe mari giiɗe e hiɓe sifoo koyɗi. Ɓe huutora ndiyan hormorɗan, nebban hormorɗan, ndoondi, buusii e cuuraay fii ɲawndugol e fii haɗugol nawnaare. »

10, 11. Ko fii honɗun kaawakeeji ɗin hannde hollataa diina ko ka Allah iwri ?

¹⁰ Wonuɓe e ɗii diinaaji no wi’a kaawakeeji ɗin no holli Allah no barkini diinaaji maɓɓe ɗin. Kono ɗii kaawakeeji hollataa Yahuwah no jaɓani ɓe. Seytaane okkay woɓɓe e maɓɓe doole fii waɗugol kaawakeeji (2 Tesalonii 2:9). E hoore ɗun kadi, Deftere Allah nden haaluno fii piiji wano dokkal Allah fii waɗugol kaawakeeji, hiitagol, wowlugol haalaaji janani, e ganndal hertiingal, ɗun fow « feƴƴay ». (1 Korenti 13:8.)

¹¹ Annabi Iisaa waajino : « Hinaa wi’ooɓe lan “ Koohoojo, Koohoojo ” ɓen fow naatata ka laamateeri kammu, kono ko waɗayɓe ko Baaba an Wonɗo ka kammu on faalaa kon tun. Nden ɲande, buy wi’oyay lan : “ Koohoojo, Koohoojo ! Taw si hinaa e innde maa nden men haaliraynoo ko Alla longini men, men raɗora kadi jinnaaji e innde maa, men waɗa kaawekeeji moƴƴi buy e innde maa ? ” Onsay mi wi’oyay ɓe : “ Mi andaano on few. Pottitee lan, yo onon waɗooɓe ko boni ! ” » (Matta 7:21-23.)

12. Ko homɓe naatoyta ka Laamateeri kammu ?

¹² Ko homɓe non naatoyta ka Laamateeri kammu ? Ko waɗayɓe faale Yahuwah on.

13. Ko golle honɗe Allah yamiri jamaa makko on waɗugol hannde, e ko homɓe woni e waɗude ɗun ?

¹³ Honɗun woni faale Allah on fii jamaa makko on hannde ? Annabi Iisaa wi’uno : « Oo Kibaaru Moƴƴo fii laamu Alla ngun feɲɲinte e aduna on fow, fii no leƴƴi ɗin fow nanira seeditoore nden » (Matta 24:14). Ko ɗee golle Seedeeɓe Yahuwah ɓen woni e waɗude hannde e hoore weltaare.

14. Ko honno Laamu Allah ngun woniri, e ko hommbo laamoytoo ?

¹⁴ E nder « aduna on fow », Seedeeɓe Yahuwah ɓen no feɲɲinde Laamu Allah ngun, laamu wonungu ngun ka kammu laamoytoongu aduna on fow e hoore peewal. Hiɓe jannude fii ko Yahuwah suɓii annabi Iisaa fii wonugol Lanɗo Laamu makko ngun, e mbatulaaɓe 144 000 suɓaaɓe hakkunde yimɓe ɓe o laamodoytoo ɓen (Danu’iila 7:14, 18, TMN ; Feɲɲinannde 14:1, 4).

15. Ko honɗun Laamu Allah ngun muloyta ?

¹⁵ Seedeeɓe Yahuwah ɓen no huutorde Deftere Allah nden, ɓe holla yimɓe ɓen ko Laamu Allah ngun muloyta Seytaane kon e kala ko o wondi. Hannde kadi diina fenaande e jannde maɓɓe fenaande fii teddingol Ibuliisa, hara ɓe teddintaa Allah haray alaa (Feɲɲinannde 18:8). Laamuuji tagaaɗo dartiiɗi Allah ɗin fow muloyay (Danu’iila 2:44, TMN).

16. Homɓe wonoyta yimɓe annabi Iisaa ɓen, e ko honto ɓe wuuroyta ?

¹⁶ E hoore ɗun kadi, Seedeeɓe Yahuwah ɓen no hollude ko annabi Iisaa waɗoyta kon fii yimɓe wonuɓe e waɗude ko Allah yamiri ɓe kon. Ɓe wonoyay yimɓe makko ɓen e hoore ndii leydi. Deftere Allah nden wi’i : « Ko fii o faaboyto miskiino wulloowo on fii ballal, kadi yankiniiɗo on mo alaa goɗɗo ko walla mo. O yurmoyte yankiniiɗo on e miskiino on, e o danndoyay wonkiiji miskinaaɓe ɓen » (Zabuura 72:12, 13, TMN).

17. Ko homɓe tun woni e feɲɲinde Laamu Allah ngun ?

¹⁷ Mojobere goo yimɓe alaa waɗooɓe faale Allah on, ɓe feɲɲina kibaaru moƴƴo on fii Laamu Allah ngun. Ko Seedeeɓe Yahuwah ɓen tun woni e anndinde aduna on fow fii Laamu Allah ngun.