1, 2. Céard atá Iehova ag iarraidh do theaghlaigh?

IS É IEHOVA a bhunaigh an chéad phósadh. Deir an Bíobla gur chruthaigh sé an chéad bhean “agus thug chun an duine í.” Bhí Ádhamh chomh lúcháireach sin go ndúirt sé: “Is cnámh de mo chnámha-sa í seo ar deireadh, Agus is feoil de m’fheoil-se í.” (Geineasas 2:22, 23) Léiríonn sé seo dúinn go bhfuil Iehova ag iarraidh ar lánúineacha pósta a bheith sona sásta.

² Faraor, tá go leor daoine nach raibh saol sona teaghlaigh acu riamh. Tá a lán prionsabail sa mBíobla, áfach, a spreagfaidh gach duine sa gclann le cur le sonas an teaghlaigh.—Lúcás 11:28.

3, 4. (a) Cén chaoi ar cheart d’fhear caitheamh lena bhean chéile? (b) Cén fáth a bhfuil sé tábhachtach go dtabharfadh lánúin phósta maithiúnas dá chéile?

³ Deir an Bíobla gur chóir d’fhear céile grá agus meas a bheith aige dá bhean. Léigh Eifisigh 5:25-29 le do thoil. Tá sé de dhualgas ar fhear céile caitheamh go maith lena bhean i gcónaí. Cosnóidh sé í freisin, agus tabharfaidh sé aire di, agus ní dhéanfaidh sé aon rud a dhéanfadh dochar di.

⁴ Céard is ceart d’fhear céile a dhéanamh nuair a dhéanann a bhean botúin? Is í an chomhairle a thugann an Bíobla: “Bíodh grá agaibh do bhur mná agus gan bheith garg leo.” (Colosaigh 3:19) A fhir chéile,  cuimhnigh go ndéanann tusa botúin chomh maith. Má tá tú ag iarraidh maithiúnas ar Dhia, caithfidh tú féin maithiúnas a thabhairt do do bhean. (Matha 6:12, 14, 15) Nuair atá fear agus bean chéile sásta maithiúnas a thabhairt dá chéile, cabhraíonn sé leo pósadh sona a bheith acu.

5. Cén fáth ar cheart d’fhear onóir a thabhairt dá bhean?

⁵ Tá Iehova ag iarraidh go dtabharfaidh fear onóir dá bhean chéile. Ní mór d’fhear fios a bheith aige ar riachtanais a mhná. Is rud an-thromchúiseach é seo. Mura gcaitheann fear go maith lena bhean, ní éistfidh Iehova lena chuid paidreacha. (1 Peadar 3:7) Is de réir a ndílseacht a thugann Iehova breith ar dhaoine. Is cuma fir nó mná iad, tá siad chomh luachmhar céanna i súile Dé.

6. Céard a chiallaíonn sé go mbeadh lánúin phósta mar “aon cholainn amháin”?

⁶ Dúirt Íosa faoi lánúin phósta: “Ní beirt iad feasta ach aon cholainn amháin.” (Matha 19:6) Bíonn siad dílis dá chéile i gcónaí. (Seanfhocail 5:15-21; Eabhraigh 13:4) Ba chóir do lánúin phósta a bheith neamhleithleach ina gcaidreamh collaí. (1 Corantaigh 7:3-5) Ba chóir d’fhear céile cuimhneamh nach “raibh aon duine riamh a thug fuath dá cholainn féin; is amhlaidh a dhéanann sé í a chothú agus a chumhdach.” Mar sin, ba chóir dó grá a bheith aige dá bhean. Thar aon ní eile, tá bean chéile ag iarraidh go mbeadh a fear cineálta agus grámhar léi.—Eifisigh 5:29.

