1, 2. Ko honɗun yimɓe buy hoolii fii mayɓe ɓen ?

YIMƁE buy no hoolii mayde wonaa kattudi wonkii, kono ko daawal mbayliigu fii wuurugol nokku goo. Yimɓe buy no sikkude maamiraaɓe maɓɓe feƴƴinɓe ɓen iwii e oo aduna ka ɓe yi’etee, ɓe yahii ka ɓe yi’etaake, ɓe iwii hakkunde yimɓe ɓen ɓe yahii ka aduna ruuhu.

² Yimɓe no hoolii maamiraaɓe maɓɓe ɓen maa ruuhuuji maɓɓe ɗin dannday ɓe e wallay ɓe no ɓe heɓira jawdi e hoore ndii leydi. Hiɓe miiji, ruuhuuji maamiraaɓe maɓɓe ɗin no dolni, ɗi waaway ɓe wallude fii no ɓe heɓira baagol moƴƴol, ɓanta fii maɓɓe e dannda ɓe fii bone. Si ɓe yejitii ɓe maa ɓe ɗaɓɓitii ɓe, ɓe waɗay ɓe ko boni : wano nawnaare, miskinaaku e masiibo.

3. Ko honno yimɓe goo rewirta maamiraaɓe maɓɓe ɓen ?

³ Yimɓe ɓen no waɗa piiji buy fii rewugol maamiraaɓe maɓɓe ɓen, fii teddingol ɓe e fii huuwondirgol e maɓɓe. Sifa ɗii piiji no yi’ee si goɗɗo maayi, wano fii surrugol mo maa ka ittugol sadaka fii makko. Sifaaji goo no woodi fii rewugol maamiraaɓe maɓɓe ɓen. E piide misal, ado yo ɓe yarude konnjan, ɓe hibbay seeɗa ka leydi fii maamiraaɓe maɓɓe ɓen. Kadi, si ɓe defii, ɓe rottay ɓe acca seeɗa ka nder wureere fii maamiraaɓe maɓɓe ɓen si aroyii, ɓe heɓa ko ɓe ɲaama.

4. Ko honɗun yimɓe buy hoolii fii wonkii ?

⁴ Woɓɓe goo no hoolii aaden no mari wonkii ki maayataa si ɓanndu ndun maayii. Hiɓe miiji, si goɗɗo waɗii ko moƴƴi, wonkii makko kin yahay ka aljanna. Kono, si tawii ontigi waɗii ko boni, wonkii makko kin yahay ka jahannama. Kenen yimɓe ɓen hawtindiray ngoo miijo e naamuuji. E piide misal, surnal haaloowo fii mayɓe wi’i, ɓee ka igliis wi’ay « mayɗo on yahii ka maamiraaɓe mum ɓen woni ton ». Ɗee dewe fow no holli ko yimɓe ɓen hoolii kon, ɓe wi’a si goɗɗo maayii wonkii makko kin maayataa. Ko honɗun Deftere Allah nden yewti en fii ɗun ?

5, 6. Ko honɗun Deftere Allah nden wi’i fii wonkii ?

⁵ Deftere Allah nden no holli wonkii kin wonaa goɗɗun ko woni e nder ɓanndu aaden ; ko aaden on tigi woni wonkii. E piide misal, ko Allah tagi baaba Aadama, o « heɓi ngurndan, o wuuri ». (Fuɗɗoode nden 2:7.) Baaba Aadama jonnaaka wonkii, hari ko o wonkii, o aaden timmuɗo.

⁶ Ko ɗun waɗi, waylunooɓe Deftere Allah nden ila e haala arana kan, ɓe wayluno « wonkii » wano « aaden », « tagaaɗo » maa « neɗɗanke ». Ɗun ŋalɗintaa en si en janngii tagaaɗo no jibinee (Fuɗɗoode nden 46:18). Wonkii no ɲaama (Sariyaaji lewiyankeeɓe ɓen 7:20, TMN). Wonkii no  hoora (Zabuura 35:13, TMN). Wonkii no wulla, ki faɗɗete e hiki jokkee (Yeremiiya 13:17, TMN ; Yuunusa 2:7, TMN ; Zabuura 7:5, TMN). Wonkii no nanngee e no jolkee (Yaɲɲannde sariyaaji ɗin 24:7, TMN ; Zabuura 105:18, TMN). Ɗee kalfe « wonkii » e « aaden » ko woni e ɗee aayeeje fow no waylaa ila e haala arana kan e no firi huunde wootere.

7. Ko aayeeje honɗe holli wonkii kin no maaya ?

⁷ Ɓayri wonkii ko tagaaɗo, si on tagaaɗo maayii, wonkii kin maayay. Hazqi’iila 18:4 (TMN) wi’i : « Kala wonkii waɗuki junuubu — ko kanki maayata. » Kuuɗe sahaabaaɓe ɓen 3:23 kadi wi’i : « Kono kala on [wonkii maa aaden] mo heɗoyaaki on annabaajo, o suutetee hakkunde jamaa on. » Ko ɗun woni, alaa ko wuurata e nder ɓanndu si en maayii.

8. Ko honɗun woni ruuhu e nder ɓanndu ?

⁸ Ruuhu on e wonkii kin wonaa gootun. Ruuhu on ko doole wonkii kin, ko jonnata en doole fii waɗugol piiji ɗin fow. Ruuhu on no wa’i wa kuuran. Kuuran no waawi gollinde vantilater maa telefon, kono vantilater on maa telefon on gollintaa hoore mun. Ko wano non kadi, ruuhu on ka nder ɓanndu wallirta en no naniren, no yiiren e no miijoren. Kono ruuhu on tun waawataa waɗude hay huunde si gite, noppi maa ngaandi alaa. Ko ɗun waɗi Deftere Allah nden wowli fii aaden : « Ruuhu makko on yalta, o yiltoo ka leydi. Nden ɲannde miijooji makko ɗin fow hayray » (Zabuura 146:4, TMN).

