SENNGO 1
Ko diinaaji ɗin fow woni e jannude goonga on ?
1. Ko diinaaji honɗi woni e nder aduna on ?
YIMƁE buy no anndi rewugol Allah no hitti. Kono, fayda ɓe fottaa e huunde wootere fii rewugol mo. Woɓɓe yahay ka jaami’u, e woɓɓe goo yahay ka hormorde. E woɓɓe kadi yahay ka igliis. Kono wota on sikku ko diinaaji tati tun woni e nder aduna on fow. Hakkunde julɓe ɓen, sariyaaji maɓɓe ɗin e dewe maɓɓe ɗen no serti. Rewooɓe sanamuuji ɗin kadi no serti naamuuji nokkeeli buy. Hay yahooɓe ka igliis ɓen fottaa e hoore dewal gootal. E nder aduna on no woodi igliisiiji guluuji e guluuji sertuɗi wonanɗi hoore majji.
Diina men kan no haanii ɲiiɓude e goonga on
2. (a) Ko honɗun waɗata goɗɗo jokka diina ? (b) Ko honɗun hollata diina men kan welataa Allah ?
2 Fii honɗun yimɓe ɓen no rewirde Allah no ɓe faaliraa non ? Buy no jokki diina mawɓe maɓɓe kan. Ko wonunoo e feƴƴude ɓaawo ɗoo kon, no battini yimɓe rewugol Allah no ɓe faaliraa non hannde. Wano ndee deftere inneteende The Africans— A Triple Heritage wi’i : « Islaam saakitino ka senngo nano Sahara e nder jihaadi. Ko wano non kadi almasiiyaaɓe ɓen saakitori ka senngo ɲaamo Sahara. Si tawii ka senngo
nano Sahara islaam saakitorno kaafa, ka senngo ɲaamo Sahara diina kretien saakitorno pinka. » Buy hakkunde men no hoolii haa nii diina maɓɓe kan no wela Allah. Kono en innataa diina no moƴƴi ɓayri mawɓe men ɓen no jokki ka maa yimɓe e leydi goo forsuno maamiraaɓe men ɓen jokkugol kan diinaa.3-5. Ko misal honngal wallata en anndugol wonaa diinaaji ɗin fow woni e jannude goonga on ?
3 Tawa diinaaji ɗin fow no wi’a no hollude laawol moƴƴol fii rewugol Allah, kono miijooji maɓɓe ɗin no serti. Hiɓe jannude piiji buy fii Allah wano honno Allah woniri e ko o faalaa yo en waɗu. Miijitee : wano hiɗon heɓi golle nokku goo. Ɲannde fuɗɗiɗon gollude, nanon patoron on alaa ɗon. Ontuma lanndoɗon gollooɓe tato honɗun haanuɗon waɗude. Golloowo arano on wi’a patoron on no faalaa yo on fittu suudu ndun. Ɗiɗaɓo on wi’a ko yo on pentu suudu ndun. Tammo on wi’a ko yo on sennditu ɓataaki ɗin.
4 Onsay, lanndoɗon gollooɓe ɓen fii patoron on. Arano on wi’a patoron on ko o suka juutuɗo e ɲaaɗuɗo. Ɗimmo on wi’a ko o mawɗo daɓɓo moƴƴuɗo. Tammo on wi’a patoron on hinaa gorko few, patoron on ko debbo. On annday kisan gollooɓe ɓen tato alaa e wowlude goonga. Si on faalaaka yaltude golle, on waɗay feere anndugol hommbo woni patoron on e ko honɗun o faalaa yo on waɗu.
5 Ko wano non kadi fii diina. Ɓayri yimɓe ɓen no joggii miijooji buy fii no Allah sifori non e ko o faalaa yo en waɗu, hiɗen haani fellitude no rewirten Allah non no yiitidi e goonga on. Kono ko honno anndirten goonga on fii Allah ?