CUID 5
Ag Coinneáil na Síochána Le Do Ghaolta
“Cuirigí oraibh mar sin . . . trócaire, cineáltas, ceansacht, agus foighne.”—Colosaigh 3:12, Tiomna Nua le Cosslett Ó Cuinn
Nuair a phósann fear agus bean bunaítear teaghlach nua. Cé go mbeidh grá agus ómós go deo agat do do thuismitheoirí, is é/í do chéile an té is tábhachtaí ar domhan duitse anois. D’fhéadfadh sé go mbeadh sé deacair ag cuid de do ghaolta glacadh leis seo. Ach is féidir le prionsabail an Bhíobla cabhrú leat an tsíocháin a choinneáil le do ghaolta, agus tú ag obair go crua chun do theaghlach nua féin a neartú.
1 COTHAIGH DEARCADH CEART I LEITH DO GHAOLTA
AN MÉID ATÁ RÁITE SA BHÍOBLA: “Tabhair onóir do d’athair agus do do mháthair” (Eifisigh 6:2, Tiomna Nua le Cosslett Ó Cuinn) Is cuma cén aois thú, caithfidh tú onóir agus ómós a bheith agat do do thuismitheoirí. Tuig freisin go gcaithfidh do chéile, mar mhac nó iníon, am a thabhairt dá thuismitheoirí nó dá tuismitheoirí. “Ní bhíonn an grá éadmhar,” mar sin ná cuirfeadh an caidreamh atá ag do chéile leo isteach ort.—1 Corantaigh 13:4, Tiomna Nua le Cosslett Ó Cuinn; Galataigh 5:26.
AN RUD IS FÉIDIR LEAT A DHÉANAMH:
-
Ná bí ag rá rudaí áiféiseacha ar nós “Bíonn do chlann de shíor do mo cháineadh” nó “ní bhíonn aon mheas ag do mháthair riamh ar an rud a dhéanaim”
-
Déan iarracht breathnú ar rudaí ó thaobh do chéile de
2 BÍ DIONGBHÁILTE NUAIR IS GÁ
AN MÉID ATÁ RÁITE SA BHÍOBLA: “Uime sin, fágann an fear a athair agus a mháthair agus cloíonn sé lena bhean, agus déanann aon fheoil amháin díobh.” (Geineasas 2:24) Cé go bhfuil tú pósta, b’fhéidir go n-airíonn do thuismitheoirí go bhfuil siad freagrach asat i gcónaí agus go bhfuil siad ag iarraidh níos mó bainte a bheith acu le do phósadh ná mar ba cheart dóibh.
Tá sé suas duitse agus do do chéile aontú ar na teorainneacha a leagfaidh sibh síos dóibh. Is féidir leat labhairt leo go hoscailte agus go díreach gan a bheith mímhúinte. (Seanfhocail 15:1) Cabhróidh uirísle, láíocht agus foighne libh caidreamh grámhar a chothú le bhur ngaolta agus a bheith “carthanach le chéile.”—Eifisigh 4:2.
AN RUD IS FÉIDIR LEAT A DHÉANAMH:
-
Má cheapann tú go bhfuil do ghaolta ag cur a ladar i do ghnóthaí, roghnaigh am caoithiúil chun é a phlé le do chéile
-
Tagaigí ar chomhaontú maidir leis an gcaoi a réiteoidh sibh na fadhbanna seo