9. Ko honɗun woni ko wonkii e ruuhu waɗataa ?

⁹ Ko ɗun waɗi, wano no Deftere Allah nden wi’iri non, ruuhu on maa wonkii kin yaltataa e nder ɓanndu fii wuurugol nokku goo si en maayii.

10. Ko honɗun Deftere Allah nden wi’i ko feƴƴata si en maayii ?

¹⁰ Ko honɗun non feƴƴata si en maayii ? Ɓayri ko Yahuwah tagi en, himo anndi kadi ko feƴƴata si en maayii. Daaluyee makko on janni, mayɓe ɓen alaa ngurndan, ɓe waawataa nanude, ɓe yi’ataa, ɓe wowlataa, maa ɓe miijitoo goɗɗun. Deftere Allah nden wi’i :

• « Mayɓe ɓen anndaa hay huunde » (Waajotooɗo on 9:5, TMN).

• « Giggol maɓɓe ngol e ngayngu maɓɓe ngun e nawliigu maɓɓe ngun haray hayri » (Waajotooɗo on 9:6, TMN).

• « Golle maa eɓɓoore maa ganndal maa mokobayaagal alaa ka gaburu ka yahataa ton » (Waajotooɗo on 9:10, TMN).

11. Ko honɗun Yahuwah daalannoo baaba Aadama ko o waɗi junuubu ?

¹¹ Miijitee ko Deftere Allah nden wi’i kon fii maamiraawo men arano on, baaba Aadama. Yahuwah tagiri baaba Aadama « mbullaari ». (Fuɗɗoode nden 2:7.) Si baaba Aadama ɗoftino Yahuwah, o wuurayno haa poomaa e hoore ndii leydi. Kono, baaba Aadama ɗoftanooki Yahuwah, ko ɗun waɗi o maayi. Ko honto baaba Aadama yahi ko o maayii ? Allah daalanno baaba Aadama : « A ɓiiray lakkere ka tiinde maa si ɲaamaa haa ruttoɗaa e ndii leydi ndi yaltuɗaa e mun, ko fii ko a mbullaari, a yiltoto wontaa mbullaari » (Fuɗɗoode nden 3:19).

12. Ko honɗun heɓunoo baaba Aadama ko o maayii ?

¹² Ko honto baaba Aadama wonunoo ado Yahuwah tagude mo ? Hay nokku. Hari o wuuraa. Ko ɗun waɗi, Yahuwah daalani baaba Aadama o yiltoto « e ndii leydi », ko ɗun woni o wuurataa wa mbullaari ndin. Ko baaba Aadama maayii, o yahaali ka kammu. O yahaano kadi ka aljanna maa ka jahannama. O yiltitino ka leydi o wonti mbullaari, o acci wuurude.

13. Ko honɗun feƴƴata si banii-Aadama e kulle ɗen maayii ?

¹³ Sifa ɗun heɓay kala tagaaɗo si o maayii ? Ko non tigi woniri. Deftere Allah nden wi’i : « Fow (banii-Aadama e kulle ɗen) no yaarude nokkun gootun. Fow ko ka mbullaari iwri, e fow yiltoto ka mbullaari » (Waajotooɗo on 3:19, 20, TMN).

14. Ko tanƴinaare honnde maruɗen fii mayɓe ɓen ?

 ¹⁴ Deftere Allah nden wi’i Allah immintinoyay mayɓe ɓen ka aljanna e hoore ndii leydi (Yuuhanna 5:28, 29 ; Kuuɗe sahaabaaɓe ɓen 24:15). Kono on saa’i ko ko aroyta. Hannde, mayɓe ɓen no wa’i wa ɗaaniiɓe (Yuuhanna 11:11-14). En haanaa hulude ɓe maa rewude ɓe, ɓayri ɓe waawataa en wallude maa ɓe waɗa en ko boni.

15, 16. Ko honno Seytaane woni e waɗirde fii no yimɓe ɓen miijoro si goɗɗo maayii, no woodi e makko goɗɗun ko maayataa ?

¹⁵ Ko Seytaane feni ndee fenaade o wi’i en maayataa. Fii yo yimɓe ɓen hoolo ndee fenaade makko, kanko e jinnaaji makko ɗin no waɗude yimɓe ɓen miijoo ko ruuhuuji mayɓe ɓen woni sabu ɲabbeeli e tampereeji ko woni e heɓude en kon. Ko fii tampereeji goo ko jinnaaji ɗin woni sabu mun. E hiɗen anndi kadi boneeji goo wonaa jinnaaji ɗin woni sabu mun. Kono wonaa goonga innugol piiji bonɗi ko heɓata en kon ko mayɓe ɓen woni sabu mun.

¹⁶ Jinnaaji ɗin no mari feere goo fii waɗugol yimɓe ɓen miijoo ko Deftere Allah nden wi’i kon fii mayɓe ɓen wonaa goonga. Ɗi ɗaynay yimɓe ɓen haa ɓe sikka ɓe yi’ii maa ɓe yewtidii e mayɓe. Fii waɗugol ɗun, jinnaaji ɗin rewray giiɗe, koyɗi, ndaarooɓe maa piiji goo. Kono, wonaa mayɓe ɓen ɓe woni yewtidude e mun, ko jinnaaji waɗitiiɗi wa yimɓe mayɓe. Ko ɗun waɗi, Yahuwah no haɗi yewtidugol e jinnaaji maa rewugol mayɓe (Yaɲɲannde sariyaaji ɗin 18:10-12, TMN ; Zakariyaa’u 10:2, TMN).