1. Fii rewugol, ko honɗun yimɓe ɓen hannde haani suɓaade ?

ANNABI IISAA wi’uno : « Kala mo aldaa e an haray ko gaɲo an » (Matta 12:30). Ko si en wonay senngo Yahuwah maa wonen senngo Seytaane. Yimɓe buy no sikkude hiɓe rewirde Allah no haaniri non, kono Deftere Allah nden wi’i Seytaane no faljinde « yimɓe aduna on fow ». (Feɲɲinannde 12:9.) Miliyonji yimɓe no hoolii hiɓe rewude Allah, kono tigi tigi on ko Ibuliisa ɓe woni e rewude ! Yimɓe ɓen hannde no haani suɓaade : hiɓe haani rewude Yahuwah, « Allah mo goonga » maa ɓe jokka Seytaane, « baaba penaale ». (Zabuura 31:5, TMN ; Yuuhanna 8:44.)

2. Ko honno Seytaane sonnjirta yimɓe ɓen fii wota ɓe rewu Yahuwah ?

² Ƴettugol ahadi fii rewugol Allah ko huunde moƴƴunde, ko ɗun Allah jaɓanta en. Kono Seytaane weltotaako yi’ugol goɗɗo no rewa Allah, o sonnjay kala waɗoowo ɗun. O waɗiray ɗun si o imminii woɓɓe goo wano goreeɓe men ɓen maa musiɓɓe men ɓen fii jalugol en maa ɓe dartoo en. Annabi Iisaa waajino : « Yimɓe suudu ontigi ndun wona ayɓe makko » (Matta 10:36).

3. Si mawɓe mon ɓen maa goreeɓe mon ɓen dartike on fii ko rewoton Allah kon, honno gerdoton ?

³ Si ɗun heɓii on, ko honno gerdoton ? Buy no anndi ɓe rewirtaa Allah no moƴƴiri non, kono hiɓe aami selugol ɗun. Hiɓe sikkude si ɓe waɗii ɗun haray ɓe ɗoftaaki mawɓe maɓɓe ɓen. Hiɗen haani  miijoraade nii ? Si on nanii woɓɓe ka ɓeynguure mon no ƴettude doroogu, on waajotaako ɓe fii innugol ɗun bonnay fii maɓɓe ? On tawtataa ɓe fii ƴettugol doroogu on, kaa ?

4. Ko honɗun Yaasuwa wi’uno Banii-Isra’iila’en e saa’i makko fii rewugol Allah ?

⁴ Yaasuwa waajino Banii-Isra’iila’en yo ɓe selu waɗugol piiji bonɗi ko maamiraaɓe maɓɓe ɓen waɗaynoo kon. O wi’i : « Jooni non hulee Yahuwah e rewon mo e hoore nunɗal e goonga, itton ɗii allaaji ɗi maamiraaɓe mon ɓen rewaynoo ka gaɗa caangol e nder Misira, e rewon Yahuwah » (Yaasuwa 24:14, TMN). Yaasuwa ɗoftino Allah, ko ɗun waɗi Yahuwah barkinno mo. Si en ɗoftike Yahuwah, o barkinay en enen kadi (2 Samu’iila 22:26, TMN).

5. Fii honɗun lancanten, sunnen piiji karamoko ?

⁵ Fii yaltugol e diina fenaande hettoo, ko lancugol sunna kala piiji karamoko wano talki, baakaaji e piiji ko nanndi e mun. Ɗun no hitti ɓayri hino holli ko Yahuwah hoolorɗen.

6. Ko honɗun almasiiyaaɓen ɓen ka teeminande aranere waɗunoo defte maɓɓe mbilankaaku ?

⁶ Ndaaree ko almasiiyaaɓe goo ka teeminande aranere waɗunoo ko ɓe ƴetti ahadi jokkugol diina goonga. Deftere Allah nden wi’i : « Yimɓe buy waɗaynooɓe mbilankaaku, addi defte mun, ɓe sunni ɗe yeeso fow » (Kuuɗe sahaabaaɓe ɓen 19:19).