7. Cén fáth a dteastaíonn ceann teaghlaigh?

⁷ Teastaíonn ceann teaghlaigh i ngach clann, duine a threoróidh iad, chun go n-oibreoidh siad go maith le chéile. Deir an Bíobla i 1 Corantaigh 11:3: “Ba mhaith  liom go dtuigfeadh sibh, áfach, go bhfuil Críost ina cheann ar gach fear, go bhfuil an fear ina cheann ar a bhean agus go bhfuil Dia ina cheann ar Chríost.”

8. Cén chaoi ar féidir le bean meas a thaispeáint dá fear céile?

⁸ Déanann gach fear céile botúin. Ach nuair a thacaíonn bean chéile le cinntí a fir, téann sé chun tairbhe don chlann go léir. (1 Peadar 3:1-6) Deir an Bíobla: “Tugadh an bhean ómós dá fear.” (Eifisigh 5:33) Céard faoin mbean nach bhfuil an creideamh céanna ag a fear is atá aici féin? Fós féin, ní mór di ómós a thabhairt dó. Deir an Bíobla: “A mhná, bígí umhal do bhur bhfir chéile, i dtreo má tá cuid acu gan géilleadh don bhriathar, go ndéanfaí iad a ghnóthú gan bhriathar trí iompar a gcuid ban, nuair a gheobhaidh siad radharc ar bhur n-iompar urramach geanmnaí.” (1 Peadar 3:1, 2) Is minic a chothaíonn fear céile meas ar chreideamh a bhean de bharr a dea-iompar.

9. (a) Céard is ceart do bhean chéile a dhéanamh mura n-aontaíonn sí lena fear? (b) Cén chomhairle a thugann Títeas 2:4, 5 do mhná céile?

⁹ Céard is féidir le bean a dhéanamh mura  n-aontaíonn sí lena fear? Is cóir di a tuairimí a chur in iúl go hómósach. Mar shampla, dúirt Sárá rud éigin le hAbrahhám nár thaitin leis, ach dúirt Iehova leis cluas éisteachta a thabhairt di. (Geineasas 21:9-12) Is annamh a dhéanann fear céile Críostaí cinneadh a théann in aghaidh an Bhíobla, mar sin ba cheart dá bhean tacú leis. (Gníomhartha 5:29; Eifisigh 5:24) Tabharfaidh bean chéile mhaith aire don chlann. (Léigh Títeas 2:4, 5.) Nuair a fheicfidh a fear céile agus a páistí an obair chrua a dhéanann sí, méadóidh a ngrá di.—Seanfhocail 31:10, 28.

10. Céard atá ráite sa mBíobla faoi scaradh agus faoi cholscaradh?

¹⁰ Uaireanta déanann lánúineacha pósta cinneadh scaradh óna chéile nó colscaradh a fháil. Ach deir an Bíobla “ná tréigeadh bean a fear céile,” agus “ná scaoileadh fear a bhean chéile uaidh.” (1 Corantaigh 7:10, 11) Bíonn cúinsí as an ngnáth ann a chuireann ar lánúin scaradh óna chéile, ach is cinneadh tromchúiseach é seo. Céard faoi cholscaradh? Tá sé ráite sa mBíobla nach bhfuil colscaradh ceadmhach ach i gcás amháin, sé sin má bhíonn caidreamh gnéis taobh amuigh den phósadh ag an bhfear nó ag an mbean chéile.—Matha 19:9.

11. Céard é an rud is mó a theastaíonn uaidh pháistí?

¹¹ A Thuismitheoirí, caith an oiread ama agus is féidir libh le bhur bpáistí. Tá gá acu le bhur n-aird, agus thar aon ní eile, tá gá acu go múinfeadh sibh dóibh faoi Iehova.—Deotranaimí 6:4-9.

12. Céard is cheart do thuismitheoirí a dhéanamh chun a bpáistí a chosaint?

¹² Tá domhan Shátain ag dul in olcas, agus tá daoine ann ar mhaith leo dochar a dhéanamh do bhur bpáistí, fiú ionsaí gnéasach a dhéanamh orthu. Bíonn sé deacair  ag go leor tuismitheoirí labhairt faoin ábhar seo. Ach ba cheart páistí a chur ar an airdeall faoi dhaoine mar seo, agus iad a chur ar an eolas faoin mbealach is fearr leis na daoine seo a sheachaint. A thuismitheoirí, caithfidh sibh bhur bpáistí a chosaint. *—1 Peadar 5:8.

