Chucu siúd a bhfuil grá acu d’Iehova agus dá Bhriathar, an Bíobla:

Dúirt Íosa: “Beidh fios na fírinne agaibh, agus saorfaidh an fhírinne sibh.” (Eoin 8:32) Cuimhnigh ar an gcaoi ar mhothaigh tú nuair a fuair tú tuiscint ar fhírinne an Bhíobla! Bhí sé iontach fáil amach go bhféadfaí teacht ar an bhfírinne sa saol urchóideach seo.—2 Tiomóid 3:1.

Is mian le Dia go mbeadh a fhios againn an fhírinne. De bhrí go bhfuil grá againn do dhaoine, tá muid ag iarraidh an fhírinne a roinnt leosan freisin. Ach tá níos mó ná sin i gceist le bheith ag tabhairt seirbhís do Dhia. Caithfidh muid ár ndícheall a dhéanamh maireachtáil mar Chríostaithe mar tá ardmheas againn ar phrionsabail Iehova. Dúirt Íosa go bhfuil bealach ann a bhféadfadh muid a chruthú do Dhia go bhfuil grá againn dó. Dúirt sé: “Má choinníonn sibh m’aitheanta, fanfaidh sibh i mo ghrá, faoi mar a choinnigh mise aitheanta m’Athar, agus a fhanaim ina ghrá.”—Eoin 15:10.

Tá grá ag Íosa dá Athair, agus déanann sé gach a n-iarrann a Athair air. Má dhéanann muidne aithris ar Íosa, beidh grá ag Iehova dúinn agus beidh muid sona sásta. Mar a dúirt Íosa, “Má tá a fhios agaibh na nithe sin, is méanar daoibh má dhéanann sibh iad.”—Eoin 13:17.

Tá súil againn go gcabhróidh an foilseachán seo leat foghlaim le maireachtáil de réir fhírinne an Bhíobla agus a bheith i do chara ag Dia. Guíonn muid go méadóidh do ghrá do Dhia agus go gcumhdóidh tú thú féin ‘i ngrá Dé . . . agus súil agat . . . chun na beatha síoraí.’—Iúd 21.