7. Ko honɗun waɗeten si jinnaaji ɗin lorrii en ?

⁷ Woɓɓe fuɗɗiiɓe rewude Yahuwah ɓen, waɗaynooɓe ndureyaagal, ɲanneyaagal maa mbileyaagal, jinnaaji ɗin lorray ɓe. Si ɗun heɓii on, noddee innde Yahuwah nden, toroɗon mo. O wallay on (Tindi 18:10, TMN ; Yaaquuba 4:7).

8. Honno almasiiyaaɓe ɓen yiiri sanamuuji e mbodooji ko diina fenaande woni e huutorde ?

⁸ Faalaaɓe rewude Yahuwah ɓen haanaa marude maa huutorde sanamuuji maa mbodooji ko diina fenaande huutorta. Almasiiyaaɓe goongaaɓe ɓen ko « gomɗinal ngal woni e ardaade, hinaa giiɗe ɗen ». (2 Korenti 5:7.) Hiɓe teddini sariya Allah haɗuɗo on huutorgol sanamu fii rewugol mo (Eggudu ndun 20:4, 5).

9. Ko honɗun Deftere Allah nden waajii fii wonugol mokobaa ?

⁹ Deftere Allah nden wi’i : « Mo yaadii e mokobaaɓe o wonay mokobaa » (Tindi 13:20, TMN). Si hiɗen faalaa wonude mokobaaɓe, hiɗen haani yaadude maa jokkondirde e Seedeeɓe Yahuwah ɓen. Ko kamɓe jokki laawol nawrayngol ngol e ngurndan poomayankejan (Matta 7:14).

10. Honno Seedeeɓe Yahuwah ɓen wallirta on rewugol Allah ?

¹⁰ Seedeeɓe Yahuwah ɓen no hinnii fii yimɓe. Golle maɓɓe ɗen ko wallugol nunɗuɓe no ɓe faamira goonga Deftere Allah nden ko nawrata e ngurndan poomayankejan. Ɓe wallay on janngidon Deftere Allah nden hara on yoɓaali. Ɓe jaaboto ko lanndotoɗon kon e ɓe holla on honno huutortoɗon ko jannguɗon kon ka nder Deftere Allah e nder ngurndan mon ɗan (Yuuhanna 17:3).

11. Ko honno pottital almasiiyaaɓe ɓen wallirta on ?

¹¹ Ka pottital maɓɓe ka Fottirde, on ɓurtay janngude fii Yahuwah. On ɓurtay faaleede jokkugol diina goonga. Ɓe wallay on kadi no walliron woɓɓe goo no ɓe anndira goonga Deftere Allah nden (Yahuudiyankeeɓe 10:24, 25).

12. Ko honno toraare wallirta on fii rewugol Allah ?

¹² No ɓeydirton non janngugol fii faale Yahuwah on, on ɓurtay yiɗude piiji ko o waɗanta en kon e hoore giggol. On ɓurtay faaleede waɗugol ko weltinta mo  e selon ko welataa mo kon. Annditee hiɗon waawi ɓadaade Yahuwah, toroɗon mo fii waɗugol ko moƴƴi e selon waɗugol ko boni (1 Korenti 6:9, 10 ; Filipii 4:6).

13. Ko honno weltinirton ɓernde Yahuwah nden ?

¹³ No ɓeydirton non ganndal mon ngal, on faalete aadagol, wonton Seedeejo Yahuwah. Si on tawtii Seedeeɓe Yahuwah ɓen, on weltinay ɓernde Yahuwah nden (Tindi 27:11, TMN). On wonay hakkunde jamaa weltiiɗo ɓe Allah haali fii mun, o wi’i : « Mi hoɗay, mi jinda hakkunde maɓɓe, mi wona Alla maɓɓe, ɓe wona jamaa an » (2 Korenti 6:16).