13. Cén chaoi ar chóir do thuismitheoirí a bpáistí a mhúineadh?

¹³ Is ar thuismitheoirí atá an fhreagracht smacht a chur ar a gcuid páistí. Teastaíonn traenáil uathu, ach ní ceart iad a cheartú go dian ná go cruálach riamh. (Irimia 30:11) Mar sin ná smachtaigh do chuid páistí nuair atá  fearg ort. Níl tú ag iarraidh go mbeadh do chuid focail ar nós “sá claímh” ag gortú do chuid páistí. (Seanfhocail 12:18) Tabhair tuiscint do do pháistí ar an gcúis ar cheart dóibh a bheith umhal.—Eifisigh 6:4; Eabhraigh 12:9-11; féach Aguisín 30.

14, 15. Cén fáth ar cheart do pháistí a bheith umhal dá dtuismitheoirí?

¹⁴ Bhí Íosa umhal dá Athair i gcónaí, fiú nuair nach raibh sé éasca. (Lúcás 22:42; Eoin 8:28, 29) Tá Iehova ag iarraidh go mbeidh páistí umhal dá dtuismitheoirí.—Eifisigh 6:1-3.

¹⁵ A Pháistí, fiú má cheapann tú go bhfuil sé deacair a bheith umhal do do thuismitheoirí, bíodh a fhios agat go mbíonn Iehova agus do thuismitheoirí sásta leat, nuair a bhíonn tú umhal. *—Seanfhocail 1:8; 6:20; 23:22-25.

16. (a) Cén chaoi a gcuireann Sátan cathú ar dhaoine óga drochrudaí a dhéanamh? (b) Cén fáth a bhfuil sé tábhachtach cairde a bhfuil grá acu d’Iehova a roghnú?

¹⁶ Is féidir leis an Diabhal tionchar a imirt ar do chuid cairde, chun cathú a chuir ort an rud mícheart a dhéanamh. Tá a fhios aige go bhfuil sé an-deacair seasamh in aghaidh an bhrú seo. Mar shampla, bhí cairde nár ghráigh Iehova ag Díneá, iníon Iacóib. Tharraing sé seo go leor trioblóide uirthi féin agus ar a clann. (Geineasas 34:1, 2) Mura bhfuil grá ag do chairde d’Iehova, b’fhéidir go gcuirfidís cathú ort rud éigin a dhéanamh nach mbeadh Iehova sásta leis. D’fhéadfadh sé seo a bheith ina ábhar dóláis duit féin, do do chlann, agus do  Dhia. (Seanfhocail 17:21, 25) Sin é an fáth a bhfuil sé an-tábhachtach cairde a bheith agat a bhfuil grá acu d’Iehova.—1 Corantaigh 15:33.

17. Cén freagracht atá ar gach duine sa gclann?

¹⁷ Nuair a leanann gach duine sa gclann comhairle Dé, seachnaíonn siad go leor fadhbanna. Mar sin, más fear céile tú, bíodh grá agat do do bhean agus caith go grámhar léi. Más bean chéile tú, bíodh ómós agat do d’fhear céile agus lean dea-shampla na mná céile a bhfuil cur síos uirthi i Seanfhocail 31:10-31. Más tuismitheoir tú, múin do do pháistí le grá a bheith acu do Dhia. (Seanfhocail 22:6) Más athair tú, ‘bí i do cheann maith ar do theaghlach féin.’ (1 Tiomóid 3:4, 5; 5:8) A pháistí, bígí umhal do bhur dtuismitheoirí. (Colosaigh 3:20) Cuimhnigh go ndéanann gach duine sa gclann botúin, mar sin bí uiríseal agus iarr maithiúnas ar a chéile.